မုံရွာ၊ ဒီဇင်ဘာ ၁၆၊ ၂၀၂၅။

စစ်ကိုင်းတိုင်း၊ မုံရွာမြို့နယ်အတွင်းက ကျေးရွာ ၃ ရွာကို စစ်ကော်မရှင်စစ်ကြောင်းကမီးရှို့ခဲ့တာကြောင့် နေအိမ် ၉၀ ကျော်မီးလောင်ပျက်စီးခဲ့တယ်လို့ မုံရွာမြို့နယ်ပြည်သူ့ကာကွယ်ရေးအဖွဲ့ဆီက သိရပါတယ်။

ဒီဇင်ဘာ ၁၅ ရက်နေ့လယ် ၁ နာရီကျော်မှာ မုံရွာနမခ ကထွက်လာတဲ့ အင်အား ၁၀၀ ကျော်ပါ စစ်ကြောင်းက ပေါက်ပင်နဲ့ နဂါးတွင်းကျေးရွာတွေကို မီးရှို့ခဲ့သလို မုံရွာ GTC ကျောင်းဝင်းအတွင်း ထွက်လာတဲ့စစ်ကြောင်းက ဆည်တော်ကြီးရွာကို မီးရှို့ခဲ့တာလို့ ဆိုပါတယ်။

“ပေါက်ပင်ကိုအရင်ရှို့တာ၊ ပေါက်ပင်ပြီးမှ နဂါးတွင်း၊ ဒေသခံတွေဖမ်းဆီးတာကိုတော့မကြားဘူး။ ပေါက်ပင်ကိုမီးရှို့နေချိန် ထိတွေ့တိုက်ပွဲဖြစ်သေးတယ်။ နောက်တကြောင်းက ဆည်ကြီးတောဘက်လည်း ရှို့တယ်။ မီးခိုးလုံးတွေမြင်ရတယ်”လို့ မုံရွာမြို့နယ်ပကဖ တာဝန်ရှိသူကပြောပါတယ်။

မီးရှို့ခံရလို့ နဂါးတွင်းကျေးရွာက အိမ်ခြေ ၅၀ လုံး၊ ပေါက်ပင်ကျေးရွာက အိမ်ခြေ ၄၀ ကျော်မီးလောင်ပျက်စီးခဲ့ပြီး ဆည်တောကြီးကျေးရွာမီးရှို့မှုမှာတော့ အပျက်အစီးမသိရသေးဘူးလို့ ဆိုပါတယ်။

ရွာတွေကိုမီးရှို့ခဲ့တဲ့ စစ်ကြောင်း ၂ ကြောင်းစလုံးဟာ ညနေ ၅ နာရီမှာ မုံရွာမြို့ပေါ်ကို ပြန်ဆုတ်သွားတယ်လို့ သိရပါတယ်။

စစ်ကော်မရှင်ဘက်စစ်ကြောင်းထိုးလို့ အိမ်ခြေ ၅၀၀ ကနေ ၁,၀၀၀ ကြားရှိတဲ့ ပေါက်ပင်၊ နဂါးတွင်း၊ ဆည်တော်ကြီး၊ အောင်ကန်သာကျေးရွာတွေက ဒေသခံပြည်သူ ၅,၀၀၀ ကျော်လည်းထွက်ပြေးခဲ့ရပြီး စစ်ကြောင်းပြန်ဆုတ်ချိန်မှာတော့ ရွာခံတွေ ကျေးရွာထဲပြန်လာနေပြီလို့ သိရပါတယ်။

နိုဝင်ဘာ ၇ ရက်ကလည်း မုံရွာမြို့နယ်၊ ကျပိုင်ကျေးရွာလမ်းဆုံအနီးမှာ ဆိုင်ကယ် စီးလာတဲ့ အမျိုးသား ၄ ဦးပစ်ခံရပြီး ၃ ဦးသေဆုံးကာ ပစ်ခတ်မှုအတွင်းအနီးအနားနေပြည်သူ ၁ ဦးပါဒဏ်ရာရတယ်လို့ သိရပါတယ်။

