ကျောက်ကြီးမှာ စစ်တပ်ဂိတ်စခန်းတိုက်ခိုက်ခံရလို့ အရာရှိအပါ ၅ ဦးသေဆုံး

■ ခမရ ၅၈၁ ကတပ်သား လက်နက်ချအလင်းဝင်

မြေလတ်အသံ၊ ဧပြီ ၂၊ ၂၀၂၆။

ကရင်အမျိုးသားအစည်းအရုံး – KNU၊ ကော်သူးလေ၊ ခလယ်လွီထူခရိုင်၊ လယ်ဒိုမြို့နယ် (ကျောက်ကြီး) ရှိ စစ်ကော်မရှင်ရဲ့ဂိတ်စခန်းကိုတိုက်ခိုက်ပြီး လက်နက်ခဲယမ်းတွေသိမ်းဆည်းခဲ့တယ်လို့ KNU က ဧပြီ ၁ ရက်မှာ ထုတ်ပြန်ထားပါတယ်။

သာယာကုန်းနဲ့ ခြံကြီးကြားမီးရထားလမ်း (၁၄၆) တံတားမှာ အခြေချထားတဲ့ဂိတ်စခန်းကို မတ်လ ၃၁ ရက်ည ၁၀ နာရီခွဲမှာ ကရင်အမျိုးသားလွတ်မြောက်ရေးတပ်မတော် (KNLA) တပ်ရင်း ၉၊ တပ်ခွဲ ၃ က ဦးဆောင်ကာ ပူးပေါင်းစစ်ကြောင်းနဲ့အတူ ဝင်ရောက်တိုက်ခိုက်ခဲ့တာလို့ ဆိုပါတယ်။

တိုက်ပွဲအတွင်း အရာရှိ ၁ ဦးအပါအဝင် စစ်ကော်မရှင်တပ်ဖွဲ့ဝင် ၅ ဦးသေဆုံးပြီး လက်နက်ငယ် ၆ လက်၊ ကျည်မျိုးစုံ ၂၃၀ တောင့်ကိုသိမ်းဆည်းကာ စခန်းတဲ ၃ လုံးကိုလည်းဖျက်ဆီးနိုင်ခဲ့တယ်လို့ ထုတ်ပြန်ချက်မှာ ဖော်ပြပါတယ်။

တဖက်မှာလည်း လယ်ဒိုမြို့နယ် (ကျောက်ကြီး) အခြေစိုက် ခမရ ၅၈၁ က စစ်ကော်မရှင်တပ်ဖွဲ့ဝင် ၁ ဦး လက်နက်နဲ့အတူ KNLA တပ်ရင်း ၉ ဆီ အလင်းဝင်လာတယ်လို့ KNU ဗဟိုက ထုတ်ပြန်ထားပါတယ်။

စစ်မှုထမ်းအတွက်ဖမ်းဆီးခံရာက စစ်ကော်မရှင်တပ်ဖွဲ့ဝင်ဖြစ်လာတဲ့ အသက် ၂၄ နှစ်အရွယ် တပ်သား မောင်ကျော်စိုးလွင်ဟာ မူးမြို့နယ်၊ တောင်စုရွာမှာအထိုင်ချစဥ် လက်နက်ချအလင်းဝင်လာခဲ့တာလို့ ဆိုထားပါတယ်။

သူနဲ့အတူ K3 ၁ လက်၊ ကျည်ဘောက် ၄ ခု၊ ကျည်တောင့် ၁၀၀ ပါလာတဲ့အတွက် လယ်ဒိုမြို့နယ်တာဝန်ရှိ ခေါင်းဆောင်တွေက ငွေကျပ် ၁၀ သိန်းကျပ်ထောက်ပံ့ထားတယ်လို့လည်း ထုတ်ပြန်ချက်မှာ ဖော်ပြထားပါတယ်။

ခလယ်လွီခရိုင် (ညောင်လေးပင်) အတွင်း စစ်ကော်မရှင်ရဲ့ လေကြောင်းတိုက်ခိုက်မှုနဲ့ စစ်ကြောင်း ထိုးသတ်ဖြတ်မှု တွေလည်းလုပ်ဆောင်နေပြီး ပြီးခဲ့တဲ့ မတ်လပထမပတ်အတွင်းမှာလည်း လယ်ဒို(ကျောက်ကြီး) မြို့နယ်မှာ စစ်ကော်မရှင်တပ်တွေရဲ့လက်ချက်နဲ့ ကလေးငယ်တွေနဲ့ သက်ကြီးပိုင်းတွေအပါ ဒေသခံ ၃၀ ကျော်သေဆုံးခဲ့ပါသေးတယ်။