မကွေး၊ ဇန်နဝါရီ ၂၁၊ ၂၀၂၅။

မကွေးတိုင်း၊ တောင်တွင်းကြီးမြို့နယ်၊ မိအုအောင်းကျေးရွာက စစ်ကောင်စီခန့် အုပ်ချုပ်ရေးမှူး ၁ ဦးကို သေနတ်နဲ့ပစ်ခတ်ရာသေဆုံးခဲ့တယ်လို့ Magway Guerrilla Warfare(မကွေးပြောက်ကျားတပ်) ဆီက သိရပါတယ်။

အသက် ၅၅ နှစ်အရွယ် စစ်ကောင်စီခန့် အုပ်ချုပ်ရေးမှူး သိန်းစိုး ဆိုသူကို ဇန်နဝါရီ ၂၀ ရက် နေ့လယ် ၁၀ နာရီဝန်းကျင်က သူ့ရဲ့နေအိမ်ထဲမှာ သေနတ်နဲ့ ၂ ချက်ပစ်ခတ်ခဲ့တာလို့ Magway Guerrilla Warfare(မကွေးပြောက်ကျားတပ်)တာဝန်ခံ ကံကြီးမောင်က ပြောပါတယ်။

“သူက အုပ်ချုပ်ရေးမှူးဖြစ်တာ ၁ နှစ်နီးပါးရှိပြီ။ စစ်ကောင်စီအလိုကျ စစ်မှုထမ်းကြေးကောက်တာ ၃ ကြိမ်ရှိပြီ။ ၁ အိမ်ကို ၃၀,၀၀၀ နှုန်းကောက်တယ်။ နေအိမ်ထဲစစ်ဆေးမေးမြန်းပြီး ဖောင်းဒိုင်း ၂ ချက် ပစ်ခဲ့တယ်။” လို့ သူက ပြောပါတယ်။

အုပ်ချုပ်ရေးမှူးသိန်းစိုးဟာ စစ်ကောင်စီတပ်ဖွဲ့တွေနဲ့ပူးပေါင်းကာ စစ်မှုထမ်းကြေးကောက်ခံတာအပြင် လျှပ်စစ်မီတာခတွေကို အဆမတန်တောင်းခံတာတွေလုပ်တာကြောင့် အခုလို ပစ်ခတ်ခဲ့တယ်လို့ Magway Guerrilla Warfare(မကွေးပြောက်ကျားတပ်)ရဲ့ ထုတ်ပြန်ချက်မှာလည်း ဖော်ပြထားပါတယ်။

အုပ်ချုပ်ရေးမှူးသိန်းစိုး ပစ်ခတ်ခံရလို့ သေဆုံးပြီးနောက်မှာ စစ်ကောင်စီတပ်ဖွဲ့ဝင်တွေက မိအုအောင်းကျေးရွာ အ၀င်အထွက်လမ်းကြောတွေကို ပိတ်ဆို့စစ်ဆေးတာတွေလုပ်နေတယ်လို့ သိရပါတယ်။

ဒီပစ်ခတ်မှုကို Magway Guerrilla Warfare(မကွေးပြောက်ကျားတပ်)နဲ့ Taungdwingyi Fighter Force(LPDF) တို့က ပူးပေါင်းလုပ်ဆောင်ခဲ့တာပါ။

ပြီးခဲ့တဲ့ဇန်နဝါရီ ၄ ရက်ကလည်း ဆင်ပေါင်ဝဲမြို့နယ် EPC ရုံးမှာ အထိုင်ချတပ်ဆွဲကာ ခရီးသွားကားတွေကို ဆပ်ကြေးကောက်နေတဲ့ စစ်ကောင်စီတပ်ဖွဲ့ဝင်တွေကို Magway Guerrilla Warfare(မကွေးပြောက်ကျားတပ်) အဖွဲ့က ပစ်ခတ်ခဲ့ရာ စစ်ကောင်စီတပ်ဖွဲ့ဝင် ၆ ဦး သေဆုံးခဲ့ပါသေးတယ်။

