ပြည်

ပဲခူး၊ မတ် ၃၁၊ ၂၀၂၃။

ပဲခူးတိုင်း(အနောက်ပိုင်း)၊ ပြည်မြို့နယ် စီမံအုပ်ချုပ်ရေးကောင်စီက ဌာနဆိုင်ရာတွေကို သင်္ကြန်မဲလက်မှတ်တွေ ဖိအားပေးရောင်းနေတယ်လို့ သိရပါတယ်။

စစ်ကောင်စီ ဌာနဆိုင်ရာတွေ၊ ရပ်ကျေးအုပ်ချုပ်ရေးမှူး၊ ဆယ်အိမ်မှူး၊ သတင်းပေးတွေနဲ့ စစ်ကောင်စီထောက်ခံသူတွေကို ရောင်းချနေတာလို့ ဆိုပါတယ်။

“ရောင်းတာကတော့ ပုဂ္ဂလိကဆေးရုံ၊ ဆေးခန်းနဲ့ သူတို့နဲ့နီးစပ်တဲ့ စီးပွားရေးလုပ်ငန်းရှင်တွေကို ရောင်းတာတွေ့ရတယ်။ တမဲကို ၃၅၀၀ တဲ့ ဆိုင်ကယ်နဲ့ ဖုန်းတွေပါတယ်” လို့ မြို့ခံတဦးက ပြောပါတယ်။

မဲတစောင်ကို ၃၅၀၀ ကျပ်နှုန်းနဲ့ ရောင်းချပြီး ယိုးဒယားဆိုင်ကယ်(၁) စီး၊ တရုတ်ဆိုင်ကယ်(၂) စီးနဲ့ ဖုန်းအလုံး(၂၀) ကို ကံစမ်းမဲဖောက်ပေးမှာဖြစ်တယ်လို့ မဲလက်မှတ်မှာ ဖော်ပြထားပါတယ်။

ဒါ့အပြင် သင်္ကြန်ကာလစည်ကားရေး စစ်ကောင်စီက နည်းမျိုးစုံသုံးနေသလို ကမ်းနားလမ်းလျှောက်သင်္ကြန်၊ ရေပေါ်သင်္ကြန်တွေနဲ့ ဌာနဆိုင်ရာ၊ ရပ်ကွက်ရုံးတွေကနေ တာဝန်ယူပြီး ယိမ်းတွေ ထွက်ကြဖို့ကိုလည်း ညွှန်ကြားထားတယ်လို့ သိရပါတယ်။

ရပ်ကွက်ယိမ်းတွေအတွက် ရပ်ကွက်အတွင်းမှာရှိတဲ့ စီးပွားရေးလုပ်ငန်းရှင်တွေကို အချိုးကျစီ တာဝန်ယူခိုင်းတာမျိုးတွေလည်း လုပ်ဆောင်နေတယ်လို့ မြို့ခံတွေက ပြောပါတယ်။

ပဲခူး၊ မတ် ၂၈၊ ၂၀၂၃။

ပဲခူးတိုင်း၊ ပြည်မြို့မှာ သင်္ကြန်စည်ကားဖို့ စစ်ကောင်စီက ဌာနဆိုင်ရာဝန်ထမ်းတွေ၊ ရာအိမ်မှူးတွေ၊ ဆယ်အိမ်မှူးတွေနဲ့ ပူးပေါင်းကြိုးစားနေကြတယ်လို့ ဒေသခံတွေက ပြောပါတယ်။

လက်ရှိ ပြည်မြို့ ဗိုလ်ချုပ်ကျောက်ရုပ်အနီးမှာ ဗဟိုမဏ္ဍပ်ဆောက်နေပြီး နောက်ထပ်လည်း ရပ်ကွက်မဏ္ဍပ်တွေ ဆက်လုပ်သွားမယ့်အစီအစဥ်တွေလည်း ကြားနေရတယ်လို့ ပြည်မြို့ဒေသခံတဦးက ပြောပါတယ်။

“စကစ ထောက်ခံတဲ့သူအချို့ ရာအိမ်မှုး၊ ဆယ်အိမ်မှုး၊ အုပ်ကြီး၊ ဒလန် သူ့လူနဲ့သူ စီစဥ်နေပြီး ပြည်သူလူထု အများစုကတော့ စိတ်ဝင်စားမှု နည်းပါးတာတွေ့ရတယ်” လို့ ဆိုပါတယ်။

