PDF

မန္တလေး၊ ဇွန် ၁၇၊ ၂၀၂၃။

မန္တလေးတိုင်းဒေသကြီး၊ နွားထိုးကြီးမြို့နယ်၊ မကျည်းကန်ကျေးရွာအနီး နွားထိုးကြီး-မလှိုင်သွား ကားလမ်းဘေးမှာ စစ်ကောင်စီက လက်နက်ပေးထားတဲ့ ပျူစောထီးဆိုသူ ၂ ဦးပစ်ခတ်ခံရလို့ သေဆုံးသွားတယ်လို့ ဒေသကာကွယ်ရေးအဖွဲ့ဝင်တွေထံက သိရပါတယ်။

ဇွန်လ ၁၆ ရက် နေ့လည် ၁ နာရီခန့်မှာ သုံးတောင်ကျေးရွာမှမကျီးကန်ကျေးရွာကို ထော်လာဂျီနဲ့သွားတဲ့ ပျူစောထီးဆိုသူ ဦးဌေးလှိုင် ၅၅ နှစ်၊ ဦးမောင်ညို ၆၉ နှစ်တို့ကို ပစ်ခတ်ရှင်းလင်းခဲ့တာလို့ ဆိုပါတယ်။

“သူတို့သွားမယ်ဆိုတာ သတင်းရလို့ လမ်းကနေ စောင့်ပြီး ရှင်းလိုက်တာ။ သူတို့လာတာ ​ထော်လာဂျီတွေနဲ့ကော ဆိုင်ကယ်တွေနဲ့ကောဘဲ အမျိုးသမီးတွေလဲပါတယ်။ ကျန်သူတွေကို ပြန်လွှတ်ပြီး သူတို့ နှစ်ယောက်ကိုဘဲ ရှင်းလိုက်တာ” လို့ ဒေသကာကွယ်ရေး အဖွဲ့ဝင်တဦးက ပြောပါတယ်။

အဲဒီ ၂ ဦးကို ဦးခေါင်းကိုဘဲ ရွေးပြီးပစ်ခတ်ခဲ့လို့ နေရာမှာဘဲ သေဆုံးသွားတယ်လို့ ဆိုပါတယ်။

ရှင်းလင်းပြီးချိန်မှာ စစ်ကောင်စီဘက်က ထုတ်ပေးထားတဲ့ ပွိုင့်တူတူး လက်လုပ်​သေနတ်တလက်၊ မိတ္ထီလာအခြေစိုက် တပ်မ ၉၉ ဌာနချုပ်က သေနတ်ထုတ်ပေးထားကြောင်း စာရွက်စာတမ်းတခု သိမ် းဆည်းရမိခဲ့တယ်လို့ သိရပါတယ်။

သေဆုံးသူ ၂ ဦးဟာ သုံးတောင်ကျေးရွာက ဖြစ်ပြီး လက်နက်ရှိ ပျူတွေဖြစ်တာကြောင့် ကျေးရွာအတွင်း လျှပ်စစ်မီးကိစ္စ၊ စိုက်ဘဏ်ချေးငွေ ကိစ္စတွေမှာ ပြည်သူတွေကို ဖိအားပေးတာနဲ့ PDF တွေကို ရွာသားတွေဘက်က မထောက်ပံနိုင်၊ မကူညီနိုငိအောင် လုပ်ဆောင်နေသူတွေဖြစ်တယ်လို့ ဆိုပါတယ်။

ရှင်းလင်းခံရတဲ့ ၂ ဦးရဲ့ ပျူစောထီးနဲ့ပတ်သက်ပြီး သီးခြားအချက်အလက်များကို မြေလတ်အသံအနေနဲ့ အတည်ပြုနိုင်ခြင်းမရှိသေးပါဘူး။

ဖေဖော်ဝါရီ ၁၇ ရက်က နွားထိုးကြီးမြို့နယ်၊ ထန်းဇင်ရွာအနီး အင်အား ၃၀ ခန့်ရှိ စစ်ကောင်စီတပ်စခန်းကို PDF တွေဘက်က ဒရုန်းနဲ့ ဗုံးသီး ၂ လုံးချတိုက်ခိုက်ခဲ့ရာ ၃ ဦးသေ၊ ၄ ဦး ဒဏ်ရာရရှိခဲ့သေးတယ်လို့ သိရပါတယ်။

