မန္တလေး၊ ဇူလိုင် ၂၅၊ ၂၀၂၅ ။

မန္တလေးမြို့၊ မဟာအောင်မြေမြို့နယ်၊ မန်းမြို့စျေးအနီး၊ ၃၉ လမ်း၊ ၈၄ – ၈၅ ကြား ရှိ ရွှေနန်းသုခရွှေဆိုင် ဓါးပြတိုက်ခံခဲ့ရတယ်လို့ ဒေသခံတွေထံက သိရပါတယ်။

ဇူလိုင် ၂၄ ရက် မနေ့ညနေ ၄ နာရီကျော်မှာ အဲ့ဒီရွှေဆိုင်ကို ကား ၁ စီးနဲ့ရောက်လာတဲ့ အမည်မသိလက်နက်ကိုင် ၆ ဦးလောက်က ဓားပြတိုက်ခဲ့ပြီး ရွှေဆိုင်လုံခြုံရေးဝန်ထမ်းအချို့ကို သေနတ်နဲ့ပစ်ခတ်ခဲ့တယ်လို့ ဆိုပါတယ်။

” ကျနော်တို့သိတာက ဓားပြတိုက်တာလို့ သိရတယ်။ ထိခိုက်တာက ဆိုင်ကဝန်ထမ်းတွေပဲ။ အပြန်အလှန်လည်း ပစ်ခတ်မှုဖြစ်သေးတယ်။ ဝန်ထမ်းတွေထိတာကတော့ စိုးရိမ်စရာတော့မရှိဘူး” လို့ ဖြစ်စဥ်ကိုသိထားတဲ့ မန္တလေးမြို့ခံတဦးက မြေလတ်အသံကို ပြောပါတယ်။

လက်နက်ကိုင်တွေက သေနတ်နဲ့ပစ်ခတ်ခဲ့လို့ ရွှေဆိုင်လုံခြုံရေးဝန်ထမ်း အသက် ၅၅ နှစ်အရွယ် ဦးဝေမျိုးညွန့်၊ အသက် ၂၄ နှစ်အရွယ် ကိုဇော်လင်းနိုင်တို့ လက်နဲ့ခြေထောက်တွေမှာ ကျည်ထိမှန်ဒဏ်ရာတွေရရှိခဲ့တယ်လို့ သိရပါတယ်။

ဆိုင်လုံခြုံရေးတွေကို ပစ်ခတ်ပြီးနောက် ဆိုင်အတွင်းက ရွှေနဲ့စိန်ထည်အများအပြားကို ဓားပြတိုက်သူတွေက ယူဆောင်သွားပြီး ဆုံးရှုံးမှုတန်ဖိုးအသေးစိတ်ကိုတော့ မသိရကြောင်း အထက်ပါမြို့ခံက ပြောပါတယ်။

ရွှေဆိုင်ဓားပြတိုက်ပြီးပြန်အထွက်မှာ ဓားပြတိုက်တဲ့အဖွဲ့တွေနဲ့ ရွှေဆိုင်အနီး မန်းမြို့မစျေးတာဝန်ကျစစ်ကောင်စီလက်အောက်ရဲတပ်ဖွဲ့တွေ အပြန်အလှန်ပစ်ခတ်မှုဖြစ်ခဲ့ပေမယ့် ဓားပြတိုက်သူတွေ ထွက်ပြေးလွတ်မြောက်သွားတယ်လို့ သိရပါတယ်။

ဧပြီ ၂၉ ရက်ကလည်း ချမ်းမြသာစည်မြို့နယ်၊ အောင်ပင်လယ်ရပ်ကွက်၊ ၁၀၃×၁၀၄ လမ်းကြား၊ ၅၅ လမ်းပေါ်ရှိ “ရွှေဇာမဏီ”ရွှေဆိုင်ဓါးပြတိုက်ခံရပြီး ရွှေ ၂၀ ကျပ်သားကျော်ပါသွားတယ်လို့ သိရပါတယ်။

