သေဆုံး

ပခုက္ကူ၊ မတ် ၉၊ ၂၀၂၃။

မကွေးတိုင်းဒေသကြီး၊ ပခုက္ကူခရိုင်၊ ပေါက်မြို့နယ်အတွင်းမှာရှိတဲ့ ကျေးရွာတွေကိုမတ်လ ၉ ရက် ဒီမနက် ၈ နာရီကစပြီး စစ်ကောင်စီဘက်ကစစ်ကြောင်းထိုးကာ နေအိမ်တွေကိုလည်း မီးရှို့ဖျက်စီးခဲ့တယ်လို့ ပေါက်မြောက်ပိုင်းကာကွယ်ရေးတပ်ဖွဲ့ဆီက သိရပါတယ်။

စစ်ကြောင်းထိုးရာ ကျေးရွာတလျှောက်မှာ ပေါက်မြိုနယ်အရှေ့ပိုင်း အုန်းတောတောင်စုနဲ့ မြောက်စုကို စစ်တပ်အင်အား ၁၀၀ ကျော်နဲ့ ဝင်ရောက်စီးနင်းခဲ့ပြီး နေအိမ်များကိုမီးရှို့ဖျက်စီးခဲ့သလို လက်နက်ကြီးငယ်တွေနဲ့ပစ်လို့ ထိခိုက်သေဆုံးရှိခဲ့တယ်လို့ ပြန်ကြားရေးတာဝန်ခံက ပြောပါတယ်။

“အိမ်တွေလည်းမီးရှို့ခံရတယ်။ အပစ်ခံရလို့သေတဲ့ပြည်သူရှိသလို။ ကျနော်တို့တပ်ဖွဲ့ဝင်တဦး ထိခိုက်ဒဏ်ရာရခဲ့တယ်။ ဖုန်းတလုံးလည်းပါသွားတယ်”လို့ ပြန်ကြားရေးတာဝန်ခံ ဗိုလ်လရောင်က မြေလတ်အသံကို ပြောပါတယ်။

စစ်ကောင်စီတပ်ဖွဲ့ဝင်တွေက အဲ့ဒီကျေးရွာကပြန်လည်ထွက်ခွာသွားတာမရှိဘဲ၊ တပ်စွဲထားလို့ ရွာနားသွားဖို့မလွယ်ကူတဲ့အတွက် ဒေသခံ ၂၀၀ ကျော်ကို ဘေးလွတ်ရာကို ပြောင်းရွေ့ထားခဲ့ရတယ်လို့ ဆိုပါတယ်။

ဒီနေ့ မနက်ပိုင်းမှာပဲ ပေါက်မြို့နယ်ထဲက အုန်းတောရွာ တောင်စုနဲ့ မြောက်စုအပြင် ညောင်ဝန်းတောင်စုရွာ၊ ညောင်ဝန်းမြောက်စုရွာ၊ ရွာသာကြီးရွာ၊ ဝက်မှီးရွာတွေကိုကိုလည်း စစ်ကြောင်းထိုးခံရတာကြောင့် ဒေသခံ ၅၀၀၀ ကျော် ထွက်ပြေးခဲ့ရပါတယ်။

ယင်းမာပင်၊ မတ် ၉၊ ၂၀၂၃။

စစ်ကိုင်းတိုင်း၊ ယင်းမာပင်မြို့နယ်၊ ကျွန်းတောပြင်ရွာ(ခေါ်) နဘူးတောကျေးရွာမှာ နေထိုင်တဲ့ ထန်းတက်သမား ၂ ဦး မတ်လ ၈ ရက်ညနေ ၃ နာရီလောက်မှာ စစ်ကောင်စီစစ်ကြောင်းနဲ့တွေ့ပြီး သေဆုံးခဲ့တယ်လို့ သိရပါတယ်။

