မန္တလေး

မန္တလေး၊ ဇန်နဝါရီ ၂၃၊ ၂၀၂၃။

မန္တလေးတိုင်း၊ မတ္တရာမြို့နယ်၊ လွန်တောင်းကျေးရွာက ပျူခေါင်းဆောင်တဦး ဇန်နဝါရီ ၂၁ ရက် မနက်ပိုင်းမှာ အသတ်ခံလိုက်ရပြီးနောက် စစ်ကောင်စီက ဒေသခံ ၃ ဦးကို ဖမ်းဆီး သတ်ဖြတ်လိုက်တယ်လို့ သိရပါတယ်။

အသတ်ခံရသူ ပျူခေါင်းဆောင်ဆိုသူက ဦးမြင့်ဝင်း ၅၀ နှစ်ဖြစ်ပြီး၊ သူက တောင်ယာထဲမှာ ရှိနေချိန် မြို့ပြပြောက်ကျားအဖွဲ့က ပစ်ခတ်ရှင်းလင်းခဲ့တာဖြစ်တယ်လို့ အဖွဲ့ဝင်ရဲဘော်တဦးက ပြောပါတယ်။

“သေနတ် ၂ ချက် ပစ်ခတ်ရှင်းလင်းခဲ့တာပါ။ သူအသတ်ခံရတဲ့နေ့မှာပဲ စကစတွေက ရွာထဲကို ရောက်လာပြီးတော့ အိမ်ထောင်စုစာရင်းကောက်တယ်။ ပြီးတော့ ကောင်လေး ၂ ယောက်ကို ဖမ်းသွားတယ်။ နောက်ပြီးတော့ တခြားရွာက ကောင်လေးတယောက်ကိုလည်း ဖမ်းသွားတယ်” လို့ ဆိုပါတယ်။

ဖမ်းဆီးခံလိုက်ရတဲ့ လူငယ် ၃ ဦးဟာ အသက် ၂၀ အရွယ် ရှိကြပြီး လွန်တောင်းကျေးရွာက ၂ ဦး၊ ကျူံးကျေးရွာက ၁ ဦးတို့ဖြစ်ကာ ဇန်နဝါရီ ၂၂ ရက် မနက်ပိုင်းမှာ စစ်ကောင်စီက သူတို့ရဲ့ရုပ်အလောင်းကို လာယူဖို့ ကျေးရွာအုပ်ချုပ်ရေးမှူးကို အကြောင်းကြားလာခဲ့တယ်လို့ ဒေသခံတဦးက ပြောပါတယ်။

“ဒီကလေး ၃ ယောက်က PDF အဖွဲ့ဝင်တွေဗျ။ ဘယ်အဖွဲ့ရဲ့ အဖွဲ့ဝင်ဆိုတာကိုတော့ မသိရဘူး။ စကစက ဒီကောင်လေးတွေကို သတ်ပြီးတော့ ရွာကအုပ်ချုပ်ရေးမှူးကို အလောင်းလာယူဖို့ ဖုန်းဆက်ပြောလာတယ်ဗျ။ မတ္တရာမြို့ထဲကို ဖမ်းခေါ်သွားပြီးတော့ သတ်လိုက်တာ” လို့ ဆိုပါ တယ်။

အခုလို ဖမ်းဆီးအသတ်ခံလိုက်ရသူ ၃ ဦးထဲမှ ကျူံးရွာသားရဲ့အမည်မှာ ဒင်ကြီး ၂၁ နှစ်ဖြစ်ပြီး သူတို့တွေဟာ PDF အဖွဲ့ဝင်တွေ ဟုတ်၊မဟုတ်ကိုတော့ မြေလတ်အသံအနေနဲ့ သီးခြားအတည်မပြုနိုင်သေးပါ။

ဒါ့အပြင် သူတို့ ၃ ဦးကို သတ်ဖြတ်လိုက်တဲ့ စစ်ကောင်စီတပ်သားတွေကတော့ (၉၅) တပ်ရင်းနဲ့ မန္တလေးနန်းတွင်းတပ်ရင်းတွေက ဖြစ်နိုင်တယ်လို့ ဒေသခံတွေက ခန့်မှန်းပြောဆိုကြပါတယ်။

