သေဆုံး

မြင်းမူ၊ ဖေဖော်ဝါရီ ၂၅၊ ၂၀၂၆။

စစ်ကိုင်းတိုင်း၊ မြင်းမူမြို့နယ်၊ ရွှေကျောင်းကန်ကျေးရွာမှာ စက်တပ်လေထီးနဲ့ ဗုံးကြဲခံရလို့ ကလေး ၂ ဦးအပါအဝင် လူ ၁၀ ဦးသေဆုံးခဲ့တယ်လို့ မြင်းမူမြို့နယ်ပကဖတာဝန်ရှိသူတွေထံက သိရပါတယ်။

ဖေဖော်ဝါရီ ၂၃ ရက် ည ၇ နာရီကျော်မှာ မုံရွာ နမခစစ်ဌာနချုပ်ကလာတဲ့ စက်တပ်လေထီး(ဂျိုင်ရိုကော်ပတာ) ၃ စီးက ကျေးရွာအတွင်း ဗုံး ၄ လုံးထက်မနည်းကြဲချခဲ့ရာ ဆီကြိတ်စက်လုပ်ငန်းနေရာကို ကျရောက်ပေါက်ကွဲခဲ့တာလို့ ဆိုပါတယ်။

” ရွာအရှေ့ပိုင်းလောက်ကျမယ်။ ဖြစ်ဖြစ်ချင်း ၉ ယောက်သေတယ်။ ဒဏ်ရာရတဲ့အထဲက ၁ ယောက်က အဲ့ညပိုင်းမှာ ထပ်သေတာ။ ကလေး ၂ ယောက် လူကြီး ၈ ယောက်ပါတယ်။”လို့ မြင်းမူမြို့နယ်ပကဖတာဝန်ရှိသူက မြေလတ်အသံကို ပြောပါတယ်။

ဗုံးကျရောက်ပေါက်ကွဲတာကြောင့် အသက် ၅ နှစ်နဲ့ ၁၁ နှစ်အရွယ်မိန်းကလေး ၂ ဦး၊ အသက် ၂၀ အရွယ် PDF တပ်ဖွဲ့ဝင် ၁ ဦး၊ အသက် ၂၀ ကနေ ၆၅ နှစ်ကြား အမျိုးသား ၄ ဦးနဲ့ အမျိုးသမီး ၃ ဦး ဗုံးစထိမှန် သေဆုံးသွားတယ်လို့ ဆိုပါတယ်။

ဒါ့အပြင် အသက် ၄၀ နှစ်ကနေ ၅၀ ကြားရှိ အမျိုးသား ၅ ဦးထိခိုက်ဒဏ်ရာရပြီး ဆီကြိတ်စက်ရုံအပါ အဝင် အဆောက်အဦ ၁၂ လုံးခန့်ပျက်စီးခဲ့ကာ တိုက်ပွဲဖြစ်ပွားတာမရှိဘဲ ဗုံးကြဲခံရတာကြောင့် ကျေးရွာပြည်သူတွေ နောက်ထပ်ဗုံးလာကြဲမှာကို စိုးရိမ်နေကြတယ်လို့ သိရပါတယ်။

ဖေဖော်ဝါရီ ၁၇ ရက်ကလည်း ခင်ဦးမြို့နယ်၊ ညောင်ပင်ကြီးစုကျေးရွာကို စစ်ကော်မရှင်တပ်က လေကြောင်းကနေ ဗုံးကြဲလို့ ပြည်သူ ၃ ဦးသေဆုံးကာ ၆ ဦးဒဏ်ရာရတယ်လို့ သိရပါတယ်။

မုံရွာ၊ ဖေဖော်ဝါရီ ၂၃၊ ၂၀၂၆။

စစ်ကိုင်းတိုင်း၊ မုံရွာမြို့၊ သာစည်ဘုရားမုခ်ပေါက်အနီးရှိ စစ်ကော်မရှင်ဂိတ်အနီးကို လမ်းမှားဝင်သွားတဲ့ ခရီးသည်တင်ကားကို စစ်ကော်မရှင်တပ်တွေကပစ်ခတ်ခဲ့တာကြောင့် ယာဥ်မောင်း ၁ ဦးသေဆုံးခဲ့တယ်လို့ ဖြစ်စဥ်ကိုသိရှိတဲ့ ဒေသခံတွေဆီက သိရပါတယ်။

