ရွှေဘို၊ ဇွန် ၂၇၊ ၂၀၂၅။

စစ်ကိုင်းတိုင်း၊ ရွှေဘိုမြို့နယ်၊ ရွှေဘို-ဆိပ်ခွန်သွားလမ်းပိုင်းပေါ်မှာ စစ်ကောင်စီတပ်ဖွဲ့ဝင်ပစ်တဲ့ လက်နက်ကြီးထိမှန်ပြီး ဒေသခံ ၃ ဦးဒဏ်ရာရခဲ့တယ်လို့ ရွှေဘိုမြို့နယ်ပြည်သူ့ကာကွယ်ရေးအဖွဲ့ ပြန်ကြားရေးတာဝန်ခံဆီက သိရပါတယ်။

ဇွန် ၂၆ ရက်ညနေ ၄ နာရီခန့်မှာ ရွှေဘိုမြို့တောင်ဘက်မုဒ်အထွက်မှာ အထိုင်ချထားတဲ့ စစ်ကောင်စီတပ်ဖွဲ့ဝင်တွေက ၈၁ မမ လက်နက်ကြီး ၁ လုံး၊ မင်းကုန်းရွာဘုန်းကြီးကျောင်းမှာ တပ်စွဲထားတဲ့ စစ်ကောင်စီတပ်ဖွဲ့ဝင်တွေက ၆၀ မမ ၁ လုံးပစ်ခတ်ခဲ့တယ်လို့ ဆိုပါတယ်။

“ပြည်သူထိတဲ့ အလုံးက ၈၁ ကျကွဲတာကနေ ထိကြတာ။ တိုက်ပွဲမဖြစ်ဘဲနဲ့ပစ်တာ။ ခါတိုင်းလည်း သူတို့က ဒီလိုဘဲ တော်လှန်ရေးအင်အားစုတွေရှိတဲ့ဘက်ကို ရမ်းသမ်းပစ်ခတ်နေတာပါပဲ”လို့ ရွှေဘိုမြို့နယ်ပကဖ ပြန်ကြားရေးတာဝန်ခံက ပြောပါတယ်။

လက်နက်ကြီးကျရောက်ပေါက်ကွဲတာကြောင့် လမ်းသွားလမ်းလာ ကင်းပြားရွာသား အသက် ၄၀ ကျော်အမျိုးသား ၂ ဦးနဲ့ အမျိုးသမီး ၁ ဦးတို့ ထိခိုက်ဒဏ်ရာရခဲ့ပြီး လက်ရှိမှာဆေးကုသမှုပေးနေတာကြောင့် စိုးရိမ်ရတဲ့အခြေအနေမရှိဘူးလို့ ဆိုပါတယ်။

ရွှေဘိုမြို့နယ်မှာ ရွှေဘိုမြို့ကလွဲပြီး ရွှေဘို-မြစ်ကြီးနားလမ်းပိုင်း၊ ရွှေဘို-ဆိပ်ခွန်လမ်းပိုင်းအပါအဝင် နေရာအများစုကို ဒေသကာကွယ်ရေးအဖွဲ့တွေဘက်ကထိန်းချုပ်ထားတာလို့လည်း ရွှေဘိုမြို့နယ်ပကဖ ပြန်ကြားရေးတာဝန်ခံက ပြောပါတယ်။

ဧပြီ ၂၈ ရက်ကလည်း ရွှေဘိုမြို့နယ်၊ ကွေ့တက်ကြီးကျေးရွာမှာ မခေါက်ကျေးရွာရှိ ပျူစောထီး အဖွဲ့ဝင်တွေကနေ ဒရုန်းအသုံးပြုပြီး ဗုံး ၁ လုံးကြဲချခဲ့တာကြောင့် မိသားစုဝင် ၃ ဦးဒဏ်ရာရခဲ့တယ်လို့ သိရပါတယ်။

