တိုက်ခိုက်ခံရ

ဝေါ၊ ဖေဖော်ဝါရီ ၂‌၇၊ ၂၀၂၃။

ပဲခူးတိုင်း၊ ဝေါမြို့နယ်၊ ဝေါမြို့ကနေ ဘုရားပျိူကျေးရွာဘက် အထွက်မှာရှိတဲ့ စစ်ဆေးရေး ဂိတ် တိုက်ခိုက်ခံရပြီး ၃ ဦး သေဆုံးကာ ၄ ဦး ဒဏ်ရာရသွားတယ်လို့ သိရပါတယ်။

ဖေဖော်ဝါရီလ ၂၆ ရက် မနေ့က ည ၈ နာရီ ၃၀ မိနစ်ခန့်မှာ စစ်သား၊ ရဲ၊ ပျူစောထီး၊ မီးသတ် အင်အား ၁၀ ဦးခန့် ရှိနေတဲ့ စစ်ဆေးရေးဂိတ်ကို ဝင်ရောက် တိုက်ခိုက်ခဲ့တာဖြစ်ပြီး အလစ်အငိုက်တိုက်ခိုက်နိုင်ခဲ့လို့ စစ်ကောင်စီဘက်က ထိခိုက်သေဆုံးမှုများခဲ့တာလို့ ဝေါမြို့နယ် ပကဖ တာဝန်ရှိသူက ပြောပါတယ်။

“အဲဒီဂိတ်က ရန်ကုန်-မော်လမြိုင်လမ်းပိုင်းပေါ်က စစ်ဆေးရေးဂိတ်ကြီး မဟုတ်ဘူး။ အဲ့ဒီဂိတ်က ဖွင့်ထားတာ ၁ နှစ်လောက် ရှိပြီး သူတို့အဖွဲ့တွေ အမြဲတမ်းရှိတဲ့နေရာတော့ မဟုတ်ဘူး။ စကစ ဘက်က သတင်းရတာမျိုးရှိရင် လာစောင့်ကြတယ်။ ပြီးရင် တရားမဝင် ဖြတ်သန်းသွားလာတဲ့ ကားတွေကို ငွေတောင်းတဲ့နေရာပါ” လို့ ပြောပါတယ်။

စစ်ဆေးရေးဂိတ်ကို တိုက်ခိုက်မှုအတွင်း စစ်အုပ်စုဘက်က ပျူစောထီး ၁ ဦးနဲ့ မီးသတ် ၂ ဦး သေဆုံးပြီး စစ်ကောင်စီတပ်ဖွဲ့ဝင် တပ်ကြပ် ၁ ဦး၊ နယ်ထိန်းရဲတပ်ကြပ် ၁ ဦး၊ ပျူစောထီး ၂ ဦး ဒဏ်ရာရသွားတယ်လို့ ဆိုပါတယ်။

အာဏာသိမ်း စစ်ကောင်စီဘက်က ထိခိုက်သေဆုံးသွားသူတွေကို ဝေါဆေးရုံကို စစ်ကောင်စီဘက်က တင်ပို့ထားပြီး ဒဏ်ရာပြင်းထန်သူတွေကိုတော့ ရန်ကုန်ဆေးရုံကို ထပ်မံပို့ဆောင်ထားရတယ်လို့ သိရပါတယ်။

တိုက်ခိုက်မှု ဖြစ်ပွားပြီးနောက် ဖေဖော်ဝါရီလ ၂၇ ရက် ဒီကနေ့ မနက်ပိုင်းမှာတော့ စစ်ကောင်စီဘက်က အင်အား ၂၀ ကျော်ဟာ ကား ၄ စီးနဲ့ ရောက်လာပြီး ဘုရားပျိုကျေးရွာ အနီးဝန်းကျင်ကို တောနင်း ရှာနေတယ်လို့ ဆိုပါတယ်။

ဒီဇင်ဘာလ ၅ ရက်နေ့ကလည်း ဝေါမြို့ ကန်တော်ရပ်ကွက်က အုပ်ချုပ်ရေးမှူးရုံး မိုင်းခွဲခံရပြီး ရုံးအဆောက်အဦး ထိခိုက်ပျက်စီးသွားသေးတယ်လို့ သိရပါတယ်။

မြင်းမူ၊ ဖေဖော်ဝါရီ ၂‌၇၊ ၂၀၂၃။

စစ်ကိုင်းတိုင်း၊ မြင်းမူမြို့နယ် Zero ပြောက်ကျားတပ်မဟာ တပ်ရင်း ၇-မြင်းခြံခရိုင် စခန်းကို မျက်စိလည် ရောက်လာတဲ့ မုံရွာ နမခ က စစ်ကြောင်းဟာ တိုက်ခိုက်ခံရပြီး ၁၇ ဦး သေဆုံးခဲ့တယ်လို့ အဲဒီတပ်ဖွဲ့ထံက သိရပါတယ်။

ယမန်နေ့ ဖေဖော်ဝါရီလ ၂၆ ရက်နေ့ နံနက်ပိုင်းမှာ လေယာဉ်နဲ့ချသွားတဲ့ အင်အား ၁၀၀ ဝန်းကျင်ရှိ စစ်ကောင်စီစစ်ကြောင်းနဲ့ PDF အဖွဲ့တွေ ထိတွေ့တိုက်ပွဲ ဖြစ်ခဲ့တယ်လို့ Zero ပြောက်ကျားတပ်မဟာ တပ်ရင်း ၇-မြင်းခြံခရိုင် တပ်ရင်းမှူး ဗိုလ်သက်ကြီးက ပြောပါတယ်။

