ပဲခူး၊ ဒီဇင်ဘာ ၁၅၊ ၂၀၂၂။

ပဲခူးတိုင်း၊ ပြည်မြို့နယ်တိုင်းဒေသကြီးလွှတ်တော်ကိုယ်စားလှယ် ဦးကျော်ဇေယျကို စစ်ကောင်စီက ဒီဇင်ဘာ ၁၂ ရက် မနေ့က ပုဒ်မ ၆ ခုနဲ့ ထောင်ဒဏ် ၁၉ နှစ်ချမှတ်ခဲ့တယ်လို့မိသားစုဆီက သိရပါတယ်။

NLD အမတ် ဦးကျော်ဇေယျကို စစ်ကောင်စီတပ်ဖွဲ့တွေက ပြီးခဲ့တဲ့ ဇွန်လ ၉ ရက်မှာဖမ်းဆီးလိုက်ပြီး ရေကြည်အိုင် စစ်ကြောရေးမှာ ၁၀ ရက် ဖမ်းဆီးစစ်ဆေးခံရပြီးနောက် ဇူလိုင် ၂၉ ရက်မှာ ပြည်မြို့ ဒကစကို ပို့ကာ သြဂုတ် ၈ ရက်မှာတော့ပြည်ထောင်ကိုရောက်ရှိခဲ့ပါတယ်။

ဖမ်းဆီးခဲ့ပြီးတဲ့နောက် စစ်ကောင်စီက ဦးကျော်ဇေယျကို ပုဒ်မ ၆ ခုဖြစ်တဲ့ အကြမ်းဖက်မှု ၊ ရွေးကောက်ပွဲ ၊ ၅၀၅(က) ၂ ခါ ၊ ယစ်မျိုး ၊ ဘေးစီမံ စတဲ့ပစ်မှုတွေနဲ့ ဖမ်းဆီးထားပြီ ၆ လအကြာမှာ အမိန့်ချခဲ့တယ်လို့လည်းဆိုပါတယ်။

“ရေကြည်အိုင်စစ်ကြောရေးမှာ စုတ်ပြတ်သတ်နေအောင်ရိုက်တာ လူရုပ်တောင်မပေါ်ဘူး။ဖမ်းဆီးခံရတဲ့ ၆လလုံး မိသားစုဝင်တွေနဲ့ တွေ့ခွင့်မပေးပါဘူး။ စာတောင်ပေးလို့မရဘူးအခုလိုအမိန့်ချခံရတာတော့ခံပြင်းတာပေါ့။ မတရားအမိန့်တွေ သူတို့ချချင်သလိုချနေတာ မတရားမှန်းသိပေမဲ့လည်း အခုချိန်တော့ ကိုယ့်လူနေကောင်းကျန်းမာဖို့ဘဲအရေးကြီးတယ်ကိုယ့်ထက်တောင်ပေးဆပ်ထားရသူတွေတပုံကြီးရှိသေးတာပဲ ”လို့ ဦးကျော်ဇေယျရဲ့အမျိုးသမီးက မြေလတ်အသံကို ပြောပါတယ်။

ပြည်ထောင်တွင်းတရားရုံးမှာ ဦးကျော်ဇေယျကို ထောင်ဒဏ် (၁၉) နှစ်ချမှတ်တာကိုမိသားစုဝင်တွေက ကိုယ်တိုင်သွားပြီး ကြားနာရခြင်းမျိုးမဟုတ်ပဲ တဆင့်ပြောစကားကသာသိရှိရတယ်လို့ ဆိုပါတယ်။

ဦးကျော်ဇေယျဟာ ၂၀၁၅ ကနေ ၂၀၂၀ အထိရွေးကောက်ပွဲမှာ အနိုင်ရလွှတ်တော်ကိုယ်စားလှယ်တဦးဖြစ်ကာ လက်ရှိပြည်မြို့မှာ နိုင်ငံရေးမှုနဲ့ ဖမ်းခံထားရသူ ၅၀ဦးထက်မနည်းရှိနေပါတယ်။