မန္တလေး၊ ဒီဇင်ဘာ ၂၈၊ ၂၀၂၂။

မန္တလေးတိုင်း၊ မြင်းခြံမြို့နယ်ထဲက ပျူစောထီးရွာတရွာဖြစ်တဲ့ ဆုံကျေးရွာကို ကာကွယ်ရေးအဖွဲ့တွေကတိုက်ခိုက်နေချိန် ပျူတွေဘက်ကို စစ်ကူပေးဖို့ထွက်လာတဲ့စစ်ကောင်စီကားတစီး မိုင်းဆွဲခံခဲ့ရတယ်လို့ သိရပါတယ်။

ဒီဇင်ဘာလ ၂၇ ရက်မနေ့ကမနက်အစောပိုင်း ၂ နာရီလောက်က နဘူးအိုင်ရွာကနေ စစ်ကူထွက်လာတဲ့ကားကို ဆီမီးခုံ-နဘူးအိုင် လမ်းပိုင်းတနေရာမှာ ကြားဖြတ်ပြီး ပဒေသာမိုင်း ၅ လုံးဆွဲတိုက်ခိုက်ခဲ့တာလို့ နောင်ရိုးအထူးပြောက်ကျားတပ်ရဲ့ ရဲဘော်တဦးက ပြောပါတယ်။

“နဘူးအိုင်ကနေ မှန်လုံကားသေးတစီး စစ်ကူထွက်လာတာ၊ စစ်သားတွေတပ်ကူလာမယ့်လမ်းမှာ ကြိုတင်ပြင်ဆင်ပြီး မိုင်းဆင်ထားတာပါ၊ နဘူးအိုင်နဲ့ပျူရွာ (ဆုံရွာ)က ဆိုင်ကယ်နဲ့ဆို မိနစ်၂၀လောက်ပဲဝေးတာ။ မိုင်းဆွဲခံရတဲ့ကားကတော့ နဘူးအိုင်ကို ကြိုးနဲ့ဆွဲပြီးပြန်သွားရတယ်”လို့ ပြောပါတယ်။

မိုင်းဆွဲတိုက်ခိုက်ခံရလို့ စစ်ကောင်စီတပ်သား ၄ ဦးသေဆုံးကာ ကားပျက်စီးခဲ့ပြီး၊ သေဆုံးအလောင်းတွေနဲ့ကားကို နဘူးအိုင်ရွာထဲကိုပဲ ပြန်သယ်သွားတယ်လို့ တပ်တွင်းသတင်းပေးတွေရဲ့ပြန်ပြောချက်အရ အတည်ပြုထားနိုင်ခဲ့တယ်လို့ ဆိုပါတယ်။

အဆိုပါတိုက်ခိုက်မှုကို နယ်မြေခံအဖွဲ့တွေဖြစ်တဲ့ မြင်းခြံခရိုင်တပ်ရင်း အမှတ် ၆၊ တပ်ခွဲ-၁ နောင်ရိုးအထူးပြောက်ကျားတပ် NYSGFနဲ့အတူ မြင်းခြံခရိုင် တပ်ရင်းအမှတ်-၁ 27 revolution forceတို့ ပူးပေါင်းလုပ်ဆောင်ခဲ့တာလည်း ဖြစ်ပါတယ်။

ဒါ့အပြင် မနေ့ကမနက် ဆုံရွာတိုက်ခိုက်မှုမှာတော့ အဲ့ဒီရွာက ပျူစောထီး ၃ ဦးသေဆုံးခဲ့ပြီး ၁၀ ဦးထပ်မနည်း ထိခိုက်ဒဏ်ရာရရှိခဲ့တယ်လို့ သိရပါတယ်။