ပြည်မြို့မှာ အခုနှစ်သင်္ကြန်ကို ကမ်းနားလမ်းတလျှောက်မှာ လမ်းလျှောက်သင်္ကြန်ပြုလုပ်ပြီး မြစ်ကမ်းစပ်မှာတော့ ရေပေါ်သင်္ကြန်ပြုလုပ်ဖို့ စီစဥ်နေတယ်လို့ သိရပါတယ်။

ဒါ့အပြင် ဌာနဆိုင်ရာများအလိုက် ယိမ်းတွေထွက်ဖို့ ညွှန်ကြားထားပြီး မြို့ပေါ် ၁၀ ရပ်ကွက်မှာလည်း အုပ်ချုပ်ရေးမှူးတွေဦးဆောင်ပြီး ယိမ်းတွေထွက်ဖို့ ကြိုးစားနေသလို ငွေကြေးကောက်ခံတာတွေကိုလည်း လုပ်ဆောင်နေတယ်လို့ သိရပါတယ်။

“ရပ်ကွက်တွေထဲကို လာကောက်တယ်။ စေတနာရှိသလောက်လို့ ပြောတယ်။ စီးပွားရေးလုပ်ငန်းရှင်တွေကိုတော့ သက်သက်ကောက်တာ ရှိတယ်။ ယိမ်းတွေအတွက် တာဝန်ယူခိုင်းတာတွေ လုပ်တယ်” လို့ မြို့ခံအမျိုးသမီးတဦးက ပြောပါတယ်။

လက်ရှိအချိန်ထိ ပုဂ္ဂလိကမဏ္ဏုပ်ဆောက်တာမျိုးနဲ့ ကြေညာတာမျိုး မရှိသေးသလို ဌာနဆိုင်ရာများနဲ့ ဖိအားပေးခံရသူတွေကလွဲရင် အများစုက စိတ်ဝင်စားမှု မရှိကြဘူးလို့ မြို့ခံတွေဆီက သိရပါတယ်။

သဲကုန်း၊ မတ် ၁၅၊ ၂၀၂၃။

ပြည်ခရိုင်၊ သဲကုန်းမြို့နယ်၊ ဆင်စွယ်ရပ်ရွာ အနောက်ဘက် ရေကန်ထဲမှာ ဓါတ်လိုက်ခံရသူ အမျိုးသားတဦးကို ဆေးရုံပို့ဆောင်ခဲ့ပေမယ့် သေဆုံးသွားခဲ့တယ်လို့ သဲကုန်းပရဟိတနာရေးကူညီမှုအသင်းက သိရပါတယ်။

ယမန်နေ့ မတ်လ ၁၄ ရက်နေ့ည ၁၀ နာရီခွဲခန့်က သတင်းပေးအကြောင်းကြားလို့ သွားရောက်ကယ်ဆယ်ကာ အရေးပါ်ဌာနကိုပို့ဆောင်ခဲ့ပေမယ့် သေဆုံးခဲ့တာလို့ ဆိုပါတယ်။

“သဲကုန်မြို့နဲ့နှစ်မိုင်ကျော်လောက်ဝေးမယ်၊ ကန်စပ်ချောင်းစပ်မှာငါးဓါတ်တို့ကျတာ၊ သူတို့လုပ်နေကျတွေပါ၊ ခုက အက်ဆီးဒင့်သဘောမျိုးဖြစ်တာ၊ ကန်ထဲမှာငါးတွေကို ကျင်စက်နဲ့ဖမ်းကြတာ၊ အုပ်စုလိုက်ဖမ်းရင်း ကြိုးပေါက်တာမျိုးနဲ့ ဓာတ်လိုက်သွားတာမျိုးဖြစ်ပြီး၊ သေသွားတာဖြစ်နိုင်တယ်လို့” သဲကုန်းပရဟိတနာရေးကူညီမှုအသင်း ဥက္ကဌက မြေလတ်အသံကို ပြောပါတယ်။

သေဆုံးသူမှာ အသက် ၃၀ အရွယ်ရှိ အမျိုးသားတဦးဖြစ်ကာ သူရဲ့ ရုပ်အလောင်းကို ယနေ့မတ်လ ၁၅ ရက်မနက်ပိုင်းက မြို့နယ်ဆေးရုံကြီးရင်ခွဲရုံကတဆင့် သေဆုံးသူနေထိုင်ရာ တပ်ရွာကို ပို့ဆောင်ပေးခဲ့တယ်လို့ သိရပါတယ်။