စာတည်း – လင်း

ဝက်လက်၊ ဒီဇင်ဘာ ၁၀၊ ၂၀၂၅။

စစ်ကိုင်းတိုင်း၊ ဝက်လက်မြို့နယ်၊ ရွှေပန်းကုန်းတိုက်နယ်ရှိ ကျေးရွာချင်းဆက်မြေသားလမ်း လမ်းပျက်စီးမှုများလာတာကြောင့် သွားလာရေးအခက်တွေ့နေကြတယ်လို့ ဒေသခံတွေဆီက သိရပါတယ်။

၂၀၂၃ လောက်ကစလို့ ကုန်တင်ယာဥ်တွေအပါအဝင် ခရီးသွားယာဥ်တွေဟာ ဝက်လက်ဘက်ကလာပါက ရွာသာကြီးကျေးရွာထိပ်ရှိ စစ်ကော်မရှင်စစ်ဆေးရေးဂိတ်ကိုရှောင်လိုတာကြောင့် ရွာတော်ရွာထိပ်ကနေ ရှောင်ကွင်းလမ်းကိုဝင်ရောက်ပြီး စစ်ကိုင်းမြို့နယ်၊ ဆားတောင်မြို့အထိ ကျေးရွာချင်းဆက်လမ်းကို အသုံးပြုတဲ့အတွက် မြေသားလမ်းပိုင်းတွေ ပျက်စီးလာတာလို့ ဆိုပါတယ်။

“အခြေနေဆိုးတာကတော့ကျောက်ခဲစားသွားရင်တောင်အစာကြေတယ်။ တနေ့ကိုကားကြီး ကားသေး အစီးရေက ၇၀/၈၀ ကအနည်းဆုံး။ လမ်းဆိုးလို့ ကုန်တင်ယာဥ်ခရီးတင်ယာဥ်တွေတောင်မှောက်တယ်။ ပြန်ပြုပြင်တာမရှိဘူး။ ဆိုင်ကယ်စီးတာတောင်အဆင်မပြေဘူး။ အရင်ကအဆင်ပြေတယ်။ ကားကြီးတွေ သွားလို့ မြေဖြည့်ထားတဲ့ လမ်းကချိုင့်တွေ၊ ဂမူတွေနဲ့ ဆိုင်ကယ်တောင် အဆင်မပြေဘူး”လို့ ဒေသခံတဦးကပြောပါတယ်။

လမ်းပိုင်းတွေပျက်စီးနေတာကြောင့် တောင်သူတွေရဲ့ ထွက်ကုန်တွေပို့ဆောင်ဖို့၊ ရွာခံတွေ ကျန်းမာရေး၊ ပညာရေးကိစ္စသွားလာဖို့ အခက်ကြုံနေရတယ်လို့ ဆိုပါတယ်။

“ဆားတောင်ဘက်ကို အဓိကသွားကြတာများတယ်။ မိုးရာသီတုန်းကတော့ ကားတွေဘာတွေ တိမ်းမှောက်တာရှိတယ်။ ကားချင်းရှောင်ပြီး မြေကျွံပြီးမှောက်တာ။ စပါးတွေကိုလှည်းတွေနဲ့ သယ်တာမှာမှောက်နိုင်တဲ့အနေထားရှိတယ်။ ပူနေရတယ်။ ဒီဘက်က ရာသီပေါ်သီးနှံမစိုက်ကြဘူး။ စပါးဘဲစိုက်ကြတာဆိုတော့ ပျက်စီးပုပ်သိုးတာမရှိဘူး”လို့ သူကဆက်ပြောပါတယ်။

