မြင်းခြံ၊ စက်တင်ဘာ ၄၊ ၂၀၂၅။

မန္တလေးတိုင်း၊ မြင်းခြံမြို့နယ်၊ ကုက္ကဲရွာ အထကကျောင်းဝန်းထဲမှာတပ်စွဲနေပြီး လမ်းသွားလမ်းလာတွေဆီက ဆက်ကြေးတောင်းနေတဲ့ စစ်ကော်မရှင်အဖွဲ့ကိုတိုက်ခိုက်ရာ ထိခိုက်သေဆုံးမှုရှိပြီး လက်နက်ခဲယမ်း တွေလည်း သိမ်းဆည်းခဲ့တယ်လို့ ရွေခြံသားပြောက်ကျားတပ်ဖွဲ့ – မြင်းခြံမြို့နယ်ဆီက သိရပါတယ်။

ကုက္ကဲရဲစခန်းအနီးရှိ အထကကျောင်းမှာတပ်စွဲထားတဲ့ အင်အား ၅၀ ကျော်ပါ စစ်ကော်မရှင်တပ်ဖွဲ့ဝင်တွေက ဆက်ကြေးကောက်နေချိန် စက်တင်ဘာ ၂ ရက် မနက် ၉ နာရီခန့်ကစတင်ကာ ၁၅ မိနစ်ကြာ တိုက်ခိုက်ခဲ့တယ်လို့ ဆိုပါတယ်။

“သူတို့က လမ်းသွားပြည်သူတွေဆီက လုယက်တယ်၊ စားစရာတွေကိုလည်းချယူတယ်၊ ဆက်ကြေးကောက်တယ်၊ ဘယ်ကားကို ဘယ်လောက်နှုန်း အနိုင်ကျင့်ပြီးကောက်တာ၊ ကျနော်တို့ ချောင်းတာက ဩဂုတ် ၃၁ ရက်ကစပြီးတော့ mission စဖော်တာ၊ ကျနော်တို့ ၂ ညအိပ်နဲ့ ၁ ရက်စောင့်ခဲ့ရတယ်၊” လို့ ရွှေခြံသားပြောက်ကျားတပ်ဖွဲ့ – မြင်းခြံမြို့နယ်တာဝန်ခံက ပြောပါတယ်။

တိုက်ခိုက်ရာမှာ ရှေ့ထွက်ပဒေသာမိုင်းတွေကိုလည်း အသုံးပြီးခဲ့ပြီး တိုက်ပွဲအတွင်း ၃ ပွင့်ဗိုလ် အောင်သောင်း အပါအဝင် စစ်ကော်မရှင်တပ်ဖွဲ့ဝင် ၇ ဦးသေဆုံးတာကို အတည်ပြုနိုင်ခဲ့တယ်လို့ ဆိုပါတယ်။

ဒါ့အပြင် MA 3 ၆ လက်၊ ကျည်ဘောက် ၂၀ ခု၊ MA 5 ၁ လက်၊ ၆၀ မမ ၁ လက်၊ 5.56 ကျည် ၉၀၄ တောင့်၊ 9 မမကျည် ၅ တောင့်၊ 60 မမဗုံးသီး ၃ လုံး၊အိနာဂါ၂ လုံး၊ ဓား ၅ ချောင်း၊ လက်ပစ်ဗုံး၂ လုံး၊ လေးခွ ၂ လက်၊ ဝက်အူလှည့် ၁ ချောင်း၊ ငွေသား ၁,၄၉၂,၀၀၀ ကျပ်၊ ဖုန်း ၇ လုံး၊ လက်ပတ်နာရီ ၂ လုံးနဲ့ အခြားစစ် အသုံးအဆောင်တို့ကို သိမ်းဆည်းနိုင်ခဲ့တယ်လို့ ဆိုပါတယ်။

မြင်းခြံမြို့နယ်တွင်းကျေးရွာတွေကို လှည့်လှည်စစ်ကြောင်းထိုးနေတဲ့ စစ်ကော်မရှင်နဲ့ ပျူစောထီး ပူးပေါင်းတပ်ဖွဲ့အင်အား ၃၀၀ ကျော်ကိုလည်း နွားထိုးကြီးမြို့နယ်၊ မာန်လည်ရွာဘုန်းကြီးကျောင်းမှာ ယာယီတပ်စွဲနေစဉ် ဩဂုတ် ၂၀ ရက် မနက် ၁၁ နာရီမှာ တော်လှန်ရေးတပ်တွေက တိုက်ခိုက်ပြီးနောက် လက်နက်ခဲယမ်းတွေသိမ်းဆည်းခဲ့သေးတယ်လို့ သိရပါတယ်။

