ဆားလင်းကြီး၊ ဇန်နဝါရီ ၅၊ ၂၀၂၅။

စစ်ကိုင်းတိုင်း၊ ဆားလင်းကြီးမြို့နယ်၊ မတောင့်တကျေးရွာရှိ တိုက်နယ်ဆေးရုံ ဗုံးကြဲခံရပြီး CDM ဆရာဝန် ၁ ဦးသေဆုံးကာ ကလေး ၁ ဦးအပါ ၃ ဦးဒဏ်ရာရခဲ့တယ်လို့ ကျေးရွာနဲ့နီးစပ်သူတွေဆီက သိရပါတယ်။

ဇန်နဝါရီ ၄ ရက် နေ့လယ် ၂ နာရီခန့်မှာ နမခ ကနေ တက်လာတဲ့ စက်တပ်လေထီးက တိုက်နယ်ဆေးရုံပေါ်ကို ဗုံး ၁ လုံးကြဲချခဲ့တယ်လို့ ဆိုပါတယ်။

“တိုက်ပွဲဘာညာမရှိဘဲ အပြန်မှာကြဲသွားတဲ့သဘောပါ။ ဆေးရုံရဲ့စားဖိုဆောင်မှာကျတာ။ ဆရာဝန် ၁ ယောက်ထိတယ်။ ပြီးတော့ စားဖိုဆောင် အလုပ်လုပ်တဲ့သူတွေထိတယ်။”လို့ ကျေးရွာနဲ့နီးစပ်သူတဦးက ပြောပါတယ်။

ဆေးရုံကို ဗုံးကြဲခံရတာက သတင်းပေးတွေရဲ့ သတင်းပေးပို့ချက်တွေနဲ့ စစ်ကော်မရှင်ဘက်က လေကြောင်းကင်းထောက်မှုတွေကြောင့် နေရာအတိအကျနဲ့ဗုံးလာကြဲသွားတာဖြစ်နိုင်တယ်လို့ ဆိုပါတယ်။

ဗုံးထိမှန်တာကြောင့် အသက် ၄၀ အရွယ် CDM ဆရာဝန် အမျိုးသား ၁ ဦးသေဆုံးသွားပြီး အသက် ၈ နှစ်အရွယ် ယောက်ျားလေး ၁ ဦး၊ စားဖိုဆောင်တာဝန်ကျသူ အသက် ၄၀ အရွယ် အမျိုးသား ၂ ဦးတို့ ဒဏ်ရာရခဲ့တယ်လို့ဆိုပါတယ်။

ဒါ့အပြင် ဆေးရုံရဲ့ စားဖိုဆောင်နဲ့ လူနာဆောင်တို့ထိခိုက်ပျက်စီးပြီး လူနာတွေတော့ ထိခိုက်သူမရှိဘူးလို့ သိရပါတယ်။

ပြီးခဲ့တဲ့အောက်တိုဘာ ၂၀ ရက်ကလည်း ဆားလင်းကြီးမြိုနယ်၊ ထန်းပုကျေးရွာကို စစ်ကော်မရှင်ဘက်က စက်တပ်လေထီးနဲ့ဗုံးကြဲလို့ အရပ်သား ၂ ဦးသေဆုံးပြီး ၁ ဦးဒဏ်ရာရခဲ့တယ်လို့ သိရပါတယ်။

စာတည်း – လင်း

မြေလတ်အသံ၊ နိုဝင်ဘာ ၂၄၊ ၂၀၂၅။

စစ်ကိုင်းတိုင်း၊ တန့်ဆည်မြို့နယ်၊ ကံထူးမကျေးရွာရဲ့ တိုက်နယ်ဆေးရုံကို စစ်ကော်မရှင်တပ်က နိုဝင်ဘာ ၂၄ ရက်ဒီမနက် ၁ နာရီကျော်မှာ ဗုံးကြဲတိုက်ခိုက်ခဲ့တာကြောင့် လူငယ် ၂ ဦးအပါအဝင် ၇ ဦး သေဆုံးခဲ့တယ်လို့ ဒေသခံတွေက ပြောပါတယ်။

