တောင်သာ၊ ဧပြီ ၂၁၊ ၂၀၂၅။

မန္တလေးတိုင်း၊ တောင်သာမြို့နယ်၊ သံဘို(ရွာသစ်)ကျေးရွာမှာ စက်တပ်လေထီးနဲ့ဗုံးကြဲခံရပြီး ကလေးငယ် ၁ ဦးအပါအဝင် ၃ ဦးသေဆုံးပြီး ၄ ဦးဒဏ်ရာရတယ်လို့ ဒေသခံတွေနဲ့တောင်သာပကဖဆီက သိရပါတယ်။

ဧပြီ ၂၁ ရက်မနက် ၂ နာရီ ၄၅ မိနစ်ခန့်မှာ မိတ္ထီလာလေတပ်ကနေ တက်လာတဲ့ စက်တပ်လေထီး ၃ စီးဟာ သံဘိုကျေးရွာကို ဒေသခံနေအိမ်တွေအပေါ် ဗုံး ၁၁ လုံးကြဲချခဲ့တယ်လို့ ဆိုပါတယ်။

“ပြည်သူအိမ်ခေါင်ပေါ်ကို တည့်တည့်ချတာ။ အပေါ်ကနေ စက်လက်တွေနဲ့လည်းကုတ်သွားတယ်။ သားအမိ ၂ ယောက်က ပွဲချင်းပြီး။ တအိမ်တည်းက ၅ ယောက်ထိတာ။ “လို့ ဒေသခံအမျိုးသမီးတဦးကပြောပါတယ်။

စက်တပ်လေထီးနဲ့ဗုံးကြဲခံရလို့ အသက် ၉ နှစ်ကျော်အရွယ် မအေးမြတ်စန္ဒာ၊ မိခင်ဖြစ်သူ အသက် ၄၀ အရွယ် မတူး၊ အသက် ၃၅ နှစ်အရွယ် ကိုကျော်သူလင်းတို့သေဆုံးခဲ့ပါတယ်။

ဒါ့အပြင် မသဲသဲဝေ၊ ကိုဝင်းကျော်ရှိန်း၊ မတင့်တင့်ထွန်း၊ မေသက်နှင်းဦးတို့ ၄ ဦးဒဏ်ရာရခဲ့ပြီး ဆေးကုသဖို့ နီးစပ်ရာဆေးရုံကို ပို့ထားရသလို နေအိမ် ၂ လုံးပျက်စီးပြီး နွား ၂ ကောင်သေဆုံးခဲ့တယ်လို့ သိရပါတယ်။

ထိခိုက်သေဆုံးသူတွေကိုတော့ ဒီနေ့မှာပဲ မြေချသင်္ဂြိုဟ်နိုင်ဖို့ စီစဥ်လုပ်ဆောင်နေကြတယ်လို့ ဆိုပါတယ်။

“နေအိမ်ပေါ်တည့်တည့်ကျတာ ဗုံးက။ မနက်အစောကြီးဆိုတော့ တိုက်ပွဲဖြစ်တာလည်းမရှိဘူး။ ရွာမှာ တော်လှန်ရေးအဖွဲ့တွေနေတာမရှိဘူး။ ဖြတ်သွားဖြတ်လာသဘောလောက်ဘဲရှိတာ။ ရွာကိုတမင်သက်သက်ဗုံးချတဲ့သဘောပါ”လို့ တောင်သာမြို့နယ်ပကဖ ပြန်ကြားရေးတာဝန်ခံကပြောပါတယ်။

သံဘိုကျေးရွာက လေကြောင်းကနေ ဗုံးကြဲခံရတာ ၃ ကြိမ်မြောက်ဖြစ်ပြီး အရင် ကြဲခံရချိန်မှာတော့ လူထိခိုက်တာမျိုးတွေမရှိဘဲ တောစပ်နားတွေကျတာကြောင့် နေအိမ်အချို့ဘဲ ပျက်စီးမှုရှိခဲ့တယ်လို့ သိရပါတယ်။

