ပဲခူး၊ မေ ၁၅၊ ၂၀၂၃။

ပဲခူးတိုင်းအနောက်ခြမ်း၊ ပြည်မြို့နယ်က ပုဒ်မ ၆ ခုနဲ့ ထောင်ဒဏ်ချမှတ်ခံထားရတဲ့ အမျိုးသားဒီမိုကရေစီအဖွဲ့ချုပ် – NLD မှ ပြည်မြို့နယ်ကိုယ်စားပြု တိုင်းဒေသကြီးလွှတ်တော်ကိုယ်စားလှယ် ဦးကျော်ဇေယျကို ပြည်ထောင်တွင်းတရားရုံးက ပုဒ်မ ၂ ခုနဲ့ ထပ်မံတရားစွဲထားတယ်လို့ မိသားစုနဲ့ နီးစပ်သူတဦးဆီက သိရပါတယ်။

အကြမ်းဖက်မှု၊ ရွေးကောက်ပွဲ၊ ၅၀၅ (က) ၂ မှု၊ ယစ်မျိုး၊ ဘေးစီမံ စတဲ့အမှုတွေနဲ့ ထောင်ဒဏ် ၁၉ နှစ် ချမှတ်ခံထားရတာကနေ လက်ရှိမှာ အကြမ်းဖက်မှုတိုက်ဖျက်ရေး ဥပဒေပုဒ်မ ၄၉(က) နဲ့ ၂ မှု ထပ်မံစွဲဆိုခဲ့တာလို့ သိရပါတယ်။

“ပေါင်းတည်က ၁ မှုနဲ့ သဲကုန်းက ၁ မှု ထပ်စွဲတာလို့ပြောတယ်။ လာမယ့်မေလ ၁၉ ရက်မှာ ရုံးထုတ်မယ်လို့ သိရတယ်။ အခုလက်ရှိက ရှေ့နေငှားရမ်းဖို့က အခက်အခဲရှိတယ်။ လိုက်ရဲသူမရှိဘူး ဖြစ်နေတယ်။ ပုဒ်မတွေက ၁၀ နှစ်ကနေ သေဒဏ်အထိ ချမှတ်နိုင်တော့ ရှေ့နေငှားရမ်းဖို့ ကြိုးစားနေပါတယ်”လို့ မိသားစုနဲ့ နီးစပ်သူတဦးက ပြောပါတယ်။

အခု ထပ်မံချမှတ်လိုက်တဲ့အမှုဟာ ထောင်ဒဏ် ၁၀ နှစ်ကနေ သေဒဏ်အထိ ချမှတ်နိုင်တဲ့အမှု ဖြစ်တယ်လို့လည်း သိရပါတယ်။

သူ့ကို ပြီးခဲ့တဲ့နှစ် ဇွန်လ ၉ ရက်က ဖမ်းဆီးခဲ့ပြီး ရန်ကုန်မြို့၊ ရေကြည်အိုင်စစ်ကြောရေးနဲ့ ပြည်မြို့ ဒ.က.စ စစ်ကြောရေးတို့မှာ မိသားစုနဲ့ တွေ့ခွင့်မပေးဘဲ ၂ လအကြာစစ်ဆေးခဲ့ပြီးနောက် ပြည်မြို့ အကျဉ်းထောင်ကိုပို့ကာ ထောင်တွင်းတရားရုံးကနေ ၂၀၂၂ ခုနှစ်၊ ဒီဇင်ဘာလ ၁၉ ရက်မှာ ထောင်ဒဏ် ၁၉ နှစ် ချမှတ်ခဲ့တာလို့ သိရပါတယ်။

ဦးကျော်ဇေယျဟာ ပဲခူးတိုင်း၊ ပြည်မြို့နယ် တိုင်းလွှတ်တော်ကိုယ်စားလှယ်အဖြစ် ၂၀၁၅ ခုနှစ်နဲ့ ၂၀၂၀ ခုနှစ် အထွေထွေရွေးကောက်ပွဲမှာ ၂ ကြိမ်ဆက်တိုက် အနိုင်ရခဲ့သူလည်း ဖြစ်ပါတယ်။

စာတည်း – လင်း

မကွေး၊ မေ ၁၃၊ ၂၀၂၃။

မကွေးတိုင်း၊ တောင်တွင်းကြီးမြို့နယ်၊ ၂၀၂၀ ရွေးကောက်ပွဲအနိုင်ရ အမျိုးသားဒီမိုကရေစီအဖွဲ့ချုပ်ပါတီ၊ တိုင်းဒေသကြီး အမှတ် ၁ လွှတ်တော်ကိုယ်စားလှယ် ဦးအောင်ကိုကို(ခ)အောင်အောင်၊ ဒေါ်အေးအေးလင်း နဲ့ မအင်ကြင်းညိုတို့ကို စစ်ကောင်စီက ဖမ်းဆီးသွားပြီး ဘယ်မှာချုပ်နှောင်ထားတယ်ဆိုတာ မသိရသေးပါဘူး။