ဖေဖော်ဝါရီ ၂၁ ရက် ည ၈ နာရီမိနစ် ၄၀ လောက်မှာ မန္တလေးကနေ ဗန်းမော်ကိုသွားမယ့် ယာဥ်မောင်းအပါအဝင် လူ ၆ ဦးလိုက်ပါလာတဲ့ ‘ဗန်းမော်မန်း’ ခရီးသည်တင်ယာဥ်ဟာ မုံရွာမြို့ပေါ်မှာ ကွမ်းခြင်းတွေတင်ပြီးထွက်လာချိန်မှာ စစ်ကော်မရှင်ဂိတ်နဲ့တွေ့ပြီး ပစ်ခတ်ခံရတာလို့ ဆိုပါတယ်။

“ကားသမားက ကွင်းတဲ့လမ်းကိုမသိဘဲနဲ့ မှားဝင်သွားတာဖြစ်နိုင်တယ်။ မုံရွာမြို့ထဲကနေ ၇ နာရီမထိုးခင် ထွက်လို့ရတယ်။ ပုံမှန်ဆို ကွင်းလမ်းကနေသွားရင် ပြသနာမရှိဘူး။ သာစည်ဂိတ်ဘက်ကို ဝင်သွားတော့ ညပိုင်းက သူတို့ဘက်ကို ဘယ်ကားမှမလာတော့ ရပ်တော့ရပ်ခိုင်းသေးတယ်ပြောတယ်။ ကားသမားက နားကနည်းနည်းလေးတော့ မကြားတာနေမယ်”လို့ ဖြစ်စဥ်ကိုသိထားတဲ့ ဒေသခံတဦးက ပြောပါတယ်။

ဒီပစ်ခတ်မှုကြောင့် ယင်းမာပင်မြို့နယ်မှာနေထိုင်သူ အသက် ၅၂ နှစ်အရွယ် ယာဥ်မောင်းအမျိုးသား ၁ ဦး ကျည်ထိမှန်သေဆုံးပြီး အလောင်းကိုလည်း ဖေဖော်ဝါရီ ၂၂ ရက်မနက်ပိုင်းမှ လူမှုကူညီရေးအသင်း ၁ ခုက လာသယ်သွားပြီးနောက် အဲ့ဒီနေ့မှာပဲ မုံရွာဆေးရုံကတဆင့် မိသားစုတွေက ပြန်သယ်သွားပြီလို့ သိရပါတယ်။

ပစ်ခတ်မှုကြောင့် ကားလေကာမှန်နဲ့ ကားခေါင်းပိုင်းတွေမှာ ကျည်ထိပျက်စီးခဲ့ကာ ပစ်ခတ်ပြီးနောက် ကားပေါ်ပါ စပယ်ယာ(ယာဉ်နောက်လိုက်)နဲ့ ကလေးငယ် ၁ ဦးအပါ စုစုပေါင်းခရီးသည် ၄ ဦးတို့ကိုလည်း စစ်ကော်မရှင်တပ်သားတွေကစစ်ဆေးပြီး ဖေဖော်ဝါရီ ၂၂ ရက်မနက်မှာ ပြန်လွှတ်ပေးလိုက်တယ်လို့ သိရပါတယ်။

ဖေဖော်ဝါရီ ၃ ရက်ကလည်း မုံရွာမြို့၊ သာစည်လမ်းပေါ် TTC ကျောင်းအနီးမှာ စစ်ကော်မရှင်တပ်တွေက အိမ်စီးကား ၁ စီးကို ပစ်ခတ်ရာ ကားပေါ်ပါသူ ၃ ဦး သေဆုံးခဲ့တယ်လို့ သိရပါတယ်။