မူလကတည်းကကောင်းမွန်တာမရှိတဲ့ ၅ မိုင်ခန့်အရှည်ရှိအဆိုပါမြေသားလမ်းပိုင်းဟာ ၂၀၂၁၊ အာဏာမသိမ်းခင်က ရွာတော်ကျေးရွာကနေ ဆားတောင်ထိ ဆိုင်ကယ်နဲ့သွားပါက ၄၅ မိနစ်ခန့်သာမောင်းနှင်ရပေမယ့် လက်ရှိမှာတော့ လမ်းပျက်စီးမှုပိုများလာတာနဲ့ ကားပိတ်ဆို့တာတွေကြောင့် မောင်းနှင်ချိန် ပိုမိုကြာမြင့်လာတယ်လို့ ဒေသခံတဦးကပြောပါတယ်။

“ချိုင့်တွေ၊ ဂမူတွေများတော့ ဆိုင်ကယ်ကပုံမှန်စီးရမယ့် နေရာစီးမရတော့ဘူး။ လူထိန်းထားရတာ။ Speed နဲ့ကိုစီးမရဘူး။ လမ်းပိတ်တာက အခုမရှိဘူး။ မိုးတွင်းကရှိတယ်။ အခုက Speed နဲ့ စီးမယ် လုပ်လိုက်၊ ချိုင့်တွေ့လိုက် ပြန်ထိန်းလိုက်နဲ့ အချိန်ပိုကြာတာ” လို့ ဆိုပါတယ်

ဒါ့အပြင်လမ်းပိုင်းပေါ်မှာဖြတ်သန်းလာတဲ့ ကားကြီး၊ ကားငယ်တွေကို အခွန်ကောက်ခံနေတဲ့ တိုက်နယ်ပကဖအဖွဲ့တွေရှိပေမယ့်လမ်းပျက်စီးမှုကို ပြန်လည်ပြင်ဆင်ပေးတာမျိုးမရှိတာကြောင့် ပြန်လည်ပြင်ဆင်ပေးစေချင်တဲ့အပြင် ကုန်တင်ယာဥ်ကြီးတွေဖြတ်သန်းသွားလာမှုတွေကိုလည်း တားမြစ်ပေးစေချင်တယ်လို့ အထက်ပါဒေသခံက ပြောပါတယ်။

“လမ်းတွေပျက်တယ်။ ပြန်လည်ပြုပြင်ပေးမှုမရှိဘူး။ ကားတွေလည်းအခက်အခဲဖြစ်တယ်။ ပြည်သူတွေလည်း အခက်အခဲဖြစ်တယ်။ မိုးရွာတုန်းသွားလာထားကြတယ်။ ပြုပြင်မှုလည်းမရှိကြဘူး။ အခွန်ကောက်တယ်ဆိုရင်း လမ်းကောင်းအောင်ပြုပြင်ပေးပေါ့။ အဲ့လိုမဟုတ်ရင် ကားတွေကို တားရမှာ”လို့ အဆိုပါဒေသခံက ဆက်ပြောပါတယ်။

အဆိုပါလမ်းပိုင်းပျက်စီးမှုနဲ့ ကားတွေသွားလာခွင့်ပေးတဲ့အခြေအနေတွေကိုသိရဖို့ ရွှေပန်းကုန်း တိုက်နယ်ပကဖ တာဝန်ခံဆီ မြေလတ်အသံက တယ်လီဖုန်းကတဆင့် ဆက်သွယ်ပေမယ့် ဆက်သွယ်လို့မရခဲ့ပါဘူး။

အဲ့ဒီလမ်းပိုင်းဟာ ရွာတော်၊ လှဒွေ၊ ရွှေပန်းကုန်း၊ ဒီလုံးပို၊ သာစည်၊ မင်းရွာ ကျေးရွာတွေက ဒေသခံတွေ အဓိက အားထားသွားလာနေရတဲ့လမ်းဖြစ်တယ်လို့လည်း သိရပါတယ်။

စာတည်း – လင်း

မကွေး၊ နိုဝင်ဘာ ၂၅၊ ၂၀၂၅။

မကွေးတိုင်း၊ ပေါက်မြို့နယ်နဲ့ မြိုင်မြို့နယ်ထဲက ကျေးရွာ ၅ ရွာကို စစ်ကော်မရှင်စစ်ကြောင်းတွေက နိုဝင်ဘာ ၁၈ ကနေ ၂၄ ရက်အတွင်းမီးရှို့ဖျက်ဆီးခဲ့တယ်လို့ ဒေသခံတွေဆီက သိရပါတယ်။