အဲဒီလို ဘတ္ထရီအကြီးစားတွေနဲ့ လျှပ်စစ်ရှော့တိုက်ကျင်စက်တို့ ငါဖမ်းနည်းဟာ လူအတွက်အန္တရာယ်များသလို ငါးဥချချိန်နဲ့ ငါးသားပေါက်များ မျိုးတုန်းမှုကို ဆိုးဆိုးရွားရွားဖြစ်စေတဲ့အတွက် ဥပဒေအရတားမြစ်ထားသော ငါးဖမ်းနည်းဖြစ်သော်လည်း ထိထိရောက်ရောက် တားမြစ်နိုင်တာမျိုး မရှိသေးဘူးလို့ သိရပါတယ်။
ပုံစာ – သေဆုံးသွားသူ၏ရုပ်အလောင်းကို ပြန်လည်ပို့ဆောင်ပေးနေသော ပရဟိတကား။

စာတည်း-007

ပြည်၊ မတ် ၁၃၊ ၂၀၂၃။

ပဲခူးတိုင်း(အနောက်ခြမ်း)၊ ပြည်မြို့မှာ ကျဆုံးခဲ့တဲ့ ရေကြောင်းတက္ကသိုလ်ကျောင်းသား ထက်မြတ်အောင်ရဲ့ ကျဆုံးခြင်း ၂ နှစ်ပြည့် လှုပ်ရှားမှုကို ရေကြောင်းပညာတက္ကသိုလ် ကျောင်းသားများသမဂ္ဂက ကျောင်းပရဝုဏ်အနီးမှာပဲ ပြုလုပ်ခဲ့တယ်လို့ သိရပါတယ်။

ဒီကနေ့ မတ်လ ၁၃ ရက်နေ့မှာ ကျရောက်မယ့် ကျဆုံးခြင်း ၂ နှစ်ပြည့်အတွက် မတ်လ ၁၂ ရက် မနေ့ မနက် ၇ နာရီလောက်မှာ အကြိုလှုပ်ရှားမှု ပြုလုပ်ခဲ့တာဖြစ်တယ်လို့ ရေကြောင်းပညာတက္ကသိုလ် ကျောင်းသားသမဂ္ဂအဖွဲ့ဝင် တဦးက မြေလတ်အသံကို ပြောပါတယ်။

“မနှစ်ကတော့ ဘန်နာကပ်တယ်။ ဒီနှစ်ကတော့ အမှတ်တရသဘောမျိုး တခုခုလုပ်ကြမယ်ဆိုပြီး အမှုဆောင်တွေတိုင်ပင်ပြီး လုပ်ဖြစ်တာပါ။ ထက်မြတ်အောင်က ဝမ်းဗိုက်နေရာနားကို ကျည်ဆံထိမှန်တာရယ်၊ ပထမနှစ်ကျောင်းသားလည်း ဖြစ်တာရယ်ကြောင့် ကျနော်တို့ ကျောင်းယူနီဖောင်း ပထမနှစ်ဘားနဲ့ အင်္ကျီပေါ်မှာ ဆေးနီတွေပက်ပြီး လုပ်လိုက်တာပါ” လို့ ပြောပါတယ်။

ထက်မြတ်အောင်ဟာ ၂၀၂၁ ခုနှစ်၊ မတ်လ ၁၃ ရက်နေ့က ပြည်မြို့၊ ခရမ်းကုန်းရပ်ကွက်မှာ ပြုလုပ်ခဲ့တဲ့ စစ်အာဏာရှင်ဆန္ဒပြသပိတ်စစ်ကြောင်းကို စစ်ကောင်စီတပ်က ကျည်အစစ်တွေနဲ့ ပစ်ခတ်ဖြိုခွင်းစဉ်မှာ ရှေ့တန်းကနေ ဒိုင်းနဲ့အကာအကွယ်ပေးရင်း ဝမ်းဗိုက်ကျည်ထိမှန် ကျဆုံးခဲ့တာ ဖြစ်ပါတယ်။

အဲ့ဒီနေ့ ပစ်ခတ်ဖြိုခွင်းခံရတဲ့ ပြည်မြို့သပိတ်စစ်ကြောင်းမှာပဲ အသက် ၂၀ ဝန်းကျင် ဖြိုးဝေယံကျော် ဆိုသူ လူငယ်လည်း ဦးခေါင်းကျည်ထိမှန်ခဲ့ကာ စစ်ကောင်စီတပ် ကုတင် ၁၀၀ စစ်ဆေးရုံကို ပို့ဆောင်ကုသစဉ်မှာ ကျဆုံးခဲ့ပါတယ်။

