ဆားလင်းကြီး၊ စက်တင်ဘာ ၂၁၊ ၂၀၂၅။

စစ်ကိုင်းတိုင်း၊ ဆားလင်းကြီးမြို့နယ်ထဲက ကျေးရွာ ၆ ရွာမှာ စစ်ကော်မရှင်ကပြုလုပ်မယ့် ရွေးကောက်ပွဲကို ဆန့်ကျင်တဲ့လှုပ်ရှာမှုတခုဖြစ်တဲ့ ဆိုင်ကယ်သပိတ်ကို ပြုလုပ်ခဲ့တယ်လို့ ဆားလင်းကြီးမြို့နယ် သပိတ်အင်အားစုဆီက သိရပါတယ်။

စက်တင်ဘာ ၂၀ ရက် နေ့လယ်ပိုင်းကစပြီး ဆားလင်းကြီးမြို့နယ်သပိတ်အင်အားစု၊ ယင်းမာပင်မြို့နယ်သပိတ်အင်အားစု၊ မုံရွာပင်မလူထုသပိတ်တိုက်ပွဲဦးဆောင်ကော်မတီ၊ တကသကျောင်းသားဟောင်းများအင်အားစု ရန်ကုန်နဲ့ ဒဂုံတက္ကသိုလ်ကျောင်းသားများသမဂ္ဂတို့ ပူးပေါင်းပြီး ဆိုင်ကယ်အစီးရေ ၄၀ ကျော် လူအင်အား ၇၀ ခန့်နဲ့ ကျေးရွာတွေကို လှည့်လည်ကာ သပိတ်ပြုလုပ်ခဲ့တာလို့ဆိုပါတယ်။

“သပိတ်ကော်မတီရဲ့ သဘောထားကတော့ ရှင်းပါတယ် အတုအယောင်ရွေးကောက်ပွဲကို တရားဝင်မှုအားလျော့အောင် ရတဲ့ပုံစံနဲ့ လုပ်ကြဖို့ပါပဲ။ ပြည်သူတွေကို ဘာပြောချင်လဲဆိုတော့ ကျွန်တော်တို့နဲဲ့အတူ အတုအယောင်ရွေးကောက်ပွဲ ဆန့်ကျင်ရေးလှုပ်ရှားမှုတွေမှာ ပါဝင်ကြဖို့ပါပဲ”လို့ ဆားလင်းကြီးမြို့နယ်သပိတ်အင်အားစု ကော်မတီဝင်တဦးက ပြောပါတယ်။

ပြည်သူတွေအနေနဲ့ လက်ရှိအချိန်မှာ ဒုက္ခပေါင်းစုံနဲ့ ကြုံတွေ့နေကြရပြီး ဒီဒုက္ခတွေ ချုပ်ငြိမ်းဖို့အတွက် တသံတည်းညီ တချီတည်းရုန်းပြီး စစ်အာဏာရှင်ကို ဖြုတ်ချကြပါစို့လို့ တိုက်တွန်းလိုတယ်လို့ အထက်ပါ ကော်မတီဝင်က ဆက်ပြောပါတယ်။

ကျေးရွာတွေကိုလှည့်လည်ပြီး သပိတ်ပြုလုပ်ချိန် လူထုရဲအသက်စည်းစိမ်ဥစ္စာတွေကို ဖျက်ဆီးဖို့အတွက် စစ်ကော်မရှင်အနေနဲ့ ထွက်ပေါက်ဖြစ်တဲ့ တရားမဝင်အတုအယောင်ရွေးကောက်ပွဲကို ပြုလုပ်ဖို့ကြိုးစားနေတာဖြစ်ပြီး ဒီရွေးကောက်ပွဲကို ဆန့်ကျင်ကြဖို့ တိုက်တွန်းနှိုးဆော်ခဲ့တယ်လို့ ဆိုပါတယ်။

သပိတ်အဖွဲ့တွေ ကျေးရွာတွေကိုရောက်လာချိန်မှာ ကျေးရွာနေပြည်သူတွေကလည်း ရွေးကောက်ပွဲကို အလိုမရှိကြောင်း ကြွေးကြော်ခဲ့ကြတယ်လို့ သိရပါတယ်။

