ဖမ်းမိ

မြေလတ်အသံ၊ ဒီဇင်ဘာ ၈၊ ၂၀၂၅။

မကွေးတိုင်း၊ ငဖဲမြို့နယ်၊ အမ်း-ပဒါန်းလမ်းပိုင်းရှိ စစ်ကော်မရှင်တပ်စခန်းနဲ့တိုက်ပွဲတို့က ဘက်ပြောင်း ထွက်ပြေးလာတဲ့ ဒုတပ်ကြပ် ၁ ဦးအပါအဝင် ၄ ဦးဘက်ပြောင်းလာကာ တပ်သား ၃ ဦးကိုလည်းအရှင်ဖမ်းမိပြီးထိန်းသိမ်းထားတယ်လို့ လူထုတော်လှန်ရေးမဟာမိတ်အင်အားစု (PRA – Magway) က ဒီဇင်ဘာ ၇ ရက်မှာ ထုတ်ပြန်ပါတယ်။

ဘက်ပြောင်းခိုလှုံလာသူ ၄ ဦးမှာ အသက် ၁၉ နှစ်ကနေ ၂၅ နှစ်အရွယ်ရှိ ဒုတပ်ကြပ် ၁ ဦးနဲ့ တပ်သား ၃ ဦးတို့ဖြစ်ပြီး နတ်ရေကန်ကာကင်းစခန်းဖြစ်တဲ့ ငဖဲမြို့နယ်၊ ဇင်ပြွန်းရွာစခန်းကနေ အောက်တိုဘာလအတွင်းမှာ PRA-Magway ထံချိတ်ဆက်ပြီး လက်နက်ချဘက်ပြောင်းလာခဲ့တာလို့ ဆိုပါတယ်။

“ဇင်ပြွန်းရွာမှာ နတ်ရေကန်ရဲ့ကာကင်းစခန်းရှိတယ်။ အဲ့မှာတော့ အင်အားတရင်းစာလောက် ဝန်ထမ်း အင်အား ၁၀၀ ကျော်လောက်စုဖွဲ့ထားတာ။ သူတို့ (စကမ) ရဲ့ နတ်ရေကန်ရှေ့တန်းစခန်း ဖြစ်တယ်။ သူတို့က ရှေ့တန်းစခန်းမှာဘဲ ချိတ်ဆက်ပြီးတော့မှ ကျနော်တို့ဆီကို CDM လုပ်ပြီးတော့ အလင်းဝင်ရောက်လာတာ”လို့ PRA-Magway မှ တာဝန်ရှိသူက ပြောပါတယ်။

အဆိုပါ ဒုတပ်ကြပ်အပါအဝင် ၄ ဦးဟာ CDM လုပ်ပြီး ဘက်ပြောင်းလာတာကြောင့် သူတို့ကို လုံခြုံတဲ့နေရာတခုမှာစောင့်ရှောက်ပေးထားတယ်လို့ သူကဆိုပါတယ်။

အဲ့ဒီစစ်ကော်မရှင်တပ်သား ၄ ဦးဟာ အာရက္ခတပ်တော် – AA သိမ်းပိုက်ထားတဲ့ ရခိုင်ပြည်နယ်၊ ဂွမြို့နယ်အခြေစိုက် ခမရ-၅၆၃ လက်အောက်ခံတပ်ရင်းကဖြစ်ပြီး သူတို့ဆီကနေ MA – 1 ၁ လက်၊ MA- 2 ၁ လက်၊ MA – 3 ၂ လက်နဲ့ တခြားခဲယမ်းအချို့ရရှိခဲ့တယ်လို့ PRA-Magway တာဝန်ရှိသူက ပြောပါတယ်။

ဒါ့အပြင် နတ်ရေကန်တောင်နဲ့ အမ်း-ပဒန်း လမ်းပိုင်းတိုက်ပွဲတွေက ထွက်ပြေးလာတဲ့ ခလရ-၂၉၅ နဲ့ ခလရ-၃၅ တပ်ရင်းတို့မှ လက်နက်မဲ့စစ်ကော်မရှင်တပ်ဖွဲ့ဝင် ၃ ဦးကို ငဖဲမြို့နယ်အတွင်းတနေရာမှာ နိုဝင်ဘာလအတွင်းက ဖမ်းဆီးရမိခဲ့တယ်လို့ ဆိုပါတယ်။