ဦးအောင်ကိုကို ကို မေလ ၉ ရက် ညနေ ၆နာရီခန့်က ရန်ကုန်တိုင်း၊ ထောက်ကြန့်စစ်သင်္ချိုင်းအနီး အဝေးပြေးကားပေါ်မှာ ဖမ်းဆီးခံလိုက်ရပြီး စုံစမ်းလို့မရတော့ဘူးလို့ ဦးအောင်ကိုကိုနဲ့ နီးစပ်သူတဦးက ပြောပါတယ်။

“လွှတ်တော်ကိုယ်စားလှယ်ဖမ်းဆီးခံရပြီး ရန်ကုန်က အမျိုးတော်စပ်တဲ့ အမျိုးသမီးနှစ်ဦးကိုလည်း ဖမ်းဆီးပါတယ်။ အင်းစိန်မြို့မရဲစခန်းကို သွားရောက်စုံစမ်းတော့လည်း သူတို့ဆီမှာမရှိလို့ သူတို့လည်းမသိဘူး၊ နောက်တပတ်လောက်နေရင်တော့ သိနိုင်တယ်လို့ အဲဒီစခန်း တာဝန်ရှိသူတဦးက ပြန်ပြောလိုက်တယ်” လို့ ဆိုပါတယ်။

ဦးအောင်ကိုကို ကိုဖမ်းဆီးပြီးနောက် ရန်ကုန်တိုင်း၊ အင်းစိန်မြို့နယ်၊ အောင်ဆန်းရပ်ကွက်မှာ နေထိုင်တဲ့ အမျိုးတော်စပ်သူ ဒေါ်အေးအေးလင်းနဲ့ တူမဖြစ်သူ မအင်ကြင်းညို တို့ကို အဲဒီနေ့ ည ၉ နာရီ ၄၀ မိနစ်အချိန်မှာ လာရောက်ဖမ်းဆီးခေါ်ဆောင်သွားခဲ့တယ်လို့ သိရပါတယ်။

အလားတူ အမျိုးသားဒီမိုကရေစီအဖွဲ့ချုပ်ပါတီ၊ တောင်တွင်းကြီးမြို့နယ်၊ တိုင်းဒေသကြီးအမှတ် ၂ လွှတ်တော်ကိုယ်စားလှယ် ဦးဝင်းမြင့်လှိုင်(ခ)ဦးလှိုင်ကိုလည်း စစ်ကောင်စီက ၂၀၂၁ ခုနှစ်၊ နိုဝင်ဘာ ၈ ရက်နေ့မှာ ဖမ်းဆီးခဲ့ပြီး ဒေါင်းနေထောင်ကိုပို့ဆောင်ကာ အမှုပေါင်း ၁၉ မှုနဲ့ တရားစွဲဆိုခဲ့တာပါ။

အဲဒီနောက် ဦးဝင်းမြင့်လှိုင်ကို ၂၀၂၂ ခုနှစ်၊ ဇွန်လ ၂၁ ရက်နေ့မှာ ရာဇသတ်ကြီးဥပဒေပုဒ်မ ၅၀၅ (က) အပါအဝင် အမှု ၅ မှုအတွက် ထောင်ဒဏ် ၂၅ နှစ်၊ အောက်တိုဘာလ ၃၁ ရက်မှာ အကြမ်းဖက်မှုတိုက်ဖျက်ရေးဥပဒေ ပုဒ်မ ၅၀ (က)၊ ပုဒ်မ ၅၁ (ဂ)၊ ပုဒ်မ ၅၂ (က)၊ ပုဒ်မ (၅၄) စတဲ့ပုဒ်မတွေနဲ့ စွဲဆိုထားတဲ့ အမှု ၁၄ ခုအတွက် ထောင်ဒဏ် ၁၄၈ နှစ် ချမှတ်ခဲ့တယ်လို့ သိရပါတယ်။

စာတည်း-007

ပဲခူး၊ ဒီဇင်ဘာ ၁၅၊ ၂၀၂၂။

ပဲခူးတိုင်း၊ ပြည်မြို့နယ်တိုင်းဒေသကြီးလွှတ်တော်ကိုယ်စားလှယ် ဦးကျော်ဇေယျကို စစ်ကောင်စီက ဒီဇင်ဘာ ၁၂ ရက် မနေ့က ပုဒ်မ ၆ ခုနဲ့ ထောင်ဒဏ် ၁၉ နှစ်ချမှတ်ခဲ့တယ်လို့မိသားစုဆီက သိရပါတယ်။