စာတည်း – လင်း

တောင်တွင်းကြီး၊ ဖေဖော်ဝါရီ ၂၃၊ ၂၀၂၆။

မကွေးတိုင်း၊ တောင်တွင်းကြီးမြို့နယ်၊ မှုတ်ရှည်အုပ်စု၊ ညောင်လေးပင်ရွာ အုပ်ချုပ်ရေးမှူး ဖေဖော်ဝါရီ ၂၁ ရက်နေ့လယ်ပိုင်းမှာ ပစ်ခတ်ခံရပြီးသေဆုံးခဲ့တယ်လို့ ဒေသခံတွေဆီက သိရပါတယ်။

ပစ်ခတ်ခံရသူဟာ အသက် ၅၀ အရွယ် အုပ်ချုပ်ရေးမှူး ဆန်းဝင်းဖြစ်ပြီး နေ့လယ် ၁ နာရီဝန်းကျင်မှာ ဒေသခံကာကွယ်ရေးတပ်ဖွဲ့ဝင်တွေက ဝင်ရောက်ပစ်ခတ်ခဲ့တာလို့ ဆိုပါတယ်။

“သူ့နေအိမ်မှာ ပစ်ခတ်ရှင်းလင်းခံရတာ၊ ဦးခေါင်းချည်းပဲ ၄/၅ ချက်လောက်ပစ်သွားတာ၊ မီတာကြေးတွေ အဆမတန်ကောက်တယ်၊ စစ်မှုထမ်းကြေးတွေ ပုံမှန်ဆိုရင် ၁ သောင်း၊ ၂ သောင်းရှိတာကို သူက အိမ်တွေကို ကြည့်ပြီးတော့ ၅ သောင်း၊ ၁ သိန်း၊ ၂ သိန်းဆိုပြီး ခွဲတမ်းချပြီး ကောက်တာ၊ သူ့ကို PDF တွေ(ဆီ)တိုင်ရင်လည်း တရွာလုံးကို ပြာကျအောင်လုပ်မယ်လို့ ကြွေးကြော်ထားတာ”လို့ ညောင်လေးပင် ရွာခံတဦးက ပြောပါတယ်။

ပစ်ခတ်ခံရပြီးနောက် အလောင်းကို နေ့လယ် ၂ နာရီဝန်းကျင်မှာ တောင်တွင်းကြီးနယ်မြေခံရဲစခန်းက ရဲတပ်သား ၁၀ ဦးကျော်လောက်က လာသယ်သွားခဲ့တယ်လို့ ဆိုပါတယ်။

အုပ်ချုပ်ရေးမှူးဆန်းဝင်း ကိုပစ်ခတ်တဲ့ ဒေသကာကွယ်ရေးတပ်ဖွဲ့တွေကတော့ သတင်းထုတ်ပြန်တာ မရှိသေးပါဘူး။

ပြီးခဲ့တဲ့ ဖေဖော်ဝါရီ ၁ ရက်ကလည်း တောင်တွင်းကြီးမြို့နယ်၊ ငှက်ပျောတောကျေးရွာ အုပ်ချုပ်ရေးမှူး ကျော်စိုးကိုလည်း တော်လှန်ရေးတပ်ဖွဲ့ဝင်တွေက နေအိမ်ထဲမှာပစ်ခတ်ရာ သေဆုံးခဲ့ပါသေးတယ်။

စာတည်း – လင်း

မကွေး၊ ဖေဖော်ဝါရီ ၁၈၊ ၂၀၂၆။

မကွေးတိုင်း၊ မကွေးမြို့၊ ဧရာဝတီတံတား(မကွေး) မင်းဘူးဘက်ခြမ်းဂိတ်မှာ မင်းဘူးဒေသခံအချို့ လိုက်ပါလာတဲ့ကား ၁ စီး ပစ်ခတ်ခံရပြီး ၁ ဦးသေဆုံးကာ ၃ ဦး ဖမ်းဆီးခံထားရတယ်လို့ မင်းဘူးမြို့ခံတွေဆီက သိရပါတယ်။

ဖေဖော်ဝါရီ ၁၇ ရက် ည ၉ နာရီခွဲခန့်မှာ အမျိုးသား ၄ ဦးလိုက်ပါလာတဲ့ အဆိုပါကားကို တားဆီးရာကနေ ရပ်မပေးတာကြောင့် စစ်ကော်မရှင်ဂိတ်အဖွဲ့က ပစ်ခတ်ခဲ့တာဖြစ်ပြီး ယာဉ်မောင်းဖြစ်သူ သေဆုံးခဲ့တာလို့ ဆိုပါတယ်။

