ရေစကြို၊ ဩဂုတ် ၆၊ ၂၀၂၅။

မကွေးတိုင်း၊ ရေစကြိုမြို့နယ်၊ ဖြုံဘူးကျေးရွာကို စစ်ကောင်စီတပ်ကပစ်ခတ်တဲ့ လက်နက်ကြီးကျည် ထိမှန်ပြီး အသက် ၂ နှစ် အရွယ် ကလေး ၁ ဦးသေဆုံးခဲ့တယ်လို့ ရေစကြိုမြို့ မြို့ခံတွေဆီက သိရပါတယ်။

ဩဂုတ် ၄ ရက် မနက် ၁၀ နာရီဝန်းကျင်မှာ ရေစကြိုအခြေစိုက် ခလရ ၂၅၆ တပ်ကပစ်ခတ်တဲ့ ၈၀ မမ လက်နက်ကြီးကျည်တွေက ဖြုံဘူးကျေးရွာကိုကျရောက်ပေါက်ကွဲချိန် ထိမှန်သေဆုံးခဲ့ကြတာလို့ ဆိုပါတယ်။

“အားလုံးပေါင်း ၁၇ လုံးပစ်တာ၊ တနေကုန်ပဲ၊ မနက် ၁၀ နာရီလောက်က ခလရ ၂၅၆ ကနေပြီးတော့ အနောက်ဘက်ကို ၃ လုံးပစ်တာ၊ အထိအခိုက်တော့မရှိပါဘူး၊ နေ့လယ် ၁၂ နာရီလောက်ကြတော့ ရေလယ်ကျွန်းဘက်ကို လှမ်းပစ်တာ ဖြုံဘူးရွာထဲကျတဲ့အချိန်မှာ ကလေး ၁ ဦးကတော့ ဆေးကုသမှုခံယူပြီး ဆုံးသွားတယ်၊” လို့ ရေစကြိုမြို့ခံတဦးက ပြောပါတယ်။

ဒီပစ်ခတ်မှုကြောင့် အသက် ၂ နှစ် အရွယ် ယောကျ်ားလေး ၁ ဦး သေဆုံးပြီး အသက် ၆၀ နှစ် အရွယ်ဦးဝင်းကြည်ကတော့ ဒဏ်ရာပြင်းပြင်းထန်ထန်ရခဲ့တယ်လို့ ဆိုပါတယ်။

ဒါ့အပြင် အဲ့ဒီနေ့ ည ၁၁ နာရီခွဲလောက်မှာ ရေစကြိုမြို့အနောက်ဘက်အခြမ်းကို ၉ လုံး ထပ်မံ ပစ်ခတ်ခဲ့ပြီး ဒီပစ်ခတ်မှုမှာတော့ အထိအခိုက်မရှိခဲ့ဘူးလို့ ရေစကြိုမြို့ခံတဦးက ပြောပါတယ်။

ဖြုံဘူးကျေးရွာဟာ လူဦးရေ ၆၀၀ လောက်ရှိပြီး ဩဂုတ် ၃ ရက်ကစလို့ တရွာလုံး ရွာကနေတိမ်းရှောင်နေရတာလို့ သိရပါတယ်။

စာတည်း – လင်း

မြေလတ်အသံ၊ သြဂုတ် ၂၊ ၂၀၂၅။

မန္တလေးတိုင်း၊ မိုးကုတ်မြို့ပေါ်ကို စစ်ကောင်စီတပ်က သြဂုတ် ၂ ရက်ဒီနေ့မနက် ၈ နာရီကျော်မှာ ဗုံးကြဲတိုက်ခိုက်ခဲ့တာကြောင့် သံဃာ ၁ ပါးအပါအဝင် ၁၂ ဦးသေဆုံးခဲ့တယ်လို့ မိုးကုတ်မြို့နယ်ပကဖဆီက သိရပါတယ်။