စစ်ကော်မရှင်တပ်ရဲ့ တိုက်ခိုက်ရေးလေယာဥ် ၁ စီးနဲ့ တိုက်နယ်ဆေးရုံကို ဗုံးသီး ၂ လုံးကြဲချခဲ့တာဖြစ်ပြီး ဆေးရုံအနီးရှိ ကားဘော်ဒီဆိုင်ကိုပါ ဗုံးထိမှန်ခဲ့တာကြောင့် ဆိုင်မှာရှိနေတဲ့ အမျိုးသား ၇ ဦးသေဆုံးပြီး ၃ ဦးဒဏ်ရာရရှိခဲ့တာလို့ ဆိုပါတယ်။

“သေဆုံး၊ ဒဏ်ရာရတာက ဆေးရုံတက်နေတဲ့လူနာတွေမဟုတ်ပါဘူး။ ပစ်ခံရတဲ့ ဓာတ်မှန်ဆောင်ကလည်း လူနာတွေ လက်ခံပြီးတော့ကုနေတာမရှိဘူး။ သေဆုံး၊ ဒဏ်ရာရတဲ့သူတွေက ကားဘော်ဒီဆိုင်က အလုပ်သမားတွေနဲ့ အလုပ်သမားတွေကို မှီခိုနေတဲ့ မိသားစုဝင်တွေပဲ ဖြစ်ပါတယ်”လို့ တန့်ဆည်ဒေသခံအမျိုးသားတဦးက ပြောပါတယ်။

သေဆုံးသူ ၇ ဦးမှာ ဇင်ကို ၁၆ နှစ်၊ ကတုံး ၁၇ နှစ်၊ ပိုင်ချစ် ၁၉ နှစ်၊ ပေါက်စ(ခ)ရှိုင်းထက်အောင် ၂၀ နှစ်၊ ဦးစံဦး ၅၃ နှစ်နဲ့ အမည်မသိရှိရသေးတဲ့ ကားသမား ၂ ဦးတို့ဖြစ်ပြီး ဒဏ်ရာရရှိသူ ၃ ဦးကတော့ ကိုတေဇာဝင်း ၃၉ နှစ်၊ ကောင်းခန့်လှိုင် ၁၈ နှစ်၊ အောင်မျိုးဦး ၁၅ နှစ်တို့ဖြစ်ကြပါတယ်။

သေဆုံးသူတွေထဲက ပိုင်ချစ် ဆိုသူဟာ ဆေးကုသမှုခံယူနေချိန်အတွင်း သေဆုံးခဲ့ရတာဖြစ်ပြီး ဒဏ်ရာရသူ ၃ ဦးဟာလည်း ဒဏ်ရာပြင်းထန်ရာရရှိထားတာကြောင့် အရေးပေါ်ဆေးကုသနေရတယ်လို့လည်း အထက်ပါအမျိုးသားက ဆိုပါတယ်။

သေဆုံး၊ ဒဏ်ရာရရှိသူတွေဟာ တန့်ဆည်၊ မုံရွာ၊ ပင်လည်ဘူး၊ ကန့်ဘလူစတဲ့မြို့နယ်တွေက ဒေသခံတွေဖြစ်ကြတယ်လို့ သိရပါတယ်။

ပြီးခဲ့တဲ့ စက်တင်ဘာ ၂၆ ရက်ကလည်း ကံထူးမကျေးရွာရှိ စက်သုံးဆီအရောင်းဆိုင် နဲ့ ဆေးဆိုင် ၁ ဆိုင်ကို စစ်ကော်မရှင်တပ်ကဗုံးကြဲတိုက်ခိုက်ခဲ့ရာ အမျိုးသား ၉ ဦး၊ အမျိုးသမီး ၂ ဦး စုစုပေါင်း ၁၁ ဦးသေဆုံးခဲ့ပါသေးတယ်။

စာတည်း – လင်း

မြေလတ်အသံ၊ နိုဝင်ဘာ ၁၉၊ ၂၀၂၅။

အမျိုးသားညီညွှတ်ရေးအစိုးရ(NUG)လက်အောက် ပြည်သူ့ကာကွယ်ရေးတပ်တွေထိန်းချုပ်ထားတဲ့ စစ်ကိုင်းတိုင်း၊ ဗန်းမောက်မြို့နဲ့ ကနီမြို့နယ်ကို စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အရပ်သား ၃ ဦး သေဆုံးခဲ့တယ်လို့ ဒေသခံတွေက ပြောပါတယ်။

