ကျောက်တော်

မြေလတ်အသံ၊ စက်တင်ဘာ ၁၊ ၂၀၂၂။

ရခိုင်ပြည်နယ်၊ ကျောက်တော်မြို့၊ ကဝိရတနာ စစ်ဘေးရှောင်စခန်းမှ အမျိုးသားတဦးမှာ စစ်ကောင်စီ၏ ဖမ်းဆီးခြင်းကို ခံလိုက်ရပြီးနောက် ရက်ပေါင်း ၅၀ကျော်အထိ မိသားစုနှင့် အဆက်အသွယ် လုံးဝပြတ်တောက်နေသည်ဟု သိရသည်။

ယခုလို ဦးကျော်ဟိန်း ပျောက်ဆုံးနေ၍ ကျန်ရှိနေသည့် မိသားစု ၅ဦးမှာ ကျန်းမာရေး၊ ပညာရေး၊ စားဝတ်နေရေး ဖြေရှင်းနိုင်ဖို့သူများဆီက ချေးယူ သုံးစွဲနေရသဖြင့် လက်ရှိတွင် အကြွေး ၃သိန်း တင်နေပြီဟု ဇနီးဖြစ်သူဒေါ် အေးသန်းက ပြောသည်။

“ကျမမှာ သားသမီး ၄ယောက်ရှိပါတယ်။ အကြီးဆုံးသားကတော့ ဆယ်တန်းတက်နေပါတယ်။ သားလတ်ကတော့ ၆တန်း၊ သားငယ်ကတော့ ၁တန်းတက်နေပါတယ်။ သမီးအငယ်ဆုံးကတော့ ၄နှစ်ပဲရှိသေးတယ်။ ဒီလထဲမှာဆိုရင် သမီးလေး နေမကောင်းဖြစ်လို့ ဆေးခန်းပြရတယ်။ အကူအညီပေးမယ့် ဆွေမျိုးတွေလည်းမရှိဘူး။ သူများဆီကယူထားတဲ့အကြွေးကိုတောင် ဘယ်လိုပြန် ပေးရမလဲမသိတော့ဘူး”ဟု ဆိုသည်။

ဖမ်းဆီးခံရသူမှာ ဦးကျော်ဟိန်း(ဆေးဆရာ) ၃၉ နှစ် ဖြစ်ပြီး ၎င်းကို ပြီးခဲ့သည့် ဇူလိုင် ၁၉ရက် ညအချိန်တွင် မီးရ ထားစစ်ဘေးရှောင်စခန်းမှ ဆေးကု၍ပြန်လာစဉ် ဖမ်းဆီးခံလိုက်ရခြင်းဖြစ်သည်။

မိသားစုများအနေဖြင့် ဦးကျော်ဟိန်းမှာ လက်ရှိ အချိန်ထိ အသက်ရှင်လျှက်ရှိ၊ မရှိဆိုသည်တခုတည်းကိုသာ သိခွင့်ရရှိလိုကြောင်း ဇနီးဖြစ်သူက စစ်ကောင်စီကို တောင်းဆိုထားသည်။

ဦးကျော်ဟိန်းမှာ ကျောက်တော်မြို့နယ်၊ မီးဝကျေးရွာမှဖြစ်ပြီး မိသားစုနှင့်အတူ ပြီးခဲ့သည့် ၂၀၁၉ခုနှစ်မှစတင်ကာ စစ်ဘေးရှောင်စခန်းတွင် လာရောက် ခိုလှုံနေသူဖြစ်သည်။

ယင်းအပြင် ဦးကျော်ဟိန်းမှာ ဆေးဆရာလုပ်ကာ မိသားစုကို လုပ်ကျွေးနေသူတစ်ဦးဖြစ်ပြီး မည်သည့် အဖွဲ့အစည်းနှင့်လည်း ဆက်စပ်မှုမရှိဟု သိရသည်။

မြေလတ်အသံ၊ သြဂုတ် ၁၇၊ ၂၀၂၂။

ရခိုင်ပြည်နယ်၊ ကျောက်တော်မြို့နယ်၊ အပေါက်ဝကျေးရွာရှိ နေအိမ်တအိမ်မှ ရွှေ ၁၀ ကျပ်သားကျော်နှင့် ပိုက်ဆံ သိန်း (၁၀၀)ကို ယနေ့ဩဂုတ် ၁၇ ရက် ညဥ့် ၁ နာရီကျော်အချိန်ခန့်တွင် ခိုးခံလိုက်ရသည်ဟု သိရသည်။

ခိုခံလိုက်ရသည့်နေအိမ်ပိုင်ရှင်မှာ ဒေါ်ချိုချို ဖြစ်ပြီး၊ ၎င်းမှာ မိခင်၏နာရေး၌ရှိနေစဉ် အဆိုပါပစ္စည်းများကို ခိုးခံလိုက်ရခြင်းဖြစ်သည်။