ပဲခူး၊ နိုဝင်ဘာ ၄၊ ၂၀၂၂။

ပဲခူးတိုင်း ပြည်မြို့မှာ စစ်ကောင်စီက ကျင်းပတဲ့ တန်ဆောင်တိုင်ဘုရားပွဲစျေး စျေးဝယ်သူနဲ့ လည်ပတ်သူတွေ နည်းပါးတယ်လို့ ဒေသခံတွေဆီက သိရပါတယ်။

” မဝယ်ပါဘူး ဘုရားအရှေ့လေးလုပ်တာ စွယ်တော်လာဖူးတဲ့ သူပဲရှိတယ်။ အရင်လို ပွဲစျေးတန်းတွေ ဇာတ်ပွဲတွေ ရဟတ်တွေမှ မရှိဘဲ။ ဆိုင်ခန်းတောင် အရင်လို ဝါးဆိုင်ခန်းတွေ မဟုတ်။ ဘုရားပေါ်တော့ စွယ်တော်တိုက်ဖွင့်တယ် ဘုရားဖူးတွေ ပုံမှန်အချိန်ထက်များတာ” လို့ ‌ပြည်မြို့ခံ တဦးက ပြောပါတယ်။

စစ်ကောင်စီက ပွဲစျေးတန်းစည်ကားဖို့ ဆိုင်ခန်းငှားခ ပေးစရာမလိုပဲ အခမဲ့ရောင်းချခွင့်ပေးထားပေမယ့် ဆိုင်ခန်းတွေကို ကြိုယူထားပြီး တခန်း ၂သောင်းဝန်းကျင်နဲ့ ပြန်ရောင်းနေသူတွေရှိသလို ဆိုင်ခန်းမရလို့ ရန်ဖြစ်ကြသူတွေလည်း ရှိတယ်လို့ ဒေသခံတွေ ဆီကသိရပါတယ်။

ပဲခူး၊ အောက်တိုဘာ ၃၁၊ ၂၀၂၂။

ပဲခူးတိုင်းဒေသကြီး(အနောက်ပိုင်း)၊ ပြည်မြို့က နိုင်ငံရေးတက်ကြွလှုပ်ရှားသူ ပရဟိတသမားတဦးကို စစ်ကောင်စီက အကြမ်းဖက်ဥပဒေနဲ့ ထောင်ဒဏ် ၇ နှစ် ချမှတ်လိုက်ပါတယ်။

ယနေ့အောက်တိုဘာ ၃၁ ရက်နေ့မှာပဲ ပရဟိတသမားတဦးဖြစ်တဲ့ တက်ကြွလှုပ်ရှားသူ ကိုသိန်းမင်းထွန်းကို စစ်ကောင်စီရဲ့ အကျဉ်းထောင်တွင်း အထူးတရားရုံးကနေ အကြမ်းဖက်ဥပဒေပုဒ်မ ၅၂(က) နဲ့ ထောင်ဒဏ် ၇ နှစ်ကို ချမှတ်လိုက်တယ်လို့ သူနဲ့နီးစပ်သူများထံက သိရပါတယ်။

“ဒီနေ့အမိန့်ချတယ်။ ကျန်းမာရေး ကောင်းပါတယ်။ ခြေထောက်ကတော့ နဂိုအတိုင်း မဖြစ်ဘူး ဒဏ်ရာရထားတဲ့ဟာက ဘာဖြစ်လဲဆိုတော့ ခြေထောက်ဆက်တာမှာ အရိုးအက်တော့ မညီဘူး။ အခုဂျိုင်းထောက်နဲ့ နေရတယ်။ ထောင်ဆရာဝန်ကို ပြောထားတယ်လို့ ပြောတယ်။ နဂိုအတိုင်းကောင်းဖို့ သူတို့မိသားစုက ကြိုးစားပြီး လုပ်နေကြတယ်လို့ ကြားရတယ်။ ခြေထောက်က ခါတိုင်းလို မဟုတ်ဘူး။ ကိုက်နေတယ်လို့ ကြားတယ်။” လို့ ကိုသိန်းမင်းထွန်းနဲ့ နီးစပ်သူတဦးက မြေလတ်အသံကို ပြောပါတယ်။

