ပဲခူး၊ ဇူလိုင် ၁၂၊ ၂၀၂၄။

ပဲခူးတိုင်းအနောက်ခြမ်း၊ ပေါက်ခေါင်းမြို့နယ်၊ ကြို့ပင်ဝိုင်းအုပ်စု အုပ်ချုပ်ရေးမှူး ၂ ဦး အသတ်ခံရပြီးနောက် ထပ်မံတာဝန်ယူခဲ့သူ အုပ်ချုပ်ရေးမှူးကို ဇူလိုင် ၁၀ ရက် မနက်ပိုင်းမှာ သေနတ်နဲ့ပစ်သတ်ခဲ့တယ်လို့ ပေါင်းတည်မြို့နယ်ပြည်သူ့ကာကွယ်ရေးတပ်ဖွဲ့ ၃၆၀၁ PPDF တပ်ရင်းဆီက သိရပါတယ်။

ဇူလိုင် ၁၀ ရက် မနက် ၉ နာရီခွဲလောက်မှာ ပြည်ခရိုင်ပြည်သူ့ကာကွယ်ရေးတပ်မတော် ၃၆၀၁ PPDf တပ်ရင်း၊ တပ်ခွဲ ၁ နဲ့ တပ်ရင်း ၄ ရဲဘော်တွေက အုပ်ချုပ်ရေးမှူး အသက် ၅၀ အရွယ် ဦးဝင်နိုင်ကို သူနေထိုင်တဲ့ ရွှေကူရွာအနီးမှာ ပစ်ခတ်ခဲ့တာလို့ ဆိုပါတယ်။

“သူ(ကိုဝင်းနိုင်)တို့အဖွဲ့က (အပေါင်းအသင်း) ၆ ဦးရှိတယ်။ ခု ၃ ဦးသေပြီ။ သူတို့အားလုံးက သတင်းပေး ဒလန်တွေ လုပ်နေတာ။ ခုလည်း (သူတို့က)အုပ်ကြီးတဦးသေရင် တဦးတက်ပြီးလုပ်နေတာ။ ခုသေတဲ့ ဝင်းနိုင်ကလည်း ဘယ်သူ့ဂရုစိုက်ရမလဲဆိုပြီး အုပ်ချုပ်ရေးမှူးလုပ်လာလို့ ရှင်းခဲ့တာ။” လို့ ပေါင်းတည်မြို့နယ် ပြည်သူ့ ကာကွယ်ရေးတပ်ဖွဲ့ ၃၆၀၁ PPDF တပ်ရင်း ပြန်ကြားရေး တာဝန်ခံက ပြောပါတယ်။

ပြီးခဲ့တဲ့ မေ ၃၁ ရက်နဲ့ ဇွန် ၁၃ ရက်ကလည်း လက်ရှိ ဦးဝင်းနိုင်တာဝန်ယူထားတဲ့နေရာမှာ လုပ်ဆောင်ခဲ့တဲ့ အုပ်ချုပ်ရေးမှူး ကိုညွန့်စိန်နဲ့ ကိုပွားသီးတို့ကို ပြည်ခရိုင်ပြည်သူ့ကာကွယ်ရေးတပ်ဖွဲ့ ဝင်တွေကပဲ ပစ်ခတ်ရှင်းလင်းခဲ့ပါသေးတယ်။

ကျေးရွာအုပ်စုအုပ်ချုပ်ရေးမှူး ၃ ဦး ရက်ခြားပြီး အသတ်ခံရတာကြောင့် ဇူလိုင် ၁၁ ရက် ဒီမနက်မှာတော့ ပေါက်ခေါင်းမြို့နယ်၊ ငါးဘတ်ကုန်း၊ ချင်းလည်ရွာတွေဘက်မှာ စစ်အုပ်စုဝင်တွေက ခရီးသွား ပြည်သူတွေကို စစ်ဆေးမှုတွေ ပြုလုပ်ခဲ့တယ်လို့ သိရပါတယ်။

ပြီးခဲ့တဲ့ ဇွန် ၁၅ ရက်ကလည်း ပေါက်ခေါင်းမြို့နယ်၊ တောင်လယ်ရွာက စစ်ကောင်စီသတင်းပေးလို့ သတင်းထွက်နေသူ ကိုဗိုလ်ဝင်းကိုလည်း သူရဲ့နေအိမ်မှာ သေနတ်နဲ့ ပစ်သတ်ခံခဲ့ရပါသေးတယ်။