” မကွေးဘက်က ပြန်လာတာ၊ (ဂိတ်ဖြတ်တဲ့အချိန်) ကား ၂ စီးကို ရှေ့ကကားက လက်ပြပြီးမောင်းသွားတာ၊ ရှေ့ကကားကမောင်းတော့ သူကလည်း လက်ပြပြီးမောင်းတာ၊ မီးကလည်း ပြတ်နေတဲ့အချိန် မောင်းတာ၊ မကွေးတံတား မင်းဘူးဘက်ဂိတ်မှာ အပစ်ခံရတာ၊ ‘အောင်မင်းကျော်ဆေးဆိုင်’က လူ သေသွားတယ်၊ ကားလည်းမှန်တယ်။” လို့ မင်းဘူး ဒေသခံတဦးက မြေလတ်အသံကို ပြောပါတယ်။

သေဆုံးသူဟာ မင်းဘူးမြို့၊ အောင်မင်းကျော် ဆေးဆိုင်ပိုင်ရှင် အသက် ၄၀ ကျော်အရွယ်ရှိ အမျိုးသား ၁ ဦး ဖြစ်ပြီး ပစ်ခတ်ခံရပြီးနောက် သေဆုံးသူအပါအဝင် ကားပေါ်ပါနောက်ထပ် ၃ ဦးနဲ့ ကားကိုပါ မကွေး တပ်မ ၈၈ မှာ ဖမ်းဆီးထားကာ အလောင်းကိုတော့ ပိုက်ဆံပေးပြီး ပြန်ထုတ်ရတယ်လို့ သူက ဆက်ပြောပါတယ်။

ပြီးခဲ့တဲ့ ဖေဖော်ဝါရီ ၃ ရက်ကလည်း မကွေးဘက်ကနေ မင်းဘူးကို ဆိုင်ကယ်နဲ့ ပြန်လာတဲ့ အသက် ၂၀ ကျော်အရွယ် လူငယ် ၂ ဦးကို စစ်ကော်မရှင်တပ်ဖွဲ့ကစစ်ဆေးချိန် ရပ်မပေးတာကြောင့် ပစ်ခတ်ခဲ့ရာက ၂ ဦးစလုံး သေဆုံးခဲ့ပါသေးတယ်။

ပြည်၊ ဖေဖော်ဝါရီ ၁၆၊ ၂၀၂၆။

ပဲခူးတိုင်း၊ ပြည်မြို့နယ်၊ ပတ္တမြားတောင်ရွာအပြင် ကြက်ဝိုင်းမှာ ပျူစောထီး ၁ ဦးကိုပစ်ခတ်ရာ သေဆုံးခဲ့တယ်လို့ ပြည်ခရိုင်တပ်ရင်း ၂ က ဖေဖော်ဝါရီ ၁၆ ရက် ဒီကနေ့မှာ သတင်းထုတ်ပြန်ပါတယ်။

ပစ်သတ်ခံရသူဟာ ဆီဆုံကုန်းကျေးရွာနေ အသက် ၅၀ ကျော်အရွယ် ငထွန်းဆိုသူဖြစ်ပြီး ဖေဖော်ဝါရီ ၁၁ ရက် နေ့လယ် ၁ နာရီခန့်မှာ ကျေးရွာကြက်ဝိုင်းမှာရှိနေချိန် ဝင်ရောက်ပစ်ခတ်ရာ သေဆုံးခဲ့တာဖြစ်ပြီး သူ့ကိုပစ်ခတ်စဉ် ပြည်သူ ၁ ဦးကိုလည်းထိမှန်ပြီးဒဏ်ရာရခဲ့တယ်လို့ ဆိုပါတယ်။