ကပစ ၂၄ ကထွက်လာတဲ့ အင်အား ၂၀၀ ကျော်ပါစစ်ကော်မရှင်စစ်ကြောင်းက နိုဝင်ဘာ ၁၈ ရက်မှာ ပေါက်မြို့နယ်၊ တယ်ပင်ရွာနဲ့ နိုဝင်ဘာ ၂၃ ရက်မှာ ကျောက်မဲတောင်ရွာတို့ကို မီးရှို့ ဖျက်ဆီးခဲ့တယ်လို့ ဆိုပါတယ်။

“ကပစ ၂၄ အနီးတဝိုက်မှာပဲ ရှိနေသေးတယ်။ ကျောက်မဲတောင်ကို မီးရှို့ပြီးမှ ပြန်ဆုတ်သွားတာပါ။”လို့ ဒေသခံတဦးက ဆိုပါတယ်။

အခုလိုမီးရှို့ဖျက်ဆီးခဲ့တာကြောင့် အိမ်ခြေ ၁၀၀ ဝန်းကျင်ရှိ ကျောက်မဲတောင်ရွာက နေအိမ် ၁၅ လုံး၊ အိမ်ခြေ ၈၀ ရှိ တယ်ပင်ရွာက နေအိမ် ၇ လုံးမီးလောင်ပျက်စီးခဲ့တယ်လို့ ဆိုပါတယ်။

လက်ရှိမှာတော့ စစ်ကြောင်းက ကပစ ၂၄ အနီးရှိ မျှားပိုင်းကျေးရွာအနီးမှာရှိနေပြီး စစ်ကြောင်းကြောင့် သီးခြောက်၊ သရဖီ၊ လယ်လန်း၊ မြေခြား၊ သရက်လေးပင်၊ သပွတ်စု၊ တောင်ချို၊ ဒေါင်းသာ၊ ကျောက်ကား၊ ကျားသိုက်၊ ခင်တန်းရှည်၊ ဆင်ဇာ၊ ပလောင်း၊ ကျောက်မဲတောင်၊ ကျောက်တံခါး၊ ခင်အေး၊ မျှားပိုင်း၊ အုန်းမှင်၊ တယ်ပင်၊ မကျီးကုန်း၊ ယောကုန်း၊ ထန်းပင်ချောင်းစတဲ့ ကျေးရွာက ဒေသခံတွေလည်း တိမ်းရှောင်နေရတယ်လို့ သိရပါတယ်။

ဒါ့အပြင် အဆိုပါစစ်ကြောင်းဟာ အောက်တိုဘာလနောက်ဆုံးပတ်ကစလို့ ပေါက်မြို့နယ်တောင်ပိုင်း လယ်လန်းက နေအိမ် ၃ လုံး၊ သရဖီကျေးရွာက နေအိမ် ၃၇ လုံး၊ သီးခြောက်ကျေးရွာက နေအိမ် ၁၀ လုံး၊ ဆင်ဇာရွာက နေအိမ် ၆ လုံး၊ ကျောက်ကာစစ်ရှောင်စခန်းက နေအိမ် ၃၀ ကိုမီးရှို့ပြီး ပြည်သူ ၅ ဦးကိုသတ်ကာ ၅ ဦးကိုဖမ်းဆီးခဲ့သေးတယ်လို့ ဒေသခံတဦးက ပြောပါတယ်။

အလားတူ နိုဝင်ဘာ ၂၄ ရက် မနေ့ကညနေဘက်မှာ မြိုင်မြို့နယ်၊ တဲကြီးကျေးရွာကို ရောက်နေတဲ့ စစ်ကြောင်းက ရွာထဲကနေအိမ်တွေကိုမီးရှို့ခဲ့တယ်လို့ ဆိုပါတယ်။

