ယာဉ်တိုက်မှု

ရေတာရှည်၊ ဖေဖော်ဝါရီ ၅၊ ၂၀၂၆ ။

ပဲခူးတိုင်း၊ ရေတာရှည်မြို့နယ်အပိုင် ရန်ကုန်-မန္တလေးအမြန်လမ်းမိုင်တိုင် ၁၅၇/၇ အနီးမှာ ခရီးသည်တင်ကားနဲ့အိမ်စီးကားတိုက်မိပြီး ၁ ဦးသေဆုံးကာ ၃ ဦးဒဏ်ရာရခဲ့တယ်လို့ ကူညီဆောင်ရွက်ပေးခဲ့သူတွေထံကသိရပါတယ်။

ဖေဖော်ဝါရီ ၅ ရက်ဒီကနေ့မနက် ၂ နာရီကျော်မှာ နေပြည်တော်ကနေ ရန်ကုန်ဘက်ကိုဦးတည်မောင်းနှင်လာတဲ့ ခရီးသည်တင်ယာဥ်နဲ့ တဖက်ယာဥ်ကြောကနေ (U Turn) ဂငယ်ကွေ့ ကွေ့ပြီး လမ်းကူးလာတဲ့အိမ်စီးကားတို့ တိုက်မိခဲ့တာလို့ ဆိုပါတယ်။

” ခရီးသည်တင်ယာဥ်က လမ်းမှန်တယ်။ အိမ်စီးကားက (တဖက်ယာဥ်ကြောနေ) လမ်းဒီဘက်ချိုးမယ့်အခြေနေမှာ လမ်းမှန်နဲ့သွားတွေ့တာ။ အိမ်စီးကားဖင်ကိုတိုက်ပြီး စီယာတိုင်ကိုညာဘက်ဆွဲလိုက်တော့ လမ်းဘေးကာထားတဲ့တန်းတွေ သွား တိုက်မိသွားတာ။”လို့ ကူညီဆောင်ရွက်ပေးခဲ့သူတဦးက မြေလတ်အသံကို ပြောပါတယ်။

ယာဥ်တိုက်မှုကြောင့် အသက် ၅၀ ကျော်အရွယ် ခရီးသည်တင်ယာဥ်မောင်းအမျိုးသား နေရာမှာသေဆုံးပြီး ယာဥ်ပေါ်ပါ အသက် ၂၀ ကျော်အရွယ် ခရီးသည်အမျိုးသမီး ၃ ဦးဒဏ်ရာရခဲ့ကာ သေဆုံးထိခိုက်သူတွေကိုတော့ လူမှုကူညီရေးအသင်းတွေက တောင်ငူပြည်သူ့ဆေးရုံကို တင်ပို့ထားရတယ်လို့ သိရပါတယ်။

ဖေဖော်ဝါရီ ၄ ရက် မနက်ပိုင်းကလည်း ပျော်ဘွယ်မြို့နယ်၊ ပေပင်လေးကျေးရွာအနီး အမြန်လမ်းပေါ်မှာ ခရီးသည်တင်ယာဥ် ၁ စီး အင်ဂျင်အပူလွန်ကဲကာ မီးလောင်မှုဖြစ်ပွားခဲ့ပြီး ကား ၁ စီးလုံး ပျက်စီးဆုံးရှုံးခဲ့ပေမယ့် လူထိခိုက်တာမရှိဘူးလို့ သိရပါတယ်။

ဝေါ၊ ဇန်နဝါရီ ၈၊ ၂၀၂၆။

ပဲခူးတိုင်း၊ ဝေါမြို့နယ်၊ ရန်ကုန်- မော်လမြိုင်ပြည်ထောင်စုလမ်းမှာ ကုန်တင်ယာဥ်ကို အိမ်စီးယာဥ်က အနောက်ကဝင်တိုက်ခဲ့တာကြောင့် ၃ ဦးသေဆုံးခဲ့ပြီး အသက် ၁၀ နှစ်ကလေး ၁ ဦးသာ အသက်ရှင်ကျန်ရစ်တယ်လို့ ကူညီဆောင်ရွက်ပေးခဲ့သူတွေထံက သိရပါတယ်။

