မြင်းမူ၊ နိုဝင်ဘာ ၃၀၊ ၂၀၂၅ ။

စစ်ကိုင်းတိုင်း၊ မြင်းမူနဲ့အရာတော်ကကျေးရွာတွေမှာ ဆေးခြောက်ပင် စိုက်ပျိုးရောင်းချသူများလာတယ်လို့ ဒေသအခြေစိုက်ကာကွယ်ရေးအဖွဲ့ဝင်တဦးထံက သိရပါတယ်။

ဆေးခြောက်ပင်တွေကို တော်လှန်ရေးအဖွဲ့တွေထိန်းချုပ်ထားတဲ့ အရာတော်မြို့နယ်တောင်ဘက်ရှိ ကဲဘာ၊ မင်းရွာ၊ ညောင်ခြေထောက်၊ ရသာ၊ ဆင်တလည်၊ မလဲသာကျေးရွာတွေနဲ့ မြင်းမူမြို့နယ် အရှေ့မြောက်ဘက်ရှိထိန်ကန်၊ ရွှေစောင်းကန်၊မွှေးလှကျေးရွာတွေမှာ ၂၀၂၃ ကစတင်ကာ လက်ရှိအထိ အများအပြားစိုက်ပျိုးရောင်းချလာကြတာလို့ ဆိုပါတယ်။

” စိုက်တာက ပြည်သူတွေစိုက်တယ်။ ရပ်ကျေးအဖွဲ့(ပကဖ၊ပလဖ၊ပအဖ)တွေလည်း ပါတယ်။ ပြီးခဲ့တဲ့နှစ်တွေက သိပ်မများဘူးရယ်။ ဒီနှစ်တော့ ပိုများလာတယ်။ ၁ ရွာမှာ အပင်ရေ ၈ သောင်း ၁ သိန်းလောက်ရှိတယ်။” လို့ မုံရွာခရိုင်အတွင်းစစ်ရေးလှုပ်ရှားတဲ့ ကာကွယ်ရေးအဖွဲ့ဝင်တဦးက မြေလတ်အသံကို ပြောပါတယ်။

ဆေးခြောက်ပင်စိုက်ပျိုးမှုများလာတာကြောင့် ဒေသခံလူကြီးပိုင်းတွေကြားမှာ သုံးစွဲလာကြသလို အသက်မပြည့်သေးတဲ့ လူငယ်တွေမှာလည်း ခိုးယူသောက်သုံးတာမျိုးတွေလည်းရှိလာတယ်လို့ ဆိုပါတယ်။

” ၁၄ ၊ ၁၅ အရွယ်တွေက ခိုးပြီးတော့ သောက်လာကြတယ်။ လူကြီးပိုင်းတွေကတော့ ကြိုက်တဲ့သူက တော်တော်များများ သုံးလာကြတယ်။ ရောင်းစားတာတွေရှိတယ်။ လောလောဆယ် ပြဿနာဖြစ်နေတာမရှိသေးဘူး။ အခုမှစရောက်ခါစဆိုတော့ စိတ်ပူလို့ထောက်ပြတာ။ ခုနေမရှင်းလင်းရင် နောက်ကျမထိန်းနိုင်မှာကြောက်တာ။ ဒီအတိုင်း အချို့နယ်တွေလို ဒီအတိုင်းလွှတ်ထားရင် အကုန်ပျက်စီးကုန်မှာ နီးတဲ့ကလေးတွေက။ ကိုယ့်အနီးနားဝန်းကျင်ရှိနေတယ်ဆို သူနေနေကိုယ်နေနေ သုံးမိမှာပဲ။ မစွဲလမ်းတဲ့သူ မဖြစ်ပေမယ့် စွဲလမ်းသူဆို ဘေးထွက်ဆိုးကျိုးဖြစ်လာနိုင်တယ်။”လို့ အထက်ပါဒေသကာကွယ်ရေးအဖွဲ့ဝင်ကပြောပါတယ်။

ဒေသတွင်းမှာ ဆေးခြောက်တွေ စိုက်ပျိုးထုတ်လုပ်ရောင်းချတာတွေများလာနေပေမယ့် သက်ဆိုင်ရာမြို့နယ် ပကဖ၊ ပအဖ၊ ပလဖ တွေက ထိရောက်အောင် အရေးယူဆောင်ရွက်တာတွေမရှိဘူးလို့လည်း သူက ဆိုပါတယ်။

မြင်းမူမြို့နယ်အတွင်း ဆေးခြောက်စိုက်ပျိုးရောင်းချနေတာတွေနဲ့ ပတ်သက်ပြီး ယခုနှစ် ၂၀၂၅ အတွင်း သတိပေးဖမ်းဆီးမှုတွေ လုပ်ဆောင်ထားပြီးဖြစ်တယ်လို့ မြင်းမူမြို့နယ်ပကဖတာဝန်ရှိသူတဦးက ပြောပါတယ်။

