မတ္တရာ၊ စက်တင်ဘာ ၂၄၊ ၂၀၂၅။

မန္တလေးတိုင်း၊ မတ္တရာမြို့နယ်၊ ရုံးပင်ကျေးရွာမှာ စစ်ကော်မရှင်တပ်တွေပစ်ခတ်တဲ့ လက်နက်ကြီး ကျရောက်ပေါက်ကွဲခဲ့တာကြောင့် အမျိုးသမီး ၁ ဦးသေဆုံး ၂ ဦးဒဏ်ရာရတယ်လို့ ကျေးရွာနဲ့ နီးစပ်သူတွေဆီက သိရပါတယ်။

စက်တင်ဘာ ၂၃ ရက်ညနေ ၃ နာရီခန့်မှာ လက္ကောင်းကြီးကျေးရွာသင်္ချိုင်းမှာ တပ်စွဲထားတဲ့ စစ်ကော်မရှင်တပ်ဖွဲ့ဝင်တွေက ရုံးပင်ကျေးရွာဘက်ကို လက်နက်ကြီး ၆ လုံးပစ်ခဲ့ရာ လူနေအိမ်ပေါ်တွေနဲ့ ကျေးရွာအပြင်ဘက်ကိုကျရောက်ပေါက်ကွဲခဲ့တယ်လို့ ဆိုပါတယ်။

“ထိတဲ့သူမိသားစုက နေအိမ်ပေါ်တည့်တည့်ကျတာ။ အမျိုးသမီးက သေတယ်။ ကလေးနဲ့ ယောကျာ်းလုပ်သူက ဒဏ်ရာရတယ်။ ခုတလော ဒီကောင်တွေ(စကမ)လက်နက်ကြီးတွေပစ်တာ များပြားလာ တယ်။ တနေ့ကို အလုံး ၅၀ လောက် ပြည်သူကျေးရွာတွေကိုပစ်နေတာ။ သူတို့ပစ်တဲ့နေရာတွေက တိုက်ပွဲဖြစ်တာမရှိဘူး”လို့ ရုံးပင်ကျေးရွာနဲ့နီးစပ်သူတဦးကပြောပါတယ်။

လက်နက်ကြီးထိမှန်လို့ အသက် ၃၅ နှစ်အရွယ် မအေးအေးမော်မှာ နေရာမှာတင်သေဆုံးပြီး အသက် ၁၀ နှစ်အရွယ် သမီးဖြစ်သူမှာ မျက်ခုံးဒဏ်ရာရ၊ အမျိုးသားဖြစ်သူ အသက် ၃၆ နှစ်အရွယ် ကိုသိန်းထွေးမှာ လက်မှာဒဏ်ရာသွားပြီး နေအိမ်လည်းပျက်စီးခဲ့တယ်လို့ ဆိုပါတယ်။

စစ်ကော်မရှင်ဘက်က လက်နက်ကြီးပစ်ခတ်လို့ အိမ်ခြေ ၁၅၀ ကျော်ရှိတဲ့ ရုံးပင်ကျေးရွာက ဒေသခံ ၅၀၀ ကျော်လည်း ဘေးလွတ်ရာကိုတိမ်းရှောင်နေရတယ်လို့ ဆိုပါတယ်။

စက်တင်ဘာ ၁၃ ရက်ကလည်း မတ္တရာမြို့နယ်အရှေ့မြောက်ခြမ်း၊ အင်ကြင်းမြိုင်ကျေးရွာ အနီးဝန်းကျင်ကို စစ်ကော်မရှင်တပ်က လေကြောင်းကနေဗုံးကြဲလို့ ကိုရင် ၁ ပါးအပါအဝင် ၃ ဦးသေဆုံးတယ် သိရပါတယ်။

စာတည်း – လင်း

လက်ပံတန်း၊ စက်တင်ဘာ ၁၀၊ ၂၀၂၅။

ပဲခူးတိုင်း၊ လက်ပံတန်းမြို့နယ်၊ သစ်ဟောင်းပြင်ကျေးရွာမှာ ဒရုန်းနဲ့ဗုံးချတိုက်ခိုက်ခံရပြီး အမျိုးသမီး ၂ ဦးသေဆုံးကာ ၂ ဦးဒဏ်ရာရခဲ့တယ်လို့ ရွှေတန်းမြေပြည်သူ့ကာကွယ်ရေးအဖွဲ့ တာဝန်ရှိသူတွေဆီက သိရပါတယ်။

