အရာတော်

အရာတော်၊ မတ် ၅၊ ၂၀၂၅။

စစ်ကိုင်းတိုင်း၊ အရာတော်မြို့နယ်အခြေစိုက် မုံရွာခရိုင်တပ်ရင်း ၂၁ Ngwe Dwin Revolution Force ရဲ့တပ်ဖွဲ့ဝင် ၉ ဦးကို ကျည်ကာပြားနဲ့ ဦးထုပ်တွေ တပ်ဆင်ပေးနိုင်ခဲ့တယ်လို့ တပ်စုမှူး ဗိုလ်စိုးကြီး ဆီက သိရပါတယ်။

အောက်တိုဘာ ၁ ရက်ကနေ နိုဝင်ဘာ ၁၅ ရက်အထိ တပ်ရင်း ၂၁ က ပြုလုပ်ခဲ့တဲ့ “ အားအင်အပြည့်ဖြင့်ဆက်တိုက်မယ်” ကမ်ပိန်း(Campaign) ကနေ ကျပ်သိန်း ၁၅၀ ပြည့်မီရရှိခဲ့ပြီး အဆိုပါရရှိငွေတွေကနေ တပ်ဖွဲ့ဝင် ၉ ဦးအတွက် L4 ကျည်ကာနဲ့ L4 ဦးထုပ်တွေ တပ်ဆင်ပေးနိုင်ခဲ့တာလို့ ဆိုပါတယ်။

“ကျည်ကာကမ်ပိန်းလုပ်ရတဲ့ ရည်ရွယ်ချက်က ရှေ့တန်းမှာတိုက်ပွဲဝင်နေတဲ့ရဲဘော်တွေ တခါတလေဆိုရင်ဘေးလွယ်အိတ်တွေနဲ့ တိုက်တာရှိတယ်။ ကျည်ကာတွေမပါပဲတိုက်တာရှိတယ်၊ အထိအခိုက်အနည်းဆုံးဖြစ်အောင်လို့ တပ်ဆင်တာပါ။” လို့ တပ်စုမှူး ဗိုလ်စိုးကြီးက ပြောပါတယ်။

မုံရွာခရိုင် တပ်ရင်း ၂၁ မှာ တပ်ဖွဲ့ဝင် အင်အား ၁၀၀ ကျော်ရှိပြီး လက်ရှိပြုလုပ်ခဲ့တဲ့ကမ်းပိန်းဟာ တပ်ခွဲ ၂ အတွက် တပ်ခွဲ ၁ ခွဲစာ ပြုလုပ်ခဲ့တာဖြစ်ကာ အဲ့ဒီတပ်ခွဲမှာ တပ်ဖွဲ့ဝင် ၂၀ ဦးအတွက် ကျည်ကာနဲ့ ဦးထုပ်တွေတပ်ဆင်ပေးဖို့ ကျန်ရှိနေသေးတယ်လို့ သိရပါတယ်။

မြေလတ်အသံ၊ ဇန်နဝါရီ ၃၀၊ ၂၀၂၅။

အရာတော်မြို့နယ်၊ ငွေတွင်းကျေးရွာအခြေစိုက် ပျူစောထီး(ပြည်သူ့စစ်)စခန်းက ပစ်လိုက်တဲ့ ၈၁ မမ လက်နက်ကြီးကျည်စထိမှန်ပြီး ကလေး ၁ ဦးနဲ့ အမျိုးသမီး ၂ ဦး ထိခိုက်ဒဏ်ရာရှိခဲ့ပါတယ်။

ဇန်နဝါရီ ၂၈ ရက် ညနေ ၄ နာရီလောက်က ငွေတွင်းကျေးရွာကနေ ၁ မိုင်ခန့်အကွာ မြေနက်ကျေးရွာကို စစ်ရေးလှုပ်ရှားမှုမရှိဘဲ ၈၁ မမလက်နက်ကြီး ၂ လုံးနဲ့ ပစ်ခတ်ခဲ့တာလို့ အရာတော်မြို့နယ် ဒေသခံပြည်သူ့ကာကွယ်ရေးတပ်ဖွဲ့က တာဝန်ရှိသူတစ်ဦးက မြေလတ်အသံကို ပြောပြပါတယ်။

စစ်ရေးလှုပ်ရှားမှုမရှိတဲ့အတွက် နေ့စဥ်ပုံမှန်သွားလာနေကြတဲ့ မြေနက်ကျေးရွာက အသက် ၉ နှစ်အရွယ် ကလေးငယ် ၁ ဦးနဲ့ အသက် ၅၀ ကျော်အရွယ် အမျိုးသမီး ၂ ဦးတို့ ဒဏ်ရာရရှိခဲ့ပြီး ဆေးကုသမှုခံယူနေရတယ်လို့ ပြောပါတယ်။