စာတည်း – ကိုချမ်း

မကွေး၊ ဇန်နဝါရီ ၁၄၊ ၂၀၂၅။

မကွေးတိုင်း၊ ပွင့်ဖြူမြို့နယ်၊ မဒဲကျေးရွာအုပ်စုထဲက ကျေးရွာတွေကို စစ်မှုမထမ်းချင်ရင် ၁ အိမ်ထောင် ၁ သောင်းခွဲကျပ် ပေးရမယ်ဆိုပြီး အုပ်ချုပ်ရေးမှူးနဲ့ ဆယ်အိမ်မှူးတွေက အတင်းအဓမ္မခြိမ်းခြောက် ကောက်ခံသွားတယ်လို့ ဒေသခံတွေဆီက သိရပါတယ်။

ဇန်နဝါရီ ၁၃ ရက်နေ့ နေ့လယ်၁၂ နာရီမှာ အုပ်ချုပ်ရေးမှူး ဒေါ်ဝင်းဝင်းအေးနဲ့ ဆယ်အိမ်မှူးတွေဖြစ်တဲ့ ဦးလှဝင်း၊ ဦးစောတင်၊ မပြုံးကြည်တို့က ၁ အိမ်ထောင် ကျပ် ၁ သောင်းခွဲကောက်ခံပြီး ငွေမပေးနိုင်ရင် စစ်မှုထမ်းရမယ်ဆိုကာ အတင်းအဓမ္မခြိမ်းခြောက် ကောက်ခံခဲ့တာလို့ ဆိုပါတယ်။

“တကယ်လို့မှ မပေးဆောင်ရင် မဒဲရွာအရှေ့က ကျောင်းကုန်းကြီးကျေးရွာအုပ်စုနဲ့ ရေပုတ်ကလေးကျေးရွာအုပ်စုက ပျူစောထီးတွေကိုခေါ်ပြီးတော့ နေ့ချင်းညချင်း ဖမ်းဆီးခိုင်းပါမယ်ဆိုလို့ ခံဝန်ကတိတွေနဲ့ မပေးရင်မဖြစ်လို့ကြောက်အားလန့်အားကြီးပြီးတော့ ကျနော်တို့ပေးရပါတယ်”လို့ ဒေသခံတဦး ပြောပါတယ်။

မဒဲကျေးရွာအုပ်စုထဲမှာ အိမ်ခြေ ၄၀၀ ရှိတဲ့ မဒဲကျေးရွာအပါအဝင် ၇ ရွာရှိကာ မဒဲကုန်းရွာ အိမ်ခြေ ၁၀၀၊ ထိန်အိုင်ရွာ အိမ်ခြေ ၃၈၀၊ သစ်ပုတီးကုန်း ၁၃၅ အိမ်၊ မလွှကုန်းရွာမ အိမ်ခြေ ၁၃၀၊ မလွှကုန်းရွာသစ် အိမ်ခြေ ၉၀ နဲ့ အိမ်ခြေ ၁၃၈ အိမ်ရှိပေတောကျောင်းကုန်းရွာတို့ ပါဝင်ပါတယ်။

ရာအိမ်မှူးနဲ့အဖွဲ့ဟာ တနေ့ ၁ ရွာနှုန်းဝင်ရောက်ကောက်ခံခဲ့ပြီး ဇန်နဝါရီ ၁၃ ရက်နေ့မှာ မဒဲကုန်းရွာကို နောက်ဆုံးကောက်ခံခဲ့တာကြောင့် နေ့လယ် ၁၂ နာရီကနေ ၃ နာရီအတွင်း မဒဲကျေးရွာ ရပ်ကွက်ရုံးကို သွားရောက်ပေးဆောင်ခဲ့ကြရတယ်လို့ သိရပါတယ်။

ကျေးရွာအုပ်စု ၇ ရွာထဲက အိမ်ထောင်စုအားလုံးနီးပါး ပေးဆောင်ခဲ့ကြရကာ စားဝတ်နေရေး ကျပ်တည်းပြီး မပေးနိုင်တဲ့သူ ၄၊ ၅၊ ၁၀ ဦး လောက်ဟာလည်း ဘယ်နေ့ဘယ်ရက်မှာ ပေးပါမယ်ဆိုတဲ့ ခံဝန်ကတိပေးထားကြရတယ်လို့ ဒေသခံတဦးက ပြောပါတယ်။

