ချောက်၊ စက်တင်ဘာ ၆၊ ၂၀၂၅။

မကွေးတိုင်း၊ ချောက်မြို့၊ အမှတ် ၁၅ တိုးချဲ့ရပ်ကွက် ကိုရီးယားသင်တန်းကျောင်းက ပေါ်တာဆွဲဖမ်းဆီး ခံထားရတဲ့သင်တန်းသား ၁၃ ဦး ပြန်လွတ်လာတယ်လို့ ပြည်သူ့ညီနောင် – စလင်းအဖွဲ့ဆီက သိရပါတယ်။

စက်တင်ဘာ ၄ ရက် ညနေပိုင်းမှာ ၉ ဦး၊ စက်တင်ဘာလ ၅ ရက် နေ့လယ်ပိုင်းမှာ ၄ ဦး ပြန်လွတ်လာတာဖြစ်ပြီး ချောက်မြို့နယ်အထွေထွေအုပ်ချုပ်ရေးရုံးမှာ ခံဝန်ကတိထိုးကာ ငွေကျပ်သိန်း ၅၀ မှ သိန်း ၇၀ အတွင်း ငွေပမာဏနဲ့ မိသားစုဝင်တွေက ပြန်ရွေးခဲ့ကြရတာလို့ ဆိုပါတယ်။

“ခံဝန်ကတိက ဘယ်လိုမျိုးတွေ ထိုးရသလဲတော့ ကျနော်လည်း မပြောတတ်ဘူး၊ သူတို့ခံဝန်ကတိတွေနဲ့ လက်မှတ်ထိုးပြီးမှ သိန်း ၅၀၊ သိန်း ၆၀၊ သိန်း ၇၀ ပေးပြီးရွေးရတယ်၊ ကျောင်းသားမိဘတွေက သွားရွေးကြတာ၊ ၁၃ ဦးလုံးကတော့ သူတို့နေအိမ်တွေမှာ ပြန်ရောက်ပါပြီ၊” လို့ ပြည်သူ့ညီနောင် – စလင်းအဖွဲ့ တာဝန်ခံ ကိုပြည်သူက ပြောပါတယ်။

အဆိုပါသင်တန်းသား ၁၃ ဦးဟာ စလင်းမြို့နယ် ကျေးရွာတွေကနေ သင်တန်းလာတက်နေသူတွေဖြစ်ပြီး လက်ရှိမှာ စစ်ကော်မရှင်လက်ကနေပြန်လွတ်လာပြီးနောက် နေထိုင်ရာကျေးရွာတွေကို ပြန်လည်ရောက်ရှိသွားပြီလို့ သိရပါတယ်။

စက်တင်ဘာ ၄ ရက် နေ့လယ် ၃ နာရီဝန်းကျင်မှာ အထက်ပါ ဘာသာစကားသင်တန်းကျောင်းက သင်တန်းသား ၁၃ နဲ့ တရပ်ကွက်တည်းရှိ ‘ကော်နာ’ စားသောက်ဆိုင်က စားပွဲထိုးလူငယ်အမျိုးသား ၃ ဦးတို့ကို စစ်ကော်မရှင် တပ်ဖွဲ့ဝင်တွေနဲ့ ပျူစောထီးတွေကဖမ်းဆီးခဲ့တာလို့ ဒေသခံတွေကပြောပါတယ်။

ဒီဖမ်းဆီးမှုကို ထွေအုပ်ရုံးမှာထိုင်တဲ့ ချောက်မြို့နယ်စစ်ကော်မရှင်အဖွဲ့ဝင် ၁ DSA အပတ်စဥ် ၄၇ ဆင်း ဝါဇီတပ်က ဗိုလ်မှူး တင်ထွန်းဦးအမိန့်နဲ့ ဖမ်းဆီးခဲ့တာလို့ သိရပါတယ်။

သင်တန်းသား ၁၃ ဦးပြန်လွတ်လာပေမယ့် စက်တင်ဘာ ၆ ရက်ထိ ချောက်မြို့ခံ စားပွဲထိုးလူငယ် ၃ ဦးကတော့ ငွေမပေးနိုင်တာကြောင့် ချောက်မြို့မရဲစခန်းမှာ ဆက်လက်ချုပ်နှောင်ထားတယ်လို့ ပြည်သူ့ညီနောင် – စလင်းအဖွဲ့တာဝန်ခံ ကိုပြည်သူက ပြောပါတယ်။

