WY

မြေလတ်အသံ၊ သြဂုတ် ၄၊ ၂၀၂၅။

ပဲခူးတိုင်း၊ ပြည်ခရိုင်၊ ပန်းတောင်းမြို့နယ်မှာ စိတ်ကြွရူးသွပ်ဆေးပြား ၂ သန်းကို ဖမ်းဆီးရမိခဲ့တယ်လို့ သြဂုတ် ၃ ရက်မှာ မူးယစ်ဆေးဝါးအလွဲသုံးမှုထိန်းချုပ်ရေးဗဟိုကော်မတီ (CCDAC-Myanmar) က ထုတ်ပြန်ပါတယ်။

ငွေကျပ် ၃ ဘီလီယံတန်ဖိုးရှိတဲ့ အဆိုပါ YW ဆေးပြား ၂ သန်းကို ကြံခင်းမြို့ကနေတဆင့် ပန်းတောင်းမြို့ကို သယ်ဆောင်လာချိန် ပုသိမ်-မုံရွာလမ်း၊ ရေကျော်ကျေးရွာလမ်းဆုံအနီးမှာ ဇူလိုင် ၂၁ ရက်ည ၉ နာရီကျော်ကဖမ်းဆီးရမိခဲ့တာလို့ ဆိုပါတယ်။

အဆိုပါမူးယစ်ဆေးတွေကို တာဝန်ခံသယ်ယူပေးသူ ကျော်ကျော်ဝင်း၊ ပူးပေါင်းပါဝင်သူ ခင်မောင်လွင်နဲ့ မြတ်မင်းတို့ ၃ ဦးကိုပါ ဖမ်းဆီးရရှိထားတယ်လို့ ထုတ်ပြန်ထားပါတယ်။

စစ်ဆေးပေါ်ပေါက်ချက်အရ အထက်ပါစိတ်ကြွရူးသွပ်ဆေးပြားတွေဟာ ရန်ကုန်မှ ရခိုင်ပြည်နယ်ကို သယ်ဆောင်ရောင်းဝယ်သူ တင်အောင်မိုးရဲ့ အစီအမံနဲ့ ပန်းတောင်းမြို့နယ်နဲ့ မင်းတုန်းမြို့နယ်ကြားရှိ နယ်စပ်ကို တာဝန်ခံသယ်ဆောင်သူ ကျော်ကျော်ဝင်းထံ လွှဲအပ်ခဲ့ပြီးနောက် ရန်ကုန်မှကြံခင်းမြို့ကို မော်တော်ယာဉ်နဲ့ သယ်ဆောင်ခဲ့တာလို့သိရပါတယ်။

ဆက်လက်ပြီး အဲဒီဆေးပြားတွေကို ကြံခင်းမှတဆင့် ပန်းတောင်းမြို့ကို LIFAN ယာဉ်ပိုင်ရှင် စိုးမင်း နဲ့ ယာဉ်မောင်း တင့်ဆွေ တို့ပ ဆက်လက်သယ် ဆောင်ခဲ့ကြပြီး ပန်းတောင်းမြို့နယ်မှတဆင့် ရခိုင်ပြည်နယ်ကို ဆက်လက်သယ်ဆောင်မှာဖြစ်တယ်လို့ ထုတ်ပြန်ချက်မှာဖော်ပြထားပါတယ်။

ပြီးခဲ့တဲ့၂၀၂၄၊ ဇွန် ၁၆ ရက်ကလည်း တန် ဖိုးငွေကျပ် ၁ ဒသမ ၇၄ ဘီလီယံတန်ဖိုးရှိတဲ့ စိတ်ကြွရူးသွပ်ဆေးပြားပေါင်း ၁၁ ဒသမ ၆ သိန်း ကို ပန်းတောင်းမြို့နယ်၊ ရွှေပြည်သာကျေးရွာမှာ စစ်ကောင်စီဘက်က ဖမ်းဆီးရမိခဲ့တယ်လို့သိရပါတယ်။

ဇီးကုန်း၊ ဧပြီ ၁၁၊ ၂၀၂၅။

ပဲခူးတိုင်းအနောက်ခြမ်း၊ ဇီးကုန်းမြို့နယ် စစ်ကောင်စီအမာခံ သတင်းပေးထောက်တိုင် ကြက်ခြေနီခေါင်းဆောင်ထံက WY ဆေးပြားတွေ ဖမ်းဆီးမိခဲ့တယ်လို့ မြို့ခံတဦးဆီက သိရပါတယ်။