စာတည်း – လင်း

မန္တလေး၊ ဧပြီ ၂၊ ၂၀၂၃။

မန္တလေးတိုင်း၊ မတ္တရာမြို့နယ်၊ ကြားရွာထိပ်မှာ အမျိုးသား ၁ ဦး အသတ်ခံရပြီး လည်ပင်းမှာ “အစွန်းရောက်တို့ သွားရာလမ်း” စာသားပါ လည်ဆွဲကိုလည်း ချိတ်ဆွဲခံထားရတယ်လို့ သိရပါတယ်။

ဧပြီလ ၁ ရက်မနေ့ကမနက် ၅ နာရီလောက်က ကြားရွာထိပ်လမ်းဘေးမှာ လက်ပြန်ကြိုးတုပ်ပြီး ဦးခေါင်းကို သေနတ်နဲ့ပစ်သတ်ခံထားရတဲ့ အသက် ၃၀ နှစ်အရွယ် အမျိုးသားတဦးကို တွေ့ခဲ့ရတာလို့ ဒေသခံတဦးကပြောပါတယ်။

“ဖမ်းဆီးသတ်ဖြတ်ခံရတဲ့ သဘောရှိတယ်။ ပြီးတော့ အလောင်းပေါ်မှာ လည်ဆွဲတခုဆွဲထားပေးတာ တွေ့ရတယ်။ လူသတ်ပြီး လည်ဆွဲ ဆွဲပေးတတ်တာက ပျူတွေနဲ့ သွေးသောက်အဖွဲ့တွေရဲ့ လုပ်ရပ်ပဲ။ အလောင်းတွေ့တယ်ဆိုပြီး စကစ ဘက်က အလောင်းလာကောက်သွားကြတာတော့ သိရတယ်”လို့ ပြောပါတယ်။

ဒီလုပ်ရပ်ကို စစ်ကောင်စီလက်အောက်ခံ ပျူစောထီးတွေနဲ့ စစ်တပ်ထောက်ခံတဲ့ လက်နက်ကိုင်အဖွဲ့အစည်းတွေက လုပ်တာဖြစ်နိုင်တယ်လို့လည်း ဒေသခံတွေက ခန့်မှန်းပြောဆိုနေကြပါတယ်။

အသတ်ခံရသူဟာ ကြားရွာက ဒေသခံမဟုတ်သလို သူနဲ့ပက်သက်တဲ့အသေးစိတ်အချက်အလက်နဲ့ ဘယ်အဖွဲ့အစည်းက ခုလိုဖမ်းဆီးသတ်ဖြတ်ခဲ့လဲ ဆိုတာကိုတော့ မြေလတ်အသံက သီးခြားအတည်မပြုနိုင်သေးပါဘူး။

မတ်လ ၂၂ ရက်မနက် ၁၁ နာရီခန့်မှာလည်း မတ္တရာမြို့နယ်၊ တံတားဖြူကျေးရွာနဲ့ ကျောက်တံတားကျေးရွာတွေမှာ အမျိုးသား ၃ ဦးပစ်သတ်ခံထားရပြီး အလောင်းတွေပေါ်မှာ “သွေးသောက်အဖွဲ့၊ အနီရောင်စစ်ဆင်ရေး မတ္တရာ” စာသားပါ တံဆိပ်ဝိုင်းတွေကိုလည်း တွေ့ရှိခဲ့ပါသေးတယ်။

စစ်ကိုင်း၊ မတ် ၂၈၊ ၂၀၂၃။

စစ်ကိုင်းတိုင်း၊ မင်းကင်းမြို့နယ်ထဲက ချင်းတွင်းမြစ်ကြောင်းမှာရှိတဲ့ တရားမဝင် ရွှေမျှောဖောင်တွေကို စစ်ကောင်စီဘက်က မီးရှို့ဖျက်ဆီးပြီး အလုပ်သမား ၇ ဦးကိုလည်း သတ်သွားခဲ့တယ်လို့ သိရပါတယ်။