ဘန့်ဘွေးရွာက အင်အား ၃၀ နီးပါးရှိ စစ်သားနဲ့ပျူတွေ စစ်ကြောင်းထိုးလာချိန် နဘူးတောကျေးရွာအရောက်မှာ အသက် ၃၅ နှစ်အရွယ် ထန်းတက်သမား ကိုမင်းဇော် ကို သေနတ်နဲ့ပစ်သတ်ခဲ့တာဖြစ်ပြီး၊ ဦးမြအေး ၅၀ နှစ်ကတော့ ဒီပစ်ခတ်မှုတွေကို ကြောက်လန့်ပြီး ထန်းပင်ပေါ်ကနေ ပြုတ်ကျသေဆုံးခဲ့တာလို့ ယင်းမာပင်မြို့နယ် သတင်းမှန်ပြန်ကြားရေး တာဝန်ခံတဦးက ပြောပါတယ်။

“ကိုမင်းဇော်ကိုတော့ ထန်းပင်ပေါ်က ဆင်းဆင်းချင်း ပစ်သတ်သွားတာပါ။ ဦးမြအေးကတော့ ထန်းပင်ကနေ ပြုတ်ကျပြီး ဆေးကုသမှုခံယူနေရင်း ည ၈ နာရီလောက်မှာ ဆုံးသွားတယ်။ သူတို့ ၂ ယောက်စလုံးက နဘူတောရွာ တောပြင်မှာနေတဲ့ ထန်းတက်သမားတွေပါ” လို့ ဆိုပါတယ်။

ပျူစောထီးတပ်ဖွဲ့တွေဟာ ပစ်ခတ်မှုပြုလုပ်ပြီး ညနေ ၃ နာရီခွဲလောက်မှာ ဘန့်ဘွေးကျေးရွာထဲကို ပြန်ဝင်သွားခဲ့တယ်လို့ သိရပြီး၊ သေဆုံးသွားတဲ့ ကိုမင်းဇော်နဲ့ ဦးမြအေးကိုတော့ ဒီနေ့မနက်မှာပဲ သင်္ဂြိုလ်ပေးလိုက်ပြီလို့ ဆိုပါတယ်။

ဘန့်ဘွေးရွာမှာ စစ်တပ်ကလည်း ပြီးခဲ့တဲ့နှစ် ဇွန်လဝန်းကျင်ကတည်းက ရွာခံပျူစောထီးအဖွဲ့ဝင် အိမ်ထောင်စု ၁၀ စုနဲ့ပေါင်းကာ တပ်စွဲနေတာဖြစ်ပြီး၊ ကျန်တဲ့အိမ်ထောင်စု ၃၀၀ ကျော်ကတော့ ရွာအနီးတောတိုက်တွေထဲမှာပဲ စစ်ရှောင်အနေနဲ့ နေထိုင်ကြတယ်လို့ ဘန့်ဘွေးကျေးရွာသား တဦးက ဆိုပါတယ်။

အဲ့ဒီစစ်သားနဲ့ ပျူတွေဟာ အနီးရွာက ဒေသခံတွေကိုလည်း အကြောင်းမဲ့ဖမ်းဆီးသတ်ဖြတ်တာ၊ စစ်ဆေးပြီး ပစ္စည်းသိမ်းယူတာနဲ့ နေအိမ်တွေကို မီးရှို့တာတွေ ပြုလုပ်နေတာလည်း ဖြစ်ပါတယ်။

မတ်လအတွင်း ယင်းမာပင်မြို့နယ်ထဲက ဒေသခံပြည်သူ ၆ ဦးထိ စစ်ကောင်စီတပ်တွေရဲ့ သတ်ဖြတ်တာကို ခံခဲ့ရတယ်လို့ ယင်းမာပင်မြို့နယ် သတင်းမှန်ပြန်ကြားရေးက ထုတ်ပြန်ရေးသားထားပါတယ်။