မန္တလေး၊ ဒီဇင်ဘာ ၂၈၊ ၂၀၂၂။

မန္တလေးတိုင်း၊ မတ္တရာမြို့နယ်၊ ပိုဝမြောက်ရွာနဲ့ စိန်ပန်းကုန်းရွာကဖမ်းဆီးခံလိုက်ရတဲ့ ဒေသခံ ၁၈ ဦးထဲက ၁၅ ဦးကို ဒီဇင်ဘာလ ၂၈ ရက်ဒီမနက်မှာ ပြန်လွှတ်ပေးခဲ့ပေမယ့် အဲဒီထဲက စစ်သင်တန်းဆင်းထားသူ ၃ ဦးကိုတော့ ဆက်လက်ဖမ်းဆီးထားတယ်လို့ သိရပါတယ်။

ပြန်မလွှတ်ခဲ့သူ ၃ ဦးကတော့ အသက် ၂၃ နှစ်အရွယ် ကိုနိုင်းနိုင်း(ခ)နိုင်းထက်ကျော်၊ ကိုပြည့်ပြည့်ကျော်နဲ့ အသက် ၂၉ နှစ်အရွယ် ကိုအောင်မျိုးနိုင်တို့ဖြစ်ကြပြီး၊ သူတို့ကို စစ်ကောင်စီတပ်သားတွေက စစ်ကြောင်းနဲ့အတူ မတ္တရာမြို့ဘက်ကို ခေါ်သွားတယ်လို့ နွေဦးတော် လှန်ရေး – မတ္တရာမှ တာဝန်ရှိသူတဦးက ပြောပါတယ်။

“အဲဒီသုံးယောက်က နယ်စည်းမခြားတပ်ရင်း ၁၈ ကနေ သင်တန်းဆင်းပြီး ပကဖဖွဲ့ဖို့ ရွာတွေပြန်ဆင်းလာတဲ့လူငယ်တွေပါ။ သူတို့နဲ့တူတူ ဖမ်းခံထားရတဲ့ပြည်သူတွေကိုတော့ ပြန်လွှတ်ပေးခဲ့တယ်။ စကစတွေက အဲဒီလူငယ်သုံးယောက်ကို ကြိုးတုတ်ပြီးတော့ ပိုဝရွာကနေ မတ္တရာဘက်ကို ထွက်သွားကြတယ်” လို့ ဆိုပါတယ်။

အခုပြန်လွှတ်ခဲ့တဲ့ပြည်သူ ၁၅ ဦးနဲ့ စစ်သင်တန်းဆင်း ၃ ဦးတို့ကို စစ်ကောင်စီတပ်သားတွေက ဒီဇင်ဘာလ ၂၆ ရက်မှာ ဖမ်းဆီးခဲ့တာဖြစ်ပြီး၊ သူတို့ကတော့ စိန်ပန်းကုန်းရွာက ၄ ဦးနဲ့ ပိုဝမြောက်ရွာက ၁၄ ဦးတို့ဖြစ်ကြပါတယ်။

“စကစတွေက သူတို့အကုန်လုံးကိုဖမ်းပြီးတော့ ပိုဝမြောက်ရွာက ကျော်မျိုးဝင်းဆိုတဲ့ သူရဲ့နေအိမ်ထဲမှာ သော့ခတ်ပြီးပိတ်ထားတာ။ သူတို့မလွှတ်လာခင် မနေ့ကအဲဒီရွာအနားမှာ ကာကွယ်ရေးတပ်ဖွဲ့တွေနဲ့ အပြန်အလှန်ပစ်ခတ်တာ ဖြစ်ခဲ့သေးတယ်။ ကြာကြာတော့ မဟုတ်ဘူး။ အဲဒီပစ်ခတ်နေတဲ့အချိန်မှာ ကျော်မျိုးဝင်းဆိုသူက ပထဆုံးထွက်ပြေးလွတ်မြောက်လာခဲ့တယ်။ ဒီမနက်ရောက်တော့ ကျန်တဲ့သူတွေကို ပြန်လွှတ်ပေးခဲ့ပြီးတော့ သင်တန်းဆင်းသုံးယောက်ကို ကြိုးတုတ်ပြီး ရွာကနေ ထွက်သွားကြတာ”လို့ အထက်ပါ တာဝန်ရှိသူက ဆိုပါတယ်။