ခုလိုစစ်ကော်မရှင်တပ်တွေရဲ့ စီးနင်းဖမ်းဆီးမှုတွေရှိနေတာကြောင့် ဒေသခံတွေအနေနဲ့လည်း ည ၈ နာရီထိုးတာနဲ့ နေအိမ်ပြင်မထွက်ရဲဘဲ အသွားအလာနည်းသွားကြတယ်လို့ သိရပါတယ်။

ချောက်မြို့ပေါ်မှာ စစ်ကော်မရှင်တပ်နဲ့ ပျူစောထီးတွေက မကြာခဏပေါ်တာဆွဲဖမ်းဆီးတာတွေ လုပ်နေပြီး ဩဂုတ် ၂၇ ရက်ကလည်း ချောက်မြို့ပေါ်ရှိ ဖုန်းဆိုင်တွေက ဝန်ထမ်းလူငယ်တွေကို စစ်ကော်မရှင်အဖွဲ့တွေ က ပေါ်တာဆွဲဖမ်းဆီးမှုတွေပြုလုပ်ခဲ့သေးတယ်လို့ သိရပါတယ်။

စာတည်း – လင်း

ဂန့်ဂေါ၊ မေ ၁၃၊ ၂၀၂၅။

မကွေးတိုင်း၊ ဂန့်ဂေါမြို့နယ်၊ လယ်မကျေးရွာကို စစ်ကောင်စီတပ်တွေဝင်စီးပြီး ဖမ်းဆီးသွားသူတွေအနက် ၁၁ ဦးပြန်လွတ်လာပြီလို့ ရွာခံတွေထံက သိရပါတယ်။

စစ်ကောင်စီတပ်တွေက ဖမ်းဆီးသွားသူတွေထဲက အမျိုးသမီး ၁၁ ဦးကို မေ ၁၂ ရက်နေ့ နေ့လယ်ပိုင်းမှာပင် ပြန်လွှတ်ပေးလိုက်ပြီး ကျန်သူတွေကို ဆက်ဖမ်းထားတယ်လို့ ဆိုပါတယ်။

“မနေ့က အမတ ၃၇၁ အရောက်မှာ မိန်းကလေးတွေကြီးဘဲ ပြန်လွှတ်လိုက်တာ။ ယောကျ်ားလေး ၁၁ ယောက်နဲ့မိန်းကလေး ၂ ယောက်ကျန်သေးတယ်။ ပြန်လွတ်လာသူတွေက ရိုက်နှက်ထားတာ ထုထားတာမရှိဘူး။ “လို့ ရွာခံတဦးကပြောပါတယ်။

ပြန်လွတ်လာတဲ့ အမျိုးသမီးတွေထဲမှာ အသက် ၂၀ ကနေ ၆၀ ကျော်အရွယ်တွေထိပါဝင်ပြီးကလေးမိခင်တွေလည်းပါဝင်တယ်လို့ သိရပါတယ်။

ဆက်လက်ဖမ်းဆီးထားတဲ့ အမျိုးသား ၁၁ ဦးနဲ့ အမျိုးသမီး ၂ ဦးထဲမှာ အသက် ၁၇ နှစ်အရွယ် ကျောင်းသား ၄ ဦးပါဝင်ပြီး သူတို့ကိုတော့ အမတ ၃၇၁ ကနေ ခလရ ၅၀ထဲကို ခေါ်ဆောင်သွားပြီး မေ ၁၃ ရက်နေ့ထိပြန်လွတ်မလာကြသေးဘူးလို့ဆိုပါတယ်။

မေ ၁၂ ရက်မနက် ၂ နာရီခန့်မှာ ဂန့်ဂေါ ခလရ ၅၀ က လာတဲ့ အင်အား ၁၀၀ ခန့်ပါစစ်ကြောင်းဟာ ကျေးရွာစာသင်ကျောင်းအနီးစခန်းချထားတဲ့ ပကဖစခန်းကိုဝင်စီးပြီး ကျေးရွာပကဖ တပ်ဖွဲ့၀င် ၇ ဦး၊ စခန်းမှာညလာအိပ်တဲ့ ကျောင်းသား ၄ ဦးကို ဖမ်းဆီးသတ်ဖြတ်ခဲ့ပြီး ကျေးရွာခံတွေဖြစ်တဲ့ အမျိုးသား ၁၁ ဦး၊ အမျိုးသမီး ၁၃ ဦးကို ဖမ်းဆီးသွားကာ ကျေးရွာပကဖ စခန်းထဲက သေနတ် ၁၇ လက်အပါအဝင် ဆက်စပ်ပစ္စည်းတွေကိုလည်းသိမ်းဆည်းသွားခဲ့ပါတယ်။

