တမူး၊ မတ် ၂၄၊ ၂၀၂၃။

စစ်ကိုင်းတိုင်း(အထက်ပိုင်း)၊ တမူးမြို့နယ်၊ စစ်ကောင်စီလက်အောက် ဘုက္ကန်ရွာနယ်မြေရဲစခန်းကို မတ်လ ၂၄ ရက် ဒီကနေ့ မနက်အစောပိုင်းမှာ တမူးအမျိုးသားလွတ်မြောက်ရေးတပ်တော်-NLA က ဝင်ရောက်စီးနင်း တိုက်ခိုက်ခဲ့တယ်လို့ သိရပါတယ်။

ရဲစခန်းစီးနင်းစဉ်မှာ စခန်းအတွင်းမှာရှိတဲ့ စစ်ကောင်စီလက်အောက် ရဲတပ်ဖွဲ့ဝင်တွေက လက်နက်ချအညံ့ခံတာကြောင့် ဘုက္ကန်နယ်မြေရဲစခန်းမှူးအပါ ရဲ ၆ ဦး အရှင်ဖမ်းမိခဲ့သလို စခန်းမှာရှိတဲ့ လက်နက်တွေလည်း သိမ်းဆည်းနိုင်ခဲ့တယ်လို့ တမူး PDF တပ်ရင်းဌာနချုပ်တာဝန်ရှိသူတဦးက မြေလတ်အသံကို ပြောပါတယ်။

“မနက်မိုးမလင်းခင် ဝင်စီးတာ၊ စခန်းသိမ်းနိုင်တယ်။ ရဲ ၂ ယောက် ထွက်ပြေးသွားတယ်။ စခန်းမှူးအပါ ၆ ယောက် အဖမ်းခံတယ်။ သေနတ်တွေ သိမ်းဆည်းရှိခဲ့တယ်။ ဖမ်းမိတဲ့ရဲတွေရဲ့ အဆင့်၊ နာမည်တွေ၊ အသက်တွေ အသေးစိတ်ကိုတော့ မသိရသေးဘူး” လို့ သူက ပြောပါတယ်။

ရဲစခန်းစီးနင်းသိမ်းပိုက်မှုမှာ ရဲတပ်သားတွေ ကိုင်ဆောင်တဲ့ G-3 ၅ လက်၊ အူဇီ ၂ လက်၊ ကာဘိုင် ၂ လက်၊ ခါးချိုးတတောင့်ထိုးတူမီးတွေအပြင် ကျည်ဆံအများအပြား၊ စကားပြောစက်နဲ့ တခြားစစ်ဖက်ဆိုင်ရာပစ္စည်းတွေကိုလည်း သိမ်းဆည်းရရှိခဲ့ကာ ရဲစခန်းကိုလည်း မီးရှို့ဖျက်ဆီးနိုင်ခဲ့တယ်လို့ ဆိုပါတယ်။

တမူးအမျိုးသားလွတ်မြောက်ရေးတပ်တော်- National Liberation Armyဟာ ယခင်က တမူး PDF တပ်ရင်း-၃ အဖြစ် လှုပ်ရှားခဲ့တာဖြစ်ပြီး မတ်လ ၅ရက်နေ့ကစတင်ကာ N.L.A အဖြစ် အမည်ပြောင်းလဲဖွဲ့စည်းခဲ့တာဖြစ်ကာ ဝောာ်လှန်ရေးကိုအရှိန်အဟုန်မြှင့်ပြီး လုပ်ဆောင်သွားမှာ ဖြစ်တယ်လို့ သိရပါတယ်။

စာတည်း- ရင်ငြိမ်း

ပေါင်းတည်၊ မတ် ၁၃၊ ၂၀၂၃။

ပဲခူးတိုင်း(အနောက်ပိုင်း) ပြည်ခရိုင်၊ ပေါင်းတည်မြို့ ပန်းခြံမှာ ကိုဖုန်းမော်နေ့ အမှတ်တရ လူထုလှုပ်ရှားမှုကို မတ်လ ၁၃ ရက် ဒီကနေ့မနက် ၁၁ နာရီမှာ ပြုလုပ်ခဲ့ကြတယ်လို့ သိရပါတယ်။

