လက်နက်ကြီးနဲ့ပစ်

စစ်ကိုင်း၊ ဇွန် ၅၊ ၂၀၂၃။

စစ်ကိုင်းတိုင်း၊ ကလေးမြို့နယ်မြောက်ပိုင်းကို စစ်ကောင်စီက လေကြောင်းသုံးတိုက်ခိုက်တဲ့အပြင် လက်နက်ကြီးနဲ့ပါ ဆက်တိုက်ပစ်ခတ်နေတာကြောင့် ဒေသခံပြည်သူ ၈ ဦး ထိမှန်ဒဏ်ရာ ရထားတယ်လို့ သိရပါတယ်။

ဇွန်လ ၅ ရက် ဒီနေ့မနက် ၁၀ နာရီခွဲဝန်းကျင်မှာ တိုက်ခိုက်ရေး ရဟတ်ယာဉ်တစီးနဲ့ ရှုခင်းသာရွာကို တိုက်ခိုက်ခဲ့တာဖြစ်ပြီး၊ ၁၁ နာရီခွဲဝန်းကျင်မှာတော့ ကလေးမြို့ပေါ်ကနေ လက်နက်ကြီးနဲ့ပစ်ခတ်လို့ လက်ပံချောင်းရွာအနီး ကျရောက်ပေါက်ကွဲခဲ့တာကြောင့် ဒေသခံတွေ ထိမှန်ဒဏ်ရာ ရရှိခဲ့တာလည်း ဖြစ်ပါတယ်။

“ကလေးမြောက်ပိုင်းကို လေကြောင်းပစ်နေပြီ၊ စာသင်ကျောင်း ပစ်ခံရတာ၊ လက်နက်ကြီးနဲ့ပစ်တာလည်း ထိထားတယ်၊ ခုလည်း လေယာဉ်နောက်တစီးပတ်ဝဲနေတာမို့ သတိထားနေရတယ်” လို့ ကလေးဒေသခံတဦးက ပြောပါတယ်။

လေကြောင်းပစ်ခတ်ခံရလို့ ရှုခင်းသာရွာက ဒေသခံ ၄ ဦး ထိမှန်ဒဏ်ရာရခဲ့တဲ့အပြင် ကျေးရွာစာသင်ကျောင်း လည်းပျက်စီးခဲ့ပြီး သေဆုံးသူတွေရှိတယ်လို့ သတင်းတွေထွက်ပေါ်နေပေမယ့် မြေလတ်အသံက သီးခြားအတည်မပြုနိုင်သေးပါဘူး။

ဒါ့အပြင် လက်နက်ကြီးနဲ့ပစ်ခတ်လို့ လက်ပံချောင်းရွာက ဒေသခံ ၄ ဦး ကျည်ထိမှန်ခဲ့ကာ တဦးကတော့ ခြေထောက်ပြတ်သွားပြီး တဦးက စိုးရိမ်ရတယ်လို့ သိရပါတယ်။

ထိခိုက်သူတွေထဲမှာ အမျိုးသား၊ အမျိုးသမီးဘယ်နှစ်ဦး ပါလဲဆိုတာနဲ့ လူနာတွေရဲ့ အသေးစိတ်အချက်လက်ကိုတော့ စုံစမ်းနေဆဲဖြစ်တယ်လို့ မြေပြင်နဲ့နီးစပ်သူ အထက်ပါဒေသခံက ပြောပါတယ်။

နေ့လယ် ၁၂ နာရီမှာလည်း နောက်ထပ် တိုက်ခိုက်ရေးရဟတ်ယာဉ်တစီးက ကလေးမြို့ပေါ်ကို ပျံသန်းတာတွေ လုပ်နေတဲ့အတွက် ကလေးမြို့မြောက်ပိုင်းက ပြည်သူတွေ သတိနဲ့နေနေရတယ်လို့ ဆိုပါတယ်။

ကလေးမြို့တောင်ပိုင်းမှာ မေလ ၂၇ ရက်က ၃ ပွင့်ဗိုလ်တဦးအပါအဝင် စစ်ကောင်စီတပ်သား ၁၅ ဦးကျော်သေဆုံးခဲ့ပြီးနောက် စစ်ကောင်စီက ကလေးမြို့ပေါ်ကို စဉ့်ကူးကနေ အင်အား ၃၀၀ နီးပါး ထပ်မံဖြည့်တင်းထားပြီး ဂန့်ဂေါ-ကလေးနယ်စပ်မှာလည်း စစ်ရေးတင်းမာမှုတွေရှိနေတယ်လို့ သိရပါတယ်။