“ထွက်ပြေးတိမ်းရှောင်လာတဲ့ စစ်ကောင်စီတပ်ဖွဲ့ဝင် ၃ ဦးကိုတော့ ကျနော်တို့နတ်ရေကန်တိုက်ပွဲမှာဘဲ ဖမ်းဆီးရမိတာဖြစ်တယ်။ သူတို့က နတ်ရေကန်မှာကျနော်တို့နဲ့တိုက်ပွဲ ဖြစ်နေတဲ့အချိန်မှာ လက်နက်တွေစွန့်ပြီး သူတို့ထွက်ပြေးတဲ့အနေအထားမှာ ဖမ်းဆီးရမိထားတာဖြစ်တယ်”လို့ အထက်ပါ တာဝန်ရှိသူက ပြောပါတယ်။

အဆိုပါဖမ်းမိသူ ၃ ဦးကိုတော့ CDM လုပ်လာသူတွေနဲ့မတူဘဲ စစ်သုံ့ပန်းဥပဒေနဲ့အညီ အရေးယူပြီး အကျဥ်းထောင်မှာ ထိန်းသိမ်းထားတယ်လို့ သူကဆိုပါတယ်။

ပြီးခဲ့တဲ့စက်တင်ဘာလအတွင်းကလည်း ငဖဲမြို့နယ်၊ နတ်ရေကန်တောင်တိုက်ပွဲမှ ထွက်ပြေးလာတဲ့ စစ်ကော်မရှင်တပ်ဖွဲ့ဝင် ၂၇ ဦးကို လူထုတော်လှန်ရေးမဟာမိတ်အင်အားစု (PRA – Magwa y)က ဖမ်းမိ ပြီး ဥပဒေနဲ့အညီ ထိန်းသိမ်းထားတယ်လို့ သိရပါတယ်။

စာတည်း – လင်း

ပေါက်၊ နိုဝင်ဘာ ၂၁၊ ၂၀၂၅။

မကွေးတိုင်း၊ ပေါက်မြို့နယ်ရှိ စစ်ကော်မရှင်တပ်နဲ့ ပျူစောထီးတွေအထိုင်ချတပ်စွဲထားတဲ့ကျေးရွာတွေထဲအထိ ဒေသခံတော်လှန်ရေးတပ်တွေက စီးနင်းတိုက်ခိုက်ခဲ့ပြီး စစ်ကော်မရှင်တပ်သား ၃ ဦးနဲ့ လက်နက်ခဲယမ်းတွေကိုသိမ်းဆည်းရရှိခဲ့တယ်လို့ မြိုင်မြို့နယ်ပြည်သူ့ကာကွယ်ရေးတပ်ဖွဲ့ဆီက သိရပါတယ်။

နိုဝင်ဘာ ၁၈ ရက်ကနေ ၂၀ ရက်အတွင်း ပေါက်မြို့နယ်တောင်ပိုင်းရှိ ဝန်ကျုံး၊ သစ်ချိုကုန်း၊ ထန်းပေါက်ကုန်း၊ ချိုင်စောက်၊ ဖလံရွာကိုင်း၊ ကျောက်တိုင်ခင်ရွာနဲ့ ညောင်စင်တောတိုက်တို့မှ စစ်ကော်မရှင်နဲ့ ပျူစောထီးတွေကိုတိုက်ခိုက်ခဲ့ရာ ထန်းပေါက်ကုန်းရွာအနီးမှာ စစ်ကော်မရှင်တပ်သား ၃ ဦးကို လက်နက်ခဲယမ်းတွေနဲ့ ဖမ်းမိခဲ့တယ်လို့ ဆိုပါတယ်။

“မနေ့က အရှင်ဖမ်းမိတာ၊ သူတို့ကို ဖမ်းမိတာက ဒီကောင်တွေက အစာအာဟာရပြတ်နေပြီ၊ ဒီကောင်တွေစစ်ကြောင်းကို လိုက်ရှင်းရင်းနဲ့မိတာ၊ ထန်းပေါက်ကုန်းရွာ အရှေ့တောင်ဘက်မှာ ဖမ်းမိတာ”လို့ မြိုင်မြို့နယ် ပြည်သူ့ကာကွယ်ရေးတပ်ဖွဲ့တာဝန်ခံ ဗိုလ်လက်ယာက မြေလတ်အသံကို ပြောပါတယ်။