စက်တင်ဘာ ၉ ရက်နေ့လယ် ၁၂ နာရီခန့်မှာ လက်ပံတန်းမြို့ပျူစောထီးအဖွဲ့တွေက သစ်ဟောင်းပြင်ကျေးရွာအနီး တမိုင်ကျော်လောက်ကနေကျေးရွာထဲကို ဒရုန်းနဲ့ဗုံးသီး ၂ လုံးလာကြဲချသွားတယ်လို့ ဆိုပါတယ်။

“အိမ်မှာနေရင်းနဲ့ကိုထိတာ။ ရွာထဲအိမ်တွေမှာရှိနေတာ။ ဗုံးတွေကပြင်းတယ်။ အိမ်တွေပေါ်ကျတာနဲ့ ပွင့်ကျလန်ထွက်ကုန်တာ။ အိမ် ၂ အိမ်ပျက်ပြီး အမျိုးသမီး ၂ ဦးသေပြီး ၂ ဦးဒဏ်ရာရသွားတာ။ မိသားစုဝင်တွေပဲ”လို့ ရွှေတန်းမြေပြည်သူ့ကာကွယ်ရေးအဖွဲ့တာဝန်ခံက ပြောပါတယ်။

စစ်ကော်မရှင်တပ်က မြို့နယ်အလိုက် ပျူစောထီးအဖွဲ့တွေဆီ ဒရုန်းတွေပေးထားတာရှိနေပြီး ပျူစောထီးအဖွဲ့တွေက ရရှိထားတဲ့ ဒရုန်းတွေကို စမ်းသပ်မောင်းနှင်ပြီး ကြုံတဲ့နေရာကို ဗုံးလိုက်ကြဲနေတာလို့ အထက်ပါတာဝန်ရှိသူက ပြောပါတယ်။

ဗုံးကျပေါက်ကွဲလို့ အသက် ၆၀ ဝန်းကျင်အရွယ်ရှိ ဒေါ်ခင်လှိုင်၊ အသက် ၅၀ ဝန်းကျင်ရှိ ဒေါ်စန်းဌေးတို့ နေရာတင်သေဆုံးပြီး အသက် ၉ နှစ်အရွယ် မယွန်းဝတီနဲ့ အသက် ၄၅ နှစ်အရွယ် မညိုမီလှိုင်တို့ ပြင်းထန်ဒဏ်ရာရခဲ့တယ်လို့ ဆိုပါတယ်။

ဒါအပြင်နေအိမ် ၂ လုံးမီးလောင်ပျက်စီးသွားပြီး ဒဏ်ရာရသူ ၂ ဦးကိုတော့ နီးစပ်ရာဆေးရုံပို့ထားရကာ သေဆုံးသွားသူတွေကိုတော့ နေ့ချင်းသင်္ဂြိုဟ်လိုက်ပြီလို့ သိရပါတယ်။

ဒရုန်းဗုံးချခံရတာကြောင့် အိမ်ခြေ ၂၀၀ ခန့်ရှိတဲ့ သစ်ဟောင်းပြင်ကျေးရွာက ဒေသခံအများစုဟာ ဘေးလွတ်ရာကိုတိမ်းရှောင်သွားကြရပြီး လူနည်းစုလောက်က ရွာမှာဆက်ရှိနေပါတယ်။

စက်တင်ဘာ ၄ ရက်ကလည်း လက်ပံတန်းမြို့နယ်၊ သရက်ချောင်းရွာမှာ စစ်ရှောင်ရာကနေ နေအိမ်ခေတ္တပြန်နေနေတဲ့အမျိုးသား ဒရုန်းဗုံးထိမှန်လို့ သေဆုံးသွားတယ်လို့ သိရပါတယ်။