မဒဲကျေးရွာ အုပ်ချုပ်ရေးမှူး ဒေါ်ဝင်းဝင်းအေးဟာ ပွင့်ဖြူမြို့ ပြည်ထောင်စုကြံ့ခိုင်ဖွံ့ဖြိုးရေးရုံးမှာ နေထိုင်ပြီး ဆယ်အိမ်မှူးဖြစ်တဲ့ ဦးလှဝင်း၊ ဦးစောတင်၊ မပြုံးကြည် တို့က မဒဲကျေးရွာမှာ နေထိုင်ကာ အုပ်စုတွင်းကျေးရွာတွေကို ငွေကြေးလိုက်လံကောက်ခံတယ်လို့ သိရပါတယ်။

စာတည်း – ကိုချမ်း

ပဲခူး၊ ဇူလိုင် ၁၂၊ ၂၀၂၄။

ပဲခူးတိုင်းအနောက်ခြမ်း၊ ပေါက်ခေါင်းမြို့နယ်၊ ကြို့ပင်ဝိုင်းအုပ်စု အုပ်ချုပ်ရေးမှူး ၂ ဦး အသတ်ခံရပြီးနောက် ထပ်မံတာဝန်ယူခဲ့သူ အုပ်ချုပ်ရေးမှူးကို ဇူလိုင် ၁၀ ရက် မနက်ပိုင်းမှာ သေနတ်နဲ့ပစ်သတ်ခဲ့တယ်လို့ ပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့ ၃၆၀၁ PPDF တပ်ရင်းဆီက သိရပါတယ်။

ဇူလိုင် ၁၀ ရက် မနက် ၉ နာရီခွဲလောက်မှာ ပြည်ခရိုင်ပြည်သူ့ကာကွယ်ရေးတပ်မတော် ၃၆၀၁ PPDf တပ်ရင်း၊ တပ်ခွဲ ၁ နဲ့ တပ်ရင်း ၄ ရဲဘော်တွေက အုပ်ချုပ်ရေးမှူး အသက် ၅၀ အရွယ် ဦးဝင်နိုင်ကို သူနေထိုင်တဲ့ ရွှေကူရွာအနီးမှာ ပစ်ခတ်ခဲ့တာလို့ ဆိုပါတယ်။

“သူ(ကိုဝင်းနိုင်)တို့အဖွဲ့က (အပေါင်းအသင်း) ၆ ဦးရှိတယ်။ ခု ၃ ဦးသေပြီ။ သူတို့အားလုံးက သတင်းပေး ဒလန်တွေ လုပ်နေတာ။ ခုလည်း (သူတို့က)အုပ်ကြီးတဦးသေရင် တဦးတက်ပြီးလုပ်နေတာ။ ခုသေတဲ့ ဝင်းနိုင်ကလည်း ဘယ်သူ့ဂရုစိုက်ရမလဲဆိုပြီး အုပ်ချုပ်ရေးမှူးလုပ်လာလို့ ရှင်းခဲ့တာ။” လို့ ပေါင်းတည်မြို့နယ် ပြည်သူ့ ကာကွယ်ရေးတပ်ဖွဲ့ ၃၆၀၁ PPDF တပ်ရင်း ပြန်ကြားရေး တာဝန်ခံက ပြောပါတယ်။

ပြီးခဲ့တဲ့ မေ ၃၁ ရက်နဲ့ ဇွန် ၁၃ ရက်ကလည်း လက်ရှိ ဦးဝင်းနိုင်တာဝန်ယူထားတဲ့နေရာမှာ လုပ်ဆောင်ခဲ့တဲ့ အုပ်ချုပ်ရေးမှူး ကိုညွန့်စိန်နဲ့ ကိုပွားသီးတို့ကို ပြည်ခရိုင်ပြည်သူ့ကာကွယ်ရေးတပ်ဖွဲ့ ဝင်တွေကပဲ ပစ်ခတ်ရှင်းလင်းခဲ့ပါသေးတယ်။

ကျေးရွာအုပ်စုအုပ်ချုပ်ရေးမှူး ၃ ဦး ရက်ခြားပြီး အသတ်ခံရတာကြောင့် ဇူလိုင် ၁၁ ရက် ဒီမနက်မှာတော့ ပေါက်ခေါင်းမြို့နယ်၊ ငါးဘတ်ကုန်း၊ ချင်းလည်ရွာတွေဘက်မှာ စစ်အုပ်စုဝင်တွေက ခရီးသွား ပြည်သူတွေကို စစ်ဆေးမှုတွေ ပြုလုပ်ခဲ့တယ်လို့ သိရပါတယ်။