တဲကြီးကျေးရွာကို ရောက်ရှိနေတဲ့စစ်ကြောင်းဟာ နိုဝင်ဘာ ၂၃ ရက်မှာ တဲကြီးကျေးရွာနဲ့ ၂ မိုင်ခန့်အကွာရှိ ပေါက်မြို့နယ် နယ်သတ်ရွာက နေအိမ် ၂ လုံးကို မီးရှို့ ဖျက်ဆီးခဲ့ပြီး မနေ့ကညနေပိုင်းမှာ ဒေသတော်လှန်ရေးတပ်တွေနဲ့ တိုက်ပွဲဖြစ်ပြီးနောက် တဲကြီးရွာကိုမီးရှို့ခဲ့တာလို့ သိရပါတယ်။

“ထပ်ရှို့တယ် သိရတာ။ စစ်ကြောင်းက အဲ့ရွာထဲမှာရှိနေတာဆိုတော့ ဘယ်လောက်လောင်တယ် ဘယ်လောက်ကုန်သွားတယ်ဆိုတာကို ကျနော်တို့ကသေသေချာချာ သိလို့မရဘူး။ မနေ့ကလည်း ရှို့တယ် “လို့ ဒေသခံတဦးက ဆိုပါတယ်။

နိုဝင်ဘာ ၂၅ ရက်ဒီမနက်ပိုင်းမှာတော့ တဲကြီးရွာကိုရောက်နေတဲ့စစ်ကြောင်းက ရွာရဲ့ တောင်ဘက်ပိုင်း ဆီကို အထွက်ပြနေတယ်လို့ ဒေသခံတွေဆီက သိရပါတယ်။

တမခ ၁၀၁၊ ခလရ ၄၁၈ နဲ့ ခလရ ၄၁၉ ကစစ်ကော်မရှင်တပ်သားတွေပါဝင်ပြီး မြိုင်နဲ့ ပေါက်မြို့နယ်အစပ်ရှိ တဲကြီး၊ နသတ်၊ ကံသတ်၊ ကမ္ဘားဖြူ၊ ကျောက်ခွက် စတဲ့ကျေးရွာတွေကို နို၀င်ဘာ ၁၉ ရက်ကစလို့ စစ်ကြောင်းထိုးကာ ကျေးရွာတွေကိုမီးရှို့နေပြီး ဒေသခံကာကွယ်ရေးတပ်တွေနဲ့လည်း မကြာခဏထိတွေ့ ပစ်ခတ်မှုတွေဖြစ်နေတာပါ။

စစ်အာဏာသိမ်းချိန်ကနေ ၂၀၂၅၊ မေလကုန်ပိုင်းအထိ မကွေးတိုင်းအတွင်းက အရပ်သားနေအိမ်ပေါင်း ၁၆,၄၇၀ လုံး မီးရှို့ဖျက်ဆီးခံထားရတယ်လို့ သုသေသနအဖွဲ့တခုဖြစ်တဲ့ Data for Myanmar ရဲ့ နိုဝင်ဘာ ၂၂ ရက်ထုတ်အစီရင်ခံစာမှာ ဖော်ပြထားပါတယ်။

စာတည်း – လင်း

◼ ထွက်မပြေးနိုင်တဲ့ သက်ကြီးပိုင်း သံဃာ ၁ ပါးမီးထဲပါပျံလွန်

တောင်သာ၊ နိုဝင်ဘာ ၂၂၊ ၂၀၂၅။

မန္တလေးတိုင်း၊ တောင်သာမြို့နယ်၊ ညောင်တိုကျေးရွာကို စစ်ကော်မရှင်တပ်ကစစ်ကြောင်းထိုး မီးရှို့လို့ နေအိမ် ၅၀ ခန့်ပျက်စီးပြီး သံဃာ ၁ ပါးလည်း မီးထဲပါ ပျံလွန်တော်မူခဲ့တယ်လို့ ကျေးရွာနဲ့ နီးစပ်သူတွေဆီက သိရပါတယ်။