စာတည်း – လင်း

စစ်ကိုင်း၊ ဇွန် ၂၊ ၂၀၂၃။

စစ်ကိုင်းတိုင်း၊ စစ်ကိုင်းမြို့နယ်၊ စာရေးရွာကို စစ်ကောင်စီက လက်နက်ကြီးနဲ့ပစ်ခတ်နေတဲ့အတွက် ရွာလုံးကျွတ် ထွက်ပြေးတိမ်းရှောင်နေရတယ်လို့ ဒေသခံရွာသားတွေကတဆင့် သိရပါတယ်။

ဇွန်လ ၂ ရက် ဒီကနေ့နေ့လယ် ၁ နာရီခွဲလောက်က ပဒူရွာကို စစ်ကူသွားပို့ပြီးပြန်လာတဲ့ စစ်ကြောင်းဟာ စာရေးရွာနဲ့တမိုင်ခန့်အကွာမှာ မိုင်းဆွဲခံခဲ့ရပြီးနောက် စာရေးရွာသားတွေ မိုင်းဆွဲတယ်အထင်နဲ့ ရွာဘက်ကိုလက်နက်ကြီးတွေနဲ့ ဆက်တိုက်ပစ်နေတာဖြစ်တယ်လို့ ဆိုပါတယ်။

“ကျနော်တို့ကတော့ ခုဝေးသထပ်ဝေးတဲ့နေရာ ပြေးနေရတယ်၊ လူကြီးတွေကိုတော့ လှည်းပေါ်တင်ပြီး သွားနေကြတယ်၊ လူငယ်တွေကတော့ လမ်းလျှောက်လိုက်တဲ့သူတွေက လိုက်ကြတယ်၊ သူတို့(စစ်ကောင်စီ)ဘက်က ၁၅ မိနစ်လောက်နားပြီး တခါပြန်ပစ်တယ်၊ ခုလည်း လက်နက်ကြီးတွေ ဆက်တိုက်ပစ်လို့ တနေရာထပ်ရွေ့နေရတယ်”လို့ စာရေးရွာသားတဦးက ပြောပါတယ်။

စာရေးရွာမှာ စာရေးအရှေ့ရွာနဲ့ စာရေးအနောက်ရွာဆိုပြီး ၂ ရွာရှိကာ ရွာ ၂ ရွာကို သင်္ချိုင်းကုန်းပဲ ခြားထားပြီး၊၂ ရွာပေါင်းမှာ အိမ်ခြေ ၂၀၀၀ ဝန်းကျင်နဲ့ လူဦးရေ ၃၀၀၀ ကျော်ရှိရာ လက်နက်ကြီးတွေက စာရေးအနောက်ရွာဘက်ကို ဆက်တိုက်ကျနေတဲ့အတွက် ၂ ရွာလုံး ပြေးနေရတယ်လို့ ဆိုပါတယ်။

လက်ရှိမှာ စာရေးရွာထဲကို စစ်သားတချို့ဝင်ရောက်ပြီး လက်နက်တွေနဲ့ ပစ်ခတ်နေတယ်လို့သိရကာ ထိခိုက်မှုအခြေအနေတွေကိုတော့ မြေလတ်အသံက ဆက်လက်စုံစမ်းနေဆဲဖြစ်ပါတယ်။

စစ်ကောင်စီက လက်နက်ကြီးနဲ့ပစ်ခတ်ရုံသာမက စာရေးရွာနဲ့ကပ်လျက်မှာရှိတဲ့ ရွာသစ်ရွာကိုလည်း ဝင်ရောက်မီးရှို့နေတဲ့အတွက် နေအိမ်တချို့ မီးလောင်နေပြီး ပဒူရွာအနီးတဝိုက်မှာလည်း လေယာဉ်ပျံသန်းတာတွေ ရှိနေတယ်လို့ ဆိုပါတယ်။

လက်ရှိမှာ စစ်ကိုင်းအခြေစိုက် တမခ ၃၃ ကနေလည်း သံချပ်ကာကား ၃ စီး ပဒူရွာဘက်ကို စစ်ကူအနေနဲ့ထွက်လာကာ လမ်းတလျှောက်မှာရှိတဲ့ စစ်ရှောင်ပြည်သူတွေကိုလည်း ဖမ်းဆီး၊ စစ်ဆေးမေးမြန်းတာတွေ လုပ်နေတယ်လို့ အထက်ပါဒေသခံက ပြောပါတယ်။

ပဒူရွာမှာလည်း စစ်ကောင်စီတပ်ဖွဲ့နဲ့ နယ်မြေခံကာကွယ်ရေးအဖွဲ့တွေ မေလ ၁၉ ရက်‌နေ့ကတည်းက ဒီကနေ့ချိန်ထိ ထိတွေ့မှုတွေဖြစ်နေဆဲပဲ ဖြစ်ပြီး စစ်ကောင်စီဘက်က အကျဆုံးများကာ အထိနာနေတယ်လို့လည်း ဒေသခံတွေဆီက သိရပါတယ်။