အလားတူ ပြီးခဲ့တဲ့ဒီဇင်ဘာလ ၂၄ ရက်မှာလည်းစစ်ကောင်စီတပ်တွေက စိန်ပန်းကုန်းရွာကို မီးရှို့ပြီး ဒေသခံ ၄ ဦးကို ဖမ်းဆီးသွားခဲ့ရာ အဲဒီထဲက ၁ ဦးရဲ့ရုပ်အလောင်းကိုတော့ ဒီဇင်ဘာလ ၂၇ ရက်မနေ့ကမနက်ပိုင်းမှာ တွေ့ရှိခဲ့ရတယ်လို့ ဒေသခံတွေက ပြောပါတယ်။

အဆိုပါစစ်ကောင်စီတပ်တွေအနေနဲ့ ခုလိုကျေးရွာတွေကိုမီးရှို့ပြီး ဒေသခံတွေကို ဖမ်းဆီးနေတာဟာ ဒီဇင်ဘာလ ၂၃ ရက်က စိန်ပန်းကုန်းကျေးရွာအနီးမှာ စစ်ကောင်စီရဲ့မော်တော်ဘုတ်တစင်း ဒရုန်းနဲ့တိုက်ခိုက်ခံလိုက်ရတာကို အခဲမကြေတဲ့အတွက် လုပ်ဆောင်နေတာဖြစ်နိုင်တယ်လို့ ကာကွယ်ရေးတပ်ဖွဲ့တွေနဲ့ ဒေသခံတွေက ခန့်မှန်းပြောဆိုနေကြပါတယ်။

မန္တလေး၊ ဒီဇင်ဘာ ၂၈၊ ၂၀၂၂။

မန္တလေးတိုင်း၊ မတ္တရာမြို့နယ်၊ စိန်ပန်းကုန်းကျေးရွာကနေ စစ်ကောင်စီတပ်တွေဖမ်းဆီးသွားခဲ့တဲ့ အမျိုးသား ၄ ဦးထဲက ၁ ဦးရဲ့ရုပ်အလောင်းကို ဒီဇင်ဘာလ ၂၇ ရက်မနေ့ကမနက် ၉ နာရီဝန်းကျင်မှာ တွေ့ရှိခဲ့တယ်လို့ သိရပါတယ်။

အဲဒီရုပ်အလောင်းကိုတော့ ပိုဝမြောက်ရွာရဲ့ အရှေ့ဘက်တံတားအနီးက တောစပ်မှာ ထွက်ပြေးတိမ်းရှောင်နေတဲ့ဒေသခံတွေက တွေ့ရှိခဲ့တာလို့ နွေဦးတော်လှန်ရေး – မတ္တရာမှ တာဝန်ရှိသူက မြေလတ်အသံကို ပြောပါတယ်။

“အလောင်းတွေ့ခဲ့ရတဲ့ဒေသခံက စိန်ပန်းကုန်းရွာအနောက်ဘက် မြေနုကျွန်းမှာ တောင်သူလုပ်နေတဲ့ စစ်ကိုင်းတိုင်းဘက် မင်းရွာတောင်ကလို့ သိရပါတယ်။ တယောက်ထဲ တွေ့သေးတာပါ။ နောက်တယောက်ကို ရှာဖွေနေပါတယ်။ အလောင်းက တော်တော်စုတ်ပြတ်နေပြီ။ ခေါင်းလည်းပြားနေတယ်”လို့ ဆိုပါတယ်။

ပြီးခဲ့တဲ့ဒီဇင်ဘာလ ၂၄ ရက်မှာ စစ်ကောင်စီတပ်တွေက စိန်ပန်းကုန်းကျေးရွာကို မီးရှို့ခဲ့ပြီး အဲ့ဒီကျေးရွာတွေဘက်မှာ လာရောက်စစ်ရှောင်ရင်း တောင်ယာလုပ်နေတဲ့ဒေသခံ ၄ ဦးကို ဖမ်းဆီးသွားကာ အဲဒီထဲက ၁ ဦးရဲ့ ရုပ်အလောင်းကို တွေ့ရှိခဲ့ရတာဖြစ်ပါတယ်။