စာတည်း – လင်း

မုံရွာ၊ မတ် ၈၊ ၂၀၂၃။

စစ်ကိုင်းတိုင်း၊ မုံရွာမြို့၊ မုံရွာ-မန္တလေး ကားလမ်းရှိ မြေနဲရွာအနီးမှာ တပ်စွဲပြီး လမ်းသွားလမ်းလာ ပြည်သူတွေကို ပိုက်ဆံတောင်းနေတဲ့ စစ်ဆေးရေးဂိတ်က စစ်သားတွေကို ဒေသခံကာကွယ်ရေးတပ်တွေက လက်နက်ကြီးတွေနဲ့ ပစ်ခတ်တိုက်ခိုက်ခဲ့ပါတယ်။

အဲ့ဒီစစ်ဆေးရေးဂိတ်မှာရှိတဲ့ စစ်သား‌တွေက လမ်းသွားလမ်းလာ ပြည်သူတွေကို ပိုက်ဆံတောင်းနေတဲ့အပြင် နီးစပ်ရာကျေးရွာတွေက ဟင်းသီးဟင်းရွက်တွေခူးပြီး အပင်တွေကို ပျက်စီးအောင်လုပ်တဲ့အတွက် မတ်လ ၆ ရက်ညနေ ၁၁ နာရီမှာ လက်နက်ကြီး ၆၀ မမနဲ့ ၃ ချက် ပစ်ခတ်တိုက်ခိုက်ခဲ့တာလို့ မုံရွာခရိုင် တပ်ရင်း ၇ Lightning PDF တာဝန်ခံက ပြောပါတယ်။

“အဲ့ဒီလို ပစ်ခတ်ခဲ့ရာမှာ စစ်အုပ်စုဘက်က ၆ ဦး သေဆုံးပြီး အများအပြားဒဏ်ရာရကြတယ်လို့ တပ်တွင်းဖရဲသီးရဲ့ အတိအကျ သတင်းပေးချက်အရ သိရတယ်” လို့ ပြောပါတယ်။

ဒီထိခိုက်သေဆုံးမှုနဲ့ပတ်သက်ပြီး မြေလတ်အသံက သီးခြားအတည်မပြုနိုင်သေးပါဘူး။

တိုက်ခိုက်ခံရပြီးနောက်မှာလည်း စစ်အုပ်စုဘက်က လက်နက်ကြီးတွေနဲ့ ပြန်လည်ပစ်ခတ်ခဲ့ပြီး စစ်သားတွေကတော့ လက်ရှိအချိန်ထိ အဲ့ဒီစခန်းမှာပဲ ရှိနေသေးတယ်လို့ သိရပါတယ်။

ဒီတိုက်ခိုက်မှုကို မုံရွာခရိုင် တပ်ရင်း ၇ Lightning PDF၊ မော်လိုက်ခရိုင်တပ်ရင်း ၂နဲ့ မုံရွာခရိုင်လှုပ်ရှားတပ်ရင်း တို့က ပူးပေါင်းတိုက်ခိုက်ခဲ့တာလည်း ဖြစ်ပါတယ်။

ပြီးခဲ့တဲ့ ဖေဖော်ဝါရီလ ၂၄ ရက်ကလည်း မုံရွာမြို့ လဝကရုံးမှာ စောင့်နေတဲ့စစ်အုပ်စုကို မုံရွာခရိုင် တပ်ရင်း ၇ Lightning PDF အဖွဲ့က RPG နဲ့ ပစ်ခတ်ခဲ့ရာ စစ်သား ၄ ဦး သေဆုံးခဲ့ပါသေးတယ်။

