ပုလဲ၊ မတ် ၁၆၊ ၂၀၂၃။
ယင်းမာပင်ခရိုင်၊ ပုလဲမြို့နယ်ရှိ ပြည်သူ့ကာကွယ်ရေးစခန်းတခုမှာ လေပြင်းတိုက် လျှပ်စီးကြောင်းထိမှန်ပြီး ဆိုင်ကယ်တစီး မီးလောင်ဆုံးရှုံးခဲ့တယ်လို့ သိရပါတယ်။
မတ်လ ၁၅ ရက်နေ့၊ ညသန်းခေါင်ယံ အချိန်ခန့်က ဖြစ်ပွားခဲ့တာလို့ ယင်းမာပင်ခရိုင်၊ အမှတ် ၁၂ တပ်ရင်း P1.3012 Guerilla Ranger တပ်ရင်းရဲ့ တာ၀န်ခံ ကိုနေမင်း က မြေလတ်အသံကို ပြောပါတယ်။
“မိုးရွာတာက နည်းတယ်ဗျ။ လေတိုက်တာက အတော်များတယ်။ မိုးခြိမ်းပြီး လျှပ်စီးလက်တာများတော့ လျှပ်စီးကြောင်းထိလို့ ဆိုင်ကယ်ကို မီးစွဲလောင်တာပါ။ တဲစခန်းနဲ့က နီးပေမယ့် ရေစိုနေတော့ တခြားပစ္စည်းတွေ ပျက်စီးဆုံးရှုံးတာ မရှိပါဘူး” လို့ ကိုနေမင်း က မြေလတ်အသံကို ပြောပါတယ်။
မိုးလေဝသ လေ့လာခန့်မှန်းသူ တဦးက မတ်လ ၁၀ ရက်နေ့ကစလို့ မြန်မာနိုင်ငံတဝှမ်း မိုးသက်လေပြင်းကျကာ မိုးသီးများ ကြွေကျနိုင်ပြီး မွန်၊ ကရင်၊ ရန်ကုန်၊ ပဲခူး၊ ဧရာဝတီ၊
မကွေး၊ မန္တလေး၊ စစ်ကိုင်း ကဲ့သို့ပြည်နယ်နဲ့ တိုင်းအချို့မှာ မိုးထစ်ချုန်းရွာသွန်းတာတွေ ဖြစ်နိုင်တယ်လို့ ခန့်မှန်းပြောဆိုထားပါတယ်။
စာတည်း – 007