ကိုသိန်းမင်းထွန်းဟာ နွေဦးတော်လှန်ရေးမှာ တက်ကြွစွာ ပါဝင်လှုပ်ရှားခဲ့ရာက စစ်ကောင်စီရဲ့ လိုက်လံဖမ်းဆီးခြင်းကို ရှောင်ရှားဖို့ တောတွင်းတနေရာမှာ ခိုလှုံနေရာက ပြီးခဲ့တဲ့ ၂၀၂၁ ခုနှစ် နိုဝင်ဘာလ ၁၀ ရက်နေ့မှာ စစ်ကောင်စီစစ်ကြောင်းရဲ့ စီးနင်းပစ်ခတ်ဖမ်းဆီးခြင်းကို ခံလိုက်ရပြီး သူနဲ့အတူ ကိုဖုန်းပြည့်ပိုင်၊ ကိုပြည့်စုံ နဲ့ ကိုကုလားလေး တို့ပါ ဖမ်းဆီးခံခဲ့ကြရတာ ဖြစ်ပါတယ်။

“ပစ်ခတ်ဖမ်းဆီးခံရတုန်းက ခြေထောက်က အခုအကောင်းအတိုင်းဖြစ်ဖို့ ခက်သွားပြီ။ သူက ပရဟိတကို တကယ်ကို လုပ်ခဲ့တာလေ။ ဆန္ဒပြတဲ့အချိန်မှာသာ ဖမ်းဆီးလို့ ထွက်ပြေးသွားခဲ့တာကနေ ဖြစ်သွားတာ။” လို့ သူနဲ့အတူ ပရဟိတလုပ်ကိုင်ခဲ့သူတဦးက ပြောပါတယ်။

ဖမ်းဆီးခံခဲ့ရတဲ့ ၄ ဦးထဲက ရွှေတောင်မြို့နယ် အကသ အဖွဲ့ဝင်တဦးဖြစ်တဲ့ ကိုဖုန်းပြည့်ပိုင်ကိုတော့ ပြီးခဲ့တဲ့ အောက်တိုဘာ ၁၄ ရက်နေ့က ပြည်အကျဉ်းထောင်တွင်း အထူးတရားရုံးကနေပဲ အကြမ်းဖက်ဥပဒေပုဒ်မ-၅၀(က)၊ ၅၂(က) တွေနဲ့ ထောင်ဒဏ် ၁၀ နှစ် ချခဲ့ပါသေးတယ်။

၂၀၂၂ ခုနှစ် စက်တင်ဘာလကနေ အောက်တိုဘာ ၁၅ ရက်နေ့အထိ ပြည်အကျဉ်းထောင်တွင်း ဖမ်းဆီးထားသူ ၂၀ ကျော်ကို အကြမ်းဖက်ဥပဒေဖြင့် ထောင် ၁၀ နှစ်စီချမှတ်ခံထားရပြီးနောက် အခုလို ကိုသိန်းမင်းထွန်းကို ထပ်မံထောင်ချခဲ့တာဖြစ်ပြီး ပြည်ခရိုင်ထဲမှာ အကြမ်းဖက်ဥပဒေနဲ့ ဖမ်းဆီးတရားစွဲဆို ထောင်ချခံထားရသူ ၁၅၀ ဝန်းကျင်မှာရှိတယ်လို့ အကျဉ်းထောင်အသိုင်းအဝန်းကနေ သိရပါတယ်။

ပဲခူး၊ စက်တင်ဘာ ၈၊ ၂၀၂၂။

ပဲခူးတိုင်း(အနောက်ခြမ်း)သဲကုန်းမြို့နယ် ရန်ကုန်-ပြည်လမ်း ဝက်ပုတ်တာဆုံအနီးမှာ စက်တင်ဘာ ၇ ရက် မနေ့ညနေက စစ်ကောင်စီစစ်ဆေးရေးဂိတ်ကို ဝင်လာတဲ့ အိမ်စီးကားတစီး ပစ်ခတ်တားဆီးခံရတယ်လို့ ဒေသခံတွေက ပြောပါတယ်။