ဇန်နဝါရီ ၇ ရက် ယမန်နေ့ည ၁၁ နာရီကျော်မှာ ကားလမ်းမိုင်တိုင်အမှတ် ၆/၄ အနီးမှာ စက်ချို့ယွင်းတာကြောင့် ဝေါမြို့ဘက်ကို ဦးတည်ရပ်ထားတဲ့ ၂၂ ဘီးကုန်တင်ယာဥ်ကို လားရာတူကနေ မောင်းနှင်လာတဲ့ ပရိုဘောက်ယာဥ်က အနောက်ကဝင်တိုက်ခဲ့တာလို့ ဆိုပါတယ်။

” ပရိုဘောက်က နောက်ကနေဝင်တိုက်တာ။ ကုန်တင်ယာဥ်ဖင်ကို ဝင်တိုက်တာ။ ကားပေါ်မှာတော့ လူ ၄ ဦးပါတယ်”လို့ အခင်းဖြစ်စဥ်ကိုကူညီဆောင်ရွက်ပေးခဲ့သူတဦးက မြေလတ်အသံကို ပြောပါတယ်။

ယာဥ်တိုက်မှုကြောင့် ပရိုဘောက်ယာဥ်ပေါ်ပါ ရန်ကုန်တိုင်း၊ မြောက်ဒဂုံမြို့၊ ချမ်းမြေ့သာ ၁ လမ်းနေသူတွေဖြစ်တဲ့ အသက် ၄၃ နှစ် ကိုဇေယျာလင်း၊ ဇနီးဖြစ်သူ မတင်တင်လှိုင်နဲ့ အသက် ၄၀ အရွယ် အမျိုးသား ၁ ဦးတို့ အခင်းဖြစ်နေရာမှာပဲ သေဆုံးသွားခဲ့တယ်လို့ သိရပါတယ်။

နောက်ထပ်ပရိုဘောက်ယာဥ်ပေါ်ပါတဲ့ ကိုဇေယျာလင်းရဲ့သမီးဖြစ်သူ အသက် ၁၀ နှစ်အရွယ် မိန်းကလေးမှာ ဘယ်ဘက်နားထင်ပေါက်ပြဲ သွေးထွက်ဒဏ်ရာ၊ ရင်ဘတ်အောင့်ဒဏ်ရာတွေရရှိခဲ့ပြီး စိုးရိမ်ရတဲ့အခြေအနေရှိတာကြောင့် ဝေါမြို့နယ်ပြည်သူ့ဆေးရုံကို ပို့ဆောင်ကုသပေးထားရတယ်လို့ သိရပါတယ်။

ဒီဇင်ဘာ ၂၆ ရက်ကလည်း ပဲခူးတိုင်း၊ အုတ်တွင်းမြို့နယ်အပိုင်၊ ရန်ကုန်-မန္တလေး အမြန်လမ်းမှာ အိမ်စီးကားဘီးပေါက်ပြီး တိမ်းမှောက်လို့ ကားပေါ်ပါသူ ၇ ဦးဒဏ်ရာရတယ်လို့ သိရပါတယ်။

ပဲခူး၊ စက်တင်ဘာ ၂၁၊ ၂၀၂၅။

ပဲခူးတိုင်း၊ ပဲခူးမြို့နယ်၊ တဲကြီးကုန်းကျေးရွာအနီး မြို့ရှောင်လမ်းပေါ်မှာ ၆ ဘီးကားက လမ်းလုပ်သားတွေကို ဝင်တိုက်မိပြီး ၁ ဦးသေ ၂ ဦးဒဏ်ရာရတယ်လို့ ဒေသခံတွေဆီက သိရပါတယ်။

စက်တင်ဘာ ၂၀ ရက် ညနေ ၃ နာရီကျော်ခန့်မှာ ပဲခူးမြို့နေ ယာဉ်မောင်းဦးကျော်သူနဲ့ အမျိုးသား ၇ ဦးလိုက်ပါလာတဲ့ HINO RANGER ၆ ဘီးကားဟာ မိုင်တိုင်အမှတ် ၃၆/၁ နဲ့ ၃၆/၂ အကြား တံတား အမှတ် ၄/၈ အရောက်မှာ ရွှေသံလွင်ကုမ္ပဏီက လမ်းလုပ်သားတွေကိုဝင်တိုက်မိခဲ့တာလို့ ဆိုပါတယ်။

