ဖိုလ်ဝင်တောင်

ယင်းမာပင်၊ မတ် ၁၃၊ ၂၀၂၆။

စစ်ကိုင်းတိုင်း၊ ယင်းမာပင်မြို့နဲ့ ၇ မိုင်အကွာ ဖိုလ်ဝင်တောင်ဘုရားမုခ်ဝအနီး စစ်ကော်မရှင်က ဗုံးကြဲလို့ ပြည်သူ ၂ ဦးအပါအဝင် ၃ ဦးသေဆုံးခဲ့တယ်လို့ ဖြစ်စဥ်ကိုသိထားတဲ့ ဒေသကာကွယ်ရေးအဖွဲ့ဝင်တွေဆီက သိရပါတယ်။

မတ်လ ၁၂ ရက်မနက် ၉ နာရီခန့်မှာ စစ်ကော်မရှင်ဘက်က စက်တပ်လေထီး ၂ စီးဟာ မုခ်ဝအနီးကို ဗုံး ၂ လုံးကြဲချခဲ့တယ်လို့ ဆိုပါတယ်။

“စစ်ကြောင်းဖြတ်ရင်းနဲ့ ပြည်သူတွေကောရှိနေတဲ့အချိန် ဗုံးချခံရတာ။ မြို့နယ်က တပ်ပေါင်းစုတွေသွားနေရင်းနဲ့ ချခံရတာ။ ပြည်သူ ၂ ယောက်သေတယ်။ ရဲဘော် ၁ ယောက်ကျတယ်။ ပြည်သူက ခရီးသွားပြည်သူ ဆိုင်ကယ်စီးနေရင်းနဲ့ဖြစ်သွားတာ”လို့ ဒေသကာကွယ်ရေးအဖွဲ့ဝင်တဦးက ပြောပါတယ်။

ဗုံးစထိမှန်ပြီး အသက် ၅၀ ကျော်အရွယ် ခရီးသွားအမျိုးသား ၁ ဦး၊ အမျိုးသမီး ၁ ဦးနဲ့ အဲ့ဒီနေရာအနီးရှိနေတဲ့ အသက် ၂၀ အရွယ် ဒေသခံကာကွယ်ရေးတပ်ဖွဲ့၀င် ၁ ဦးတို့ သေဆုံးခဲ့တယ်လို့ ဆိုပါတယ်။

ဒါ့အပြင် ခရီးသွား ၅ ဦးနဲ့ PDF အဖွဲ့ဝင် ၃ ဦးဒဏ်ရာရခဲ့ပြီး ထိခိုက်သေဆုံးသူတွေကို စစ်ကြောင်းပါ PDF အဖွဲ့ဝင်တွေက ဘေးလွတ်ရာရွှေ့ပြောင်းပြီး ဆေးကုသမှုပေးနေရတယ်လို့ သိရပါတယ်။

ဒါ့အပြင်မနေ့က မနက်ပိုင်းမှာပဲစစ်ကိုင်းတိုင်း၊ မုံရွာမြို့နယ်၊ တောင်ဘက်ခြမ်းက ကျေးရွာတရွာကို စစ်ကော်မရှင်ဘက်က စက်တပ်လေထီးနဲ့ဗုံးချခံရလို့ PDF အဖွဲ့ဝင် ၁ ဦးနဲ့ပြည်သူ ၁ ဦးဒဏ်ရာရတယ်လို့ သိရပါတယ်။

စာတည်း – လင်း

သိုက်ထွန်း

မြေလတ်အသံ၊ ဇူလိုင် ၉၊ ၂၀၂၅။

စစ်ကိုင်းတိုင်း၊ ယင်းမာပင်ခရိုင်အတွင်းမှာရှိတဲ့ သမိုင်းဝင်ဖိုလ်ဝင်တောင်ဘုရားကို ဘုရားဖူးလာရောက်လည်ပတ်သူများတာကြောင့် ဖိုလ်ဝင်တောင်ရှိ မျောက်တွေ အစာအတွက် တဒင်္ဂပြေလည်ခဲ့တယ်လို့ ဒေသခံတွေထံက သိရပါတယ်။

ဒီကနေ့ ဇူလိုင် ၉ ရက်ဟာ ဝါဆိုလပြည့်နေ့ဖြစ်တာကြောင့် ဖိုလ်ဝင်တောင်နဲ့ ရွှေဘတောင်တွေကို ဘုရားဖူးလာရောက်သူ ထောင်နဲ့ချီတဲ့အထိအများအပြားရှိနေပြီး ဘုရားဖူးလာရောက်သူတွေက မျောက်တွေကို အစာကျွေးကုသိုလ်ယူကြတာကြောင့် မျောက်စာအတွက်ခဏတာအဆင်ပြေတယ်လို့ ဆိုပါတယ်။