“မနေ့က မြင်းမူမြို့နယ် ညောင်ပင်ကန်ကျေးရွာကနေပြီးတော့ ထိုးလာတဲ့ စစ်ကြောင်းက ကန်တော်ဘက်ကို တည့်တည့်လာတယ်။ မနက် ၉ နာရီလောက်ကတည်း စပြီး‌တော့ ထိတွေ့တိုက်ပွဲ ဖြစ်တယ်။ ည ၇ နာရီခွဲမှာ တိုက်ပွဲပြီးတယ်။ ကျနော်တို့က စခန်းကို ဟပေးလိုက်တာ၊ တိုက်ပွဲက ပြင်းထန်းတယ်။ ရန်သူ့ဘက်က စစ်** ၁၇ ကောင် သေတယ်။ ကျ‌နော်တို့ဘက်က ဆားတောင်မိုးကြိုးအဖွဲ့က ရဲဘော် ၂ ယောက် ကျဆုံးတယ်” လို့ ဗိုလ်သက်ကြီးက ပြောပါတယ်။

Zero ပြောက်ကျားတပ်မဟာ တပ်ရင်း ၇-မြင်းခြံခရိုင် စခန်းက မရွှေ့ပြောင်းနိုင်တဲ့ပစ္စည်း သိန်း ၃၅၀ ဖိုးလောက် ဆုံးရှုံးခဲ့ရပြီး မုံရွာ နမခ စစ်ကြောင်းက ကန်တော်ရွာ ဘုန်းကြီးကျောင်း ၂ ကြောင်းလည်း မီးရှို့သွားတယ်လို့ ဆက်ပြောပါတယ်။

တိုက်ခိုက်မှုကို Zero ပြောက်ကျားတပ်မဟာ တပ်ရင်း ၇-မြင်းခြံခရိုင်၊ တပ်ရင်း ၂ မြင်းခြံခရိုင်၊ ကျောက်ဆည်ခရိုင် တပ်ရင်း ၁၊ စစ်ကိုင်းခရိုင် တပ်ရင်း ၂၊ ဆားတောင်မိုးကြိုးအဖွဲ့၊ နယ်မြေခံအင်အားစုအချို့ နှင့် လက်နက်ကြီးအဖွဲ့အချို့တို့က ပူးပေါင်းတိုက်ခိုက်ခဲ့တာလို့ သိရပါတယ်။

ပြီးခဲ့တဲ့ ဖေဖော်ဝါရီလ ၂၄ ရက်နေ့ကလည်း အရာတော်မြို့နယ်မှာ နေအိမ်တွေကို မီးရှို့နေတဲ့ မုံရွာ နမခ က စစ်ကောင်စီစစ်ကြောင်းနဲ့ Zero ပြောက်ကျားတပ်မဟာ တပ်ရင်း ၇-မြင်းခြံခရိုင်တို့ တိုက်ပွဲဖြစ်ပြီး စစ်သား ၁၀ ဦး သေဆုံးခဲ့တယ်လို့ သိရပါတယ်။

နတ်မောက်၊ ဖေဖော်ဝါရီ ၂‌၆၊ ၂၀၂၃။

မကွေးတိုင်း၊ နတ်မောက်မြို့နယ်၊ သီးချောင်းရွာအရှေ့ဘက်မှာ စစ်ကောင်စီကားတစီးကို ဒေသခံကာကွယ်ရေးတပ်တွေက ကြားဖြတ်တိုက်ခိုက်ရာ ထိခိုက်သေဆုံးမှုတွေရှိခဲ့တယ်လို့ သိရပါတယ်။

နတ်မောက်မြို့ဘက်ကနေ စိုင်ကောင်းရွာဘက်ကိုမောင်းနှင်လာတဲ့ စစ်ကောင်စီအရာရှိ ၂ ဦးနဲ့ တပ်သား ၂ ဦးပါကားတစီးကို အဲ့ဒီလမ်းပိုင်းတနေရာမှာ ဖေဖော်ဝါရီလ ၂၆ ရက်ဒီမနက်ပိုင်းက မိုင်းဆွဲပစ်ခတ်ခဲ့တာလို့ တိုက်ဒေါင်းပြည့်သူတော်လှန်ရေး အင်အားစုအဖွဲ့တာဝန်ခံ ဘကျော်ကြီးက ပြောပါတယ်။

“နတ်မောက်မြို့နယ်ထဲက စိုင်းကောင်းနဲ့နတ်မောက်မြို့နယ်ဆက်သွယ်ထားတဲ့ လမ်းမကြီးပေါ်မှာ စောင့်ကြိုပြီး မနက် ၉ နာရီ ၄၅ မိနစ်အချိန်မှာ မိုင်းဆွဲပြီး ပစ်ခတ်တိုက်ခိုက်ခဲ့တာ၊ အိမ်စီးကား ၁ စီးကို တိုက်ခိုက်ခဲ့တာ၊ အရာခံဗိုလ်အဆင့်ရှိသူ ၂ ဦးပါတယ်၊ အားလုံး ၄ ဦး သေတယ်၊ ဘယ်တပ်ရင်းက လို့တော့ မသိရဘူး၊ ယူနီဖောင်းတွေပါတယ်၊ လက်နက်တွေပါတယ်” လို့ ပြောပါတယ်။

မြေပြင်တိုက်ခိုက်ရေးရဲဘော်တွေရဲ့ ပြောပြချက်အရ လိုက်ပါလာသူ ၄ ဦးလုံးသေဆုံးခဲ့တယ်လို့ ခန့်မှန်းပေးမယ့် ဒီသေဆုံးမှုနဲ့ပက်သက်ပြီး မြေလတ်အသံက သီးခြားအတည်မပြုနိုင်သေးပါဘူး။