စာတည်း-နွေဦးငြိမ်းချမ်း

မန္တလေး၊ ဇွန် ၁၇၊ ၂၀၂၃။

မန္တလေးတိုင်းထဲမှာအခြေစိုက်ထားတဲ့ Bagan Ogre Force(PDF)အဖွဲ့ တပ်ဖွဲ့ဝင်တွေကို မြို့သိမ်းတိုက်ပွဲအတွက် အထူးကွန်မန်ဒိုသင်တန်း ရက် ၁၀၀ စစ်ရေးလေ့ကျင်မှုပြုလုပ်ခဲ့တယ်လို့ တပ်ဖွဲ့ခေါင်း ဆောင် ဗိုလ်ဇီးကွက်က ပြောပါတယ်။

Bagan Ogre Force အထူးကွန်မန်ဒိုသင်တန်းသား ၁၅ ဦးကို တိုင်းရင်းသားတော်လှန်ရေးတပ်ဖွဲ့(EAO)တခုက သင်တန်းဆရာတွေနဲ့ မတ်လ ၂ ရက်နေ့ ကနေ ဇွန်လ ၁၄ ရက်အထိ လေ့ကျင့်ပေးခဲ့တာလို့ဆိုပါတယ်။

“အဓိက က မြို့ပြ Urban Operation (မြို့ပြစစ်ဆင်ရေး) အတွက်ပါ။ Urban နဲ့ Jungle( တောတွင်း) ကမတူဘူး Urban က အနီးကပ်တိုက်ခိုက်တာ Jungle ထက်လျှင်မြန်ရတယ် ရုပ်ပြောင်း၊ ရုပ်လွှဲ မြန်ရမယ်။ ပြည်သူနဲ့တသားတည်းနေနိုင်ရမယ်။ အဓိကမြို့ပြကိုပြန်သိမ်းဖို့ မြို့ပြစစ်ဆင်ရေးအတွက် သင်တန်းပေးတာပါ ” လို့ ဗိုလ်ဇီးကွက်က မြေလတ်အသံကို ပြောပါတယ်။

အခြေနေအချိန်အခါပေါ်မူတည်ပြီး ရန်သူနဲ့အနီးကပ်တိုက်ခိုက်နည်း ၊ ရန်သူ့စခန်းကိုလျှပ်တပြက်ဝင်ရောက်တိုက်ခိုက်နည်း၊ ဝင်ရောက်ချေမှုန်းနည်းတွေကို ဦးစားပေးသင်ကြားပေးပါတယ်လို့ သူက ဆက်ပြောပါတယ်။

လေ့ကျင့်ရာမှာသက်လုံနဲ့ လျှင်မြန်မှုရှိဖို့အတွက် ပြေးတာ၊ အမြင့်ခုန်တာ၊ အုတ်နံရံတွေကိုခုန်တက်တာ၊ အခန်းတွင်းဝင်ရောက်ရှင်းလင်းတာစတဲ့ မြို့ပြစစ်ဆင်ရေးအတွက် လိုအပ်တဲ့လေ့ကျင့်မှုတွေကို အတွေ့ အကြုံရှိသင်တန်းဆရာတွေကသင်ကြားပေးတာလို့ဆိုပါတယ်။

Bagan Ogre Forceအဖွဲ့နဲ့ ညောင်ဦးခရိုင်တပ်ရင်း ၅ တို့ဟာဒေသခံကာကွယ်ရေးတပ်တွေနဲ့ပေါင်းကာ ဇွန်လ ၄ ရက်က စစ်ကိုင်းတိုင်း၊ တန့်ဆည်မြို့နယ်ထဲက ကဘဲရွာစစ်ကောင်စီကင်းစခန်းကိုတိုက် ခိုက်ခဲ့ကြပါသေးတယ်။

စာတည်း- ရင်ငြိမ်း

စစ်ကိုင်း၊ ဇွန် ၁၇၊ ၂၀၂၃။

စစ်ကိုင်းတိုင်း၊ ကောလင်းခရိုင်၊ ဝန်းသိုမြို့နယ် ပျူစောထီးခေါင်းဆောင်အပါ ၃ ဦးကိုတော် လှန်ရေးရဲဘော်တွေက ပစ်ခတ်ရှင်းလင်းခဲ့တယ်လို့ WunTho Revolution.WR တပ်ဖွဲ့ထံကသိရပါတယ်။

