ကျဆုံး

ဆိပ်ဖြူ၊ ဖေဖော်ဝါရီ ၂၅၊ ၂၀၂၃။

မကွေးတိုင်း၊ ဆိပ်ဖြူမြို့နယ် မြောက်ဘက်ပိုင်းကို ဝင်ရောက်နေတဲ့ စစ်ကောင်စီတပ်ဖွဲ့ကို မိုင်းထောင်ပြီးအပြန်မှာ ခြုံခိုတိုက်ခိုက်ခံရလို့ ဆိပ်ဖြူမြောက်ပိုင်းပြည်သူ့ကာကွယ်ရေးတပ်ဖွဲ့ဝင်တဦး ကျဆုံးသွားတယ်လို့ သိရပါတယ်။

ဖေဖော်ဝါရီ ၂၄ ရက်နေ့ မနေ့က မနက်ပိုင်းမှာ စစ်ကောင်စီစစ်ကြောင်း ၂ ကြောင်း ခွဲထွက်လာတာကို ဆိပ်ဖြူမြို့မြောက်ပိုင်း ပြည်သူ့ကာကွယ်ရေးတပ်ဖွဲ့ဝင်‌တွေက မသိရှိဘဲ မိုင်းထောင်ပြီး ပြန်လာစဉ် ခြုံခိုတိုက်ခိုက်ခံရပြီး အသက် ၂၁ အရွယ် ရဲဘော်ကျားလေးဟာ သွေးထွက်လွန်ပြီး ကျဆုံးသွားခဲ့တယ်လို့ ဆိပ်ဖြူမြောက်ပိုင်း ပြည်သူ့ကာကွယ်ရေးတပ်ဖွဲ့မှ တာဝန်ခံဆရာ ဒေးဗစ်က မြေလတ်အသံကို ပြောပါတယ်။

“ရဲဘော်တွေက ရှေ့ကနေ ကင်းစောင့်နေတယ်။ မိုင်းတွေကို စောင့်နေတယ်။ မိုင်းလမ်းကြောင်းက လွဲသွားတော့ နောက်ထပ်လမ်းကြောင်း တကြောင်းကနေ သူတို့(စစ်ကောင်စီ) ရှေ့တိုးလာမှာသိလို့ အခြားလမ်းမှာ ရဲဘော် ၇ ယောက်က မိုင်းထောင်ပြီး အပြန် ပစ်ခတ်ခံလိုက်ရတယ်” လို့ ဆိုပါတယ်။

ခြေထောက်ထိမှန်သွားတဲ့ ရဲဘော်ကျားပေါက်ကို တပ်ရင်းတပ်ဖွဲ့တွေကလည်း ၂ ဘက် ညှပ်ပြီး သွားရောက်ကယ်ခဲ့ပေမဲ့လည်း အချိန်နောက်ကျသွားတဲ့အတွက် အသက်ကို မမှီလိုက်ဘူးလို့လည်း တာဝန်ခံဆရာဒေးဗစ်က ဆက်ပြောပါတယ်။

“၇ ယောက်မှာ ၆ ယောက်က လွတ်မြောက်လာပြီး သူကတော့ ခြေထောက်ကျည်ထိမှန်လို့ကျန်ခဲ့တယ်။ ကျန်ခဲ့တော့ သူ့ဆီကနေ ဖုန်းနဲ့ဆက်သွယ်လာတယ်။ လာကယ်ပေးဖို့ ပြောတော့ ကျတော်တို့တပ်ရင်းတပ်ဖွဲ့တွေ ကြိုးစားပြီးတော့ ကယ်ခဲ့တယ်။ ဒါပေမဲ့မမှီလိုက်ဘူး” လို့ ဆိုပါတယ်။

သေဆုံးသွားတဲ့ ရဲဘော်ကျားပေါက်ကို ညတွင်းချင်းမှာပဲ သူ့ရဲ့ဇောတိမြေကို ပြန်လည်ခေါ်ဆောင်သွားပြီး မီးရှို့သဂြိုလ်လိုက်တယ်လို့ ဆိုပါတယ်။

ခြုံခိုတိုက်ခိုက်ခဲ့တဲ့ စစ်ကြောင်းဟာ ဖေဖော်ဝါရီ ၂၃ ရက်နေ့ မနက် ၉ နာရီလောက်မှာ ဆိပ်ဖြူမြို့ မြောက်ဘက်မှာရှိတဲ့ တောင်ရွာမရွာထဲကို ဝင်ခဲ့ပြီး စိုက်ခင်းနဲ့ သံပုရာပင်ကြားကတောမှာ ပုန်းခိုနေခဲ့ကာ ဖေဖော်ဝါရီလ ၂၄ ရက်နေ့ မနက် ၆ နာရီလောက်မှာတော့ တပ်မရွာက ကာကွယ်ရေး ကင်းပွိုင့်ကို ဝင်စီးခဲ့ပြီး ကင်းပွိုင့်မှကျန်ခဲ့တဲ့ ဆိုင်ကယ်နဲ့ ပစ္စည်းတချို့ကို မီးရှို့ဖျက်ဆီးခဲ့ပါတယ်။

