ပျူစောထီးတပ်ဖွဲ့

ပွင့်ဖြူ၊ ဇူလိုင် ၁၅၊ ၂၀၂၅။

မကွေးတိုင်း၊ ပွင့်ဖြူမြို့နယ်ရှိ ရေပုတ်ကြီးကျေးရွာမှာ ပျူစောထီးတပ်ဖွဲ့ထဲကို ဝင်ရောက်တဲ့ ရွာခံအမျိုးသားတွေများနေပြီး ၂ လအတွင်း လူ ၆၀ ဦးခန့် ပျူစောထီးအင်အားတိုးမြင့်သွားတယ်လို့ သိရပါတယ်။

မူလက ရေပုတ်ကြီးကျေးရွာမှာ ပျူစောထီးတပ်ဖွဲ့ဝင် ၁၀ ဦးခန့်သာရှိရာကနေ ပြီးခဲ့တဲ့ မေနဲ့ဇွန်လ အတွင်းရွာခံအမျိုးသားတွေ ပျူစောထီးတပ်ဖွဲ့ထဲ ဝင်ရောက်မှုများလာပြီး လက်ရှိမှာ အင်အား ၇၀ ခန့် အထိရှိနေတယ်လို့ ဆိုပါတယ်။

“ အစက ရေပုတ်ကြီးကျေးရွာမှာ ပျူစောထီး အင်အားက ၁၀ ဦးလောက်ပဲရှိပါတယ်၊ နောက်ပိုင်းတော့ ရရှိတဲ့ငွေကြေးနဲ့ ဆန်ကို ပျူစောထီးထဲဝင်တဲ့သူတွေကို ပေးမယ်ဆိုပြီးကောက်တဲ့အတွက် အခုဆိုရင် ၁ လချင်း ၁ လချင်းမှာ ပျူစောထီး အင်အားက ၁ လ ကို ၃၀ ဦးနဲ့ ၂ လအတွင်းမှာ ၆၀ ဦးလောက် တိုးလာတယ်၊ အဲ့ဒီတိုးလာတဲ့ လူတွေကိုပေးဖို့ ကောက်နေတာ၊ မေလကစပြီးကောက်နေတာ ၃ လရှိပါပြီ” လို့ ရေပုတ်ကြီးရွာခံအမျိုးသားတဦးက မြေလတ်အသံကို ပြောပါတယ်။

ရေပုတ်ကြီးရွာပျူစောထီးခေါင်းဆောင်နဲ့ ကျေးရွာအုပ်ချုပ်ရေးမှူးက ပျူစောထီးတပ်ဖွဲ့ထဲဝင်ရောက်သူတွေအနေနဲ့ ၎င်းတို့တပ်ဖွဲ့ကိုထောက်ပံ့ဖို့လစဥ်ကြေးပေးဆောင်ဖို့မလိုတဲ့အပြင် လစဥ်ဆန် ၁ အိတ်နဲ့ ငွေ ၅ သောင်းရရှိမယ်ဆိုကာ ပြောဆိုစည်းရုံးမှုတွေကြောင့်လည်း အခုလိုဝင်ရောက်သူ များပြားလာတာလို့ အထက်ပါဒေသခံက သုံးသပ်ပြောဆိုပါတယ်။

ရေပုတ်ကြီးရွာကို ပျူစောထီးခေါင်းဆောင် ကိုဖိုးဌေး၊ အုပ်ချုပ်ရေးမှူး ကိုလူဝင်း၊ ဒုခေါင်းဆောင် ကိုဝင်းလှိုင်တို့က ဦးစီးပြီးတော့ စလင်းမြို့အခြေစိုက် ခလရ ၂၅၃၊ ခလရ ၂၅၄၊ ခလရ ၂၅၅ တပ်တွေက ကာဘိုင်နဲ့ G3 လက်နက်ငယ် ၂၅ လက် တပ်ဆင်ပေးထားတာလို့ သိရပါတယ်။

ရေပုတ်ကြီးကျေးရွာဟာ အိမ်ခြေ ၆၀၀ ကျော်၊ လူဦးရေ ၃,၀၀၀ ကျော်ရှိ ရွာကြီးဖြစ်ပြီး ပွင့်ဖြူမြို့နဲ့ ၆ မိုင်ခန့်၊ ပျူစောထီးအားကောင်းတဲ့ ကျောက်ကုန်းကြီးရွာနဲ့ ၂ မိုင်ခန့်သာကွာဝေးတယ်လို့ သိရပါတယ်။

စလင်းမြို့နယ်အတွင်း ဒေသကာကွယ်ရေးတပ်တွေနဲ့ စစ်ကောင်စီတပ်ဖွဲ့ဝင်တွေအကြားဖြစ်ပွားနေတဲ့ တိုက်ပွဲတွေကြောင့် စစ်ကောင်စီတပ်က ပွင့်ဖြုမြို့နယ်အတွင်း တပ်စခန်းတွေကို လူလက်နက်အင်အား ဖြည့်တင်းတာတွေရှိသလို၊ ကျေးရွာတွေက ပျူစောထီးတပ်ဖွဲ့တွေကိုလည်း လက်နက်ခဲယမ်းတိုးမြှင့် တပ်ဆင်တာတွေ လုပ်ဆောင်ပေးနေတယ်လို့ ဒေသခံတွေနဲ့ တော်လှန်ရေးတပ်ဖွဲ့ဝင်တွေထံက သိရပါတယ်။