အိမ်ခြေ ၂၀၀ ကျော် လူဦးရေ ၈၀၀ ကျော်နေထိုင်တဲ့ လယ်မကျေးရွာဟာ အမတ ၃၇၁ နဲ့ ၃ မိုင်ကျော်၊ ခလရ ၅၀ နဲ့ ၅ မိုင်ကျော်သာကွာဝေးလို့ စစ်ကြောင်းထပ်ထိုးခံရမှာ ကြောက်ပြီး ရွာခံအများစုထွက်ပြေးနေရာ မေ ၁၃ ရက်ထိ ကျေးရွာကိုမပြန်ကြသေးဘူးလို့ ရွာခံတဦးကပြောပါတယ်။

စစ်ကောင်စီသတ်ဖြတ်ခဲ့တဲ့ ပကဖအဖွဲ့ဝင်တွေနဲ့ ကျောင်းသားတွေရဲ့ အလောင်းတွေကိုတော့ ရွာခံအချို့က နေ့ချင်းပဲ သင်္ဂြိုဟ်လိုက်တယ်လို့ သိရပါတယ်။

စာတည်း – လင်း

ပေါင်းတည်၊ မေ ၃၊ ၂၀၂၃။

ပဲခူးတိုင်းအနောက်ခြမ်း၊ ပေါင်းတည်အကျဥ်းထောင်ကနေ မေလ ၃ ရက် ဒီနေ့မနက်မှာ စစ်ကောင်စီက နိုင်ငံရေးအကျဥ်းသား ၃ ဦးသာ ပြန်လွတ်ပေးခဲ့တယ်လို့ မြို့ခံတဦးက ပြောပါတယ်။

ပေါင်းတည်အကျဥ်းထောင် အထူးတရားရုံးမှာ နတ်တလင်းမြို့နယ် တရားသူကြီးက ပုဒ်မ ၅၀၅ – ကနဲ့ ထောင်ဒဏ် ၃ နှစ် ချမှတ်ခံထားရတဲ့ ဒေါ်သီတာအောင်၊ ကိုမြခိုင်နဲ့ ကိုအောင်စန်းလင်းတို့ ဖြစ်တယ်လို့ သိရပါတယ်။

“သူတို့က ထောင်ထဲမှာ ၂ နှစ်ကျော်နေခဲ့ရပြီး လွတ်ရက်စေ့ဖို့ လအနည်းငယ်လောက်ပဲ လိုတော့တာ။ အခုပြန်မလွတ်လည်း မကြာခင်လွတ်မယ့် သူတွေပါ။ မြင်ရတာတော့ အားလုံးကျန်းမာရေး ကောင်းတဲ့ပုံစံတွေပါ” လို့ အကျဥ်းထောင်နဲ့ နီးစပ်သူတဦးက ပြောပါတယ်။

ဒေါ်သီတာအောင်ဟာ အခုနှစ် စက်တင်ဘာလမှာ လွတ်ရက်စေ့မှာဖြစ်ပြီး၊ ကိုမြခိုင်နဲ့ ကိုအောင်ဆန်းလင်းကတော့ လာမယ့်ဇူလိူင်လမှာ လွတ်ရက်စေ့မှာ ဖြစ်တယ်လို့ သူကဆက်ပြောပါတယ်။

စစ်ကောင်စီက နိုင်ငံတဝန်းရှိ အကျဥ်းထောင်တွေထဲက ပုဒ်မ ၅၀၅ – ကနဲ့ အမိန့်ချထားသူ အကျဥ်းသား/ သူ ၂၁၅၃ ဦးကို ရာဇသတ်ကြီး ပုဒ်မ ၄၀၁၊ ပုဒ်မခွဲ(၁) (နောက်တကြိမ်ပြစ်မှုထပ်မံကျူးလွန်ပါက ၎င်းပစ်ဒဏ်အပြင် ယခုကျခံရန် ကျန်ရှိတဲ့ပြစ်ဒဏ်များကိုပါ ဆက်လက် ကျခံပါမည်) နဲ့ လွတ်ပေးခဲ့တာ ဖြစ်ပါတယ်။

လက်ရှိမှာတော့ ပေါင်းတည်အကျဥ်းထောင်အတွင်း နွေဦးတော်လှန်ရေးမှာ ပါဝင်မှုနဲ့ ဖမ်းဆီးချုပ်နှောင်ခံထားရသူ နိုင်ငံရေးအကျဥ်းသူ/သား ၁၂၅ ဦးခန့် ကျန်ရှိနေသေးတယ်လို့ သိရပါတယ်။

စာတည်း – လင်း