ခုတိုက်ခိုက်တဲ့ နေရာမှာ စစ်ကောင်စီတပ်သားတွေ စခန်းချထားတဲ့နေရာနဲ့ ၁ မိုင်ဝန်းကျင်သာ ဝေးတဲ့အပြင် တိုက်ခိုက်ပြီးနောက် နောက်ထပ်စစ်သားတွေက တပ်ကူရောက်လာတာကြောင့် ကာကွယ်ရေးရဲဘော်တွေအနေနဲ့ အမြန်ဆုတ်ခွာခဲ့ရတယ်လို့ ဆိုပါတယ်။

လက်ရှိအချိန်ထိ အဲ့ဒီနေရာမှာ စစ်ကားတွေရှိနေပြီး အခြေအနေအသေစိတ်ကိုတော့ စုံစမ်းလို့မရသေးဘူးလို့ တာဝန်ခံဘကျော်ကြီးက ဆိုပါတယ်။

ပြီးခဲ့တဲ့ဇန်နဝါရီလ ၄ ရက်ကလည်း နတ်မောက်မြို့နယ်၊ ပန်းညိုကျေးရွာက စစ်ကောင်စီခန့်အုပ်ချုပ်ရေးမှူး ဘိုသိန်းဆိုသူကို တိုက်ဒေါင်း – ပြည်သူ့တော်လှန်ရေးအင်အားစုက သေနတ်နဲ့ပစ်ခတ်ပြီး ရှင်းလင်းခဲ့ပါသေးတယ်။

မြင်းမူ၊ ဖေဖော်ဝါရီ ၂‌၆၊ ၂၀၂၃။

စစ်ကိုင်းတိုင်း၊ မြင်းမူမြို့နယ်၊ ပဒတ္တိုင်းကျေးရွာကိုမီးရှို့ပြီးထွက်လာတဲ့ စစ်ကောင်စီတပ်သားတွေ ဖေဖော်ဝါရီလ ၂၅ ရက်မနေ့ကမနက် ၁၀ နာရီလောက်မှာတိုက်ခိုက်ခံရတာကြောင့် ၃ ဦးသေဆုံးခဲ့တယ်လို့ သိရပါတယ်။

အင်အား ၇၀ ကျော်နဲ့ ပဒတ္တိုင်းရွာကိုမီးရှို့ခဲ့တဲ့စစ်ကြောင်းမှာ အရာတော်မြို့နယ်၊ ကန်ရင်းမလဲ သာရွာဘက်ကဖြစ်ပြီး၊ တိုက်ခိုက်မှုအတွင်း စစ်သား ၃ ဦးသေဆုံးခဲ့သလို ၁၅ ဦးလောက်လည်း ထိခိုက်ဒဏ်ရာရရှိနိုင်တယ်လို့ တောင်သာအခြေစိုက် Delta Force Taungtha အဖွဲ့မှ တာဝန်ခံကိုဇင်ယော်က ပြောပါတယ်။

“ကျနော်တို့နဲ့ တိုက်ပွဲဖြစ်တာက ပေ ၁၅၀ အကွာလောက်ပဲရှိတယ်။ ကျနော်တို့က နေရာ ကောင်းကောင်းယူပြီး တိုက်ခိုက်နိုင်ခဲ့တယ်။ တိုက်ပွဲအတွင်းမှာဘဲ စကစ ၃ ကောင်သေတာကို မျက်မြင်တွေ့ခဲ့တယ်။ ၁၅ ကောင်ထက်မနည်းဒဏ်ရာရသေးတယ်လို့တော့ ကင်းထောက်က ပြောတယ်။ ဒါကိုတော့ အတည်မပြုနိုင်သေးဘူး”လို့ ပြောပါတယ်။

အဆိုပါဒဏ်ရာရသွားတဲ့ စစ်ကောင်စီတပ်သားတွေကို စိုင်မြစ်ကျေးရွာမြောက်ဘက်ရှိ တောရပ်ကျောင်းမှာ ဝင်ရောက်ပြီးဆေးကုသခဲ့ကြတယ်လို့ ဆိုပါတယ်။

“တိုက်ပွဲကတော့ မိနစ် ၂၀ လောက်ကြာတယ်။ ကျနော်တို့ကပျောက်ကြားစနစ်နဲ့ တိုက်ခိုက်ခဲ့တာဆိုတော့ ရဲဘော်တွေအထိအခိုက်မရှိခဲ့ဘူး။ တိုက်ပွဲမှာ စကစ ၃ ကောင်သေတာကို ထမ်းစင်နဲ့ သယ်သွားတာကိုတွေ့ခဲ့ရတယ်။ ဒဏ်ရာရတာကိုတော့ အသေးစိတ်အချက်အလက်မသိရသေးဘူး”လို့ တိုက်ခိုက်မှုမှာပါဝင်တဲ့ People Revolution Force Kyaukse ( PRFK)မှ တာဝန်ခံ ကိုစစ်နိုင်ကလည်း အတည်ပြုပြောပါတယ်။

ဒီတိုက်ခိုက်မှုကို တောင်သာအခြေစိုက် Delta Force Taungthaအဖွဲ့နဲ့မဟာမိတ်အဖွဲ့တွေဖြစ်ကြတဲ့ ကျောက်ဆည်တော်လှန်ရေးအင်အားစု(PRFK)၊ မလှိုင်တော်လှန်ရေးအင်အားစုတို့ ပူးပေါင်း လုပ်ဆောင်ခဲ့တာဖြစ်ပါတယ်။