မိုးကုတ်မြို့အနောက်ပိုင်း ကျပ်ပြင်အုပ်စု၊ အောင်သုခနဲ့ ဂေါင်းဦးဘာကွက်သစ်ရပ်ကွပ်ထိပ်ရှိ မိုးကုတ်-မန္တလေးလမ်းမကြီးပေါ်က ‘မင်းကြိုက်’ လက်ဖက်ရည်ဆိုင်အနီးကို ဗုံး ၂လုံးကြဲချရာမှာ ထိခိုက်သေဆုံးခဲ့ကြတာပါ။

“သံဃာတော် ၁ ပါးတော့ပါတယ်။ ဆွမ်းခံကြွတဲ့အချိန် ထိခိုက်တာပါ။ လောလောဆယ် ၁၂ယောက် သေတယ်လို့ သတင်းရထားပါတယ်။ အတိကျကတော့ စာရင်းမတက်လာသေးလို့ အတည်မပြုနိုင်သေးပါဘူး”လို့ မိုးကုတ်မြို့နယ်ပကဖ တာဝန်ရှိသူတဦးက ပြောပါတယ်။

သေဆုံးသူတွေထဲက အသက် ၂၈ နှစ်အရွယ်အမျိုးသား ၁ ဦးဆိုရင် အီကြာကွေးမုန့်ဝယ်ပြီး နေအိမ်ပြန်လာချိန်လမ်းမှာ ဗုံးကြဲခံလိုက်ရတာကြောင့် ခန္ဓာကိုယ်တခုလုံး အပိုင်းပိုင်းအစစဖြစ်သွားတယ်လို့ ဆိုပါတယ်။

“သူငယ်ချင်းကို ဆာလာအိတ်နဲ့ လိုက်ကြုံးနေရလို့ပါဗျာ။ ကိုယ့်သူငယ်ချင်းကို ခုလို ဝက်သားတုံး ကောက်သလို ကောက်ရမယ်မထင်ထားဘူး။ ပေါင်တခြမ်းပဲ အကောင်းပြန်ရတယ်။ ရသလောက်လေး လိုက်စုပေးနေတာအခု”လို့ သေဆုံးသူရဲ့ သူငယ်ချင်းဖြစ်သူအမျိုးသားတဦးက ပြောပါတယ်။

ထိခိုက်သေဆုံးသူတွေနဲ့ပက်သက်တဲ့ အချက်အလက်တွေနဲ့ နောက်ဆက်တွဲအခြေအနေတွေကိုတော့ မြေလတ်အသံက ဆက်လက်စုံစမ်းနေပါတယ်။

ပြီးခဲ့တဲ့ဇူလိုင် ၂၉ ရက်ကလည်း မိုးကုတ်မြို့ပေါ်ကို စစ်ကောင်စီတပ်က ပေါင် ၅၀၀ ဗုံး ၃ လုံးနဲ့ ပေါင် ၂၅၀ ဗုံး ၂ လုံးကြဲချခဲ့ရာ အရှေ့ရွာရပ်ကွက်မှ ဒေါ်ဝင်းကြည် ၈၉ နှစ်၊ ကိုနိုင် ၃၈ နှစ် နဲ့ မင်းတံတားရပ်ကွက်မှ ဦးဝင်းမြင့် ၅၀ နှစ်၊ ကိုအယ်လေး ၂၈ နှစ်၊ ဦးရီဌေး ၄၈ နှစ်တို့ ၅ ဦးသေဆုံးခဲ့တယ်လို့သိရပါတယ်။

စာတည်း – လင်း

ချောင်းဦး၊ ဩဂုတ် ၁၊ ၂၀၂၅။

စစ်ကိုင်းတိုင်း၊ မုံရွာမြို့နဲ့ ချောင်းဦးမြို့မှာ စစ်ကောင်စီတပ်က စက်တပ်လေထီးနဲ့ဗုံးကြဲတဲ့အပြင် လက်နက်ကြီးတွေနဲ့ပါပစ်ခတ်တာကြောင့် ထိခိုက်ဒဏ်ရာရသူ ၇ ဦးရှိခဲ့တယ်လို့ ဒေသခံတွေဆီက သိရပါတယ်။