နိုဝင်ဘာ ၁၈ ရက်မှာ ဝန်ကျုံးရွာနဲ့ သစ်ချိုကုန်းရွာတို့ကို တိုက်ခိုက်သိမ်းပိုက်ခဲ့တာဖြစ်ပြီး နိုဝင်ဘာ ၁၉ ရက်မှာ ချိုင်စောက်ရွာ၊ ဖလံရွာကိုင်းရွာ၊ ညောင်စင်တောတိုက်ရှိ စစ်ကော်မရှင်တပ်တွေကို တိုက်ခိုက်ကာ နိုဝင်ဘာ ၂၀ ရက်မှာ ထန်းပေါက်ကုန်းရွာနဲ့ ကျောက်တိုင်ခင်ရွာကို တိုက်ခိုက်ချိန် စစ်ကော်မရှင်တပ်ဖွဲ့ ၃ ဦးကိုဖမ်းမိခဲ့တာလည်း ဖြစ်ပါတယ်။

ဖမ်းဆီးခံရသူတွေဟာ တပ်မ ၄၁၈ မှ အသက် ၂၆ နှစ်အရွယ်တပ်သားအောင်ပိုင်ဦး၊ ၁၉ နှစ်အရွယ် ညီညီနိုင်နဲ့ တပ်မ ၄၁၉ မှ ၃၂ နှစ်အရွယ် တပ်သားထွန်းမင်းဇော်ကတော့ဖြစ်တယ်လို့ ဆိုပါတယ်။

တပ်သားအောင်ပိုင်ဦးနဲ့ ညီညီနိုင်တို့ဟာ စစ်မှုထမ်းအပတ်စဥ် ၁၅ ဆင်းထားသူတွေဖြစ်ပြီး တပ်သား ထွန်းမင်းဇော်က စစ်မှုထမ်းအပတ်စဥ် ၁၀ ဆင်းထားသူဖြစ်ကာ ပေါက်မြို့နယ်အတွင်းရှိ ရေနံမှော်တွေနဲ့ ဒေသခံတော်လှန်ရေးတပ်တွေစိုးမိုးထားတဲ့နယ်မြေတွေကို စစ်ကြောင်းထိုးဖို့ ပခုက္ကူအခြေစိုက် တပ်မ ၁၀၁ ကိုရောက်ရှိပြီးနောက် စစ်ကြောင်းထိုးလာသူတွေဖြစ်တယ်လို့ ဆိုပါတယ်။

ဒါ့အပြင် အဲ့ဒီတပ်သားတွေဆီက RPG၊ ခြောက်လုံးပြူးသေနတ်နဲ့ ခဲယမ်းတွေကိုလည်းသိမ်းဆည်းရမိခဲ့တယ်လို့ သိရပါတယ်။

တော်လှန်ရေးတပ်တွေဘက်က ဝန်ကျုံးရွာနဲ့ သစ်ချိုကုန်းရွာတွေကိုပူးပေါင်းသိမ်းပိုက်ခဲ့ပြီး ပင်တောင်ရွာကိုတိုက်ခိုက်ချိန်မှာ စစ်ကော်မရှင်ဘက်ကအင်အားအများအပြားနဲ့ စစ်ကူလာတဲ့အတွက် ပြန်လည်ဆုတ်ခွာလာခဲ့ရတယ်လို့ မြိုင်ပကဖက ထုတ်ပြန်ထားပါတယ်။

တော်လှန်ရေးတပ်တွေသိမ်းပိုက်တိုက်ခိုက်ခဲ့တဲ့ ဝန်ကျုံးရွာနဲ့ သစ်ချိုကုန်းရွာမှာ စစ်ကော်မရှင်တပ်နဲ့ ပျူစောထီးအင်အား ၈၀ ဝန်းကျင်လောက်တပ်စွဲနေကြတာဖြစ်ပြီး တိုက်ခိုက်ခံရတာကြောင့် ပင်ထောင်ရွာဆီကို ထွက်ပြေးသွားကြတယ်လို့ ဗိုလ်လက်ယာ ကပြောပါတယ်။