အဲ့ဒီစစ်ကောင်စီစစ်ကြောင်းဟာ ဖေဖော်ဝါရီလ ၂၆ ရက်ဒီကနေ့မှာတော့ ထီးဆောင်းကျေးရွာဘက်ကို ရောက်ရှိနေပြီလို့ ကာကွယ်ရေးရဲဘော်တွေက ပြောပါတယ်။

ပြီးခဲ့တဲ့ဖေဖော်ဝါရီလ ၂၃ ရက်မှာလည်း အရာတော်မြို့နယ်၊ မင်းရွာကြီးမြောက်ရွာထဲ တပ်စွဲထားတဲ့ စစ်ကောင်စီစစ်ကြောင်းနဲ့ တောင်သာ PDF၊ စစ်ကိုင်းခရိုင်တပ်ရင်း ၇တို့အကြား ထိပ်တိုက်တွေ့ဆုံပြီး တိုက်ပွဲဖြစ်ပွားခဲ့ရာ စစ်ကောင်စီတပ်သား ၁၀ ဦးသေဆုံးခဲ့ပါသေးတယ်။

အရာတော်၊ ဖေဖော်ဝါရီ ၂၅၊ ၂၀၂၃။

စစ်ကိုင်းတိုင်း၊ အရာတော်မြို့နယ်မှာ နေအိမ်တွေကို မီးရှို့နေတဲ့ မုံရွာ နမခ တပ်က စစ်ကြောင်းကို ​ဒေသကာကွယ်ရေး တပ်ဖွဲ့တွေက ဝင်ရောက်တိုက်ခိုက်ခဲ့တယ်လို့ သိရပါတယ်။

အရာတော်၊ ကျောက်ပျောက်ရွာနဲ့ မင်းရွာကို မီးရှို့နေတဲ့ စစ်ကောင်စီတပ်တွေကို ဖေဖော်ဝါရီ ၂၄ ရက် မနေ့ ညနေ ၄ နာရီခွဲလောက်က စတင်တိုက်ခိုက်ခဲ့တာ ဖြစ်ပြီး တိုက်ပွဲကြာချိန် ၂ နာရီခန့်အထိ ကြာခဲ့ကာ တိုက်ပွဲအတွင်း စစ်ကောင်စီတပ်သား ၁၀ ဦး သေဆုံးတယ်လို့ Zero ပြောက်ကျားတပ်မဟာ၊ မြင်းခြံခရိုင်တပ်ရင်း ၇ တပ်ရင်းမှူး ဗိုလ်သက်ကြီးက မြေလတ်အသံကို ပြောပါတယ်။

”တိုက်ပွဲက ၂ နာရီလောက် ကြာတယ်။ ကျနော်တို့ Zero ပြောက်ကျားတပ်ဖွဲ့က ရဲဘော် ၁ ဦး လက်မောင်း ထိမှန်တယ်။ မစိုးရိမ်ရပေါ့။ သူတို့ဘက်က စစ်သား ၁၀ ကောင် သေတယ်။ မုံရွာ နမခ က လာတဲ့ စစ်သားတွေပါ။ အင်အားကတော့ အစောပိုင်းက ၈၀ လောက်ပါပြီး အခုတော့ သူတို့ဘက်က အင်အား ၃၀ ကျော်ပဲ ကျန်တော့တယ်” လို့ သူက ပြောပါတယ်။

တိုက်ခိုက်ခံရတဲ့ မုံရွာ နမခ တပ်က စစ်သားတွေဟာ မင်းရွာက နေအိမ်တွေကို ဆက်လက်မီးရှို့နေပြီး ရွာအတွင်းမှာရှိတဲ့ နေအိမ် အများအပြား မီးလောင်ဆုံးရှုံး နေတယ်လို့ သူကဆက်ပြောပါတယ်။

စစ်ကောင်စီတပ် ထိခိုက်သေဆုံးမှုတွေနဲ့ ပတ်သက်လို့ ဒေသကာကွယ်ရေးတပ်ဖွဲ့တွေရဲ့ ပြောဆိုမှုတွေအပေါ် မြေလတ်အသံအနေနဲ့ သီးခြားအတည်မပြုနိုင်ပါဘူး။

ဒီတိုက်ခိုက်မှုကိုတော့ Zero ပြောက်ကျားတပ်မဟာ တပ်ရင်း ၇-မြင်းခြံခရိုင်၊ တပ်ရင်း ၂ မြင်းခြံခရိုင်၊ တပ်ရင်း ၁ စစ်ကိုင်းခရိုင်၊ တပ်ရင်း ၂ တပ်ခွဲ ၁ GTR တပ်ခွဲ၊ မန္တလေးခရိုင်တပ်ရင်း၊ မိုးကြိုးဆားတောင်ဦးအဖွဲ့၊ ကိုရန်နိုင်အဖွဲ့၊ မန္တလေး UG အဖွဲ့၊ မုံရွာခရိုင်တပ်ရင်း ၆ နှင့် နယ်မြေခံတပ်ရင်းတပ်ဖွဲ့ တို့က ပူးပေါင်းတိုက်ခိုက်ခဲ့တယ်လို့ သိရပါတယ်။

ပြီးခဲ့တဲ့ ဖေဖော်ဝါရီ ၂၁ ရက်နေ့မှာလည်း အရာတော်မြို့နယ် ကျောက်ပျောက်ရွာနဲ့ မင်းရွာဘက်ကနေ စစ်ကြောင်းထိုးလာတဲ့ စစ်ကောင်စီတပ်ကို Zero ပြောက်ကျားတပ်မဟာအဖွဲ့က တိုက်ခိုက်ခဲ့တာ စစ်ကောင်စီ တပ်သား ၉ ဦး သေဆုံးခဲ့တယ်လို့ သိရပါတယ်။