စာတည်း – ဟိန်းစံ

မြင်းမူ၊ မေ ၃၊ ၂၀၂၅။

စစ်ကိုင်းတိုင်း၊ မြင်းမူမြို့က ရွှေဧကရာဇ်ရွှေဆိုင်ပိုင်ရှင်နဲ့ ဆိုင်လုပ်သားတချို့ ယူဆောင်လာတဲ့ ရွှေထည်ပစ္စည်းနဲ့ငွေသားတွေ ဓားပြတိုက်ခံခဲ့ရပြီး အဆိုပါဓားပြမှုမှာ ပါဝင်သူ Local ကာကွယ်ရေးတပ်ဖွဲ့ဝင် ၉ ဦးကို သက်သေခံပစ္စည်းတွေနဲ့အတူ ဖမ်းမိထားတယ်လို့ မြင်းမူ မြို့နယ်ပကဖအဖွဲ့ ထံက သိရပါတယ်။

မေ ၁ ရက် မနက် ၇ နာရီခန့်က မာဃရပ်ကွက်နေ၊ ရွှေဧကရာဇ်ရွှေလုပ်ငန်းပိုင်ရှင် ဦးနိုင်စိုးဟာ နေအိမ်ကနေ မြို့မစျေးရှေ့ရှိ ၎င်းပိုင်ရွှေဆိုင်ကို ရွှေထည်နဲ့ငွေသားတွေယူဆောင်ကာ ဆိုင်ဖွင့်ဖို့သွားရောက်ချိန် နေအိမ်နဲ့ ၁ ဖာလုံခန့်အကွာအရောက်မှာ လက်နက်ကိုင်ထားသူ လူ ၅ ဦးက ဓားပြတိုက်ခဲ့တာပါ။

ဓားပြတိုက်မှုမှာ ပူးပေါင်းပါဝင်သူ ၉ ဦးကို မေ ၁ ရက် ညနေပိုင်းမှာပဲ ငါးဇွန်မြို့နယ်နဲ့ မြင်းမူမြို့နယ် ကြားတနေရာမှာ သက်သေခံပစ္စည်းတွေအပါအဝင် လက်နက်အချို့နဲ့အတူဖမ်းမိခဲ့တာလို့ ဆိုပါတယ်။

” ဖမ်းမိထားသူတွေက တော်လှန်ရေးလုပ်တဲ့အဖွဲ့တွေကဘဲ။ သူတို့က မှားယွင်းပြီးလုပ်မိ သွားတယ်လို့ ထင်ပါတယ်။ တော်လှန်ရေးအစကတည်းက ပါသူတွေလည်းပါတယ်။ နောက်မှ ပါဝင်လာသူတွေလည်းပါတယ်။ အဖွဲ့နာမည်တော့ရှိတယ်။ လောလောဆယ်တော့ ထုတ်ပြန်လို့ မရသေးဘူး”လို့ မြင်းမူမြို့နယ်ပကဖဒုတာဝန်ခံက မြေလတ်အသံကို ပြောပါတယ်။

ဓားပြတိုက်ခံရမှုမှာ ရွှေထည်ပစ္စည်း ၅ ပိဿာခန့်နဲ့ ငွေကျပ် သိန်း ၈၀၀ ခန့် ဆုံးရှုံးသွားကြောင်းဒေသခံတွေကပြောဆိုပေမယ့် အဆိုပါအချက်ကို မြေလတ်အသံက သီးခြားအတည်မပြုနိုင်ပါဘူး။

ဓါးပြတိုက်သူတွေကို ဖမ်းမိချိန်မှာ လက်ဆွဲအိတ်၊ ကော်ပုံးတွေနဲ့ ထည့်ထားတဲ့ ပိုက်ဆံ၊ ရွှေထည်တွေကို သိမ်းဆည်းရမိခဲ့ကာ သိမ်းဆည်းရရှိတဲ့ ရွှေထည်နဲ့ ငွေသားတွေအားလုံးကို ပိုင်ရှင်ထံ ပြန်လည်ပေးအပ်လိုက်ပြီဖြစ်တယ်လို့ အထက်ပါဒုတာဝန်ခံက ပြောပါတယ်။