“ထက်မြတ်အောင် ကျဆုံးမှုအတွက်ကို ကျနော်က ဝမ်းနည်းတာထက် ဂုဏ်ယူတာက ပိုပါတယ်။ သေသွားတဲ့လူအတွက် ခဏကလေး ဝမ်းနည်းပြတာဟာ လုံလောက်မှုမရှိဘူးလို့ ထင်ပါတယ်။ သူ့သေဆုံးမှုဟာ တရားမမျှတဘူးလို့ ယုံကြည်ရင် တော်လှန်ပါ။ ဒီနည်းလမ်းပဲ ရှိပါတယ်။ အပြင်ပန်းကနေ ဝမ်းနည်း ကြေကွဲ ပြရတာ ဘာအဓိပ္ပာယ်မှ မရှိပါဘူး” လို့ ကျောင်းသားတဦးက ပြောပါတယ်။

ပြီးခဲ့တဲ့ ၂၀၂၂ ခုနှစ် မတ်လ ၁၃ ရက်နေ့ ၁ နှစ်ပြည့်တုန်းကလည်း ကျဆုံးလူငယ် ၂ ဦးအတွက် သူတို့ အုတ်ဂူမှာ အထိမ်းအမှတ်ပန်းခွေ လာချတာနဲ့ပတ်သက်ပြီး မီးသဂြိုလ်စက်ဝန်ထမ်းတဦး စစ်ကောင်စီရဲ့ ဖမ်းဆီးခြင်းကို ခံခဲ့ရပါသေးတယ်။

စာတည်း – ရင်ငြိမ်း

ပြည်၊ မတ် ၁၃၊ ၂၀၂၃။

ပဲခူးတိုင်းဒေသကြီး(အနောက်ပိုင်း)၊ ပြည်မြို့၊ မင်းကြီးတောင်ပေါ်ရှိ စစ်ဘက်ဆိုင်ရာလုံခြုံရေးတပ်ဖွဲ့ရုံးမှာ ဗုံးပေါက်ကွဲမှုဖြစ်ပွားပြီး၊ တပ်ဖွဲ့ဝင် ၄ ဦးသေဆုံးခဲ့တယ်လို့ ဌာနဆိုင်ရာဝန်ထမ်းတချို့ထံက သိရသည်။

ပြီးခဲ့တဲ့ မတ်လ ၁၂ ရက်နေ့ ညနေပိုင်းက ပြည်မြို့၊ မင်းကြီးတောင်ပေါ်မှာ ရှိတဲ့ စစ်ဘက်ဆိုင်ရာလုံခြုံရေးတပ်ဖွဲ့ရုံးမှာ ပေါက်ကွဲမှုဖြစ်ပွားခဲ့တာဖြစ်ပြီး အဲဒီနေရာဟာ စစ်အာဏာရှင်အဆက်ဆက် စစ်ကြောရေးလုပ်ရာနေရာဖြစ်ပြီး ဒကစ အကြီးပိုင်းများ လာရောက်လေ့ရှိကာ စစ်တပ်မိသားစုလိုင်းခန်းများ ပတ်လည်ဝိုင်းထားရာ နေရာလည်း ဖြစ်တယ်လို့ ဆိုပါတယ်။

“မနေ့ကညနေက ပေါက်ကွဲမှု ဖြစ်တယ်။ သူတို့ဗုံးနဲ့သူတို့ပေါက်ကွဲတယ်လို့ ကနဦးသိထားတယ်။ ၃ ဦးကတော့ ချက်ချင်းသေပြီး ၁ ဦးကတော့ ဆေးရုံရောက်မှ သေတယ်လို့ ကြားတယ်။ အခုလောလောဆယ်တော့ အဲအပေါ်ကို တက်ခွင့်ပိတ်ထားတယ်။” လို့ နီးစပ်သူများထံက သိရပါတယ်။

အဲဒီနေရာကို ယခင်ကတည်းက တက်ရောက်ခွင့်ပိတ်ပင်ထားပြီး စစ်အာဏာသိမ်းမှုဖြစ်ပြီးနောက် လာရောက်ခွင့် ပိုမိုတင်းကျပ်ထားတဲ့အတွက် ပါဆယ်ဗုံးလာပို့တာ မဖြစ်နိုင်ဘူးလို့ ယင်းနေရာအနီး ရပ်ကွက်နေထိုင်သူများက ဆိုပါတယ်။