စာတည်း – လင်း

◼ ပုလဲမှာလည်း လေယာဥ်နဲ့ဗုံးကြဲခံရလို့ အမျိုးသမီး ၁ ဦး သေဆုံး

သိုက်ထွန်း၊ ဟယ်သာ

မြေလတ်အသံ၊ စက်တင်ဘာ ၄၊ ၂၀၂၅။

စစ်ကိုင်းတိုင်း၊ ဘုတလင်မြို့နယ်မှာ စစ်ကော်မရှင်တပ်စစ်ကြောင်းက ရွာခံအမျိုးသမီး ၂ ဦးကို သေနတ်နဲ့ပစ်သတ်ခဲ့ပြီး ပုလဲမြို့နယ်မှာလည်း လေကြောင်းကနေ ဗုံးကြဲခံရလို့ အမျိုးသမီး ၁ ဦး သေဆုံးခဲ့တယ်လို့ ဒေသခံတွေထံက သိရပါတယ်။

ဘုတလင်မြို့မှာ တပ်စွဲထားတဲ့ စစ်ကော်မရှင်တပ်အင်အား ၉၀ ခန့်ဟာ စက်တင်ဘာလ ၄ ရက် ဒီကနေ့ နေ့လယ် ၂ နာရီလောက်မှာ ဘုတလင်-ရေဦးလမ်းပိုင်းကို စစ်ကြောင်းထိုးလာပြီးနောက် ရှမ်းတဲရွာကို စစ်ကြောင်း ၂ ကြောင်းခွဲဝင်ရောက်လာကာ အမျိုးသမီး ၂ ဦးကို သေနတ်နဲ့ပစ်သတ်သွားခဲ့တာလို့ ဆိုပါတယ်။

” ရှမ်းတဲရွာက အမျိုးသမီး ၂ ဦးက **တွေပြန်ထွက်ပြီဆိုပြီး ရွာထဲပြန်ဝင်တဲ့အချိန်သတ်ခံရတာ။ ၁ ယောက်က ၄ လသားရဲ့မိခင်၊ ကလေးတော့မမှန်ပဲ အသက်ရှင်ကျန်ရစ်တယ်” လို့ ဘုတလင်ရပ်ကျေးပအဖအဖွဲ့ဝင်တဦးက မြေလတ်အသံကို ပြောပါတယ်။

သေဆုံးသူတွေမှာ ရှမ်းတဲရွာနေ အသက် ၄၀ အရွယ် မဖြူနဲ့ အသက် ၃၀ အရွယ် မအေးသီတို့ဖြစ်ပြီး မအေးသီမှာ သားဖြစ်သူ ၄ လသားလေးကို ပွေ့ချီထားရင်း ပစ်ခတ်ခံခဲ့ရတာလို့ ဆိုပါတယ်။

ဒါ့အပြင် စစ်ကြောင်းတွေဟာ တက်လှိုင်းရွာလမ်းခွဲအနီး မြေပဲခင်းတွေမှာ မြေပဲနှုတ်နေတဲ့ မြောက်ကျည်ရွာခံ ၁၅ ဦးကိုဖမ်းဆီးသွားခဲ့ပြီး ညနေ ၅ နာရီခန့် ဘုတလင်မြို့တွင်းပြန်လည်ဝင်ရောက်ချိန်မှာ ၁၄ ဦးကို ပြန်လွှတ်ပေးခဲ့ကာ အသက် ၃၅ နှစ်ဝန်းကျင် ကိုဖိုးဇေ ကို ဆက်လက်ဖမ်းဆီး ခေါ် ဆောင်သွားတယ်လို့ သိရပါတယ်။

အလားတူ စစ်ကိုင်းတိုင်း၊ ပုလဲမြို့နယ်၊ တနယ်ကျေးရွာကို စစ်ကော်မရှင်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် အမျိုးသမီး ၁ ဦးသေဆုံးခဲ့ပါတယ်။

စက်တင်ဘာ ၄ ရက်နေ့လယ် ၁ နာရီခန့်မှာ စစ်ကော်မရှင်တိုက်လေယာဥ်က ဗုံး ၂ လုံးကြဲချခဲ့ရာ တနယ်ကျေးရွာအနောက်တောင်ဘက်ရှိ နေအိမ်အတွင်း ကျရောက်ပေါက်ကွဲခဲ့ပြီး အသက် ၄၀ ဝန်းကျင်အမျိုးသမီးမှာ ဗုံးစထိမှန်ကာ ခါးပြတ်သေဆုံးခဲ့တာလို့ ဒေသခံတဦးက ပြောပါတယ်။