ဖမ်းမိထားတဲ့ ဓားပြမှုကျူးလွန်သူတွေကိုတော့ လတ်တလောမှာစစ်ဆေးနေဆဲဖြစ်ပြီး အမျိုးသားညီညွတ်ရေးအစိုးရ NUG ပြည်ထဲရေးဝန်ကြီးဌာနကိုတော့တင်ပြထားတယ် လို့ ဆိုပါတယ်။

စာတည်း – ဟိန်းစံ

မုံရွာ၊ မတ် ၂၁၊ ၂၀၂၃။

စစ်ကိုင်းတိုင်း၊ မုံရွာမြို့လည်ခေါင်က ရွှေဆိုင်တခု မတ်လ ၂၁ ရက် ဒီကနေ့ နေ့လယ် ၁၂ နာရီကျော်လောက်မှာ ဓားပြတိုက်ခံခဲ့ရတယ်လို့ မြို့ခံတွေဆီက သိရပါတယ်။

အောင်မင်္ဂလာရပ်ကွက်၊ ဗိုလ်ချုပ်လမ်းမပေါ်မှာရှိတဲ့ ပေါ်ဦးရွှေဆိုင်ဓားပြတိုက်ခံခဲ့ရတာဖြစ်ပြီး လက်နက်တွေကိုင်ဆောင်ထားတဲ့ အမည်မသိလူ ၅ ဦးက ကားတစီးနဲ့ရောက်ရှိလာကာ ရွှေဆိုင်အတွင်းဝင်ရောက်ဓားပြတိုက်သွားတာလို့ မုံရွာမြို့ခံအမျိုးသမီးတဦးက မြေလတ်အသံကို ပြောပါတယ်။

“မတ်တူးကားနဲ့လာတာ၊ ကားနံပါတ်တော့မပါဘူး။ အဝင်အထွက် ၅ မိနစ်လောက်ပဲလုပ်တယ်ပြီးတော့ ရွှေဆိုင်ထဲက နေပြန်ထွက်သွားတယ်။ မျက်နှာတွေကိုတော့ အဝတ်နဲ့အုပ်ထားတယ်။ အသက် အရွယ်တွေက ငယ်ငယ်လေးတွေပဲ။ ပေါ်ဦးရွှေဆိုင်နားမှာ ဝိန့်စိန်ရွှေဆိုင်နဲ့ ဟောင်ကောင်ဖုန်းဆိုင်တွေလည်းရှိတယ် သူတို့ကိုတော့ ဘာမှမလုပ်သွားဘူး” လို့ ပြောပါတယ်။

မုံရွာမြို့ကို စစ်ခေါင်းဆောင်ဗိုလ်ချုပ်မှူးကြီး မင်းအောင်လှိုင်ရောက်ရှိနေတဲ့ မတ်လ ၁၉ ရက်နေ့ကစလို့ ခရီးစဉ်တလျှောက် မြို့အနှံ့လုံခြုံရေးတင်းကြပ်ထားတာဖြစ်ပြီး အခုရက်ပိုင်းမှာ မြို့တွင်းစစ်ဆေးတာတွေလည်း ပိုမိုလုပ်ဆောင်နေတယ်လို့ မြို့ခံတွေက ပြောပါတယ်။

ပေါ်ဦးရွှေဆိုင်ဓားပြတိုက်ခံရတာကြောင့် ရွှေဆိုင်အတွင်းခင်းထားတဲ့ ရွှေထည်အားလုံးနီးပါးပါသွားတယ်လို့ ဒေသခံတွေကပြောဆိုပေမယ့် ဆုံးရှုံးမှုတန်ဖိုးကို မြေလတ်အသံအနေနဲ့သီးခြားအတည်မပြုနိုင်သေးပါဘူး။