ပေါင်းတည်၊ ရန်ကုန် – ပြည်လမ်းပေါ်က ရဲစခန်းရှေ့ ငြိမ်းချမ်းရွှေတည် ပြည်သူ့ပန်းခြံထဲမှာ နှင်းဆီနီ လူထုလူပ်ရှားမူအဖြစ် ပြုလုပ်တာဖြစ်ပြီး စစ်အာဏာရှင်စနစ်ဆန့်ကျင်ရေး၊ ဒီမိုကရေစီရရှိရေး၊ ၂၀၀၈ ဖွဲ့စည်းပုံဖျက်သိမ်းရေး၊ ငါတို့အစိုးရ ငါတို့ပြန်ပေး၊ ဖက်ဒရယ်ဒီမိုကရေစီဖော်ဆောင်ရေး စာတန်းတွေပါတဲ့ တီရှပ်အင်္ကျီတွေ ဝေငှခဲ့ကြသလို ပန်းခြံထဲက ခုံတွေနဲ့ အလှပန်းပင်တွေပေါ်မှာလည်း ချိတ်ဆွဲခဲ့တာ ဖြစ်ပါတယ်။

စက်မှုကျောင်းသား ကိုဖုန်းမော် အပါအဝင် ခေတ်အဆက်ဆက်နဲ့ နွေဦးတော်လှန်ရေးအတွင်း ဒီမိုကရေစီတိုက်ပွဲမှာ ကျဆုံးခဲ့ရတဲ့ ရဟန်းရှင်လူကျောင်းသားပြည်သူအပေါင်းတို့ကို အောက်မေ့ဂုဏ်ပြုတဲ့အနေနဲ့ ၇/အဖွဲ့က ပြုလုပ်ခဲ့တာလို့ သိရပါတယ်။

စာတည်း – 007

စဉ့်ကူး၊ ဖေဖော်ဝါရီ ၂၃၊ ၂၀၂၃။

မန္တလေးတိုင်း၊ စဉ့်ကူးမြို့နယ်၊ နွယ်ရုံနယ်‌မြေ ရဲစခန်းအတွင်းကို ဖေဖော်ဝါရီလ ၂၂ ရက် မနေ့နေ့လည် ၂ နာရီလောက်မှာ ဒရုန်းနဲ့ ဗုံးကြဲတိုက်ခိုက်ခဲ့တယ်လို့ ဗိုလ်လင်းယုန်အဖွဲ့ထံက သိရပါတယ်။

ရဲစခန်းအတွင်း ဒရုန်းနဲ့ ၂ ကြိမ် ဗုံးကြဲတိုက်ခိုက်ရာမှာ ရဲစခန်းအဆောက်အဦးအတွင်းကို ကျရောက်ပေါက်ကွဲခဲ့လို့ ရဲတပ်ဖွဲ့ဝင်တွေဘက်က လူနဲ့အဆောက်အဦးတွေ ထိခိုက်သေဆုံး၊ ဒဏ်ရာရတွေရှိခဲ့ပြီး စခန်းအတွင်းကနေ ပြန်လည် ပစ်ခတ်မှုတွေ ရှိခဲ့တယ်လို့ ဆိုပါတယ်။

“အားလုံး ၆ လုံး ကြဲချတာ၊ အဆောက်အဦးအတွင်းထဲတွေကို ကျတယ်။ ပထမ ၁ လုံး ၂ လုံး စကြဲတော့ ရဲစခန်းထဲကနေ ဒီကောင်တွေ ဘေးပတ်ဝန်းကျင်တွေကို အချက် ၂၀ လောက် ရမ်းသမ်းပစ်တယ်။ ထိခိုက်မှုက ရခ ၃ ကောင်‌သေပြီး ၂ ကောင် ပြင်းထန်ဒဏ်ရာနဲ့ ဆေးရုံသို့ပို့လိုက် ဆိုတာ စောင့်ကြည့်ရဲဘော်တွေက ပြန်ပြောလို့ သိရတယ်” လို့ အဖွဲ့ ခေါင်းဆောင် ဗိုလ်လင်းယုန်က မြေလတ်အသံကို ပြောပါတယ်။