“မနေညကတော့ ဖြစ်ပြီး တင်းတင်းကျပ်ကျပ် ပိတ်ထားတယ်။ ဘယ်သူမှ တက်မရဘူး။ အဲရုံးကိုသွားတဲ့လမ်းက ဆင်စုရပ်ကွက်နဲ့ နဝဒေးတံတားကိုသွားတဲ့ ဖြတ်လမ်းပေါ့။ မြန်မာ့အသံ ထပ်ဆင့်လွှင့်ရုံလည်း ရှိတယ်။ ကျန်တာကတော့ သူတို့ ဝန်ထမ်းတွေပဲနေတာ စစ်ကြောရေးက အဲမှာလည်းလုပ်တယ်။ နာမည်ကြီးနေရာပေါ့” ဟု မြို့ခံတဦးက ဆိုပါတယ်။

ဒဏ်ရာရသူတွေကိုတော့ နွားမယံကျေးရွာ အုပ်စုမှာရှိတဲ့ ကုတင် ၁၀၀ စစ်ဆေးရုံမှာ တက်ရောက်ကုသနေရတယ်လို့ သိရပါတယ်။

ပေါက်ကွဲမှုနဲ့ပတ်သက်ပြီးတော့ “မြေပြင်သတင်းစုံစမ်းချက်အရတော့ သူတို့ရုံးကို PDF၊ UG တွေဘက်က လုပ်တာမျိုးမရှိဘူး။ သိရတဲ့ သတင်းအရတော့ သူတို့ တပ်ဖွဲ့ဝင်တွေ အချိန်းအပြောင်းလုပ်တဲ့ အချိန် လက်နက်တွေပါ ရွှေ့ပြောင်းရာကနေ မတော်တဆဖြစ်ပြီး ပေါက်ကွဲတာလို့တော့ သိရတယ်။” လို့ ပြည်ခရိုင် တော်လှန်ရေးအင်အားစု ပြန်ကြားရေးတာဝန်ရှိသူက ပြောပါတယ်။

ပြည်၊ မတ် ၄၊ ၂၀၂၃။

ပဲခူးတိုင်းအနောက်ခြမ်း၊ ပြည်မြို့နယ် မှော်ဇာကျေးရွာမှာ ရှိတဲ့ သရေခေတ္တရာမြို့ဟောင်းက ရှေးဟောင်းရွှေထည်တွေ တူးယူနေတဲ့ ဗိုလ်မှူးတဦးကို အရေးမယူဘဲ အမှုကိုဖုံးထားတယ်လို့ ပြည်မြို့ဒေသခံ တဦးဆီက သိရပါတယ်။

ပြည်မြို့ ဒေသကွပ်ကဲရေးစစ်ဌာနချုပ်က ဗိုလ်မှူးဝဏ္ဏတိုင်းကျော်ဆိုသူ ဦးဆောင်ပြီး အဖွဲ့ဝင် ၁၀ ယောက်လောက်နဲ့ ရှေးဟောင်းမြို့ရိုးအပြင်ဘက်၊ အောင်မြင်ဗာဟုဘုရားအနီးရှိ ကြက်တူရွေးတောင်မှာ တူးဖော်တာတွေ လုပ်နေခဲ့တာဖြစ်တယ်လို့ ဆိုပါတယ်။

အဲ့ဒီလို တူးဖော်နေတာကို စရဖက သတင်းရလို့ မတ်လ ၁ ရက်က ဗိုလ်မှူး ဝဏ္ဏတိုင်းကျော်ရဲ့ အခန်းအထိ ဝင်ဖမ်းခဲ့ပြီး ရှေးဟောင်းလို့ ယူဆရတဲ့ ဆင်းတုတွေ့တယ်လို့ ဒေသခံတဦးက ပြောပါတယ်။

“မနေ့ (မတ်လ ၁ ရက်)က ဖမ်းတာပါ။ ချက်ချင်းပဲ ပြန်လွှတ်ပြီး ဟန်မပျက် တာဝန်ထမ်းဆောင် ခိုင်းထားပါတယ်။ ဒကစမှူးက အဓိက ညှိပေးတာပါ။ ရှေးဟောင်းနယ်မြေမို့လည်း စရဖ နဲ့ ရဲက လိုက်တာ” လို့ ပြောပါတယ်။

အခုလို တူးဖော်နေတာ ဘယ်လောက်ကြာနေပြီဆိုတာ မသိရသလို အဲ့ဒီသတင်းကိုလည်း ဖုံးဖို့ ကြိုးစားနေကြတာလို့လည်း ဆိုပါတယ်။