ပြည်ဘက်ကနေ ရန်ကုန်ဘက်ကို မောင်းနှင်လာတဲ့ ခဲနက်ရောင် အိမ်စီးကားဖြစ်ပြီး အင်းမစစ်ဆေးရေးဂိတ်မှာ စစ်ဆေးမခံပဲ မောင်းနှင်လာလို့ မနေ့ညနေ ၃နာရီခွဲလောက်မှာ ဝက်ပုတ်တာဆုံ အရောက်မှာ အခုလို ပစ်ခတ်တားစီးခံလိုက်ရတာလို့ ဆိုပါတယ်။

“အရာရှိဗိုလ်မှူး အငြိမ်စားလို့ ပြောတယ် ကားကခဲနက်ရောင် အမျိုးအစားတော့ မသိဘူး အရေးကြီးလို့ ပြန်လာတာတဲ့ အဲဒါကို စစ်ဆေးရေး ဂိတ်ကို ဝင်ဝင်ချင်း ကားဘီးကို ပစ်ဖောက်ပစ်တာ မနေ့က ပြဿနာတွေ တက်နေတာလေ ထပ်ပြီး သိရတာက အဲကားက အင်းမမှာလည်း ရပ်မပေးဘူး ရပ်မပေးတော့ အင်းမဂိတ်ကနေ သတင်းလှမ်းပို့ထားတာလို့ သိရတယ် မနေ့က နောက်ထပ် အရာရှိလို ကားတွေပါ ထပ်ရောက်လာတာ ဂိတ်ကကောင်တွေလည်း တောင်းပန်နေရတယ်” လို့ ဒေသခံတဦးက ပြောပါတယ်။

သေနတ်နဲ့ အနည်းဆုံး သုံးချက်ပစ်ခတ်ခံခဲ့ရပြီး ပျက်စီးသွားတဲ့ လျော်ကြေးငွေကို ပစ်ခတ်ခဲ့တဲ့ ဝက်ပုတ် တာဆုံ စစ်ကောင်စီစစ်ဆေးရေး ဂိတ်ကနေ တောင်းပန်ကာပေးလျော်ရတယ်လို့ ဆိုပါတယ်။

“အဲဂိတ်ကစစ်သားတွေက တောင်းပန်ရုံတင်မကဘူး ငွေလျော်ရတယ်လို့ကြားတယ် သိန်း ၃၀ လောက်လျော်လိုက်ရတယ်လို့ ပြောကြတယ် ပြီးတော့ အဲလူကပြောသေးတယ် လူတွေကြပ်တည်းနေချိန်မှာ ဂိတ်ကနေ ငွေတွေတောင်းနေတာတွေ လုပ်နေတာက အစသိတယ်လို့လည်း ပြောသွားသေးတယ်”လို့ ဒေသနောက်တဦးကလည်း ပြောပါတယ်။

ပစ်ခတ်တားစီးခံရတဲ့ ကားဟာ အငြိမ်းစားဗိုလ်မှူးရဲ့ကား ဟုတ်မဟုတ်ကိုတော့ မြေလတ်အသံ သတင်းဌာနက သီးခြားအတည်ပြုချက် မရရှိသေးပါဘူး။

ပဲခူး၊ ဇူလိုင် ၁၂၊ ၂၀၂၂။

ပဲခူးတိုင်းဒေသကြီး(အနောက်ပိုင်း)၊ ပြည်မြို့နယ် တိုင်းဒေသကြီးလွှတ်တော်ကိုယ်စားလှယ် ဦးကျော်ဇေယျ ဖမ်းဆီးခံရပြီးနောက် ဒေသခံတချို့ကို ဆက်တိုက်ဆိုသလို ဖမ်းဆီးခံနေရတယ်လို့ မြို့ခံတွေကပြောပါတယ်။