“ကြက်ဝိုင်းမှာ သူ့ကိုပစ်တာ။ ပြည်သူထိတယ်ဆိုတာက ငထွန်းကိုပစ်ခတ်ပြီးတော့ ငထွန်းခေါင်းကနေ ပေါက်ထွက်သွားတဲ့ကျည်က သွားထိတာ။ အဲဒါကလည်း အဲ့နေ့က ရွာမှာမင်္ဂလာဆောင်ပြုလုပ်နေသူရဲ့ အဖေလို့သိရတယ်။ သူကလည်း ကြက်ဝိုင်းကိုလာပြီး ကြည့်ရှုနေတာ”လို့ ပြည်ခရိုင်အမှတ် ၂ တပ်ရင်း သတင်းနှင့်ပြန်ကြားရေးတာဝန်ခံ Red star က ပြောပါတယ်။

ပစ်ခတ်မှုကြောင့် ပျူစောထီးငထွန်းမှာ ဦးခေါင်းကျည်ထိဒဏ်ရာနဲ့ နေရာမှာတင်သေဆုံးခဲ့ပြီး ပတ္တမြားတောင်ရွာသား အသက် ၅၀ အရွယ် အမျိုးသားမှာ ကျောကုန်းမှာဒဏ်ရာရာခဲ့တယ်လို့ ဆိုပါတယ်။

ပျူစောထီးငထွန်းဟာ ဝက်ထီးကန်နယ်မြေရဲစခန်းက ရဲ၊ စစ်ကော်မရှင်တပ်သားတွေနဲ့ပူးပေါင်းကာ ပေါ်တာဆွဲတာ၊ ဖမ်းမိသူတွေကို ပြန်ထုတ်ပေးမယ်ဆိုပြီး မိသားစုတွေဆီကငွေတောင်းတာ၊ တော်လှန်ရေးအဖွဲ့တွေရဲ့ သတင်းတွေကို စစ်ကော်မရှင်ဆီ သတင်းပေးတာတွေကြောင့် ခုလိုပစ်ခတ်ခဲ့တာလို့ ပြည်ခရိုင်အမှတ် ၂ တပ်ရင်း သတင်းနှင့်ပြန်ကြားရေးတာဝန်ခံ Red star ကပြောပါတယ်။

ဖေဖော်ဝါရီ ၆ ရက်ကလည်း တောင်ငူမြို့နယ်၊ နေပူကုန်းကျေးရွာက စစ်ကော်မရှင်ခန့် အုပ်ချုပ်ရေးမှူး ဦးစိန်မြင့်ဆိုသူနေအိမ်မှာ ပစ်သတ်ခံရပြီး သေဆုံးခဲ့ပါသေးတယ်။

စာတည်း – လင်း

တောင်ငူ၊ ဖေဖော်ဝါရီ ၉၊ ၂၀၂၆။

ပဲခူးတိုင်း၊ တောင်ငူမြို့နယ်၊ နေပူကုန်းကျေးရွာက စစ်ကော်မရှင်ခန့် အုပ်ချုပ်ရေးမှူးကို နေအိမ်မှာ ပစ်ခတ်ရာသေဆုံးခဲ့တယ်လို့ တောင်ငူခရိုင် ၃၅၀၁ တပ်ရင်း၊ တပ်ခွဲ ၁ တာဝန်ရှိသူတွေဆီက သိရပါတယ်။

ပစ်ခတ်ခံရသူဟာ နေပူကုန်းကျေးရွာအုပ်ချုပ်ရေးမှူး အသက် ၆၀ အရွယ် ဦးစိန်မြင့်ဆိုသူဖြစ်ပြီး ဖေဖော်ဝါရီ ၆ ရက် ညနေ ၅ နာရီခန့်က သူ့နေအိမ်မှာ ဝင်ရောက်ပစ်ခတ်ခဲ့တာလို့ ဆိုပါတယ်။

“တော်လှန်ရေး ၅ နှစ်တာမှာ စစ်ကောင်စီဒေါက်တိုင်တွေကို ကျနော်တို့ပစ်မှတ် မှတ်ပုံတင်ထားတာရှိတယ်။ သူ့ရဲ့ အလစ်အငိုက်ကိုချောင်းပြီးတော့ လုပ်ခဲ့ရတာ။ သေနတ်နဲ့ပစ်ခဲ့တာ။ ကလေးတွေပစ်ခတ်ခဲ့တာက ၁၆ ချက်ပါ။ နေအိမ်မှာပဲ ပစ်ခတ်ခဲ့တာ”လို့ တောင်ငူခရိုင် ၃၅၀၁ တပ်ရင်း၊ တပ်ခွဲ ၁ တာဝန်ရှိသူက ပြောပါတယ်။