“ခြေထောက်တွေထိသွားတာ။ နောက်တယောက်ကတော့ ခါးဖောက်ဝင်သွားတာ။ အငယ်ဆုံးတယောက်ကတော့ ပါးမှာ အရေပြားကြီး လန်သွားတယ်။” လို့ အရာတော်မြို့နယ် ဒေသခံပြည်သူ့ကာကွယ်ရေးတပ်ဖွဲ့က တာဝန်ရှိသူတစ်ဦးက ပြောပါတယ်။

အရင်ကလည်း ငွေတွင်းကျေးရွာဘက်က လက်နက်ကြီးတွေနဲ့ ပစ်လေ့ရှိတဲ့အတွက် အရပ်သားတွေ ထိခိုက်ဒဏ်ရာရခဲ့ဖူးပါတယ်။

ငွေတွင်းကျေးရွာမှာ စစ်ကောင်စီတပ်ဖွဲ့ဝင်တွေနဲ့ ပျူစောထီးတွေက ခံစစ်စခန်းနဲ့ အခိုင်အမာတပ်စွဲထားတာဖြစ်ပြီး သူတို့စခန်းထဲကနေ လက်နက်ကြီးနဲ့ အကြောင်းမဲ့ ပစ်ခတ်တာဖြစ်တယ်လို့ ပြောပါတယ်။

ငွေတွင်းကျေးရွာက ပျူစောထီးအဖွဲ့ဝင်တွေနဲ့ စစ်ကောင်စီတပ်ဖွဲ့တွေကို တော်လှန်ရေးအင်အားစုတွေက ဝိုင်းဝန်းပြီးတော့ ပိတ်ဆို့ဖြတ်တောက်မှုတွေ လုပ်ဆောင်နေကြတာရှိပါတယ်။

၂၀၂၅ နှစ်စအထိ ငွေတွင်းကျေးရွာက ပျူစောထီးတွေရဲ့ ဖိနှိပ်မှုဒဏ်တွေကြောင့် ထွက်ပြေးခိုလုံလာသူ အရပ်သားပြည်သူ စုစုပေါင်း ၃,၀၀၀ ဝန်းကျင်ရှိပါတယ်။

သတင်း – ငြိမ်းချမ်းမေ၊ စာတည်း – ဈာန်မြင့်

စစ်ကိုင်း၊ ဇွန် ၁၈၊ ၂၀၂၃။

စစ်ကိုင်းတိုင်း၊ မုံရွာခရိုင်၊ အရာတော်မြို့နယ်ထဲက ပျက်စီးနေတဲ့ကျေးလက်လမ်းပိုင်းတချို့ကို အရာတော်မြို့နယ် ပြည်သူ့ကာကွယ်ရေးအဖွဲ့ – နဂါးနီတပ်ခွဲ တပ်ဖွဲ့ဝင်တွေက ဒေသခံတွေနဲ့အတူ ကူညီပြုပြင်ပေးခဲ့တယ်လို့ အဲ့ဒီအဖွဲ့ဆီက သိရပါတယ်။

ဇွန်လ ၁၇ ရက် မနေ့ကမနက်ပိုင်းမှာ အရာတော်မြို့နဲ့ကျေးရွာ ၅ ရွာကို ဆက်သွယ်ထားတဲ့ လမ်းပိုင်းနေရာတွေမှာ မိုးရွာတာများပြီး ဒေသခံတွေသွားလာရတာ ခက်ခဲနေလို့ ရဲဘော် အင်အား ၂၀ ကျော်က သွားရောက်ပြုပြင်ပေးခဲ့တာလို့ သိရပါတယ်။

“လမ်းက ချိုင့်ခွက်တွေ မြောင်းတွေလိုဖြစ်နေတော့ သွားလာရတာခက်ခဲနေတယ်။ ယာဥ်အန္တရာယ် ဖြစ်မှာစိုးတာနဲ့ ကျေးလက်နေပြည်သူတွေ အဆင်ပြေဖို့ ကူညီလုပ်ကိုင်ရတာပါ”လို့ အရာတော်မြို့နယ် ပြည်သူ့ကာကွယ်ရေးအဖွဲ့ နဂါးနီတပ်ခွဲမှ သတင်းတာဝန်ခံက မြေလတ်အသံကို ပြောပါတယ်။