ဩဂုတ် ၁ ရက် နေ့လယ် ၁၀ နာရီခန့်လောက်က စက်တပ်လေထီး ၁ စီးနဲ့ မုံရွာမြို့နယ် ချောင်းဆုံရွာထိပ်ကို ဗုံး ၁ လုံးကြဲချတိုက်ခိုက်ချိန် တော်လှန်ရေးတပ်ဖွဲ့ဝင် ၁ ဦးနဲ့ အမျိုးသား ၁ ဦး စိုးရိမ်ရ ဒဏ်ရာရခဲ့ပါတယ်။

ဒါ့အပြင် နေ့လယ် ၁၀ နာရီ ၁၅ မိနစ်မှာ ချောင်းဦးမြို့နယ်၊ ရွှေဒါးကျကျေးရွာအနီးကို ဗုံး ၁ လုံးကြဲချ တိုက်ခိုက်ချိန် အမျိုးသား ၂ ဦးထိခိုက်ပြီး၊ ၁၀ နာရီခွဲမှာ မြပုလဲခြံကနေ လက်နက်ကြီးနဲ့ ၆ လုံး ထပ်မံ ပစ်ခတ်ခဲ့တာကြောင့် ရွှေဒါးကျကျေးရွာက အမျိုးသမီး ၁ ဦး၊ အမျိုးသား ၂ ဦးထိခိုက်ဒဏ်ရာခဲ့တာလို့ ဆိုပါတယ်။

“စိုးရိမ်ရတဲ့လူ ၂ ဦးတော့ပါတယ်၊ သူတို့က လေကြောင်းကနေတိုက်ခိုက်အပြီး မြပုလဲခြံကနေ လက်နက်ကြီးနဲ့ ၆ လုံးလောက်ပစ်တယ်၊ ချောင်းဦး တာဘောင်အစပ်တွေကို လှမ်းထုတာ၊ အဲ့ဒီမှာလည်း ပြည်သူအထိအခိုက်ရှိသေးတယ်၊ ၃ ဦးလောက်ထိခိုက်တယ်”လို့ ရွှေဒါးကျဒေသခံတဦးက ပြောပါတယ်။

လက်ရှိမှာ ဒဏ်ရာရသူတွေကိုတော်လှန်ရေးဆေးပေးခန်းတွေမှာ အသီးသီးကုထားပြီး ကုသလို့မနိုင်တဲ့ သူတွေကိုတော့ တခြားဆေးရုံတွေကိုပို့ပြီးကုသနေတယ်လို့ ဆိုပါတယ်

ဒါ့အပြင် ချောင်းဆုံရွာထိပ်က ဆိုင်တခုလည်း ဗုံးကျရောက်ပေါက်ကွဲပျက်စီးခဲ့သလို ဒေသခံတွေလည်း တိမ်းရှောင်နေကြတယ်လို့ အထက်ပါဒေသခံကဆက်ပြောပါတယ်။

ဇူလိုင် ၂၉ ရက် ညနေ ၄ နာရီခွဲလောက်က ချောင်းဦးမြို့နယ်၊ မုံရွာ-မန္တလေးလမ်းမပေါ် မြပုလဲဂိတ်မှာ တပ်စွဲထားတဲ့ စစ်ကောင်စီတွေဟာ ကျီကုန်းရွာကို ၈၀ မမ လက်နက်ကြီး ၂ လုံးနဲ့ ပစ်ခတ်ခဲ့တာကြောင့် ကလေး ၁ ဦးအပါ အမျိုးသမီး ၂ ဦးသေဆုံးပြီး ၅ ဦးထိခိုက်ဒဏ်ရာရရှိခဲ့ပါသေးတယ်။

စာတည်း – လင်း