သေနတ်နဲ့ပစ်ခတ်ခံရလို့ အုပ်ချုပ်ရေးမှူး ဦးစိန်မြင့်မှာ နေရာမှာတင်သဆုံးပြီး အလောင်းကိုတော့ စစ်ကော်မရှင်အဖွဲ့တွေက လာကောက်သွားတယ်လို့ သိရပါတယ်။

သေဆုံးသူအုပ်ချုပ်ရေးမှူး ဦးစိန်မြင့်ဟာ စစ်အာဏာသိမ်းပြီးနောက် အုပ်ချုပ်ရေးမှူးဖြစ်လာသူဖြစ်ပြီး သူ့ကိုအုပ်ချုပ်ရေးမှူးအလုပ်ကနေ နုတ်ထွက်ဖို့ စာနဲ့ရော လူကိုယ်တိုင်ပါ အကြိမ်ကြိမ်သတိပေးခဲ့ပေမယ့် စစ်ကော်မရှင်အလိုကျ ဆက်လက်လုပ်ဆောင်နေတာကြောင့် ပစ်ခတ်ခဲ့တာလို့ ဆိုပါတယ်။

ဒါ့အပြင် အဲ့ဒီနေ့မနက်ပိုင်းမှာပင် ပိတောက်ကုန်းကျေးရွာ ဘောလုံးကွင်းမှာ ကျေးရွာနေ အသက် ၅၀ အရွယ် ဦးဇော်နိုင်သန်းဆိုသူပါ ကျည်ထိဒဏ်ရာတွေနဲ့သေဆုံးနေတာကို ရွာခံတွေက တွေ့ခဲ့ရပြီး သူ့ကိုဘယ်သူတွေက ဘာကြောင့်ပစ်ခတ်ခဲ့တယ်ဆိုတာတော့ မသိရဘူးလို့ ဆိုပါတယ်။

ပြီးခဲ့တဲ့နှစ် မတ် ၂၁ ရက်ကလည်း တောင်ငူမြို့နယ်၊ တောင်ငူ-သံတောင်သွားလမ်း မိုးကောင်းရွာနဲ့ အင်းဝိုင်းရွာနားလမ်းပေါ်မှာ အမှတ် ၃ နယ်မြေရဲစခန်းက ဆိုင်ကယ်နဲ့လာတဲ့ ရဲ ၂ ဦးပစ်ခတ်ခံရပြီး ဒုရဲအုပ် ၁ ဦးသေဆုံးခဲ့တယ်လို့ သိရပါတယ်။

စာတည်း – လင်း

မြေလတ်အသံ၊ ဖေဖော်ဝါရီ ၇၊ ၂၀၂၆။

ပဲခူးတိုင်း၊ မုန်းမြို့နယ်နဲ့ မကွေးတိုင်း၊ မြိုင်မြို့နယ်တွေမှာ ၅ ရက်အတွင်း စစ်ကော်မရှင်တပ်က လေကြောင်းကနေ တိုက်ခိုက်ခဲ့တာကြောင့် ပြည်သူ ၃ ဦးသေဆုံးပြီး ၅ ဦးဒဏ်ရာရခဲ့ပါတယ်။

ကရင်အမျိုးသားအစည်းအရုံး (KNU) ထိန်းချုပ်ဒေသဖြစ်တဲ့ ခလယ်လွီထူခရိုင်၊ မုန်း (မူး) မြို့နယ်မှာ စစ်ကော်မရှင်ဘက်က ဒရုန်းနဲ့ ဗုံးကြဲတာ၊ လေယာဥ်နဲ့ ဗုံးကြဲတာနဲ့ လက်နက်ကြီးပစ်ခတ်မှုတွေကြောင့် အရပ်သား ၃ ဦး သေဆုံးပြီး ၁ ဦး ဒဏ်ရာရခဲ့တယ်လို့ KNU ဗဟိုက ဖေဖော်ဝါရီ ၆ ရက်မှာ ထုတ်ပြန်ခဲ့ပါတယ်။