စာတည်း – လင်း

ရွှေဘို၊ ဇွန် ၂၆၊ ၂၀၂၅။

ရွှေဘိုခရိုင် အမှတ် ၁၈ တပ်ရင်း၊ နယ်စည်းမခြားတော်လှန်ရေးအင်အားစုရဲ့ အပတ်စဥ် ၁ မွမ်းမံသင်တန်းဆင်းပွဲကို ဇွန် ၂၅ ရက်မှာပြုလုပ်ခဲ့တယ်လို့ အဲ့ဒီတပ်ရင်းဆီက သိရပါတယ်။

သင်တန်းဆင်းပွဲကို စစ်ကိုင်းတိုင်း၊ ရွှေဘိုခရိုင်ထဲမှာပြုလုပ်ခဲ့တာဖြစ်ပြီး တဆက်တည်းမှာပဲ သင်တန်းဆင်းတပ်ဖွဲ့ဝင်တွေကို ယူနီဖောင်းတပ်ဆင်တာ၊ ရှမ်း-မန်းစစ်ဆင်ရေးကပြန်လာတဲ့ တပ်ဖွဲ့ဝင်တွေကို ဂုဏ်ပြုဆုငွေပေးအပ်ခဲ့တယ်လို့ ဆိုပါတယ်။

“သင်တန်းဆင်းပွဲမှာ ကျည်ကာဦးထုပ်၊ ယူနီဖောင်း၊ ကျည်ကာအင်္ကျီတွေကိုပေးအပ်ခဲ့ပြီး ရှမ်း-မန်း စစ်ဆင်ရေးက ပြန်လာတဲ့ ရဲဘော်တွေကို ဂုဏ်ပြုဆုငွေ ၁ သိန်းကျပ်နဲ့ ရှမ်း-မန်းစစ်ဆင်ရေးကို မပါတဲ့ ရဲဘော်တွေကို ဗလာမပါကံစမ်းမဲတွေ ဖောက်ပေးခဲ့တယ်”လို့ ရွှေဘိုခရိုင် အမှတ် ၁၈ တပ်ရင်း နယ်စည်းမခြား တော်လှန်ရေးအင်အားစု ပြောရေးဆိုခွင့်ရှိသူ နေမျိုးပဲခူးက ပြောပါတယ်။

ဒီသင်တန်းကို အခုနှစ်မေ ၂၄ ရက်ကနေ ဇွန် ၂၅ ရက်ထိပြုလုပ်ခဲ့ပြီး သင်တန်းပြီးဆုံးတဲ့နေ့မှာပဲ သင်တန်းဆင်းပွဲပြုလုပ်ခဲ့တာလို့ ဆိုပါတယ်။

စုစုပေါင်း သင်တန်းသားအဟောင်း ၁၀၀ ကျော်ပါဝင်တက်ရောက်ခဲ့ပြီး အတွေ့အကြုံရှိ နည်းပြဆရာတွေကပြန်လည်သင်ကြားပေးခဲ့တယ်လို့ ပြောပါတယ်။

သင်တန်းဆင်းပွဲကို ရွှေဘိုခရိုင် အမှတ် ၁၅ တပ်ရင်းက တပ်ရင်းမှူး၊ ရွှေဘိုခရိုင် အမှတ် ၂၃ တပ်ရင်းက တပ်ရင်းမှူး၊ ရွှေဘိုခရိုင် ၁၇၀၁ ထောက်ပို့တပ်ရင်းက ဒုတပ်ရင်းမှူးနဲ့ ရွှေဘိုခရိုင် အမှတ် ၉၇၀၆ တပ်ရင်းက တပ်ရင်းမှူးတို့တက်ရောက်ခဲ့တယ်လို့ ဆိုပါတယ်။