NLD အမတ် ဦးကျော်ဇေယျကို စစ်ကောင်စီတပ်ဖွဲ့တွေက ပြီးခဲ့တဲ့ ဇွန်လ ၉ ရက်မှာဖမ်းဆီးလိုက်ပြီး ရေကြည်အိုင် စစ်ကြောရေးမှာ ၁၀ ရက် ဖမ်းဆီးစစ်ဆေးခံရပြီးနောက် ဇူလိုင် ၂၉ ရက်မှာ ပြည်မြို့ ဒကစကို ပို့ကာ သြဂုတ် ၈ ရက်မှာတော့ပြည်ထောင်ကိုရောက်ရှိခဲ့ပါတယ်။

ဖမ်းဆီးခဲ့ပြီးတဲ့နောက် စစ်ကောင်စီက ဦးကျော်ဇေယျကို ပုဒ်မ ၆ ခုဖြစ်တဲ့ အကြမ်းဖက်မှု ၊ ရွေးကောက်ပွဲ ၊ ၅၀၅(က) ၂ ခါ ၊ ယစ်မျိုး ၊ ဘေးစီမံ စတဲ့ပစ်မှုတွေနဲ့ ဖမ်းဆီးထားပြီ ၆ လအကြာမှာ အမိန့်ချခဲ့တယ်လို့လည်းဆိုပါတယ်။

“ရေကြည်အိုင်စစ်ကြောရေးမှာ စုတ်ပြတ်သတ်နေအောင်ရိုက်တာ လူရုပ်တောင်မပေါ်ဘူး။ဖမ်းဆီးခံရတဲ့ ၆လလုံး မိသားစုဝင်တွေနဲ့ တွေ့ခွင့်မပေးပါဘူး။ စာတောင်ပေးလို့မရဘူးအခုလိုအမိန့်ချခံရတာတော့ခံပြင်းတာပေါ့။ မတရားအမိန့်တွေ သူတို့ချချင်သလိုချနေတာ မတရားမှန်းသိပေမဲ့လည်း အခုချိန်တော့ ကိုယ့်လူနေကောင်းကျန်းမာဖို့ဘဲအရေးကြီးတယ်ကိုယ့်ထက်တောင်ပေးဆပ်ထားရသူတွေတပုံကြီးရှိသေးတာပဲ ”လို့ ဦးကျော်ဇေယျရဲ့အမျိုးသမီးက မြေလတ်အသံကို ပြောပါတယ်။

ပြည်ထောင်တွင်းတရားရုံးမှာ ဦးကျော်ဇေယျကို ထောင်ဒဏ် (၁၉) နှစ်ချမှတ်တာကိုမိသားစုဝင်တွေက ကိုယ်တိုင်သွားပြီး ကြားနာရခြင်းမျိုးမဟုတ်ပဲ တဆင့်ပြောစကားကသာသိရှိရတယ်လို့ ဆိုပါတယ်။

ဦးကျော်ဇေယျဟာ ၂၀၁၅ ကနေ ၂၀၂၀ အထိရွေးကောက်ပွဲမှာ အနိုင်ရလွှတ်တော်ကိုယ်စားလှယ်တဦးဖြစ်ကာ လက်ရှိပြည်မြို့မှာ နိုင်ငံရေးမှုနဲ့ ဖမ်းခံထားရသူ ၅၀ဦးထက်မနည်းရှိနေပါတယ်။

ပဲခူး၊ ဇူလိုင် ၁၂၊ ၂၀၂၂။

ပဲခူးတိုင်းဒေသကြီး(အနောက်ပိုင်း)၊ ပြည်မြို့နယ် တိုင်းဒေသကြီးလွှတ်တော်ကိုယ်စားလှယ် ဦးကျော်ဇေယျ ဖမ်းဆီးခံရပြီးနောက် ဒေသခံတချို့ကို ဆက်တိုက်ဆိုသလို ဖမ်းဆီးခံနေရတယ်လို့ မြို့ခံတွေကပြောပါတယ်။

ပြီးခဲ့တဲ့ ဇွန်လ ၉ ရက်နေ့က ရန်ကုန်မြို့မှာ ဦးကျော်ဇေယျအပါအဝင် ၄ ဦးဖမ်းဆီးခံခဲ့ရပြီး ပြည်မြို့ကို လွှဲပြောင်းပေးလိုက်တယ်ဆိုတဲ့ သတင်းတွေထွက်ပေါ်ခဲ့ပြီး ဘယ်နေရာမှာထိန်းသိမ်းထားတယ် ဆိုတာ တိကျစွာမပြောနိုင်သေးချိန်မှာပဲ သံသယရှိတဲ့ဒေသခံတချို့ကို စစ်ကောင်စီက လိုက်လံဖမ်းဆီးနေတာပါ။

