ပြန်မလွှတ်

ဝက်လက်၊ နိုဝင်ဘာ ၄၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်၊ မောက္က​ဒီးကျေးရွာကနေ စစ်ကော်မရှင်တပ်ဖမ်းဆီးသွားတဲ့ ပြည်သူ ၄၀ ကျော် ၃ ရက်ကြာတဲ့အထိ ပြန်မလွတ်သေးဘူးလို့ ဝက်လက်မြို့နယ်ပကဖ သတင်းနှင့်ပြန်ကြားရေးတာဝန်ရှိသူထံက သိရပါတယ်။

နိုဝင်ဘာ ၂ ရက် မနက် ၆ နာရီခန့်မှာ ရွာသာကြီးနဲ့ စစ်ကိုင်းမြို့နယ်၊ ဆားတောင်ဘက်ကလာတဲ့ စစ်ကော်မရှင်ပူးပေါင်းစစ်ကြောင်းအင်အား ၆၀ လောက်က မောက္ကဒီးကျေးရွာထဲကို ဝင်ရောက်ကာ အရပ်သားတွေကိုဖမ်းဆီးခဲ့တာလို့ ဆိုပါတယ်။

” စစ်ကြောင်းရောက်လာတာကို မသိလိုက်တဲ့သူတွေအဖမ်းခံရတာ။ ဒီနေ့လည်းတခေါက်ထပ်ဝင်သေးတယ်။ ဒီနေ့တော့လူမပါသွားဘူး။ ပထမတခေါက်က ဝင်တုန်းကဖမ်းသွားတဲ့သူတွေဘဲရှိတယ်။ ဒီနေ့ထိတော့ပြန်မလွတ်လာသေးဘူး”လို့ ဝက်လက်မြို့နယ်ပကဖသတင်းနှင့်ပြန်ကြားရေးတာဝန်ခံက မြေလတ်အသံကို ပြောပါတယ်။

ဖမ်းဆီးခံရတဲ့ မောက္ကဒီးဒေသခံတွေဟာ ကလေးငယ်တွေ၊ သက်ကြီးရွယ်အိုတွေနဲ့အမျိုးသမီးတွေအများစုဖြစ်ပြီး သူတို့ရဲ့ကိုယ်ရေးအချက်အလက်တွေကို ​စိစစ်နေဆဲဖြစ်ကာ လက်ရှိမှာ အဲ့ဒီရွာခံ ၄၀ ကို ရွာသာကြီးကျေးရွာမှာ ဖမ်းဆီးထားတာဖြစ်တယ်လို့ သိရပါတယ်။

မောက္ကဒီးကျေးရွာကို စစ်ကော်မရှင်စစ်ကြောင်း ၂ ကြိမ်ဝင်ရောက်ထားတာကြောင့် အိမ်ခြေ ၂၀၀ ခန့်ရှိ မောက္ကဒီးရွာက ဒေသခံ ၇၀၀ ထက်မနည်းဟာ ဘေးလွတ်ရာကိုထွက်ပြေးတိမ်းရှောင်နေကြရတာလည်း ဖြစ်ပါတယ်။

စာတည်း – ဟိန်းစံ

မန္တလေး၊ ဒီဇင်ဘာ ၂၈၊ ၂၀၂၂။

မန္တလေးတိုင်း၊ မတ္တရာမြို့နယ်၊ ပိုဝမြောက်ရွာနဲ့ စိန်ပန်းကုန်းရွာကဖမ်းဆီးခံလိုက်ရတဲ့ ဒေသခံ ၁၈ ဦးထဲက ၁၅ ဦးကို ဒီဇင်ဘာလ ၂၈ ရက်ဒီမနက်မှာ ပြန်လွှတ်ပေးခဲ့ပေမယ့် အဲဒီထဲက စစ်သင်တန်းဆင်းထားသူ ၃ ဦးကိုတော့ ဆက်လက်ဖမ်းဆီးထားတယ်လို့ သိရပါတယ်။

ပြန်မလွှတ်ခဲ့သူ ၃ ဦးကတော့ အသက် ၂၃ နှစ်အရွယ် ကိုနိုင်းနိုင်း(ခ)နိုင်းထက်ကျော်၊ ကိုပြည့်ပြည့်ကျော်နဲ့ အသက် ၂၉ နှစ်အရွယ် ကိုအောင်မျိုးနိုင်တို့ဖြစ်ကြပြီး၊ သူတို့ကို စစ်ကောင်စီတပ်သားတွေက စစ်ကြောင်းနဲ့အတူ မတ္တရာမြို့ဘက်ကို ခေါ်သွားတယ်လို့ နွေဦးတော် လှန်ရေး – မတ္တရာမှ တာဝန်ရှိသူတဦးက ပြောပါတယ်။