ဇွန်လ ၁၆ ရက် မနက် ၇ အချိန်ခန့်မှာ ဝန်းသိုမြို့အရှေ့ဘက်ရှိ ရွှေကောင်းထက်ဆီဆိုင်မှာ ရပ်နားထားတဲ့ စက်သုံးဆီဘောက်ဆာကားတွေကို အခွန်ကောက်ဖို့ ကားနဲ့လာတဲ့ပျူစောထီး ၃ ဦးကို လက်ဦးမှုရယူပြီး၊ ပစ်ခတ်ရှင်းလင်းခဲ့တယ်လို့ ကောလင်းခရိုင် အမှတ် (၄) တပ်ရင်း၊ WunTho Revolution (WR) အဖွဲ့ စစ်မြေပြင်ထောက်လှမ်းရေးနဲ့ သတင်းစုဆောင်းရေးအရာရှိတဦးက မြေလတ်အသံကို ပြောပါတယ်။

“ပျူခေါင်းဆောင်နဲ့အဖွဲ့ အခွန်လာကောက်မှာ သိလို့ကြိုစောင့်နေခဲ့တာပါ။ ပျူတွေဆီဆိုင်ထဲရောက်တာနဲ့ ဝင်ပစ်ခဲ့တာပါ။ သူတို့ဘက်က ပြန်မပစ်နိုင်ခဲ့ပါဘူး။ ပျူခေါင်းဆောင်အပါ ၃ ဦးနေရာမှာ ပွဲချင်းပြီးသေသွားတယ်။ လက်နက်ခဲယမ်းတွေလည်း ရခဲ့တယ်” လို့ သူကပြောပါတယ်။

တော်လှန်ရေးရဲဘော်တွေ ပစ်ခတ်ရှင်းလင်းခဲ့သူတွေမှာ ဝန်းသိုမြို့ ပျူစောထီးခေါင်းဆောင်ကျော်ဝင်းမောင်၊ ဝင်းကို နဲ့ အမည်မသိသူတဦးတို့ဖြစ်ပြီး၊ အဲဒီပျူအများစုဟာ လူစိတ်မရှိကြဘဲ၊ ပြည်သူတွေကိုသတ်တာ အိမ်တွေမီးရှို့တာပစ္စည်းတွေ မတရားသိမ်းတာ ဆက်ကြေး ကောက်တာတွေလုပ်နေတော့ ရှင်းလင်းခဲ့ရတာလို့ သူက ဆက်ပြောပါတယ်။

ပျူတွေထံကလည်း ကာဘိုင်သေနတ် ၁ လက်နဲ့ ကျည်ဘောက် ၂ ခု၊ KA သေနတ် ၁ လက်နဲ့ကျည်ဘောက် ၂ ခု ၊ လက်လုပ်သေနတ် အတိုတလက်၊ ကော်သေနတ်တလက်၊ ကျည်အမျိုးအစားက 9.5 မီလီကျည်ဆံတချို့ နဲ့ အသုံးအဆောင်ပစ္စည်းတွေ သိမ်းဆည်းရခဲ့တယ် လို့ဆိုပါတယ်။

ပျူသုံးဦးကို ရှင်းလင်းရာမှာ ဝန်းသို PDF.နဲ့အတူ ဝန်းသို ပကဖ အဖွဲ့အင်အား ၉ ဦးနဲ့ လုပ်ဆောင်ခဲ့တာဖြစ်ပြီး တပ်ဖွဲ့ဝင်တွေ အထိအခိုက်မရှိခဲ့ဘူးလို့ သိရပါတယ်။

ဇွန်လ ၁၂ ရက် နေ့လယ်ပိုင်းမှာလည်း စစ်သားနဲ့ ပျူစောထီးတွေက ကန့်ဘလူခရိုင်၊ ချပ်သင်းတိုက်နယ်၊ ဇင်းကျေးရွာအနားမှာရှိတဲ့ စစ်ရှောင်တဲ ၉ လုံး၊ ကျွဲနှစ်ကောင်၊ နွားတကောင်၊ ဆန်တင်း ၆၀ ကျော်တိုကို့လည်း မီးရှို့ဖျက်ဆီးခဲ့တယ်လို့ သိရပါတယ်။