ပြီးခဲ့တဲ့နှစ်စက်တင်ဘာလထဲမှာလည်း မုံရွာမြို့လည်ခေါင် သိန်းတရာရွှေဆိုင်ဓားပြတိုက်ခံခဲ့ရပြီး ကျပ်သိန်းသုံးသောင်းကျော်ရှိတဲ့ ရွှေထည်ပစ္စည်းတွေဆုံးရှုံးသွားတယ်လို့သိရပါတယ်။

စာတည်း- ရင်ငြိမ်း

ပခုက္ကူ၊ မတ် ၁၅၊ ၂၀၂၃။

မကွေးတိုင်းဒေသကြီး၊ ပခုက္ကူမြို့က နန်းမြတ်တော်ဝင် စိန်ရွှေရတနာဆိုင် ဓားပြတိုက်ခံရပြီး ကျပ်သိန်း ၂၀ ခန့်တန်ဖိုးရှိ ရွှေထည်နဲ့ဖုန်းတွေကို ယူဆောင်သွားတာခံခဲ့ရတယ်လို့ သိရပါတယ်။

ယမန်နေ့ မတ်လ ၁၄ ရက်နေ့ ညနေ ၃ နာရီကျော်ခန့်မှာ အဲ့ဒီ စိန်ရွှေရတနာနဲ့ရွှေပန်းတိမ်ဆိုင်ကို သေနတ်နဲ့ဓားကိုင်ထားသူ ၄ ဦးခန့်က ဆိုင်ကယ်နဲ့ရောက်လာပြီး သေနတ်နဲ့ ခြိမ်းခြောက် ဓားပြတိုက်သွားတယ်လို့ ဒေသခံတဦးက ပြောပါတယ်။

“ဓားပြတိုက်ခံရတာက ဟုတ်ပါတယ်။ အများကြီး ပါသွားတာတော့ မဟုတ်ဘူး။ ကျန်တာက မိသားစုဝင်တွေလည်း စိုးရိမ်နေကြတယ်။ ဖမ်းခေါ်သွားခံရတဲ့ အလုပ်သမား ၁ ယောက်လည်း ပြန်ရောက်လာပြီလို့ သိရတယ်။ လမ်းမှာပဲ ပြန်လွှတ်ပေးလိုက်တာ” လို့ ပြောပါတယ်။

ရွှေဆိုင်ကနေ လက်စွပ် ၃ ကွင်း၊ လက်ကောက် ၁ ကွင်း၊ ဖုန်း ၁ လုံးတို့ကို ယူဆောင်သွားခဲ့တာဖြစ်လို့ သိရပါတယ်။ ဖြစ်စဉ်ဖြစ်ပွားပြီးနောက်မှာတော့ စစ်ကောင်စီဘက်က မြို့တွင်းလမ်းတွေကို ပိတ်ဆို့စစ်ဆေးခဲ့သလို မြို့အဝင်အထွက်နေရာတွေကိုပါ ပိတ်ဆို့ စစ်ဆေးတာလုပ်ခဲ့ပေမယ့် ဖမ်းဆီးရမိတာ မရှိဘူးလို့ ဆိုပါတယ်။

ဖေဖော်ဝါရီလ ၆ ရက်နေ့ကလည်း ပခုက္ကူမြို့၊ အမှတ်(၁၀)ရပ်ကွက်၊ ရန်အောင်လမ်းနေ ဦးအောင်မိုးဝင်း နေအိမ် ဓားပြတိုက်ခံရပြီး ဦးအောင်မိုးဝင်းကို ဖမ်းဆီးသွားတဲ့အပြင် ငွေကျပ် သိန်း ၅၀ ကျော်နဲ့ ဖုန်းတွေကိုပါ ယူဆောင်သွားတယ်လို့ သိရပါတယ်။