နဂါးနီတပ်ခွဲဟာ ပြည်သူကိုအခြေပြုထားတဲ့အဖွဲ့ဖြစ်သလို ပြည်သူကို စည်းရုံးရင်းနဲ့ တိုက်ပွဲဝင်မှ အောင်နိုင်မယ်လို့ ခံယူထားတဲ့အတွက် ပြည်သူတွေရဲ့အခက်အခဲကို ကူညီဆောင်ရွက်ပေးရတာ ဖြစ်တယ်လို့ သူကဆက်ပြောပါတယ်။

ပြီးခဲ့တဲ့ ဖေဖော်ဝါရီလ ၁၉ ရက်နေ့ကလည်း နဂါးနီပြည်သူ့ကာကွယ်ရေးတပ်ဖွဲ့ အနေနဲ့ ရွှေဘိုမြို့နယ်က စစ်ရှောင်ပြည်သူတွေကို စားနပ်ရိက္ခာတွေ ကူညီထောက်ပံ့ပေးခဲ့တယ်လို့ သိရပါတယ်။

အဲ့ဒီအဖွဲ့ဟာ ပြည်သူအကျိုးပြုလုပ်ငန်းတွေလုပ်ကိုင်ရာမှာ လမ်းတံတားပြင်ရုံသာမက ရပ်ရွာလုံခြုံရေးနဲ့ စစ်ဘေးရှောင်တွေကို ကူညီပံပိုးတာတွေလည်း လုပ်ကိုင်နေပြီး၊ စစ်ကောင်စီကို တိုက်ခိုက်ဖို့အတွက် လက်နက်ကြီးတချို့ကိုပါ ထုတ်လုပ်တာတွေလုပ်နေတယ်လို့ သိရပါတယ်။

စာတည်း – လင်း

စစ်ကိုင်း၊ မေ ၁၂၊ ၂၀၂၃။

စစ်ကိုင်းတိုင်း၊ အရာတော်မြို့နယ်၊ ဆင်တလည်ကျေးရွာက နေအိမ်တွေကို ပျူစောထီးတွေက မီးရှို့ပြီး လူလတ်ပိုင်း အမျိုးသား ၁၅ ဦးကိုလည်း ဓားစာခံအဖြစ် ဖမ်းခေါ်သွားခဲ့တယ်လို့ သိရပါတယ်။

သလဲဘာကျေးရွာက ပျူစောထီးအင်အား ၅၀ လောက်က သူတို့ရွာနဲ့ တမိုင်လောက်ဝေးတဲ့ ဆင်တလည်ရွာကို မေလ ၁၂ ရက်ဒီမနက် ၈ နာရီလောက်မှာဝင်လာချိန် ကာကွယ်ရေးတပ်တွေနဲ့ ထိတွေ့မှုဖြစ်ခဲ့ပြီး အဲ့ဒီနောက်မှာ နေအိမ်တွေကိုမီးရှီု့ခဲ့တာလို့ အမေ့သား – Local PDF စစ်ကိုင်းအဖွဲ့ ခေါင်းဆောင်တဦးက ပြောပါတယ်။

“ကျနော်တို့တွေ သူတို့ကိုချောင်း နေတာ ၂ ရက်လောက်ရှိပြီ။ ဒီနေ့မှ ရွာထဲကိုဝင်လာတာ ရွာထဲကို ဝင်လာတဲ့အချိန် သေနတ်တွေပစ်ဖောက်တာမျိုးမရှိဘူး၊ ဓားစားခံအဖြစ် ဖမ်းဆီးခံရတဲ့ပြည်သူတွေက ကိုယ့်ဘက်က ကင်းပုန်းဝပ်နေတဲ့ရဲဘော်တွေလား၊ နွားကျောင်းသားတွေလား ဆိုတာ အတိအကျ မသိရသေးဘူး။ တခြားနယ်ကရဲဘော်တွေလည်း ကင်းပုန်းဝပ်ပေးနေကြတယ်ဆိုတော့လေ။” လို့ ပြောပါတယ်။

ဖမ်းဆီးခံရသူတွေရဲ့ အသေးစိတ်အချက်အလက်နဲ့ မီးရှို့ခံရတဲ့ အိမ်ခြေအရေအတွက်တွေကိုတော့ မြေလတ်အသံက ဆက်လက်စုံစမ်းနေဆဲပါ။