စာတည်း – နွေဦးငြိမ်းချမ်း

မကွေး၊ ဇွန် ၁၆၊ ၂၀၂၃။

မကွေးတိုင်း၊ မြိုင်မြို့နယ်၊ ကန်နီ (ပျူရွာ) ကနေ ရိက္ခာရှာထွက်လာတဲ့ စစ်ကောင်စီတပ်နဲ့ ပျူစောထီးတပ်ဖွဲ့တွေကို ကာကွယ်ရေးပူးပေါင်းတပ်ဖွဲ့တွေက ဇွန်လ ၁၄ ရက် နေ့လယ် ၂ နာရီခွဲကနေ ၃ နာရီခွဲအထိ လက်နက်ကြီးတွေနဲ့ ပစ်ခတ်ခဲ့တယ်လို့ PDF တပ်ဖွဲ့တွေဆီက သိရပါတယ်။

အင်အား ၅၀ နီးပါးရှိ စစ်ကောင်စီ၊ ပျူစောထီးတပ်ဖွဲ့တွေဟာ ကန်နီရွာရဲ့တောင်ဘက်ခြမ်းကို ထွက်လာတယ်လို့ သတင်းရရှိထားတဲ့အတွက် ဒေသကာကွယ်ရေး ပူးပေါင်းတပ်ဖွဲ့တွေက အသင့်စောင့်ဆိုင်းပြီး ၆၀ မမ၊ ၈၀ မမ လက်နက်ကြီးတွေနဲ့ ပစ်ခတ်ခဲ့တယ်လို့ ဆိုပါတယ်။

“သူတို့က အရှေ့တည့်တည့်ကို ထွက်လာပြီးတော့မှ တောင်ဘက်ခြမ်းကို ချိုးသွားတယ်။ တောင်ဘက်ခြမ်းမှာက ကျနော်တို့ မိုင်းကွင်းရှိတယ်။ အဲဒီမိုင်းကွင်းကို သူတို့က ကျော်သွားတော့ ကျနော့်ရဲ့နီးစပ်ရာ မဟာမိတ်အဖွဲ့တွေကို လှမ်းခေါ်ပြီးတော့မှ လက်နက်ကြီးတွေနဲ့ ပစ်ခဲ့တယ်” လို့ ပခုက္ကူခရိုင် အမှတ် (၁၇) တပ်ရင်းမှ ဒုတပ်ရင်းမှူး ကိုဘီလုံးက ပြောပါတယ်။

အဲဒီပစ်ခတ်မှုမှာ စစ်ကောင်စီဘက်က ထိခိုက်သေဆုံးတာတွေနဲ့ ပတ်သက်ပြီး စုံစမ်းနေဆဲလို့လည်း ဆိုပါတယ်။ လက်နက်ကြီးတွေနဲ့ ပစ်ခတ်ခံရတဲ့ စစ်ကောင်စီနဲ့ ပျူစောထီးတပ်ဖွဲ့တွေဟာ ကန်နီ(ပျူရွာ)ထဲကို ညနေ ၅ နာရီလောက်မှာ ပြန်လည်ဝင်ရောက်သွားခဲ့တယ်လို့လည်း ဆိုပါတယ်။

ကန်နီရွာမှာ ရှိနေတဲ့ စစ်ကောင်စီနဲ့ ပျူစောထီးတပ်ဖွဲ့တွေမှာ ရိက္ခာတွေပြတ်တောက်နေပြီဖြစ်တယ်လို့ ကြားသိရပြီး အခုလို ရိက္ခာတွေ ပြတ်တောက်နေပေမယ့်လည်း မြိုင်မြို့ထဲမှာရှိတဲ့ စစ်ကောင်စီတပ်ဖွဲ့တွေကလည်း ကူညီဖြေရှင်းပေးနေတာမျိုး မရှိဘူးလို့ ကိုဘီးလုံးက ဆက်ပြောပါတယ်။

ပစ်ခတ်မှုကို ပခုက္ကူခရိုင်အမှတ် (၁၇) တပ်ရင်း၊ ယင်းမာပင်ခရိုင် အမှတ် (၁၀)တပ်ရင်းမှ MRG တပ်ခွဲ၊ ဗိုလ်စနေ Local အဖွဲ့နဲ့ PK Local အဖွဲ့တို့က ပူးပေါင်းတိုက်ခိုက်ခဲ့ကြပါတယ်။