သံဘိုကျေးရွာက အိမ်ခြေ ၆၄ အိမ်ရှိပြီး လူဦးရေ ၂၀၀ ကျော်နေထိုင်ကာ ဗုံးကြဲခံရတာကြောင့် ရွာခံအချို့ကတော့ ယနေ့မနက်ပိုင်းမှာမြို့ပေါ်ပြောင်းရွေ့တာရှိပြီး အများစုကတော့ ရွာက ဗုံးခိုကျင်းတွေမှာ ပုန်းအောင်းနေထိုင်နေကြတယ်လို့ ဆိုပါတယ်။

ဧပြီ ၁၈ ရက်ကလည်း တောင်သာမြို့နယ်၊ နန်းတည်ကျေးရွာပေါ်ကို ဂျက်ဖိုက်တာနဲ့ဗုံးကြဲခံရလို့ ပြည်သူ ၂ ဦးသေဆုံးပြီး ၅ ဦးဒဏ်ရာရကာ နေအိမ် ၇ လုံးပျက်စီးခဲ့တယ်လို့ သိရပါတယ်။

ညောင်ဦး၊ ဧပြီ ၂၀၊ ၂၀၂၅။

မန္တလေးတိုင်း၊ ညောင်ဦးမြို့နယ်၊ မြေနီကျေးရွာမှာ ကျေးရွာအုပ်ချုပ်ရေးမှူးနဲ့ သမက်ဖြစ်သူတို့ ပစ်သတ်ခံရပြီးသေဆုံးခဲ့တယ်လို့ ဒေသကာကွယ်ရေးအဖွဲ့ဝင်တဦးဆီက သိရပါတယ်။

ပစ်ခတ်ခံရသူတွေဟာ မြေနီကျေးရွာအုပ်ချုပ်ရေးမှူး အသက် ၇၀ အရွယ် ဦးရဲတင့်နဲ့ သမက်ဖြစ်သူ အသက် ၃၃ နှစ်အရွယ် ဦးဇော်မင်းမြတ်တို့ဖြစ်ပြီး ဧပြီ ၁၉ ရက် မနက် ၁ နာရီခန့်မှာ လက်နက်ကိုင်အဖွဲ့တခုက ဝင်ရောက်ပစ်ခတ်သွားတာလို့ ဆိုပါတယ်။

“ရွာထဲမှာ ဝင်ရှင်းခံရတာတော့သိတယ်။ အိမ်ခြံဝန်းထဲ ခေါ်ထုတ်ပြီးရှင်းခံရတယ်လို့ သိရတယ်။ အုပ်ကြီးကတော့ စစ်ကောင်စီခန့်အုပ်ချုပ်ရေးမှူးပဲ။”လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

ဦးရဲတင့်ဟာ စစ်ကောင်စီခန့်အုပ်ချုပ်ရေးမှူးဖြစ်တာကြောင့် ပစ်ခတ်ဖို့စီစဥ်သေးပေမယ့် ကျေးရွာအပေါ် ဒုက္ခပေးတာမရှိသလို သူကြောင့်ဖမ်းဆီးခံရသူတွေလည်းမရှိတဲ့အတွက် ကျေးရွာခံတွေကတားမြစ်တဲ့အတွက် ပစ်ခတ်မှုမလုပ်ဖြစ်ခဲ့ဘူးလို့ အထက်ပါဒေသကာကွယ်ရေးအဖွဲ့ဝင်က ဆက်ပြောပါတယ်။

ဒီပစ်ခတ်မှုကို ဘယ်လက်နက်ကိုင်အဖွဲ့က လုပ်ဆောင်ခဲ့တယ်ဆိုတာကိုတော့ အတည်မပြုနိုင်သေးပါဘူး။

ဧပြီ ၆ ရက်ကလည်း ညောင်ဦးမြို့နယ်၊ ငါ့သရောက်မြို့၊ အမှတ် ၃ ရပ်ကွက်နေ ကြံခိုင်ရေးပါတီ ရပ်ကျေးဥက္ကဌတဦး နေအိမ်မှာပစ်သတ်ခံရပြီး သေဆုံးသွားသေးတယ်လို့ သိရပါတယ်။