စာတည်း – လင်း

မြင်းမူ၊ မတ် ၈၊ ၂၀၂၃။

စစ်ကိုင်းတိုင်း၊ မြင်းမူမြို့နယ်နဲ့ မုံရွာမြို့နယ်အတွင်းရှိ စစ်ကောင်စီတပ်သားတွေနဲ့ ပျူစောထီးတွေကို သက်ဆိုင်ရာ ဒေသကာကွယ်ရေးတပ်တွေက မတ်လ ၆ ရက်နဲ့ ၇ ရက်မှာ တိုက်ခိုက်ခဲ့တာကြောင့် စစ်သားသေဆုံးမှုတွေ ရှိခဲ့တယ်လို့ သိရပါတယ်။

မြင်းမူမြို့၊ အထက ၁ ကျောင်းဝန်းထဲမှာ တပ်စွဲနေတဲ့ စစ်ကောင်စီတပ်တွေကို မတ်လ ၇ ရက် နေ့လယ် ၁၁ နာရီ ၅၀ မိနစ်လောက်မှာ ဗုံးခွဲတိုက်ခိုက်ခဲ့ရာ စစ်သား ၂ ဦး သေဆုံးခဲ့တယ်လို့ True Fighte မြို့ပြပြောက်ကျားတပ်ဖွဲ့မှ ဗိုလ်စွန်ရဲက ပြောပါတယ်။

“အင်အားက အယောက် ၂၅ ယောက်ရှိတာ။ သူတို့က ကျောင်းဝန်းထဲမှာ ထမင်းစားနေကြတာ။ ထမင်းစားပြီးတဲ့ **၅ ကောင်က ပန်းကန်ဆေးဖို့ ၇ တန်းကျောင်းဆောင်ဘက်ကို ထွက်လာချိန် လျက်ဆားပုလင်း(ဗုံး)နဲ့ ပစ်ခတ်ခဲ့တာ။ **တွေရဲ့အနီးနားကို ကျတယ်။ ၂ ကောင်ကျတယ်။ ၃ ကောင် ဒဏ်ရာ အပြင်းအထန်ရတယ်” လို့ ပြောပါတယ်။

အဲ့ဒီစစ်သားတွေဟာ စစ်ကိုင်းအခြေစိုက် တမခ ၃၃ က စစ်သားတွေ ဖြစ်နိုင်တယ်လို့ ကာကွယ်ရေးရဲဘော်တွေက ခန့်မှန်းထားပြီး၊ ဗုံးနဲ့ပစ်ခတ်ပြီးနောက် ပြန်လည်ပစ်ခတ်တာတွေလည်း လုပ်ခဲ့တယ်လို့ သိရပါတယ်။

ဒါ့အပြင် မုံရွာမြို့နယ်၊ တောပုရွာအနီး ကင်းပတ်နေတဲ့စစ်သားနဲ့ ပျူစောထီးတွေကိုလည်း မတ်လ ၆ ရက်မနက် ၇ နာရီလောက်မှာ Monywa Local Revolution Union ရဲ့ တပ်ခွဲ ၂ Brave Heart Army – BHA အဖွဲ့နဲ့ ပူးပေါင်းအဖွဲ့တွေက မိုင်းဆွဲတိုက်ခိုက်ခဲ့ပါတယ်။

အင်အား ၃၀ နဲ့ ကင်းလှည့်နေချိန် တောပုရွာအနီးမှာပဲ ပဒေသာမိုင်း ၅ လုံးနဲ့ တိုက်ခိုက်ခဲ့ရာ ပျူစောထီး ၄ ဦး သေဆုံးခဲ့တယ်လို့ Brave Heart Army – BHA အဖွဲ့မှ ပြန်ကြားရေးတာဝန်ခံ မပိုးပိုးက ပြောပါတယ်။

“သူတို့ရွာနားက စပါးခင်းတွေကို စစ်သားအချို့ရယ်၊ ရဲရယ် ပါသလို ပျူစောထီးတွေကလည်း စစ်ယူနီဖောင်းနဲ့ ကင်းပတ်နေတာ။ မိုင်းမိသွားလို့ လက်နက်ငယ်တွေ၊ လက်နက်ကြီးတွေနဲ့ ပြန်လှန်ပစ်တာမျိုးတွေ လုပ်တယ်” လို့ ပြောပါတယ်။