စစ်ကိုင်း၊ ဖေဖော်ဝါရီ ၈၊ ၂၀၂၃။

စစ်ကိုင်းတိုင်း၊ ကလေးမြို့၊ ညောင်ပင်သာရပ်ကွက်မှာရှိတဲ့ ကလျာဏရွှေပန်းထိမ်ဆိုင်က ရွှေပစ္စည်းအချို့ကို သေနတ်ကိုင်ဆောင်ထားတဲ့ အမျိုးသားတဦးက ဖေဖော်ဝါရီလ ၈ ရက် ဒီမနက် ၁၁ နာရီလောက်မှာ လုယူထွက်ပြေးသွားခဲ့တယ်လို့ သိရပါတယ်။

အဆိုပါ အမျိုးသားမှာ အသက် ၃၀ ဝန်းကျင်ရှိပြီး၊ သူဟာ ဆိုင်ထဲဝင်လာကာ ရွှေဝယ်ယူမယ်လို့ ပြောဆိုပြီးနောက် ပြပေးတဲ့ရွှေထည်ပစ္စည်းတွေကို လုပြေးသွားတာလို့ မျက်မြင်တွေရဲ့ ပြောဆိုချက်ကို ကိုးကားပြီး ကလေးမြို့ မြို့ပြစီမံချက် UG တပ်ရင်း ဦးဆောင်သူ ကိုရန်မင်းနိုင်က ပြောပါတယ်။

“သူက ထွက်ပြေးတဲ့အခါ အနီးအနားပြည်သူတွေက လိုက်ဖမ်းကြတော့ လွယ်ထားတဲ့အိတ်ကနေ သေနတ်ကို ထုတ်ပြတော့ ဆက်မလိုက် ကြတော့ဘူး။ ဒါပေမဲ့ သူထွက်ပြေးတဲ့အချိန်မှာ ယူသွားတဲ့ရွှေပစ္စည်း ကျကျန်ခဲ့တယ်။ ပြီးတော့ အိတ်ထဲကကျည်ဆံတထောင့်ပါ ကျကျန်ခဲ့တယ်။ ဓားပြက ဘာမှမရလိုက်ဘဲ ရဲစခန်းဘက်ကို ထွက်ပြေးသွားတယ်” လို့ ဆိုပါတယ်။

အဆိုပါအမျိုးသား ဆိုင်ကိုလာချိန်က စီးလာတဲ့ 125 အမျိုးအစား ဆိုင်ကယ်လည်း ဆိုင်ရှေ့မှာ ကျန်ခဲ့ပြီး၊ ဆိုင်ကယ်နဲ့ ကျကျန်ခဲ့တဲ့ ကျည်ဆံတထောင့်တို့ကို မြို့မရဲစခန်းက ရဲတပ်သားတွေ လာရောက်သိမ်းယူသွားခဲ့တယ်လို့ ကိုရန်မင်းနိုင်က ဆက်ပြောပါတယ်။

“ကလျာဏဆိုင်ကနေ အရှေ့ဘက်ကိုသွားရင် ပြည်သူနေအိမ်တွေနဲ့ ရဲစခန်း၊ ခရိုင်စုပေါင်းရုံး၊ ဒလန်၊ ပျူပေါတဲ့ ဘဲအင်းရပ်ကွက်၊ ပျူစောထီးရွာ တောင်အူပြင်သာရွာဘက်ကို ဓားပြက ထွက်ပြေးသွားတာ” လို့ ဆိုပါတယ်။

ပြီးခဲ့တဲ့ ၂၀၂၂ ခုနှစ် ဇူလိုင်လမှာလည်း ကလေးမြို့၊ အောင်သစ္စာရပ်ကွက်၊ နယ်မြေ ၃ မှာ သား အမိနှစ်ဦးတည်းနေတဲ့အိမ်ကို မျက်နှာဖုံးနဲ့ သေနတ်ကိုင်ဆောင်ထားတဲ့ အမျိုးသား ၆ ဦးက ဓားပြတိုက်ပြီး ရွှေ ၅ ကျပ်သားနဲ့ ပိုက်ဆံ သိန်းငါးဆယ်ကို ယူဆောင်သွားခဲ့တယ်လို့ သိရပါတယ်။