စာတည်း – လင်း

မြေလတ်အသံ၊ ဩဂုတ်၂၆၊ ၂၀၂၅။

မန္တလေးတိုင်း၊ မြင်းခြံခရိုင်၊ နွားထိုးကြီးမြို့နယ်၊ မာန်လည်ရွာဘုန်းကြီးကြောင်းမှာတပ်စွဲနေတဲ့ စစ်ကော်မရှင်စစ်ကြောင်းကို တိုက်ခိုက်ခဲ့ရာ စစ်သားသေဆုံးမှုများပြီး လက်နက်၊ ခဲယမ်းဆက်စပ်ပစ္စည်းတွေရရှိခဲ့တယ်လို့ မြေပြင်တပ်ဖွဲ့ဝင်တွေထံက သိရပါတယ်။

မြင်းခြံမြို့နယ်တွင်းကျေးရွာတွေကို လှည့်လှည်စစ်ကြောင်းထိုးနေတဲ့ စစ်ကော်မရှင်နဲ့ ပျူစောထီးပူးပေါင်းတပ်ဖွဲ့အင်အား ၃၀၀ ကျော်ဟာ အဲ့ဒီဘုန်းကြီးကျောင်းမှာ ယာယီတပ်စွဲနေစဥ် ဩဂုတ် ၂၀ ရက် မနက် ၁၁ နာရီမှာ စတင်တိုက်ခိုက်ခဲ့တာဖြစ်ပြီး ညနေ ၅ နာရီခွဲအထိ တိုက်ပွဲဖြစ်ပွားခဲ့တယ်လို့ ဆိုပါတယ်။

“ အပြန်အလှန်ပစ်ပါတယ်။ လက်နက်ကြီးပစ်ကူတွေနဲ့ သူတို့ဘက်က လေကြောင်းပစ်ကူတွေလာပေးပါတယ်။ အလောင်းတွေက သိရသလောက်က သူတို့ကချက်ချင်းမီးထဲကိုပစ်ထည့်တာမျိုးရှိတယ်လို့တော့ သိရပါတယ်။ ကျနော်တို့အလောင်းတော့မရခဲ့ပါဘူး” လို့ တိုက်ခိုက်မှုမှာပါဝင်ခဲ့တဲ့ မြင်းခြံခရိုင်စစ်ရေးသတင်းရင်းမြစ်တဦးက မြေလတ်အသံကို ပြောပါတယ်။

တိုက်ပွဲတွေအတွင်း စစ်ကော်မရှင်တပ်ဖွဲ့ဝင် ၁၀ ဦးသေဆုံးခဲ့ပြီး ၈ ဦး ဒဏ်ရာရရှိခဲ့တယ်လို့ မြေပြင်တိုက်ခိုက်ရေးပါဝင်သူတွေက ပြောဆိုထားပြီး အထိနာတဲ့ စစ်ကောင်စီတပ်က လေကြောင်း၊ လက်နက်ကြီးတွေနဲ့ ပစ်ကူပေးတိုက်ခိုက်ခဲ့တယ်လို့ ၎င်းက ဆိုပါတယ်။

ဒါ့အပြင် တိုက်ပွဲအတွင်း MA 11လက်နက်ငယ် ၂ လက်၊ Drone Shooter ၁ လက်၊ ငါးကြင်းမြီး (စက်လတ်) ပြောင်း ၁ ချောင်း၊ လက်ပစ်ဗုံး ၃ လုံး၊ Starlink အင်တာနက်စက် ၁ လုံး၊ ငွေသားအချို့၊ ကျည်ဘောက် ၂ ခု၊ ကျည်ဆန်တချို့ သိမ်းဆည်းရမိခဲ့တယ်လို့ သိရပါတယ်။