မတ်လ ၉ ရက်နေ့က ကဗျစ်၊ ဖရုံကာ၊ ရှမ်းတော့ စတဲ့ကျေးရွာတွေနားမှာရှိတဲ့ ရွှေမျှောဖောင်တွေနဲ့ လူနေတဲတွေကို မီးရှို့ခဲ့ပြီး ရွှေမျှောဖောင် ၅၃ ဖောင်နဲ့ ဆက်စပ်ပစ္စည်းတွေ ဖျက်ဆီးခံလိုက်ရကာ သိန်းထောင်ချီ မီးထဲပါသွားခဲ့တယ်လို့ ဆိုပါတယ်။

“ရွှေတွေနဲ့ တန်ဖိုးကြီးပစ္စည်းတွေတော့ စစ်ကောင်စီဘက်က ယူသွားတယ်။ ပြီးတော့ မျှောထဲမှာ ကျန်ခဲ့တဲ့ အလုပ်သမား ၅ ယောက် ရွာသား ၂ ယောက် အသတ်ခံရတယ်။ ပစ်သတ်ပြီး သဲသောင်ပြင်မှာ မြှုပ်ခဲ့တာ။ ခုပြန်ဖော်ပြီး ဘယ်သူတွေဆိုတာ စစ်ဆေးနေကြတယ်” လို့ မင်းကင်းမြို့နယ် ပကဖတာဝန်ခံက ပြောပါတယ်။

စစ်ကောင်စီတပ်ရဲ့ သတ်ဖြတ်ခြင်းခံထားရတဲ့ ပြည်သူ ၇ ဦးမှာ ၂ ဦးကတော့ ကဗျစ်ရွာသားတွေဖြစ်တယ်လို့ သိထားရပြီး ရွှေမျှောလုပ်ကွက်မှာ နယ်ပေါင်းစုံကလူတွေ လာရောက်လုပ်ကိုင်တဲ့အတွက် ဘယ်သူဘယ်ဝါဆိုတာ သိရဖို့ ကြန့်ကြာနေတယ်လို့ ဆိုပါတယ်။

စစ်ကောင်စီဘက်က ချန်နယ်တွေမှာတော့ ရွှေမျှောလုပ်ကွက်တွေမှာ PDF တွေဝင်ရောက်လုပ်ကိုင်တာတွေရှိတဲ့အတွက် ခုလိုဖျက်ဆီးတာဖြစ်တယ်လို့ ထုတ်ပြန်ထားပေမယ့် ကာကွယ်ရေးအဖွဲ့တွေကတော့ သူတို့နဲ့ဆက်နွယ်မှုမရှိဘဲ တပ်ရင်းတပ်ဖွဲ့ ထိန်းချုပ်နယ်မြေထဲမှာရှိလို့ ခုလို ဖျက်ဆီးခံရတာဖြစ်တယ်လို့ ဆိုပါတယ်။

စစ်ကောင်စီဝါဒဖြန့် တယ်လီဂရမ်တွေမှာတော့ ရွှေမျှောဖောင်တွေနဲ့ ဆက်စပ်ပစ္စည်းတွေကာလတန်ဖိုး ၁၁,၀၅၃,၄၄၀,၀၀၀ ကျပ် (သိန်းပေါင်း တစ်သိန်းတစ်သောင်းကျော်) သိမ်းဆည်းရမိခဲ့တယ်လို့ ဖော်ပြထားပါတယ်။

အဆိုပါ စစ်ကောင်စီစစ်ကြောင်းဟာ အင်အား ၁၀၀ ဝန်းကျင်နဲ့ ဖေဖော်ဝါရီလကတည်းက မင်းကင်းမြို့နယ်ထဲကို စစ်ကြောင်းထိုးနေတာဖြစ်ပြီး မတ်လ ၂၄ ရက်ကမှ မင်းကင်းကနေ ကလေးမြို့ ဒကစထဲကို ပြန်ဆုတ်ခွာသွားတာ ဖြစ်တယ်လို့ သိရပါတယ်။

မတ်လ ၁၄ ရက်နေ့ကလည်း ရွှေမျှောတွေကို ဖျက်ဆီးနေလို့ နယ်မြေခံကာကွယ်ရေးတပ်ရင်းတွေနဲ့ မြို့နယ်ပကဖအဖွဲ့ ပူးပေါင်းကာ သွားရောက်တိုက်ခိုက်ခဲ့ပြီး စစ်ကောင်စီဘက်က ၃ ဦးသေဆုံးခဲ့တယ်လို့ သိရပါတယ်။