“သပိတ်ကျင်းလို ရွှေထွက်တဲ့နေရာတွေမှာဆိုရင်တော့ ပြသနာ မဖြစ်ဘူး။ ဒီနယ်မြေမှာက ကုန်းမို့မို့ဆို ဘုရားပျက်ပဲ အထဲမှာကလည်း ဌာပနာပစ္စည်းတွေက ရှိနေတတ်တယ်။ တူနေတာတော့ ကြာလောက်ပြီ။ ပါတာလည်း ပါကုန်ပြီ။ ခုမှ သိတာဆိုတော့။ ပြီးတော့ လူကြီးဆုံရာက ဝိုင်းအုပ်ပေးထားကြတာ” လို့ သူက ဆက်ပြောပါတယ်။

၂၀၁၄ ခုနှစ်၊ ဇွန်လ ၂၂ ရက်နေ့၊ ကာတာနိုင်ငံ၊ ဒိုဟာမြို့မှာပြုလုပ်ခဲ့တဲ့ ၃၈ ကြိမ်မြောက် ကမ္ဘာ့အမွေအနှစ်ကော်မတီအစည်းအဝေးမှာ ပျူမြို့ဟောင်းတွေဖြစ်တဲ့ သရေခေတ္တရာ၊ ဗိဿနိုး၊ ဟန်လင်း တို့ကို ကမ္ဘာအမွေအနှစ် စာရင်းဝင်အဖြစ် အသိအမှတ်ပြုထည့်သွင်းခဲ့ပါတယ်။
အခုလို တူးဖော်နေတာဟာ ကမ္ဘာ့အမွေအနှစ် စာရင်းဝင်ထားပြီးသား နေရာတခုဖြစ်တဲ့အတွက် ရှေးဟောင်းအမွေအနှစ်တွေ ဆုံးရှုံးရတယ်လို့ ပြည်မြို့ ဒေသခံတဦးက ဆိုပါတယ်။

၂၀၁၉ ခုနှစ် ဖေဖော်ဝါရီ ၂၈ ရက် ပြည်ထောင်စုလွှတ်တော် ဥပဒေ အမှတ် ၆ ယဥ်ကျေးအမွေအနှစ်ဒေသများ ကာကွယ်ထိန်းသိမ်းရေးဥပဒေ အခန်း ၁၀ ပုဒ်မ ၃၄ အပုဒ်ခွဲ ၁နဲ့ ၂ အရ ပြစ်မှုထင်ရှားပါက အနည်းဆုံး ထောင်ဒဏ် ၆ လ ကနေ ၁ နှစ်အထိ ချမှတ်ခံရမဲ့အပြင် အနည်းဆုံး ငွေကျပ် ၁၀ သိန်း ကနေ သိန်း ၃၀ အထိ ချမှတ်နိုင်တယ်လို့ ပါဝင်ပါတယ်။

အလားတူ ၈၈ အရေးအခင်းပြီးချိန်ကလည်း သရေခေတ္တရာ ရှေးဟောင်းနယ်များအတွင်း၊ အာဏာသိမ်းစစ်တပ် ဦးဆောင်ကာ ရှေးဟောင်းအဆောက်အအုံတွေထဲက ပျူခေတ်လက်ရာ ရွှေ၊ ငွေများကို တူးဖော်ယူဆောင်တာတွေ ရှိခဲ့ပါတယ်။

အဲ့ဒီအပြင် စီးပွားရေးကျပ်တည်းနေတဲ့ ဒေသခံတွေကလည်း သက်ဆိုင်ရာ လယ်ယာမြေပိုင်ရှင်များကို မြေငှားရမ်းခပေးပြီး ရွှေကျင်တာ၊ ရှေးဟောင်းပစ္စည်းတွေ ရှာဖွေခဲ့ကြတာတွေကြောင့် ပျူခေတ်အထင်ကရ အဆောက်အအုံနဲ့ သာသနိကအဆောက်အအုံများစွာ ပျက်စီးခဲ့တယ်လို့ ရှေးဟောင်း သုတေသန ပညာရှင်များက ထောက်ပြပြောဆိုထားပါတယ်။

၂၀၂၁ ခုနှစ် အာဏာသိမ်းမှုနောက်ပိုင်းကစလို့ လက်ရှိအချိန်အထိ သရေခေတ္တရာမြို့ဟောင်း အဝင်အထွက်နေရာတွေမှာ အာဏာသိမ်းစစ်တပ်က အစောင့်တွေ ချထားတာ ရှိနေပါသေးတယ်။