ပြီးခဲ့တဲ့ ဇွန် ၁၅ ရက်ကလည်း ပေါက်ခေါင်းမြို့နယ်၊ တောင်လယ်ရွာက စစ်ကောင်စီသတင်းပေးလို့ သတင်းထွက်နေသူ ကိုဗိုလ်ဝင်းကိုလည်း သူရဲ့နေအိမ်မှာ သေနတ်နဲ့ ပစ်သတ်ခံခဲ့ရပါသေးတယ်။

စာတည်း – လင်း

မကွေး၊ ဇွန် ၁၇၊ ၂၀၂၃။

မကွေးတိုင်းဒေသကြီး၊ အောင်လံခရိုင်၊ အောင်လံမြို့နယ်၊ ရွှေပန်းတောကျေးရွာနဲ့ အင်းလယ်ကျေးရွာကြားမှာ ဆိုင်ကယ်နဲ့ပြန်လာတဲ့ အုပ်ချုပ်ရေးမှူးလမ်းမှာ သတ်ခံရတယ်လို့ ဒေသခံတွေထံက သိရပါတယ်။

ဇွန်လ ၁၇ ရက် မနက် ၁၁ နာရီခန့်မှာ အင်းလယ်ကျေးရွာအုပ်စု အုပ်ချုပ်ရေးမှူး ဦးမြင့်ဦး အသက် ၅၀ နှစ်ခန့်ဟာ ရွှေပန်းတောကျေးရွာကနေ သူနေထိုင်ရာ အင်းလယ်ကျေးရွာဘက်ကို ဆိုင်ကယ်နဲ့တဦးတည်းပြန်လာချိန် သတ်ခံလိုက်ရတာဖြစ်တယ်လို့ ဆိုပါတယ်။

“ကျနော်တို့သိရသလောက်က အင်ကြင်းကုန်းဆိုတာရှိတယ်။ အဲနားမှာ အုပ်ကြီးကိုခြေထောက်လက်တွေ ဓားနဲ့မွှန်းပြီး သေနတ်နဲ့ပစ်သတ်သွားတာ။ မသေခင် နှိပ်စက် စစ်ဆေးသွားပုံပဲ”လို့ ဒေသခံတဦးက ပြောပါတယ်။

ဓားနဲ့မွှန်း၊ သေနတ်နဲ့ပစ်ခတ်ရှင်းလင်းခံရလို့ အုပ်ချုပ်ရေးမှူး ဦးမြင့်ဦးမှာ နေရာမှာပဲ သေဆုံးသွားလို့ အောင်လံဆေးရုံကို ပို့ထားရတယ်လို့ ဒေသခံတွေက ပြောပါတယ်။

ဦးမြင့်ဦးဟာ ကျေးရွာထဲမှာ နွား၊ ဝက်ပေါ်ရင် စစ်ကောင်စီနဲ့ပေါင်းပြီး ဆက်ကြေးကောက်ခံသူတဦး ဖြစ်တယ်လို့ ဆိုပါတယ်။

အုပ်ချုပ်ရေးမှူးအသတ်ခံရပြီးနောက် အောင်လံဘက်က စစ်ကောင်စီတပ်သားတွေ ရောက်လာပြီး အနီးဝန်းကျင်ကို စစ်ဆေးမှုတွေလုပ်ကာ တချို့က အောင်လံဘက်ပြန်သွားသလို တချို့က ရွှေပန်းတော စစ်ကောင်စီ တပ်စွဲထားတဲ့နေရာမှာ ကျန်ခဲ့တယ်လို့ သိရပါတယ်။

အဲဒီပစ်ခတ်ရှင်းလင်းမှုကိုတော့ ဘယ်အဖွဲ့တွေက ဘာကြောင့်လုပ်တယ်ဆိုတာ မသိရသေးပါဘူး။

ဇွန် ၈ ရက် ည ၈ နာရီခန့်မှာ အောင်လံမြိုနယ်၊ ဥယျာဥ်ရွာအနီးမှာ အောင်လံဘက်ကနေ ဥယျာဥ်ရွာဘက်ကို ဆိုင်ကယ်နဲ့ပြန်လာတဲ့ အသက် ၄၀ နှစ်အရွယ် ဥယျာဥ်ကျေးရွာအုပ်ချုပ်ရေးမှူး သောင်းစိုးဦးဟာ ပစ်ခတ်ခံရပြီး ဒဏ်ရာပြင်းထန်ရသွားတယ်လို့ သိရပါတယ်။