ရေစကြို၊ ဖေဖော်ဝါရီ ၂၄၊ ၂၀၂၃။

မကွေးတိုင်း၊ ရေစကြိုမြို့နယ်၊ ပခန်းငယ်ရွာမှာ လုံခြုံရေးယူနေတဲ့ စစ်အုပ်စုကို ညအချိန် ဝင်ရောက်တိုက်ခိုက်ခဲ့တာကြောင့် ရဲတဦး သေဆုံးကာ တဦး ထိခိုက်ဒဏ်ရာ ရရှိခဲ့တယ်လို့ ပခုက္ကူခရိုင်တပ်ရင်း ၁၀၊ တပ်ခွဲ ၁ သိန်းဌက်ပြောက်ကျားတပ်ဖွဲ့က သတင်းထုတ်ပြန်ထားပါတယ်။

ရေစကြိုမြို့နယ်၊ ပခန်းငယ်ကျေးရွာအတွင်း စစ်သားနဲ့ရဲအင်အား ၇၀ လောက်နဲ့ လုံခြုံရေးယူနေချိန် ဖေဖေါ်ဝါရီလ ၂၂ ရက်ည ၉ နာရီလောက်မှာ တိုက်ခိုက်ခဲ့တာလို့ ဆိုပါတယ်။

“ပခန်းငယ်ကျေးရွာအတွင်းမှာ လမ်းပေါ်တွေအထိ ရဲတွေ၊ စစ်သားတွေက လုံခြုံရေးယူနေတာကို ကျနော်တို့က တိုက်ခိုက်ခဲ့တာပါ။ သူတို့ဘက်ကလည်း ပြန်ပစ်တယ်။ ရဲတယောက်ဆေးရုံမှာ သေပြီး တယောက်က ပေါင်ကို ထိမှန်ဒဏ်ရာ ရသွားတယ်” လို့ သိန်းဌက်ပြောက်ကျားတပ်ဖွဲ့ ဗိုလ်ရေခဲက ပြောပါတယ်။

ဒီသေဆုံးမှုနဲ့ ပတ်သက်ပြီး မြေလတ်အသံက သီးခြားအတည်မပြုနိုင်သေးပါဘူး။

အပြန်အလှန် ၁၀ မိနစ်လောက် ထိပ်တိုက်ထိတွေ့ပစ်ခတ်ရာ စစ်သားနဲ့ ရဲတွေဘက်က လက်နက်ကြီး လက်နက်ငယ်တွေနဲ့ တရစပ် ပြန်လည်ပစ်ခတ်လို့ ပြန်လည်ဆုတ်ခွာခဲ့တယ်လို့ သူက ဆက်ပြောပါတယ်။

ထိတွေ့တိုက်ပွဲဖြစ်ပြီး နာရီဝက်အကြာ စစ်သားနဲ့ ရဲတွေကလက်နက်ကြီးနဲ့ ရမ်းသမ်းပစ်ခတ်ရာ ပြည်သူနှစ်ဦးလည်း ထိခိုက်ဒဏ်ရာ ရရှိခဲ့တယ်လို့ ဆိုပါတယ်။

ပြည်သူတွေအနေနဲ့ ပစ်ခတ်မှုသံတွေ ကြားပါက ထွက်မကြည့်ဖို့နဲ့ လုံခြုံတဲ့နေရာမှာ နေထိုင်ဖို့ သတိပေးခဲ့ပြီး၊ ဝင်ရောက်စပ်စုတာကြောင့် လုပ်ငန်းတွေ လွဲချော်ခဲ့တာမျိုး ရှိတဲ့အတွက် နောင်တွင် လုပ်ငန်းအောင်မြင်ရေးကိုသာ ဂရုစိုက်လုပ်ဆောင်သွားမှာ ဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။

ပြီးခဲ့တဲ့ ဖေဖေါ်ဝါရီလ ၁၇ ရက်ည ၈ နာရီလောက်ကလည်း သိန်းဌက်ပြောက်ကျားတပ်ဖွဲ့ဟာ ရေစကြိုမြို့နယ်၊ ပခန်းငယ်စခန်းကနေ ညကင်းပတ်ထွက်လာတဲ့ ရဲတွေကို တိုက်ခိုက်ခဲ့ပါသေးတယ်။

ရွှေဘို၊ ဖေဖော်ဝါရီ ၂၂၊ ၂၀၂၃။

စစ်ကိုင်းတိုင်း၊ ရွှေဘိုမြို့နယ်၊ ပေါက်ချိုင်ရွာကို စစ်ကြောင်းထိုးနေတဲ့စစ်သားတွေကို ဒေသခံPDF မဟာမိတ်တွေက ဖေဖေါ်ဝါရီလ ၂၁ ရက်မနေ့ကမနက်ပိုင်းမှာ လက်နက်မျိုးစုံနဲ့ တိုက်ခိုက်ခဲ့တာကြောင့် ထိခိုက်သေဆုံးမှုတွေ များခဲ့တယ်လို့ ဗိုလ်ကျားရိုင်း – ရွှေဘို LPDF က သတင်းထုတ်ပြန်ထားပါတယ်။