“အဖမ်းခံနေရတာကတော့ ဆက်တိုက်ပဲ အရင် NLD ပြန်ကြားရေးလုပ်ခဲ့ဖူးသူလည်း အဖမ်းခံလိုက်ရတယ်။ နောက် မြို့ကနာမည်ကြီးစီးပွားရေးသမားတယောက်လည်း လာဖမ်းသွားတယ်။ ပြန်လွှတ်မလွှတ်တော့မသိဘူး နောက်ပြီး ပေါင်းတလည်နဲ့ ဝက်ထီးကန်မြို့တွေမှာလည်း ဖုန်းနဲ့လိုက်တိုက်စစ်ပြီး ရှာတယ်။ တချို့လည်း ရှောင်နေကြတယ်။ ကိုကျော်ဇေယျနဲ့ ဆက်စပ်မှုရှိတယ်မရှိဘူးကတော့ သေချာမပြောနိုင်ဘူး” လို့ မြို့ခံအမျိုးသားတဦးကပြောပါတယ်။

ပေါင်းတလည်မြို့က စစ်ကောင်စီခန့် ရပ်ကွက်အုပ်ချုပ်ရေးမှူးတဦး၊ ယခင် NLD ပါတီသတင်းနဲ့ပြန်ကြားရေးအဖွဲ့ဝင်တဦး၊ စီးပွားရေးလုပ်ငန်းရှင်တဦးနဲ့ အခြား ဖမ်းဆီးခံရသူ ၅ ဦးထက်မနည်းရှိတယ်လို့ မြို့ခံတွေက ဆိုပါတယ်။

အဲဒီလို ကိုကျော်ဇေယျအပါအဝင် ဖမ်းဆီးခံခဲ့ရသူတွေနဲ့ နောက်ဆက်တွဲ ဖမ်းဆီးခံရသူတွေကိုပါ စစ်ကောင်စီနဲ့ NUG၊ သက်ဆိုင်ရာအဖွဲ့အစည်းတွေက တရားဝင်သတင်းထုတ်ပြန်ခြင်းမရှိသေးတဲ့အပေါ် လူထုက စိုးရိမ်နေကြတယ်လို့ဆိုပါတယ်။

“ဘယ်မှာဖမ်းမိပြီး ဘယ်ကိုပို့တယ်ဆိုတာ ကျနော်တို့သိရသလောက်ကတော့ တိတိကျကျ ပြောနိုင်သူမရှိဘူး။ ထုတ်ပြန်တာလည်းမတွေ့ရတော့ မြို့ခံတွေနဲ့ ပတ်သက်စပ်ဆက်သူတွေက စိုးရိမ်တာပေါ့ဗျာ။ အဖမ်းခံနေရတဲ့သူတွေလည်း ရှိနေတော့။ ကျနော်ပြောချင်တာကတော့ ကိုယ့်အခြေအနေကိုယ်သိပေါ့ဗျာ။ စပ်ဆက်ပတ်သက်မှုကြီးကြီးရှိနေတယ်ဆိုရင်တော့ အဖမ်းမခံရခင် ရှောင်နေတာအကောင်းဆုံးပါပဲ။” လို့ မြို့ခံတဦးကပြောပါတယ်။

ဦးကျော်ဇေယျ ဟာ အမျိုးသားဒီမိုကရေစီအဖွဲ့ချုပ်ပါတီရဲ့ ပြည်မြို့နယ် တိုင်းဒေသကြီးလွှတ်တော်ကိုယ်စားလှယ်အဖြစ် ၂၀၁၅၊ ၂၀၂၀ ရွေးကောက်ပွဲများမှာ အနိုင်ရကိုယ်စားလှယ်ဖြစ်ခဲ့ပြီး စစ်အာဏာသိမ်းပြီးနောက်ပိုင်းမှာလည်း အာဏာရှင်ဆန့်ကျင်တော်လှန်ရေးတွေ ဆက်လက်လုပ်ဆောင်ခဲ့လို့ သူငှားရမ်းနေထိုင်ခဲ့တဲ့ အိမ်အပါအဝင် ပိုင်ဆိုင်မှုတွေကိုပါ ချိတ်ပိတ်သိမ်းဆည်းခံထားရသူဖြစ်ပါတယ်။