“မြို့ရှောင်လမ်းမှာ လမ်းပြင်နေတယ်။ ကားက စလစ်ဖြစ်ပြီးတော့ ထိုးချသွားတာ။ ကလေး ၂ ယောက် ထိသွားတယ်။ မျက်နှာ၊ လက်တွေ၊ ပေါင်တွေ ထိတဲ့သူထိကုန်တယ်”လို့ ကူညီဆောင်ရွက်ပေးခဲ့သူတဦးက ပြောပါတယ်။

ယာဥ်တိုက်မှုကြောင့် လမ်းလုပ်သားတွေဖြစ်တဲ့ အသက် ၂၀ ကျော်အရွယ် မိုးကိုကို၊ အာကာနဲ့ ယာဥ်ပေါ်ပါ အမျိုးသား ၁ ဦးစုစုပေါင်း ၃ ဦးထိခိုက်ဒဏ်ရာရသွားကာ ထိခိုက်ဒဏ်ရာရသူတွေကို ပဲခူးဆေးရုံ ပို့ဆောင်ဆေးကုသနေချိန် မိုးကိုကိုမှာ သေဆုံးသွားတယ်လို့ သိရပါတယ်။

ကားက လမ်းလုပ်သားတွေကိုတိုက်မိပြီးနောက် တံတားအနီးက ရေမြောင်းထဲကိုထိုးကျသွားပြီး ယာဥ်မောင်းဖြစ်သူ ဦးကျော်သူကိုတော့ ပဲခူးရဲစခန်းမှာ လူသေမှု ရာဇသတ်ကြီးပုဒ်မ ၃၀၄ နဲ့အမှုဖွင့်အရေးယူထားတယ်လို့ ဆိုပါတယ်။

ဩဂုတ် ၁၇ ရက်ကလည်း ပဲခူးမြို့နယ်အပိုင် ရန်ကုန်-မန္တလေး အမြန်လမ်းပေါ်မှာ ကုန်တင်ယာဥ် ၂ စီးတိုက်မိပြီး အမျိုးသား ၂ ဦးသေဆုံးခဲ့တယ်လို့ သိရပါတယ်။

စာတည်း – လင်း

ပဲခူး၊ ဩဂုတ် ၁၇၊ ၂၀၂၅ ။

ပဲခူးမြို့နယ်အပိုင် ရန်ကုန်-မန္တလေးအမြန်လမ်းမကြီး မိုင်တိုင်အမှတ်(၄၀/၀) နဲ့ (၄၀/၁) အကြားမှာ ကုန်တင်ယာဥ် ၂ စီးဆင့်တိုက်လို့ အမျိုးသား ၂ ဦးသေဆုံးခဲ့တယ်လို့ ကူညီမှုလုပ်ဆောင်ပေးခဲ့သူတွေထံက သိရပါတယ်။

ဩဂုတ် ၁၇ ရက် ဒီကနေ့မနက် ၂ နာရီခန့်မှာ ရန်ကုန်ဘက်ကနေ မန္တလေးဘက်ကို ကုန်ခြောက်တွေတင်ဆောင်မောင်းနှင်လာတဲ့ ၁၂ ဘီး ကုန်တင်ယာဥ်ဟာ အခင်းဖြစ်နေရာမှာ လားရာတူရှေ့မှ ကုန်တင်ယာဥ်ကို ဝင်တိုက်ခဲ့တာလို့ ဆိုပါတယ်။

” လူတယောက်က ကားတားလို့ ရှေ့ကုန်ကားကနှေးလိုက်တာကို နောက်ကားက ဝင်တိုက်မိတာ။ သေတာက ကားကို တားတဲ့သူသေတယ်။ နောက်ကုန်ကားက ယာဥ်မောင်းသေတယ်” လို့ ဖြစ်စဥ်ကိုကူညီဆောင်ရွက်ပေးခဲ့သူတဦးက မြေလတ်အသံကို ပြောပါတယ်။