ရွှေဘိုမြို့နယ်၊ သပြေကန်ရွာက စာသင်ကျောင်းနဲ့နေအိမ်တလုံးကိုမီးရှို့ပြီး အင်အား ၇၀ ဝန်းကျင်နဲ့ ထွက်လာတဲ့စစ်ကြောင်းက ပေါက်ချိုင်ရွာကနေအိမ်ကိုမီးရှို့ချိန် မနက် ၉ နာရီလောက်မှာ တိုက်မိုင်း အလုံးရေ ၂၀ ကျော်အပြင် ၆၀ မမ ကျကွဲလက်နက်ကြီးတွေ၊ ဒရုန်းတွေနဲ့ အသင့်စောင့် တိုက်ခိုက်ခဲ့တာလို့ ဆိုပါတယ်။

“နယ်မြေရှင်းလင်းရေးလုပ်တဲ့အခါမှာ စစ်သားအလောင်းမီးရိူ့ထားတာတွေ၊ တိုက်မိထားတဲ့ မိုင်းကျင်းတွေဘေးမှာ သွေးကွက်တွေ တွေ့ရတယ်။ စစ်ကြောင်းရှေ့ဆက်မတိုးတာကိုတွက်ရင် သူတို့ဘက်က ဗိုလ်ကြီးအဆင့်လောက်ကျသွားတဲ့သဘောမှာရှိတယ်”လို့ ဗိုလ်ကျားရိုင်းအဖွဲ့က တာဝန်ခံရဲဘော်ဗလကြီးက ပြောပါတယ်။

နယ်မြေရှင်းလင်းစဥ် ၃ ပွင့်ဗိုလ်အကျီတထည်၊ ၄၀ မမ ဗုံးသီးအခွံ၊ ကျည်ဘောက်တခု၊ ၇၃ မမပို့ယမ်းဗူး၊ နင်းမိုင်းတလုံး၊ အခြားအသုံးအဆောင်ပစ္စည်းတွေလည်း သိမ်းဆည်းရမိတယ်လို့ သူကဆက်ပြောပါတယ်။

တိုက်ခိုက်မှုကြောင့် စစ်သား ၂၅ ဦးသေဆုံးကာ ၁၈ ဦးဒဏ်ရာရတယ်လို့ ဗိုလ်ကျားရိုင်း – ရွှေဘို LPDF ကထုတ်ပြန်ထားပေမယ့် ဒီဒဏ်ရာရ၊ သေဆုံးမှုအရေအတွက်နဲ့ပတ်သက်ပြီး မြေလတ်အသံက သီးခြားအတည်မပြုနိုင်သေးပါဘူး။

တိုက်ခိုက်မှုအတွင်း ထိခိုက်သေဆုံးသူတွေများတဲ့အတွက် စစ်ကြောင်းရှေ့ဆက်မတိုးတော့ပဲ ဒဏ်ရာရစစ်သားတွေကိုထမ်းကာ အနီးဆုံးဖြစ်တဲ့ တည်သီးတောရွာဘက်ကို ဝင်ရောက်သွားတယ်လို့ ဆိုပါတယ်။

တိုက်ခိုက်မှုကို ဗိုလ်ကျားရိုင်း-ရွှေဘို(LPDF)အဖွဲ့၊ ဗိုလ်ဂျပန်ကြီး TTT- Shwebo -LPDF၊ C&T SHWEBO LPDF၊ ဗိုလ်ကျားပျံ – ရွှေဘို (LPDF)အပါအဝင် မဟာမိတ်အဖွဲ့တွေက ပူးပေါင်း လုပ်ဆောင်ခဲ့ကြတာလည်း ဖြစ်ပါတယ်။

အဲဒီစစ်ကြောင်းဟာ ဖေဖေါ်ဝါရီလ ၁၂ ရက်ကစတင်ကာ ကျောက်မြင့်ရွာ၊ တင့်တယ်ရွာ၊ ငါးဆူကုန်းရွာ၊ မဲတောရွာ၊ ချီပါရွာ၊ ပန်းလှိုင်ရွာ၊ ရေတော်မူရွာ၊ ဝါးရုံကန်ရွာ၊ သန်းတောရွာ၊ ထူးကြီးရွာ၊ တည်ပင်ကျေးရွာတွေကိုလည်း မီးရိူ့ခဲ့တဲ့ စစ်ကြောင်းဖြစ်တယ်လို့လည်း သိရပါတယ်။

ငါန်းဇွန်၊ ဖေဖော်ဝါရီ ၂၁၊ ၂၀၂၃။

မန္တလေးတိုင်း၊ ငါန်းဇွန်မြို့နယ်၊ သားကြင်ကျေးရွာအနီးမှာ လှည့်ကင်းထွက်လာတဲ့ စစ်ကောင်စီအဖွဲ့ တိုက်ခိုက်ခံရပြီး တပ်ကြပ်ကြီး ၁ ဦးအပါအဝင် ၄ ဦးသေဆုံးတယ်လို့ သိရပါတယ်။

ဖေဖော်ဝါရီလ ၂၀ ရက်ည ၇ နာရီ ၁၅ မိနစ်ခန့်မှာ သားကြင်ရွာမှာတပ်စွဲထားတဲ့ စစ်ကောင်စီအဖွဲ့မှ အင်အား ၁၀ ဦးကျော်ဟာ လှည့်ကင်းထွက်ချိန် ကျေးရွာအပြင်ဘက်ဘုရားနားအရောက်မှာ တိုက်ခိုက်ခဲ့တာလို့ Local People’s Defense Force – SINTGAING ပြန်ကြားရေးတာဝန်ခံက ပြောပါတယ်။