နိုဝင်ဘာ ၂၁ ရက်နေ့လယ် ၂ နာရီကျော်ခန့်မှာ တောင်သာမြို့ကနေလာတဲ့ စစ်ကော်မရှင် ပူးပေါင်း အင်အား ၃၀၀ ခန့်ဟာ စစ်ကြောင်း ၃ ကြောင်းခွဲပြီးနောက် ညောင်တိုကျေးရွာထဲကို ၁ ကြောင်း ဝင်ပြီးမီးရှို့ခဲ့ကာ နောက်ထပ် စစ်ကြောင်း ၂ ခုက ကျေးရွာအနီးရှိ ဒေသခံကာကွယ်ရေးတပ်တခုရဲ့ ဂိတ်စခန်းကိုမီးရှို့သွားတယ်လို့ ဆိုပါတယ်။

“ဘုန်းကြီးက အသက်ကြီးနေ မသွားနိုင်တော့ စစ်ရှောင်တွေကလည်း ဘုန်းကြီးကို သတိမေ့သွားကြတာဆိုတော့ မီးထဲပါသွားတဲ့သဘောပါ။ ဂိတ်မှာရဲဘော်တွေကျတာမရှိဘူး။ ဂိတ်ကိုက မီးရှို့သွားတာ။ အိမ်က ၅၀ လောက်ကုန်သွားတာ”လို့ ကျေးရွာနဲ့နီးစပ်သူတဦးက ပြောပါတယ်။

မီးရှို့ချိန်ထွက်မပြေးနိုင်တဲ့ သက်တော် ၈၀ ကျော်သံဃာ ၁ ပါးမီးထဲပါ ပျံလွန်တော်မူခဲ့ပြီး နိုဝင်ဘာ ၂၂ ရက်ဒီကနေ့မှာလည်း မြေဖြူကုန်းရွာဘက်ကိုစစ်ကြောင်းဆက်ထိုးနေလို့ အိမ်ခြေ ၂၀၀ ကနေ ၄၀၀ ကြားရှိတဲ့ ညောင်တို၊ မြေဖြူကုန်း၊ ဆည်ကုန်း၊ ချောင်းနားရွာတွေအပါအဝင် ကျေးရွာ ၇ ရွာလောက်က ဒေသခံ ၅,၀၀၀ ဝန်းကျင်လည်း ဘေးလွတ်ရာထွက်ပြေးနေရတယ်လို့ ဆိုပါတယ်။

စစ်ကော်မရှင်ထောက်ခံတယ်လီဂရမ်တွေမှာတော့ ညောင်တိုကျေးရွာအနီး တောင်သာ-ငါ့သရောက် လမ်းပေါ်က တောင်သာမြို့နယ်ပကဖ ဂိတ်စခန်းကိုတိုက်ခိုက်သိမ်းပိုက်နိုင်ခဲ့တယ်လို့ ရေးသားဖော်ပြထားကြပြီး သက်ဆိုင်တပ်ဖွဲ့တွေဘက်ကတော့ တစုံတရာထုတ်ပြန်တာမရှိသေးပါဘူး။

ပြီးခဲ့တဲ့ စက်တင်ဘာ ၁၀ ရက်ကလည်း တောင်သာမြို့နယ်၊ ရုံးစည်ကြီးကျေးရွာက စစ်ကော်မရှင်စစ်ကြောင်းဝင်ရောက်ပြီး နေအိမ် ၁၅ လုံးကို မီးရှို့ဖျက်ဆီးခဲ့သေးတယ်လို့ သိရပါတယ်။

ပုံ – စစ်ကောင်ကော်မရှင်တယ်လီဂရမ်။

သတင်း – ကျော်ကြီး၊ စာတည်း – လင်း

မတ္တရာ၊ အောက်တိုဘာ ၃၁၊ ၂၀၂၅။

မန္တလေးတိုင်း၊ မတ္တရာမြို့နယ်၊ မြောက်တံငါကျေးရွာအနီး မန္တလေး-မတ္တရာ-မိုးကုတ် ကားလမ်းပေါ်ရှိ ကျောက်စရစ်ကုန်းတံတား မိုင်းခွဲခံရပြီး ပျက်စီးသွားတယ်လို့ ဒေသခံတွေဆီက သိရပါတယ်။