လက်ရှိ ပင်ထောင်ရွာမှာ စစ်ကော်မရှင်အင်အား ၁၈၀ နီးပါးရှိနေပြီး တော်လှန်ရေးတပ်တွေ သိမ်းပိုက်ထားတဲ့ ရွာ ၂ ရွာမှာတော့ စစ်ကော်မရှင်တပ်တွေပြန်လည်နေထိုင်နေတာမရှိဘူးလို့ ဆိုပါတယ်။

ဒါ့အပြင် တိုက်ပွဲဖြစ်ပြီးနောက် ပေါက်မြို့နယ်အတွင်း စစ်ကော်မရှင်တပ်က လေကြောင်း တိုက်ခိုက်မှုတွေ ဆက်တိုက်လုပ်နေတယ်လို့ ဒေသခံတွေဆီက သိရပါတယ်။

စက်တင်ဘာ ၂၈ ရက်ကလည်း မြိုင်မြို့နယ်၊ တွင်းမရွာမှာ ပြည်သူပိုင်ပစ္စည်းတွေကို ဝင်ယူတဲ့ စစ်ကော်မရှင်တပ်ဖွဲ့ဝင်တွေကို မြိုင်မြို့နယ်ပကဖတပ်ဖွဲ့က တိုက်ခိုက်ခဲ့သေးတယ်လို့ သိရပါတယ်။

စာတည်း – လင်း

မြေလတ်အသံ၊ အောက်တိုဘာ ၃၊ ၂၀၂၅။

မကွေးတိုင်း၊ ငဖဲမြို့နယ်၊ ရခိုင်ရိုးမပေါ် အမ်း-ပဒါန်းလမ်းပိုင်းနံဘေးရှိ နတ်ရေကန်တောင်တိုက်ပွဲတွေကနေ ထွက်ပြေးလာတဲ့ စစ်ကော်မရှင်တပ်သား ၂၇ ဦးကို ဖမ်းဆီးရရှိထားတယ်လို့ PRA-Magway က အောက်တိုဘာ ၂ ရက် မနေ့က ထုတ်ပြန်ပါတယ်။

ဖမ်းဆီးရမိသူတွေဟာ စကခ ၁၇ လက်အောက်ခံတပ်ဖွဲ့ဝင် ၂၀ ဦးနဲ့ တပ်မ ၇၇ လက်အောက် ၇ ဦးဖြစ်ပြီး ၂၀ ဦးဟာ စက်တင်ဘာလအတွင်း နတ်ရေကန်တောင်တိုက်ပွဲတွေကထွက်ပြေးလာတဲ့ စစ်မှုထမ်းသင်တန်းဆင်းစစ်ကော်မရှင်တပ်သားတွေဖြစ်ကာ တပ်မ ၇၇ တပ်ဖွဲ့ဝင် ၇ ဦးကတော့ ဇူလိုင်လကတည်းကဖမ်းဆီးရမိထားတာလို့ ဆိုပါတယ်။

” သူတို့က ဒီအတိုင်းပဲစခန်းသိမ်းတိုက်ပွဲမှာ ကြောက်လန့်တကြားထွက်ပြေးလာကြတာ။ သုံ့ပန်းတွေကိုတော့ ကျနော်တို့က ထောင် ပုံစံမျိုးလုပ်ပြီးတော့ သေချာစီမံ ဆောင်ရွက်ကွပ်ကဲထားပါတယ်”လို့ PRA-Magway တာဝန်ရှိသူတဦးက မြေလတ်အသံကို ပြောပါတယ်။

နတ်ရေကန်တောင်ကြောတလျှောက် တိုက်ပွဲတွေပြင်းထန်နေချိန် ခြေဦးတည့်ရာထွက်ပြေးလာတဲ့ အဲ့ဒီစစ်ကော်မရှင်တပ်သားတွေကို PRA-Magwayတပ်ဖွဲ့ဝင်တွေက ကြားဖြတ်ဖမ်းဆီးနိုင်ခဲ့တာဖြစ်ပြီး စစ်သုံ့ပန်းအားလုံးဟာ စစ်မှုထမ်းသင်တန်းအပတ်စဥ် ၇ နဲ့ ၁၃ ဆင်း တပ်သားတွေဖြစ်ကြတယ်လို့ သူကဆိုပါတယ်။