“အဲဒီသုံးယောက်က နယ်စည်းမခြားတပ်ရင်း ၁၈ ကနေ သင်တန်းဆင်းပြီး ပကဖဖွဲ့ဖို့ ရွာတွေပြန်ဆင်းလာတဲ့လူငယ်တွေပါ။ သူတို့နဲ့တူတူ ဖမ်းခံထားရတဲ့ပြည်သူတွေကိုတော့ ပြန်လွှတ်ပေးခဲ့တယ်။ စကစတွေက အဲဒီလူငယ်သုံးယောက်ကို ကြိုးတုတ်ပြီးတော့ ပိုဝရွာကနေ မတ္တရာဘက်ကို ထွက်သွားကြတယ်” လို့ ဆိုပါတယ်။

အခုပြန်လွှတ်ခဲ့တဲ့ပြည်သူ ၁၅ ဦးနဲ့ စစ်သင်တန်းဆင်း ၃ ဦးတို့ကို စစ်ကောင်စီတပ်သားတွေက ဒီဇင်ဘာလ ၂၆ ရက်မှာ ဖမ်းဆီးခဲ့တာဖြစ်ပြီး၊ သူတို့ကတော့ စိန်ပန်းကုန်းရွာက ၄ ဦးနဲ့ ပိုဝမြောက်ရွာက ၁၄ ဦးတို့ဖြစ်ကြပါတယ်။

“စကစတွေက သူတို့အကုန်လုံးကိုဖမ်းပြီးတော့ ပိုဝမြောက်ရွာက ကျော်မျိုးဝင်းဆိုတဲ့ သူရဲ့နေအိမ်ထဲမှာ သော့ခတ်ပြီးပိတ်ထားတာ။ သူတို့မလွှတ်လာခင် မနေ့ကအဲဒီရွာအနားမှာ ကာကွယ်ရေးတပ်ဖွဲ့တွေနဲ့ အပြန်အလှန်ပစ်ခတ်တာ ဖြစ်ခဲ့သေးတယ်။ ကြာကြာတော့ မဟုတ်ဘူး။ အဲဒီပစ်ခတ်နေတဲ့အချိန်မှာ ကျော်မျိုးဝင်းဆိုသူက ပထဆုံးထွက်ပြေးလွတ်မြောက်လာခဲ့တယ်။ ဒီမနက်ရောက်တော့ ကျန်တဲ့သူတွေကို ပြန်လွှတ်ပေးခဲ့ပြီးတော့ သင်တန်းဆင်းသုံးယောက်ကို ကြိုးတုတ်ပြီး ရွာကနေ ထွက်သွားကြတာ”လို့ အထက်ပါ တာဝန်ရှိသူက ဆိုပါတယ်။

အလားတူ ပြီးခဲ့တဲ့ဒီဇင်ဘာလ ၂၄ ရက်မှာလည်းစစ်ကောင်စီတပ်တွေက စိန်ပန်းကုန်းရွာကို မီးရှို့ပြီး ဒေသခံ ၄ ဦးကို ဖမ်းဆီးသွားခဲ့ရာ အဲဒီထဲက ၁ ဦးရဲ့ရုပ်အလောင်းကိုတော့ ဒီဇင်ဘာလ ၂၇ ရက်မနေ့ကမနက်ပိုင်းမှာ တွေ့ရှိခဲ့ရတယ်လို့ ဒေသခံတွေက ပြောပါတယ်။

အဆိုပါစစ်ကောင်စီတပ်တွေအနေနဲ့ ခုလိုကျေးရွာတွေကိုမီးရှို့ပြီး ဒေသခံတွေကို ဖမ်းဆီးနေတာဟာ ဒီဇင်ဘာလ ၂၃ ရက်က စိန်ပန်းကုန်းကျေးရွာအနီးမှာ စစ်ကောင်စီရဲ့မော်တော်ဘုတ်တစင်း ဒရုန်းနဲ့တိုက်ခိုက်ခံလိုက်ရတာကို အခဲမကြေတဲ့အတွက် လုပ်ဆောင်နေတာဖြစ်နိုင်တယ်လို့ ကာကွယ်ရေးတပ်ဖွဲ့တွေနဲ့ ဒေသခံတွေက ခန့်မှန်းပြောဆိုနေကြပါတယ်။