ကနီ၊ ဩဂုတ် ၈၊ ၂၀၂၅။

စစ်ကိုင်းတိုင်း၊ ကနီမြို့နယ်တနေရာမှာ ကနီမြို့နယ်သပိတ်ဦးဆောင်ကော်မတီက ကနီမြို့နယ် ပြည်သူ့အုပ်ချုပ်ရေးအဖွဲ့၊ လူထုဖက်ဒရယ် သပိတ်အင်အားစု၊ အမျိုးသမီးမဟာမိတ်အင်အားစု – WAB တို့နဲ ပူးပေါင်းပြီး ဒီကနေ့မှာကျရောက်တဲ့ ၃၇ နှစ်မြောက် ၈၈၈၈ အရေးတော်ပုံသပိတ် ပြုလုပ်ခဲ့တယ်လို့ သိရပါတယ်။

ကနီမြို့နယ်သပိတ်ဦးဆောင်ကော်မတီက ဦးဆောင်ပြီး ဩဂုတ် ၈ ရက် တရက်တည်းမှာ လှုပ်ရှားမှု နှစ်ရပ်ပြုလုပ်ခဲ့ပြီး လူထုအင်အား ၁၀၀ ဝန်းကျင် တက်ရောက်ခဲ့တယ်လို့ WAB အဖွဲ့ဝင်တဦးထံက သိရပါတယ်။

“ကနီမြို့နယ်သပိတ်ဦးဆောင်ကော်မတီ၊ အမျိုးသမီးမဟာမိတ်အင်အားစု(WAB)၊ လူထုဖက်ဒရယ်သပိတ်အင်အားစုနဲ့ ကနီမြို့နယ်ပြည်သူ့အုပ်ချုပ်ရေးအဖွဲ့တို့ ပူးပေါင်းပြီး လှုပ်ရှားမှု ၂ နေရာ လုပ်ခဲ့ပါတယ်၊ တနေရာမှာတော့ ထီးသပိတ်နဲ့ ပြည်သူလူထုအင်အား ၁၀၀ ဝန်းကျင် ပါဝင်ပြီးတော့၊ တနေရာမှာတော့ အနီရောင်အင်္ကျီပေါ် ၈ ဂဏန်း စာလုံးရေးသားပြီး ပူးပေါင်းခဲ့ကြပါတယ်။”လို့ အမျိုးသမီးမဟာမိတ်အင်အားစု-WAB အဖွဲ့ဝင် မစန္ဒာက ပြောပါတယ်။

သပိတ်အင်အားစုတွေနဲ့ ကျေးရွာလူထုတွေဟာ ကျေးရွာအတွင်း စီတန်းလှည့်လည်တာ၊ ထိုင်သပိတ် ပြုလုပ်တာနဲ့ ကျေးရွာဂစ်တာအဖွဲ့က ရောင်နီသီချင်း၊ သွေးသစ္စာ၊ ကမ္ဘာမကြေဘူး သီချင်းတွေ တီးခတ်ပြီး လူထု သံပြိုင် သီဆိုတာတွေ လုပ်ဆောင်ခဲ့ကြတယ်လို့ မစန္ဒာက ဆက်ပြောပါတယ်။

၃၇ နှစ်မြောက် ၈၈၈၈ အရေးတော်ပုံအထိမ်းအမှတ် ထီးသပိတ်တွေကို ရန်ကုန်အပါအဝင် မြန်မာနိုင်ငံ တဝှမ်းက ဒေသအသီးသီးမှာ လူထုလှုပ်ရှားမှုတွေ ပြုလုပ်လျက်ရှိပါတယ်။