အဆိုပါစစ်ကြောင်းဟာ စစ်ကော်မရှင်တပ်နဲ့ မြင်းခြံခရိုင်ပျူစောထီးခေါင်းဆောင် သီတာယုမွန်လက်အောက်ပျူစောထီးတွေပါဝင်တဲ့ ပူးပေါင်းစစ်ကြောင်းဖြစ်ကာ ဩဂုတ် ၁ ရက်မှာ သစ်ရှည်ပင်ရွာကနေစတင်ကာ ကျေးရွာ ၂၀ ခန့်ကို လှည့်ပတ်စစ်ကြောင်းထိုးခဲ့တာဖြစ်ပြီး မာန်လည်ရွာဘုန်းကြီးကျောင်းမှာ ယာယီတပ်စွဲနေတာပါ။

အဲ့ဒီစစ်ကြောင်းကြောင့် ဩဂုတ်လဆန်းပိုင်းကနေလက်ရှိအထိ မြင်းခြံမြို့နယ် ကျေးရွာပေါင်း ၂၀ ကျော်က ဒေသခံပြည်သူ ၂ သောင်းနီးပါးစစ်ရှောင်နေကြရတယ်လို့ သိရပါတယ်။

တိုက်ခိုက်မှုကို နွားထိုးကြီးပြည်သူ့ကာကွယ်ရေးအဖွဲ့ (ပကဖ)နဲ့အတူ မြင်းခြံခရိုင် PDF တပ်ရင်း၊ တပ်ဖွဲ့တွေ ပူးပေါင်းတိုက်ခိုက်ခဲ့တာလည်း ဖြစ်ပါတယ်။

စာတည်း – ဟိန်းစံ

မြင်းခြံ၊ ဩဂုတ် ၂၂၊ ၂၀၂၅။

မန္တလေးတိုင်း၊ မြင်းခြံမြို့နယ်၊ ဆုံရွာကနေ ငါန်းဇွန်မြို့နယ်၊ ငါန်းမြာရွာကိုသွားတဲ့ စစ်ကော်မရှင်တပ်ဖွဲ့ဝင်တွေကို ကြားဖြတ်တိုက်ခိုက်ရာ သေဆုံးသူများပြီး လက်နက်ခဲယမ်းတွေကိုလည်း သိမ်းဆည်းနိုင်ခဲ့တယ်လို့ Natogyi People Defence Force မြင်းခြံခရိုင် အမှတ် ၄ တပ်ရင်းဆီက သိရပါတယ်။

ထော်လာဂျီ ၁ စီး၊ ဆိုင်ကယ် ၃ စီးတို့နဲ့လာတဲ့ စစ်ကော်မရှင်တပ်ဖွဲ့ဝင်အင်အား ၂၀ ဝန်းကျင်ကို သြဂုတ် ၂၁ ရက် မနေ့နေ့လယ် ၁၂ နာရီ ၁၅ မိနစ်မှာ အဆိုပါစစ်ကြောင်းသွားရာလမ်းပိုင်းတနေရာမှာ တော်လှန်ရေးတပ်တွေက ကြားဖြတ်တိုက်ခိုက်ခဲ့တာလို့ ဆိုပါတယ်။

“ပြောက်ကျားစပြီးတော့ ကျည်စပစ်တဲ့အချိန် ဆိုင်ကယ်နဲ့ ထော်လာဂျီပေါ်ပါ အကုန်လုံးရဲ့ အလောင်းတွေကို လမ်းပေါ်မှာ ကျနော်တို့မျက်မြင်တွေ့ခဲ့တယ်၊ တချို့စစ်ကော်မရှင်ကောင်တွေက ပစ်ခတ်မှု ဖြစ်စဉ်အတွင်းထဲမှာပဲ ပြန်ပြေးတယ်၊ ထွက်ပြေးတဲ့အချိန် ကျနော်တို့နောက်ကနေ လိုက်ရှင်းတဲ့ အချိန်မှာ ကျနော်တို့ကို ပြန်ပြီးတော့ ခုခံပစ်ခတ်တာတွေရှိတယ်၊” လို့ Natogyi People Defence Force မြင်းခြံခရိုင်အမှတ် ၄ တပ်ရင်းရဲ့ တပ်ဖွဲ့ဝင်တဦးက ပြောပါတယ်။

တိုက်ပွဲအတွင်း စစ်ကော်မရှင်တပ်ဖွဲ့ဝင် ၁၀ ဦးသေဆုံးတာကို မျက်မြင်တွေ့ရှိခဲ့ပြီး တချို့တပ်ဖွဲ့ဝင်တွေကတော့ထွက်ပြေးသွားကာ G 3 ၃ လက်၊ MA 11 ၁ လက်၊ ကျည်ဘောက် ၃ ခု၊ G 3 ကျည် ၁၆ တောင့်တို့ကို သိမ်းဆည်းရခဲ့တယ်လို့ သိရပါတယ်။