ပဲခူး၊‌ မတ် ၂၉၊ ၂၀၂၂။

ပဲခူးတိုင်း ပြည်မြို့နယ် တမ္မကောက်အုပ်စု တီတွတ်စံပြရွာက တိုင်းဒေသကြီးလွှတ်တော်ကိုယ်စားလှယ် အမှတ်(၁) ဦးသက်ဝင်းလှိုင်ရဲ့ နေအိမ်ကို စစ်ကောင်စီက ဒီနေ့ ညနေပိုင်းမှာ ချိတ်ပိတ်သွားခဲ့တယ်လို့ သိရပါတယ်။

ချိတ်ပိတ်ခံရတဲ့ လွှတ်တော်ကိုယ်စားလှယ်ဟာ ပြီးခဲ့တဲ့ နှစ် မေလ ၃ရက်က တော်လှန်‌ရေးလုပ်ငန်းဆောင်ရွက်နေစဥ် မတော်တဆမှုတခုကြောင့် ကျဆုံးသွားခဲ့သူဖြစ်ပြီး ဒီနေ့မှာ နေအိမ်ကို စစ်ကောင်စီက ချိတ်ပိတ်လိုက်တာကြောင့် ကျန်ခဲ့တဲ့ မိသားစုတွေဟာ အိမ်ငှားပြီး နေနေရတယ်လို့ ဒေသခံတဦးက ပြောပါတယ်။

” သူ့မိသားစုက လက်ရှိအိမ်ငှားပြီး နေနေရတယ် သားလေးရယ် သမီးလေးရယ် အမျိုးသမီးရယ်ပေါ့၊ သူတို့က အရမ်းကြောက်နေကြတယ်” လို့ ‌မိသားစုနီးစပ်သူ တဦးက ပြောပါတယ်။

ဥပဒေမဲ့ အာဏာသိမ်းပြီး ဥပဒေမဲ့ လုပ်ရပ်တွေကို လုပ်နေတဲ့ စစ်ကောင်စီကိုတော့ ပြောစရာ စကားမရှိပေမယ့် ကျန်နေခဲ့တဲ့ မိသားစုအတွက် ဒီလုပ်ရပ်ဟာ လူမဆန်တဲ့ လုပ်ရပ်တခုဖြစ်တယ်လို့ လုပ်ဖော်ကိုင်ဖက် သူငယ်ချင်းဖြစ်သူ လွှတ်တော်ကိုယ်စားလှယ် ဦးကျော်ဇေယျက ပြောပါတယ်။

” ဖခင်တယောက် ‌သေဆုံးထားလို့ ပူဆွေးသောကရောက်နေရတဲ့ သားသမီးတွေနဲ့ ခင်ပွန်းကို ဆုံးရှုံးထားလို့ သောကရောက်နေရတဲ့ ဇနီးသည်တွေ အတွက်ကို တော်တော်လူမဆန်တဲ့ လုပ်ရပ်ပေါ့ “လို့ ပြောပါတယ်။

ပြီးခဲ့တဲ့ ရက်ပိုင်းအတွင်းကလည်း ပြည်မြို့ ခေတ္တရာမြို့သစ် ၁လမ်းထိပ်က မိုဘိုင်းကမ္ဘာ ဖုန်းဆိုင်ကိုလည်း စစ်ကောင်စီက ချိတ်ပိတ်ခဲ့ပြီး ကပိုင်ရှင်ဖြစ်သူကို ဖမ်းဆီးသွားခဲ့တယ်လို့ သိရပါတယ်။

မြေလတ်အသံ၊ မတ် ၉၊ ၂၀၂၂။

ပုဒ်မ ၅၀၅ နဲ့ ဖမ်းဆီးပြီး ရွေးကောက်ပွဲမှာ မဲလိမ်မဲခိုးကြောင်း လက်မှတ်ရေထိုးပေးဖို့ စစ်ကောင်စီက ညှိနှိုင်းတာကို လက်မခံတဲ့ ပဲခူးတိုင်းအနောက်ခြမ်း၊ သာယာဝတီမြို့က ရွေးချယ်ခံ တိုင်းဒေသကြီးလွှတ်တော်ကိုယ်စားလှယ်ကို မတ်လ ၈ ရက် မနေ့ကမနက်ပိုင်းက သာယာဝတီထောင်တွင်းတရားရုံးကနေ ထောင်ဒဏ် ၃ နှစ် ချမှတ်ခဲ့ပါတယ်။

ဦးကျော်ကိုကိုစိန်ဆိုသူဖြစ်ပြီး ၂၀၂၀ ရွေးကောက်ပွဲမှာ သာယာဝတီမြို့နယ် တိုင်းဒေသကြီးလွှတ်တော်ကိုယ်စားလှယ်အဖြစ် အမျိုးသားဒီီမိုကရေစီအဖွဲ့ချုပ်ကနေ ရွေးချယ်ခံရသူဖြစ်တယ်လို့ သိရပါတယ်။