ဆင်တလည်ရွာကို မီးရှို့ပြီး မနက် ၁၁ နာရီလောက်မှာတော့ အဲ့ဒီပျူစောထီးတပ်ဖွဲ့တွေဟာ သလဲဘာကျေးရွာထဲကို ပြန်လည်ဝင်ရောက်သွားခဲ့တယ်လို့ ဆိုပါတယ်။ အိမ်ခြေ ၄၀၀ ကျော်ရှိတဲ့ ဆင်တလည်ရွာဟာ ဒီတကြိမ်နဲ့ဆိုရင် မီးရှို့ခံရတာ ၃ ကြိမ်မြောက်ရှိပါပြီလည်း ဖြစ်ပါတယ်။

၂၀၂၂ ခုနှစ်၊ ဇူလိုင် ၁၃ ရက်မှာ နေအိမ် ၃၇ လုံး၊ ၂၀၂၃ ခုနှစ် ဧပြီ ၁၉ ရက်မှာ နေအိမ် ၁၅ လုံးကိုလည်း သလဲဘောကျေးရွာရှိ ပျူစောထီးတွေကပဲ မီးရှို့ခဲ့တာပါ။

လက်ရှိအချိန်မှာတော့ ဆင်တလည်ကျေးရွာက ရွာသားတချို့ဟာ ကျေးရွာထဲကို ပြန်လည် ဝင်ရောက်လာနေပြီး မီးလောင်နေတဲ့နေအိမ်တွေကို မီးငြိမ်းသက်မှုတွေ လုပ်နေတယ်လို့လည်း သိရှိရပါတယ်။

စာတည်း – လင်း

အရာတော်၊ မေ ၅၊ ၂၀၂၃။

စစ်ကိုင်းတိုင်း၊ အရာတော်မြို့နယ်၊ ကြွေပုဂံကျေးရွာကနေအိမ်တွေကို မေလ ၅ ရက်ဒီမနက် ၉ နာရီလောက်မှာ စစ်ကောင်စီတပ်သားတွေက ဒုတိယအကြိမ် ဝင်ရောက်မီးရှို့ဖျက်ဆီးခဲ့ပါတယ်။

အရာတော်မြို့နယ် စစ်အခြေခံလေ့ကျင့်ရေးတပ် စ.ခ.တ (၁၀)မှ တပ်သားအင်အား ၆၀ လောက်ဟာ ဝက်ခဲကျေးရွာကနေ ၂ မိုင်ကျော်ဝေးတဲ့ ကြွေပုဂံကျေးရွာထဲကို ဒီမနက် ၈ နာရီလောက်မှာ ပစ်ခတ်ဝင်ရောက်လာပြီးနောက် နေအိမ်တွေကို မီးရှို့ခဲ့တာလို့ အရာတော်ပိုစ့်မှ တာဝန်ရှိသူတဦးက ပြောပါတယ်။

“တိုက်ပွဲမဖြစ်ပဲနဲ့ ရွာထဲကိုဝင်လာတယ်။ ပြီတော့ ရွာကိုမီးရှို့တယ်။ ဒီနေ့မနက်နေအိမ်တွေ မီးထဲဘယ်လောက်ပါသွားလဲ မသိရသေးပါဘူး။ ရွာသားတွေလည်း ထွက်ပြေးနေကြတယ်။ ရွာထဲကို မဝင်ကြသေးဘူး။ အခုချိန်ထိတော့ ဖမ်းဆီးခံရတဲ့ပြည်သူတွေ ရှိတယ်လို့မကြားမိသေးပါဘူး” လို့ အရာတော်ပို့စ် မှ တာဝန်ရှိသူတဦးက ပြောပါတယ်။

ကြွေပုဂံရွာကို မီးရှို့ပြီး မနက် ၁၀ နာရီလောက်မှာတော့ အဆိုပါစစ်ကောင်စီတပ်ဖွဲ့ဟာ ကြွေပုဂံရွာ အနောက်ဘက်ကို ပြန်လည်ဝင်ရောက်သွားခဲ့ပေမယ့် ကြွေပုဂံရွာနဲ့ ရွာနီးချင်း ဒုံဒစ်ရွာက ပြည်သူတွေကတော့ လက်ရှိအချိန်ထိ ရွာကနေ ထွက်ပြေးတိမ်းရှောင်နေရတယ်လို့ သိရပါတယ်။

ပြီးခဲ့တဲ့မတ်လ ၂၉ ရက်မှာလည်း ကြွေပုဂံကျေးရွာကို စစ်ကောင်စီတပ်က ပထမအကြိမ် စစ်ကြောင်းထိုး ဝင်ရောက်ကာ နေအိမ် ၂၉ လုံးကို မီးရှို့ဖျက်ဆီးခဲ့ပါသေးတယ်။

စာတည်း – လင်း