တနယ်ကျေးရွာဟာ အိမ်ခြေ ၁,၈၀၀ ခန့်ရှိ ကျေးရွာကြီးတရွာဖြစ်ပြီး ဩဂုတ်လကုန်ပိုင်းမှာလည်း ကျေးရွာအနောက်မြောက်ဘက်ဘုန်းကြီးကျောင်းပေါ်ကို လေယာဥ်နဲ့ဗုံးကြဲခံခဲ့ရပြီး အဲ့ဒီဗုံးကြဲခံရမှုမှာ လူထိခိုက်မှုမရှိခဲ့ဘူးလို့ သိရပါတယ်။

စာတည်း – ဟိန်းစံ

ဝက်လက်၊ ဩဂုတ် ၂၂၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်၊ ရွာနန်းကျေးရွာမှာ စစ်ကော်မရှင်တပ်တွေပစ်ခတ်တဲ့ လက်နက်ကြီးထိမှန်ပြီး အမျိုးသမီး ၁ ဦးသေဆုံးကာ ၂ ဦးဒဏ်ရာရတယ်လို့ ရွာခံတွေဆီက သိရပါတယ်။

ဩဂုတ် ၂၁ ရက်မနက် ၁၀ နာရီ မိနစ် ၄၀ ခန့်မှာ ဆားတောင်ရဲစခန်းကနေ ၁၂၀ မမ လက်နက်ကြီး တလုံးပစ်ခတ်ခဲ့ရာ ရွာနန်းရွာရဲ့အနောက်တောင်ထောင့်ရှိ နေအိမ်အနီးရေတွင်းနားကို ကျရောက် ပေါက်ကွဲခဲ့တယ်လို့ ဆိုပါတယ်။

“ရေချိုးနေတဲ့ တွင်းနှစ်တွင်းနားကိုကျတာ။ အိမ်ဝန်းထဲကရေတွင်း။ ဖြစ်ဖြစ်ချင်း နို့တိုက်မိခင်ကတော့ တခါတည်းအူထွက်ပြီး ပွဲချင်းပြီးသွားတယ်။ ဆုံးတဲ့သူနဲ့ဒဏ်ရာရသူတွေက ရေချိုးနေချိန် ထိကြတာ”လို့ ရွာခံတဦးက ပြောပါတယ်။

လက်နက်ကြီးကျရောက်ပေါက်ကွဲတာကြောင့် အသက် ၂၉ အရွယ် မထူးထူးမွန်ဆိုသူဟာ သေဆုံးသွားပြီး သူ့မှာကလေးမွေးထားတာ ၂ လခန့်သာရှိသေးတယ်လို့ ဆိုပါတယ်။

ဒါ့အပြင် မထူးမွန်ရဲ့ ဖခင်ဖြစ်သူ အသက် ၆၄ နှစ်အရွယ် ဦးညိုမောင် ခြေဖမိုးပြတ်ထွက်ဒဏ်ရာ၊ ၆၁ နှစ်အရွယ် ဒေါ်ဝင်းမြိုင် ပေါင်စုတ်ပြဲဒဏ်ရာတွေရရှိသွားတဲ့အတွက် ဆေးကုသနေရတယ်လို့ သိရပါတယ်။

ရွာနန်းကျေးရွာက အိမ်ခြေ ၁,၀၀၀ ခန့်ရှိတဲ့ကျေးရွာဖြစ်ပြီး ၂၀၂၂၊ မတ်လအတွင်းက စစ်ကြောင်းဝင်ရောက် မီးရှို့လို့ အိမ်ခြေ ၃၀၀ ကျော်မီးလောင်ပျက်စီးခဲ့သေးတယ်လို့ ဆိုပါတယ်။

စစ်ကောင်စီဘက်က လက်နက်ကြီးပစ်ခတ်ပြီးနောက် စစ်ကြောင်းထိုးလာနိုင်တာကြောင့် ဝက်လက်မြို့နယ်ထဲက ရွာနန်း၊ ရွာသစ်၊ ညောင်ပင်ကြီးတော၊ စစ်ကိုင်းမြို့နယ်ထဲက သိမ်ကျောင်း၊ မြင်းကြွ၊ ကူကြီးကုန်း၊ လင်းတလူး၊ ကျားမင်းကြီး၊ ကျော်ဇေယျ၊ ရှမ်းကုန်းကျေးရွာတွေက ဒေသခံ ၇,၀၀၀ နီးပါး ကျေးရွာကနေ ယာယီတိမ်းရှောင်နေကြရပါတယ်။