ဒါ့အပြင်ကျန်တဲ့ဖမ်းဆီးခံ ၃ ဦးထဲက ၂ ဦးမှာတော့ မတ္တရာမြို့ရဲစခန်းမှာ ချုပ်နှောင်ခံထားရပြီး ကျန် ၁ ဦးကိုတော့ ဒီဇင်ဘာလ ၂၈ ရက်ဒီကနေ့မနက်အထိ ရှာမတွေ့သေးဘူးလို့ အထက်ပါတာဝန်ရှိသူက ပြောပါတယ်။

“မီးရှို့တဲ့နေ့က လေးယောက်ဖမ်းခံရတာ။ အဲဒီလေးယောက်မှာ နှစ်ယောက်ကတော့ ရဲစခန်းကို ရောက်နေတယ်လို့ သိရတယ်။ တယောက်ကတော့ အလောင်းတွေ့တယ်။ ကျန်တယောက်ကတော့ အခုထိရှာမတွေ့သေးဘူး။ သူတို့လေးယောက်စလုံးရဲ့ နာမည်တွေကိုတော့ သိရအောင် စုံစမ်းနေပါတယ်”လို့ ဆိုပါတယ်။

စစ်ကောင်စီရဲ့ မီးရှို့တာကို ခံလိုက်ရတဲ့ စိန်ပန်းကုန်းကျေးရွာမှာ အိမ်ခြေ ၁၅၀ ကျော်ရှိပြီး၊ အဲဒီထဲက နေအိမ် ၁၂ လုံး ပြာကျပျက်စီးသွားခဲ့ရသလို ကျေးရွာသူ၊သားတွေအနေနဲ့လည်း အခုအချိန်ထိ ဘေးလွတ်ရာမှာ တိမ်းရှောင်နေကြရတယ်လို့ သိရပါတယ်။

မန္တလေး၊ ဒီဇင်ဘာ ၂၇၊ ၂၀၂၂။

မန္တလေးတိုင်း၊ မန္တလေးမြို့ပေါ်က ပုဂ္ဂလိကပိုင် ဆေးရုံ ၅ ရုံမှာ ဒီဇင်ဘာလ ၃၁ရက်ကစပြီး ဆေးကုသခွင့်ကိုယာယီပိတ်မယ်လို့ စစ်ကောင်စီကစီစဥ်နေကြောင်း သတင်းတွေ ထွက်ပေါ်နေတယ်လို့ သိရပါတယ်။

မြို့တော်၊ နန်းတော်၊ ကံ့ကော်၊ ထက်နေလင်း၊ စိန်ပန်း စတဲ့ဆေးရုံတွေဖြစ်ကြပြီး၊ အဲဒီဆေးရုံ ၅ ရုံထဲက နန်းတော်နဲ့ ကံ့ကော်ဆေးရုံကတော့ ဒီဇင်ဘာလ ၂၇ ရက်ဒီကနေ့ကစလို့ လူနာတွေကို ပြောင်းရွေ့ပေးနေကြပြီလို့သိရကြောင်း MDY Revolution မှတာဝန်ရှိသူတဦးက မြေလတ်အသံကို ပြောပါတယ်။

“လူနာတွေ ဒီနေ့မှာပြောင်းရွေ့နေရတယ်ဆိုတာကို ကိုယ်တိုင်ပြောင်းရွေ့နေရတဲ့သူတယောက်က ပြောလို့သိရတာ။ ဘာဖြစ်လို့ပြောင်းရွေ့လည်းဆိုတာကိုတော့ ဆေးရုံအနေနဲ့ မပြောဘူးတဲ့။ ကံကော်နဲ့ နန်းတော်ဆေးရုံက လူနာတွေကို မင်္ဂလာပုဂ္ဂလိကဆေးရုံကို ရွေ့ပြောင်းနေတာပါ။ အခုမင်္ဂလာဆေးရုံမှာ လူနာတွေစုနေကြပြီး လူတောင်မနိုင်တော့ဘူးပြောတယ်”လို့ ဆိုပါတယ်။