“သူက ၂၀၂၀ မှာ ရွေးချယ်ခံရတာပါ။ လွန်ခဲ့တဲ့ ၄ လလောက်က ဖမ်းဆီးခံရတာပါ။ မနေ့ကသူကို ပုဒ်မ ၅၀၅ နဲ့ထောင်သုံးနှစ်ချခဲ့ပါတယ်။ ပြီးတော့ စာရွက်အလွတ်ပေါ်မှာလည်း လက်ပွေရာတွေ အတင်းအဓမ္မနှိပ်ခိုင်းပါတယ်” လို့ ဦးကျော်ကိုကိုစိန်နဲ့ နီးစပ်သူတဦးက ပြောပါတယ်။

ဒါ့အပြင် နောက်နောင် NLD ပါတီနဲ့ ပတ်သက်ခြင်းမရှိဖို့နဲ့ ရွေးကောက်ပွဲမှာ မဲလိမ်မဲခိုးတာ မှန်ကန်ကြောင်းလက်မှတ်ထိုးပေးဖို့ ညှိနှိုင်းတာကိုလည်း ကိုကျော်ကိုကိုစိန်က ငြင်းဆိုခဲ့တယ်လို့လည်း သူက ဆက်ပြောပါတယ်။

အခုလာမယ့်သောကြာနေ့မှာလည်း သာယာဝတီထောင်တွင်းက ပုဒ်မ ၅၀၅ နဲ့ ဖမ်းဆီးထားသူအချို့ကို အမိန့်ချသွားဖို့ရှိတယ်လို့လည်း သိရပါတယ်။

မြေလတ်အသံ၊ ဇန်နဝါရီ ၉၊ ၂၀၂၂။

ပြည်သူ့လွှတ်တော်ကိုယ်စားလှယ် ဒေါက်တာခင်စိုးစိုးကြည် ရဲ့ သက်ကြီးရွယ်အို အိပ်ယာထဲလဲနေတဲ့ အဖေနဲ့ အဒေါ်ဖြစ်သူကို အားချင်း နှင်ချပြီး နေအိမ်နဲ့ လုပ်ငန်းကို ဇန်နဝါရီ ၁ရက်က ချိတ်ပိတ်သွားခဲ့တာဖြစ်တယ်လို့ ကာယကံရှင်တွေဆီက သိရပါတယ်။

အဲ့ဒီ သက်ကြီးပိုင်း နှစ်ဦးဟာ မဖြစ်မနေ ဘေးမှာနေပြီး စောင့်ရှောက်ပေးဖို့ လိုအပ်နေသူတွေ ဖြစ်ပြီး အဲ့ဒီလူတွေကိုပါ ချက်ချင်းနှင်ချခဲ့ပြီး ချိတ်ပိတ်သွားခဲ့တာဖြစ်တယ်လို့ ပြောပါတယ်။

” အိမ်က ဆရာမ အမည်ပေါက် ဟုတ်တယ်၊ မိသားစုပိုင်နေအိမ်ပေါ့ ၊ အဲ့ဒီမှာ ဆရာမ ရဲ့ အဖေက အသက် ၉၀ပေါ့၊ လေဖြတ်ထားလို့ အိပ်ယာထဲမှာ လှဲနေရတာဖြစ်တယ်၊ ဆရာမရဲ့ အဒေါ်ကလည်း အသက် ၈၀ အရိုးကျည်းပေါင်းကြောင့် ပက်လက်ပဲ ဖြစ်တယ်၊ သူတို့ကို ပြုစုစောင့်ရှောက်ရတဲ့ ဆရာမရဲ့ တူတွေလည်းရှိတယ်” လို့ ပြောပါတယ်။

စစ်ကောင်စီကချိတ်ပိတ်ခဲ့တဲ့ KS2K ရေသန့်စက်ရုံဟာလည်း ဒေါ်ခင်စိုးစိုးကြည်ရဲ့ အစုရှယ်ရာ မပါဝင်တော့ပဲ မောင်ဖြစ်သူနဲ့ အများပိုင် လုပ်ငန်းကို ချိတ်ပိတ်သွားခဲ့တာဖြစ်တယ်လို့ ပြောပါတယ်။

” စီးပွားရေးအရ နောက်နောင် ဘယ်သူမှ မပတ်သက်ရဲအောင် ရည်ရွယ်ချက်ရှိရှိနဲ့ ၊ ဆရာမ မပိုင်တော့မှန်းသိသိနဲ့ အများပိုင်းမှန်း သိရဲ့နဲ့ အိမ်ကို ချိတ်ပိတ်ရင်းနဲ့ ရောပြီးချိတ်ပိတ်ခဲ့တာဖြစ်တယ်” လို့ ‌ဒေါ်ခင်စိုးစိုးကြည်နဲ့ နီးစပ်သူ တဦးက ပြောပါတယ်။

