အိုးတိန်တွင်း၊ ဇူလှိုင် ၉၊ ၂၀၂၅။

စစ်ကောင်စီ၏လေကြောင်းတိုက်ခိုက်မှုကြောင့် ကလေးသူငယ်များအပါ လူပေါင်းဒါဇင်ကျော် သေဆုံးခဲ့တဲ့ စစ်ကိုင်းတိုင်း၊ ဒီပဲယင်းမြို့နယ်၊ အိုးတိန်တွင်းကျေးရွာရှိ အိမ်ထောင်စုတွေကို ငွေထောက်ပံ့ပေးခဲ့တယ်လို့ S&C မီးဘေးစစ်ဘေးပညာရေး ကူညီစောင့်ရှောက်ရေးအဖွဲ့ဆီက သိရပါတယ်။

အိုးတိန်တွင်းကျေးရွာရှိ အိမ်ထောင်စု ၂၅၀ တို့အတွက် ၁ အိမ်ထောင်ကို ကျပ် ၄ သိန်းကျော် (၄၄၃,၀၀၀) နှုန်းနဲ့ စုစုပေါင်း သိန်း ၁,၀၀၀ ကျော်ထောက်ပံ့ခဲ့တာဖြစ်ပြီး ဒီထောက်ပံ့ငွေတွေဟာ ပြည်သူတွေရဲ့လှူဒါန်းမှုကတဆင့်ရရှိထားတဲ့ ငွေတွေဖြစ်တယ်လို့ S&C မှ တာဝန်ရှိသူ ကိုစိုးမိုးအောင်က ပြောပါတယ်။

လေကြောင်းတိုက်ခိုက်မှုပြီးခဲ့ပြီးနောက် S&C အဖွဲ့အနေနဲ့ အဲ့ဒီရွာကိုသွားရောက် ထောက်ပံ့ပေးခဲ့တာဟာ ယခု ၁ ကြိမ်အပါအဝင် စုစုပေါင်း ၃ ကြိမ်မြောက်ရှိခဲ့ပြီလို့ ဆိုပါတယ်။

“စဖြစ်ကတည်းကဆို ၃ ကြိမ်ရှိပါပြီ၊ သွားရောက်လှူဒါန်းတာ ပထမအကြိမ် dreambed တွေပါ။ ဒုတိယအကြိမ်ဒဏ်ရာရတွေအတွက် ငွေကြေးပါ၊ အခုကြိမ်က တရွာလုံးအကုန်ငွေသား ထောက်ပံ့ပေးခဲ့တာပါ”လို့ S&C မှ တာဝန်ရှိသူ ကိုစိုးမိုးအောင်ကဆိုပါတယ်။

အဆိုပါ လေကြောင်းတိုက်ခိုက်မှုကြောင့် ကျောင်းသား၊ ကျောင်းသူ ၃၅ ဦး ခြေ၊ လက်အင်္ဂါဆုံးရှုံးခဲ့ရပြီး အဲ့ဒီထဲက ၁၃ ဦးကတော့ ဆေးကုသမှုခံယူနေရဆဲ လို့လဲသိရပါတယ်။

“အခုကဒဏ်ရာရသူတွေတချို့ကဆေးကုနေရတုန်း၊ တချို့ကတော့ ဆေးရုံကဆင်းပါပြီ။ ဆေးရုံက ဆင်းခဲ့ပေမယ့် အခုချိန်ထိဒဏ်ရာတွေမပျောက်သေးဘူးဗျ။ တချို့ကသေရာပါဒဏ်ရာတွေ မသန်စွမ်းတွေ ဖြစ်သွားကြပါတယ်”လို့ ဆိုပါတယ်။

ရွာခံတွေအနေနဲ့ လေကြောင်းတိုက်ခိုက်မှု ဖြစ်စဉ်ပြီးကတည်းက ကျောင်းထဲနဲ့ အနီးနားတဝိုက်ကို လာဖို့၊ ကြည့်ဖို့ စိုးရိမ်စိတ်‌ချောက်ချားစိတ်တွေ ဖြစ်နေကြတယ်လို့လည်း ဆိုပါတယ်။

