မြေလတ်အသံ၊ သြဂုတ် ၃၀၊ ၂၀၂၅။

စစ်ကိုင်းတိုင်း၊ ယင်းမာပင်ခရိုင်ပြည်သူ့ကာကွယ်ရေးတပ်-PDF တပ်ရင်း ၁၄ တပ်ရင်းမှူး ကိုဇေယျာဌေး ဖမ်းဆီးစစ်ဆေးခံနေရတယ်လို့ တပ်ရင်း ၁၄ နဲ့ နီးစပ်သူတွေထံက သိရပါတ​ယ်။

ဇူလိုင်လဆန်းပိုင်းက ယင်းမာပင်ခရိုင်တပ်ရင်း ၁၄-၁၅ တပ်ဖွဲ့ဝင်တချို့ မူးယစ်ဆေးဝါးတွေနဲ့အတူ ချင်းပြည်နယ်၊ ဟားခါးမြို့အတွင်းဖမ်းဆီးခံခဲ့ရတာနဲ့ပတ်သက်ပြီး အမျိုးသားညီညွတ်ရေးအစိုးရ-NUG ကာကွယ်ရေးဝန်ကြီးဌာနညွှန်ကြားချက်နဲ့ ခရိုင်ကွပ်ကဲရေးအဖွဲ့က သြဂုတ် ၂၆ ရက် ည ၇ နာရီကျော်မှာ ဖမ်းဆီးခဲ့တာလို့ ဆိုပါတယ်။

” တပ်ရင်း၁၄၊ ၁၅ ဆိုတာက တူတူပဲဗျ။ တပ်ရင်းမှူး(ဇေယျာဌေး)တဦးတည်း ကိုင်ထားတာ။ သူ့ကို MOD က ဖမ်းဝရမ်းထုတ်ထားတာကြာပါပြီ။ သူ့ကို စစ်ဆေးခံဖို့ ခဏခဏခေါ်တာရှိတယ်။ ဒါပေမယ့်သူက လာရောက်အစစ်ဆေးမခံလို့ ဖမ်းဆီးလိုက်ရတာ” လို့ ယင်းမာပင်ခရိုင်တပ်ရင်း ၁၄ နဲ့ နီးစပ်သူ တပ်ဖွဲ့ဝင်တဦးက မြေလတ်အသံကို ပြောပါတယ်။

လက်ရှိ တပ်ရင်းမှူးကို ယင်းမာပင်ခရိုင်ကွပ်ကဲရေးရုံးမှာ ဖမ်းဆီးထိန်းသိမ်းထားကာ စစ်ဆေးမှုတွေလုပ်ဆောင်နေပြီး စစ်ဆေးမှုအခြေအနေအသေးစိတ်တွေကို မသိရှိရသေးလို့ ခရိုင်ကွပ်ကဲရေးဘက်ကလည်း သတင်းထုတ်ပြန်လာတာမရှိသေးပါဘူး။

ပြီးခဲ့တဲ့ ဇူလိုင် ၈ ရက်က ယင်းမာပင်ခရိုင်တပ်ရင်း ၁၅ တပ်ရင်းမှူးထောက်ခံစာနဲ့ ဟိုင်းလပ်ကား ၂ စီး၊ တပ်ရင်း ၁၅ က တပ်ဖွဲ့ဝင် ၃ ဦး၊ ယာဥ်မောင်း ၂ ဦးလိုက်ပါကာသယ်ယူလာတဲ့ စိတ်ကြွဆေးပြား ၃ သန်းခန့်၊ ဘိန်းဖြူ ၁၁၀ ကီလိုဂရမ်ခန့်၊ သေနတ် ၂ လက်ကို Chinland Defense Force Hakha က ဟားခါးမြို့နယ်အတွင်း ဖမ်းဆီးရမိခဲ့ကြောင်း ရုပ်သံနဲ့တကွ ထုတ်ပြန်လာတာပါ။