စာတည်း – လင်း

၂ ရက်အတွင်း လေယာဥ်ဗုံးကြောင့် သပိတ်ကျင်းနယ်ကျေးရွာ ၂ ရွာက လူ ၄၀ နီးပါး သေဆုံးထား

မြေလတ်အသံ၊ ဧပြီ ၁၉၊ ၂၀၂၅။

မန္တလေးတိုင်း၊ သပိတ်ကျင်းမြို့နယ်၊ ရေထွက်ရွာကို စစ်ကောင်စီတပ်က လေယာဥ်ဗုံးကြဲ တိုက်ခိုက်ခဲ့တာကြောင့် နောက်ဆုံးသိရတဲ့ သတင်းအချက်အလက်တွေအရ ကလေးငယ်တွေအပါ ၂၄ ဦး သေဆုံးခဲ့တယ်လို့ ဒေသခံတွေက ပြောပါတယ်။

ဧပြီ ၁၉ ရက် ဒီကနေ့ နေ့လယ် ၁ နာရီကျော်မှာ ရေထွက်ကျေးရွာကို လေကြောင်းတိုက်ခိုက်ခဲ့တာဖြစ်ပြီး လေယာဥ်ဗုံးဟာ စက်သုံးဆီဆိုင်တွေအနီးကျရောက်ပေါက်ကွဲကာ စက်သုံးဆီဆိုင်တွေပါ ပေါက်ကွဲမှုဖြစ်ပေါ်ခဲ့တာလို့ ဆိုပါတယ်။

” ဓာတ်ဆီဆိုင်နားကို ကြဲသွားတာ။အဲဒီဆိုင်တွေကလည်း ပေါက်ကွဲထွက်ကုန်တယ်။ သေတာ အများကြီးပဲ။ အလောင်းတွေကောက်နေတုန်း လေယာဉ်တွေထပ်လာတယ်”လို့ မြေပြင်ရှိနေသူတဦးက ပြောပါတယ်။

လေကြောင်းတိုက်ခိုက်မှုကြောင့် ကလေးငယ် ၂ ဦး အပါ ပြည်သူ ၁၃ ဦး သေဆုံးခဲ့တယ်လို့ သပိတ်ကျင်းမြို့နယ်ပကဖက သတင်းထုတ်ပြန်ထားပြီး ပြည်သူ ၂၀ ကျော် ဒဏ်ရာရခဲ့ကာ စိုးရိမ်ရဒဏ်ရာရသူတွေလည်းရှိတယ်လို့ သိရပါတယ်။

ယမန်နေ့ ဧပြီ ၁၈ ရက်ကလည်း သပိတ်ကျင်းမြို့နယ်၊ လိပ်ကျရွာကို ဗုံးကြဲတိုက်ခိုက်ခဲ့တာကြောင့် ပြည်သူ ၁၃ ‌‌ဦးသေဆုံးထားပြီး ရေထွက်ရွာကို ယမန်နေ့က တကြိမ်ဗုံးကြဲတိုက်ခိုက်ခဲ့သေးကာ ဒီကနေ့မှာလည်း ထပ်မံဗုံးကြဲတိုက်ခိုက်ခဲ့တာလို့ သိရပါတယ်။

သပိတ်ကျင်းမြို့နယ်၊ ၇ မိုင်ကျေးရွာအနီးမှာ တော်လှန်ရေးတပ်တွေနဲ့ စစ်ကောင်စီတပ်ဖွဲ့တွေအကြား တိုက်ပွဲတွေဖြစ်ပွားနေပြီး စစ်ကောင်စီတပ်ဘက်က သပိတ်ကျင်းမြို့နယ်ကို လေကြောင်းတိုက်ခိုက်မှုတွေ ဆက်တိုက်ပြုလုပ်နေတာပါ။

( ဧပြီလ ၁၉ ရက် ည ၈ နာရီအထိ သိရှိရသည့် နောက်ဆုံးအခြေအနေအား ဖြည့်စွက်ထားပါသည်။)