“ကျမအမေဆုံးလို့ အဲဒီမှာနေနေတာ။ အမေအိမ်က ပြန်လာတော့ တံခါးတွေပွင့်လို့တွေ့ရတယ်။ အိမ်ပေါ်တက်လို့ သေတ္တာကိုကြည့်လိုက်တော့ ခတ်ထားတဲ့လက်ခုပ်သီးတွေ မရှိတော့ဘူး။ သေတ္တာလည်း ပွင့်လို့တွေ့ရတယ်။ ရွှေက ၁၀ ကျပ်သားကျော်တယ်။ ပိုက်ဆံကတော့ သိန်း ၁၀၀ ပါ။ သေတ္တာထဲမှာထည့်ထားတာ၊” ဟုဆိုသည်။

လက်ရှိတွင် ခိုးခံရမှုကို ULA/AAမှ တာဝန်ရှိသူများကို တိုင်တန်းထားသည်ဟု သိရသည်။

အဆိုပါကျေးရွာတွင် ပြီးခဲ့သည့် ၂၀၂၁ ခုနှစ်၊ ဩဂုတ်လ ၂၃ ရက်တွင်လည်း ဦးဘသိန်းမောင်၏ နေအိမ်မှ ရွှေ ၉ ကျပ်သားနှင့် ပလက်တီနမ် ၂ ကျပ်သားတို့ ခိုးခံလိုက်ရသည်ဟု သိရသည်။

မြေလတ်အသံ၊ မေ ၃၁၊ ၂၀၂၂။

ရခိုင်ပြည်နယ်၊ ကျောက်တော်မြို့နယ်၊ ရုပ်သားကျေးရွာမှ အမျိုးသမီးတဦးမှာ ယနေ့ မေလ ၃၁ ရက်နံနက် ၇ နာရီအချိန်ခန့်တွင် ရွာမြောက်ဖက်ရှိတောင်ပေါ်သို့ ဟင်းရှာရန်သွားစဥ် မြေမြုပ်မိုင်းပေါက်ကွဲမှုဖြစ်ကာ ဒဏ်ရာပြင်းထန်စွာရရှိသွားပြီးနောက် သေဆုံးခဲ့သည်ဟု ဒေသခံများကပြောသည်။

သေဆုံးသူမှာ ဒေါ်မတင်သိန်း ၇၅ နှစ်ဖြစ်ပြီး၊ ၎င်းမှာ ခြေထောက်နှစ်ဖက်လုံးပြတ်ထွက်သွားကာ ကျောက်တော်မြို့ဆေးရုံသို့ သယ်ယူလာစဥ်လမ်းတွင် သေဆုံးသွားခြင်းဖြစ်သည်ဟု ကူညီပေးနေသည့် ကျောက်တော်ဒေသခံ ကိုကျော်လှမြင့်က ပြောသည်။

“အခုတော့အလောင်းကို ကျောက်တော်ဆေးရုံ ရင်ခွဲရုံကိုပို့လိုက်တယ်။ သူ့ကို ရွာကနေ ကျောက်တော်ဆေးရုံကို ယူလာတဲ့အချိန်မှာ သွေးထွက်လွန်ပြီးတော့ သေသွားတာပါ၊”ဟု ဆိုသည်။

အဆိုပါမိုင်းပေါက်ကွဲမှုဖြစ်ပွားခဲ့သည့် တောင်တန်းတလျှောက်တွင် စစ်ကောင်စီတပ်များက တပ်စွဲလျှက်ရှိနေသည်မှာ တနှစ်ကျော်ရှိနေပြီ ဖြစ်သည်ဟုလည်း ဒေသခံများကပြောဆိုကြသည်။

အလားတူ အဆိုပါရုပ်သားကျေးရွာတွင် ပြီးခဲ့သည့် ၂၀၂၀ ခုနှစ်အတွင်းကလည်း အသက် ၁၉ နှစ်အရွယ် မန္ဒာအေးမှာ တောင်ပေါ်၌ ဟင်းရှာနေစဥ် မိုင်းပေါက်ကွဲမှုဖြစ်သွားသဖြင့် ခြေထောက်နှစ်ဖက်လုံး ဖြတ်လိုက်ရသည်ဟု သိရသည်။

ရခိုင်တွင် စစ်ရေးပဋိပက္ခဖြစ်ပွားခဲ့စဉ်အတွင်း မြေမြုပ်မိုင်းအပါအဝင် စစ်လက်ကျန်ပစ္စည်းပေါက်ကွဲမှုကြောင့် သေဆုံးခဲ့သူ ၄၄ ဦးရှိပြီး ထိခိုက်ဒဏ်ရာရရှိသူ ၈၁ ဦးရှိခဲ့သည်ဟု ရခိုင်တိုင်းရင်းသားမျိုးနွယ်များအစည်းအရုံး (REC)၏ စာရင်းအရသိရသည်။