ပွိုင့် ၁ နေရာတည်းမှာတင် မိုင်း ၅ လုံးဆင်တိုက်ခိုက်ခဲ့တာကြောင့် ပျူစောထီး ၃ ဦးက နေရာတင် သေဆုံးခဲ့ပြီး ကျန် ၁ ဦးတော့ ဆေးကုနေချိန်ကျမှ သေဆုံးခဲ့တာလို့ မပိုးပိုးက ဆက်ပြောပြပါတယ်။

အဲဒီတိုက်ခိုက်မှုကို BHA ရဲဘော်တွေက ဦးဆောင်ပြီး၊ MLRU တပ်ခွဲ ၁၊ တပ်ခွဲ ၃ ရဲဘော်တွေနဲ့ ပူးပေါင်းလုပ်ဆောင်ခဲ့တယ်လို့လည်း ဆိုပါတယ်။

အထက်ပါ တိုက်ခိုက်မှုတွေအတွက် စစ်ကောင်စီဘက်က ထိခိုက်သေဆုံးမှုတွေနဲ့ ပတ်သက်ပြီး မြေလတ်အသံက သီးခြားအတည်ပြုနိုင်သေးပါဘူး။

ပြီးခဲ့တဲ့ ဖေဖေါ်ဝါရီလ ၂၇ ရက် နေ့လယ်ကလည်း Brave Heart ဟာ မုံရွာမြို့၊ ကွက်သစ်ရပ်ကွက်က စစ်မှုထမ်းဟောင်း ဒုတပ်ကြပ်သန်းနိုင် ဆိုသူကို မုံရွာလွှတ်တော်နဲ့ နမခကြားမှာ ၉ မမ နဲ့ ၂ ချက် ပစ်ခတ်ရှင်းလင်းခဲ့ပါသေးတယ်။

လက်ရှိမှာ စစ်ကိုင်းအတွင်းက ရွှေဘို၊ မုံရွာ၊ ခင်ဦး၊ ရေဦး၊ မြင်းမူ၊ ဒီပဲယင်း၊ ဝက်လက် စတဲ့မြို့နယ်တွေမှာ စစ်ကောင်တပ်တွေက စစ်ကြောင်းထိုး တိုက်ခိုက်မှုတွေနဲ့ နေအိမ်မီးရှို့တာတွေကို ဆက်တိုက်ဆိုသလို လုပ်ဆောင်နေသလို ကာကွယ်ရေးတပ်တွေနဲ့ ထိတွေ့တိုက်ခိုက်မှုတွေဟာလည်း ခပ်စိတ်စိတ် ဖြစ်ပွားလျှက် ရှိနေပါတယ်။

စာတည်း – လင်း

ခင်ဦး၊ မတ် ၆၊ ၂၀၂၃။

ပျူစောထီးတပ်ဖွဲ့တွေက လက်နက်ကြီးတွေနဲ့ ပစ်ခတ်ပြီး စစ်ကြောင်းထိုးလာလို့ စစ်ကိုင်းတိုင်း၊ ခင်ဦးမြို့နယ်က အသက် ၈ နှစ်အရွယ် ကလေးတဦးဟာ ထွက်ပြေးတိမ်းရှောင်ရင်း ကျည်ထိမှန် သေဆုံးခဲ့တယ်လို့ သိရပါတယ်။

မတ်လ ၆ ရက် ဒီမနက် ၁၁ နာရီလောက်မှာ အင်အား ၁၀၀ ဝန်းကျင်ရှိတဲ့ ပျူစောထီးတပ်ဖွဲ့ဝင်တွေက ကျီစုရွာဘက်ကို စစ်ကြောင်းထိုးလာချိန်မှာ ထွက်ပြေးတိမ်းရှောင်နေကြတဲ့ မုံလှကျေးရွာက အသက် ၈ နှစ်အရွယ် မိန်းကလေးငယ်တဦး ကျည်ထိမှန် သေဆုံးခဲ့တာလို့ ခင်ဦးမြို့နယ် သတင်းမှန်ကြားရေး တာဝန်ခံတဦးက မြေလတ်အသံကို ပြောပါတယ်။