စာတည်း – 007

မကွေး၊ ဇွန် ၁၅၊ ၂၀၂၃။

မကွေးတိုင်း၊ နတ်မောက်မြို့နယ်၊ ရွှေပန်းတောရွာအနီးမှာ စစ်ကောင်စီလက်အောက်ခံ ဆက်သွယ်ရေးတပ်က တပ်ကြပ်ကြီးတဦးကို ပစ်ခတ်ခဲ့လို့ ပွဲချင်းပြီးသေဆုံးသွားတယ်လို့ ဒေါင်းစစ်သည်ပြောက်ကျားတပ်ဖွဲ့ထံက သိရပါတယ်။

သေဆုံးသွားသူဟာ နတ်မောက်မြို့နယ်၊ ရွှေပန်းတောနဲ့ ဂွေးကုန်းရွာအကြားရှိ အမှတ် ၂ ပင်မဆက်သွယ်ရေးတပ်ရင်းက တပ်ကြပ်ကြီး/စာရေး ထက်ကိုလင်း ဆိုသူဖြစ်ပြီး ဇွန်လ ၁၄ ရက် မနေ့ မနက် ၆နာရီဝန်းကျင်က တပ်အတွက် ရိက္ခာထွက်ဝယ်ချိန် သေနတ်နဲ့ ၅ ချက်ပစ်ခတ်ရှင်းလင်းခဲ့တာလို့ ဆိုပါတယ်။

“တပတ်လောက်လေ့လာပြီးမှ မစ်ရှင်ဖော်ဆောင်ခဲ့တာပါ။ တပ်နဲ့ ၃မိုင်လောက်အကွာက ရွာနဲ့ဝေးပြီး လူရှင်းတဲ့ လယ်ကွင်းထဲမှာ ရှင်းခဲ့တာ။ သူက တပ်ရိက္ခာပိုင်းနဲ့ တပ်တွင်းစားဖိုဆောင်ကို စီမံရတဲ့သူ” လို့ ဒေါင်းစစ်သည်တပ်ဖွဲ့ တာဝန်ရှိသူတဦးက မြေလတ်အသံကို ပြောပါတယ်။

အဆိုပါ တပ်ကြပ်ကြီးရဲ့အလောင်းကို ရွှေပန်းတောရဲစခန်းထဲကို သယ်သွားကြပြီးနောက် နတ်မောက်ကနေ စစ်ကား ၂ စီး လူနာတင်ယာဉ်တစီးနဲ့ ရောက်လာကာ တပ်ထဲကိုပြန်သယ်သွားတယ်လို့ ဆိုပါ တယ်။

အခင်းဖြစ်ပွားပြီးနောက် ရွှေပန်းတောရွာအနီးတဝိုက်က ဒေသခံတွေကို စစ်ကောင်စီတပ်က မှတ်ပုံတင်ကအစ အသေးစိတ်စစ်ဆေးနေပြီး ရွှေပန်းတောစာသင်ကျောင်းကိုလည်း ပိတ်လိုက်တယ်လို့ သိရပါ တယ်။

အဆိုပါ စစ်ဆင်ရေးကို ဒေါင်းစစ်သည်ပြောက်ကျားတပ်ဖွဲ့(နတ်မောက်) နဲ့အတူ Magway Guerrilla Warfare (မကွေးပြောက်ကျားတပ်ဖွဲ့)တို့ ပူးပေါင်း လုပ်ဆောင်ခဲ့တာလည်း ဖြစ်ပါတယ်။

ပြီးခဲ့တဲ့ ဇွန်လ ၅ရက်ကလည်း နတ်မောက်မြို့ မြင်းတဲကြီးရွာက စစ်ကောင်စီသတင်းပေး တင်မောင်ဝင်းကို ဂဠုန်တပ် နတ်မောက်PDFတပ်ခွဲက ရှင်းလင်းခဲ့ပါသေးတယ်။

စာတည်း – ရင်ငြိမ်း

မန္တလေး၊ ဇွန် ၁၅၊ ၂၀၂၃။

မန္တလေးတိုင်း၊ သပိတ်ကျင်းမြို့နယ်မှာ ဇွန်လ ၁၄ ရက် မနေ့ မနက် ၉ နာရီဝန်းကျင်က သင်္ကန်းဝတ် ၁ ဦးနဲ့ အမျိုးသား ၂ ဦး အသတ်ခံခဲ့ရတယ်လို့ ဒေသခံတွေဆီကသိရပါတယ်။