ဖေဖော်ဝါရီ ၂ ရက်မှာလည်း ခမရ ၄၃၉ တပ်ကနေ ခင်ကြီးကျေးရွာထဲကို ဒရုန်းနဲ့ ဗုံးကြဲခဲ့တာကြောင့် အသက် ၅၅ နှစ်အရွယ် ဒေါ်ထွေးရီသန်း သေဆုံးပြီး နေအိမ် ၁၇ လုံးလည်း ထိမှန်ပျက်စီးခဲ့တယ်လို့ ဆိုပါတယ်။

ဖေဖော်ဝါရီ ၄ ရက် မနက် ၁၀ နာရီခွဲမှာ မုန်းမြို့နယ်၊ စောခီးကျေးရွာထဲကို လေယာဉ်နဲ့ ဗုံး ၂ လုံး ကြဲချခဲ့တာကြောင့် အသက် ၉ နှစ်အရွယ် စောကလဲမူသော ထိမှန်သေဆုံးခဲ့ပြီး နေ့လယ် ၁၁ နာရီမှာလည်း ခမရ ၄၃၉ တပ်ကနေ ခင်ကြီးကျေးရွာထဲကို ဒရုန်းနဲ့ ဗုံးကြဲခဲ့တာကြောင့် အသက် ၅၈ နှစ်အရွယ် မောင်မျိုး ထိမှန်သေဆုံးခဲ့ပါတယ်။

ဒါ့အပြင် အဲ့ဒီနေ့ ညနေ ၃ နာရီခွဲမှာလည်း ခလရ ၆၀ ကနေ ငထွေစုတ်ကျေးရွာထဲကို ဒရုန်းနဲ့ဗုံးကြဲတာ၊ ၁၂၀ မမ လက်နက်ကြီး ၆ လုံးနဲ့ပစ်ခတ်ခဲ့တာကြောင့် အသက် ၁၄ နှစ်အရွယ် စောတာနေသား ထိမှန် ဒဏ်ရာရရှိခဲ့တယ်လို့ ထုတ်ပြန်ချက်မှာဖော်ပြထားပါတယ်။

အလားတူ မကွေးတိုင်း၊ မြိုင်မြို့နယ်၊ ရွာသစ်ကြီးရွာကိုလည်း ဖေဖော်ဝါရီ ၆ ရက်ညနေ ၅ နာရီခန့်မှာ စစ်ကော်မရှင်ရဲ့ ဂျက်ဖိုက်တာ ၁ စီးက ဗုံး ၁ လုံးကြဲချခဲ့တယ်လို့ ဆိုပါတယ်။

“နေအိမ်ဘေးလမ်းပေါ်ကျတာ။ နေအိမ်ခြံဝန်းထဲကလူတွေနဲ့ လမ်းပေါ်ရှိနေသူတွေ ထိကြတာပါ။ ရွာနားမှာလည်း တိုက်ပွဲဖြစ်တာမရှိပါဘူး။ ထိတာက ရွာခံပြည်သူတွေပါ။”လို့ အညာမြေတပ်ပေါင်းစု တာဝန်ရှိသူကပြောပါတယ်။

ဗုံးပေါက်ကွဲစထိမှန်တာကြောင့် အသက် ၃၅ နှစ်ကနေ ၅၀ နှစ်အကြားရှိ အမျိုးသမီး ၃ ဦးနဲ့အမျိုးသား ၁ ဦးထိခိုက်ဒဏ်ရာရကာ အဲဒီအထဲက အမျိုးသမီး ၁ ဦးနဲ့အမျိုးသား ၁ ဦးက စိုးရိမ်ရအခြေနေရှိပြီး နေအိမ် ၁ လုံးလည်းပျက်စီးခဲ့တယ်လို့ ဆိုပါတယ်။

၂၀၂၁ စစ်အာဏာသိမ်းချိန်ကနေ ၂၀၂၆ ဖေဖော်ဝါရီ ၆ ရက်အထိ စစ်ကော်မရှင်တပ်နဲ့ လက်အောက်ခံအဖွဲ့အစည်းတွေကြောင့် သေဆုံးခဲ့သူစုစုပေါင်း ၇,၇၅၆ ဦးရှိခဲ့တယ်လို့ နိုင်ငံရေးအကျဥ်းသားများကူညီစောင့်ရှောက်ရေးအသင်း – AAPP က ထုတ်ပြန်ထားပါတယ်။