ပြီးခဲ့တဲ့ ဇွန်လ ၉ ရက်နေ့က ရန်ကုန်မြို့မှာ ဦးကျော်ဇေယျအပါအဝင် ၄ ဦးဖမ်းဆီးခံခဲ့ရပြီး ပြည်မြို့ကို လွှဲပြောင်းပေးလိုက်တယ်ဆိုတဲ့ သတင်းတွေထွက်ပေါ်ခဲ့ပြီး ဘယ်နေရာမှာထိန်းသိမ်းထားတယ် ဆိုတာ တိကျစွာမပြောနိုင်သေးချိန်မှာပဲ သံသယရှိတဲ့ဒေသခံတချို့ကို စစ်ကောင်စီက လိုက်လံဖမ်းဆီးနေတာပါ။

“အဖမ်းခံနေရတာကတော့ ဆက်တိုက်ပဲ အရင် NLD ပြန်ကြားရေးလုပ်ခဲ့ဖူးသူလည်း အဖမ်းခံလိုက်ရတယ်။ နောက် မြို့ကနာမည်ကြီးစီးပွားရေးသမားတယောက်လည်း လာဖမ်းသွားတယ်။ ပြန်လွှတ်မလွှတ်တော့မသိဘူး နောက်ပြီး ပေါင်းတလည်နဲ့ ဝက်ထီးကန်မြို့တွေမှာလည်း ဖုန်းနဲ့လိုက်တိုက်စစ်ပြီး ရှာတယ်။ တချို့လည်း ရှောင်နေကြတယ်။ ကိုကျော်ဇေယျနဲ့ ဆက်စပ်မှုရှိတယ်မရှိဘူးကတော့ သေချာမပြောနိုင်ဘူး” လို့ မြို့ခံအမျိုးသားတဦးကပြောပါတယ်။

ပေါင်းတလည်မြို့က စစ်ကောင်စီခန့် ရပ်ကွက်အုပ်ချုပ်ရေးမှူးတဦး၊ ယခင် NLD ပါတီသတင်းနဲ့ပြန်ကြားရေးအဖွဲ့ဝင်တဦး၊ စီးပွားရေးလုပ်ငန်းရှင်တဦးနဲ့ အခြား ဖမ်းဆီးခံရသူ ၅ ဦးထက်မနည်းရှိတယ်လို့ မြို့ခံတွေက ဆိုပါတယ်။

အဲဒီလို ကိုကျော်ဇေယျအပါအဝင် ဖမ်းဆီးခံခဲ့ရသူတွေနဲ့ နောက်ဆက်တွဲ ဖမ်းဆီးခံရသူတွေကိုပါ စစ်ကောင်စီနဲ့ NUG၊ သက်ဆိုင်ရာအဖွဲ့အစည်းတွေက တရားဝင်သတင်းထုတ်ပြန်ခြင်းမရှိသေးတဲ့အပေါ် လူထုက စိုးရိမ်နေကြတယ်လို့ဆိုပါတယ်။

“ဘယ်မှာဖမ်းမိပြီး ဘယ်ကိုပို့တယ်ဆိုတာ ကျနော်တို့သိရသလောက်ကတော့ တိတိကျကျ ပြောနိုင်သူမရှိဘူး။ ထုတ်ပြန်တာလည်းမတွေ့ရတော့ မြို့ခံတွေနဲ့ ပတ်သက်စပ်ဆက်သူတွေက စိုးရိမ်တာပေါ့ဗျာ။ အဖမ်းခံနေရတဲ့သူတွေလည်း ရှိနေတော့။ ကျနော်ပြောချင်တာကတော့ ကိုယ့်အခြေအနေကိုယ်သိပေါ့ဗျာ။ စပ်ဆက်ပတ်သက်မှုကြီးကြီးရှိနေတယ်ဆိုရင်တော့ အဖမ်းမခံရခင် ရှောင်နေတာအကောင်းဆုံးပါပဲ။” လို့ မြို့ခံတဦးကပြောပါတယ်။