” မျောက်အကောင်ရေ ၁,၀၀၀ နီးပါးရှိတာ၊၊ အခါကြီးရက်ကြီးမှသာ ဘုရားဖူးပြည်သူတွေပေါလို့ အဆင်ပြေတာ၊ ပုံမှန်ရက်ဆို မျောက်တွေအတွက် အစာ ရေစာသိပ်ရှားပါးတာ”လို့ ဖိုလ်ဝင်တောင်ဒေသခံအမျိုးသမီးတဦးက မြေလတ်အသံကို ပြောပါတယ်။

ဖိုလ်ဝင်တောင်နဲ့ ရွှေဘတောင်ဟာ ၁ ဖာလုံသာကွာဝေးပြီး ဘုရားဖူးပြည်သူတွေက နွားသိုးတောင်၊ ရွှေဘတောင်၊ ဖန်းခါးတောင်စတဲ့နေရာတွေအထိလာရောက်ကာ မျောက်စာကိုယူဆောင်ကျွေးကျသလို တောင်ပေါ်ရောက်မှ ဝယ်ကျွေးကြသူတွေလည်းများပြားတယ်လို့ ဆိုပါတယ်။

၂၀၁၉ ကိုဗစ်ကပ်ရောဂါစတင်ဖြစ်ပွားချိန်ကစပြီး စစ်အာဏာသိမ်းပြီးနောက် ၂၀၂၅ ယခုနှစ် အစောပိုင်းကာလတွေအထိ ဖိုလ်ဝင်တောင်၊ ရွှေဘတောင်တွေကို ဘုရားဖူးလာရောက်သူမရှိတာကြောင့် အထက်ပါတောင်တွေမှာနေထိုင်နေတဲ့ မျောက်တွေအတွက် ကာလရှည်ကြာ အစာရေစာရှားပါးခဲ့တယ်လို့ သိရပါတယ်။

ဘုရားဖူးလာရောက်မှုမရှိတဲ့ကာလတွေမှာ မျောက်တွေဟာ အစာရေစာရှားပါးလာလို့ ဖိုလ်ဝင်တောင်ရွာနဲ့အနီးတဝိုက်က လူနေအိမ်တွေအတွင်းအထိ ဝင်ရောက် အစာရှာဖွေတာတွေလုပ်ဆောင်လာတာကြောင့် အခက်ကြုံတွေ့ရမှုတွေရှိခဲ့တယ်လို့ ဒေသခံတွေက ပြောပါတယ်။

ယနေ့ ဝါဆိုလပြည့်နေ့မှာ ဒေသတွင်းကပြည်သူထောင်နဲ့ချီ ဘုရားဖူးလာကြပေမယ့် အာဏာမသိမ်းမီကာလတွေနဲ့ နှိုင်းယှဥ်ပါက ၃ ပုံ ၁ ပုံခန့်သာ ဘုရားဖူးလာရောက်မှုရှိတယ်လို့ ဒေသခံတွေနဲ့ ဖိုလ်ဝင်တောင်နေထိုင်သူတွေက သုံးသပ်ပြောဆိုပါတယ်။

စစ်အာဏာသိမ်းပြီးချိန်ကစပြီး လက်ရှိကာလအထိ အခါကြီးရက်ကြီးတွေဖြစ်တဲ့ ဝါဆိုလပြည့်၊ သီတင်းကျွတ်လပြည့်၊ တန်ဆောင်မုန်းလပြည့်နဲ့ တန်ခူးလသင်္ကြန်ကာလအတွင်းသာ ဘုရားဖူးလာရောက်သူတွေရှိတာကြောင့် အဆိုပါနေ့ရက်တွေမှာ မျောက်စာအတွက်အဆင်ပြေကြပေမယ့် ဘုရားဖူးလာရောက်မှု မရှိတဲ့ ကျန်ရက်အများစုမှာတော့ မျောက်တွေအတွက် အစားအစာရှားပါးနေဆဲဖြစ်တာကြောင့် မျောက်စာလှူဒါန်းမယ့် ကုသိုလ်ရှင်၊ စေတနာရှင်တွေ လိုအပ်နေဆဲဖြစ်ပါတယ်။

စာတည်း – ဟိန်းစံ