ပဲခူး၊ ဒီဇင်ဘာ ၃၁၊ ၂၀၂၂။

ပဲခူးတိုင်းအနောက်ခြမ်း၊ သာယာဝတီမြို့နယ်ထဲမှာ တပ်ထောက်ခံပွဲမလုပ်ရဲတဲ့အတွက် ပြည်မြို့ပေါ်က ကြံ့ခိုင်ရေးရုံးထဲမှာ ပြောင်းပြီးလုပ်ခဲ့ကြတယ်လို့ သိရပါတယ်။

ဒီဇင်ဘာလ ၃၁ ရက်ဒီကနေ့မနက်ပိုင်းမှာ သာယာဝတီမြို့နယ်ကြံ့ခိုင်ရေးပါတီကပြုလုပ်တဲ့ ကုလသမဂ္ဂလုံခြုံရေးကောင်စီက မြန်မာနိုင်ငံနဲ့ပတ်သက်ပြီးဆုံးဖြတ်ချက်ကို ဆန့်ကျင်ရှုံ့ချကြောင်းပွဲကို သာယာဝတီမှာမလုပ်ရဲတဲ့အတွက် ပြည်မြို့၊ ကြံခိုင်ရေးရုံးထဲမှာပြောင်းလဲပြုလုပ်ခဲ့တာလို့ သာယာဝတီမြို့နယ်ကြံခိုင်ရေးပါတီနဲ့ နီးစပ်သူကတဦးကပြောပါတယ်။

“အမှန်ဆို ကုလသမဂ္ဂလုံခြုံရေးကောင်စီက မြန်မာနိုင်ငံနဲ့ပတ်သက်တဲ့ဆုံးဖြတ်ချက်ကို ဆန့်ကျင်ရှုံချပွဲကို မြို့နယ်အလိုက်လုပ်ခိုင်းတာ။ သာယာဝတီက PDF ရန်ကြောက်လို့ ပြည်မှာပြောင်းလုပ်ရတာလို့ သိရတယ်”လို့ ပြောပါတယ်။

စစ်တပ်အာဏာသိမ်းပြီးနောက်ပိုင်း သာယာဝတီဂဠုန်တပ်ဖွဲ့ ပေါ်ပေါက်လာပြီးချိန်မှစတင်ပြီး စစ်ကောင်စီသတင်းပေး၊ ဒလန်ဆိုသူတွေနဲ့ စစ်ကောင်စီတပ်ဖွဲ့တွေ ရှင်းလင်းခံလာရချိန်မှာ သာယာဝတီမြို့နယ်ထဲမှာ စစ်တပ်ထောက်ခံပွဲတွေ လုပ်ရဲသူမရှိသလောက်ဖြစ်လာတယ်လို့ သာယာဝတီဂဠုန်တပ်ဖွဲ့ မြေပြင်စစ်ရေးတာဝန်ခံ ကိုဥက္ကာကပြောပါတယ်။

“သာယာဝတီဂဠုန်တပ်ဖွဲ့မပေါ်ချိန်ကတော့ ကြံခိုင်ရေးနဲ့စကစထောက်ခံသူတွေက တော်တော်လေး လေကျယ်ကျယ်နဲ့ မြို့ပေါ်မှာတောင် တပ်ထောက်ခံပွဲတွေလုပ်ခဲ့ကြတယ်။ ဘယ်သူမှဂရုမစိုက်ဘဲလုပ်ခဲ့တယ်။ ဂဠုန်တပ်ဖွဲ့ ပေါ်လာပြီးချိန်မှာ သူတို့ရဲ့အုပ်ချုပ်ရေးယန္တယားအဖွဲ့ဝင်တွေ ရှင်းခံလာရတော့ အဲဒီအချိန်ကစပြီး ကျီးလန့်စာ စားဖြစ်နေရတယ်။ ဘယ်အချိန် အသတ်ခံရမလဲဆိုပြီးတော့။ ကျနော်တို့ဘက်ကလဲ သူတို့ လမ်းပေါ်တက်လာတာနဲ့ ဘယ်သူဘယ်ဝါသိတာနဲ့ စကစ ဒေါက်တိုင်တွေကို ရှင်းနေမှာပဲ”လို့ ပြောပါတယ်။