ပစ်ခတ်တိုက်ခိုက်နေချိန် မြင်းခြံမြို့နယ်၊ ဆုံရွာနဲ့ ငါန်းဇွန်မြို့နယ်၊ ငါန်းမြာရဲစခန်းတို့က စစ်ကူတွေရောက်ရှိလာတာကြောင့် ၁ နာရီဝန်းကျင်တိုက်ခိုက်ပြီးနောက်မှာ ပြန်လည်ဆုတ်ခွာလာခဲ့တယ်လို့ သိရပါတယ်။

“ပြီးရင် တိုက် ၁ လုံးထဲမှာ သူတို့ ပိတ်မိနေတဲ့အချိန် ကျနော်တို့ဘက်က လက်နက်ချဖို့အတွက် ကမ်းလှမ်းတာတွေ ဖိတ်ခေါ်တာတွေလုပ်ခဲ့တယ်၊ အချိန်မရတာလည်းပါတယ်၊ ပြီးရင်ဆုံရွာဘက်ကို စစ်ကူလာတာလည်းရှိတယ်၊ ငါန်းမြာရဲစခန်းကလည်း စစ်ကူလာတယ်၊ ကျနော်တို့ ထိတွေ့မှုဖြစ်တာက ဆုံရွာနဲ့ ငါန်းမြာရဲစခန်းကြားထဲမှာဆိုတော့ အချိန်မီတော့ခေါ်တယ်၊ ဒါပေမဲ့ စစ်ကူရောက်တဲ့အချိန် ကျနော်တို့ရဲဘော်တွေ ပြန်ဆုတ်ခဲ့တာ” လို့ သူက ပြောပါတယ်။

ဒီတိုက်ခိုက်မှုကို Natogyi People Defence Force မြင်းခြံခရိုင်အမှတ် ၄ တပ်ရင်း နဲ့ မြင်းခြံခရိုင် အမှတ် ၁၀ တပ်ရင်း မန္တလေးခရိုင် တပ်ရင်း ၅ ၊ ကျားမင်း LPDF ၊ ငန်းနက် LPDF ၊ မြောက်ပိုင်းသား LPDF ၊ အမရပူရ ပကဖ တို့က ပူးပေါင်းလုပ်ဆောင်ခဲ့တာဖြစ်ပါတယ်။

ပြီးခဲ့တဲ့ ဩဂုတ် ၅ ရက်ကလည်း မန္တလေးတိုင်း၊ နွားထိုးကြီးမြို့နယ်၊ ကနားကျေးရွာနဲ့ ပြင်စည်ကျေးရွာကြားမှာ စစ်ကောင်စီတပ်ဖွဲ့ဝင်တွေ စီးလာတဲ့ကားကို Natogyi People Defence Force မြင်းခြံခရိုင် အမှတ် ၄ တပ်ရင်းကတိုက်ခိုက်ရာ ၃ ဦးသေဆုံးပြီး လက်နက်ခဲယမ်းတွေ သိမ်းဆည်းရခဲ့ပါသေးတယ်။

မြင်းခြံမြို့နယ်အတွင်းမှာ သြဂုတ်ပထမပတ်ထဲက တိုက်ပွဲစတင်ဖြစ်ခဲ့ပြီး မြင်းခြံမြို့ နယ်ပတ်ချာလည် ၅ မိုင်ခန့်ကို စစ်ကောင်စီတပ်ဖွဲ့ဝင်တွေနဲ့ ပျူစောထီး သီတာယုမွန်အဖွဲ့တွေပါဝင်တဲ့ အင်အား ၂,၀၀၀ ခန့်ပါ စစ်ကြောင်းက ဖြန့်ကျက်စစ်ကြောင်းထိုးမှုတွေလည်း ရှိနေပါတယ်။

ဒါ့အပြင် စစ်ကြောင်းထိုးနေတာနဲ့တိုက်ပွဲတွေကြောင့် ကံဆင့်မြောက်၊ ကံဆင့်တောင်၊ ပျော်ဘွယ်၊ ဖောင်းကား၊ လက်ဝဲမြင်းနီ၊ ရွာကြီး၊ ညောင်ပင်သာ၊ နတ်ထား၊ တမုန်းကိုင်း၊ စံပြကျေးရွာအပါအဝင် ကျေးရွာ ၁၅ ရွာခန့်က ဒေသခံ ၁၀,၀၀၀ ခန့်ထွက်ပြေးတိမ်းရှောင်နေကြရတယ်လို့ သိရပါတယ်။