စာတည်း – လင်း

ရွှေဘို၊ မေ ၂၇၊ ၂၀၂၅။

စစ်ကိုင်းတိုင်း၊ ရွှေဘိုမြို့၊ အမှတ် ၅ ရပ်ကွက်ရှိ ရွှေပလောင်ပုဂ္ဂလိကဆေးရုံဝန်းအတွင်း ပစ်ခတ်မှုတွေဖြစ်ပြီး ပျူစောထီး ၂ ဦးနဲ့ အရပ်သား ၂ ဦးဒဏ်ရာရခဲ့တယ်လို့ ဒေသခံတွေထံက သိရပါတယ်။

မေ ၂၆ ရက် မနေ့မနက် ၈ နာရီကျော်မှာ မေခွန်ရွာပျူစောထီးခေါင်းဆောင် ပေါသိန်းနဲ့အင်အား ၁၀ ဦးခန့်ပါ ပျူစောထီးအဖွဲ့က ရွှေပလာင်ဆေးရုံမှာ လာရောက်ကုသနေစဥ် လက်နက်ကိုင်အဖွဲ့တခုက လာရောက်ပစ်ခတ်ခဲ့ရာ အပြန်အလှန် ပစ်ခတ်မှုတွေဖြစ်ပွားခဲ့တယ်လို့ ဆိုပါတယ်။

” ပေါသိန်းက ခြေထောက်ကျိုးလို့ ဆေးရုံလာတက်တာ။ အဲ့ဒါက ပုဂ္ဂလိက ဆေးရုံလေ။ ခုက ဒုတိယအကြိမ်ခြေထောက်ကျိုးတာ။ ချော်လဲလို့ကျိုးတာ။ ပထမတခေါက်ကလည်း ကျိုးထားသေးတာ။ အသက်တောင်မပါတာကံကောင်းတယ်” လို့ ဖြစ်စဥ်ကိုသိရှိထားတဲ့ဒေသခံတဦးက မြေလတ်အသံကို ပြောပါတယ်။

အပြန်အလှန်ပစ်ခတ်မှုတွေကြောင့် ဆေးရုံလုံခြုံရေးဝန်ထမ်း အသက် ၄၀ ကျော်အရွယ် အမျိုးသား ၁ ဦးနဲ့ ပစ်ခတ်မှုဖြစ်ချိန် စက်ဘီးနဲ့ဖြတ်သန်းသွားတဲ့ လမ်းသွား၊ လမ်းလာ အသက် ၃၀ ကျော်အရွယ် အမျိုးသမီး ၁ ဦးတို့( မစိုးရိမ်ရ)ဒဏ်ရာရသွားကာ ပျူစောထီးတွေဘက်ကလည်း ၂ ဦးဒဏ်ရာရတယ်လို့ ၎င်းဒေသခံထံက သိရပါတယ်။

ဆေးရုံဝန်းအတွင်း ကင်းလာစောင့်ပေးတဲ့ ပျူစောထီးတွေကို ရွှေဘိုတိုက်နယ် ၅ ပကဖတပ်ဖွဲ့က သွားရောက်ပစ်ခတ်တိုက်ခိုက်ခဲ့တာဖြစ်ပြီး တိုက်ခိုက်မှုအတွင်း ပျူစောထီး ၂ ဦး ထိခိုက်ခဲ့တယ်လို့ ရွှေဘိုမြို့နယ်ပကဖတာဝန်ရှိသူတဦးက အတည်ပြုပြောပါတယ်။

“ မျက်မြင်တော့ ၂ ကောင်လဲကျသွားတာရှိတယ်။ သူတို့စီးလာတဲ့ ပါဂျဲရိုးကားကလည်း ပျက်စီးတာရှိတယ်။ အတွင်းထဲက လူထိ၊ မထိတော့မသိရဘူး” ၎င်းက ပြောပါတယ်။