သပိတ်ကျင်း၊ ဧပြီ ၁၉၊ ၂၀၂၅။

မန္တလေးတိုင်း၊ သပိတ်ကျင်းမြို့နယ်၊ လိပ်ကျကျေးရွာကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့လို့ ပြည်သူ ၁၃ ဦး သေဆုံးပြီး ၃ ဦးအပြင်းအထန်ဒဏ်ရာရခဲ့တယ်လို့ ပြင်ဦးလွင်ခရိုင်ပကဖသတင်းတာဝန်ခံဆီက သိရပါတယ်။

ဧပြီ ၁၈ ရက် ယမန်နေ့ မနက် ၁၀ နာရီကျော်မှာ မန္တလေး-မိုးကုတ်ကားလမ်းဘေးရှိ လိပ်ကျကျေးရွာအလယ်စျေးကို ပေါင် ၃၀၀ ဗုံးနဲ့ ကြဲချတိုက်ခိုက်ခဲ့တာဖြစ်ပြီး လမ်းသွား၊ လမ်းလာတွေ ဗုံးစထိမှန်သေဆုံးသွားခဲ့တယ်လို့ ဆိုပါတယ်။

“ဆိုင်ကယ်စီးနေတဲ့သူတွေပါ ထိတာ။ လမ်းပေါ်မှာ တုံးလုံးပက်လက်ပဲ” လို့ သပိတ်ကျင်းဒေသခံတဦးက ပြောပါတယ်။

လေယာဥ်ဗုံးထိမှန်တာကြောင့် ဒေသခံအမျိုးသား ၈ ဦး ၊ အမျိုးသမီး ၃ ဦး၊ ကလေး ၁ ဦးအပါ ၁၃ ဦး သေဆုံးခဲ့ပြီး ယမန်နေ့ညနေပိုင်းအထိ သပိတ်ကျင်းမြို့နယ်တခုလုံးကို လေကြောင်းတိုက်ခိုက်မှုပြုလုပ်ခဲ့တဲ့အပြင် လက်ရှိအထိ တိုက်ပွဲနဲ့လေကြောင်းအန္တရာယ်တွေကြောင့် သေဆုံးသူတွေရဲ့ အသေးစိတ်အချက်အလက်ကို မသိရသေးဘူးလို့ ပြင်ဦးလွင်ခရိုင်ပကဖက ဆိုပါတယ်။

သပိတ်ကျင်းမြို့နယ်၊ ၇ မိုင်ကျေးရွာအနီးမှာ တော်လှန်ရေးတပ်တွေနဲ့ စစ်ကောင်စီတပ်ဖွဲ့တွေအကြား တိုက်ပွဲတွေဖြစ်ပွားနေပြီး စစ်ကောင်စီတပ်ဘက်က သပိတ်ကျင်းမြို့နယ်ကို လေကြောင်းတိုက်ခိုက်မှုတွေ ဆက်တိုက်ပြုလုပ်နေတာပါ။

ဧပြီ ၁၆ ရက်ကလည်း လိပ်ကျရွာကို လေကြောင်းတိုက်ခိုက်ခဲ့ပြီး အဲ့ဒီတိုက်ခိုက်မှုမှာ လူထိခိုက်သေဆုံးမှုမရှိခဲ့ပေမယ့် အဆောက်အဦတချို့ပျက်စီးမှုရှိခဲ့တယ်လို့ သိရပါတယ်။

ရေစကြို၊ ဧပြီ ၁၈၊ ၂၀၂၅။

မကွေးတိုင်း၊ ရေစကြိုမြို့နယ်မှာ စစ်ကောင်စီတပ်က အကြောင်းမဲ့ လေကြောင်းတိုက်ခိုက်လို့ ခြေပြတ်ခဲ့တဲ့ အသက် ၈၀ နှစ်အရွယ်အဖိုး ၁ ဦး သွေးထွက်လွန်ပြီး သေဆုံးခဲ့တယ်လို့ Yesagyo Township Info Committee က တာဝန်ရှိသူတဦးက ပြောပါတယ်။