စာတည်း – ဇို

မတ္တရာ၊ မတ် ၂၃၊ ၂၀၂၃။

မကွေးတိုင်း၊ ပခုက္ကူမြို့နယ်၊ မြစ်ခြေမြို့မှာ စစ်ကောင်စီခန့် အုပ်ချုပ်ရေးမှူးအပါ အမျိုးသား ၂ ဦး မတ်လ၂၁ ရက် ညနေ ၄ နာရီကျော်က သေနတ်နဲ့ပစ်ခတ်ခံရလို့ သေဆုံးသွားတယ်လို့ ဒေသခံတွေဆီက သိရပါတယ်။

ပစ်သတ်ခံရသူတွေဟာ အသက် ၄၆ နှစ်အရွယ် မြစ်ခြေ၊ အမှတ် ၁ ရပ်ကွက် စစ်ကောင်စီခန့်အုပ်ချုပ်ရေးမှူး ပျူစောထီးခေါင်းဆောင် နိုင်လင်းအောင်နဲ့ ကမ္ဘာအေးရပ်ကွက်နေ အသက် ၅၁ နှစ်အရွယ် ဝေဖြိုးအောင်ခရီးသည်တင်ယာဥ်လိုင်းဂိတ်မှူး ဦးယုဟန် တို့ဖြစ်ပြီး၊ သူတို့ ၂ ဦးဟာ နိုင်လင်းအောင်ရဲ့နေအိမ်မှာ ရှိနေချိန် သေနတ်ကိုင်ဆောင်ထားသူ အမျိုးသား ၄ ဦးက ဝင်ရောက်ပစ်ခတ်ခဲ့တာလို့ အမည်မဖော်လိုတဲ့ မြို့ခံအမျိုးသားတဦးက မြေလတ်အသံကို ပြောပါတယ်။

“နိုင်လင်းအောင်က အုပ်ကြီးတာဝန်လည်း ယူထားတယ်။ ပြီးတော့ မြစ်ခြေမြို့ရဲ့ပျူစောထီးခေါင်းဆောင် ဖြစ်တယ်။ သူက ရင်ဘတ်မှာ သေနတ်ဒဏ်ရာ ၃ ချက်ရပြီးတော့ နေအိမ်ထဲမှာတင် ပွဲချင်းပြီး သေတယ်။ ပြီးတော့ သူ့အိမ်ကိုရောက်နေတဲ့ ကားဂိတ်မှူးမှာလည်း ရင်ဘတ်နဲ့လက်မှာ ဒဏ်ရာနဲ့ ပွဲချင်းပြီးသေတယ်” လို့ ပြောပါတယ်။

ပစ်ခတ်မှုနဲ့ပတ်သက်လို့ ဒေသတွင်းတော်လှန်ရေးတပ်ဖွဲ့တွေဘက်က တစုံတရာသတင်းထုတ်ပြန်တာမျိုး မရှိသေးသလို ဘယ်အဖွဲ့က လုပ်ဆောင်တယ်ဆိုတာ အတည်မပြုနိုင်သေးပါဘူး။

စစ်ကောင်စီအုပ်ချုပ်ရေးမှူးနဲ့ ကားဂိတ်မှူးတို့ ပစ်သတ်ခံရပြီးတဲ့နောက် မတ်လ ၂၂ ရက် မနေ့ကမနက် ၈ နာရီကျော်မှာ အိုင်ရှည်ရပ်ကွက်မှာ လက်ဖက်ရည်ဆိုင်ထိုင်နေတဲ့ ဦးဝင်းမြင့် ၅၂ နှစ်နဲ့ သားဖြစ်သူ ကိုကျော်မိုး ၂၃ နှစ်တို့ကို စစ်ကောင်စီတပ်သားတွေက ဖမ်းဆီးခေါ်ဆောင်သွားတယ်လို့ ဆိုပါတယ်။

“အဲ့ဒီသားဖကို ဖမ်းပြီးတော့ မြစ်ခြေရဲစခန်းကို ဖမ်းခေါ်သွားတယ်။ ဘာဖြစ်လို့ဖမ်းတာလည်းတော့ မသိရဘူး။ အုပ်ကြီးနဲ့ဂိတ်မှူးပစ်ခတ်ခံရတာနဲ့ ပတ်သက်ပြီး ဖမ်းတာလို့ ထင်တယ်” လို့ သူကဆက်ပြောပါတယ်။