ပြီးခဲ့တဲ့စက်တင်ဘာ ၂၈ ရက်မှာ နတ်ရေကန်စခန်းကုန်းနဲ့ ၂ မိုင်ခန့်အကွာရှိ အင်အား ၁၀၀ ခန့်နဲ့တပ်စွဲထားတဲ့ ဂုတ်ကြီးကျေးရွာကာကင်းစခန်းကို အာရက္ခတပ်တော် – AAနဲ့ ပူးပေါင်းတပ်ဖွဲ့တွေက တိုက်ခိုက်သိမ်းပိုက်ခဲ့ပြီး အဲ့ဒီစခန်းနဲ့တိုက်ပွဲတွေကနေ စကခ ၁၇ လက်အောက်ခံတပ်သားတွေ အများအပြားထွက်ပြေးနေကြတာပါ။

အမ်းမြို့ အနောက်ပိုင်းတိုင်းစစ်ဌာနချုပ်သိမ်းပိုက်ရရှိပြီးနောက် ယခုနှစ်ပိုင်းမှာ အမ်း-ပဒါန်းလမ်းပိုင်း ငဖဲမြို့နယ်အတွင်းအထိ တိုက်ပွဲတွေရောက်ရှိလာခဲ့ပြီး ယခင်နတ်ရေကန်တောင်တိုက်ပွဲတွေဖြစ်တဲ့ ကံမြင်းကန်၊ ဂုတ်စည်းရိုး၊ တာဝါတိုင်စခန်းသိမ်းတိုက်ပွဲတွေမှာလည်း ထွက်ပြေးစစ်ကော်မရှင်တပ်သားတွေကို ငဖဲ အခြေစိုက်ကာကွယ်ရေးတပ်ဖွဲ့တွေက အများအပြားဖမ်းမိခဲ့တာပါ။

စက်တင်ဘာလကုန်ပိုင်း ဂုတ်ကြီးစခန်းသိမ်းတိုက်ပွဲအတွင်း ထွက်ပြေးသူတွေများတာကြောင့် စစ်ကော်မရှင်တပ်က လိုက်လံရှာဖွေခဲ့ပေမယ့် ရှာတဲ့တပ်ဖွဲ့တွေပါ အဆက်အသွယ်ပြတ်တောက်နေကြောင်း ဖမ်းဆီးရမိစစ်သုံ့ပန်းတွေရဲ့ ပြောဆိုချက်ကို ကိုးကားပြီး မြေပြင်တော်လှန်ရေးတပ်ဖွဲ့တွေက ပြောပါတယ်။

ဂုတ်ကြီးစခန်းကို သိမ်းပိုက်ခံရပြီးနောက် အောက်တိုဘာ ၁ ရက်နဲ့ ၂ ရက်မှာ အဓိကပင်မစခန်းကြီးဖြစ်တဲ့ ကမ္ဘာလုံးစခန်းအနီး တိုက်ပွဲတွေပြင်းထန်နေတာကြောင့် စစ်ကော်မရှင်တပ်က စခန်းနဲ့အနီးတဝိုက်ကို တိုက်လေယာဥ်တွေနဲ့ ပစ်ကူပေး ဗုံးကြဲတိုက်ခိုက်ခဲ့တယ်လို့ သိရပါတယ်။

ပြီးခဲ့တဲ့စက်တင်ဘာ ၄ ရက်ကလည်း ငဖဲမြို့အခြေစိုက် အမှတ် ၁၄ ကာကွယ်ရေးပစ္စည်းစက်ရုံ (ကပစ ၁၄) က ထွက်ပြေးလာတဲ့ စစ်ကော်မရှင်တပ်ဖွဲ့ဝင် ၄ ဦး မင်းဘူးခရိုင်အမှတ် ၆ တပ်ရင်းဆီ ဘက်ပြောင်းခိုလှုံလာခဲ့တယ်လို့ သိရပါတယ်။