အဲ့ဒီတိုက်ခိုက်မှုကို ဗိုလ်ကောင်းကင်တပ်ဖွဲ့ (ပြင်ဦးလွင်ခရိုင် ပ.က.ဖ)၊ ဗိုလ်လင်းယုန်တပ် ဖွဲ့ (ပြင်ဦးလွင်ခရိုင် ပ.က.ဖ)၊ စဉ့်ကူးမြို့နယ် (ပ.က.ဖ)၊ ဧရာဝတီပျံလွှား၊ Sky Hero (Madaya) ARDF တော်လှန်ရေးအင်အားစု၊ Peacock Warrior Force စတဲ့ တော်လှန်ရေးတပ်ဖွဲ့တွေပူးပေါင်းလုပ်ဆောင်ခဲ့တာ ဖြစ်တယ်လို့ သိရပါတယ်။

ဇန်နဝါရီလ ၅ ရက်နေ့ကလည်း သပိတ်ကျင်းမြို့နယ်ထဲက ချောင်းကြီးနယ်မြေ ရဲစခန်းကို ဗိုလ်လင်းယုန်အဖွဲ့နဲ့ ပူးပေါင်းမဟာမိတ်တပ်ဖွဲ့တွေ သွားရောက်တိုက်ခိုက်ခဲ့လို့ ရဲတပ်ဖွဲ့ဝင် ၅ ဦး သေဆုံးခဲ့တယ်လို့ ထုတ်ပြန်ထားပါတယ်။

စစ်ကိုင်း၊ ဖေဖော်ဝါရီ ၉၊ ၂၀၂၃။

စစ်ကိုင်းတိုင်း ၊ ပုလဲမြို့နယ်၊ ပုလဲမြို့မရဲစခန်းကို ဒေသကာကွယ်ရေးပူးပေါင်းတပ်ဖွဲ့တွေက လက်နက်ကြီးတွေနဲ့ သွားရောက် ပစ်ခတ်ခဲ့တယ်လို့ တပ်ဖွဲ့ဝင်တွေထံက သိရပါတယ်။

ဖေဖော်ဝါရီ ၈ ရက် မနေ့က ည ၁၀ နာရီလောက်မှာ မြေလတ်ဒေသပြောက်ကျားတပ်ဖွဲ့ – MRG ပူးပေါင်းတပ်ဖွဲ့က ၆၀(မမ) လက်နက်ကြီး ၂ ပြောင်းနဲ့ မီးလောင်ဗုံး ၁ ပြောင်းနဲ့ ပုလဲမြို့မ ရဲစခန်းထဲကို သွားရောက်ပစ်ခတ်ခဲ့တယ်လို့ ပုလဲတပ်ရင်း (၄) တပ်ခွဲ (၃)ရဲ့ တာဝန်ခံက ပြောပါတယ်။

“ရဲစခန်းထဲမှာက စစ်** အင်အား ၄၀ နီးပါး ရှိတယ်။ ကျတော်တို့က လက်နက်ကြီး သုံးဆိုင်းနဲ့သွားပစ်ခဲ့တယ်။ မီးလောင်ဗုံးသုံးလုံး နဲ့ပစ်တော့ တလုံးက မီးစွဲနေတယ်လို့ ပြောတယ်။ ထိခိုက်သေဆုံးမှုတွေကတော့ မကြားရသေးဘူး” လို့ ဆိုပါတယ်။

လက်နက်ကြီးတွေ ပစ်နေပြီး ၅ မိနစ်အကြာမှာ ပုလဲမြို့မရဲစခန်းကနေ လက်နက်ကြီး လက်နက်ငယ်တွေနဲ့ ပြန်လည်ပစ်ခတ်ခဲ့ပေမဲ့လည်း မိမိတို့ ဒေသကာကွယ်ရေး ပူးပေါင်းတပ်ဖွဲ့က အထိခိုက်မရှိ ပြန်လည်ဆုတ်ခွာနိုင်ခဲ့တယ်လို့ ဆိုပါတယ်။

အဲဒီတိုက်ခိုက်မှုကို မြေလတ်ဒေသပြောက်ကျားတပ်ဖွဲ့ – MRG ၊ ဒေါင်းနက်၊ အညာဒေါင်း၊ မုဆိုးလေးစတဲ့ မဟာမိတ်တပ်ပေါင်းစုက ပူးပေါင်းတိုက်ခိုက်ခဲ့ကြပါတယ်။

