မြေလတ်အသံ၊ ဇန်နဝါရီ ၂၊ ၂၀၂၆။
စစ်ကိုင်းတိုင်း၊ ကသာမြို့သိမ်းတိုက်ပွဲအတွင်းမှာ စစ်ကော်မရှင်တပ်စခန်း ၄ ခုအထိကို တော်လှန်ရေးတပ်တွေဖက်မှ သိမ်းပိုက်ရရှိထားတယ်လို့ ဒေသခံတော်လှန်ရေးတပ်ဖွဲ့ဝင်တွေက ပြောပါတယ်။
မြို့သိမ်းတိုက်ပွဲ စတင်ဆင်နွှဲတဲ့ ဒီဇင်ဘာ ၂၆ ရက်က မြို့ပြင်ရှိ ကာကင်းစခန်း ၂ ခုနဲ့ ဒီဇင်ဘာ ၃၀ ရက်မှာ မြို့တွင်း အမှတ် ၅ နဲ့ အမှတ် ၈ ရပ်ကွက်ရှိ အထိုင်စခန်း ၂ ခု တို့ကို တော်လှန်ရေးပူးပေါင်းတပ်တွေက သိမ်းပိုက်နိုင်ခဲ့တာလို့ ဆိုပါတယ်။
“ကျနော်တို့ မြို့ပြင်က ကာကင်း ၂ ခုရယ်၊ နောက်မြို့ထဲမှာရှိတဲ့ ရပ်ကွက် ၅ က စစ်ကော်မရှင် ထိုင်ထားတဲ့ စိုးမိုးကုန်း၊ ဘုန်းကြီးကျောင်းပေါ့။ နောက်ရပ်ကွက် ၈ က စေတီကုန်းထိုင်တဲ့နေရာရယ် လက်ရှိကတော့ရထားပြီ။ ကျန်တာမြို့ထဲကိုအကုန်လုံး ဝင်သွားကြပြီ။ (တော်လှန်ရေးတပ်တွေ) မြို့ထဲကို တောက်လျှောက်ရောက်သွားပြီ။ မြို့ရဲ့တဝက်ဝင်သွားပြီ။ မြို့လယ်ခေါင်လို့ပြောလို့ ရမှာပေါ့”လို့ ကသာဒေသခံ တော်လှန်ရေးတပ်ဖွဲ့ဝင်တဦးက ပြောပါတယ်။
ဇန်နဝါရီ ၂ ရက် ဒီကနေ့မနက်ပိုင်းမှာတော့ ထောက်ပို့လေယာဥ် ၂ စီးနဲ့ ခမရ ၃၀၉ တပ်ရင်းကို ရိက္ခာနဲ့ တပ်သားတွေ ပို့ပေးနေတာကိုတွေ့မြင်ရပြီး လက်နက်ကြီး၊ ဒရုန်းတွေနဲ့ အပြန်အလှန် ပစ်ခတ်တိုက်ခိုက်မှုတွေ တောက်လျှောက်ဖြစ်နေကြတယ်လို့ သူက ဆိုပါတယ်။
လက်ရှိမှာ စစ်ကော်မရှင်တပ်သားတွေအနေနဲ့ ကသာမြို့အခြေစိုက် ခမရ ၃၀၉ တပ်ရင်းတခုကနေပဲ တော်လှန်ရေးတပ်ဖွဲ့တွေကို ခုခံနိုင်တော့သလို တပ်တွင်းကနေ ဒရုန်းတွေသုံးပြီး ဗုံးကြဲတိုက်ခိုက်တာတွေ နေ့တိုင်းလုပ်ဆောင်နေတာကြောင့် လူနေအိမ်တွေ ပျက်စီးမှုရှိနေတယ်လို့ အထက်ပါတပ်ဖွဲ့ဝင် ကပြောပါတယ်။
ကသာမြို့ပေါ်နေထိုင်ကြတဲ့ မြို့ခံပြည်သူတွေအနေနဲ့ တိုက်ပွဲစဖြစ်တဲ့ ဒီဇင်ဘာ၂၆ ရက်ကနေ နေရပ်စွန့်ခွာတိမ်းရှောင်နေကြသလို ဒီဇင်ဘာ ၃၀ ရက်မှာတော့ ပိတ်မိကျန်ခဲ့တဲ့ ပြည်သူတွေကို တော်လှန်ရေးတပ်တွေက ကူညီကယ်ထုတ်ပေးခဲ့ကြတယ်လို့ သူကဆိုပါတယ်။
ကသာမြို့က ထွက်လာတဲ့ စစ်ဘေးရှောင်တွေဟာ မြို့နီးနားမှာရှိတဲ့ နဘားမြို့၊ မော်လူးမြို့၊ မဲဇာရွာ၊ အင်းတော်မြို့နယ်၊ မြစ်ကြီးနား၊ မန္တလေး စတဲ့နေရာတွေကို တိမ်းရှောင်နေကြတာဖြစ်တယ်လို့ သိရပါတယ်။
ကသာမြို့ဟာ ဧရာဝတီမြစ်အနောက်ဘက်ကမ်းရှိ ခရိုင်မြို့ဖြစ်ပြီး ရပ်ကွက် ၁၁ ခုနဲ့ ကျေးရွာပေါင်း ၂၀ နီးပါးရှိကာ မြို့ပေါ်လူဦးရေ ၂ သောင်းကျော်နေထိုင်တဲ့မြို့လည်း ဖြစ်ပါတယ်။
ကသာခရိုင်အတွင်းမှာ ကသာ၊ ဗန်းမောက်နဲ့ အင်းတော် စတဲ့မြို့နယ် ၃ ခုပါဝင်ပြီး အင်းတော်နဲ့ဗန်းမောက်မြို့တွေကို ၂၀၂၅ အတွင်းမှာ တော်လှန်ရေးတပ်တွေက သိမ်းပိုက်ထိန်းချုပ်ထားနိုင်တာလည်း ဖြစ်ပါတယ်။
စာတည်း – လင်း