“စိတ်ထဲတော့ချောက်ချားနေကြတယ် အဲ့ကျောင်းဝန်းထဲမှာ ငွေဝေတာကြောင့်အခုမှ လာကြတာ လာမကြည့်ရဲတာတွေရော စိတ်ထိခိုက်ကြတာတွေရောကြောင့်မလာကြဘူး။ တရွာလုံး အဲ့ကျောင်း ထဲမှာ ဖိတ်ခေါ်ငွေဝေလိုက်မှ သူတို့လည်း နည်းနည်းပြန်ပြီး ဖြေသိမ့်နိုင်တဲ့သဘောမှာရှိကြတယ်။ သူတို့ကိုတော့ ငွေကြေးထောက်ပံ့ရင်း အားမငယ်ဖို့နဲ့ ဆက်လက်ကူညီနိုင်ဖို့တွေအတွက် ကြိုးစားပေးမယ်လို့အားပေးခဲ့ပါတယ်”လို့ S&C မှ တာဝန်ရှိသူ ကိုစိုးမိုးအောင်ကဆိုပါတယ်။

စစ်ကိုင်းတိုင်း၊ ဒီပဲယင်းမြို့နယ်၊ အိုးတိန်တွင်းရွာစာသင်ကျောင်းကို ပြီးခဲ့တဲ့ မေ ၁၂ ရက် မနက် ၉ နာရီခွဲလောက်မှာ စစ်ကောင်စီတပ်က တိုက်လေယာဉ်နဲ့ ပေါင် ၅၀၀ ဗုံး ၁ လုံးကြဲချတိုက်ခိုက်ခဲ့တာကြောင့် စုစုပေါင်းကျောင်းသား၊ ကျောင်းသူ ၄၈ ဦးနဲ့ ဆရာမ ၂ ဦး သေဆုံးခဲ့တယ်လို့ ကိုစိုးမိုးအောင်က ပြောပါတယ်။

သတင်း – ဟယ်သာ၊ စာတည်း – လင်း

မန္တလေး၊ မေ ၅၊ ၂၀၂၅။

မန္တလေးတိုင်း၊ ပုသိမ်ကြီးမြို့နယ်၊ အုန်းချောကျေးရွာအုပ်စုအတွင်းရှိ ဆည်တော်လေးဆည်က ရေလွှတ်တာကြောင့် အိမ်ထောင်စု ၂၀၀ ခန့်အရေးပေါ်ရွှေ့ပြောင်းကြရတယ်လို့ ဒေသလူမှုကူညီရေး အဖွဲ့ဝင်တွေဆီက သိရပါတယ်။

မေ ၃ ရက်မှာရွာတဲ့မိုးကြောင့် တောင်ကျချောင်းရေစီးဆင်းပြီး ဆည်တော်လေးဆည်အတွင်း ရေဝင်ရောက်တာများလာတဲ့အတွက် မေ ၄ ရက် မနက်ပိုင်းမှာ ဆည်ရေလွှတ်ချခဲ့တာလို့ ဆိုပါတယ်။

ဆည်ရေအပါအဝင် တောင်ကျချောင်းရေတွေကြောင့် အုန်းချောချောင်းအတွင်းရေများလာရာက ချောင်းနံဘေးလူနေအိမ်တွေထဲထိရေဝင်ရောက်လာတာလို့ ဆိုပါတယ်။

“ဆည်တော်လေးရေနဲ့တောင်ကျရေဆုံပြီး ရေဝင်တာပေါ့။ အုန်းချော၊ ငါးမိုင်၊ ခြောက်မိုင်၊ တံတားကွင်းလမ်းတွေပေါ့။ ကမ်းနားကအိမ်တွေဆို မြုပ်တာတွေရှိတယ်။ အရေအတွက်ကတော့ ရာဂဏန်းတော့ မရှိဘူး။ ရေဝင်လို့ ရွှေ့ပြောင်းကြတာမျိုးရှိတယ်”လို့ ဒေသလူမှုကူညီရေး အသင်းဝင်တဦးက ပြောပါတယ်။

တောင်ကျရေတွေဟာ ကမ်းနားအနိမ့်ပိုင်းတွေမှာ ၅ ပေခန့်ထိတက်လာပြီး အမြင့်ပိုင်းတွေမှာတော့ ၁ ပေခန့်ရှိတယ်လို့ ဆိုပါတယ်။

လက်ရှိမှာတော့ အုန်းချောကျေးရွာက အိမ်ထောင်စု ၂၀၀ ခန့်ဟာ ကျေးရွာရဲ့ကုန်းမြင့်ပိုင်းတွေရှိ ဘုန်းကြီးကျောင်း၊ စာသင်ကျောင်းတွေမှာ ကိုယ့်အစီအစဥ်နဲ့ကိုယ်ရွှေ့ပြောင်းနေထိုင်ကြပြီး မေ ၅ ရက်ဒီမနက်ပိုင်းထိ ရေပြန်မကျသေးတာကြောင့် နေအိမ်တွေကိုပြန်ရတာမျိုးမရှိသေးဘူးလို့ ဒေသလူမှုကူညီရေးအသင်းဝင်တဦးက ပြောပါတယ်။