” ဒီနှစ်ထဲမှာတင် ၂ ခါ ၃ ခါလောက်ဖမ်းထားတယ်။ ခုလောလောဆယ်တော့ မြင်းမူနယ်ထဲမှာ ထပ်မကြားဘူး။ ပထမတခါဖမ်းကတည်းက ဝမ်နင်(Warning)ပေးထားတာ။ နောက်တခါထပ်စိုက်ရင် ဖမ်းဆီးမယ်။ လူတွေပါဖမ်း၊ ပစ္စည်းတွေသိမ်းမယ်ဆိုပြီး ပြောခဲ့ပြီးသားပါ။” လို့ သူက ပြောပါတယ်။

မြင်းမူ၊ အရာတော်နယ်တွေက ယခင်က ဆေးခြောက်စိုက်ပျိုးထုတ်လုပ်တာမျိုးမရှိဘဲ ဒေသထွက်ရာသီ သီးနှံတွေကိုသာ စိုက်ပျိုးကြပြီး ၂၀၂၂ နှစ်ကုန်ပိုင်းကစတင်ကာ ဆေးခြောက်ပျိုးပင်နဲ့မျိုးစေ့တွေရောက်လာပြီး စိုက်ပျိုးကြတာကနေ တစထက်တစ တွင်ကျယ်စွာစိုက်ပျိုးလာကြတယ်လို့ ဆိုပါတယ်။

စိုက်ပျိုးရရှိလာတဲ့ ဆေးခြောက်အရွက်၊ အဖူးတွေကို အခြောက်ခံပြီးနောက် အရည်အသွေးပေါ်မူတည်ပြီး ၁ ပိဿာကို ကျပ် ၈ သိန်းမှ ၁၀ သိန်းထိစျေးရရှိကာ ပွဲစားတွေက စိုက်ခင်းတွေအထိ လာရောက်ဝယ်ယူကြတယ်လို့ ဆိုပါတယ်။

ဆေးခြောက်စျေးကောင်းတာကြောင့် ဒေသခံတွေအနေနဲ့ ဒေသကောက်ပဲသီးနှံတွေကို မစိုက်ပျိုးကြတော့ဘဲ ဆေးခြောက်ပင်တွေကိုသာ ပြောင်းလဲစိုက်ပျိုးလာကြသလို တချို့မှာလည်း ဒေသသီးနှံစိုက်ခင်းတွေကြားမှာ ရောနှောစိုက်ပျိုးကြတာမျိုးတွေ ပြုလုပ်လာကြတယ်လို့ သိရပါတယ်။

စာတည်း – ဟိန်းစံ

မြင်းမူ၊ စက်တင်ဘာ ၁၇၊ ၂၀၂၅။

စစ်ကိုင်းတိုင်း၊ မြင်းမူမြို့နယ်၊ ပဲကူကျေးရွာက ရပ်ကျေးပကဖစခန်းတခုကို စစ်ကော်မရှင်တပ်တွေက မီးရှို့ဖျက်ဆီးပြီးနောက် လက်နက်ခဲယမ်းတွေနဲ့ ဆက်စပ်ပစ္စည်းတချို့ကို သိမ်းဆည်းသွားတယ်လို့ မြင်းမူမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

စက်တင်ဘာ ၁၅ ရက် နေ့လယ် ၂ နာရီခန့်မှာ မြင်းမူမြို့ဘက်ကနေ အင်အား ၁၀၀ ကျော်နဲ့ စစ်ကြောင်းထိုးလာတဲ့ စစ်ကော်မရှင်တပ်နဲ့ပျူစောထီးအဖွဲ့ဟာ ပဲကူကျေးရွာအပြင်ဘက်ရှိ အထက်ပါ ကျေးရွာပကဖ စခန်းကို ဝင်ရောက်စီးနင်းခဲ့တာလို့ ဆိုပါတယ်။

“သူတို့ဆီမှာလည်း သတင်းပေးပါတယ်။ စခန်းဝင်စီးပြီး မီးရှို့သွားတာ။ တိုက်ပွဲကတော့ ပဲကူးရွာထဲတော့ မဖြစ်ဘူး၊ အပြင်ဘက် ထိတွေ့မှုပုံစံနည်းနည်းတော့ရှိခဲ့တယ်။ ကိုယ့်ဘက်ကတော့ ထိခိုက်မရှိဘူး။ သူတို့ဘက်ကထိခိုက်ရှိ မရှိတော့မသိဘူး။ ညပိုင်းမှာရွာကနေ ပြန်ထွက်သွားတယ်”လို့ မြင်းမူမြို့နယ် ပကဖ တာဝန်ရှိသူတဦးကပြောပါတယ်။

တိုက်ပွဲဖြစ်ချိန် စခန်းရှိတပ်ဖွဲ့ဝင်တွေဆုတ်ခွာသွားတာကြောင့် ထိခိုက်သေဆုံးမှုတွေမရှိခဲ့ဘဲ စစ်ကော်မရှင်စစ်ကြောင်းဟာ စခန်းတဲတွေကို မီးရှို့သွားပြီးနောက် လက်လုပ် ၉ လက်၊ ခဲယမ်းအနည်းငယ်၊ ရိက္ခာတွေ၊ တဲအဆောက်အဦ ၃ လုံး၊ ဆိုင်ကယ် ၂ စီး သိမ်းဆည်းခံလိုက်ရတယ်လို့ ဆိုပါတယ်။