စာတည်း – ဟိန်းစံ

ကနီ၊ စက်တင်ဘာ ၁၂၊ ၂၀၂၅။

စစ်ကိုင်းတိုင်း၊ ကနီမြို့နယ်၊ ချောင်းမရွာအနီးတိုက်ပွဲမှာ မုံရွာအခြေစိုက် ခမရ ၁၆ စစ်ကော်မရှင် တပ်ဖွဲ့ဝင် ၄ ဦးအရှင်မိပြီး ၃ ဦးသေဆုံးတယ်လို့ အမျိုးသားညီညွတ်ရေးအစိုးရ-NUG ကာကွယ်ရေး ဝန်ကြီးဌာနက စက်တင်ဘာ ၁၂ ရက်ဒီကနေ့မှာ ထုတ်ပြန်ပါတယ်။

ချောင်းမရွာအနီးမှာ ခမရ ၁၆ က ဗိုလ်မှူး သူရိန် ဦးဆောင်တဲ့ အင်အား ၁၀၀ ခန့်ပါ စစ်ကြောင်းကို စက်တင်ဘာ ၁၁ ရက် မနက် ၁၁ နာရီမှာ ဝင်ရောက်တိုက်ခိုက်ခဲ့ရာ စစ်ကောင်မရှင်တပ်ဖွဲ့ဝင်တွေ ထိခိုက်သေဆုံးပြီး ဘန့်ဘွေးရွာကို ဆုတ်ခွာသွားတယ်လို့ ဆိုပါတယ်။

တိုက်ပွဲအတွင်း စစ်ကော်မရှင်စစ်ကြောင်းဆီက အလောင်း ၃ လောင်း၊ စစ်သုံ့ပန်း ၄ ဦး၊ MA-1 ၄ လက်၊ MA-3 ၁ လက်၊ MG-3 ၁ လက်၊ MAS စနိုက်ပါ ၁ လက်၊ ဂျမ်ပါ ၁ လုံးနဲ့ တခြားသော စစ်အသုံးအဆောင်တွေကို သိမ်းဆည်းရမိတယ်လို့ ထုတ်ပြန်ချက်မှာ ဖော်ပြပါတယ်။

အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန ကွပ်ကဲမှုအောက်ရှိ ပြည်သူ့ကာကွယ်ရေးတပ်မတော်၊ တပ်ရင်း၊ တပ်ဖွဲ့များ၊ ပြည်သူ့ကာကွယ်ရေးအဖွဲ့များ (ပကဖ) နဲ့ မဟာမိတ်တပ်တွေက ပူး ပေါင်းတိုက်ခိုက်ခဲ့တာဖြစ်ပါတယ်။

မြေလတ်အသံ၊ ဇူလိုင် ၁၊ ၂၀၂၅။

စစ်ကိုင်းမြို့နယ်၊ မင်းကွန်းတိုက်နယ်ကျေးရွာကို မီးရှို့ဖျက်ဆီးနေတဲ့ စစ်ကောင်စီတပ်စခန်းကို ဝင်ရောက်တိုက်ခိုက်ရာ စစ်သား ၄ ဦးသေဆုံးပြီး ၄ ဦးအရှင်ဖမ်းမိခဲ့တယ်လို့ ဇွန် ၃၀ ရက်‌နေ့မှာ ယူနီကွန်း ပျောက်ကြားတပ်ဖွဲ့က ထုတ်ပြန်ပါတယ်။

မင်းကွန်းတောင်ရွာရှိ နဂါးပတ်တောင်ကျောင်းတိုက်အတွင်း အင်အား ၃၀ခန့်နဲ့ တပ်စွဲထားတဲ့ စခန်းကုန်းကို ဇွန် ၂၇ ရက်နေ့မှာ အလစ်အငိုက်ဝင်ရောက်တိုက်ခိုက်ခဲ့ရာ နာရီဝက်အတွင်း သိမ်းပိုက်နိုင်ခဲ့တာလို့ ဆိုပါတယ်။

“၂၇ ရက်နေ့မှာပါ။ နာရီပိုင်းနဲ့သိမ်းလာနိူင်ပါတယ်။ အလောင်း ၄ လောင်းတွေ့ခဲ့တယ်။ စခန်းကဘုန်းကြီးကျောင်းမှာ တပ်စွဲထားတာဖြစ်လို့ မီးမရှို့ခဲ့ပါ။ ကျန်တဲ့စကစတွေကတော့ မင်းကွန်းထဲကို ထွက်ပြေးကြတယ်ထင်တယ်ဗျ”လို့ ယူနီကွန်းပျောက်ကြားတပ်ဖွဲ့မှ တာဝန်ရှိသူကပြောပါတယ်။