ကလေး၊ မတ် ၂၅၊ ၂၀၂၅။

မကွေးတိုင်း၊ ဂန့်ဂေါမြို့နယ်၊ နှမ်းခါးကျေးရွာကို စစ်ကောင်စီရဲ့ဗုံးကြဲတိုက်ခိုက်မှုအတွင်း သေဆုံးသွားတဲ့ CDM ဆရာဝန် ဒေါက်တာမြစိုးအောင်မိသားစုသေဆုံးခဲ့ရမှုအတွက် ဝမ်းနည်းခြင်းသပိတ်တခုကို ကလေးမြို့နယ်တနေရာမှာ ပြုလုပ်ခဲ့ကြတယ်လို့ ကလေးမြို့လူထုတိုက်ပွဲဦးဆောင်ကာ်မတီဆီက သိရပါတယ်။

မတ် ၂၄ ရက်ညပိုင်းမှာ ကလေးမြို့လူထုတိုက်ပွဲဦးဆောင်ကာ်မတီက ဦးဆောင်းပြီး ညသပိတ် ပြုလုပ်ခဲ့တာဖြစ်တယ်လို့ ကော်မတီတာဝန်ရှိသူအမျိုးသမီးတဦးကဆိုပါတယ်။

မတ် ၂၂ ရက်မှာ နှမ်းခါးရွာဆေးပေးခန်းဗုံးကြဲခံရလို့ သေဆုံးသူ ၁၁ ဦးအထဲမှာ ဒေါက်တာ မြစိုးအောင်၊ ကိုယ်ဝန်လေးလရှိနေတဲ့ ဇနီးဖြစ်သူ အထက်တန်းသူနာပြု ဒေါ် ခိုင်နှင်းဝေ၊ သားဖြစ်သူ ၅ နှစ်အရွယ် ကလေးငယ်တို့ တနေရာတည်းမှာပဲ သေဆုံးခဲ့ကြတာပါ။

အကြမ်းမဖက်အာဏာဖီဆန်ကြရင်း အကြမ်းဖက်သတ်ဖြတ်ခံရသူတွေ၊ တပါးသူရဲ့အသက်ကို ကယ်တင်ရင်း အသက်ပေးဆပ်ခဲ့ကြရသူတွေအားလုံးရဲ့ ရဲစွမ်းသတ္တိနဲ့ပြတ်သားခိုင်မာတဲ့ စိတ်ဓါတ်၊ ခံယူချက်နဲ့ လုပ်ရပ်တွေအပေါ် CDM အားလုံးနဲ့ထပ်တူလေးစားဂုဏ်ယူကြောင်းကိုလည်း ကလေးမြို့ လူထုတိုက်ပွဲဦးဆောင်ကော်မတီက ဆိုထားပါတယ်။

ဒါ့အပြင် စစ်ရေးပစ်မှတ်မဟုတ်တဲ့ နှမ်းခါးရွာဆေးပေးခန်းကို စစ်ကောင်စီက လေကြောင်းကနေ ဗုံးကြဲတိုက်ခိုက်ခဲ့တဲ့ဖြစ်စဉ်အပေါ် ပြည်သူလူထုက နည်းလမ်းပေါင်းစုံနဲ့ ဝိုင်းဝန်းရှုတ်ချကြဖို့လည်း တိုက်တွန်းထားပါသေးတယ်။

စာတည်း – လင်း

ကနီ၊ ဧပြီ ၁၃၊ ၂၀၂၃။

စစ်ကိုင်းတိုင်း၊ ကနီမြို့နယ်မှာ ကနီနွေဦးတော်လှန်ရေးသပိတ် အင်အားစုနဲ့ ပြည်သူတွေ ဦးဆောင်ပြီး တော်လှန်သင်္ကြန် (အကြိုနေ့)သပိတ် ပြုလုပ်ခဲ့ပါတယ်။

ဧပြီလ ၁၃ ရက် ဒီနေ့မနက် ၇ နာရီလောက်မှာ အင်အား ၁၀၀ ကျော်နဲ့ စစ်အာဏာရှင်ဆန့်ကျင်ရေး သပိတ်ကို မုံရွာ-ယာကြီး-ကလေးဝ ကားလမ်းတနေရာမှာ ကျင်းပပြုလုပ်ခဲ့တယ်လို့ သပိတ်မှာ ပါဝင်သူတဦးက ပြောပါတယ်။