စာတည်း – လင်း

ဆော၊ ဖေဖော်ဝါရီ ၆၊ ၂၀၂၆။

မကွေးတိုင်း၊ ဆောမြို့နယ်၊ ကျောက်ထုမြို့နဲ့ ၂ မိုင်အကွာ မိအယ်ကျေးရွာကို စစ်ကော်မရှင်တပ်က ဗုံးကြဲခဲ့တာကြောင့် အခြေခံကျောင်းသူ ၂ ဦးအပါအဝင် အမျိုးသမီး ၅ ဦးသေဆုံးခဲ့တယ်လို့ ကျေးရွာနဲ့ နီးစပ်သူတွေဆီက သိရပါတယ်။

ဖေဖော်ဝါရီ ၅ ရက် ၃ နာရီလောက်မှာ UAV ဒရုန်းတွေနဲ့ကင်းထောက်လာတာကိုတွေ့ရပြီး ၁ နာရီလောက်အကြာ ညနေ ၄ နာရီကျော်မှာ စစ်ကော်မရှင်ရဲ့ဂျက်ဖိုက်တာ ၁ စီးက ရွာအလယ်ပိုင်းကို ဗုံး ၂ လုံးကြဲချခဲ့တာလို့ ဆိုပါတယ်။

“ရွာလယ်တည့်တည့်အိမ်ပေါ်မှာကျတာ။ ထိခိုက်သေဆုံးက အမျိုးသမီးတွေချည်းပဲ။ ကျောင်းသူလေး ၂ ယောက်ပါတယ်။ ဗုံးကျတဲ့နေရာမှာတော့ အိမ်တွေပျက်စီးပြီး ၁ လုံးဆိုမီးကိုလောင်သွားတာ။ ကျန်တာတွေက ပြိုတာပျက်တာ။ တည့်တည့်ကျတဲ့အိမ်က မီးကိုလောင်သွားတာ။ ပြင်းတယ်”လို့ ကျေးရွာနဲ့နီးစပ်သူတဦးက ပြောပါတယ်။

ဗုံးထိပြီး အသက် ၄၀ အရွယ်အမျိုးသမီး ၁ ဦးနဲ့ သမီးဖြစ်သူ ၈ နှစ်အရွယ် ၃ တန်းကျောင်းသူ၊ ၁၃ နှစ်အရွယ် ၇ တန်းကျောင်းသူ၊ အသက် ၇၀ အရွယ်အမျိုးသမီး ၁ ဦးနဲ့သမီးဖြစ်သူ အသက် ၅၀ အရွယ်အမျိုးသမီး ၁ ဦး စုစုပေါင်း ၅ ဦးသေဆုံးကာ အသက် ၅၀ ကျော်အရွယ် နောက်ထပ်အမျိုးသမီး ၂ ဦးပြင်းထန်ဒဏ်ရာရပြီး နေအိမ် ၅ လုံးလည်း ပျက်စီးခဲ့တယ်လို့ သိရပါတယ်။

မိအယ်ရွာမှာ အိမ်ခြေ ၁၅၀ ခန့်ရှိပြီး ဗုံးကြဲခံရပြီးနောက် ဒေသခံတွေလည်းဘေးလွတ်ရာကို ထွက်ပြေးတိမ်းရှောင်နေကြရတယ်လို့ ဆိုပါတယ်။

ပြီးခဲ့တဲ့ ဇန်နဝါရီ ၂၀ ရက်ကလည်း ဆောမြို့နယ်၊ လယ်ကြီးအိုင့်ကျေးရွာကို ဂျက်ဖိုက်တာနဲ့ ဗုံးကြဲတိုက်ခိုက်ခဲ့တာကြောင့် ဒေသခံ ၁ ဦး သေဆုံးပြီး ၄ ဦး ဒဏ်ရာရရှိခဲ့တယ်လို့ သိရပါတယ်။

စာတည်း – လင်း