လက်ရှိအချိန်မှာတော့ အဲဒီစစ်ကြောင်း ၂ ကြောင်းဟာ ပေါင်းစည်းလိုက်ပြီး ဆိပ်ဖြူအစပ် ပခုက္ကူမြို့နယ်ဘက်မှာ ရှိတဲ့ စညောင်းရွာရဲ့အနောက်ဘက် ဒဟက်တော်ထဲမှာ ရှိနေတယ်လို့ သိရပါတယ်။

စစ်ကိုင်း၊ ဖေဖော်ဝါရီ ၁၃၊ ၂၀၂၃။

စစ်ကိုင်းတိုင်းဒေသကြီး၊ ဆားလင်းကြီးမြို့နယ်၊ ကျားတက်ကျေးရွာအနီး ကျေးရွာဖွံ့ဖြိုးရေးလမ်းပေါ်မှာ စစ်ကောင်စီအဖွဲ့ရဲ့ အလစ်တိုက်ခိုက်တာခံရလို့ PDF ရဲဘော် ၇ ဦး ကျဆုံးပြီး ၅ ဦး ဒဏ်ရာရသွားတယ်လို့ သိရပါတယ်။

ဖေဖော်ဝါရီလ ၁၂ ရက်နေ့မနက် ၁၁ နာရီကျော်ခန့်မှာ စစ်ကောင်စီကို သွားတိုက်ဖို့ အသွားနေရာအရွေ့အပြောင်းမှာ စစ်ကောင်စီဘက်က အလစ်တိုက်ခိုက်တာကို ခံလိုက်ရတာဖြစ်တယ်လို့ ဒေါင်းနက်နယ်စည်းမခြား ပြောက်ကျားတပ်ဖွဲ့တာဝန်ရှိသူ ရဲဘော်ပေက ပြောပါတယ်။

“သူတို့က ဆားလင်းကြီးနယ်ထဲက ရွာတရွာမှာ အင်အား ၈၀ လောက်နဲ့ ရောက်နေတယ်လို့ သတင်းရလို့ သွားတိုက်ဖို့ သွားတာ။ အဲရွာကနေမှာ သူတို့က ကျားတက်ဘက်ကို ရောက်သွားတယ်ဆိုပြီး သတင်းပြန်ရလို့ ကျားတက်အထွက်မှာ တိုက်မယ်ဆိုပြီး လူစုပြီးအသွားမှာ စကစဘက်က ပစ်တာကို ခံလိုက်ရတယ်။ ဒီဘက်က ကား ၃ စီးနဲ့ သွားတာပါ။ တိုက်ပွဲက ခဏဘဲ ဖြစ်လိုက်တာပါ။ စစ်ကောင်စီဘက်က ထိခိုက်တာတော့ ရှိနိုင်တယ်။ ဒါပေမယ့် အသေအချာ မသိရဘူး” လို့ ပြောပါတယ်။

အဲဒီတိုက်ပွဲမှာ ဒဏ်ရာရနေတဲ့ ဒေါင်းနက်နယ်စည်းမခြား ပြောက်ကျားတပ်ဖွဲ့ဝင် ၆ ဦးနဲ့ ပကဖ ရဲဘော် ၁ ဦးကို စစ်ကောင်စီက ဓားတွေနဲ့ သတ်ဖြတ်ခဲ့ပြီး ကျဆုံးရဲဘော်တွေထဲက ၄ ဦးကိုတော့ မီးရှို့ ခဲ့တယ်လို့ ဆိုပါတယ်။

ဒါ့အပြင် တိုက်ပွဲထဲမှာ ရဲဘော် ၅ ဦး ဒဏ်ရာရခဲ့ပြီး ဒဏ်ရာရသူတွေကတော့ လုံခြုံတဲ့နေရာကို ပြန်ရောက်ပြီလို့ ဆိုပါတယ်။

အဆိုပါတိုက်ပွဲမှာ ရဲဘော်တွေ အသုံးပြုတဲ့ ကား ၃ စီးကို စစ်ကောင်စီဘက်က မီးရှို့ဖျက်ဆီးခဲ့သလို သေနတ် ၂ လက်ကိုလည်း သိမ်းဆည်းခံလိုက်ရတယ်လို့ သိရပါတယ်။

ကျဆုံးရဲဘော်တွေရဲ့ နားရေးကိစ္စတွေကိုတော့ သက်ဆိုင်ရာအဖွဲ့နဲ့ မိသားစုဝင်တွေက နေ့ချင်းပြီး ဆောင်ရွက်ခဲ့တယ်လို့ ဆိုပါတယ်။

တိုက်ပွဲအပြီးမှာ စစ်ကောင်စီအဖွဲ့ဟာ ပုလဲမြို့ထဲကို ဝင်သွားပြီး စာသင်ကျောင်းမှာ တပ်စွဲနေထိုင်နေတယ်လို့ သိရပါတယ်။