ရေစကြိုမြို့နယ်၊ ဗလဘအုပ်စု ဗလဘကျေးရွာကို ဧပြီ ၁၇ ရက် မနေ့ ညနေ ၄ နာရီခွဲလောက်မှာ လေကြောင်းကနေ ၃ ကြိမ် ဗုံးကြဲပစ်ခတ်တိုက်ခိုက်ခဲ့တဲ့အတွက် အဖိုးဦးအောင်သန်းနဲ့ နောက်ထပ် ဒေသခံတချို့ထိခိုက်ခဲ့ပြီး ဦးအောင်သန်းကတော့ ဒီနေ့မနက်ပိုင်းမှာ သေဆုံးခဲ့တာလို့ ဆိုပါတယ်။

“အဘိုးအိုက ခြေတဖက်ပြတ်ဒဏ်ရာနဲ့ သွေးထွက်လွန်ပြီး ဆုံးသွားတာ” လို့ Yesagyo Township Info Committee က တာဝန်ရှိသူတဦးက ပြောပါတယ်။

စစ်ကောင်စီတပ်ဟာ ဂျက်ဖိုက်တာနဲ့ဗုံးကြဲတဲ့အပြင် ရော့ကတ်နဲ့ပါပစ်တဲ့အတွက် ကျေးရွာ ဘုန်းတော်ကြီးကျောင်းနဲ့ ကျောင်းအနီးက အိမ်တွေကိုထိသွားတာလို့ သူကဆက်ပြောပါတယ်။

ဒီတိုက်ခိုက်မှုကို မိတ္ထီလာလေတပ်ဘက်ကလာတဲ့ ဂျက်ဖိုက်တာ ၁ စီးကလုပ်ဆောင်ခဲ့တာဖြစ်ပြီး ပေါင် ၃၀၀ ဗုံးသီး ၃ လုံး ကြဲချခဲ့တာလို့ ရေစကြိုမြို့နယ်ပြည်သူ့ကာကွယ်ရေးအဖွဲ့ ရဲ့ သတင်းနဲ့ ပြန်ကြားရေး တာဝန်ခံကပြောပါတယ်။

ဒါ့အပြင်ကျေးရွာဘုန်းကြီးကျောင်းနဲ့ နေအိမ်အဆောက်အအုံအချို့လည်း ပျက်စီးခဲ့တယ်လို့ ရေစကြိုဒေသခံတဦးက အတည်ပြုပြောပါတယ်။

“ပေါင် ၃၀၀ ဗုံးတွေ ကြဲသွားတာ၊ ဘုန်းကြီးကျောင်းနဲ့ အနီးအနားမှာရှိတဲ့ အိမ်တချို့ပျက်စီးသွားတယ်၊ အသက် ၈၀ အရွယ် လူကြီးပိုင်းတဦးခြေထောက်ပြတ်သွားတယ်၊ဘုန်းကြီးကျောင်းဝိုင်းထဲက အဆောက်အဦတချို့ ပျက်စီးသွားတယ်၊ မီးစက်ထားတဲ့အဆောက်အဦလည်း ပျက်စီးတယ်”လို့ ရေစကြိုမြို့ခံတဦးက ပြောပါတယ်။

မတ် ၂၈ မှာလှုပ်ခတ်ခဲ့တဲ့ အင်အားပြင်းငလျင်ကြီးကြောင့် ပျက်စီးခဲ့တာတွေကို ပြန်လည်ထူထောင်ရေးလုပ်ငန်းတွေ အရှိန်မြှင့်လုပ်ဆောင်ဖို့ဆိုကာ ဧပြီ ၂ ရက်မှ ၂၂ ရက်အထိ ယာယီအပစ်ရပ်ထားကြောင်း ကြေညာခဲ့ပြီးနောက် နေ့စဉ်ဆိုသလို အရပ်သားနေအိမ်တွေကို လေကြောင်းကနေ ဗုံးကြဲတာ၊ လက်နက်ကြီးနဲ့ ပစ်ခတ်တာတွေကို ပြုလုပ်နေတာလည်းဖြစ်ပါတယ်။

ပုံစာ – ဗုံးကြဲတိုက်ခိုက်ခံရသည့် ဗလဘကျေးရွာက နေအိမ်အဆောက်အဦတချို့။

သတင်း – မောင်ဆွေအင်း၊ ဒိန်းဂျား၊ စာတည်း – လင်း