ဖမ်းဆီးခံရစဥ်မှာ ယင်းမာပင်ခရိုင်တပ်ရင်း ၁၄-၁၅ တပ်ရင်းမှူးက တပ်ဖွဲ့မှာအသုံးပြုမယ့် လက်နက်နဲ့ ဖောက်ခွဲရေးပစ္စည်းတွေသယ်ယူဖို့ အတွက်သာ ထောက်ခံစာရေးသားပေးခဲ့တာဖြစ်ပြီး မူးယစ်ဆေးဝါးတွေသယ်ဆောင်လာတာဟာ ပုဂ္ဂလိကလုပ်ရပ်သာဖြစ်တယ်လို့ ဇူလိုင် ၈ ရက်ညနေပိုင်းမှာပဲ တပ်ရင်း ၁၅ က ထုတ်ပြန်လာပါတယ်။

ဖြစ်စဥ်နဲ့ပတ်သက်ပြီး တပ်ရင်း ၁၅ အနေနဲ့လည်း အပြည့်အဝတာဝန်ယူမှာဖြစ်သလို စုံစမ်းမှုတွေလုပ်ဆောင်နေကြောင်း၊ NUG အစိုးရရဲ့ စုံစမ်းစစ်ဆေးမှုတွေကိုလည်း ပူးပေါင်းဆောင်ရွက်မှာဖြစ်ကြောင်းဖော်ပြခဲ့တာပါ။

မူးယစ်ဆေးဝါးတွေကို သယ်ယူပို့ဆောင်မှုမှာ အဓိကတာဝန်ရှိသူတွေဟာ မောင်ဇော်လတ် (ခ) ဝင်းမော်ဦး၊ တပ်ရင်း ၁၄ တပ်ခွဲမှူး ကိုပုတီး (ခ) ကျော်မင်းဇော်တို့ ဖြစ်ပြီး ၎င်းတို့ ၂ ဦးမှာ ထွက်ပြေးတိမ်းရှောင်နေကြောင်း CDF ဟားခါးက ထုတ်ပြန်ခဲ့ကာ ဇူလိုင် ၁၂ ရက်မှာ ကိုပုတီးက မိခင်တပ်ရင်းထံ လာရောက် အဖမ်းခံခဲ့တယ်လို့ သိရပါတယ်။

စာတည်း – ဟိန်းစံ

မြေ​လတ်အသံ၊ သြဂုတ် ၈၊၂၀၂၅ ။

စစ်ကိုင်းတိုင်း၊ ယင်မာပင်မြို့နယ်မှာ စစ်ကောင်စီရဲ့ လေကြောင်းအန္တရာယ်ကြားက ၈ လေးလုံး အရေးတော်ပုံ ၃၇ နှစ် ပြည့်အခမ်းအနားကို အောင်မြင်စွာပြုလုပ်နိုင်ခဲ့တယ်လို့ ယင်းမာပင်မြို့နယ် သပိတ်အင်အားစုတွေက ပြောပါတယ်။

ဒီကနေ့ ဩဂုတ် ၈ ရက်ဟာ ၈ လေးလုံးအရေးတော်ပုံ ၃၇ နှစ်ပြည့်မြောက်ခဲ့တာဖြစ်ပြီး ယင်းမာပင်ကြားကာလစာသင်ကျောင်းတွေက ဆရာ၊ ဆရာမနဲ့ ကျောင်းသားတွေ၊ ဒေသခံပြည်သူတွေ၊ သပိတ်ကော်မတီဝင်တွေ ပူးပေါင်းခဲ့ကြတာလို့ဆိုပါတယ်။

” လေကြောင်းက ပါရာမော်တာ ၁ ကြိမ်၊ Mi 17 ၂ ကြိမ်ဝဲတယ်။ ဗုံးခိုကျင်းထဲ ဝင်ရတဲ့အထိပဲ။ အခမ်းအနားပြီးအောင်တော့ လုပ်​​ဆောင်နိုင်ခဲ့တယ်။”လို့ ယင်းမာပင်မြို့နယ်သပိတ်အင်အားစုကော်မတီဝင် CDM ဆရာမတဦးက မြေလတ်အသံကို ပြောပါတယ်။

အခမ်းအနားမှာ လူအများလေ့လာနိုင်စေဖို့ ၈ လေးလုံးအရေးအခင်း ဓာတ်ပုံမှတ်တမ်းတွေကိုပြသထားပြီး ထီး၊ရေအိုးတွေမှာ ၈၈၈၈ ရေးဆွဲဖော်ပြတာတွေ ပြုလုပ်ခဲ့ကြတယ်လို့ ဆိုပါတယ်။