စာတည်း – လင်းဇေ

ပဲခူး၊ မေ ၁၉၊ ၂၀၂၃။

ပဲခူးတိုင်းအနောက်ခြမ်း၊ သာယာဝတီမြို့နယ် အနောက်ဘက်က ကျွန်းကုန်းကျေးရွာအုပ်ချုပ်ရေးမှူးကို ပစ်ခတ်ဖို့လာတဲ့သူတွေကို သားဖြစ်သူက ခုခံဖို့ကြိုးစားရာက သေနတ်ကျည်ဆံထိမှန်ကာ သေဆုံးသွားတယ်လို့ သိရပါတယ်။

ကျွန်းကုန်းအုပ်စုအုပ်ချုပ်ရေးမှူး ဦးလှဌေးရဲ့ ကျွန်းကုန်းရွာနေအိမ်မှာ မေ ၁၆ ရက် ည ၉နာရီက ဖြစ်ခဲ့တဲ့ ပစ်ခတ်မှုမှာ သားဖြစ်သူ အသက် ၄၆ နှစ်အရွယ် ဖိုးထောင်(ခ)ကိုအောင်မြင့်ခိုင် သေဆုံးခဲ့တာလို့ ဆိုပါတယ်။

“အုပ်ချုပ်ရေးမှူးလှဌေးကို သေနတ်နဲ့ပစ်တာမှာ ရှောင်လိုက်တော့မမှန်ဘူးတဲ့။ အဲအချိန်မှာလှဌေးရဲ့အိမ်ဘေးကပ်လျက်မှာ အိမ်ခွဲနေတဲ့ သားကသေနတ်သမားတွေကိုခုံခံဖို့ပြင်နေချိန်မှာ သူ့(ဖိုးထောင်)ကိုသေနတ်နဲ့ ၄ ချက်ပစ်ခတ်ခံရပြီး နေရာမှာသေသွားတာ။”လို့ ဒေသခံတဦးက ပြောပါတယ်။

သေနတ်သမား ၃ ဦး ဆိုင်ကယ်၂ စီးနဲ့ လာပစ်ခဲ့တာလို့ သိရပြီး အခုလုပ်ဆောင်မှုကို ဘယ်အဖွဲ့က လုပ်တယ်ဆိုတာ မသိရသေးသလို သတင်းထုတ်ပြန်တာမျိုးလည်း မရှိသေးပါဘူး။

ပစ်ခတ်မှုဖြစ်ပြီး အိမ်နီးနားချင်း ကိုဖိုးကျော်နဲ့ ကိုဖိုးဝင်းတို့ညီအစ်ကို ၂ ဦးကို မေလ ၁၇ ရက်မှာ စစ်တပ်ကဖမ်းသွားပြီး ကိုဖိုးထောင်ကို မေလ ၁၈ ရက် မနေ့က ကျွန်းကုန်းရွာမှာပဲ သဂြိုဟ်ခဲ့တယ်လို့ ဆိုပါတယ်။

ပြီးခဲ့နှစ် နိုဝင်ဘာ ၁၄ ရက်မှာ သာယာဝတီမြို့နယ်က အိုင်ကဒုံရွာအုပ်ချုပ်ရေးမှူး ကိုမင်းနိုင်နဲ့ မြစ်ကျိုးရွာ အုပ်ချုပ်ရေးမှူးကြီးမြင့်တို့ ၂ ဦးကို မြို့နယ်စိုက်ဘဏ်ရုံးကနေ ရွာကိုအပြန် သုံးဆယ်မြို့ ဖိုးခေါင်လမ်းက ညောင်နီကုန်းရွာနဲ့ ရေလဲရွာကြားမှာ သာယာဝတီဂဠုန်တပ်ဖွဲ့ကနန်းထိုက်အောင်စစ်ဆင်ရေးအဖြစ် သေနတ်နဲ့ပစ်လို့ သေဆုံးခဲ့ပါတယ်။