ယာဥ်တိုက်မှုကြောင့် ၁၂ ဘီးကုန်တင်ယာဥ်မောင်းနှင်သူအပါ အသက် ၃၀ ကျော်အရွယ် အမျိုးသား ၂ ဦးနေရာမှာပဲ သေဆုံးသွားပြီး ရုပ်အလောင်းတွေကို ပဲခူးဆေးရုံကို ပို့ဆောင်ပေးခဲ့ရတယ်လို့ သိရပါတယ်။

ရန်ကုန်-မန္တလေးအမြန်လမ်းမကြီးဟာ မူလက ကုန်တင်ယာဥ်တွေ တက်ရောက်မောင်းနှင်ခွင့်မပြုထားပေမယ့် စစ်အာဏာသိမ်းပြီးနောက်ပိုင်း အမြန်လမ်းမပေါ်မှာလည်း ကုန်တင်ယာဥ်တွေ တက်ရောက်မောင်းနှင်လာကြတာပါ။

မေ ၉ ရက်ကလည်း ရေတာရှည်မြို့နဲ့ ကေတုမတီမြို့သစ်ကြား မြောက်နမ်ချွန်ကျေးရွာအနီး ရန်ကုန်-မန္တလေးလမ်းဟောင်းမှာ ဆီဘောက်ဆာ ၂ စီးတိုက်မိပြီး ၃ ဦးသေဆုံးကာ ၄ ဦးဒဏ်ရာရခဲ့တယ်လို့ သိရပါတယ်။

ကျောက်တံခါး၊ မတ် ၂၆၊ ၂၀၂၅ ။

ပဲခူးတိုင်း၊ ကျောက်တံခါးမြို့နယ်အပိုင်၊ ရန်ကုန်-မန္တလေးအမြန်လမ်းမှာ စစ်ကောင်စီလက်အောက်သစ်တောဝန်ထမ်းတွေ လိုက်ပါလာတဲ့ကားက ခရီးသည်တင်ကားကိုဝင်တိုက်လို့ ၂ ဦးမှာ ပြင်းထန်ဒဏ်ရာတွေရခဲ့တယ်လို့ ဒေသခံတွေထံက သိရပါတယ်။

မတ် ၂၅ ရက် မနေ့မနက် ၄ နာရီခန့်မှာ အမြန်လမ်းမိုင်တိုင်အမှတ် ၈၅/၁ အနီး ကားဘီးပေါက်လို့ ရပ်ထားတဲ့ခရီးသည်တင်ယာဉ်ကို သစ်တောဝန်ထမ်းတွေလိုက်ပါလာပြီး ရန်ကုန်ကနေ နေပြည်တော်ဘက်ကို ဦးတည်မောင်းနှင်လာတဲ့ Toyota Hilux Revo အမျိုးအစားအဖြူရောင်ယာဉ်က ဝင်တိုက်မိခဲ့တာလို့ဆိုပါတယ်။

” သစ်တောယာ​ဉ်မောင်းက အိပ်ငိုက်ပြီးတော့ ရပ်ထားတဲ့ခရီးသည်တင်ယာဉ်ကို နောက်ကနေ ဝင်တိုက်တာ။ သစ်တောဝန်ထမ်းက ၄ ယောက်ပါတာ။ ၂ ယောက်က စိုးရိမ်ရတယ်။”လို့ အခင်းဖြစ်နေရာကိုရောက်ရှိခဲ့တဲ့ ဒေသခံတဦးက မြေလတ်အသံကို ပြောပါတယ်။

ယာဉ်တိုက်မှုကြောင့် စစ်ကောင်စီလက်အောက် ဧရာဝတီတိုင်း၊ ဟင်္သာတခရိုင်သစ်တောဦးစီးဌာနခရိုင်မှူး (လက်ထောက်ညွှန်ကြားရေးမှူး) ဦးမင်းနိုင်၊ တောခေါင်း ကိုစိုင်းလင်းကျော်တို့မှာ ပြင်းထန်ဒဏ်ရာ(စိုးရိမ်ရ)ရရှိပြီး ကျန်သစ်တောဝန်ထမ်း ၂ ဦးမှာ မစိုးရိမ်ရဒဏ်ရာရသွားတယ်လို့ ဆိုပါတယ်။