ဖမ်းဆီးခံရသူမှာ ဇီးကုန်ကြက်ခြေနီအဖွဲ့ခေါင်းဆောင် အသက် ၅၀ နှစ်ကျော်အရွယ် ကိုကျော်စိုးမင်း (ခ)မင်းမင်း (ခ)မင်းလေးဖြစ်ပြီး ဧပြီ ၉ ရက် မွန်းလွဲ ၁ နာရီလောက်မှာ ၎င်းနေထိုင်ရာ အမှတ် ၁ ရပ်ကွက်၊ မြရတနာလမ်းနေအိမ်ကို သာယာဝတီခရိုင်ရဲတပ်ဖွဲ့က ဝင်ရောက်ရှာဖွေစဉ် WYဆေးပြား ၅၂ ပြားနဲ့အတူ ဖမ်းမိခဲ့တာလို့ ဆိုပါတယ်။

“ ရဲ**တွေ စဝင်ဖမ်းတဲ့နေ့က ဆေးပြားတွေတွေ့လို့ သူက အိမ်ထဲကနေထွက်ပြေးတာ။ လာဖမ်းတဲ့ရဲတွေက လမ်းမပေါ်အထိလိုက်ဖမ်းရတယ်။ စဖမ်းတဲ့နေ့ကတည်းက သာယာဝတီရဲစခန်းအချုပ်ထဲကို ခေါ်သွားတာ။ သူက WYရောင်းနေတာကြာပြီ၊ သူ့ကိုဖမ်းလို့ မြို့ခံတွေဝမ်းသာနေကြတယ်။“ လို့ ဇီးကုန်းမြို့ခံတဦးက မြေလတ်အသံကို ပြောပါတယ်။

ကိုကျော်မင်းစိုးဟာ ယခင်ကလည်း စသုံးလုံး(အထူးစုံစမ်းစစ်ဆေးရေးဦးစီးဌာန) သတင်းပေးလုပ်ခဲ့သလို လက်ရှိအာဏာသိမ်းကာလမှာလည်း စစ်ကောင်စီတပ်သားတွေနဲ့ပေါင်းပြီး ဒီမိုကရေစီထောက်ခံသူတွေရဲ့ အိမ်ရှေ့တွေကို သွားရောက်ဆဲဆိုတာတွေလည်း ပြုလုပ်လေ့ရှိတယ်လို့ သူကဆက်ပြောပါတယ်။

ဇီးကုန်းမြို့ခံနောက်တဦးကလည်း ကိုကျော်မင်းစိုးဟာ ဗိုလ်ချုပ်သန်းရွှေ စစ်အစိုးရလက်ထက် ၂၀၀၀ ပြည့်နှစ်အကျော်ကာလတွေကတည်းက စစ်တပ်သတင်းပေးလုပ်ခဲ့သလို ၂၀၁၀ ရွေးကောက်ပွဲမှာ ကြံ့ခိုင်ရေးပါတီမဲအောင်နိုင်ရေးအတွက် လုပ်ဆောင်ခဲ့သူလည်း ဖြစ်တယ်လို့ ဆိုပါတယ်။

“ဇီးကုန်းမြို့နယ်ကြံ့ခိုင်ရေးပါတီကနေ ဝင်ပြိုင်တဲ့ ဦး​ဉာဏ်ထွန်း မဲအောင်နိုင်ရေးကိုလည်း သူပဲလုပ်ခဲ့တာ။ သန်းရွှေကြီးခေတ်က စသုံးလုံး အင်ဖော်မာလည်းသူလုပ်ဖူးတယ် ခုလည်း စစ်တပ်အမာခံ။” လို့ ပြောပါတယ်။

ပြီးခဲ့တဲ့ ဖေဖေါ်ဝါရီ ၂၈ ရက်ကလည်း ပန်းတောင်းမြို့နယ်၊ ရပ်သာအုပ်စု၊ ပုသိမ် – မုံရွာကား လမ်းပေါ်မှာ ကျပ် သိန်းပေါင်း ၂ သောင်းကျော်တန်ဖိုးရှိ WYဆေးပြားတွေ ဖမ်းမိခဲ့သေးတယ်လို့ သိရပါတယ်။

သတင်း – မောင်ဆွေအင်း၊ စာတည်း – ဟိန်းစံ