သာယာဝတီဂဠုန်တပ်ဖွဲ့အနေနဲ့ ၂၀၂၂ ခုနှစ်၊ ဩဂုတ်လမှစတင်ပြီး ဒီဇင်ဘာလ ၂၈ ရက်အထိ သာယာဝတီမြို့နယ်အတွင်းက အုပ်ချုပ်ရေးအဖွဲ့ဝင်၊ ပျူ၊ သတင်းပေးဒလန်ဆိုသူ စုစုပေါင်း ၁၃ ဦးထိ ရှင်းလင်းထားတယ်လို့ သိရပါတယ်။

ပဲခူး၊ ဒီဇင်ဘာ ၁၅၊ ၂၀၂၂။

ပဲခူးတိုင်း၊ ပြည်မြို့နယ်တိုင်းဒေသကြီးလွှတ်တော်ကိုယ်စားလှယ် ဦးကျော်ဇေယျကို စစ်ကောင်စီက ဒီဇင်ဘာ ၁၂ ရက် မနေ့က ပုဒ်မ ၆ ခုနဲ့ ထောင်ဒဏ် ၁၉ နှစ်ချမှတ်ခဲ့တယ်လို့မိသားစုဆီက သိရပါတယ်။

NLD အမတ် ဦးကျော်ဇေယျကို စစ်ကောင်စီတပ်ဖွဲ့တွေက ပြီးခဲ့တဲ့ ဇွန်လ ၉ ရက်မှာဖမ်းဆီးလိုက်ပြီး ရေကြည်အိုင် စစ်ကြောရေးမှာ ၁၀ ရက် ဖမ်းဆီးစစ်ဆေးခံရပြီးနောက် ဇူလိုင် ၂၉ ရက်မှာ ပြည်မြို့ ဒကစကို ပို့ကာ သြဂုတ် ၈ ရက်မှာတော့ပြည်ထောင်ကိုရောက်ရှိခဲ့ပါတယ်။

ဖမ်းဆီးခဲ့ပြီးတဲ့နောက် စစ်ကောင်စီက ဦးကျော်ဇေယျကို ပုဒ်မ ၆ ခုဖြစ်တဲ့ အကြမ်းဖက်မှု ၊ ရွေးကောက်ပွဲ ၊ ၅၀၅(က) ၂ ခါ ၊ ယစ်မျိုး ၊ ဘေးစီမံ စတဲ့ပစ်မှုတွေနဲ့ ဖမ်းဆီးထားပြီ ၆ လအကြာမှာ အမိန့်ချခဲ့တယ်လို့လည်းဆိုပါတယ်။

“ရေကြည်အိုင်စစ်ကြောရေးမှာ စုတ်ပြတ်သတ်နေအောင်ရိုက်တာ လူရုပ်တောင်မပေါ်ဘူး။ဖမ်းဆီးခံရတဲ့ ၆လလုံး မိသားစုဝင်တွေနဲ့ တွေ့ခွင့်မပေးပါဘူး။ စာတောင်ပေးလို့မရဘူးအခုလိုအမိန့်ချခံရတာတော့ခံပြင်းတာပေါ့။ မတရားအမိန့်တွေ သူတို့ချချင်သလိုချနေတာ မတရားမှန်းသိပေမဲ့လည်း အခုချိန်တော့ ကိုယ့်လူနေကောင်းကျန်းမာဖို့ဘဲအရေးကြီးတယ်ကိုယ့်ထက်တောင်ပေးဆပ်ထားရသူတွေတပုံကြီးရှိသေးတာပဲ ”လို့ ဦးကျော်ဇေယျရဲ့အမျိုးသမီးက မြေလတ်အသံကို ပြောပါတယ်။

ပြည်ထောင်တွင်းတရားရုံးမှာ ဦးကျော်ဇေယျကို ထောင်ဒဏ် (၁၉) နှစ်ချမှတ်တာကိုမိသားစုဝင်တွေက ကိုယ်တိုင်သွားပြီး ကြားနာရခြင်းမျိုးမဟုတ်ပဲ တဆင့်ပြောစကားကသာသိရှိရတယ်လို့ ဆိုပါတယ်။

ဦးကျော်ဇေယျဟာ ၂၀၁၅ ကနေ ၂၀၂၀ အထိရွေးကောက်ပွဲမှာ အနိုင်ရလွှတ်တော်ကိုယ်စားလှယ်တဦးဖြစ်ကာ လက်ရှိပြည်မြို့မှာ နိုင်ငံရေးမှုနဲ့ ဖမ်းခံထားရသူ ၅၀ဦးထက်မနည်းရှိနေပါတယ်။