မဟာအောင်မြေ

မန္တလေး၊ ဒီဇင်ဘာ ၄၊ ၂၀၂၅။

မန္တလေးတိုင်း၊ မဟာအောင်မြေမြို့နယ်၊ ရဲမွန်တောင် ရပ်ကွက်၊ ၅၈ လမ်း၊ ၄၃ နဲ့ သိပ္ပံလမ်းကြားရှိ ‘ပေါက်ကျိုင်း’လက်ဖက်ရည်ဆိုင် မီးလောင်ပြီး ဆိုင်ဝန်ထမ်း ၁ ဦးမီးလောင်ဒဏ်ရာရတယ်လို့ မီးလောင်မှုမှာကူညီလုပ်ဆောင်ပေးခဲ့သူတွေဆီက သိရပါတယ်။

ဒီဇင်ဘာ ၄ ရက် ဒီမနက် ၇ နာရီခန့်မှာ လက်ဖက်ရည်ဆိုင် စားဖိုဆောင်ကနေ မီးစလောင်ခဲ့ရာက ဆိုင်နဲ့ အနီးအနားနေအိမ်တွေပါ မီးကူးစက်လောင်ခဲ့တာလို့ ဆိုပါတယ်။

“စားဖိုဆောင် 40 kg ဂက်စ်အိုးက ခေါင်းပွင့်ထွက်ပြီး ဂက်စ်တွေယိုစိမ့်ပြီး အနီးက မီးဖိုကနေတဆင့် မီးလောင်မှုဖြစ်တာ။ မီးက ၁ နာရီလောက်ငြှိမ်းသတ်ရတယ်။ စိုးရိမ်ရတစ်ယောက်ဒဏ်ရာရတာ ရှိတယ်”လို့ မီးလောင်မှုကိုကူညီပေးခဲ့သူတဦးက ပြောပါတယ်။

မီးလောင်မှုကြောင့် အသက် ၁၆ နှစ်အရွယ် ဆိုင်ဝန်ထမ်း အောင်ငြိမ်းချမ်းမှာ မျက်နှာ၊ လည်ပင်း၊ လက်နဲ့ခြေထောက်တွေမှာ မီးလောင်ဒဏ်ရာစိုးရိမ်ရတာကြောင့် မန္တလေးပြည်သူ့ဆေးရုံကို ပို့ဆောင်ထားရတယ်လို့ ဆိုပါတယ်။

ဒါ့အပြင် လက်ဖက်ရည်ဆိုင်၊ အနီးအနားရှိ နေအိမ် ၂ လုံးမီးလောင်ပျက်စီးမှုရှိခဲ့ပြီး မန္တလေးမြို့ပေါ်ရှိ သန္ဓေမီးသတ်နဲ့ အရန်မီးသတ်အဖွဲ့ဝင်တွေ၊ အနီးအနားရှိ ဒေသခံတွေက ဝိုင်းဝန်းမီးငြှိမ်းသတ်ပေးခဲ့ရတယ်လို့ သိရပါတယ်။

နိုဝင်ဘာ ၁၈ ရက်ကလည်း အမရပူရမြို့နယ်၊ ဘုံအိုးကျေးရွာရှိ နေအိမ်တလုံးက ဆိတ်ခြံမှာ ခြင်မလာအောင် မီးမွှေးထားရာမှ မီးလောင်မှုဖြစ်ပြီး နေအိမ် ၈ လုံးမီးလောင်ပျက်စီးခဲ့တယ်လို့ သိရပါတယ်။

စာတည်း – လင်း

မန္တလေး၊ ဇူလိုင် ၂၀၊ ၂၀၂၅။

မန္တလေးတိုင်း၊ မဟာအောင်မြေမြို့နယ်၊ မဟာနွယ်စဉ်ရပ်ကွက်၊ ၃၆ လမ်း၊ ၇၁ လမ်းနဲ့ ၇၂ လမ်းကြားရှိ နေအိမ် ၁ အိမ်မှာ Bluetooth Speaker Box အားသွင်းထားရာမှ မီးလောင်မှုဖြစ်ပြီး နေအိမ် ၈ လုံး မီးလောင်ပျက်စီးခဲ့တယ်လို့ ကူညီလုပ်ကိုင်ပေးခဲ့သူတွေဆီက သိရပါတယ်။

ဇူလိုင် ၁၉ ရက်ည ၈ နာရီခန့်က အိမ်ငှားနေထိုင်သူ အသက် ၃၉ အရွယ် အမျိုးသမီးဟာ နေအိမ်အပေါ်ထပ်မှာ Speaker Box ကို အားသွင်းထားရာက ဘတ္ထရီပွင့်ထွက်ပြီး မီးလောင်မှုဖြစ်ခဲ့တာလို့ ဆိုပါတယ်။

“Bluetooth Speaker Boxက အပူလွန်ကဲပြီး ပေါက်ကွဲတော့ မီးစတွေက အနီးအနားက အဝတ်အထည်တွေပေါ်ကျပြီး မီးလောင်တာ။ လူတွေတော့ ထိခိုက်တာမရှိဘူး”လို့ မီးငြှိမ်းသတ်ရာမှာ ပါဝင်ကူညီပေးခဲ့သူတဦးက ပြောပါတယ်။

မီးလောင်တာကြောင့် နေအိမ် ၈ လုံးနဲ့ အိမ်တွင်းပစ္စည်းအချို့ မီးလောင်ပျက်စီးခဲ့ပြီး ပျက်စီးဆုံးရှုံးမှု တန်ဖိုးကိုတော့ မသိရသေးဘူးလို့ ဆိုပါတယ်။

မန္တလေးတိုင်း၊ ခရိုင်၊ မြို့နယ်အဆင့် မီးသတ်တပ်ဖွဲ့ဝင်တွေ၊ အရန်မီးသတ်တပ်ဖွဲ့ဝင်တွေနဲ့ ဒေသခံပြည်သူတွေ ဝိုင်းဝန်းမီးငြှိမ်းသတ်ခဲ့တဲ့အတွက် မီးလောင်ပြီး ၁ နာရီခန့်အကြာမှာ မီးငြှိမ်းသတ်နိုင်ခဲ့တယ်လို့ သိရပါတယ်။

မီးစတင်လောင်ခဲ့တဲ့အိမ်က အိမ်ငှားအမျိုးသမီးကတော့ အမှတ် ၉ ရဲစခန်းမှာ မီးပေါ့ဆမှု ရာဇသတ်ကြီးပုဒ်မ ၂၈၅ နဲ့ အမှုဖွင့်ခံထားရတယ်လို့ သိရပါတယ်။

ပြီးခဲ့တဲ့ မေ ၂၈ ရက်ကလည်း ချမ်းအေးသာစံမြို့နယ်ရှိ ကဥ္စဏမဟီရပ်ကွက်၊ ၇၇လမ်း၊ ၃၃ လမ်းနဲ့ ၃၄ လမ်းကြားရှိ Cow Boy Bar မှာ ဝရိန်ဆော်ရာက မီးလောင်မှုဖြစ်ကာ အမျိုးသမီး ၄ ဦးသေဆုံးသွားတယ်လို့ သိရပါတယ်။

စာတည်း – လင်း