စစ်ကိုင်း၊ ဒီဇင်ဘာ ၂၁၊ ၂၀၂၂။

စစ်ကိုင်းတိုင်းဒေသကြီး၊ မုံရွာမြို့၊ ဗိုလ်ချုပ်လမ်းပေါ်ရှိ ​ရွှေမုံရွာ ရတနာရွှေဆိုင်ဓားပြတိုက်ခံရပြီး သေနတ်နဲ့ပစ်ခံရလို့ ဆိုင်ရှင်အမျိုးသား ဒဏ်ရာရသွားတယ်လို့ သိရပါတယ်။

ဒီဇင်ဘာလ ၂၀ ရက်နေ့၊ နေ့လည် ၂ နာရီကျော်ခန့်မှာ ရွှေမုံရွာ ရတနာရွှေဆိုင်ရှေ့ကို ကားတစီးနဲ့ အမျိုးသား ၃ ဦးရောက်လာပြီး ရွှေဆိုင်ကိုသေနတ်နဲ့ပစ်ခတ်ခဲ့တယ်လို့ ဒေသခံတဦးက ပြောပါတယ်။

“လာတာက လူလတ်ပိုင်းအမျိုးသား ၃ ယောက်လို့ သိရတယ်။ ရွှေဆိုင်ကို ပစ်ခတ်ပြီးမှ ရွှေလုသွားတာ။ အများကြီးတော့ မပါသွားဘူး။ သူတို့သေနတ်နဲ့ပစ်လို့ ဆိုင်ရှင်အမျိုးသားတော့ ထိသွားတယ်။ ဆိုင်မှာက လင်မယား နှစ်ယောက်တည်းရှိကြတယ်လို့ သိရတယ်” လို့ ပြောပါတယ်။

သေနတ်နဲ့ပစ်ခံရလို့ ဆိုင်ရှင်အမျိုးသားမှာ တင်ပါးဆုံ၊ ခြေသလုံးနဲ့ ​ခြေကျင်းဝတ်တွေမှာ သေနတ်ဒဏ်ရာ ၅ ချက်ရသွားပြီး စိုးရိမ်ရလို့ မုံရွာပြည်သူ့ဆေးရုံကို ပို့ထားရတယ်လို့ ဆိုပါတယ်။

သေနတ်နဲ့ပစ်ခတ်ပြီးနောက် ဓားပြတိုက်သူတွေဟာ ဆိုင်ကနေ ကမန်းကတန်း ပြန်ထွက်သွားရလို့ ၁ မတ်သားခန့်ရှိ ရွှေလက်စွပ်တကွင်းသာ ယူသွားနိုင်တယ်လို့ သိရပါတယ်။

မြို့လယ်ခေါင်မှာ လူကိုသေနတ်နဲ့ပစ်ခတ်ပြီး ရွှေလုယူသွားသူတွေကို မဖမ်းလိုက်နိုင်ဘဲ လွတ်မြောက်သွားတယ်လို့ ဆိုပါတယ်။

စက်တင်ဘာလ ၁၁ ရက်နေ့ကလည်း မုံရွာမြို့၊ ဘုရားကြီးရပ်ကွက်၊ ဗိုလ်ချုပ်အောင်ဆန်းလမ်းနဲ့တရုတ်တန်းလမ်းထောင်မှာရှိတဲ့ သိန်းတရာရွှေဆိုင် ဓားမြတိုက်ခံရလို့ ကျပ်သိန်းပေါင်း ၃ သောင်းကျော်တန်ဖိုးရှိ ရွှေထည်တွေပါသွားမှုမှာလည်း လက်ရှိအချိန်ထိ ကျူးလွန်သူတွေကို ဖမ်းဆီးရမိခြင်းမရှိသေးဘူးလို့ သိရပါတယ်။