ကျောင်းအုပ်ဆရာမ

ရေတာရှည်၊ စက်တင်ဘာ ၁၀၊ ၂၀၂၆။

ပဲခူးတိုင်း၊ ရေတာရှည်မြို့နယ်၊ စည်ပိုင်းကျေးရွာကနေ ဗျူဟာ ၁၆ လက်အောက်ခံ တပ်ဖွဲ့တွေက ဖမ်းဆီးခေါ်ဆောင်သွားခံရသူ ကျောင်းအုပ်ဆရာမနဲ့ ရပ်မိရပ်ဖ ၅ ဦးကို ပြန်လွှတ်ပေးလိုက်ပြီလို့ ဒေသကာကွယ်ရေးအဖွဲ့ဝင်တွေထံက သိရပါတယ်။

ပြီးခဲ့တဲ့ ဩဂုတ်လ ၈ ရက်နေ့ညနေပိုင်းမှာ စည်ပိုင်းကျေးရွာ အထက(ခွဲ) ကျောင်းအုပ်ဆရာမကြီး ဒေါ်ဌေးဌေးနွယ်၊ ရပ်မိရပ်ဖတွေဖြစ်တဲ့ ဒေါ်အိမိုးဝင်း၊ ဒေါ်ပူတူးမ၊ ဦးတင်ရှိန်၊ ဦးကျော်ကျော်ဦး၊ ဦးစိုးဝင်းတို့ကို PDF အဖွဲ့ဝင်တွေက ကျေးရွာကနေ ခေါ်ဆောင်သွားခဲ့တာလို့ ဆိုပါတယ်။

“(စကစ)ကျောင်းတွေက ဒီဘက်မှာ ဖွင့်ခွင့် ပေးထားတယ်။ စာမေးပွဲကိစ္စ ရေတာရှည်မြို့ကို သွားရတယ်။ အရင်ကသွားရင် သတင်းပို့ ရတယ်။ အခုက သတင်းမပို့ဘဲ သွားတယ်။ မြို့ပေါ်ရောက်တော့ အုပ်ကြီးတွေနဲ့ တွေ့တယ်၊ ပြောတယ်ဆိုတဲ့ အခြေနေတွေရှိတော့ ပြန်လာတော့ ခေါ်ယူပြီး မေးတာ။ ဖမ်းလာတဲ့ သဘောမဟုတ်ဘူး”လို့ ဒေသကာကွယ်ရေး အဖွဲ့ဝင်တဦးပြောပါတယ်။

ခေါ်ယူစစ်ဆေးမှုလုပ်တာကိုတော့ နာရီပိုင်းလောက်သာ ကြာမြင့်ပေမယ့် လမ်းခရီးဝေးတာ၊ ရေတွေတက်လာနေတာကြောင့် လမ်းခရီးစိတ်မချရလို့ ချက်ချင်း ပြန်မလွှတ်ပေးခဲ့တာလို့ ဆိုပါတယ်။

ကျောင်းအုပ်ဆရာမပါ ၆ ဦးကို ခေါ်ယူစစ်ဆေးပြီးနောက် စက်တင်ဘာလ ၉ ရက်နေ့မနက် ၉ နာရီကျော်မှာ ကျေးရွာအရောက် ပြန်ပို့ပေးခဲ့တယ်လို့ ဆိုပါတယ်။

ကျောင်းအုပ်ဆရာမပါ ရပ်မိရပ်ဖတွေကို PDF အဖွဲ့တွေက ဖမ်းဆီးခေါ်ဆောင်သွားတဲ့ကိစ္စနဲ့ပတ်သက်ပြီး ရွာခံပြည်သူ ၂၀၀ ကျော်က ပြန်လွှတ်ပေးဖို့ စက်တင်ဘာလ ၉ ရက်နေ့ မနက် ၉ နာရီကျော်ခန့်မှာ ဆန္ဒထုတ်ဖော်မှုပြုလုပ်ခဲ့ရာ ဆန္ဒထုတ်ဖော်ချိန်မှာ ဖမ်းဆီးခံထားရသူတွေ ပြန်ရောက်လာတာကြောင့် ဆန္ဒထုတ်ဖော်ပွဲကို ရုပ်သိမ်းသွားကြတယ်လို့ သိရပါတယ်။

အာဏာသိမ်းစစ်တပ်ရဲ့ ဝါဒဖြန့်ချီရေး တယ်လီဂရမ်ချန်နယ်တွေမှာတော့ စည်ပိုင်းကျေးရွာ ဒေသခံပြည်သူတွေက ဖမ်းဆီး ပြန်လွှတ်ပေးဖို့ ဆန္ဒပြတောင်းဆိုနေဆိုပြီး ဓာတ်ပုံတွေနဲ့ ဖြန့်ဝေထားပါတယ်။

◼ တပတ်အတွင်း နတ်မောက်က ကျောင်းဆရာမ ၂ ဦးအသတ်ခံထားရ

နတ်မောက်၊ ဇွန် ၈၊ ၂၀၂၅။

မကွေးတိုင်း၊ နတ်မောက်မြို့နယ်၊ ကူနီကျေးရွာအခြေခံပညာမူလတန်းလွန်ကျောင်း ကျောင်းအုပ်ဆရာမ သေနတ်နဲ့ပစ်သတ်ခံခဲ့ရတယ်လို့ နတ်မောက်ဂဠုန် PDF အဖွဲ့တာဝန်ခံထံက သိရပါတယ်။

