မကွေး၊ မတ် ၁၆၊ ၂၀၂၂။

မကွေးတိုင်း၊ ဆင်ပေါင်ဝဲမြို့နယ် ကျေးရွာတခုက လက်နက်ထုတ်လုပ်ရေးစခန်းတခုကို စစ်ကောင်စီက အင်အားအများအပြားနဲ့ မနေ့က မနက် ၆နာရီဝန်းကျင်မှာ ဝင်ရောက်စီးနင်းခဲ့လို့ ဗိဿနိုး PDF ဘက်က လက်နက်ထုတ်လုပ်ရေး ရဲဘော် အနည်းဆုံး ၃ဦး ကျဆုံးပြီး ၂ဦး ပျောက်ဆုံးနေတယ်လို့ သိရပါတယ်။

စစ်ကောင်စီဘက်က ဖောကားတွေ အသုံးပြုပြီး တစီးကို အယောက် ၂၀ နီးပါးနဲ့ စခန်းကို သိမ်းဖို့ ဝင်ရောက်လာပြီး အပြန်အလှန်ပစ်ခတ်မှုတွေရှိခဲ့တယ်လို့ ဗိဿနိုး PDF က ရဲဘော်တဦးက ပြောပါတယ်။

” ကျနော်တို့ဘက်က ၅ယောက်လောက်ပျောက်နေတာ ၃ယောက်တော့ Dead Body ပြန်သယ်မယ် ကျန်တဲ့ ၂ယောက်က ဖမ်းခံရတာလား လွတ်နေတာလား မသိရသေးဘူး၊ သူတို့ဘက်ကလည်း အထိအခိုက်တော့ ရှိမယ်၊သေချာအတည်မပြုနိုင်သေးဘူးဖြစ်နေတယ်၊ အပြန်အလှန်ပစ်ကြတာဆိုတော့ ထိတော့ထိမှာ” လို့ ဗိဿနိုး PDF က ရဲဘော်တဦးက ပြောပါတယ်။

လက်ရှိ ဆင်ပေါင်ဝဲမြို့နယ်က လက်နက်ထုတ်လုပ်တဲ့ စခန်းကို စစ်ကောင်စီက အင်အား ၈၀ နီးပါးနဲ့ ဝင်ရောက်သိမ်းပိုက်ထားပြီး PDF ဘက်က ပျောက်ဆုံး ရဲဘော် ၂ဦးကို စုံစမ်းနေဆဲ ဖြစ်တယ်လို့ သိရပါတယ်။

ဝက်လက်၊ ဒီဇင်ဘာ ၁၀၊ ၂၀၂၁။

ဝက်လက်မြို့နယ်အတွင်းမှာ PDF ရဲဘော် ၂ ဦး ဒီဇင်ဘာ ၉ ရက် မနေ့ကည ၈ နာရီလောက်က မိုင်းထိမှန်ပြီး ကျဆုံးခဲ့တယ်လို့ ဝက်လက် PDF ဆီကသိရပါတယ်။

ဝက်လက်မြို့နယ် ပြည်သူ့ကာကွယ်ရေးတပ်ဖွဲ့ တပ်ရင်း (၁) က ရဲဘော်သုတနဲ့ ရဲဘော်ရာမတို့ဖြစ်ပြီး စစ်ကိုင်းတိုင်း၊ ဝက်လက်မြို့နယ်ထဲက နေရာတခုမှာ စစ်ကောင်စီကို တိုက်ခိုက်ဖို့ မိုင်းထောင်နေချိန်အတွင်းမှာပဲ အမှတ်မထင် ပေါက်ကွဲသွားခဲ့တာကြောင့် နှစ်ဦးစလုံး နေရာမှာတင်ပွဲချင်းပြီး သေဆုံးခဲ့တာဖြစ်တယ်လို့ ဝက်လက် PDF ရဲ့တာဝန်ရှိသူတဦးက မြေလတ်အသံကိုပြောပါတယ်။

“မိုင်းထောင်ရင်းနဲ့မိုင်းက ထကွဲသွားတာပါ၊ ၂ ယောက်လုံးသေဆုံးသွားတာပါ၊ အလောင်းတောင် ကောင်းကောင်းကောက်လို့မရပါဘူး။ တပိုင်းတစဆီဖြစ်သွားတာ၊ ဒီဝက်လက်မြို့နယ်ထဲက ပွိုင့်တခုကို စစ်ကောင်စီတွေလာနေလို့ အပြေးအလွှားထောင်ရင်းနဲ့ ဖြစ်သွားတာ၊ ကျန်ရှိတဲ့ မိသားစုဝင်တွေကိုတော့ ကျနော်တို့တတ်နိုင်သလောက် ထောက်ပံ့ရမှာပေါ့” လို့ သူကဆက်ပြောပါတယ်။

‌ကျဆုံးသွားတဲ့ ရဲဘော်နှစ်ဦးရဲ့ ရုပ်အလောင်းကိုတော့ ဒီဇင်ဘာ ၁၀ ရက် ဒီနေ့နေ့လည်ပိုင်းမှာ ကောင်းမွန်စွာ သင်္ဂြိုဟ်ပေးခဲ့တယ်လို့ သိရပါတယ်။