ပစ်ခတ်မှုအတွင်း ပျူစောထီးတွေထိခိုက်တာကြောင့် ယမန်နေ့ ညနေပိုင်းထိ စစ်ကောင်စီအဖွဲ့တွေဟာ ရွှေဘိုမြို့အဝင်အထွက်နေရာတွေမှာ ပိတ်ဆို့စစ်ဆေးခဲ့တယ်လို့ သိရပါတယ်။

မေခွန်ကျေးရွာအုပ်ချုပ်ရေးမှူးဖြစ်တဲ့ ပျုစောထီး ပေါသိန်းဟာ မြို့နယ်ပျူစောထီးခေါင်းဆောင်တဦးလည်း ဖြစ်ပြီး ကျေးရွာမှာ စစ်မှုထမ်းကြေးကောက်ခံတာ၊ မြေယာတွေသိမ်းဆည်းရောင်းစားတာတွေ လုပ်ဆောင်နေတယ်လို့ ရွှေဘိုမြို့နယ်ပကဖက ပြောပါတယ်။

မေ ၁၅ ရက်ကလည်း ရွှေဘိုမြို့နယ်၊ ညောင်ပင်သာ စိုက်ပျိုးရေးသိပ္ပံတက္ကသိုလ်နဲ့ ပန်းရံကျေးရွာသွား လမ်းပေါ်မှာ ဒုရဲအုပ်အပါအဝင် ၂ ဦးပစ်ခတ်ခံရပြီး သေဆုံးသွားတယ်လို့ သိရပါတယ်။

စာတည်း – ဟိန်းစံ

မြေလတ်အသံ၊ မေ ၂၅၊ ၂၀၂၅ ။

စစ်ကိုင်းတိုင်း၊ ရွှေဘိုခရိုင်အတွင်းရှိ ဒေသခံပြည်သူတွေကို ရွှေဘိုခရိုင်ပြည်သူ့ကာကွယ်ရေးတပ်ဖွဲ့ တပ်ရင်း ၄ တပ်ဖွဲ့ဝင်တွေက လေကြောင်းအန္တရာယ်နဲ့ ပတ်သက်တဲ့ အသိပညာပေးတာနဲ့ လေကြောင်းတိုက်ခိုက်မှု ကြုံလာချိန်မှာ လုပ်ဆောင်ရမယ့်အချက်တွေကို လက်တွေ့သရုပ်ပြဟောပြောမှု ပြုလုပ်ပေးခဲ့တယ်လို့ အမျိုးသားညီညွတ်ရေးအစိုးရ – NUG ကာကွယ်ရေးဝန်ကြီးဌာနက မေ ၂၅ ရက် ဒီကနေ့မှာ ထုတ်ပြန်ပါတယ်။

ရွှေဘိုခရိုင်အတွင်းက ကျေးရွာတွေကို စစ်ကောင်စီတပ်က လေကြောင်းကနေ မကြာခဏဗုံးကြဲတိုက်ခိုက်နေပြီး အခုမေလအတွင်းမှာပဲ ရွှေဘိုခရိုင်၊ ဝက်လက်မြို့နယ်အတွင်းက ကျေးရွာ ၆ ရွာထက်မနည်း လေကြောင်းတိုက်ခိုက်ခံရတာကြောင့် လူ ၁၁ ဦးသေဆုံးထားပါတယ်။

စစ်ကောင်စီတပ်ဟာ တော်လှန်ရေးတပ်တွေ စိုးမိုးထိန်းချုပ်ထားတဲ့ နယ်မြေတွေကို နေ့စဉ်နီးပါး လေကြောင်းကနေ ဗုံးကြဲတိုက်ခိုက်နေတာဖြစ်ပြီး အဆိုပါဗုံးကြဲတိုက်ခိုက်မှုတွေကို ကာကွယ်နိုင်ဖို့ ဒေသခံပြည်သူတွေအနေနဲ့ ဗုံးခိုကျင်းတွေ အသီးသီးတူးဖော်နေထိုင်နေရတာလည်း ဖြစ်ပါတယ်။