အညာပစ်တိုင်းထောင်လေးများအဖွဲ့

စစ်ကိုင်း၊ မေ ၁၀၊ ၂၀၂၃။

စစ်ကိုင်းတိုင်း၊ ယင်းမာပင်ခရိုင်၊ ယင်းမာပင်မြို့နယ်အတွင်းမှာ စစ်ကောင်စီတပ်ရဲ့ မီးရှို့ဖျက်ဆီးတာကို ခံခဲ့ရတဲ့ကျေးရွာက အသက်ကြီး အဘိုး၊ အဘွားတွေအတွက် အညာပစ်တိုင်းထောင်လေးများအဖွဲ့က ပုဆိုးနဲ့ ထမီတွေကို မေလ ၉ ရက်မှာ လှူဒါန်းခဲ့ပါတယ်။

မီးရှို့ခံခဲ့ရတဲ့ ကျေးရွာက အဘိုး၊ အဘွား ၁၁၇ ဦးကို လုံချည် တယောက်တထည် ဂါရဝပြုလှူဒါန်းခဲ့တယ်လို့ အညာပစ်တိုင်းထောင်လေးများအဖွဲ့မှ မဖူးပွင့်ဝေက ဆိုပါတယ်။

စာတည်း – လင်းဇေ

ဆားလင်းကြီး၊ ဧပြီ ၂၉၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်ထဲက မီးဘေးသင့်ပြည်သူ ၇၀၀ ကျော်ကို အညာပစ်တိုင်းထောင်လေးများအဖွဲ့က ဧပြီ ၂၈ ရက် မနေ့က နေ့လယ် ၂ နာရီခန့်မှာ မုန့်လက်ဆောင်းတိုက်ကျွေးခဲ့တယ်လို့ သိရပါတယ်။

စစ်ကောင်စီတပ်က မီးရှို့သွားလို့ အိမ်ခြေ ၁၂၈ လုံး မီးလောင်ဆုံးရှုံးခဲ့တဲ့ ပြည်သူတွေ တခဏတာ စိတ်အမောပြေစေဖို့ရည်ရွယ်ချက်နဲ့ အခုလို မုန့်လက်ဆောင်းတိုက်ကျွေးရခြင်းဖြစ်တယ်လို့ အညာပစ်တိုင်းထောင်လေးများအဖွဲ့မှ တာဝန်ရှိသူ အမျိုးသမီးတဦးက မြေလတ်အသံကို ပြောပါတယ်။

“မီးရှို့ခံလိုက်ရတဲ့ ကျေးရွာတွေမှာက ဘာသစ်ရိပ်ဝါးရိပ်မှ မရှိဘူး အရမ်းပူတယ်။ အညာဒေသ အပူချိန်က ၄၅ အထိ ဖြစ်နေတော့ အိမ်နဲ့နေတဲ့သူတွေတောင်မှ မနေနိုင်တဲ့အပူချိန်ဆိုတော့ ဒီလိုမျိုး သစ်ရိပ်၊ ဝါးရိပ်မရှိဘဲနဲ့ ပြန်လည်ထူထောင်ပေးထားတဲ့ တဲတွေနဲ့နေရတဲ့ သူတို့လေးတွေရဲ့အပူကို ကိုယ်ချင်းစာတဲ့အနေနဲ့ တတ်နိုင်သလောက် သွားရောက် တိုက်ကျွေးခဲ့တာပါ” လို့ ပြောပါတယ်။

မီးဘေးသင့်ပြည်သူတွေကို ဝဝလင်လင်တိုက်ကျွေးနိုင်ဖို့အတွက် ဆားလင်းကြီးမြို့နယ်ထဲက ကျေးရွာပအဖတွေနဲ့တိုင်ပင်ပြီး စီစဉ်ဆောင်ရွက်ခဲ့ရကာ တနာရီအတွင်း အကုန်တိုက်ကျွေးနိုင်ခဲ့တယ်လို့ သိရပါတယ်။

“ညီမတို့က ကျွေးရင်တော့ ဘယ်နေရာကိုရောက်ရောက် ဝဝလင်လင်ကို ကျွေးတယ်။ တချို့ဆိုရင် ပါဆယ်တွေပါ ပြန်ထုပ်သွားကြတယ်။ အသက်ကြီးအဖိုးအဖွားတွေအတွက်ရော အကုန်ထည့်ပေးလိုက်တယ်။ ဘာမှချန်မထားဘူး” လို့ ဆိုပါတယ်။

အညာပစ်တိုင်းထောင်လေးများအနေနဲ့ မီးဘေးသင့်ပြည်သူတွေကို မုန့်လက်ဆောင်းကျွေးမွေးတာဟာ ဒုတိယအကြိမ်ဖြစ်ပြီး ဧပြီလ ၂၅ ရက်နေ့ကလည်း ဆားလင်းကြီးမြို့နယ်ထဲက မီးဘေးသင့်ပြည်သူ ၄၀၀ နီးပါးကို မုန့်လက်ဆောင်း တိုက်ကျွေးခဲ့တယ်လို့ သိရပါတယ်။

စာတည်း – ရင်ငြိမ်း

ယင်းမာပင်၊ မတ် ၁၃၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်မှာ စစ်တပ်ကမီးရှို့ခဲ့တဲ့ ကျေးရွာတရွာက ဒေသခံတွေကို အညာပစ်တိုင်းထောင်လေးများအဖွဲ့က မီးဖိုချောင်သုံးပစ္စည်းအပြင် ဆန်နဲ့ဆီတွေကိုပါ လှူဒါန်းခဲ့တယ်လို့ အဖွဲ့ဝင်အမျိုးသမီး တဦးဆီက သိရပါတယ်။

အိမ်ခြေ ၃၈၆ အိမ်က အိမ်ထောင်စုတွေကို မတ်လ ၁၂ ရက်မနေ့က တအိမ်ထောင်လျှင် ဒန်အိုး ၁ လုံး၊ ဇလုံး ၁ လုံး၊ ဇွန်းကြီး ၁ ချောင်း၊ သောက်ရေခွက် ၁ ခု၊ ဆန် ၁ ပြည်၊ ဆီ ၅၀ ကျပ်သားနဲ့ ငါးသေတ္တာ ၁ ဘူးဆီ လှူဒါန်းခဲ့တာလို့ ဆိုပါတယ်။

အခုလှူဒါန်းမှုမှာ ဆန်တင်း ၁၀၀ ကမ်ပိန်းက ရရှိတဲ့ ငွေရဲ့ ၃၀ %ကို ထုတ်ယူသုံးစွဲထားပြီး ပြည်တွင်းပြည်ပအလှူရှင်တွေနဲ့ CDM တဦးက လှူဒါန်းတဲ့ ဆီလည်းပါဝင်ကာ ကုန်ကျငွေ ၆၃ သိန်းကျပ်ကျေ ာ်ဖြစ်တယ်လို့ သိရပါတယ်။

အညာပစ်တိုင်းထောင်လေးများအဖွဲ့ကို ပြီးခဲ့တဲ့နှစ် နိုဝင်ဘာလ၂၈ ရက်က စတင်ဖွဲ့စည်းခဲ့တာဖြစ်ပြီး၊ လက်ရှိအချိန်အထိ မီးဘေးသင့်အိမ်ထောင်စု ၉၃၉ စုကို လှူဒါန်းနိုင်ခဲ့ပြီဖြစ်သလို ခုလိုလှူဒါန်းတာဟာ ၇ ကြိမ်မြောက်ရှိပြီလို့လည်း အထက်ပါအမျိုးသမီးက ဆိုပါတယ်။

စာတည်း – လင်း