အသတ်ခံရသူမှာ စစ်ကောင်စီလက်အောက်ကူနီရွာမူလွန်ကျောင်းအုပ်ဆရာမ အသက် ၄၆ နှစ်အရွယ်ရှိ ဒေါ်ရီရီထွေး ဖြစ်ပြီး မူလွန်ကျောင်းဝန်းအတွင်းရှိနေစဉ် ဇွန် ၆ ရက် ညနေ ၅ နာရီခန့်မှာ သေနတ်သမားတွေက ကျောင်းဝန်းအတွင်းအထိ ဝင်ရောက်ပစ်ခတ်သွားတာလို့ ဆိုပါတယ်။

” ကျောင်းအုပ်ဆရာမကြီးက စကစနဲ့ပေါင်းပြီး ဒလန်သူလျှိုလုပ်တယ်လို့တော့ကြားထားတယ်။ ပညာရေးက အကြီးပိုင်းကျောင်းအုပ်တွေကို လုပ်ပိုင်ခွင့်တွေပေးထားတယ် ကြားတယ်။ သူကဆို စကစခိုင်းတာ လိုလိုလားလားလုပ်ပေးနေသူဖြစ်တယ်။ သူ့ကိုတော့ ကျောင်းထဲမှာပဲရှင်းခံရတယ်လို့ ကြားသိထားရတယ်” လို့ နတ်မောက်ဂဠုန် PDF အဖွဲ့တာဝန်ခံ ဗိုလ်အောင်ဒင်က မြေလတ်အသံကို ပြောပါတယ်။

အဆိုပါ ကျောင်းအုပ်ဆရာမကို ဘယ်လက်နက်ကိုင်အဖွဲ့က ဘာကြောင့်သတ်ဖြတ်ခဲ့တယ်ဆိုတာကိုတော့ သူ့အနေနဲ့ မသိရသေးဘူးလို့ ၎င်းကဆက်ပြောပါတယ်။

သေနတ်နဲ့အနီးကပ်ပစ်ခံရတာကြောင့် ကျောင်းအုပ်ဆရာမ ဒေါ်ရီရီထွေးမှာ ဦးခေါင်းကျည်ထိဒဏ်ရာနဲ့ နေရာမှာပဲသေဆုံးသွားတယ်လို့ သိရပါတယ်။

အဆိုပါ ပစ်ခတ်မှုနဲ့ပတ်သက်ပြီး ဒေသတွင်းအဖွဲ့အစည်းတွေဘက်က ဇွန် ၈ ရက် ဒီကနေ့အထိ တစုံတရာသတင်းထုတ်ပြန်တာမျိုး မတွေ့ရသေးပါဘူး။

စစ်ကောင်စီထောက်ခံတဲ့တယ်လီဂရမ်တွေမှာတော့ ကျောင်းအုပ်ဆရာမကြီးဟာ ကျောင်းဝန်းအတွင်းရှိနေချိန် PDF တွေက ဆိုင်ကယ် ၃ စီးနဲ့ရောက်လာပြီး CDM မပြုလုပ်လို့ဆိုကာ သေနတ်နဲ့ပစ်၊ ဓားနဲ့ခုတ်သတ်ခဲ့လို့ နေရာမှာပင်သေဆုံးသွားတယ်လို့ စွပ်စွဲရေးသားဖော်ပြထားကြပါတယ်။

ပြီးခဲ့တဲ့ ဇွန် ၁ ရက်ကလည်း နတ်မောက်မြို့နယ်၊ ဝက်ချုပ်ကျေးရွာအထက်တန်းကျောင်း(ခွဲ)က စစ်ကောင်စီလက်အောက် အလယ်တန်းပြကျောင်းဆရာမနဲ့ ၎င်း ရဲ့ခင်ပွန်းဖြစ်သူအမျိုးသားတို့ သေနတ်နဲ့ပစ်ခတ်ခံခဲ့ရပြီး သေဆုံးခဲ့လို့ ဇွန်လပထမအပတ်အတွင်းမှာ နတ်မောက်က စစ်ကောင်စီပညာရေးဝန်ထမ်း ၂ ဦး အ သတ်ခံခဲ့ရတာပါ။

ဝက်ချုပ်ရွာက အလယ်တန်းပြကျောင်းဆရာမနဲ့ခင်ပွန်းဖြစ်သူကိုတော့ ဇွန်လ ၁ ရက်မှာ ၎င်းတို့နေအိမ်မှာရှိနေချိန် သေနတ်သမားတွေက လာရောက်ဖမ်းဆီးသွားပြီးနောက် နတ်မောက်-ရေနံချောင်းကားလမ်းဘေးမှာ သေနတ်ပစ်သတ်ခဲ့လို့ ၂ ဦးစလုံးသေဆုံးသွားသေးတယ်လို့ သိရပါတယ်။

စာတည်း – ဟိန်းစံ