ဦးကျော်ဇေယျ ဟာ အမျိုးသားဒီမိုကရေစီအဖွဲ့ချုပ်ပါတီရဲ့ ပြည်မြို့နယ် တိုင်းဒေသကြီးလွှတ်တော်ကိုယ်စားလှယ်အဖြစ် ၂၀၁၅၊ ၂၀၂၀ ရွေးကောက်ပွဲများမှာ အနိုင်ရကိုယ်စားလှယ်ဖြစ်ခဲ့ပြီး စစ်အာဏာသိမ်းပြီးနောက်ပိုင်းမှာလည်း အာဏာရှင်ဆန့်ကျင်တော်လှန်ရေးတွေ ဆက်လက်လုပ်ဆောင်ခဲ့လို့ သူငှားရမ်းနေထိုင်ခဲ့တဲ့ အိမ်အပါအဝင် ပိုင်ဆိုင်မှုတွေကိုပါ ချိတ်ပိတ်သိမ်းဆည်းခံထားရသူဖြစ်ပါတယ်။

ပဲခူး၊ ဇူလိုင် ၄၊ ၂၀၂၂။

ပဲခူးတိုင်းအနောက်ခြမ်း၊ ပြည်မြို့က ၇ တန်းကျောင်းသား ၇ ဦးကို ကျောင်းအုပ်ကြီးက ရပ်ကွက်အုပ်ချုပ်ရေးမှူးကို အကြောင်းကြားဖမ်းခိုင်းခဲ့တယ်လို့ မြို့ခံတွေဆီက သိရပါတယ်။

ပြည်မြို့၊ ခေတ္တရာမြို့သစ်မှာရှိတဲ့ အောင်မြေသာယာ မူလတန်းကျောင်းက ၇ တန်းကျောင်းသားတွေက ၂ ပတ်အတွင်း ကျောင်းပိတ်ပေးဖို့ နဲ့ ခြိမ်းခြောက်တဲ့သဘော စာရေးသား ကာ ပေးပို့လို့ဆိုပြီး ကျောင်းအုပ်ကြီးဖြစ်သူက ရပ်ကွက်အုပ်ချုပ်ရေးမှူးကို အကြောင်းကြားဖမ်းခိုင်းလို့ ဖမ်းဆီးခဲ့တာဖြစ်တယ်လို့ မြို့ခံတွေက ပြောပါတယ်။

“သိတာတော့ ကလေးတွေက ရုံးခန်းထဲက စားပွဲခုံကိုဆိုလား စာခေါက်လေးသွားတင်တာ။ အဲဒီမှာ သူတို့ကိုခြိမ်းခြောက်ပါတယ်ဆိုပြီး ကြောက်လန့်ပြီး ရပ်ကွက်အုပ်ချုပ်ရေးမှူးကို အကြောင်းကြားလိုက်တော့ အုပ်ချုပ်ရေးမှူးနဲ့ စစ်တပ်က စစ်ကားတွေနဲ့ ကလေးတွေ အိမ်တွေကို လာခေါ်ဖမ်းသွားတာ။ စာရေးထားတဲ့စာရွက်က စာလုံးပေါင်းတောင်မမှန်ပါဘူး အဲဒါကိုကလေးတွေကို စစ်ကားတွေနဲ့လာဖမ်းကြတာ” လို့ မြို့ခံတဦးကဆိုပါတယ်။

ဇူလိုင်လ ၁ ရက်နေ့က ဖမ်းဆီးသွားတဲ့ ကျောင်းသား ၇ ဦးထဲက ၆ ဦးကိုတော့ ပြန်လည်လွှတ်ပေးခဲ့ပြီး ခေါင်းဆောင်လို့ယူဆရတဲ့ ကျောင်းသားကိုတော့ ပြန်လွှတ်မပေးသေးဘူးလို့ ဆက်ပြောပါတယ်။

ပဲခူး၊ ဇွန် ၁၅၊ ၂၀၂၂။

ပဲခူးတိုင်း ပြည်မြို့က အသက်၂၄နှစ်အရွယ် လူငယ်တဦး မနေ့က ဖရူဆိုမြို့ ရှေ့တန်းတနေရာမှာ လက်နက်ကြီး စမ်းသပ်ရင်း ကျဆုံးခဲ့တယ်လို့ သိရပါတယ်။