“ကျနော်တို့အဖွဲ့ကို ဒေသကာကွယ်ရေးမိတ်ဖက်အဖွဲ့တွေကခေါ်လို့ ပူးပေါင်းသွားရောက်တိုက်ခိုက်ခဲ့တာပါ။ တိုက်ပွဲဖြစ်ချိန်ကတော့ မိနစ် ၂၀လောက်ကြာတယ်။ သူတို့လူတွေ အလစ်အငိုက်ခံလိုက်ရလို့ ပြန်ပစ်တာပါ။ ထိခိုက်သူတွေကို သူတို့အဖွဲ့တွေပြန်ဆွဲသွားတာက မျက်မြင်ပါ။ မျက်မြင်အရတော့ ၄ ယောက်သေတယ်” လို့ ပြောပါတယ်။

အဲ့ဒီစစ်‌ကြောင်းကို ခြုံခိုတိုက်ခိုက်ဖို့သွားကြချိန် တဖက်ကသတင်းရသွားပြီး စတင်ပစ်ခတ်ခဲ့လို့ သတ်မှတ်နေရာမရောက်ခင်မှာပဲ ထိတွေ့တိုက်ပွဲဖြစ်ခဲ့ကာ အနီးကပ်ပစ်ခတ်ခဲ့ရတယ်လို့လည်း ပူးပေါင်းပါ၀င်တိုက်ခိုက်ခဲ့တဲ့ ငါန်းဇွန်ပကဖတပ်ဖွဲ့မှ သတင်းတာဝန်ခံက ပြောပါတယ်။

“ချဉ်းကပ်တဲ့အနေထားကို ဒီကောင်တွေက ရိပ်စားမိသွားတယ်၊ သတင်းပေးရှိလို့လား ဘာလားတော့ မသိဘူးပေါ့နော်၊ ကျနော်တို့မှန်းသိလိုက်တာနဲ့ စပစ်တာဗျ၊ ဘောလုံးကွင်းထဲမှာစပစ်တော့ ခြုံခိုတိုက်ခိုက်ဖို့ သတ်မှတ်ထားတဲ့နေရာ မရောက်တဲ့အချိန်တွင်းမှာပဲ Battle ဖြစ်သွားတယ်”လို့ ပြောပါတယ်။

အဲဒီတိုက်ပွဲမှာ စစ်ကောင်စီဘက်က တပ်ကြပ်ကြီးအပါ ၄ ဦးသေဆုံးပြီး ၇ ဦးဒဏ်ရာရခဲ့သလို စစ်ကောင်စီတပ်သားတွေအသုံးပြုတဲ့ MA – 2 ၁ လက်နဲ့ဖုန်း၁ လုံးကို သိမ်းဆည်းရမိခဲ့ပြီး သေဆုံးဒဏ်ရရာသူတွေကိုတော့ စစ်ကောင်စီဘက်က ည ၁၂ နာရီခန့်မှာ ကားတွေနဲ့သယ်ဆောင်ကာ ငါန်းဇွန်မြို့ဘက်ကိုသွားတယ်လို့ သိရပါတယ်။

သေဆုံးခဲ့သူတွေထဲမှာ ဗိုလ်ကြီးနန္ဒမင်း ဆိုသူပါပါ၀င်တယ်လို့ တော်လှန်ရေးအင်အားစုတွေဘက်က ‌ပြောဆိုပေမယ့် မြေလတ်အသံက သီးခြားအတည်မပြုနိုင်သေးပါဘူး။

စစ်ကောင်စီဘက်က လက်နက်ကြီးနဲ့ပစ်ခတ်လို့ သားကြင်ရွာထဲက နေအိမ်တခုပေါ် ကျရောက်ပေါက်ကွဲခဲ့ကာ အိမ်မှာရှိတဲ့ ပြည်သူ ၂ ဦးလည်း ထိခိုက်ခဲ့တယ်လို့ သိရပါတယ်။

အဆိုပါစစ်ကောင်စီတပ်ဟာ အင်အား ၃၀ ကျော်နဲ့ သာကြင်ကျေးရွာမှာ တပ်စွဲထားတာ ၃ လကျော်ရှိနေပြီး ဘေးအနီးအနားရွာတွေကို စစ်ကြောင်းလိုက် လှုပ်ရှားသွားလာတာတွေရှိတယ်လို့ ဆိုပါတယ်။

အဲဒီတိုက်ခိုက်မှုကို LPDF SINTGAING၊ TGYR – Youth Guerrila Counter Revolution (LPDF)၊ ငါန်းဇွန်မြို့နယ်ပကဖ၊ MN PDF Myitnge၊ မာန်စွယ်ကျားပြည်သူ့ကာကွယ်ရေးတပ်ဖွဲ့၊ ဇာမဏီ ပျောက်ကြားတပ်ဖွဲ့၊ ကျောက်ဆည် ပကဖ မဟာမိတ်တပ်ဖွဲ့တွေက ပူးပေါင်းတိုက်ခိုက်ခဲ့တာပါ။

ဖေဖော်ဝါရီလ ၁၅ ရက်ညပိုင်းကလည်း ငါန်းဇွန်မြို့နယ်၊ ညောင်ပင်ကြီးရိုးရွာအနီး ငါန်းဇွန်-တံတားဦး ၁၄ မိုင်လမ်းပေါ်မှာ လှည့်ကင်းထွက်လာတဲ့ စစ်ကောင်စီအဖွဲ့မိုင်းဆွဲတိုက်ခိုက်ခံရပြီး ထိခိုက်သေဆုံးတာတွေ ရှိခဲ့သေးတယ်လို့ သိရပါတယ်။