၈ လေးလုံးအောက်မေ့ဖွယ်အခမ်းအနားကို အစီအစဥ် ၉ ခုနဲ့ ကျင်းပခဲ့ပြီး သပိတ်ကော်မတီဝင်တွေ ဆရာနဲ့ကျောင်းသားတွေက သပိတ်အကြောင်းဟောပြောတာ၊ ကဗျာရွတ်တာတွေ စတဲ့အစီအစဥ်တွေ ပါဝင်တယ်လို့ သိရပါတယ်။

၈၈၈၈ အရေးတော်ပုံ ၃၇ နှစ်ပြည့် အထိမ်းအမှတ်လူထုလှုပ်ရှားမှုတွေကို စစ်ကိုင်းတိုင်းအတွင်းက မုံရွာ၊ယင်းမာပင်၊ ဆားလင်းကြိီး၊ ဝက်လက်၊ စစ်ကိုင်းနယ်တွေအပြင် အခြားမြို့နယ်များမှာလည်း ပြုလုပ်ခဲ့ကြတယ်လို့ သိရပါတယ်။

သိုက်ထွန်း

မြေလတ်အသံ၊ ဇူလိုင် ၄၊ ၂၀၂၅။

စစ်ကိုင်းတိုင်း၊ ယင်းမာပင်မြို့နယ်အတွင်းရှိ သပိတ်အင်အားစုတွေက စစ်ခေါင်းဆောင် မင်းအောင်လှိုင်ရဲ့ မွေးနေ့မှာ “မင်းအောင်လှိုင်အလိုမရှိကြောင်း” ဆန္ဒထုတ်ဖော်ခဲ့ကြတယ်လို့ ဒီလှုပ်ရှားမှုမှာ ပါဝင်ခဲ့သူတွေက မြေလတ်အသံကို ပြောပါတယ်။

ဇူလိုင် ၃ ရက်မှာကျရောက်တဲ့ စစ်ခေါင်းဆောင်မင်းအောင်လှိုင်ရဲ့ဓာတ်ပုံတွေကို ခြေဖဝါးနဲ့နင်း၊ မီးရှို့မှုတွေလုပ်ပြီး ကျိန်စာတွေတိုက်ခဲ့တယ်လို့ ဆိုပါတယ်။

“မအလ မွေးနေ့မှာ ပြည်သူတွေက ကြိမ်စာတိုက်နေတယ်။ သူ့ကိုလုံးဝရွံရှာ မုန်းတီးပြီးအလိုမရှိကြောင်းပြသရင်း အသေဆိုးနဲ့သေပါစေလို့ ဆုတောင်းကြိမ်စာတိုက်ခဲ့ကြတာ”လို့ ယင်းမာပင် ဆားလင်းကြီးရွာပေါင်းစုံ သပိတ်ကော်မတီဝင်တဦးက မြေလတ်အသံကိုပြောပါတယ်။

ယခုလိုပြုလုပ်တာဟာ ၎င်းရဲ့ ဘုန်းကံနိမ့်ပါးပြီး အမြန်ကျဆုံးဖို့လည်းရည်ရွယ်ခဲ့တယ်လို့ ဆိုပါတယ်။

အဆိုပါမွေးနေ့အတွက် ယင်းမာပင်မြို့နယ်အတွင်းက အောင်လံလွှင့်မည် ရွှေရေကြည်၊ အောင်လံလွှင့်မည် ဒေါင်းသွေးနီ၊ နောက်ပြန်မလှည့်ကြေးဒီတော်လှန်ရေး၊ ယင်းမာပင်မြောက်ခြမ်းကျေးရွာများသပိတ်၊ ပြည်သူ့အားမာန်သပိတ်စတဲ့ သပိတ်စစ်ကြောင်းတွေက ကျိန်စာတိုက်တာတွေလုပ်ခဲ့တယ်လို့ သိရပါတယ်။

မြေလတ်အသံ၊ ဇွန် ၁၃၊ ၂၀၂၅ ။

စစ်ကိုင်းတိုင်း၊ ယင်းမာပင်မြို့နယ်၊ ဝမ်ပေါင်ကြေးနီစီမံကိန်းအနီးက ကျေးစာကျရွာကို စစ်ကောင်စီပူးပေါင်းတပ်ဖွဲ့က ဝင်ရောက်စီးနင်းပြီး ရွာခံ ၄၀ နီးပါးကို ဖမ်းဆီးခေါ်ဆောင်သွားတယ်လို့ ဒေသခံတွေထံကသိရပါတယ်။

