ရွှေကျင်

ပဲခူး၊ ဇန်နဝါရီ ၃၁၊ ၂၀၂၅။

ပဲခူးတိုင်း၊ ရွှေကျင်မြို့နယ်၊ သေခိုဆယ်ကျေးရွာကို စစ်ကောင်စီက ဇန်နဝါရီ ၃၁ ရက်နေ့လယ် ၁၂ နာရီကျော်မှာလေကြောင်းကနေ ဗုံးကြဲတိုက်ခိုက်ခဲ့တယ်လို့ ဒေသခံတွေကပြောပါတယ်။

ဗုံးကြဲခံရတာကြောင့် သေခိုဆယ်ကျေးရွာက အသက် ၇၀ ကျော်အရွယ် ဦးထိုကော့ အပါအဝင် မိသားစု ၄ ဦး ထိခိုက်ဒဏ်ရာရရှိခဲ့တယ်လို့ ဆိုပါတယ်။

“ရွာထဲကို ဗုံး ၅ လုံးလာကြဲသွားတယ်တဲ့။ အဲ့မှာ ၁ အိမ်လုံး ၁ မိသားစုထိသွားတယ်။ အဲ့မှာအသက်ကြီးတဲ့ အမရဲ့ ဦးလေးလည်း ဒဏ်ရာတော်တော်ပြင်းတယ်။ အခြေအနေအသေး စိတ်ကိုတော့ မသိရသေးဘူး”လို့ ဒဏ်ရာရသူတွေရဲ့မိသားစုဝင် အမျိုးသမီးတဦးက ပြောပါတယ်။

သေခိုဆယ်ကျေးရွာဟာ ကရင်အမျိုးသားအစည်းအရုံး – KNU တပ်မဟာ ၃ ထဲမှာရှိပြီး ကျေးရွာအနီး ဝန်းကျင်တွေမှာ တိုက်ပွဲဖြစ်တာတွေမရှိပေမယ့် ရွှေကျင်မြို့နယ်အတွင်းဖြစ်နေတဲ့တိုက်ပွဲတွေမှာ စစ်ကောင်စီဘက်ကကျဆုံးမှုတွေရှိတဲ့အတွက် ခုလိုပစ်ခတ်တာဖြစ်နိုင်တယ်လို့ အထက်ပါ အမျိုးသမီးက ပြောပါတယ်။

“တိုက်ပွဲတွေက ရွှေကျင်၊ ပုဇွန်မြောင်းဘက်မှာ ဖြစ်တယ်။ အဲ့ရွာ (သေခိုဆယ်) ဘက်မှာက ဘာတိုက်ပွဲမှ မဖြစ်ဘူး။ အဲ့ရွာက မြို့နဲ့လည်းတော်တော် လှမ်းတယ်။ ရွှေကျင်၊ ပုဇွန်မြောင်းဘက်တိုက်ပွဲတွေမှာ စကစဘက်က အကျအရှုံးများတယ်။ ဒါကြောင့်မို့ ရှုံးမဲမဲပြီးတော့ အဲဒီဒေသဘက်ရွာတွေကို ဗုံးလိုက်ကြဲနေတာ”လို့ သူကပြောပါတယ်။

ဒဏ်ရာရသူတွေရဲ့နောက်ဆက်တွဲအခြေအနေတွေနဲ့ ထိခိုက်ပျက်စီးမှုအခြေအနေတွေကိုတော့ မြေလတ်အသံက ဆက်လက်စုံစမ်းနေပါတယ်။

၂၀၂၁ ခုနှစ်၊ စစ်အာဏာသိမ်းချိန်ကနေ ၂၀၂၅ ဇန်နဝါရီ ၃၀ ရက်အထိ စစ်ကောင်စီနဲ့ ၎င်းရဲ့ လက်ပါးစေတွေကြောင့် သေဆုံးသူစုစုပေါင်း ၆,၂၃၁ ဦးရှိခဲ့တယ်လို့ နိုင်ငံရေးအကျဥ်းသားများ ကူညီစောင့်ရှောက်ရေးအသင်း – AAPP ကထုတ်ပြန်ထားပါတယ်။