ယင်းမာပင်၊ ဖေဖော်ဝါရီ ၂၀၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်၊ ဘန့်ဘွေးရွာကနေ စစ်ကြောင်းထွက်လာတဲ့ စစ်သားနဲ့ ပျူစောထီးတွေကို ဒေသခံကာကွယ်ရေးတပ်တွေက ဖေဖေါ်ဝါရီလ ၁၉ ရက်မနေ့မနက် ၁၀ နာရီလောက်ကတိုက်ခိုက်တာကြောင့် ၃ ဦးသေဆုံးခဲ့တယ်လို့ ဗျတ္တညီနောင်အဖွဲ့က ပြောပါတယ်။

ဘန့်ဘွေးရွာရဲ့မြောက်ဘက် ၁ မိုင်ခွဲလောက်အကွာ ရေထွက်ရိုးကျေးရွာအနီးမှာ အင်အား ၁၄ ဦးလောက်နဲ့ စစ်ကြောင်းထိုးလာတာကို စောင့်ကြိုတိုက်ခိုက်ခဲ့တာလို့ ဆိုပါတယ်။

“စစ်သားတွေနဲ့ပျူစောထီးတွေ စစ်ကြောင်းထွက်လာတာကို ဒေသအထူးအဖွဲ့က ရေထွက်ရိုးနားက စောင့်ပြီး မောင်းပြန်တွေနဲ့တိုက်ခိုက်ခဲ့တာပါ။ ကျနော်တို့ကျန်တဲ့ ၄ ဖွဲ့ကလည်း ဘန့်ဘွေးရွာထဲက စစ်သားတွေကို လက်နက်ကြီးနဲ့ပစ်ပေးနေတာပါ” လို့ ဗျတ္တညီနောင်အဖွဲ့တာဝန်ရှိသူက ပြောပါတယ်။

တိုက်ခိုက်ခံရမှုကြောင့် ဘန့်ဘွေးရွာသားပျူစောထီးနှစ်ဦးနဲ့ စစ်သားတဦးသေဆုံးခဲ့ပြီး စစ်ကြောင်းကတော့ ရှေ့ဆက်မတိုးတော့ဘဲ နောက်ပြန်လှည့်ကာ အဲဒီနေ့မှာပဲသေဆုံးသူတွေကို ဘန့်ဘွေးသချိုင်းမှာ မီးရှို့သင်္ဂြိုလ်ခဲ့တယ်လို့ သူကဆက်ပြောပါတယ်။

တိုက်ခိုက်မှုဖြစ်ခဲ့တဲ့ ရေထွက်ရိုးရွာအနီးကို မဟာမိတ်အဖွဲ့တွေက နယ်မြေရှင်းလင်းရာ အသားစတွေနဲ့အတူ သွေးစွန်းစစ်ဦးထုပ်တလုံးနဲ့ ကျည် ၅ တောင့်တွေ့ရှိခဲ့တယ်လို့ ဆိုပါတယ်။

အဲဒီတိုက်ခိုက်မှုမှာ ဗျတ္တညီနောင်၊ ဝင်္ကပါအဖွဲ့၊ Black Team၊ Golden Triangel forceနဲ့အတူ ဒေသအထူးအဖွဲ့တို့ ပူးပေါင်းလုပ်ဆောင်ခဲ့တာဖြစ်ပြီး စစ်ကောင်စီဘက်က သေဆုံးမှုအရေအတွက်ကိုတော့ မြေလတ်အသံက သီးခြားအတည်မပြုနိုင်သေးပါဘူး။

ဘန့်ဘွေးကျေးရွာဟာ အိမ်ခြေ ၃၅၀ လောက်ရှိပြီး ပြီးခဲ့တဲ့တနှစ်ခွဲကျော်လောက်ကတည်းက စစ်တပ်က အင်အား ၇၀ လောက်နဲ့ တပ်စွဲနေကာ နေအိမ်တွေကိုမီးရိူ့ခဲ့တာကြောင့် အိမ်ခြေ ၃၄၀ လောက်ကဒေသခံတွေဟာ ရွာကိုစွန့်ခွာပြီး တောတိုက်တွေထဲမှာနေထိုင်နေကြရတာဖြစ်သလို ကျန်အိမ်ခြေ ၁၀ လုံးလောက်တော့ စစ်တပ်နဲ့ပေါင်းပြီး ပျူစောထီးအဖြစ်ကျန်ရှိခဲ့တာဖြစ်ပါတယ်။

ပြီးခဲ့တဲ့ဖေဖေါ်ဝါရီလ ၁၅ ရက်ကလည်း စစ်သားတွေနဲ့ပျူစောထီးတွေဟာ ဘန့်ဘွေးရွာအနီးရှိ တောတိုက်တွေထဲက နေအိမ် ၈ လုံးကို မီးရှို့ဖျက်ဆီးခဲ့ကြပါသေးတယ်။

ဒါ့အပြင် ဇန်နဝါရီလ ၁၇ ရက်ကလည်း ဘန့်ဘွေးရွာက စစ်သားနဲ့ပျူတွေဟာ စစ်ရှောင်နေတဲ့ ဘန့်ဘွေးရွာသား အသက်၂၅ နှစ်အရွယ် ကိုခင်မောင်ဌေးနဲ့ တူဖြစ်သူ ၁၆ နှစ်အရွယ် မောင်နိုင်လင်းအောင်တို့ ၂ ဦးကို ဘန့်ဘွေးရွာကိုရှောင်ကွင်းဖောက်ထားတဲ့လမ်းမှာ ဖမ်းဆီးခဲ့ပြီး၊ ဒီနေ့တိုင်မိသားစုနဲ့ အဆက်အသွယ်မရရှိသေးပါဘူးလို့လည်း သိရပါတယ်။