ထိခိုက်ဒဏ်ရာရသူတွေကိုတော့ အမြန်လမ်းမီးသတ်နဲ့ဒေသခံတွေက မြို့ချောင်းတိုက်နယ်ဆေးရုံကို ပို့ဆောင်ပေးခဲ့ရပြီး ဆေးကုသမှုခံယူနေကြရပါတယ်။

မတ် ၁၆ ရက်ကလည်း ကျောက်တံခါးမြို့နယ်၊ ရန်ကုန်-မန္တလေး အမြန်လမ်းပေါ်မှာ လူမှုကူညီရေးအသင်းယာဉ်တိမ်းမှောက်လို့ လူနာနဲ့လူနာရှင် ၂ ဦး၊ လူမှုကူညီရေးအသင်းဝင် ၁ ဦး စုစုပေါင်း ၃ ဦးသေဆုံးပြီး ၂ ဦးဒဏ်ရာရသွားတယ်လို့ သိရပါတယ်။

စာတည်း – ဟိန်းစံ

ပဲခူး၊ မတ် ၁၉၊ ၂၀၂၅။

ပဲခူးတိုင်း၊ ပဲခူးမြို့နယ်၊ ဝမ်းဘဲအင်းကျေးရွာအနီးမှာ ဆီဘောက်ဆာနဲ့ဘုရားဖူးယာဥ်တိုက်မိပြီး ၂ ဦးသေ ၇ ဦးဒဏ်ရာရတယ်လို့ ကူညီကယ်ဆယ်ရေးလုပ်ဆောင်ပေးခဲ့သူတွေဆီက သိရပါတယ်။

မတ် ၁၈ ရက်မနက် ၈ နာရီ ၃၀ မိနစ်ခန့်က ရန်ကုန်-မန္တလေးကားလမ်းဟောင်းပေါ်မှာ ရန်ကုန်ဘက်ကနေ ဒိုက်ဦးဘက်ကိုမောင်းလာတဲ့ ဆီဘောက်ဆာယာဥ်နဲ့ လားရာတူရှေ့ကနေမောင်းနှင်လာတဲ့ ဘုရားဖူးလိုက်ထရပ်ယာဥ်တို့ ဒေးစွန်ပါဘုရားမုခ်ပေါက်ဝအနီးမှာ တိုက်ခဲ့တာလို့ဆိုပါတယ်။

“လိုက်ထရပ်က ဘုရားထဲအဝင် နောက်ကာပါလာတဲ့ဆီဘောက်ဆာက ဖြတ်တိုက်လိုက်ကော။ ဒရွတ်တိုက်ပါသွားပြီးတော့ အပင်နားမှာ သွားရပ်တာ။ “လို့ ကူညီကယ်ဆယ်ရေးလုပ်ဆောင်ပေးခဲ့သူတဦးက ပြောပါတယ်။

ယာဥ်တိုက်မှုကြောင့် လိုက်ထရပ်ယာဥ်ခေါင်းခန်းပါ ယာဥ်မောင်း အသက် ၅၀ ကျော်နဲ့ ၆၀ အရွယ် အမျိုးသား ၂ ဦး နေရာမှာတင်သေဆုံးခဲ့တယ်လို့ ဆိုပါတယ်။

ဒါ့အပြင် ယာဥ်နောက်ခန်းပါ အသက် ၁၈ နှစ်ကနေ ၅၀ ကြားရှိ အမျိုးသမီး ၂ ဦးဒဏ်ရာရပြီး အဲဒီအထဲက ဒေါ်တင်တင်ခိုင်ဆိုသူမှာ စိုးရိမ်ရတယ်လို့ သိရပါတယ်။

ထိခိုက်သေဆုံးသူတွေက ကဝမြို့ကနေ ဒေးစွန်ပါဘုရားဖူးလာကြသူတွေဖြစ်ပြီး ဒေသကူညီကယ်ဆယ်ရေးအဖွဲ့ဝင်တွေက ပဲခူးဆေးရုံကို ပို့ဆောင်ပေးခဲ့တယ်လို့ ဆိုပါတယ်။