စာတည်း – လင်း

မကွေး၊ မေ ၂၆၊ ၂၀၂၃။

မကွေးတိုင်း၊ ပခုက္ကူခရိုင်၊ ရေစကြိုမြို့နယ်၊ မိဖုရားကျေးရွာကို စစ်ကောင်စီက မေလ ၂၆ ရက်မှာ လက်နက်ကြီးတွေပစ်ခတ်ဝင်ရောက်လာပြီး နေအိမ်တွေကို မီးရှို့ဖျက်ဆီးခဲ့ပါတယ်။

အင်အား ၁၀၀ နီးပါးပါတဲ့စစ်ကြောင်းဟာ မနက် ၈ နာရီလောက်က ချင်းတွင်းမြစ်ကိုဖြတ်ကာ မိဖုရားရွာဘက်ကို ဦးတည်လာချိန် လက်နက်ကြီးတွေနဲ့ပစ်ခတ်ခဲ့တာကြောင့် အဲ့ဒီရွာက ၃၈ နှစ်အရွယ် ဒေါ်ခင်အေးပိုကို ကျည်ထိမှန်သေဆုံးခဲ့တာလည်း ဖြစ်ပါတယ်။

အဲ့ဒီနောက် မနက် ၁၀ နာရီလောက်ကျမှ ရွာထဲကနေအိမ်တွေကို ဝင်ရောက်မီးရှို့ခဲ့ကြတာလို့ Yay Lal Kyun News အဖွဲ့မှ တာဝန်ရှိသူတဦးက ပြောပါတယ်။

“ဒီဘက်ကမ်းကိုရောက်တာနဲ့ သူတို့က တရစပ် လက်နက်ကြီးတွေ၊ စက်လက်နက်တွေနဲ့ ပစ်တယ်။ အခုချိန်ထိ နေအိမ်တွေ ဘယ်လောက်ထိ မီးထဲပါသွားလဲ မသိရသေးပါဘူး။ ရွာသားတွေလည်း ရွာထဲ မဝင်ရဲသေးဘူး၊ သေဆုံးသွားတဲ့သူက ကလေး ၂ ယောက်အမေလို့ သိရတယ်။ အသက် ၁၂ နှစ်အရွယ် မောင်ညီခန့်ဇင်က လက်နက်ကြီးထိမှန်သွားတယ်”လို့ ပြောပါတယ်။

မိဖုရားကျေးရွာမှာ အိမ်ခြေ ၁၀၀၀ ကျော်ရှိပြီး အခုလိုမီးရှို့ခံရတာ ၃ ကြိမ်တိတိရှိပြီလို့လည်း ဆိုပါတယ်။

မိဖုရားကျေးရွာကိုမီးရှို့ပြီး နေ့လယ် ၁၂ နာရီလောက်မှာတော့ စစ်ကောင်စီစစ်ကြောင်းဟာ အဲဒီရွာနဲ့ ၃ ဖာလုံလောက်ဝေးတဲ့ ကျောက်ဖူးကျေးရွာထဲကို ဝင်ရောက်သွားပြီ အဲဒီရွာကနေအိမ်တွေကိုပါ မီးထပ်ရှို့ခဲ့တယ်လို့ သိရပါတယ်။

မီးရှို့ဖျက်ဆီးခံခဲ့ရတဲ့ အိမ်ခြေအရေအတွက်ကိုတော့ ဆက်လက်စုံစမ်းနေဆဲ ဖြစ်သလို စစ်ကောင်စီစစ်ကြောင်းဟာ ကျေးရွာထဲကနေပြန်လည်ထွက်ခွာသွားပေမဲ့လည်း အခုချိန်ထိ ဒေသခံတွေဟာ ကျေးရွာထဲကို ဝင်ရောက်နေထိုင်ခြင်းမရှိသေးပါဘူး။

ခုလို မီးရှို့တာတွေ လုပ်နေတဲ့အတွက် မိဖုရားကျေးရွာအပါအဝင်၊ မဲကုန်း၊ ကျောက်ဖူး၊ ကြွယ်ကုန်း၊ ဖြုံဘူး၊ ဘိုကုန်းနဲ့ တောင်ကုန်းရွာက ပြည်သူတွေဟာ နီးစပ်ရာကျေးရွာတွေနဲ့ တောတွေထဲမှာ ထွက်ပြေးပုန်းရှောင်နေရတယ်လို့လည်း ဆိုပါတယ်။

စာတည်း – လင်း