အဲဒီနေ့တိုက်ပွဲကို ဒေါင်းနက်နယ်စည်းမခြား ပြောက်ကျားတပ်ဖွဲ့၊ ရေစကြိုတော်လှန်ရေးတပ်ဖွဲ့၊ ဆားလင်းကြီးတော်လှန်ရေးတပ်ဖွဲ့၊ M7တပ်ဖွဲ့၊ ပုလဲမြို့နယ် ပကဖ တပ်ဖွဲ့တို့ ပူးပေါင်းပြီး တိုက်ခိုက်ခဲ့တယ်လို့ သိရပါတယ်။

ဖေဖော်ဝါရီလ ၂ ရက်နေ့ညက ပုလဲမြို့ပေါ်ကနေ ကျေးရွာတွေဘက်ကို စစ်ကြောင်းထိုးဖို့ အင်အား ၁၀၀ ကျော်နဲ့ ထွက်လာတဲ့ စစ်ကောင်စီအဖွဲ့ကို ပုလဲမြို့နယ် မြောက်ဘက်ဆေးရုံလမ်းကြားအရောက်မှာ ဒေါင်းနက်နယ်စည်းမခြားပြောက်ကျားတပ်ဖွဲ့က မိုင်းဆွဲတိုက်ခိုက်ခဲ့လို့ စစ်ကောင်စီဘက်က ၃ ဦး သေဆုံးပြီး ၈ ဦး ဒဏ်ရာရခဲ့သေးတယ်လို့ သိရပါတယ်။

စစ်ကိုင်း၊ ဒီဇင်ဘာ ၂၀၊ ၂၀၂၂။

စစ်ကိုင်းတိုင်းဆားတောင်မြို့နားက ညောင်ငုတ်တိုတိုက်ပွဲမှာ စစ်ကောင်စီတပ်ကလေယာဉ်နဲ့ ပစ်ကူပေးခဲ့လို့ PDF တပ်စိပ်မှူးတဦး ကျဆုံးသွားတယ်လို့ တပ်ဖွဲ့ဝင်တွေဆီက သိရပါတယ်။

စစ်ကောင်စီနဲ့ ပျူစောထီးအင်အား(၅၀)နီးပါးရှိတဲ့ ဆားတောင်မြို့နားကပျူအခြေစိုက်စခန်းကို စစ်ကိုင်းခရိုင်တပ်ရင်း(၃)၊ စစ်ကိုင်းခရိုင်တပ်ရင်း(၂)၊ LPDFနဲ့ ပကဖတို့ပူးပေါင်းပြီးဒီဇင်ဘာ၁၉ရက် မနေ့ကမနက် ၃နာရီကျော်လောက်မှာ သွားပစ်ခတ်ချိန် တိုက်ပွဲဖြစ်ခဲ့တာလို့ ပြောပါတယ်။

ပစ်ခတ်မှုတွေ ဖြစ်နေချိန် ၈နာရီလောက်မှာ စစ်ကောင်စီတပ်က Mi35 စစ်ရဟတ်ယာဉ် တစီးနဲ့ ပစ်ကူပေးခဲ့လို့ စစ်ကိုင်းခရိုင်ပြည်သူ့ကာကွယ်ရေးတပ်မတော် တပ်ရင်း(၂)တပ်ခွဲ(၁)ကအသက် ၃၀ကျော်တပ်စိပ်မှူး ဗိုလ်ကသာရဲ့ ဦးခေါင်ကျည်ထိပြီး သေဆုံးသွားတယ်လို့ဆိုပါတယ်။

“ညောင်ငုတ်တိုဆိုတာက ဆားတောင်မြို့နားကပျူရွာ။ ပျူအခြေစိုက်စခန်းပါ။ အဲဒီကိုသွားတိုက်ရင်းအပြန်အလှန်ပစ်ခတ်မှုဖြစ်တာ။ ရန်သူဘက်ကအတော်များများသေဆုံးမှုရှိတယ် အတိကျတော့မသိရသေးပါဘူး။ ကိုကသာက ထိတွေ့တိုက်ပွဲအတော်များများပါဝင်ဖူးခဲ့ပြီးရဲရင့်တဲ့သူတယောက်ပါ။”လို့ LPDFတပ်ဖွဲ့ဝင်တဦးကပြောပါတယ်။

ကျဆုံးသွားတဲ့ တပ်စိပ်မှူးဗိုလ်ကသာဟာ KIA တပ်မဟာ ၈ အပတ်စဥ် ၄ စစ်သင်တန်းဆင်းတဦးလည်းဖြစ်ပါတယ်။

ညောင်ငုတ်တိုရွာထဲက စစ်ကောင်စီတပ်နဲ့ ပျူစောထီးတို့ဟာ လက်နက်အားကိုးနဲ့ အနီးနားရွာကဒေသခံတွေကို အနိုင်ကျင့်၊ ရန်ပြုခြင်းမျိုးမကြာခဏပြုလုပ်လေ့ရှိတာကြောင့် ဆားတောင်နယ်အရှေ့ခြမ်း ကျေးရွာကဒေသခံတွေဟာ ဆားတောင်မြို့ပေါ်ကိုစျေးလာမဝယ်ရဲပဲ ဖြစ်နေရတယ်လို့ နယ်မြေခံ သတင်းအရင်းအမြစ်ဆီက သိရပါတယ်။