မတ် ၁၆ ရက်မနက်ပိုင်းကလည်း ကျောက်တံခါးမြို့နယ်၊ ရန်ကုန်-မန္တလေး အမြန်လမ်းပေါ်မှာ လူုကူညီရေးအသင်းယာဥ် တိမ်းမှောက်ပြီး လူနာနဲ့ လူနာရှင် ၂ ဦး၊ လူမှုကူညီရေးအသင်းဝင် ၁ ဦး စုစုပေါင်း ၃ ဦးသေဆုံးပြီး ၂ ဦးဒဏ်ရာရသွားတယ်လို့ သိရပါတယ်။

စာတည်း – လင်း

အင်းတကော်၊ ဖေဖော်ဝါရီ ၂၅၊ ၂၀၂၅။

ပဲခူးတိုင်း၊ အင်းတကော်မြို့နယ်၊ ရန်ကုန်-မန္တလေးလမ်းဟောင်းပေါ်မှာ သရုပ်ဆောင်အချို့လိုက်ပါလာတဲ့အိမ်စီးကားနဲ့ ကုန်တင်တွဲကားတိုက်မိပြီး သရုပ်ဆောင် ၂ ဦးအပါ အိမ်စီးကားပေါ် ပါ ၄ ဦးဒဏ်ရာရခဲ့တယ်လို့ ဒေသခံတွေထံက သိရပါတယ်။

ဖေဖော်ဝါရီ ၂၄ ရက် မနေ့ညနေ ၅ နာရီခန့်မှာ ပဲခူးဘက်ကနေ ရန်ကုန်ဘက်ကို ယာဥ်မောင်း ကိုစိုင်းသီဟန် မောင်းနှင်လာတဲ့ မတ်တူးအိမ်စီးကားနဲ့ လားရာတူမောင်းနှင်နေတဲ့ တွဲကားတို့ မိုင်တိုင် ၁၆/၁ နဲ့ ၁၆/၂ အကြားမှာ တိုက်မိခဲ့တာလို့ဆိုပါတယ်။

” ယာဥ်တိုက်မှုကတော့ ကားကြီးကသွားနေတာကို အရှိန်များသွားတယ်ထင်ပါတယ်။ ကားကြီးသွားနေတာကို နောက်ကနေဝင်တိုက်တာနေမယ်။ ကျနော်တို့ကဖြစ်ပြီးမှရောက်သွား တာဆိုတော့ လမ်းဖြတ်ကူးသူကိုရှောင်ပြီးတိုက်တာ ဟုတ်၊ မဟုတ်တော့မသိရဘူး “ လို့ ယာဥ်တိုက်မှုမှာကူညီပေးခဲ့သူတဦးက ပြောပါတယ်။

ယာဥ်တိုက်မှုကြောင့် ယာဥ်မောင်းကိုစိုင်းသီဟန်မှာ ညာလက်မောင်းပေါက်ပြဲနဲ့ ညာခြေထောက်ကျိုးဒဏ်ရာ၊ ယာဥ်ပေါ်ပါ မေမြတ်နိုးခင်(သရုပ်ဆောင်) မှာ နှာခေါင်းသွေးထွက်၊ ဝဲဘက်လက်မောင်းကျိုးဒဏ်ရာ၊ မေတ္တာမြင့်မြတ်ဟိန်း(သရုပ်ဆောင်) ခါးပွန်းပဲ့၊ တင်ပါးပွန်း ခြစ်ဒဏ်ရာ၊ ကိုအောင်သူအောင်မှာ ဝဲဘက်လည်ပင်းပွန်းခြစ်၊ ရင်ညွှန့်အောက်ဒဏ်ရာတွေရရှိခဲ့တယ်လို့ သိရပါတယ်။

ယာဥ်တိုက်မှုကြောင့်ထိခိုက်ဒဏ်ရာရသူတွေကို နယ်မြေခံလူမှုကူညီရေးအသင်းတွေက ပဲခူးမြို့ ခုတင် ၅၀၀ အထွေထွေရောဂါကုပြည်သူ့ဆေးရုံကြီးသို့ ပို့ဆောင်ပေးခဲ့တယ်လို့ သိရပါတယ်။

