ဖြန့်ဝေ

စလင်း၊ ဩဂုတ် ၃၀၊ ၂၀၂၅။

မကွေးတိုင်း၊ စလင်းမြို့နယ်အတွင်း လေကြောင်းရန်ကာကွယ်နိုင်ရန် အသိပညာပေးလက်ကမ်းစာစောင်တွေကို ဒေသခံပြည်သူတွေနဲ့ ခရီးသွားပြည်သူတွေကို ဖြန့်ဝေပေးခဲ့တယ်လို့ စလင်းမြို့နယ် ပြည်သူ့ကာကွယ်ရေးတပ်ဖွဲ့ဆီက သိရပါတယ်။

ဩဂုတ် ၁၈ ရက်ကနေ ၃၀ ရက်အထိ စလင်းမြို့နယ်အတွင်း စလင်းပကဖ နယ်မြေစိုးမိုးထားတဲ့ ဒေသတွေမှာ လက်ကမ်းစာစောင် ၂,၀၀၀ ကျော်ကို ဖြန့်ဝေပေးခဲ့တာလို့ ဆိုပါတယ်။

“လက်ကမ်းစာစောင်တွေထဲမှာတော့ လေကြောင်းတိုက်ခိုက်ခံလာရရင် ဘယ်လိုရှောင်တိမ်းရမလဲဆိုတာတွေ၊ ဘယ်လိုပြုမူရမလဲဆိုတာတွေနဲ့ လေကြောင်းတိုက်ခိုက်မှုခံရရင် ပုန်းခိုဖို့ ဗုံးခိုကျင်းတွေကို ဗုံးဒဏ်ခံနိုင်အောင် ဘယ်လိုဆောက်လုပ်ရမလဲဆိုတာတွေပါထည့် သွင်းဖော်ပြထားပေးပါတယ်၊” လို့ စလင်းပြည်သူ့ကာကွယ်ရေးတပ်ဖွဲ့ တာဝန်ခံ M4 က ပြောပါတယ်။

စစ်ကော်မရှင်တပ်ဘက်က နေရာအနှံ့လေကြောင်းတိုက်ခိုက်မှုမြင့်တက်လာတာကြောင့် ပြည်သူတွေအတွက် အသိပေးစာစောင်ထုတ်ဝေပေးခဲ့တာဖြစ်ပြီး ယခင်ကလည်း လေကြောင်းရန်၊ လက်နက်ကြီးနဲ့ မြေမြှုပ်မိုင်းအန္တရာယ် အသိပညာပေးဟောပြောမှုတွေလုပ်ခဲ့တယ်လို့ သူကဆက်ပြောပါတယ်။

ဒါ့အပြင် ဒေသခံတွေအနေနဲ့လည်း လေကြောင်းရန်ကိုမပေါ့ဆဖို့ ဆောင်ရန်၊ ရှောင်ရန်တွေနဲ့ ကြိုတင်ပြင်ဆင်မှုကဏ္ဍတွေမှာ ပူးပေါင်းဆောင်ရွက်ကြဖို့လည်း တာဝန်ခံ M4 က အသိပေး ပြောဆိုထားပါတယ်။

စာတည်း – လင်း

စစ်ကိုင်း၊ ဒီဇင်ဘာ ၃၀၊ ၂၀၂၂။

စစ်ကိုင်းတိုင်းထဲမှာရှိတဲ့ အင်တာနက်ဖြတ်တောက်ခံထားရတဲ့ မြို့နယ်တချို့က ပြည်သူတွေဆီကို သပိတ်စစ်ကြောင်းတွေကတဆင့် လူထုလွတ်မြောက်ရေးစာစဉ်တွေ ဖြန့်ဝေလျက်ရှိတယ်လို့ သိရပါတယ်။

ခုခံစစ်တွေစတင်တဲ့ ၂၀၂၁ ခုနှစ်၊ ‌သြဂုတ်လလောက်ကစပြီး လက်ရှိချိန်ထိ အင်တာနက်ဖြတ်တောက်ခံထားရတဲ့ ဒေသတွေရှိနေပြီး အဲ့ဒီဒေသမှာရှိတဲ့ပြည်သူတွေက နိုင်ငံရေးအတွေးခေါ်တွေရနိုင်ဖို့ စာစဉ်ကိုပဲ အားကိုးနေရတဲ့အတွက် ထုတ်လုပ်ဖြန့်ဝေနေတာဖြစ်တယ်လို့ ရတနာပုံတက္ကသိုလ်ကျောင်းသားများသမဂ္ဂရဲ့ တာဝန်ရှိသူတဦးက ပြောပါတယ်။

“နိုင်ငံရေးအတွေးအခေါ် ထည့်သွင်းပေးနိုင်ဖို့က စာစဉ်တွေရဲ့ တာဝန်ဖြစ်တယ်။ အင်တာနက်မရတဲ့‌ဒေသက ပြည်သူတွေဆီကို အင်တာနက်ရတဲ့ဒေသက သတင်းတွေ၊ ဆောင်းပါးတွေ၊ ဖျော်ဖြေစရာတွေ၊ နိုင်ငံရေးအတွေးအခေါ်တွေကို ပေးနိုင်ဖို့၊ အဲ့လိုပဲ အင်တာနက်ဖြတ်တောက်ခံဒေသက လှုပ်ရှားမှုတွေကို အင်တာနက်ပေါ်မှာရှိတဲ့ ပြည်သူတွေဆီ ပြန်ပေးနိုင်မယ့် ပေါင်းကူးတခုအနေနဲ့ ထုတ်ဝေခဲ့တာဖြစ်ပါတယ်”လို့ ဆိုပါတယ်။

စာစဉ်တွေကို ကျေးရွာတွေ၊ စာသင်ကျောင်းတွေ၊ ပကဖ၊ ပအဖအဖွဲ့စည်းတွေ၊ PDF တွေ၊ နိုင်ငံရေးအဖွဲ့စည်းတွေကို ဖြန့်ဝေလျက်ရှိကာ သပိတ်ကော်မတီတွေနဲ့ပူးပေါင်းကာ စစ်ကိုင်းတိုင်းဘက်ကို ဦးစားပေးဖြန့်ဝေဖို့ လုပ်ဆောင်နေပြီး ထုတ်လုပ်မှုကုန်ကြစရိတ် အခက်ခဲတွေလည်း ရှိနေတယ်လို့ ဆိုပါတယ်။

အခုလက်ရှိ ယင်းမာပင် – ဆားလင်းကြီး ရွာပေါင်းစုံသပိတ်ဦးဆောင်ကော်မတီနဲ့ ရတနာပုံတက္ကသိုလ် ကျောင်းသားများသမဂ္ဂ (ရ.တ.က.သ)တို့ ပူးပေါင်းကာ ထုတ်လုပ်ဖြန့်ဝေလျက်ရှိတယ်လို့ သိရပါတယ်။

အခုချိန်ထိ စစ်ကိုင်းတိုင်းအတွင်းက စစ်ကိုင်း၊ ရွှေဘို၊ မုံရွာ စတဲ့မြို့နယ်တွေအပါ မြိုနယ် ၅ ခုမှာသာ အင်တာနက်လိုင်းတွေရနေပြီး ကျန်မြို့နယ်တွေမှာတော့ အင်တာနက်လိုင်းတွေ ဖြတ်တောက်ခံထားရဆဲ ဖြစ်တယ်လို့လည်း သိရပါတယ်။