စာတည်း – ဟိန်းစံ

မကွေး၊ မေ ၄၊ ၂၀၂၃။

မကွေးတိုင်း၊ ပခုက္ကူမြို့နယ်၊ အနောက်ဘုန်းကံကျေးရွာက ပျူစောထီးတပ်ဖွဲ့တွေဟာ အနီးနားကျေးရွာတွေဘက်ကို လက်နက်ကြီးတွေနဲ့ နေ့စဉ်ပစ်ခတ်နေလို့ ကင်းကျေးရွာက ပြည်သူတွေဟာ ၉ လကြာတဲ့အထိ တောထဲမှာ တဲထိုးပြီး နေနေရတယ်လို့ သိရပါတယ်။

အနောက်ဘုန်းကံကျေးရွာနဲ့ ၂ မိုင်လောက်ဝေးတဲ့ ကင်းကျေးရွာက ပြည်သူတထောင်နီးပါးဟာ ပြီးခဲ့တဲ့ ၂၀၂၂ ခုနှစ်၊ သြဂုတ်လကစပြီး တောထဲမှာ ထွက်ပြေးတိမ်းရှောင်နေရကြရတာပါ။ တောထဲမှာ ထွက်ပြေးတိမ်းရှောင်နေစဉ်မှာလည်း စစ်ကောင်စီစစ်ကြောင်းထိုးလာတဲ့အချိန်မှာ ထပ်မံထွက်ပြေးတိမ်းရှောင်နေရသေးတယ်လို့ ကင်းရွာဒေသခံတဦးက ပြောပါတယ်။

အနောက်ဘုန်းကံကျေးရွာက ပျူစောထီးတွေဟာ ကင်းကျေးရွာကို စိတ်မထင်ရင်မထင်သလို ပစ်ခတ်နေတာမျိုး ဖြစ်ပြီး ကျေးရွာထဲကို လက်နက်ကြီး ကျည်ဆံကျတာမျိုးရှိသလို ကျေးရွာအနီးပတ်ဝန်းကျင်ကို ကျတာလည်း ရှိတယ်လို့ဆိုပါတယ်။ ဒီလို လက်နက်ကြီးတွေနဲ့ ပစ်ခတ်တာကြောင့် လူနေအိမ်တလုံးနဲ့ ဘုန်းကြီးကျောင်း တကျောင်းထိမှန် ပျက်စီးသွားခဲ့ပါသေးတယ်။

ဒါကြောင့် ကျေးရွာသားတွေဟာ ရွာထဲမှာ တယောက်မှမနေရဲဘဲ ရေခပ်ချိန်၊ ကျွဲ၊ နွား၊ ဆိတ် သိမ်းချိန်လောက်သာ ကျေးရွာထဲ ပြန်ကြပြီး ကျန်တဲ့အချိန်တွေမှာ တောထဲကတဲတွေဆီမှာသာ နေကြရတယ်လို့ ဒေသခံတွေက ဆိုပါတယ်။

“ရွာသားတွေက တောထဲမှာပဲ ထန်းလက်တွေနဲ့ တဲထိုးပြီးနေကြတယ်။ ထန်းပင်တွေမှာ ထန်းလက်တွေချိုးစရာ မရှိလောက်အောင်ပါပဲ။ မိုးရွာတဲ့နေ့တွေဆိုရင် ပိုဆိုးတယ်။ စစ်ကြောင်းတွေထိုးလာရင်လည်း ထပ်ပြီးထွက်ပြေးရသေးတယ်” လို့ အမည်မဖော်လိုတဲ့ ကင်းကျေးရွာက ဒေသခံတဦးက ဆိုပါတယ်။

၉ လကြာတဲ့အထိ တောထဲမှာထွက်ပြေးတိမ်းရှောင်နေရတဲ့အတွက် ဒေသခံပြည်သူတွေဟာ စားဝတ်နေရေးတွေကျပ်တည်းလာပြီး မိမိတို့ ပိုင်ဆိုင်တဲ့လယ်ယာတွေကို ပေါင်နှံကာ စားဝတ်နေရေးအတွက် ဖြေရှင်းနေရတယ်လို့ ကင်းကျေးရွာက ဒေသခံတွေက ဆက်ပြောပါတယ်။

“စားဖို့ကတော့ ရွာကပိုက်ဆံရှိတဲ့သူဆီကနေ လယ်ယာပေါင်လိုက်၊ ရွေးလိုက် တောင်သူလုပ်လိုက် လည်ပတ်ရင်း ဖြေရှင်းနေရတယ် ”လို့ ရွာခံတဦးက ဆိုပါတယ်။