ပြီးခဲ့တဲ့ နှစ် ဇွန် ၁ ရက်ကလည်း ပဲခူးမြို့နယ်၊ အင်းတကော်မြို့၊ ဆယ်မိုင်ကုန်းအဆင်းမှာ တွဲကားနဲ့အုတ်တင်ကားတိုက်လို့ ၈ ဦးဒဏ်ရာရသွားတယ် သိရပါတယ်။

စာတည်း – ဟိန်းစံ

စစ်ကိုင်း၊ ဖေဖော်ဝါရီ ၃၊ ၂၀၂၅။

စစ်ကိုင်းမြို့၊ တင်းတိပ်ရပ်ကွက်၊ သီရိရပ်၊ ကောင်းမှုတော်ဘုရားအနီးမှာ ကားစက်ချို့ယွင်းလို့ လမ်းဘေးချရပ်ကာပြုပြင်နေတဲ့ အရပ်ဘက်ကားကို စစ်ကောင်စီတပ်သံပြားကာ(Faw)ဖောကားက ဝင်တိုက်မှုဖြစ်ပွားခဲ့တယ်လို့ ရပ်ကွက်နေသူတွေထံက သိရပါတယ်။

ဖေဖော်ဝါရီ ၁ ရက် မနက် ၈ နာရီခန့်က ကောင်းမှုတော်ဘုရားအနီး မုံရွာ-မန္တလေးလမ်း ဘေးမှာ စစ်ကိုင်းဘက်ကိုဦးတည်ကာရ ပ်တန့်ပြုပြင်နေတဲ့ ထွန်စက်တင် ဒိုင်နာကားကို မုံရွာဘက်ကနေ စစ်ကိုင်းဘက်ကို မောင်းနှင်လာတဲ့ စစ်ကောင်စီတပ်ဖောကားက အနောက်ကနေ ဝင်တိုက်ခဲ့တာလို့ ဆိုပါတယ်။

“သေသူက ကားပျက်လို့ ဇက်ကိုလှန်ပြီး ပြင်နေတာ။ အဲဒီမှာ သံပြားကား ၂ စီးက ဆွဲလာတာမှာ ဝင်တိုက်လိုက်တာ။ ဒိုင်နာက မှောက်(လဲ)သွားပြီးတော့ ထွန်စက်ပါ ပြုတ်ကျသွားတာ။ ခေါင်းထဲမှာဇက်လှန်ပြီးနှိုက်နေတဲ့ ဒရိုင်ဘာက ပွဲချင်းပြီးသေတာ။”လို့ အခင်းဖြစ်ရပ်ကွက်နေသူတဦးက မြေလတ်အသံကို ပြောပါတယ်။

ထွန်စက်တင်ဒိုင်နာကားကို ဝင်တိုက်ခဲ့တဲ့ စစ်ကောင်စီတပ်ဖောကားဟာလည်း စက်ချို့ယွင်းနေတဲ့နောက်ထပ်စစ်တပ်ဖောကားတစီးကို ကြိုးနဲ့ဆွဲပြီးမောင်းနှင်လာတဲ့ကားဖြစ်ပြီး ယာဉ်တိုက်မှုဖြစ်ပွားစဉ်မှာ ဝင်တိုက်တဲ့စစ်ကောင်စီတပ်သံပြားကားပါ တိမ်းမှောက်ခဲ့ကာ ကြိုးနဲ့ဆွဲလာရတဲ့ စက်ချို့ယွင်းကားကတော့ မမှောက်ခဲ့ဘူးလို့ ဆိုပါတယ်။

ယာဉ်တိုက်မှုကြောင့် ဒိုင်နာယာဉ်မောင်း မုံရွာမြို့နေ အသက် ၂၅ နှစ်အရွယ် ကိုမင်းထက်သာ သေဆုံးသွားပြီး ဝင်တိုက်ခဲ့တဲ့ ဖောကားပေါ်ပါ စစ်ကောင်စီတပ်ဖွဲ့ဝင် ၃ ဦးစလုံးလည်း ပေါင်ကျိုးတာအပါအဝင် ထိခိုက်ဒဏ်ရာတွေရရှိခဲ့တယ်လို့ သိရပါတယ်။