ရေသန့်စက်ရုံက ဝန်ထမ်း ၃၀ နီးပါး အလုပ်လက်မဲ့ ဖြစ်ခဲ့သလို နေအိမ်ချိတ်ပိတ်ခံခဲ့ရတဲ့ မိသားဝင်တွေကတော့ ဆွေးမျိုးအိမ်မှာ သွားနေခဲ့ရပြီး လုပ်ငန်းပိုင်ရှင်တွေကတော့ ဥပဒေကြောင်းအရ ဖြေရှင်းနေတယ်လို့ သိရပါတယ်။

မကွေး၊ ဒီဇင်ဘာ ၂၄၊ ၂၀၂၁။

မကွေးတိုင်း၊ အောင်လံမြို့နယ် တိုင်းဒေသကြီးလွှတ်တော်ကိုယ်စားလှယ် ၁ ဦး၊ CDM ပညာရေးဝန်ထမ်းတဦး၊ NLD မြို့နယ် အလုပ်အမှုဆောင်တဦးနဲ့ တက်ကြွလှုပ်ရှားသူတဦး စုစုပေါင်း ၄ ဦးရဲ့ နေအိမ်တွေကို မနေ့က ချိတ်ပိတ်ခဲ့တယ်လို့ ဒေသခံတွေဆီက သိရပါတယ်။

မကွေးတိုင်း၊ အောင်လံမြို့နယ် တိုင်းဒေသကြီးအမှတ်(၁) လွှတ်တော်ကိုယ်စားလှယ် ဦးအေးကျော်၊ CDM ပညာရေးဝန်ထမ်း ဆရာဦးကျော်ကျော်ဦး၊ NLD မြို့နယ် အလုပ်အမှုဆောင် ဒေါ်ဥမ္မာဌေးနဲ့ ကိုသူရနိုင် (ခေါ်) ကိုမိုင်းဆက် တို့ ၄ ဦးရဲ့ နေအိမ်တွေ စစ်ကောင်စီက ချိတ်ပိတ်ခဲ့တာဖြစ်ပါတယ်။

“ဦးအေးကျော်အိမ်ဆို ယောက္ခမပါရှိတယ်။ သက်ကြီးရွယ်အိုပေါ့ အသက်က ၇၀ နီးပါး ရှိနေပြီ၊ မိသားစုတွေနေတဲ့ အိမ်ကို သူတို့အပြင်ခဏသွားတုန်း ဝင်ပြီးချိတ်ပိတ်ပစ်တာ။ အခုတော့ နေစရာမရှိလို့ အမျိုးတွေအိမ်မှာ သွားနေရတယ်။ ကျန်တဲ့သူတွေအိမ်ကတော့ လူမနေတာ ကြာပါပြီ” လို့ အောင်လံမြို့ ဒေသခံတဦးက မြေလတ်အသံကို ပြောပါတယ်။

အခုချိတ်ပိတ်ခံရတဲ့ လွှတ်တော်ကိုယ်စားလှယ် ဦးအေးကျော်မှာ တိုင်းဒေသကြီး အမှတ် (၂) လွှတ်တော်ကိုယ်စားလှယ်ဖြစ်ပြီး၊ အမှတ် (၁) လွှတ်တော်ကိုယ်စားလှယ် ဦးဇော်မင်းမှာ မကွေးတိုင်းဒေသကြီးအစိုးရအဖွဲ့ဝင် ဝန်ကြီးတပါးဖြစ်လို့ အာဏာသိမ်းစဉ်ကာလကတည်းက ဖမ်းဆီးထိန်းသိမ်းခံထားရကာ အခုလို နိုင်ငံရေးနဲ့ပတ်သက်သူတွေရဲ့ နေအိမ်တွေကို ချိတ်ပိတ်တာ အောင်လံမြို့နယ်မှာ ပထမဆုံးဖြစ်ကြောင်း သိရပါတယ်။

အောင်လံမြို့နယ် ပြည်သူ့လွှတ်တော်ကိုယ်စားလှယ်နဲ့ အမျိုးသားလွှတ်တော်ကိုယ်စားလှယ် (၂၀၁၅ အနိုင်ရအမတ် ဟောင်း) ၂ ဦးကတော့ စစ်ကောင်စီထံမှာ ခံဝန်ထိုးပြီး နေထိုင်နေကြောင်းနဲ့ နိုင်ငံအရေးအယူအစမတူသူတွေကို အခုလို မတရားဖမ်းဆီးထောင်ချတဲ့အပြင်၊ ထွက်ပြေးတိမ်းရှောင်နေရသူတွေရဲ့ နေအိမ်တွေကို မတရား ချိတ်ပိတ်တဲ့အပေါ် မြို့ခံလူထုအနေနဲ့ လက်မခံနိုင်ကြဘူးလို့ ဒေသခံတွေက ပြောပါတယ်။