တိုက်ပွဲအတွင်း စစ်ကောင်စီတပ်သား အသက် ၂၀ အရွယ် ၃ ဦးနဲ့ အသက် ၄၀ ကျော်အရွယ် ၁ ဦးတို့ကို ဖမ်းမိပြီး G-3 ၄ လက်၊ MA-1 ၂ လက်အပါအဝင် စစ်အသုံးအဆောင်ပစ္စည်းတချို့တို့ကို သိမ်းဆည်းရရှိခဲ့တယ်လို့ No More Dictatorship People Defence Force-NMDမှတာဝန်ရှိသူက ပြောပါတယ်။

လက်ရှိတိုက်ခိုက်သိမ်းပိုက်ခံရတဲ့ စစ်ကောင်စီစခန်းဟာ မင်းကွန်းတိုက်နယ်ရဲစခန်းနဲ့ ၁ မိုင်ကျော်ခန့်ကွာဝေးသလို စစ်ကောင်စီတပ်က မင်းကွန်းတိုက်နယ်တခုလုံးမှာ အင်အား ၃၀၀ ခန့်နဲ့တပ်ဖြန့်ထားတဲ့ကြားက အခုလိုသိမ်းပိုက်နိုင်ခဲ့တာဖြစ်တယ်လို့လည်း သူကပြောပါတယ်။

ဒီတိုက်ခိုက်မှုကို ယူနီကွန်းပျောက်ကြားတပ်ဖွဲ့ နဲ့ No More Dictatorship (NMD) တို့က ပူးပေါင်းလုပ်ဆောင်ခဲ့တာဖြစ်တယ်လို့ သိရပါတယ်။

အဲဒီစစ်တပ်ဟာ ဇွန် ၂၇ ရက်နေ့၊ မနက်ပိုင်းမှာပဲ မင်းကွန်းကျေးရွာကိုမီးရှို့ဖျက်ဆီးခဲ့သေးတယ်လို့ သိရပါတယ်။

အိမ်ခြေ ၆၀၀ ခန့်ရှိတဲ့ မင်းကွန်းတောင်ရွာကို စစ်ကောင်စီတပ်က ဇွန် ၈ ရက်နေ့ကစတင်ကာ စစ်ကြောင်းထိုးဝင်ရောက်လာခဲ့ပါတယ်။
ဒီစစ်ကြောင်းဟာ မင်းကွန်းရွာရဲ့ မြောက်ဘက်ကတော်လှန်ရေးတပ် တပ်တွေစိုးမိုးထားတဲ့ ကင်းရွာနဲ့ ချောင်းမကြီးရွာတွေကို စစ်ကြောင်းထိုးဝင်ရောက်ခဲ့ပြီး ကျောင်းထိုင်ဆရာတော် ၁ ပါးနဲ့ ပြည်သူ ၃ ဦး ကို သတ်ဖြတ်ခဲ့တယ်လို့ သိရပါတယ်။

အဲဒီနောက် ကင်းရွာနဲ့ ချောင်းမကြီးရွာတို့ကို မီးရှို့ကာ စစ်ကြောင်းနှစ် ကြောင်းခွဲပြီး တပ်စွဲခဲ့တယ်လို့ သိရပါတယ်။

ဇွန် ၂၈ ရက်နေ့မှာလည်း တော်လှန်ရေးပူးပေါင်းတပ်တွေက ချောင်းမကြီးရွာကို တပ်စွဲထားတဲ့ စစ်ကောင်စီတပ်ကို ဝင်ရောက်တိုက်ခိုက်ခဲ့တာမို့ စစ်ကောင်စီတပ်အကျဆုံးများခဲ့ပြီး မင်းကွန်းရွာထဲကို ပြန်ဆုတ်သွားကာ ဒီ‌နေ့အထိစစ်တပ်က မင်းကွန်းရွာထဲမှာ တပ်စွဲထားဆဲဖြစ်တယ်လို့ သိရပါတယ်။

စာတည်း – မြတ်