စာတည်း – လင်း

ပဲခူး၊ ဇန်နဝါရီ ၂၉၊ ၂၀၂၅။

ပဲခူးတိုင်း၊ ရွှေကျင်နဲ့ညောင်လေးပင်မြို့နယ်တွေမှာ စစ်ကောင်စီတပ်ဖွဲ့ဝင်တွေဘက်က လေကြောင်းကနေ ဗုံးကြဲချတိုက်ခိုက်တာနဲ့ လက်နက်ကြီးပစ်ခတ်တိုက်ခိုက်တာတွေကြောင့် အမျိုးသမီး တဦးသေဆုံးပြီး ဘုန်းကြီးကျောင်းနဲ့နေအိမ်တွေ ပျက်စီးသွားတယ်လို့ ရွှေကျင်မြို့နယ်ပအဖ တာဝန်ရှိသူကပြောပါတယ်။

ဇန်နဝါရီ ၂၇ ရက်နေ့မနက် ၁၁ နာရီ မိနစ် ၄၀ ခန့်မှာ ရွှေကျင်မြို့နယ်၊ ညောင်ပင်ကြီးကျေးရွာကို စစ်ကောင်စီဘက်က ဂျက်တိုက်လေယာဥ် ၁ စီးနဲ့ ဗုံး ၂ လုံးကြဲချတိုက်ခိုက်ခဲ့သလို ပိန်းဇလုပ်အခြေစိုက် ခလရ ၂၆၄ တပ်နဲ့ ရေကြည်ချောင်းကျေးရွာမှာတပ်စွဲထားတဲ့ စစ်ကောင်စီတပ်ဖွဲ့ဝင်တွေကလည်း လက်နက်ကြီးတွေနဲ့ပစ်ခတ်ခဲ့တာကြောင့် အေးမြအောင်ဘုန်းကြီးကျောင်း၊ ကျောင်းသစ်ဘုန်းကြီးကျောင်း ၂ ကျောင်းနဲ့ နေအိမ် ၂ လုံးပျက်စီးခဲ့ပါတယ်။

ဇန်နဝါရီ ၂၈ ရက်နေ့ မနက် ၂ နာရီခန့်မှာလည်း ညောင်ပင်ကြီးကျေးရွာ ကျောင်းသစ်ဘုန်းကြီးကျောင်းဝင်းထဲကို စစ်ကောင်စီတပ်ဖွဲ့ဝင်တွေဘက်က ဂျက်တိုက်လေယာဥ် ၁ စီးနဲ့ ပေါင် ၅၀၀ ဗုံး ၂ လုံးထပ်မံကြဲချတိုက်ခိုက်ခဲ့ပြီး ကျောင်းဝင်းအတွင်း ကျန်ရှိအဆောက်အဦတွေနဲ့ ကျောင်းအနီး နေအိမ် ၁ လုံးထပ်မံပျက်စီးခဲ့ပါသေးတယ်။

ညောင်လေးပင်မြို့နယ်၊ ပျဉ်ရေကြီးကျေးရွာကိုလည်း ဇန်နဝါရီ ၂၈ ရက်နေ့ နေ့လည် ၁၂ နာရီ ၃၀ ခန့်မှာ စစ်ကောင်စီတပ်ဖွဲ့ဝင်တွေဘက်က ဒရုန်းနဲ့ ဗုံးသီး ၆ လုံးကြဲချတိုက်ခိုက်ခဲ့တာကြောင့် ရွာထဲက ဘုန်းကြီးကျောင်းပေါ်ကိုကျရောက်ပေါက်ကွဲခဲ့ကာ ကျောင်းဆောင် ၄ ဆောင် ပျက်စီးခဲ့သလို ဘုန်းကြီးကျောင်းနံဘေးမှာ နေထိုင်တဲ့ အသက် ၆၉ နှစ်အရွယ်ဒေါ်စန်းမြင့် နံကြားအောက် ဗုံးစမှန်ဒဏ်ရာရပြီးနေရာမှာတင်သေဆုံးခဲ့တယ်လို့ သိရပါတယ်။