မကွေး၊ ဒီဇင်ဘာ ၂၄၊ ၂၀၂၁။

မကွေးတိုင်း၊ အောင်လံမြို့နယ် တိုင်းဒေသကြီးလွှတ်တော်ကိုယ်စားလှယ် ၁ ဦး၊ CDM ပညာရေးဝန်ထမ်းတဦး၊ NLD မြို့နယ် အလုပ်အမှုဆောင်တဦးနဲ့ တက်ကြွလှုပ်ရှားသူတဦး စုစုပေါင်း ၄ ဦးရဲ့ နေအိမ်တွေကို မနေ့က ချိတ်ပိတ်ခဲ့တယ်လို့ ဒေသခံတွေဆီက သိရပါတယ်။

မကွေးတိုင်း၊ အောင်လံမြို့နယ် တိုင်းဒေသကြီးအမှတ်(၁) လွှတ်တော်ကိုယ်စားလှယ် ဦးအေးကျော်၊ CDM ပညာရေးဝန်ထမ်း ဆရာဦးကျော်ကျော်ဦး၊ NLD မြို့နယ် အလုပ်အမှုဆောင် ဒေါ်ဥမ္မာဌေးနဲ့ ကိုသူရနိုင် (ခေါ်) ကိုမိုင်းဆက် တို့ ၄ ဦးရဲ့ နေအိမ်တွေ စစ်ကောင်စီက ချိတ်ပိတ်ခဲ့တာဖြစ်ပါတယ်။

“ဦးအေးကျော်အိမ်ဆို ယောက္ခမပါရှိတယ်။ သက်ကြီးရွယ်အိုပေါ့ အသက်က ၇၀ နီးပါး ရှိနေပြီ၊ မိသားစုတွေနေတဲ့ အိမ်ကို သူတို့အပြင်ခဏသွားတုန်း ဝင်ပြီးချိတ်ပိတ်ပစ်တာ။ အခုတော့ နေစရာမရှိလို့ အမျိုးတွေအိမ်မှာ သွားနေရတယ်။ ကျန်တဲ့သူတွေအိမ်ကတော့ လူမနေတာ ကြာပါပြီ” လို့ အောင်လံမြို့ ဒေသခံတဦးက မြေလတ်အသံကို ပြောပါတယ်။

အခုချိတ်ပိတ်ခံရတဲ့ လွှတ်တော်ကိုယ်စားလှယ် ဦးအေးကျော်မှာ တိုင်းဒေသကြီး အမှတ် (၂) လွှတ်တော်ကိုယ်စားလှယ်ဖြစ်ပြီး၊ အမှတ် (၁) လွှတ်တော်ကိုယ်စားလှယ် ဦးဇော်မင်းမှာ မကွေးတိုင်းဒေသကြီးအစိုးရအဖွဲ့ဝင် ဝန်ကြီးတပါးဖြစ်လို့ အာဏာသိမ်းစဉ်ကာလကတည်းက ဖမ်းဆီးထိန်းသိမ်းခံထားရကာ အခုလို နိုင်ငံရေးနဲ့ပတ်သက်သူတွေရဲ့ နေအိမ်တွေကို ချိတ်ပိတ်တာ အောင်လံမြို့နယ်မှာ ပထမဆုံးဖြစ်ကြောင်း သိရပါတယ်။

အောင်လံမြို့နယ် ပြည်သူ့လွှတ်တော်ကိုယ်စားလှယ်နဲ့ အမျိုးသားလွှတ်တော်ကိုယ်စားလှယ် (၂၀၁၅ အနိုင်ရအမတ် ဟောင်း) ၂ ဦးကတော့ စစ်ကောင်စီထံမှာ ခံဝန်ထိုးပြီး နေထိုင်နေကြောင်းနဲ့ နိုင်ငံအရေးအယူအစမတူသူတွေကို အခုလို မတရားဖမ်းဆီးထောင်ချတဲ့အပြင်၊ ထွက်ပြေးတိမ်းရှောင်နေရသူတွေရဲ့ နေအိမ်တွေကို မတရား ချိတ်ပိတ်တဲ့အပေါ် မြို့ခံလူထုအနေနဲ့ လက်မခံနိုင်ကြဘူးလို့ ဒေသခံတွေက ပြောပါတယ်။