စာတည်း – လင်းဇေ

ခင်ဦး၊ မတ် ၆၊ ၂၀၂၃။

ပျူစောထီးတပ်ဖွဲ့တွေက လက်နက်ကြီးတွေနဲ့ ပစ်ခတ်ပြီး စစ်ကြောင်းထိုးလာလို့ စစ်ကိုင်းတိုင်း၊ ခင်ဦးမြို့နယ်က အသက် ၈ နှစ်အရွယ် ကလေးတဦးဟာ ထွက်ပြေးတိမ်းရှောင်ရင်း ကျည်ထိမှန် သေဆုံးခဲ့တယ်လို့ သိရပါတယ်။

မတ်လ ၆ ရက် ဒီမနက် ၁၁ နာရီလောက်မှာ အင်အား ၁၀၀ ဝန်းကျင်ရှိတဲ့ ပျူစောထီးတပ်ဖွဲ့ဝင်တွေက ကျီစုရွာဘက်ကို စစ်ကြောင်းထိုးလာချိန်မှာ ထွက်ပြေးတိမ်းရှောင်နေကြတဲ့ မုံလှကျေးရွာက အသက် ၈ နှစ်အရွယ် မိန်းကလေးငယ်တဦး ကျည်ထိမှန် သေဆုံးခဲ့တာလို့ ခင်ဦးမြို့နယ် သတင်းမှန်ကြားရေး တာဝန်ခံတဦးက မြေလတ်အသံကို ပြောပါတယ်။

“တိုက်ပွဲလည်း မဖြစ်ဘဲနဲ့ ထွက်ပြေးနေတဲ့ ဒေသခံတွေကိုလက်နက်ကြီးတွေနဲ့ ပစ်တယ်။ စက်သေနတ်တွေနဲ့လည်း ပစ်တယ်။ အဲဒီမှာ ကလေးတဦးက ဆုံးသွားတယ်။ အသက် ၆၀ အရွယ် အဖိုးတဦးလည်း လက်နက်ကြီး ထိသွားတယ်” လို့ ဆိုပါတယ်။

အဲ့ဒီပျူစောထီးအဖွဲ့ဟာ ရေဦးမြို့နယ်၊ အောင်သာယာကျေးရွာက ဖြစ်ပြီး၊ ခုလိုစစ်ကြောင်းထိုးလာတဲ့အတွက် ခင်ဦးနယ်ထဲက ငါးရုံကြီး၊ ရှားတောရွာနဲ့ မုံလှရွာစတဲ့ ကျေးရွာကဒေသခံတွေ ရွာကနေ ထွက်ပြေးနေရတယ်လို့လည်း သိရပါတယ်။

အလားတူ မတ်လ ၅ ရက်မှာလည်း ခင်ဦးမြို့နယ်၊ အလယ်ရှိုရွာက ၁၂ နှစ်အရွယ် ကလေးငယ်တဦးဟာ နွားကျောင်းနေစဥ် မပေါက်ကွဲဘဲ ကျန်နေတဲ့ ၄၀ မမ လက်နက်ကြီးကျည်အဖူးကို ကိုင်မိရာမှ ပေါက်ကွဲမှုဖြစ်ပြီး ထိမှန်သေဆုံးခဲ့သေးတယ်လို့လည်း အထက်ပါတာဝန်ခံက ဆက်ပြောပါတယ်။

“ကလေးက ကျောင်းသားပါ။ ကျောင်းပိတ်လို့ နွားကျောင်းသွားရင်း လက်နက်ကြီးကိုတွေ့တော့ ကောက်ယူပြီး ရေကန်ဘောင်ပေါ်မှာ တင်ထားတယ်။ အဲဒါ မတော်တဆ ပြုတ်ကျပြီးတော့ လက်နက်ကြီးက ပေါက်သွားတယ်။ အသံကြားလို့ တောထဲက လူတွေ၊ ရွာထဲက လူကြီးတွေ လာပေမဲ့လည်း ကလေးက အသက်မမှီတော့ဘူး။ အဲဒီလက်နက်ကြီးက ဖေဖော်ဝါရီလကတည်းက စခတွေ ရမ်းသမ်းပစ်ခတ်ခဲ့တဲ့ဟာတွေပါ” လို့ ဆိုပါတယ်။

ခင်ဦးမြို့နယ်ထဲမှာ ပြီးခဲ့တဲ့ ၂၀၂၂ ခုနှစ်ကနေ ယခုနှစ် ၂၀၂၃ ခုနှစ်အထိ စစ်ကောင်စီတပ်ဖွဲ့ဝင်တွေရဲ့ လက်နက်ကြီးကျည် ထိမှန်မှုကြောင့် အသက်မပြည့်သေတဲ့ ကလေးငယ် ၁၀ ဦးထက်မနည်း သေဆုံးခဲ့တယ်လို့ ခင်ဦးမြို့နယ် သတင်းမှန်ကြားရေးတာဝန်ခံဆီက သိရပါတယ်။