ပြီးခဲ့တဲ့ ဩဂုတ် ၁၈ ရက် မနက် ၁၀ နာရီလောက်မှာလည်း ဝက်လက်မြို့နယ်၊ နဘဲပင်လှရွာ ဘုန်းကြီးကျောင်းကို ဂျက်ဖိုက်တာနဲ့ ပေါင် ၃၀၀ ဗုံး ၂ လုံးကြဲချတာကြောင့် ဘုန်းကြီးကျောင်းနဲ့ ဓမ္မာရုံ ပျက်စီးခဲ့ပြီး သက်တော် ၇၀ အရွယ်သံဃာ ၁ ပါး နဲ့ အမျိုးသား ၁ ဦး၊ ၁၀ နှစ်အရွယ် ကိုရင် ၁ ပါး ထိခိုက်ဒဏ်ရာရခဲ့ပါသေးတယ်။

စာတည်း – လင်း

မြေလတ်အသံ၊ ဇူလိုင် ၃၊ ၂၀၂၅။

ပဲခူးတိုင်း၊ မင်းလှမြို့နယ်ကို နှစ်ပတ်အကြာ စစ်‌ကြောင်းထိုးနေတဲ့ စစ်တပ်က ဇရစ်မျှောင်ရွာခံ အမျိုးသမီး ၅ ဦးကို ဖမ်းဆီးထားတယ်လို့ မင်းလှမြို့နယ်ပကဖထံက သိရပါတယ်။

ဇူလိုင် ၂ ရက်‌နေ့ မနက် ၁၁ နာရီကျော်မှာ ဇရစ်မျှောင်ရွာက နေအိမ်တွေကို စစ်တပ်ကဝင်ရောက် မီးဝင်ရှို့ချိန် ရွာထဲကို ပြန်လာတဲ့ မသင်းသင်းဦး၊ မပါပါ၊ မအသေး၊ မမိချိုနဲ့ အမည်မသိရသူအမျိုးသမီး ၁ ဦးတို့ကို ဖမ်းဆီးခဲ့တာလို့ ဆိုပါတယ်။

“သူတို့(အမျိုးသမီးတွေ)ကရွာကို ပြန်လာတုန်းဖမ်းခံရတာ။ စခတွေရုတ်တရက်ရောက်လာတော့ ပိတ်မိပြီးဖမ်းခံရတာ။ သူတို့ဖုန်းတွေလည်းသိမ်းထားတယ်”လို့ မင်းလှမြို့နယ်ပကဖပြန်ကြားရေးတာဝန်ခံ ရဲ ဘော်မိုးထက်က ပြောပါတယ်။

ဒီအမျိုးသမီး ၅ ဦးကို ဖမ်းဆီးခဲ့တဲ့ စစ်ကြောင်းမှာ အင်အား ၄၀ ကျော်ပါပြီး ၎င်းတို့ကို ဇရစ်မျှောင်ဘုန်းတော်ကြီးကျောင်းမှာ ထိန်းသိမ်းထားကာ ဇူလိုင် ၃ ရက်‌နေ့ ဒီနေ့အထိ ပြန်မလွှတ်ပေးသေးဘူးလို့ သူကဆိုပါတယ်။

ဇွန် ၂၀ ရက်ကစပြီး ဇူလိုင် ၃ ရက် ဒီနေ့အထိ မင်းလှမြို့နယ်ထဲကို စစ်​ကြောင်းထိုးဝင်ရောက်နေတဲ့ စစ်ကောင်စီတပ်သားတွေက ကျွဲမကိုင်း၊ တာကလေး၊ ဘန့်ဘွေးကုန်း၊ ဇရစ်မြောင် စတဲ့ကျေးရွာတွေရှိ ဘုန်းကြီး ကျောင်းတွေမှာ ဝင်ရောက်တပ်စွဲထားပါတယ်။