မတ်လ ၈ ရက်နေ့ကလည်း ပခုက္ကူ၊ ကျွန်းအိုကျေးရွာ ပျူစောထီးခေါင်းဆောင်ဆိုသူကို တော်လှန်ရေးတပ်ဖွဲ့တွေက ပစ်ခတ်ရှင်းလင်းခဲ့ပြီး ကျည်ဆံ၊ လက်ပစ်ဗုံးတွေ သိမ်းဆည်းရရှိခဲ့တယ်လို့ သိရပါတယ်။

စာတည်း – ရင်ငြိမ်း

ရေစကြို၊ မတ် ၂၁၊ ၂၀၂၃။

မကွေးတိုင်း၊ ရေစကြိုမြို့နယ်၊ မီးလောင်ကျွန်းရွာမှာ စစ်ကောင်စီစစ်ကြောင်း ထွက်ခွာသွားပြီးနောက် နယ်မြေရှင်းလင်းရေးဝင်စဉ် အသတ်ခံထားရတဲ့ ရွာသားအလောင်း ၂ လောင်း တွေ့ခဲ့တယ်လို့ ဒေသခံတွေဆီက သိရပါတယ်။

တပ်မ ၉၉ ဘီလူးစစ်ကြောင်းဟာ မတ်လ ၁၉ ရက်ကနေ မတ်လ ၂၁ ရက် ဒီမနက် ၆ နာရီလောက်ထိ အဲ့ဒီရွာထဲမှာ တပ်စွဲနေခဲ့တာဖြစ်ပြီး၊ ရွာသားတွေကို သတ်ဖြတ်သွားတဲ့အပြင် ဖမ်းမိထားတဲ့ပြည်သူတွေဆီကနေလည်း ရွှေထည်တွေနဲ့ ပိုက်ဆံတွေ ယူသွားတယ်လို့ ဒေသခံအမျိုးသားတဦးက ပြောပါတယ်။

“နားဆွဲဝတ်ထားတဲ့ အမျိုးသမီးတွေကို နားဆွဲတွေ ဖြုတ်ခိုင်းတယ်။ စစ်ရှောင်အဖွားတယောက်ဆီက ငွေ ၇၂ သိန်း ယူသွားတယ်။ PDF ၂ ဖွဲ့ရဲ့ ယူနီဖောင်းတွေ လဲဝတ်သွားတယ်။ ရွာသားတဦးက စစ်ကြောင်းစဝင်တဲ့နေ့ကတည်းက အသတ်ခံထားရတာ။ ကျနော်တို့တွေ့တော့ ပုပ်ပွတောင်နေပြီ။ စိတ်မနှံ့တဲ့တယောက်ကိုလည်း သတ်ပြီး PDF ဝတ်စုံ လဲဝတ်ပေးခဲ့တယ်” လို့ ပြောပါတယ်။

မီးလောင်ကျွန်းရွာသားတွေဖြစ်တဲ့ ကိုမောင်ဟန် အသက် ၅၈ နှစ်နဲ့ စိတ်ကျန်းမာရေး ချို့တဲ့သူ ကိုမြတ်စိုးဦး အသက် ၃၅ နှစ်ဝန်းကျင်တို့ အသတ်ခံထားရကာ ဦးမြတ်စိုးဦးမှာတော့ လည်ပင်းပြတ်ရှဒဏ်ရာနဲ့ သေဆုံးနေတာကို တွေ့ခဲ့တယ်လို့ ဆိုပါတယ်။

ဒါ့အပြင် ရွာထဲရှိ စစ်ရှောင်ပြည်သူတွေရဲ့ ဆိုင်ကယ် ၁၀ စီးနဲ့ ဆေးဝါးတွေအပြင် နေအိမ် ၃ လုံးကိုလည်း မီးရှို့ဖျက်ဆီးခဲ့ပြီး၊ ရွာမှာရှိတဲ့အိမ်တွေကိုလည်း မွှေနှောက်ဖျက်ဆီးသွားခဲ့ကာ တပ်စွဲချိန်အတွင်း ဖမ်းဆီးထားတဲ့ ဒေသခံ ၂၀၀ ကျော်ကိုတော့ ပြန်လွှတ်ပေးလိုက်တယ်လို့ သိရပါတယ်။