“အချိန်က မနက် ၇ နာရီမှာစပြီး ၇ နာရီ ၂ဝ မိနစ်မှာ ပြီးပါတယ်။ တူးမီးသပိတ် တူမီးသင်္ကြန်၊ အာဇာနည်စိတ်မွေး ဖက်ဒရယ်တည်ဆောက်၊ အလံမလိပ် အသံမတိတ် စခကျွန်မခံ ကနီသပိတ် ဘန်နာ စာသား‌တွေ ကိုင်ဆောင်ပြီး စစ်အာဏာရှင် ဆန့်ကျင်ရေးတရား ဟောပြောခဲ့ကြတယ်” လို့ ဆိုပါတယ်။

ဒါ့အပြင် သွေးသစ္စာသီချင်း သီဆိုပြီး “စခများသေ အညာမြေ၊ ဘာသင်္ကြန်လဲ တော်လှန်သင်္ကြန် တူမီးသပိတ် တူမီးသင်္ကြန်” စတဲ့ စစ်အာဏာရှင်ဆန်ကျင်ရေး ကြွေးကြော်သံတွေကိုလည်း ကြွေးကြော်ခဲ့ကြတယ်လို့ သိရပါတယ်။

စစ်ကိုင်း၊ ဧပြီ ၂၊ ၂၀၂၃။

စစ်ကိုင်းတိုင်း၊ ကနီမြို့နယ်မှာ တူမီးတော်လှန်ရေး ၂ နှစ်ပြည့်အထိမ်းအမှတ်အဖြစ် စစ်အာဏာရှင်ဆန့်ကျင်ရေးသပိတ်ကို ဧပြီလ ၂ ရက် ဒီနေ့မနက်မှာ ပြုလုပ်ခဲ့ ကြပါတယ်။

ဒီသပိတ်ကို ကနီမြို့နယ် နွေဦးတော်လှန်ရေးသပိတ်အင်အားစုမှ ဦးဆောင်ကာ လူဦးရေ ၅၀၀ ကျော်နဲ့ ကနီမြို့နယ်ထဲက တနေရာမှာ ကျင်းပပြုလုပ်ခဲ့ကြတယ်လို့ ကနီ နွေဦးတော်လှန်ရေးသပိတ် အဖွဲ့ဝင်တဦးက ပြောပါတယ်။

“တူမီးနဲ့ စခဲ့တဲ့ ကနီနယ်ရဲ့ လက်နက်ကိုင်တော်လှန်ရေး ၂ နှစ်ပြည့်ခဲ့ပါပြီ။ အဲဒီအရာတွေကို မမေ့သင့်ကြောင်းနဲ့ အဆုံးတိုင် စစ်အာဏာရှင်ကို တွန်းလှန်သွားမယ်” လို့ ဆိုပါတယ်။

ဒီသပိတ်မှာဦးဆောင်သူတွေက စစ်အာဏာရှင်ဆန့်ကျင်ရေးတရားတွေ ဟောပြောခဲ့ပြီး၊ “အညာနယ်သားတွေ နီသလားဟေ့ အညာသွေးတွေ ရဲသလားဟေ့” စတဲ့ဆောင်ပုဒ်တွေအပြင် သွေးသစ္စာသီချင်းကိုလည်း သံပြိုင်သီဆိုခဲ့ကြပါတယ်။

ပြီးခဲ့တဲ့ မတ်လ ၂၈ရက်ကလည်း ကနီမြို့နယ်က ကျေးရွာတရွာမှာ ဒေသခံပြည်သူတွေနဲ့ တော်လှန်ရေးအင်အားစုအဖွဲ့တွေ ဦးဆောင်ပြီး မုံရွာလူထုသပိတ်တိုက်ပွဲမှာကျဆုံးခဲ့သူ မသဉ္ဇာဟိန်းအတွက် အောက်မေ့ဖွယ် ၂ နှစ်ပြည့်အခမ်းအနားကို ကျင်းပခဲ့ပါ‌သေးတယ်။