စာတည်း – လင်း

မြင်းခြံ၊ ဩဂုတ် ၁၁၊၂၀၂၅။

မန္တလေးတိုင်း၊ မြင်းခြံမြို့နယ်၊ တလုပ်မြို့ကျေးရွာမှာ စစ်ကောင်စီနဲ့ တော်လှန်‌ရေးတပ်တွေ တိုက်ပွဲဖြစ်ပွားခဲ့ပြီး စစ်ကောင်စီတပ်က ၈ ဦး သေဆုံးကာ PDF တပ်ဖွဲ့ဝင် ၄ ဦး ထိခိုက်ဒဏ်ရာရခဲ့တယ်လို့ တလုပ် PDF အဖွဲ့ထံက သိရပါတယ်။

ဩဂုတ် ၉ ရက် မနက် ၇ နာရီခန့်မှာ အင်အား ၄၀ ခန့်ရှိနေတဲ့ တလုပ်မြို့ရွာထဲက စစ်ကောင်စီစခန်းနေရာ‌တွေကို တိုက်ခိုက်ခဲ့ရာ တိုက်ပွဲ ၇ နာရီနီးပါး ဖြစ်ပွားခဲ့တယ်လို့ သိရပါတယ်။

“ရလုရဆဲနီးအထိ လုပ်ခဲ့နိုင်တယ်။ ရွာတောင်ဘက်က ကျန်တော့တာကို နည်းနည်း သူတို့ဆီက ဂျိုင်ရိုကော်ပတာတို့၊ ဟယ်လီကော်ပရာတို့၊ ဟောင်ဝစ်ဇာပစ်ကူတွေလုပ်ခဲ့လို့ အခြေနေတခုအရ ပြန်ဆုတ်ခဲ့ရတယ်”လို့ တလုပ် PDF တာဝန်ခံ ကိုသိန်းမောင်က ပြောပါတယ်။

တိုက်ပွဲအတွင်းမှာ စစ်ကောင်စီဘက်က ၈ ဦး ထိခိုက်သေဆုံးတယ်လို့ နယ်ခံသတင်းပေးတွေဆီက ပြန်သိရပြီး တလုပ် PDF အဖွဲ့ဝင် ၄ ဦးမစိုးရိမ်ရထိခိုက်ဒဏ်ရာရခဲ့တယ်လို့ သိရပါတယ်။

တလုပ်မြို့ရွာထဲမှာ ဖြန့်ကြဲထားတဲ့ စစ်ကောင်စီအဖွဲ့ဝင်တွေဟာ ဒေသကာကွယ်ရေးပူးပေါင်းတပ်တွေ ဝင်ရောက်တိုက်ခိုက်ချိန်မှာ မြို့တောင်ဘက်က ခံစစ်စခန်းအထိဆုတ်သွားပြီး ပြန်လည်ပစ်ခတ်ခဲ့ကြတာလို့ ဆိုပါတယ်။

ပြီးခဲ့တဲ့ ဖေဖော်ဝါရီ ၁ ရက်မှာလည်း တလုပ်မြို့ရွာ စခန်းသိမ်းတိုက်ပွဲကို ဒေသကာကွယ်ရေးပူးပေါင်းတပ်တွေတိုက်ခိုက်ခဲ့ပြီး စစ်ကောင်စီတပ်ဘက်က လေကြောင်း တိုက်ခိုက်မှု ဆက်တိုက်လုပ်ဆောင်ခဲ့လို့ စခန်းမသိမ်းနိုင်ဘဲ တော်လှန်ရေးတပ်တွေ ပြန်လည်ဆုတ်ခွာခဲ့ရပါတယ်။

အဲ့ဒီတိုက်ပွဲမှာလည်း စစ်တပ်ဘက်က သေဆုံးမှုများခဲ့ပြီး PDF ၁ ဦးနဲ့ ပြည်သူ ၅ ဦးသေဆုံးခဲ့သလို မြို့ထဲက နေအိမ် ၅၀ ခန့် မီးလောင်ပျက်စီးခဲ့သေးတယ်လို့ သိရပါတယ်။

စာတည်း – မြတ်