လေပြင်းတိုက်

မကွေး၊ မေ ၁၀၊ ၂၀၂၃။

မကွေးတိုင်းဒေသကြီး၊ အောင်လံမြို့ ၊ မြို့ပေါ်ရပ်ကွက်အချို့နဲ့ ကျေးရွာတွေမှာ လေပြင်းတိုက်ခိုက်လို့ နေအိမ် ၃၄ လုံးထိခိုက်ပျက်စီးခဲ့တယ်လို့ သိရပါတယ်။

မေလ ၉ ရက်နေ့ညနေ ၅ နာရီခန့်က စတင်ပြီး လေပြင်းတိုက်ခိုက်လာတာကြောင့် သစ်ပင်လဲတာ၊ ဓါတ်တိုင်လဲတာနဲ့ နေအိမ်တွေအမိုးလန်ပျက်စီးတာတွေရှိခဲ့တယ်လို့ ဒေသခံတဦးကပြောပါတယ်။

“ခုက ကြေညာထားတဲ့ မုန်တိုင်းဝင်တာတော့မဟုတ်ဘူး။ သာမန်မိုးရွာလေပြင်းတိုက်တာလောက်ဘဲ။ လေတွေတိုက်တဲ့ တချက်ကတော့ တော်တော်ကြမ်းတယ်။ ရွာတွေမှာ လူထိခိုက်တာတွေတော့မရှိဘူး။ လေတိုက်တဲ့အချိန်ကတော့ ၁ နာရီလောက်တော့ကြာမယ်”လို့ ပြောပါတယ်။

​​လေပြင်းတိုက်ခတ်လို့ အောင်လံမြို့ပေါ်ရှိ စျေးကုန်းရပ်ကွက်၊ ရေပြင်းကျေးရွာ၊ ရေဟိုင်းကျေးရွာ၊ ရွှေသူဌေးကျေးရွာ၊ စစ်အောင်ကျေးရွာ၊ ဥယျာဥ်ကျေးရွာတွေက နေအိမ် ၃၃ လုံးနဲ့ဘုန်းကြီးကျောင်း ပျက်စီးမှုရှိခဲ့တယ်လို့ ဆိုပါတယ်။

ပျက်စီးထိခိုက်မှုရှိတဲ့နေရာတွေကို မီးသတ်၊ အရန်မီးသတ်၊ လူမှုကူညီရေးအဖွဲ့နဲ့ဒေသခံပြည်သူတွေက ဝိုင်းဝန်းရှင်းလင်းကူညီရေး လုပ်ငန်းတွေကို လုပ်ပေးခဲ့တယ်လို့ သိရပါတယ်။

နေအိမ်ပျက်စီးသွားပေမယ့် ဒေသခံတွေဟာ အခြားနေရာကို ပြောင်းရွှေ့နေထိုင်ရတာမျိုးမရှိဘဲ မိမိအစီအစဥ်နဲ့ နေအိမ်တွေမှာသာ ပြန်လည်ပြုပြင်နေထိုင်ကြတယ်လို့ သိရပါတယ်။

စာတည်း – 007

ပဲခူး၊ မေ ၁၅၊ ၂၀၂၃။

ပဲခူးတိုင်း၊ တောင်ငူမြို့နယ်အတွင်းမှာ မေလ ၁၄ ရက် မနေ့ကညနေ ၄ နာရီဝန်းကျင်မှာ လေပြင်းတိုက်ပြီး မိုးသည်းထန်စွာရွာသွန်းလို့ လူနေအိမ်အပါအဝင် အဆောက်အဦ ၅၉ လုံး ထိခိုက်ပျက်စီးသွားတယ်လို့ သိရပါတယ်။

မိုးသည်းပြီး လေပြင်းကြောင့် ငါးဖယ်အင်းကျေးရွာနဲ့ နတ်စင်ကုန်းကျေးရွာက စာသင်ကျောင်း၊ လူနေအိမ်အဆောက်အဦတွေ ထိခိုက်ပျက်စီးခဲ့တာလို့ ဒေသခံတဦးက မြေလတ်အသံကို ပြောပါတယ်။

“မိုးကအရင်ရွာပြီးမှ လေကတိုက်လာတာ။ လေက တချက်တချက်ဝေ့ပြီးတိုက်တာဆိုတော့ အိမ်တွေက အမိုးလန်တာတွေများတယ်။ အိမ်ပြိုကျတာတွေလဲရှိတယ်။ နတ်စင်ကုန်းဘက်မှာတော့ ကလေး တယောက်ထိခိုက်တာရှိတယ်။ သစ်ကိုင်းကျိုးကျချိန် သစ်ကိုင်းရိုက်မိတာ”လို့ ပြောပါတယ်။