စစ်ကောင်စီက အဲဒီဆေးရုံ ၅ ရုံကို ဘာကြောင့်ပိတ်တယ်ဆိုတာ မသိရှိရသေးပေမယ့် အခုလို ဆေးရုံတွေကိုပိတ်မယ်လို့ သတင်းမထွက်မီ အဲဒီဆေးရုံတွေမှာ ဝင်ရောက်လုပ်ကိုင်နေတဲ့ CDM ဆရာဝန်တချို့ ဖမ်းဆီးခံခဲ့ရတယ်လို့လည်း အထက်ပါတာဝန်ရှိသူက ဆက်ပြောပါတယ်။

“သတင်းမထွက်မီ CDM အချို့ ပါသွားတယ်တော့ကြားတယ်။ ဒီမနက် လူနာတွေကို ပြန်လွှတ်နေပြီတဲ့။ လောလောဆယ်သိရတာက နန်းတော်နဲ့ ကံ့ကော်ပိတ်ပြီ။ ကျန်တာဆေးရုံတွေတော့ မသိရသေးပါဘူး။ ကျနော့်အမြင်ကတော့ လကုန်ပိတ်မယ်ဆိုတော့ ဆရာဝန်ကြီးတွေ မထိုင်တော့တာဖြစ်မယ်။ ဒါကြောင့် ပြန်လွှတ်နေတော့ ပိတ်သလောက်နီးပါး ဖြစ်နေပုံရတယ်။ ဘယ်နေ့ပြန်ဖွင့်မယ်တော့ အတိကျမသိရသေးဘူး”လို့ဆိုပါတယ်။

ပြီးခဲ့တဲ့ဒီဇင်ဘာလ ၂၅ ရက်မှာ မန္တလေးဆေးတက္ကသိုလ်က CDM လုပ်ထားတဲ့ ဆီးနဲ့ကျောက်ကပ် ခွဲစိတ်အထူးကူးဆရာဝန်ကြီး ပါမောက္ခဒေါက်တာဝင်းခိုင်မှာ နန်းတော်ပုဂ္ဂလိကဆေးရုံထဲရှိနေချိန် စစ်ကောင်စီရဲ့ဖမ်းဆီးမှုကို ခံလိုက်ရတယ်လို့ ဒေသခံတွေကပြောပါတယ်။

ဒါ့အပြင်အောက်တိုဘာလ ၂၇ ရက်မှာလည်း မန္တလေးက CDM ကျန်းမာရေးဝန်ထမ်းတွေဖြစ်ကြတဲ့ မန္တလေးဆေးတက္ကသိုလ်ခွဲစိတ်ဌာနက ကထိက ဒေါက်တာမင်းဇော်ဦး (ခ) နေမျိုးဦး၊ ကုတင်-၃၀၀ သင်ကြားရေးဆေးရုံက ဒေါက်တာ မကြည်သဒ္ဒါဖြူ၊ သူနာပြု မယွန်းနန္ဒာထွန်း၊ မန္တလေး အထွေထွေ ရောဂါကုဆေးရုံကြီးက သူနာပြု မဇင်မာဝင်း (ခ) သူဇာ၊ မန္တလေးဗဟိုအမျိုးသမီးဆေးရုံက သားဖွားဆရာမ မပိုးသန္တာအောင်တို့ကို ဖမ်းဆီးရမိခဲ့တယ်လို့ စစ်ကောင်စီက အောက်တိုဘာ ၃၁ ရက်မှာ သတင်းထုတ်ပြန်ခဲ့ပါတယ်။

စစ်အာဏာသိမ်းပြီးနောက် CDM ပြုလုပ်ထားတဲ့ ကျန်းမာရေးဝန်ထမ်းပေါင်း ၁၀၈ ဦးအထိ ဖမ်းဆီးခံထားရတယ်လို့ နိုင်ငံရေးအကျဥ်းသားကူညီစောင့်စောက်ရေးအသင်း (AAPP) ရဲ့ စာရင်းအရသိရပါတယ်။