စစ်ကောင်စီတပ်ဖွဲ့ဝင်တွေဟာ စစ်ရှုံးလာချိန်တွေမှာ ဘုန်းကြီးကျောင်းတွေအတွင်း PDF တွေခိုအောင်းနေတယ်ဆိုတဲ့ သတင်းကိုလွှင့်ပြီးမှ ဘာသာရေးအဆောက်အဦတွေကို တိုက်ခိုက်တာဟာ စစ်ရာဇဝတ်မှုတွေ ပေါ်ပေါ်တင်တင်ကျူးလွန်နေတာဖြစ်တယ်လို့ ဆိုပါတယ်။

“၂၅ ၊ ၂၆ လောက်တုန်းက သူတို့ကင်းပုန်းဝပ်နေတဲ့ ပုဇွန်မြောင်းကျေးရွာဘုန်းကြီးကျောင်းကို PDF ပူးပေါင်းတပ်တွေက ဝင်ရောက်တိုက်ခိုက်တဲ့အခါမှာ သူတို့ဘက်က အင်အား ၂၀ ကျော်ကျဆုံးသွားပြီးတော့ လက်နက်တွေလည်း ဆုံးရှုံးသွားတဲ့အခါမှာ စစ်တောင်းမြစ်ဝှမ်းမှာရှိတဲ့ တော်လှန်ရေးအင်အားစုတွေ ထိန်းချုပ်ထားတဲ့နယ်မြေထဲကို လေကြောင်းကတိုက်ခိုက်တာ၊ ဒရုန်းနဲ့ဗုံးကြဲတာပါ။ သူတို့ထိခိုက်နစ်နာပါတယ်လို့ စစ်ရှုံးလာတဲ့အခါတိုင်းမှာ ပြည်သူတွေကို ကျုးလွန်တိုက်ခိုက်တာပါ။”လို့ ရွှေကျင်မြို့နယ် ပအဖ တာဝန်ခံကပြောပါတယ်။

စစ်ကောင်စီတပ်ဖွဲ့ဝင်တွေဘက်က လေယာဥ်နဲ့ဗုံးကြဲတာ၊ လက်နက်ကြီးပစ်ခတ်တာနဲ့ ဒရုန်းနဲ့ဗုံးသီးချတာတွေကြောင့် ပျဉ်ရေကြီး၊ ညောင်ပင်ကြီး၊ ကုန်းတလကြီးကျေးရွာတွေအပါအဝင် ကျေးရွာ ၅ ရွာခန့်က သက်ကြီးရွယ်အို၊ ကလေးသူငယ်တွေနဲ့ လူဦးရေ ၅၀၀ ကျော်ခန့်ဟာ ဘေးလွတ်ရာကျေးရွာတွေကို ကြိုတင်ရွေ့ပြောင်းနေထိုင်နေကြပြီး ကျေးရွာကနေ မပြောင်းရွှေ့ဘဲ အခြေအနေစောင့်ကြည့်နေကြသူတချို့လည်း ရှိနေတယ်လို့ သိရပါတယ်။

ဇန်နဝါရီ ၂၇ ရက်နေ့ညပိုင်းကလည်း ကျောက်တံခါးမြို့နယ်၊ နတ်တလင်းကျေးရွာမှာ စစ်ကောင်စီတပ်ဖွဲ့ဝင်တွေဘက်က ပစ်ခတ်တဲ့ လက်နက်ကြီးကျရောက်ပေါက်ကွဲပြီး အမျိုးသမီး ၁ ဦးသေဆုံးကာ ကလေး ၁ ဦးဒဏ်ရာရခဲ့သေးတယ်လို့ သိရပါတယ်။