အသတ်ခံရသူတွေဟာ မန္တလေး-ဗန်းမော်ကားလမ်းဘေး ကိုးပင်ကျေးရွာမှာ တပါးတည်း နေထိုင်တဲ့ အသက် ၆၀ ခန့်အရွယ် ဦးဇင်း မြင့်ဦး၊ လက်ပန်းကုန်းနဲ့ ဆယ်ဇင်းကုန်းကျေးရွာတွေမှာနေထိုင်တဲ့ အ သက် ၅၅ နှစ် ဝန်းကျင် ဦးဟန်ညွန့်နဲ့ ဦးမောင်သောင်းတို့ ဖြစ်ကြကာ သူတို့ ၂ ဦးဟာ အဲ့ဒီ ၂ ရွာအကြားမှာ ပစ်ခတ်ခံခဲ့ရတာလို့ ဆိုပါတယ်။

“မနေ့က ဖြစ်စဥ် ၃ ခုဖြစ်ခဲ့တယ်။ သေသွားတဲ့ဘုန်းကြီးက အုပ်ကြီးလုပ်မယ်ဆိုပြီး စကစဆီက သေနတ် ယူထားတယ်လို့သိရတယ်၊ စကစတွေနဲ့ဆက်စပ်မှုရှိလို့ သတ်ခံရတာလို့ သိရတယ်။ အမျိုးသား ၂ ယောက် သေဆုံးတာမှာတော့သတင်း ၂ မျိုးထွက်နေတယ်။ သူတို့တွေကိုကျတော့ နေအိမ်တွေကနေခေါ်ထုတ်သွားပြီး လမ်းမှာ သတ်သွားတာ” လို့ ဒေသတွင်းကာကွယ်ရေးအဖွဲ့တခုရဲ့ တာဝန်ရှိသူတဦးက မြေလတ်အသံ ကို ပြောပါတယ်။

ကိုးပင်ကျေးရွာက အုပ်ချုပ်ရေးမှူးဟာ ၎င်းရဲ့သား ပျူစောထီးအဖွဲ့ဝင်ဖြစ်သူကို PDF တွေဘက်က ရှင်းလင်းလိုက်ပြီးတဲ့နောက် အုပ်ချုပ်ရေးမှူးနေရာကနေ နှုတ်ထွက်လိုက်ကာ အဲ့ဒီလစ်လပ်နေတဲ့ အုပ်ချုပ်ရေးမှူးနေရာကို ဦးဇင်း မြင့်ဦးက လုပ်ဆောင်မည်ဆိုကာ စစ်ကောင်စီနဲ့ပေါင်းသင်းနေသူဖြစ်တယ်လို့ ဒေသခံတွေက ပြောပါတယ်။

ရွာခံအမျိုးသား ၂ ဦးသတ်ဖြတ်ခံရမှုမှာတော့ စစ်ကောင်စီနဲ့ပတ်သက်သူမဟုတ်ဘဲ သာမန်ပြည်သူတွေ ဖြစ်တယ်လို့ သတင်းတွေထွက်နေသလို စစ်ကောင်စီနဲ့ပတ်သက်လို့ သတ်ခံရတယ်လို့လည်း သတင်းတွေထွက်နေပေမယ့် မြေလတ်အသံက အတည်ပြုနိုင်ဖို့ စုံစမ်းနေပါတယ်။

ဒီသတ်ဖြတ်မှုတွေကို ဘယ်အဖွဲ့ကလုပ်ဆောင်တယ်ဆိုတာ မသိရသလို တော်လှန်ရေးအင်အားစုတွေဘက်က တစုံတရာထုတ်ပြန်ထားတာမျိုးမရှိသေးပါဘူး။

စစ်တပ်ထောက်ခံတဲ့ တယ်လီဂရမ်ချန်နယ်တွေမှာတော့ သပိတ်ကျင်းမှာ ရဟန်းတပါးနဲ့ ရွာသား ၂ ဦး အသတ်ခံရပြီး အဲ့ဒီသတ်ဖြတ်မှုတွေကို PDF တွေလုပ်ဆောင်တယ်လို့ စွပ်စွဲဖော်ပြထားတာတွေ့ရပါ တယ်။

ဇန်နဝါရီလ ၁၃ ရက်နေ့ညက သပိတ်ကျင်းမြို့နယ်၊ ငတက်အိုင်ကျေးရွာအုပ်ချုပ်ရေးမှူး အောင်ပုဆိုသူ ဟာ နေအိမ်မှာ ပစ်သတ်ခံရလို့ သေဆုံးခဲ့သေးတယ်လို့ သိရပါတယ်။

စာတည်း – ရင်ငြိမ်း