စစ်ကော်မရှင်ဘက်က စစ်ကြောင်းထိုးလာတာကြောင့် ပဲကူ၊ ရုံခါး၊ ညောင်ပင်ကန်ကျေးရွာတွေက ဒေသခံ ၂,၀၀၀ ခန့်ဟာ စက်တင်ဘာ ၁၅ ရက်ကတည်းက ထွက်ပြေးခဲ့ရပြီး စစ်ကြောင်းပြန်သွားပြီးနောက် ကျေးရွာကို ပြန်ရောက်လာကြပြီလို့ ဆိုပါတယ်။

စစ်ကော်မရှင်ဝါဒဖြန့်တယ်လီဂရန်ချန်နယ်တွေမှာလည်း ပဲကူးရွာအနီး ပကဖစခန်းတခုကိုသိမ်းပြီး လက်နက်ခဲယမ်းတွေလည်း သိမ်းဆည်းရမိတယ်လို့ ပုံနဲ့တကွဖော်ပြထားကာ ပုံပါပစ္စည်းတွေဟာလည်း ရပ်ကျေးပကဖစခန်းက ဟုတ်မှန်ကြောင်း မြင်းမူမြို့နယ် ပကဖ တာဝန်ရှိသူတဦးက အတည်ပြုပါတယ်။

စစ်ကြောင်းကတော့ စခန်းကိုမီးရှိ့ဖျက်ဆီးတဲ့နေ့မှာပဲ မြင်းမူဘက်ကို ပြန်ဆုတ်သွားပြီး စက်တင်ဘာ ၁၇ ရက် ဒီကနေ့အထိ ထပ်မံစစ်ကြောင်းထိုးတာမျိုးမရှိသေးဘူးလို့ သိရပါတယ်။

ပြီးခဲ့တဲ့ မတ်လ ၂၂ ရက်ကလည်း စစ်ကော်မရှင်စစ်ကြောင်းဟာ မြင်းမူမြို့နယ်၊ ခြေတော်ရာကျေးရွာကို ဝင်ရောက်မီးရှို့ခဲ့တာကြောင့် နေအိမ် ၆ လုံးမီးလောင်ပျက်စီးခဲ့ပါသေးတယ်။

စာတည်း – လင်း

မြင်းမူ၊ မတ် ၁၇၊ ၂၀၂၅။

စစ်ကိုင်းတိုင်း၊ မြင်းမူမြို့နယ်က စစ်ကောင်စီတပ်သားတွေ ပစ်ခတ်လိုက်တဲ့ လက်နက်ကြီးဗုံးသီး ကျရောက်ပေါက်ကွဲတာကြောင့် ဦးနှောင်းကုန်းကျေးရွာက လူနေအိမ် ၈လုံးနဲ့ နွားစာတဲ ၄လုံး မီး လောင်ပြာကျသွားတယ်လို့ သိရပါတယ်။

မတ် ၁၅ ရက် ယမန်နေ့ည ၈နာရီကျော်မှာ ဦးနှောင်းကုန်းကျေးရွာနဲ့ ၂ မိုင်ကွာဝေးတဲ့ ရေပိုးစားကန်အထိုင်စခန်း စစ်ကောင်စီတပ်ဖွဲ့က လက်နက်ကြီး ၃ လုံးပစ်ခတ်ခဲ့ရာ ၂ လုံးမှာ ကျေးရွာအတွင်းကျရောက် ပေါက်ကွဲခဲ့တာလို့ ဆိုပါတယ်။

“နတ်ရေကန်က ၁၂ ဘီး ၃ စီးနဲ့ ထွက်လာတဲ့ စကစတွေက ရေပိုးစားကန်မှာ အထိုင်ချပြီးတော့ ဦးနှောင်းကုန်းရွာဖက်ကို လက်နက်ကြီး ၃ လုံးပစ်ခဲ့တာ” လို့ မြင်းမူမြို့နယ် ပြည်သူ့အုပ်ချုပ်ရေးအဖွဲ့၊ မီးဘေးလုံခြုံရေးတာဝန်ရှိသူတဦးက ပြောပါတယ်။

နေအိမ်တွေဆုံးရှုံးသွားခဲ့တဲ့ ပြည်သူတွေကို မြင်းမူမြို့နယ် ပြည်သူ့အုပ်ချုပ်ရေးအဖွဲ့က ကူညီဆောင်ရွက်မှုတွေပေးထားပြီး လက်နက်ကြီးကျရောက် ပေါက်ကွဲပြီး နေအိမ်တွေမီးလောင်ချိန်မှာ ဦးနှောင်းကုန်း ရွာခံပြည်သူတွေ ဘေးလွတ်ရာကျေးရွာတွေဆီထွက်ပြေးခဲ့ကြရပေမယ့် လက်ရှိမှာတော့ မိမိကျေးရွာကို ပြန်လည်ဝင်ရောက်နေထိုင်နေကြပြီလို့ သိရပါတယ်။

စာတည်း – ဟိန်းစံ