စာတည်း – ကိုချမ်း

ရွှေကျင်၊ မတ် ၁၃၊ ၂၀၂၃။

ပဲခူးတိုင်း၊ ရွှေကျင်မြို့နယ်၊ ညောင်ခြေထောက်ကျေးရွာ ချောင်းလှေဆိပ်မှာ ဆက်ကြေးကောက်နေတဲ့ စစ်ကောင်စီတပ်ဖွဲ့ဝင် တပ်ကြပ်ကြီးတဦး သေနတ်နဲ့ ပစ်သတ်ခံခဲ့ရပါတယ်။

မတ်လ ၁၂ ရက်နေ့လည် ၁၂ နာရီခန့်မှာ ခမရ ၅၉၈ မှ အသက် ၅၀ နှစ်အရွယ် တပ်ကြပ်ကြီး ဦးငပေါက် ဆိုသူကို ဆပ်ကြေးကောက်တဲ့နေရာမှာ အလစ်ဝင်ရောက်ပြီး ပစ်ခတ်ရှင်းလင်းခဲ့တာလို့ Soul Takers – Yangon Underground Force မှ ပြန်ကြားရေးတာဝန်ရှိသူက ပြောပါတယ်။

“ကျနော်တို့ဘက်က ပစ်ခတ်ချိန်မှာ သူတဦးတည်းကို တွေ့ရတယ်။ သူက လှေတွေဆီကနေ မိုက်ကြေးခွဲ ဆက်ကြေးကောက်နေကြပါ။ အဲ့လှေဆိပ်မှာက သူ့ကိုလူတိုင်းသိကြတယ်။ ကျနော်တို့ဘက်က အလစ်တိုက် အမြန်ပြန်ထွက်လုပ်ရတာ ဖြစ်တယ်။ သူဘက်က ခုခံချိန်မရလိုက်ဘူး” လို့ ပြောပါတယ်။

အဲ့ဒီတပ်ကြပ်ကြီးဟာ အများအားဖြင့် သူ့ရဲ့အဖွဲ့တွေနဲ့ ဆက်ကြေးကောက်လေ့ရှိပြီး၊ ပစ်ခတ်ခံရချိန်မှာတော့ တဦးတည်း ရှိနေတာလို့လည်း ဆိုပါတယ်။

ခုလိုပစ်ခတ်မှုကြောင့် နေရာတင် ပွဲချင်းပြီး သေဆုံးခဲ့ပြီး၊ သူ့ဆီကနေ သေနတ်တလက်၊ ကျည်ဘောက် ၂ ခု၊ ကျည်ဆံ ၅၄ တောင့်ကို သိမ်းဆည်းရခဲ့တယ်လို့ အထက်ပါပြန်ကြားရေး တာဝန်ခံက ပြောပါတယ်။

ဒါ့အပြင် ပစ်ခတ်ခံရပြီးနောက် အဲ့ဒီနေရာကို စစ်ကောင်စီအဖွဲ့တွေ ရောက်လာပြီး လှေဆိပ်အနီး ပိတ်ဆို့ရှာဖွေတာတွေ လုပ်ခဲ့သေးတယ်လို့ သိရပါတယ်။

ပြီးခဲ့တဲ့ ဖေဖော်ဝါရီလ ၁၆ ရက်ကလည်း ရွှေကျင်မြို့နယ်၊ ရေအေးမြောင်ကျေးရွာက စစ်ကောင်စီခန့် အုပ်ချုပ်ရေးမှူး အောင်ဆန်းလင်း ဆိုသူကို ဒေသခံကာကွယ်ရေးတပ်တွေက သေနတ်နဲ့ ပစ်ခတ်ရှင်းလင်းခဲ့ပါသေးတယ်။

စာတည်း – လင်း