အောက်တိုဘာ ၃၀ ရက်မနက် ၁ နာရီခန့်မှာ မိုင်းခွဲခံရလို့ မြောက်တံငါကျေးရွာဘက်ခြမ်းက တံတားမှာ ပေ ၆၀ ခန့် ပြိုကျပျက်စီးသွားတယ်လို့ ဆိုပါတယ်။

“တံတားက မြောက်တံငါကျေးရွာနားမှာ ကျိုးသွားတာ။ မြောက်ဘက်အဖွဲ့အစည်းတွေရှိတဲ့ဘက် ကျိူးတာ။ တံတားက မြောက်တံငါနဲ့တောင်တံငါရွာကို ဆက်ထားတာ။ အဲဘက်ခြမ်းက အရင်တိုက်ပွဲတွေကတည်းကမရှိဘူး။ တံတားကတော့ ဒေသခံတွေအသုံးမပြုတာကြာပြီ”လို့ ဒေသခံတဦးက ပြောပါတယ်။

စစ်ကော်မရှင်အင်အား ၂၀၀ ခန့်ပါစစ်ကြောင်းက အောက်တိုဘာ ၂၉ ရက်ကတည်းက တောင်တံငါကျေးရွာဘက်ခြမ်းမှာ ရောက်ရှိတပ်စွဲနေတယ်လို့ ဆိုပါတယ်။

မိုင်းခွဲခံရတဲ့ ကျောက်စရစ်ကုန်းတံတားဟာ အကျယ်ပေ ၃၀၊ အရှည်ပေ ၃၆၀ ရှိတဲ့ သံကူကွန်ကရစ်တံတားအမျိုးအစားဖြစ်ပြီး ၂၀၀၀ ခုနှစ်က တည်ဆောက်ပြီးစီးခဲ့တာလို့ သိရပါတယ်။

အဆိုပါ ဒေသဟာ ၂၀၂၄ ခုနှစ်လောက်ကတည်းက ဒေသကာကွယ်ရေးပူးပေါင်းတပ်တွေဘက်က ထိန်းချုပ်ထားတဲ့ ဒေသတွေဖြစ်နေပြီး စစ်ကော်မရှင်တပ်တွေနဲ့မကြာခဏ ထိတွေ့တိုက်ပွဲဖြစ်နေတယ်လို့လည်း အထက်ပါဒေသခံက ပြောပါတယ်။

ပြီးခဲ့တဲ့ အောက်တိုဘာ ၂၈ ရက် ညပိုင်းကလည်း ရွှေဘို-ကျောက်မြောင်း- စဉ့်ကူး- လက်ပန်လှကို ဆက်သွယ်ထားတဲ့ ဧရာဝတီမြစ်ကူးတံတားဖြစ်တဲ့ ရတနာသိင်္ခတံတားကို မိုင်းခွဲခံရပြီး ပျက်စီးခဲ့ပါတယ်။

စစ်ကော်မရှင်ထောက်ခံတယ်လီဂရမ်တွေမှာတော့ အဆိုပါ တံတား ၂ စင်းလုံးကို MDY-PDF ပူးပေါင်းအဖွဲ့တွေက မိုင်းခွဲဖျက်ဆီးလိုက်တာလို့ ရေးသားဖော်ပြနေကြပြီး ဘယ်အဖွဲ့အစည်းကဖောက်ခွဲတယ်ဆိုတာကိုတော့ မြေလတ်အသံက သီးခြားအတည်မပြုနိုင်သေးပါဘူး။