‌လက်နက်ကြီးစမ်းသပ်ရင်း ကျဆုံးသွားတဲ့ လူငယ် ထင်လင်ဦး( ခ) ဂျပန်ကြီးဟာ PDF တပ်ဖွဲ့ လက်နက်ထုတ်လုပ်ရေးမှာ တာဝန်ထမ်းဆောင်နေသူဖြစ်ပြီး မနေ့က ‌ရှေ့တန်းကို လိုက်အသွားမှာ ကျဆုံးခဲ့တာဖြစ်တယ်လို့ သူငယ်ချင်းဖြစ်သူက ပြောပါတယ်။

” ရှေ့တန်းကို လိုက်သွားတာ၊ သူ့ကို ရှေ့တန်းမလိုက်နဲ့လို့ ပြောတာကို သူက အတင်းလိုက်သွားပြီးတော့၊ လက်နက်ကြီးစမ်းရင်းနဲ့ ကျသွားတာ” လို့ ပြောပါတယ်။

ရဲဘော် ထင်လင်းဦးဟာ၂၄ နှစ်ပြည့်ပြီးထားသူဖြစ်ပြီး လာမဲ့ ဇွန်လ ၂၀ရက် ရက်လည်မှာ အသက်၂၅ နှစ်ပြည့်မှာဖြစ်သလို မိဘတွေကလည်း အမွေပြတ်စွန့်လွှတ်ခံထားရသူဖြစ်ပါတယ်။

သူဟာ အရင်က Sniper အဖွဲ့ထဲမှာ တာဝန်ထမ်းဆောင်ခဲ့ဖူးသူဖြစ်ကာ ‌အနေအေးပြီး ကူညီတတ်သူတဦးလည်း ဖြစ်တယ်လို့ သူငယ်ချင်းဖြစ်သူ ရဲဘော်တဦးက ပြောပါတယ်။

” တပ်ရင်းမှာလဲအားကိုးရတယ်သူက၊ လေ့ကျင်းခန်းတွေဆိုလဲသူများတွေထက်ပိုပြီးအပင်ပန်းခံလုပ်တတ်တာ၊ သူ့ဆိုအကုန်လုံးကချစ်ကျခင်ကျတယ်၊ နေရင်ပေါတောတောနဲ့ ရုပ်ကလဲဂျပန်ရုပ်တရုပ်ထဲပဲ၊ စိတ်ညစ်စရာရှိရင်တော့တယောက်ထဲပဲအမြဲဖြေရှင်းတတ်တယ်၊ သူများတွေကိုဒုက္ခမပေးချင်လို့တဲ့၊ ခုနောက်ပိုင်းမှ သူအိမ်ကိုလွမ်းတဲ့အကြောင်းနဲ့ ထုတ်လုပ်ရေးရောက်သွားတဲ့အကြောင်းပြောပြတာ” လို့ သူငယ်ချင်း ဖြစ်သူက ပြောပါတယ်။

လက်ရှိ Southern Shan PDF တပ်ရင်း ၁၀၀၅မှာ တာဝန်ထမ်းဆောင်ရင်း လက်နက် မတော်တဆမှုကြောင့် ကရင်နီပြည်နယ် ဖရူဆိုမြို့ ‌ရှေ့တန်းမှာ ကျဆုံးခဲ့တာဖြစ်ပါတယ်။

ရဲဘော်ထင်လင်းဦးဟာ ပြည်မြို့မှာလည်း စစ်အာဏာရှင်ဆန့်ကျင်ရေးလှုပ်ရှားမှုတွေမှာ တက်တက်ကြွကြွပါဝင်ခဲ့သူတဦးဖြစ်ပြီး သင်္ကြန်ကာလအပြီးမှာ ပြည်ကပျောက်သွားခဲ့တာဖြစ်တယ်လို့ သိရပါတယ်။