လုံခြုံရေးယူပေး

ဆားလင်းကြီး၊ ဖေဖော်ဝါရီ ၂၀၊ ၂၀၂၃။

စစ်ကိုင်းတိုင်း၊ ဆားလင်းကြီးမြို့နယ်ထဲက ကျေးရွာတရွာမှာ နယ်မြေခံကာကွယ်ရေးအဖွဲ့တွေ လုံခြုံရေးယူပေးပြီး လူထုအင်အားရာချီနဲ့ သပိတ်စစ်ကြောင်းထွက်ခဲ့တယ်လို့ သိရပါတယ်။

ဖေဖော်ဝါရီလ ၂၀ ရက်ဒီကနေ့နေ့လည်က “ငါတို့သည်ပြာပုံကိုမကြောက် စစ်ဖိနပ်အောက် ဒူးမထောက်”ဆိုတဲ့ ဘန်နာကိုင်စွဲပြီး၊ ကျေးရွာအကြီးအကဲတွေနဲ့ သပိတ်ကော်မတီဝင်၂ ဦးက သပိတ်တရားဟော‌ပြောကာ သွေးသစ္စာသီချင်းနဲ့ သပိတ်သိမ်းခဲ့တယ်လို့ ဆိုပါတယ်။

အဆိုပါ သပိတ်စစ်ကြောင်းကို ကျေးရွာပအဖ၊ ပကဖနဲ့ Salingyi People Defence Force-SPDFတို့က လုံခြုံရေးယူပေးခဲ့တယ်လို့ သိရပါတယ်။

မကွေး၊ ဇန်နဝါရီ ၂၈၊ ၂၀၂၃။

မကွေးတိုင်းထဲကတနေရာမှာ ဇန်နဝါရီလ ၂၈ ရက်ဒီညနေပိုင်းက ပခုက္ကူလူထုတိုက်ပွဲကော်မတီမြေပြင်လှုပ်ရှားမှုအင်အားစုတွေနဲ့ ဒေသခံတွေပူးပေါင်းပြီး စစ်အာဏာရှင်ကိုဆန့်ကျင်တဲ့ သပိတ်စစ်ကြောင်းတခုပြုလုပ်ခဲ့ရာ အဲ့ဒီသပိတ်စစ်ကြောင်းကို ဒေသခံကာကွယ်ရေးတပ်ဖွဲ့ဝင်တွေက လုံခြုံရေးယူပေးခဲ့တယ်လို့ သိရပါတယ်။

“တရားမဝင်တဲ့ရွေးကောက်ပွဲ လူထုအားဖြင့်တိုက်ဖျက်ကြ”၊ “သတံတည်းညီတချီတည်းရုံး နှစ်ဆယ့်သုံး”စတဲ့စာသားပါဘန်နာတွေကို ကိုင်ဆောင်ပြီး သပိတ်ဆင်နွှဲခဲ့ကြတာပါ။

“တရားမဝင်ရွေးကောက်ပွဲကို လူထုအားနဲ့တိုက်ခိုက်ကြဆိုသလို ဒီရွေးကောက်ပွဲကို ကျနော်တို့တွေရနိုင်တဲ့ဘက်ကနေ တွန်းလှန်တိုက်ထုတ်ဖို့အတွက်လုပ်ဆောင်ခဲ့တာပါ” လို့ ပခုက္ကူလူထုတိုက်ပွဲကော်မတီဝင်တဦးက ပြောပါတယ်။

ဒါ့အပြင် စစ်တပ်ကအာဏာသိမ်းတာ ၂ နှစ်ပြည့်အထိမ်းအမှတ်နေ့မှာလည်း ပြည်သူလုပ်ထုအနေနဲ့ ငြိမ်သက်ခြင်းသပိတ်ပြုလုပ်ခြင်း − Silent Strike မှာပါဝင်ကြဖို့ကိုလည်း သပိတ်ဦးဆောင်သူတွေက ပြောဆိုတိုက်တွန်းခဲ့ကြပါသေးတယ်။

မန္တလေး၊ ဇန်နဝါရီ ၂၆၊ ၂၀၂၃။

မန္တလေးတိုင်း၊ မတ္တရာမြို့နယ်၊ ထုံးဘိုကျေးရွာက ကောက်ပဲသီးနှံတွေရိတ်သိမ်းနေကြတဲ့ ဒေသခံတောင်သူတွေကို ဇန်နဝါရီ ၂၆ ရက်နေ့ မှာ PDF တွေကလုံခြုံရေးယူပေးခဲ့တယ်လို့ သိရပါတယ်။

စစ်ကောင်စီကကျေးရွာကိုမီးရှို့ပြီး ရွာခံတဦးကိုပါ သတ်သွားခဲ့တာကြောင့် ထွက်ပြေးနေကြရတဲ့ တောင်သူတွေအနေနဲ့ ကောက်ပဲသီးနှံရိတ်သိမ်းဖို့ မိမိတို့ PDF တွေကိုအကူအညီတောင်းခံလို့ လုံခြုံရေးယူပေးခဲ့တာဖြစ်ကြောင်း Peacock Warrior Force – Madayaမှ တာဝန်ရှိသူတဦးက ပြောပါတယ်။

“ရွာကပြည်သူတွေက အကုန်လုံးထွက်ပြေးတိမ်းရှောင်နေကြတာ။ သူတို့ရွာအနီးအနား တောင်မကပ်ရဲကြဘူး။ အဲဒါကြောင့် ကျနော်တို့အဖွဲ့နဲ့နောက်တဖွဲ့တို့က လုံခြုံရေးယူပေးခဲ့တာ။ အခုချိန်ထိတော့ ရွာအနီးပတ်ဝန်းကျင်တွေမှာ စကစတွေက ကင်းပုန်းဝပ်တာတွေရှိနေသေးတယ်” လို့ဆိုပါတယ်။

ဒါ့အပြင် မတ္တရာမြို့နယ်ထဲမှာ နယ်မြေစိုးမိုးမှုရယူထားတဲ့ နေရာတွေမှန်သမျှက တောင်သူတွေကိုလည်း အခုလိုလုံခြုံရေးယူပေးသွားဖို့ရှိပြီး အခုလုံခြုံရေးယူပေးတဲ့အဖွဲ့တွေကတော့ ADRFတော်လှန်ရေးအင်အားစုနဲ့ Peacock Warrior Force Madaya တို့ဖြစ်ကြပါတယ်။

ထုံးဘိုကျေးရွာကို ပြီးခဲ့တဲ့ဇန်နဝါရီ ၁၇ ရက်နေ့မှာ အင်အား ၁၀၀ ခန့်ရှိတဲ့ စစ်ကြောင်းတခုက ဝင်ရောက်လာပြီး လူနေအိမ် ၁၅ လုံးနဲ့ ရွာခံဦးခင်မင်းမောင် ၄၀ နှစ်ကို သတ်ဖြတ်သွားခဲ့တယ် လို့ သိရပါတယ်။