မြေလတ်ဒေသပြောက်ကျားတပ်ဖွဲ့အနေနဲ့ ပုလဲမြို့မရဲစခန်းကို သွားရောက်ပစ်ခတ်ခဲ့တာ အခုအကြိမ်နဲ့ဆို ၁၄ ကြိမ်ထက်မနည်းရှိနေပြီ ဖြစ်တယ်လို့လည်း အဲဒီတပ်ခွဲမှူးက ပြောပါတယ်။

စစ်ကိုင်း၊ ဒီဇင်ဘာ ၂၈၊ ၂၀၂၂။

စစ်ကိုင်းတိုင်း၊ အရာဝောာ်မြို့နယ်ထဲက စစ်ကောင်စီတပ်စခန်းနဲ့ ရဲစခန်းတွေပေါ်ကို ဒရုန်းအသုံးပြုပြီးတော့ ဖရဲသီးတွေကို ဆုငွေနဲ့အကျိုးခံစားခွင့်တွေ ပြန်လည်ချီးမြှင့်မယ့်အကြောင်းအရာတွေပါတဲ့ စာစောင်တွေကို ကျဲချခဲ့တယ်လို့ အရာတော်မြို့နယ်ပြည်သူ့ကာကွယ်ရေးအဖွဲ့ကတဆင့် သိရပါတယ်။

ဒီဇင်ဘာလ ၂၇ ရက်မနေ့က ညနေ ၅ နာရီခွဲလောက်မှာ အမျိုးသားညီညွတ်ရေးအစိုးရ – NUG ကာကွယ်ရေးဝန်ကြီးဌာနရဲ့ညွှန်ကြားချက်အတိုင်း ကြဲခဲ့တာလို့ အရာတော်မြို့နယ်ပြည်သူ့ကာကွယ်ရေးအဖွဲ့မှ ပြန်ကြားရေးတာဝန်ခံကပြောပါတယ်။

“အမြန်လုပ်ပြီးဆုတ်ခွာခဲ့ရတာမို့ အဓိကမြို့ပေါ်တဝိုက်ရယ်၊ သူတို့တပ်စွဲထားတဲ့ အဓိကနေရာတွေကို ကျနော်တို့ကျဲခဲ့တာပါ၊ ဒါနဲ့ဆို ၃ကြိမ်မြောက်ပါ၊ ဝန်ကြီးဌာနကနေ ပြည်သူ့ဘက်ကိုရပ်တည်လိုတဲ့စစ်သားတွေကို စည်းရုံးတဲ့စာတွေဖြန့်တာပါ”လို့ ပြောပါတယ်။

ပြီးခဲ့တဲ့နှစ် ဇွန်လပိုင်းကလည်း အရှေ့တပ်လို့ခေါ်တဲ့ အရာတော် စခတ ၁၀ ရဲ့အပေါ်မှာ အလားတူစာစောင်တွေကို ပထမဆုံးအကြိမ်ကျဲခဲ့ပြီး၊ ၂၀၂၂ခုနှစ် ဧပြီလပိုင်းလောက်ကလည်း ဝန်ကြီးဌာနရဲ့လမ်းညွှန်မှုနဲ့ ဒုတိယအကြိမ်လုပ်ဆောင်ခဲ့ကာ၊ ခုတခါနဲ့ဆို ၃ ကြိမ်မြောက်ရှိပြီလို့ ဆိုပါတယ်။

အဆိုပါ ပန်းဖလပ်စာစောင်ထဲမှာ အမာခံသတင်းပေး(ဖရဲသီး)လုပ်မယ်ဆိုရင် သတင်းအချက်အလက်ပေါ်မူတည်ပြီး ဆုငွေပြန်လည်ချီးမြှင့်မှာဖြစ်သလို ကာကွယ်ရေးဝန်ကြီးဌာနရဲ့ ကာကွယ်ပေးမှုအာမခံချက်ကိုလည်း ခံစားရမယ်ဆိုတဲ့အချက်တွေအပြင် တခြားအချက်များစွာလည်း ပါဝင်ပါသေးတယ်။