ပြီးခဲ့တဲ့ဇူလိုင် ၁ ရက်‌နေ့ ညနေ ၅ နာရီမှာ ဘန့်ဘွေးကုန်းရွာဘုန်းကြီးကျောင်းမှာ တပ်စွဲနေတဲ့ စစ်ကောင်စီတွေက တော်လှန်ရေးတပ်ဖွဲ့တွေရှိတဲ့ ရိုးမပေါ်ကို လက်နက်ကြီးနဲ့ ပစ်ခတ်ရာ တော်လှန်ရေးတပ်ဖွဲ့တွေဆီမရောက်ခဲ့ဘဲ ကျွဲမကိုင်းရွာက စကစတပ်စခန်းကို ကျရောက်ပေါက်ကွဲခဲ့တယ်လို့ ဆိုပါတယ်။

“စကစစခန်းကို လက်နက်ကြီးကျတာ စကစ ၇ ကောင်သေတယ်လို့ သိရတယ်။မနေ့ကညအထိ တာကလေးရွာစခန်းကလည်း ရွာတွေဘက်ကို လက်နက်ကြီးတွေနဲ့ထုနေတာ”လို့ ရဲဘော်မိုးထက်က ပြောပါ တယ်။

စစ်တပ်ကဇွန် ၂၀ ရက်ကနေ ဒီနေ့အထိ စစ်အင်အား ၅၀၀ ခန့်နဲ့ စစ်ကြောင်း ၃ ခုခွဲဖြန့်ကာ မင်းလှမြို့နယ်ကို စစ်ကြောင်းထိုးဝင် ရောက်နေပါတယ်။

စစ်‌‌ကြောင်း စတင်ဝင်ရောက်လာပြီး တပတ်အတွင်း တောင်ပြတ်ရွာသစ်၊ ရွေးကုန်း၊ ဦးတိုကျွဲလမ်းစု၊ ဗိုလ်တထောင်၊ ဆားချောင်း၊ ဆင်အိုင်ချောင်းပေါက်၊ ဂန့်ဂေါ်ပင်၊ ငလှစမ်း၊ စမ်းဘုတ်၊ ခွက်မ၊ ကျွဲမကိုင်းစတဲ့ ကျေးရွာတွေကို မီးရှို့ခဲ့တာကြောင့် လူနေအိမ် ၁၈၅ လုံးပြာကျပျက်စီးခဲ့တယ်လို့ သိရပါတယ်။

စာတည်း – မြတ်

စဥ့်ကူး၊ ဇွန် ၂၉၊ ၂၀၂၅။

မန္တလေးတိုင်း၊ စဉ့်ကူးမြို့နယ်၊ လက်ပန်လှကျေးရွာ၊ ပြည်စိုးအောင်ရပ်ကွက်မှာ ဗုံးကြဲခံရလို့ နေအိမ်ထဲရှိနေတဲ့ အမျိုးသမီးတဦး ဗုံးစထိမှန်သေဆုံးခဲ့တယ်လို့ စဥ့်ကူးမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

သေဆုံးသူဟာ အသက် ၄၀ ခန့်အရွယ်ရှိ မခင်မျိုးဆန်းဆိုသူဖြစ်ပြီး ဇွန် ၂၉ ရက်နေ့လယ် ၁၂ နာရီခန့်က နေအိမ်မှာရှိနေချိန် စစ်ကောင်စီရဲ့ဂျက်ဖိုက်တာ ၁ စီးပေါ်ကနေကြဲချတဲ့ ဗုံးမှန်ကာ သေဆုံးသွားတာဖြစ်ပြီး နေအိမ် ၃ လုံးလည်းပျက်စီးခဲ့တယ်လို့ ဆိုပါတယ်။

“ပေါင် ၃၀၀ ဗုံး ၁ လုံးနဲ့ချတာ။ မခင်မျိုးစန်းက လမ်းမသွားနိုင်လို့ ခြေထောက်က ကျောက်ပတ်တီး စည်းထားရတာ။ နေအိမ်မှာရှိနေတဲ့အချိန်မှာ ဗုံးကသူ့ဘေးကိုတည့်တည့်ကျတာ။ အသားစအချို့နဲ့ အရိုး နည်းနည်းလောက်ဘဲပြန်ရတယ်”လို့ စဥ့်ကူးမြို့နယ်ပကဖ ပြန်ကြားရေးတာဝန်ခံ ကိုသံမဏိက ပြောပါတယ်။

စစ်ကောင်စီဘက်က ဗုံးလာကြဲခဲ့တဲ့ လက်ပန်လှကျေးရွာအနီးမှာ တိုက်ပွဲဖြစ်တာမရှိဘဲ ဒေသကာကွယ်ရေးအဖွဲ့ဝင်တွေလည်း ကျေးရွာထဲမှာနေထိုင်တာမရှိဘူးလို့ သိရပါတယ်။