အဲ့ဒီဘီလူးစစ်ကြောင်းဟာ ဒီမနက် ၆ နာရီလောက်ကမှ ရွာကနေထွက်ခွာကာ ပန်းညိုရွာဘက်ကို လက်နက်ကြီးတွေနဲ့ ပစ်ခတ်ဝင်ရောက်ပြီး၊ ညောင်ကားယားနဲ့ မြစ်ဆုံဘက်ကို ဆက်တိုက် စစ်ကြောင်းထိုးနေတယ်လို့ သိရပါတယ်။

စာတည်း – လင်း

မကွေး၊ ဇန်နဝါရီ ၂၇၊ ၂၀၂၃။

မကွေးတိုင်း၊ ချောက်မြို့ပေါ်နေ မွတ်စလင်အမျိုးသားတွေအပါအဝင် ၄ ဦးဟာ ပခုက္ကူဘက်ကို ကားနဲ့ခရီးသွားချိန် ၃ ဦးကလမ်းမှာအသတ်ခံခဲ့ရပြီး စီးသွားတဲ့ကားနဲ့ ကျန် ၁ ဦးကတော့ ပျောက်ဆုံးနေတယ်လို့ သိရပါတယ်။

ချောက်မြို့၊ စျေးတန်းရပ်ကွက်ရှိ သမာဓိ ဆိုင်ကယ်အရောင်းဆိုင်ပိုင်ရှင် ဦးအောင်ကျော်ဦး (ခ) ဦးဟာကင်းမ်၊ ဆွေမျိုးတော်စပ်သူ ဦးဟာစင်၊ သူငယ်ချင်းဖြစ်သူ ဦးဟာဗင်နဲ့ ယာဥ်မောင်းသူ ဦးမြင့်ဌေးတို့ ၄ ဦးဟာ ပြီးခဲ့တဲ့ဇန်နဝါရီလ ၂၅ ရက်မှာ ပခုက္ကူကိုသွားချိန် အသတ်ခံခဲ့ရတာလို့ ချောက်မြို့နယ်ပြည်သူ့ကာကွယ်‌ရေးအဖွဲ့ တာဝန်ရှိသူ ကိုပြူးကြီးကမြေလတ်အသံကို ပြောပါတယ်။

“သူနဲ့အတူတူ သိန်း ၃ ထောင်အထက်ပါသွားတယ်၊ ကား ၁ စီးလည်းပြန်မရပါဘူး၊ အလောင်းက ၃ လောင်းပဲပြန်ရတယ်၊ ၁ ယောက်ကတော့ ဘယ်သူပျောက်နေတယ်ဆိုတာမသိရပါဘူး” လို့ ပြောပါတယ်။

ဦးအောင်ကျော်ဦးနဲ့ ဦးမြင့်ဌေးတို့မှာတော့ လည်ပင်းပြတ်ရှဒဏ်ရာနဲ့ သေနတ်ဒဏ်ရာတွေရရှိထားပြီး၊ ကျန် ၁ ဦးကတော့ ရုပ်ပျက်ဆင်းပျက်ဖြစ်နေတာကြောင့် ဘယ်သူလဲဆိုတာကို အတည်ပြုလို့မရသေးဘူးလို့လည်း ဆိုပါတယ်။

သူတို့ကို ပခုက္ကူတံတားထိပ်မှာ အထိုင်ချတပ်စွဲနေတဲ့ တမခ ၁၀၁ မှ စစ်သားတွေက ပခုက္ကူမြို့ရှောင်လမ်းအလွန်မှာ ဖမ်းဆီးသတ်လိုက်တာလို့လည်း သိရပြီး ဘယ်နေ့မှာ သတ်လိုက်တယ်ဆိုတာကိုတော့ သီးခြားအတည်မပြုနိုင်သေးပါဘူး။ အဲ့ဒီ‌နောက်အလောင်းတွေကို ပခုက္ကူရင်ခွဲရုံမှာထားရှိပြီး စစ်ကောင်စီတပ်သားတွေဟာဇန်နဝါရီလ ၂၆ ရက်မှ သေဆုံးသူတွေရဲ့မိသားစုကို အကြောင်းကြာကာ ချောက်မြို့ကိုပြန်သယ်ပြီး သင်္ဂြိုဟ်ခိုင်းခဲ့တယ်လို့ သိရပါတယ်။