“တိုက်ပွဲလည်း မဖြစ်ဘဲနဲ့ ထွက်ပြေးနေတဲ့ ဒေသခံတွေကိုလက်နက်ကြီးတွေနဲ့ ပစ်တယ်။ စက်သေနတ်တွေနဲ့လည်း ပစ်တယ်။ အဲဒီမှာ ကလေးတဦးက ဆုံးသွားတယ်။ အသက် ၆၀ အရွယ် အဖိုးတဦးလည်း လက်နက်ကြီး ထိသွားတယ်” လို့ ဆိုပါတယ်။

အဲ့ဒီပျူစောထီးအဖွဲ့ဟာ ရေဦးမြို့နယ်၊ အောင်သာယာကျေးရွာက ဖြစ်ပြီး၊ ခုလိုစစ်ကြောင်းထိုးလာတဲ့အတွက် ခင်ဦးနယ်ထဲက ငါးရုံကြီး၊ ရှားတောရွာနဲ့ မုံလှရွာစတဲ့ ကျေးရွာကဒေသခံတွေ ရွာကနေ ထွက်ပြေးနေရတယ်လို့လည်း သိရပါတယ်။

အလားတူ မတ်လ ၅ ရက်မှာလည်း ခင်ဦးမြို့နယ်၊ အလယ်ရှိုရွာက ၁၂ နှစ်အရွယ် ကလေးငယ်တဦးဟာ နွားကျောင်းနေစဥ် မပေါက်ကွဲဘဲ ကျန်နေတဲ့ ၄၀ မမ လက်နက်ကြီးကျည်အဖူးကို ကိုင်မိရာမှ ပေါက်ကွဲမှုဖြစ်ပြီး ထိမှန်သေဆုံးခဲ့သေးတယ်လို့လည်း အထက်ပါတာဝန်ခံက ဆက်ပြောပါတယ်။

“ကလေးက ကျောင်းသားပါ။ ကျောင်းပိတ်လို့ နွားကျောင်းသွားရင်း လက်နက်ကြီးကိုတွေ့တော့ ကောက်ယူပြီး ရေကန်ဘောင်ပေါ်မှာ တင်ထားတယ်။ အဲဒါ မတော်တဆ ပြုတ်ကျပြီးတော့ လက်နက်ကြီးက ပေါက်သွားတယ်။ အသံကြားလို့ တောထဲက လူတွေ၊ ရွာထဲက လူကြီးတွေ လာပေမဲ့လည်း ကလေးက အသက်မမှီတော့ဘူး။ အဲဒီလက်နက်ကြီးက ဖေဖော်ဝါရီလကတည်းက စခတွေ ရမ်းသမ်းပစ်ခတ်ခဲ့တဲ့ဟာတွေပါ” လို့ ဆိုပါတယ်။

ခင်ဦးမြို့နယ်ထဲမှာ ပြီးခဲ့တဲ့ ၂၀၂၂ ခုနှစ်ကနေ ယခုနှစ် ၂၀၂၃ ခုနှစ်အထိ စစ်ကောင်စီတပ်ဖွဲ့ဝင်တွေရဲ့ လက်နက်ကြီးကျည် ထိမှန်မှုကြောင့် အသက်မပြည့်သေတဲ့ ကလေးငယ် ၁၀ ဦးထက်မနည်း သေဆုံးခဲ့တယ်လို့ ခင်ဦးမြို့နယ် သတင်းမှန်ကြားရေးတာဝန်ခံဆီက သိရပါတယ်။