ယာဉ်တိုက်မှုကြောင့် ဒိုင်နာယာဉ်၊ ထွန်စက်၊ စစ်ကောင်စီဖောကားတွေလည်း ပျက်စီးမှုတွေရှိခဲ့ပြီး အခင်းဖြစ်ပွားပြီးမကြာမီမှာပဲ စစ်ကောင်စီတပ်ဖွဲ့တွေက လမ်းကိုပိတ်ကာ ယာဉ်တွေကို ကရိန်းတွေနဲ့ရှင်းလင်းပြီး ဖောကား ၂ စီးကို ယူဆောင်သွားခဲ့တယ်လို့ ဆိုပါတယ်။

ယာဉ်တိုက်မှုကြောင့် သေဆုံးသွားတဲ့ယာဥ်မောင်းကိုတော့ ဒေသခံတွေက စစ်ကိုင်းပြည်သူ့ဆေးရုံကို ပို့ဆောင်ပေးခဲ့ရတယ်လို့ သိရပါတယ်။

စာတည်း – ဟိန်းစံ

မကွေး၊ ဇန်နဝါရီ ၂၈၊ ၂၀၂၅။

မကွေးတိုင်း၊ ချောက်မြို့နယ်၊ ဂွေးပင်ကျေးရွာအနီး ချောက်-ရေနံချောင်းကားလမ်းပေါ်မှာ ခရီးသည်တင်ကား ၁ စီး လမ်းဘေးသစ်ပင်ဝင်တိုက်ခဲ့တာကြောင့် ကားပေါ်ပါမှာလိုက်ပါလာသူ ၁ ဦးသေဆုံးပြီး ၅ ဦးဒဏ်ရာရခဲ့တယ်လို့ ကူညီကယ်ဆယ်ရေးလုပ်ပေးခဲ့သူတွေဆီက သိရပါတယ်။

ဇန်နဝါရီ ၂၇ ရက်မနက် ၈ နာရီခန့်မှာ ရေနံချောင်းမြို့ဘက်ကနေ ချောက်မြို့ဘက်ကို ခရီးသည် ၁၁ ဦးကိုတင်လာတဲ့ ခရီးသည်တင်ကားဟာ ကားလမ်းမိုင်တိုင်အမှတ် ၃၇၁/၂ နဲ့ ၃၇၁/၃ ကြားမှာ လမ်းဘေးသစ်ပင်ကိုဝင်တိုက်ခဲ့တာလို့ ဆိုပါတယ်။

“အမျိုးသား ၁ ယောက်သေသွားတယ်။ ညာဘက်က ခြေထောက်ကျိုးပြီး ဆေးရုံရောက်မှဆုံးတာ။ ၅ ယောက် ဒဏ်ရာရတာက အမျိုးသမီး ၄ ဦး၊ အမျိုးသား ၁ ဦး။ ဖြစ်ပြီးမှရောက်သွားတာဆိုတော့ သူများ ပြောတာက တိုင်လော့ပြုတ်ပြီး သစ်ပင်ဝင်တိုက်တာလို့တော့ပြောတယ်။” လို့ ကူညီကယ်ဆယ်ရေး လုပ်ကိုင်ပေးခဲ့သူတဦးက ပြောပါတယ်။

ယာဉ်တိုက်မှုကြောင့် အသက် ၄၀ ကျော်အရွယ် ကိုကျော်မင်းနောင်သေဆုံးပြီး အသက် ၃၀ အရွယ် အမျိုးသား ၁ ဦးနဲ့ အသက် ၃၀ ကနေ ၆၀ ကြား အမျိုးသမီး ၄ ဦး ပွန်းပဲ့ဒဏ်ရာရခဲ့တယ်လို့ သိရပါတယ်။

ထိခိုက်ဒဏ်ရာရသေဆုံးသူတွေကို ဒေသလူမှုကူညီရေးအသင်းတွေက မကွေးဆေးရုံကိုပို့ထားပြီး ဆေးကုသမှုခံယူနေကာ ကားကို ချောက်မြို့မရဲစခန်းဘက်ကိုသယ်သွားပြီး ယာဉ်မောင်းကိုတော့ ဖမ်းဆီးထားတယ်လို့ ကူညီကယ်ဆယ်ရေးလုပ်ပေးခဲ့သူဆီက သိရပါတယ်။

စာတည်း – လင်း