စစ်ကိုင်း၊ ဒီဇင်ဘာ ၂၆၊ ၂၀၂၂။

စစ်ကိုင်းတိုင်း၊ မုံရွာမြို့၊ ဘုရားကြီးရပ်ကွက် သီရိရတနာဈေးက စျေးခေါင်းအမျိုးသားတဦး သေနတ်နဲ့ပစ်၊ ဓားနဲ့ခုတ်ခံရပြီး သေဆုံးသွားတယ်လို့ သိရပါတယ်။

ဒီဇင်ဘာလ ၂၅ ရက်မနေ့ကနေ့လည် ၁၂ နာရီဝန်းကျင်မှာ စျေးခေါင်း ဦးအောင်ဇော်ဝင်း ၅၀ နှစ်ဟာ သီရိရတနာဈေး အပေါ်ထပ်ရှိ ဈေးရုံးခန်းမှာရှိနေချိန် အမျိုးသား ၂ ဦး ဝင်ရောက်လာပြီး သေနတ်နဲ့ပစ်၊ ဓားနဲ့ခုတ်ခဲ့တာလို့ ဒေသခံတဦးကပြောပါတယ်။

“သူက Non-CDM ဝန်ထမ်း ၁ ယောက်ပဲ။ ဖြစ်တဲ့အချိန်က စျေးခေါင်းရုံးပေါ်မှာ သူတယောက်တည်း ရှိနေချိန်လို့တော့ သိရတယ်။ အဲဒါကို သေနတ်နဲ့ပစ်တာကော ဓားနဲ့ပါထိုးခဲ့တာ။ နေရာမှာပဲ သေသွားတယ်”လို့ ပြောပါတယ်။

ဦးအောင်ဇော်ဝင်းဟာ ဝဲရင်ညွန့်ကျည်ဖောက်ဝင်ဒဏ်ရာ ၁ ချက်၊ ယာနားရွက် ပြတ်ရှဒဏ်ရာ ၁ ချက်၊ ယာလက်မောင်း ထိုးသွင်းဒဏ်ရာ ၁ ချက်၊ နောက်ကျောယာဘက် ထိုးသွင်းဒဏ်ရာ ၁ ချက် (စုစုပေါင်း ဒဏ်ရာ၄ ချက်)ရရှိပြီး သေဆုံးသွားတယ်လို့ သိရပါတယ်။

သေဆုံးသွားတဲ့ ဦးအောင်ဇော်ဝင်းအလောင်းကိုတော့ စစ်ကောင်စီတပ်သားတွေ လာရောက်စစ်ဆေးပြီး မုံရွာပြည်သူ့ဆေးရုံကို ပို့ထားတယ်လို့ ဆိုပါတယ်။

သူ့ကိုဘယ်အဖွဲ့အစည်းက ဘာကြောင့်သတ်သွားလဲဆိုတာကိုတော့ ထုတ်ပြန်ထားတာမရှိသေးပါဘူး။

ခုနောက်ပိုင်း မုံရွာမြို့ပေါ်မှာ စစ်ကောင်စီတပ်စွဲတဲ့နေရာတွေ မကြာခဏတိုက်ခိုက်ခံနေရပြီး၊ စစ်ကောင်စီလက်အောက်ခံဝန်ထမ်းတွေ၊ ထောက်ခံသူတွေနဲ့ သတင်းပေးဒလန်ဆိုသူတွေလည်း ပစ်ခတ်ရှင်းလင်းခံနေရပါတယ်။

ဒါ့အပြင်ဒီမနက် ၇ နာရီဝန်းကျင်မှာလည်း မုံရွာမြို့၊ အမှတ် ၂ ရဲစခန်းက စခန်းမှူးအပါအဝင် ၇ ဦးလိုက်လာတဲ့ကားကို မုံရွာမြို့၊ နန္ဒရပ်ကွက်၊ သမစိတ္တလမ်း၊ အင်ကြင်းခိုင်ဟိုတယ်အနီးမှာ ဒေသခံကာကွယ်ရေးတပ်ဖွဲ့ဝင်တွေက တိုက်ခိုက်ခဲ့ရာ စခန်းမှူးအပါအဝင် ၃ ဦးသေဆုံးခဲ့တယ်လို့ သိရပါတယ်။