စာတည်း – လင်း

စလင်း၊ အောက်တိုဘာ ၂၈၊ ၂၀၂၅။

မကွေးတိုင်း၊ မင်းဘူးခရိုင်၊ စလင်းမြို့ပေါ် မှာ ဒရုန်းနဲ့ဗုံးချခံရပြီး လူနေအိမ်နဲ့စာသင်ကျောင်းအဆောက်အဦတချို့ ထိခိုက်ပျက်စီးမှုရှိတယ်လို့ မြို့ခံတွေထံက သိရပါတယ်။

အောက်တိုဘာ ၂၇ ရက် ယမန်နေ့ နေ့လယ် ၂ နာရီခန့်မှာ ပေါင်းနားရပ်ကွက်၊ ပြန်ဆက်ရုံးအနီး နေအိမ်ပေါ်ကို ဒရုန်းဗုံးသီး ၂ လုံး၊ အောက်တိုဘာ ၂၈ ရက် ဒီကနေ့မနက် ၇ နာရီခန့်မှာ မြင်တင်ရပ်ကွက်ရှိ စလင်းအထက ၁ ကျောင်းဝင်းအတွင်းကို ဒရုန်းဗုံးသီး ၅ လုံးကျရောက်ပေါက်ကွဲခဲ့တာတယ်လို့ ဆိုပါတယ်။

” ဘာကြောင့်ချမှန်းမသိဘူး ဒရုန်းနဲ့လာချတာ။ ဗုံးကပေါက်တယ် လူမထိတာ။ အိမ်ကတော့ ၁ လုံးပျက်စီးတယ်။ ဒီမနက်လည်း ကျောင်းထဲကို ၅ လုံးလောက်ကျတယ်။ ကျောင်းကဖွင့်တယ်။ ကလေးတွေမရောက်တဲ့အချိန်ကျတာ “ လို့ စလင်းမြို့ခံတဦးက မြေလတ်အသံကို ပြောပါတယ်။

ဒရုန်းဗုံးတွေကျရောက်ပေါက်ကွဲတာကြောင့် လူနေအိမ် ၁ လုံး၊ စာသင်ဆောင်တချို့အုတ်နံရံနဲ့ အမိုးတွေထိခိုက်ပျက်စီးမှုရှိခဲ့တယ်လို့ မြို့ခံတွေထံကသိရပါတယ်။

စစ်ကော်မရှင်ကို ထောက်ခံရေးသားနေတဲ့ တယ်လီဂရမ်ချန်နယ်တွေမှာ စလင်းမြို့ပေါ်လူနေရပ်ကွက်တွေအတွင်း PDF တွေက ရှော့တိုက်ဒုံးနဲ့ပစ်ခတ်လို့ နေအိမ်တွေထိခိုက်ပျက်စီးခဲ့တယ်လို့ စွပ်စွဲဖော်ပြထားပါတယ်။

ဒီကနေ့မနက်ပိုင်း စာသင်ကျောင်းအတွင်း ဒရုန်းဗုံးသီးတွေကျရောက်ပေါက်ကွဲပြီးနောက် ကျောင်းကို ယာယီပိတ်ထားရတယ်လို့ သိရပါတယ်။

စစ်ကော်မရှင်တပ်ဖွဲ့က စလင်းမြို့မရဲစခန်း၊ မြို့တောင်ဘက်ရှိဘောလုံးကွင်းအနီး၊ ကံပြားရွာအထွက် စလင်း-စေတုတ္တရာလမ်းပိုင်း ကန်လယ်အနီး၊ ဆင်ဖြူကျွန်းမြို့ဘက်အထွက် စက်သုံးဆီဆိုင်တွေအနီးမှာ တပ်စွဲထားပြီး ၂၀၂၄ ဩဂုတ်လအတွင်းမှာ စလင်းမြို့မရဲစခန်းဒရုန်းဗုံးချတိုက်ခိုက်ခံရလို့ ရဲစခန်းမှူးအပါ ရဲ ၅ ဦးဒဏ်ရာရခဲ့တယ်လို့ သိရပါတယ်။

စာတည်း – ဟိန်းစံ