ဇွန် ၂၂ ရက်ညပိုင်းကလည်း စဥ့်ကူးမြို့နယ်၊ ယက္ကန်းစင်တောင်ကျေးရွာရှိ ပါချုပ်ဆရာတော် တည်ထောင်ပေးထားတဲ့ မေတ္တာနန္ဒဆေးရုံကို စစ်ကောင်စီဘက်က ဗုံးကြဲခဲ့လို့ အမျိုးသမီး ၁ ဦးသေဆုံးပြီး ၁၂ ဦးဒဏ်ရာရခဲ့တယ်လို့ သိရပါတယ်။

စာတည်း – လင်း

ဝေါ၊ ဇွန် ၂၈၊ ၂၀၂၅။

ပဲခူးတိုင်း၊ ဝေါမြို့နယ်၊ ညောင်ခါးရှည် စစ်ကောင်စီစစ်ဆေးရေးဂိတ်မှာ အမျိုးသမီး ၂ ဦး ပစ္စတိုသေနတ်တွေနဲ့အတူ ဖမ်းဆီးခံရတယ်လို့ ဒေသခံတွေဆီက သိရပါတယ်။

ဇွန် ၂၇ ရက်ညနေ ၃ နာရီကျော်ခန့်မှာ ကျိုက်ထိုဘက်ကနေ ဝေါဘက်ခြမ်းကိုမောင်းလာတဲ့ တက္ကစီ ယာဥ် ၁ စီးကို စစ်ဆေးရေးဂိတ်အရောက် x-ray စက်ကိုဖြတ်ခိုင်းပြီးစစ်ဆေးရာ ကားထဲမှာလက်နက် တွေတွေ့ပြီး ဖမ်းခံရတာလို့ ဆိုပါတယ်။

“အမျိုးသမီးနှစ်ယောက်က ကယ်ရီသယ်လာတာတဲ့။ ရန်ကုန်အရောက်ပို့ရမှာ ဘုရားသုံးဆူကနေ သယ်လာတာ။ ၁ လက်သယ်ခ ဘတ် ၆,၅၀၀ ရတယ်။ သူတို့ကိုယ်တိုင် အရောင်းအဝယ်လုပ်တာ ဖြစ်မယ်။ “လို့ ဖြစ်စဥ်ကိုသိရှိတဲ့ဒေသခံတဦးက ပြောပါတယ်။

လက်နက်သယ်ဆောင်လာသူ အသက် ၄၀ ကျော်အရွယ်နဲ့ ၂၀ ကျော်အရွယ် အမျိုးသမီး ၂ ဦး၊ တက္ကစီယာဥ်မောင်း ဇော်မင်းအောင်တို့ကိုတော့ စစ်ကောင်စီဘက်က ချက်ချင်းဖမ်းဆီးပြီး ဝေါမြို့မရဲစခန်းဘက်ကို ခေါ်သွားတယ်လို့ သိရပါတယ်။

စစ်ကောင်စီထောက်ခံတယ်လီဂရမ်တွေမှာတော့ ညောင်ခါးရှည်စစ်ဆေးရေးဂိတ်မှာ တက္ကစီယာဥ်ကို စစ်ဆေးရာမှာ ပစ္စတိုသေနတ် ၁၉ လက်၊ ကျည်အိမ် ၃၈ ခုနဲ့ ကျည်အများအပြားကို ဖမ်းမိထားတယ်ဆိုပြီး ရေးသားဖော်ပြထားပါတယ်။

ပြီးခဲ့တဲ့ မတ် ၁၂ ရက်ကလည်း ညောင်ခါးရှည်စစ်ဆေးရေးဂိတ်မှာ ဆိုင်ကယ်မောင်းနှင်လာသူ ၁ ဦးကိုလည်း ဆိုင်ကယ်ကာဗာတွေအောက်မှာသယ်ဆောင်လာတဲ့ ပစ္စတိုသေနတ် ၈ လက်၊ ကျည်ဆံတွေ့ပြီး စစ်ကောင်စီတပ်တွေက ဖမ်းဆီးခဲ့ပါသေးတယ်။

စာတည်း – လင်း