စစ်ကိုင်း၊ ဒီဇင်ဘာ ၂၃၊ ၂၀၂၂။

စစ်ကိုင်းတိုင်း၊ ကန့်ဘလူမြို့နယ်၊ ဂါးဂလှော်ရွာကို စစ်ကောင်စီစစ်ကြောင်း ဝင်ရောက်မီးရှို့ပြီးနောက် အမျိုးသမီး၂ ဦးအပါအဝင် ဒေသခံ ၄ ဦးပျောက်ဆုံးနေကာ မီးရှို့ခံထားရတဲ့ အရိုးစုတချို့လည်းရှိနေတယ်လို့ သိရပါတယ်။

ဒီဇင်ဘာလ ၁၇ ရက်ကနေ ဒီကနေ့ထိပျောက်ဆုံးနေဆဲဖြစ်ပြီး ဧည့်သည်တွေစားသောက်ဖို့အတွက် ရွာဘေးက တောင်ကုန်းတခုမှာ ချက်ပြုတ်နေချိန် ခမရ-‌၃၆၈ စစ်ကြောင်းက အင်အား ၁၆၀ လောက်နဲ့ ရွာကို ရုတ်တရက်ဝင်စီးတဲ့အတွက် ပြင်ဆင်ချိန်ပြေးချိန်မရဘဲ ဖြစ်သွားခဲ့တာလို့ ဒေသခံအမျိုးသမီးတဦးက ပြောပါတယ်။

“အမျိုးသမီး၂ ဦးကတော့ အစအနကိုပျောက်နေတာ၊ အဲ့ဘက်က တောနက်လို့ ပြေးရင်းနယ်လွန်သွားတာလားတော့ မသေချာဘူး၊ အမတို့အတွေ့ကြုံအရဆိုရင်တော့ ဖမ်းသွားပြီထင်တယ်၊ ညမလေးတယောက်ဆို အမတို့ရဲဘော်နဲ့အိမ်ထောင်ကျတဲ့ ကျောင်းဆရာမလေး၊ သူတို့က မြန်မာလို ၁၃ ရက်နေ့ မင်္ဂလာဆောင်၊ စခတွေဝင်တာက ၉ ရက်နေ့ဆိုတော့၊ မင်္ဂလာပွဲပျက်တဲ့အပြင် သတိုးသမီးလေးပါ ပျောက်သွားတာပေါ့၊ သူလည်း တအားကိုစိတ်ထိခိုက်နေတယ်။”လို့ ပြောပါတယ်။

စစ်ကြောင်းထွက်သွားပြီးနောက် ရွာထဲမှာအသတ်ခံရတဲ့ ဦးရွှေဘဆိုသူရဲ့အလောင်းနဲ့ ရုပ်ဖျက်မီးရှို့ခံထားရတဲ့ အမျိုးသားအရိုးစု ၂စု တွေ့ခဲ့ပြီး၊ ဒေသခံတွေကတော့ အဆိုပါအလောင်းတွေဟာ ချက်ပြုတ်တဲ့နေရာကနေ ဖမ်းဆီးခံလိုက်ရတဲ့သူတွေဖြစ်နိုင်ပြီး အမျိုးသမီးတွေကတော့ ပျောက်ဆုံးနေဆဲဖြစ်တယ်လို့ ပြောဆိုနေကြပါတယ်။

အိမ်ခြေ ၁၀၀ ဝန်းကျင်ရှိတဲ့ ဂါးဂလှော်ရွာဟာ စစ်ကောင်စီခြေမြန်တပ်ရင်းရဲ့ လက်နက်ကြီးနဲ့ပစ်ခတ်ကာ မီးရှို့မှုတွေကြောင့် ဘုန်းကြီးကျောင်းနဲ့ ကျန်းမာရေးဆေးပေးခန်းအပြင် နေအိမ် ၂၃ လုံးမီးရှို့ ဖျက်ဆီးခံခဲ့ရတာလည်း ဖြစ်ပါတယ်။

အဲ့ဒီစစ်ကြောင်းဟာ လွှဲ‌‌ဆိပ်၊ လက်ခုပ်ကုန်း၊ ဘောရွာတို့ကို မီးရှို့ခဲ့တဲ့စစ်ကြောင်းဖြစ်ပြီး အခုလက်ရှိ ကန့်ဘလူရှေ့ခြမ်းက စစ်ကောင်စီဂိတ်ကြီးရှိတဲ့ ဇင်းရွာဘက်မှာရှိနေတယ်လို့ သိရပါတယ်။