စာတည်း – ဇို

စဉ့်ကူး၊ မေ ၁၁၊ ၂၀၂၃။

မန္တလေးတိုင်း၊ စဉ့်ကူးမြို့နယ်၊ သာယာဝတီကျေးရွာအုပ်စုအုပ်ချုပ်ရေးမှူးနဲ့ ဆယ်အိမ်မှူး မေလ ၁၀ ရက်၊ နေ့လည် ၃ နာရီအချိန်လောက်မှာ သေနတ်ပစ်ခတ်ခံရပြီး အုပ်ချုပ်ရေးမှူး သေဆုံးသွားတယ်လို့ သိရပါတယ်။

ပစ်ခတ်ခံရသူတွေဟာ သာယာဝတီကျေးရွာနေ အသက် ၅၃ နှစ်အရွယ် ကျေးရွာအုပ်စု အုပ်ချုပ်ရေးမှူး ဦးကျော်လင်းနဲ့ မြစိမ်းကျေးရွာနေ အသက် ၂၆ နှစ်အရွယ် ဆယ်အိမ်မှူး ကိုမောင်စိုး တို့ဖြစ်ကြပြီး ဦးကျော်လင်း နေအိမ်အတွင်းရှိနေချိန် သေနတ်ကိုင်ဆောင်ထားတဲ့လူတစုက ဆိုင်ကယ်နဲ့ရောက်လာပြီး ပစ်ခတ်ခဲ့တာလို့ ဒေသခံအမျိုးသားတဦးက မြေလတ်အသံကို ပြောပါတယ်။

” သူတို့က စကစတွေနဲ့ပေါင်းနေတာ ကြာပြီဗျ။ အုပ်ကြီးအိမ်ကို မောင်စိုးကအလည်ရောက်နေတာလို့သိရတယ်။ သူတို့ကို စကစတွေကပဲ ရာထူးတွေအပ်ထားတာ။ လာပစ်တာက PDF တွေလို့တော့ ပြောကြတယ်။ ပြီးတော့ စကစတွေကို လိုက်ပို့နေတဲ့ အုပ်ကြီးရဲ့စပီးဘုတ်တစီးကို ဖောက်ခွဲခဲ့သေးတယ်” လို့ ပြောပါတယ်။

ပစ်ခတ်ခံရတာကြောင့် ကျေးရွာအုပ်စုအုပ်ချုပ်ရေးမှူး ဦးကျော်လင်းမှာ နေရာမှာတင် သေဆုံးခဲ့ပြီး ဆယ်အိမ်မှူး မောင်စိုးမှာ ပေါင်ကျည်ထိမှန်ဒဏ်ရာရရှိခဲ့တယ်လို့ သိရပါတယ်။

ဒါ့အပြင် ဦးကျော်လင်း အသတ်ခံရပြီးတဲ့နောက် သာယာဝတီကျေးရွာနဲ့ကပ်လျက်ရှိ စစ်ကောင်စီတပ်စွဲနေတဲ့ ထုံးကြီး(ပျူ)ရွာစခန်းက လက်နက်ကြီး၊ လက်နက်ငယ်တွေနဲ့ ၁၅မိနစ်ခန့်ကြာ ပစ်ခတ်ခဲ့တယ်လို့ ဒေသခံတွေကပြောပါတယ်။

ပစ်ခတ်မှုနဲ့ပတ်သက်လို့ ဒေသတွင်းတော်လှန်ရေးအင်အားစုတွေဘက်က ထုတ်ပြန်တာမျိုးမရှိသေးဘဲ စဉ့်ကူးမြို့နယ်ပကဖခေါင်းဆောင်ကို မြေလတ်အသံက ဖုန်းနဲ့ဆက်သွယ်ခဲ့ရာမှာ တိုက်ပွဲဖြစ်မယ့် အခြေအနေရှိနေတာကြောင့် ဖြေကြားနိုင်ခြင်းမရှိသေးကြောင်း ပြောဆိုပါတယ်။

မေလ ၄ ရက်နေ့ကလည်း စဉ့်ကူးမြို့နယ်နဲ့ သပိတ်ကျင်းမြို့နယ်အစပ် ခုနှစ်တဲစုကျေးရွာအနီးတပ်စွဲထားတဲ့ စစ်ကောင်စီတပ်ကို PDF တွေဘက်က အလစ်အငိုက်ဝင်ရောက်တိုက်ခိုက်ခဲ့သေးတယ်လို့သိရပါတယ်။

စာတည်း-ရင်ငြိမ်း