ဆည်တော်လေးဆည်အထက်ဘက်ဒေသတွေမှာ မိုးများလာပါက အထက်ဖြစ်စဥ်မျိုး နှစ်စဥ်နီးပါး ဖြစ်တတ်တဲ့အတွက် ချောင်းနံဘေးနေဒေသခံတွေရေဘေးရှောင်ရလေ့ရှိပြီး ချောင်းရေတန့်နေပြီး ရေပြန်မကျတဲ့အခြေအနေဆိုရင် တပတ်ကျော်ထိရေဘေးရှောင်ရတာမျိုးရှိတယ်လို့ သိရပါတယ်။

စာတည်း – လင်း

စစ်ကိုင်း၊ ဖေဖော်ဝါရီ ၅၊ ၂၀၂၃။

စစ်ကိုင်းတိုင်း၊ ရွှေဘိုခရိုင်၊ ခင်ဦးမြို့နယ်အတွင်း ပြီးခဲ့တဲ့ဇန်နဝါရီလ ၃၀ ရက်ကစတင်ပြီး စစ်ကောင်စီရဲ့ မီးရှို့ခြင်းခံရတဲ့ ကျေးရွာ ၄ ရွာကို မြို့နယ်အုပ်ချုပ်ရေးအဖွဲ့ကဦးဆောင်ပြီး ဒီနေ့ဖေဖော်ဝါရီလ ၅ ရက်မှာ ဆီနဲ့ငွေသားတချို့ ထောက်ပံ့လှူဒါန်းခဲ့ တယ်လို့ သိရပါတယ်။

“ဇန်နဝါရီ ၃၀ ရက်ကနေ ဖေဖော်ဝါရီလ ၂ ရက်နေ့အထိ ၄ ရက်အတွင်းကို ဗျိုင်းကြိုင်၊ မှန်သာ၊ ရုံးစု၊ ညောင်ပင်ကြီးစု အစရှိတဲ့ ကျေးရွာ ၄ ရွာလုံးမှာရွာလုံးကျွတ်နီးပါး မီးရှို့ဖျက်ဆီးခံခဲ့ရတာပါ။ အဲ့ဒီ ၄ ရွာလုံးကအိမ်ထောင်စု ၇၀၀ လောက် အိုးမဲ့အိမ်မဲ့ဖြစ်နေရပြီး အကူအညီတွေလိုအပ်နေတာ”လို့ မြိုနယ်အုပ်ချုပ်ရေးအဖွဲ့ တာဝန်ရှိသူတဦးက ပြောပါတယ်။

အဲ့ဒီကျေးရွာ ၄ ရွာအတွင်းကမီးရှို့ဖျက်ဆီးခံလိုက်ရတဲ့အိမ်ထောင်စုတွေအတွက် စားသုံးဆီနဲ့ ငွေသားတွေကို ခင်ဦးမြို့နယ်အုပ်ချုပ်ရေးအဖွဲ့ကဦးဆောင်ပြီး ဆီနဲ့ ငွေသားတွေ ထောက်ပံ့လှူဒါန်းခဲ့တာပါ။ အိမ်ထောင်စု ၇၀၀ အတွက် ဆီ ၅၀ ကျပ်သား နဲ့ ငွေသား တသောင်းကျပ်စီ ထောက်ပံ့လှူဒါန်းခဲ့တာလို့ သိရပါတယ်။

ခင်ဦးမြို့နယ်မှာ စစ်ကောင်စီတပ်တွေက ၂၀၂၁ ခုနှစ် ဖေဖော်ဝါရီ ၁ ရက်အာဏာသိမ်းပြီးချိန်ကစပြီး ၂၀၂၃ ခုနှစ် ဖေဖော်ဝါရီလ ၁ ရက် ၂ နှစ်ပြည့်အချိန်ထိ ကျေးရွာပေါင်း ၆၃ ရွာက နေအိမ်ပေါင်း ၃၇၀၀ အထိ မီးရှို့ဖျက်ဆီးခဲ့တာကြောင့် မီးဘေးသင့် အိုးမဲ့အိမ်မဲ့ပြည်သူ ၁၈၀၀၀ ခန့်အထိရှိနေပြီလို့ ဆိုပါတယ်။