ယမန်နေ့နိုဝင်ဘာ ၁၈ ရက်ညနေ ၄ နာရီကျော်မှာ ဗန်းမောက်မြို့နယ်တောင်ပိုင်းရှိတိုက်နယ်ဆေးရုံနဲ့ အချုပ်ခန်းနေရာတွေကို စစ်ကော်မရှင်တပ်ကတိုက်လေယာဥ်နဲ့ ဗုံးသီး ၁ လုံးစီ ကြဲချခဲ့တာကြောင့် ကျန်းမာရေးဝန်ထမ်းအမျိုးသမီး ၁ ဦးနဲ့ အမျိုးသား ၁ ဦးတို့ သေဆုံးခဲ့တာလို့ဆိုပါတယ်။

” ဆေးရုံကိုအရင်ချတာ။ ပြီးမှအချုပ်ခန်းချတာ။ ဆေးရုံက ၂ယောက်သေတယ်လို့ပဲသိရတယ်။ ကျန်တဲ့ အသေးစိတ်တွေကိုတော့မသိရဗျ။ ထိခိုက်မှုတွေများနိုင်တယ်ဗျ။ ဒီနေရာတွေက လူများတဲ့နေရာတွေလေ”လို့ ဗန်းမောက်ဒေသခံတော်လှန်ရေးတပ်ဖွဲ့ဝင်တဦးက မြေလတ်အသံကို ပြောပါတယ်။

ဗုံးကြဲခံရတဲ့ ဆေးရုံဟာ အမျိုးသားညီညွတ်ရေးအစိုးရ – NUG ရဲ့ထိန်းချုပ်မှုအောက်မှာလည်ပတ်နေတဲ့ တိုက်နယ်ဆေးရုံဖြစ်ပြီး ဖြစ်စဥ်နဲ့ပတ်သက်လို့ ဗန်းမောက်မြို့နယ် ပကဖ၊ ပအဖ၊ ပလဖ အဖွဲ့အစည်းတွေက သတင်းထုတ်ပြန်တာမရှိသေးပါဘူး။

အလားတူ နိုဝင်ဘာ ၁၈ ရက် ညနေ ၃နာရီကျော်မှာ ကနီမြို့နယ်၊ မင်းအိုကျေးရွာအနီး ယာခင်းတွေထဲကို စစ်တပ်တိုက်လေယာဥ် ၂ စီးက ဗုံး ၂ လုံးကြဲချခဲ့တာကြောင့် ယာခင်းထဲမှာရှိနေတဲ့ အမျိုးသမီး ၁ ဦးသေဆုံးပြီး ၂ ဦး ဒဏ်ရာရရှိခဲ့တယ်လို့ သိရပါတယ်။

” ကြဲတဲ့နေရာက PDF စခန်းဟောင်းနေရာလို့ပြောတယ်။ အရင်ကစခန်းချခဲ့တာပေါ့။ အခု မနေတော့ဘူး။ အဲ့နားမှာနှမ်းရိတ်နေကြတဲ့ သားအမိနှစ်ယောက်ထိတယ်။ သမီးဖြစ်သူ သေတယ်။ နောက်ထပ်ထိတဲ့ ယောကျာ်းတယောက်ကတော့ ဘယ်သူလည်းဆိုတာမသိရဘူး” လို့ ကနီဒေသခံအမျိုးသားတဦးက ပြောပါတယ်။

ဗုံးကြဲခံရတာကြောင့် အသက် ၃၀ ဝန်းကျင်ရှိ အမျိုးသမီး ၁ ဦး သေဆုံးခဲ့ပြီး ၎င်းရဲ့မိခင် အသက် ၆၁ နှစ်ရှိ အမျိုးသမီး ၁ ဦးနဲ့ အသက် ၂၃ ဝန်းကျင်ရှိ အမျိုး သား ၁ ဦး ဒဏ်ရာရရှိခဲ့တယ်လို့ ဆိုပါတယ်။

ပြီးခဲ့တဲ့နိုဝင်ဘာ ၁၁ ရက်ကလည်း ကနီမြို့နယ်၊ ဝင်းမနားကျေးရွာရှိ တိုက်နယ်ဆေးရုံကို စစ်ကော်မရှင်တပ်က ဗုံးကြဲတိုက်ခိုက်ခဲ့တာကြောင့် ဆေးကုသမှုခံယူနေကြတဲ့ ​ပြည်သူ ၈ ဦးသေဆုံးပြီး ၅၀ ကျော် ဒဏ်ရာရရှိခဲ့တယ်လို့သိရပါတယ်။

စာတည်း – ဟိန်းစံ