လေပြင်းတိုက်ခတ်မှုကြောင့် နတ်စင်ကုန်းကျေးရွာက နေအိမ် ၁၇ လုံး၊ သုသာန်ဂိုထောင် ၁ လုံး၊ စာသင်ကျောင်း ၁ ကျောင်းနဲ့ ငါးဖယ်အင်းကျေးရွာက လူနေအိမ် ၄၀ လုံး ထိခိုက်ပျက်စီးခဲ့တယ်လို့ သိရပါတယ်။

ဒါ့အပြင် တောင်ငူမြို့ပေါ်ရပ်ကွက်အချို့မှာ သစ်ပင်ကြီးတွေလဲကျတာတွေရှိခဲ့ပြီး နေအိမ်ပျက်စီးတာတွေ မရှိဘူးလို့ ဆိုပါတယ်။

ထိခိုက်ပျက်စီးမှုရှိတဲ့ နေအိမ်တွေမှ ပြည်သူတွေကတော့ ကိုယ်ထူကိုယ်ထ ပြန်လည်ပြုပြင်နေထိုင်တာနဲ့ လတ်တလောမပြင်နိုင်သေးသူတွေက နီးစပ်ရာနေအိမ်တွေမှာ ပြောင်းရွှေ့နေထိုင်နေရတယ်လို့ သိရပါတယ်။

စာတည်း- ရင်ငြိမ်း

မကွေး၊ မေ ၁၀၊ ၂၀၂၃။

မကွေးတိုင်း၊ ဂန့်ဂေါခရိုင်၊ ဆောမြို့နယ်၊ ကြခတ်ကျေးရွာအုပ်စုအတွင်းက ကျေးရွာတွေမှာ မေလ ၉ ရက်နေ့လယ် ၃ နာရီခန့်က လေပြင်းတိုက်ခတ်ခဲ့လို့ စာသင်ကျောင်းနဲ့ လူနေအိမ်တွေ ပျက်စီးခဲ့တယ်လို့ ဒေသခံတွေဆီက သိရပါတယ်။

အချိန် ၂ နာရီကျော်ကြာ လေပြင်းတိုက်ခတ်ပြီး မိုးရွာသွန်းတာကြောင့် ဘုန်းတော်ကြီးကျောင်း၊ စာသင်ကျောင်းနဲ့ နေအိမ်တွေရဲခေါင်မိုးတွေ အမိုးလန်ပျက်စီးသွားတာလို့ ဒေသခံတဦးက မြေလတ်အသံကို ပြောပါတယ်။

“နေ့ခင်း ၃ နာရီလောက်ကနေ ညနေ ၅ နာရီခွဲလောက်ထိ လေရောမိုးရောချတာ။ အိမ် ၁၀ လုံးကျော် ပျက်စီးတယ်။ ဘုန်းကြီးကျောင်းအဆောင်သစ်နဲ့ အိမ်သာလည်းပျက်စီးတယ်။ တချို့အိမ်ဆို အိမ်ခေါင်မိုး လိုက်ပြုတ်ထွက်သွားတာ။ သစ်ပင်တွေလည်းကျိုးတယ်” လို့ ကျေးရွာသားတဦးက ပြောပါတယ်။

ဒါ့အပြင် လေပြင်းတိုက်ခတ်မှုကြောင့် ရွာခံ အသက်ကြီးပိုင်း အမျိုးသမီးတဦးလည်းဒဏ်ရာရရှိခဲ့တယ်လို့ ဆိုပါတယ်။

“လေပွေတောင်ပါမယ်လို့ ကျမထင်တယ်။ အကုန်လှန်ချလိုက်သလိုပါဘဲ။ စာသင်ကျောင်းရုံးခန်းနဲ့ ကျောင်းဆောင်အမိုးတွေ လိုင်းခန်းတွေပါပျက်စီးတာ။ အိမ်သာတွေဆိုအလုံးလိုက်လဲကျသွားတယ်” လို့ CDM ကျောင်းဆရာမတဦးက ပြောပါတယ်။

ပျက်စီးမှုတွေကို ကူညီကယ်ဆယ်ရေးနဲ့ပတ်သက်လို့လာရောက်ကူညီတာမျိုးမရှိသေးဘဲ ပြည်လည်ပြင်ဆင်တာတွေကိုတော့ ဒေသခံတွေကဘဲ ကိုယ်ထူကိုယ်ထ လုပ်ဆောင်နေတယ်လို့ သိရပါတယ်။

စာတည်း – ရင်ငြိမ်း