ဇွန် ၁၃ ရက် ဒီကနေ့မနက် ၈ နာရီလောက်မှာ စစ်ကောင်စီတပ်နဲ့ရဲတပ်ဖွဲ့ပူးပေါင်းအင်အား ၁၀၀ ကျော်ဟာ ကျေးစာကျရွာအတွင်း ဝင်ရောက်လာပြီး ကျေးရွာအတွင်းတွေ့ရှိတဲ့ အသက်ငယ်ပိုင်း အမျိုးသား၊ အမျိုးသမီးတွေကို ဖမ်းဆီးသွားတာလို့ ဆိုပါတယ်။

“ ရွာအနောက်ဖက်ပေါက်ကနေ ခြေသံလုံလုံနဲ့ဝင်လာပြီး ရွာထဲက လမ်းထွက်နေတဲ့သူ၊ ခြံဝန်းထဲတွေ့တဲ့သူ မိန်းကလေး၊ ယောကျာ်းလေးအကုန်ဖမ်းတာ။ တချို့လည်းထွက်ပြေးလို့ လိုက်ပစ်တယ်။ ဖမ်းသွားတာ သက်ငယ်ပိုင်းတွေများတယ်၊ အသက် ၄၀ ကျော် ဦးလေးတယောက်လောက်ပဲပါတယ်” လို့ ရွာခံအမျိုးသားတဦးက မြေလတ်အသံကို ပြောပါတယ်။

အဆိုပါစစ်ကြောင်းဟာ လက်ရှိမှာ မြောက်ယမားတံတားအနီး ပုသိမ်-မုံရွာလမ်းပေါ်ကို ပြန်လည်ရောက်ရှိသွားပြီဖြစ်ကာ ဖမ်းဆီးခေါ်ဆောင်သွားသူတွေကို ဓားစာခံလုပ်ပြီး လမ်းကင်းလုံခြုံရေးယူနေတယ်လို့ ဆိုပါတယ်။

“ မနေ့က နမခမှာ ရောက်နေတဲ့ ကြေးနီသယ်မယ့်ကားတွေက ခုဝမ်ပေါင်ကြေးနီစီမံကိန်းထဲကို ထွက်လာပြီလို့ သိရတယ်။ အဲ့ဒီကားတွေ အတိုက်ခံရမှာစိုးလို့ သူတို့လမ်းကင်းယူတာမှာ ရွာသားတွေကို ဓားစာခံလုပ်ပြီး ဖမ်းသွားတာမျိုး” လို့ အထက်ပါရွာခံက သုံးသပ်ပြောပါတယ်။

ဖမ်းဆီးခေါ်ဆောင်သွားတဲ့စစ်ကြောင်းဟာ မုံရွာ နမခစစ်ကောင်စီတပ်၊ ဝမ်ပေါင်ကြေးနီစီမံကိန်းမှာတပ်စွဲထားတဲ့ စစ်ကောင်စီတပ်ဖွဲ့နဲ့ ယင်းမာပင်အခြေစိုက် ရဲတပ်ရင်း ၂၈ က ရဲတပ်ဖွဲ့ပူးပေါင်းစစ်ကြောင်းဖြစ်တယ်လို့ သိရပါတယ်။

လက်ရှိမှာ ၎င်းစစ်ကြောင်းကြောင့် ဝမ်ပေါင်ကြေးနီစီမံကိန်းအနီးကျေးရွာတွေဖြစ်တဲ့ ဆားလင်းကြီးမြို့နယ် ဂုဏ်တော၊ ဒုန်းတော၊ ယင်းမာပင်မြို့နယ် ၊ ကျေးစာကျ၊ ပိန်းနွယ်ချောင်၊ အုံတုံပင်၊ ထန်းတောကြီးစတဲ့ ကျေးရွာတွေ ရွာလုံးကျွတ်ထွက်ပြေးတိမ်းရှောင်နေရတယ်လို့ သိရပါတယ်။