မြေလတ်အသံ၊ စက်တင်ဘာ ၂၃၊ ၂၀၂၅။

ပဲခူးတိုင်း၊ နတ်တလင်းမြို့နယ်မှာ စစ်မှုထမ်းဖို့ ဖမ်းဆီးခံထားရသူလူငယ်က အစောင့်ရဲတပ်ဖွဲ့ဝင်တဦးကိုသတ်ပြီး လက်နက်ခဲယမ်းတွေယူဆောင်ထွက်ပြေးလာတယ်လို့ သာယာဝတီခရိုင် အမှတ် ၁ တပ်ရင်း ၃၈၀၁ ဆီက သိရပါတယ်။

ထွက်ပြေးလွတ်မြောက်လာသူဟာ တောင်ညိုကွက်သစ်ရဲစခန်းမှာ စစ်မှုထမ်းအဖြစ်ပို့ဆောင်ဖို့ဖမ်းဆီးခံထားရသူ အသက် ၁၈ နှစ်အရွယ် စိုင်းမြတ်ကို ဖြစ်ပြီး စက်တင်ဘာ ၂၁ ရက် ညပိုင်းမှာ အစောင့်ရဲတပ်သားကို ဓားနဲ့ထိုးသတ်ပြီး လက်နက်ခဲယမ်းတွေယူဆောင်ထွက်ပြေးလာပြီးနောက် PDF တွေဆီ ရောက်ရှိလာတာလို့ ဆိုပါတယ်။

” သူကလည်း စစ်မှုထမ်းအဖြစ် ဆွဲခံရတာ ၁၀ ရက်လောက်ပဲ ရှိသေးတယ်။ သူက သူတို့(ရဲတပ်ဖွဲ့) ယုံကြည်မှုကို ရအောင်ယူတယ်။ သူ့ကို တောင်ညိုရဲစခန်းမှာ လွတ်လပ်စွာထားတယ်၊ သူနဲ့အတူရှိနေတဲ့ ရဲတဦးကို အဲ့ဒီရဲရဲ့ဓါးနဲ့လည်ပင်းကို ထိုးဖောက်ပြီး လက်နက်ခဲယမ်းတွေကို တိတ်ဆိတ်စွာယူဆောင်နိုင်ခဲ့တယ်။ တိတ်ဆိတ်စွာယူဆောင်နိုင်ခဲ့တာလည်း သူတို့တန်းစီနေတဲ့အချိန် ဖြစ်ပါတယ်။ သူ့မှာထွက်ပေါက်ရာ လမ်းတခုရသွားတာပေါ့။ ဘန်ကာကင်းထဲမှာ သူနဲ့အတူရှိနေတဲ့ ရဲ** ၁ ကောင်ကို သူသုတ်သင်ရှင်းခဲ့ပြီးတော့ သူထွက်ပြေးတိမ်းရှောင်လာခဲ့တာ” လို့ သာယာဝတီခရိုင်အမှတ် ၁ တပ်ရင်း ၃၈၀၁ တပ်ရင်းမှူး ဗိုလ်မိုးကြိုး က မြေလတ်အသံကို ပြောပါတယ်။

စိုင်းမြတ်ကိုဟာ ပြီးခဲ့တဲ့ စက်တင်ဘာဒုတိယပတ်အတွင်းက တောင်ညိုကွက်သစ်ဈေးတန်းမှာ စစ်ကော်မရှင်တပ်နဲ့ ရဲတပ်ဖွဲ့ဝင်တွေရဲ့ လူ၊ ဆိုင်ကယ်တွေကို စစ်ဆေးဖမ်းဆီးချိန် စစ်မှုထမ်းဖို့ ဖမ်းဆီးခံခဲ့ရတာဖြစ်ပြီး စစ်သင်တန်းပို့ဆောင်ဖို့ တောင်ညိုရဲစခန်းထဲ ထိန်းသိမ်းထားစဥ် အခုလိုထွက်ပြေးလွတ်မြောက်လာခဲ့တာလို့ သိရပါတယ်။

ကိုစိုင်းမြတ်ကိုနဲ့ အတူ သေဆုံးရဲတပ်သားရဲ့ G-3 သေနက် ၁ လက်၊ ၇.၆၂ မမ ကျည် ၁၀ တောင့်၊ ကျည်ဘောက် ၁ ခု ယူဆောင်လာနိုင်လို့ ၎င်းကို သိန်း ၂၀ ဆုချီးမြှင့်ထားတယ်လို့ တပ်ရင်းမှူးက ပြောပါတယ်။

စာတည်း – ဟိန်းစံ

မြေလတ်အသံ၊ စက်တင်ဘာ ၂၃၊ ၂၀၂၅။

ပဲခူးတိုင်းအနောက်ခြမ်း၊ နတ်တလင်းမြို့နယ်၊ ချောင်းကမ်းကြီးကျေးရွာက ပျူစောထီးသင်တန်းဆင်း ကြံ့ခိုင်ရေးပါတီဝင်တဦး နေအိမ်မှာ ပစ်သတ်ခံရတယ်လို့ Bamar Revolution Army-B.R.A ထံကသိရပါတယ်။

အသတ်ခံရသူဟာ ချောင်းကမ်းကြီးရွာနေ အသက် ၄၅ နှစ်အရွယ် မြင့်ဇော်ဆိုသူဖြစ်ပြီး စက်တင်ဘာ ၂၂ ရက် ညနေ ၆ နာရီ မိနစ် ၃၀ ကျော်မှာ ကျေးရွာရှိသူ့ရဲ့နေအိမ်အတွင်း ဝင်ရောက်ပစ်ခတ်ခဲ့တာလို့ Bamar Revolution Army-B.R.A တပ်ခွဲမှူး ကိုလကျာ်က မြေလတ်အသံကို ပြောပါတယ်။

ထွက်ပြေးဖို့ကြိုးစားတာကြောင့် သေနတ်နဲ့ ၅ ချက်ပစ်ခတ်ခဲ့ပြီး ကိုမြင့်ဇော်မှာ ဝမ်းဗိုက်အပါအဝင် ခန္ဓာကိုယ်မှာ ကျည်ထိဒဏ်ရာတွေနဲ့နေရာမှာပဲ သေဆုံးသွားတယ်လို့ သိရပါတယ်။

ကိုမြင့်ဇော်ဟာ ချောင်းကမ်းကြီးကျေးရွာ ကြံ့ခိုင်ရေးပါတီရပ်ကျေးအဖွဲ့ဝင်တဦးဖြစ်သလို အင်းမအခြေစိုက်တပ်မ ၆၆ မှာ ဖွင့်လှစ်တဲ့ ပျူစောထီးသင်တန်းကို တက်ရောက်ထားသူဖြစ်ပြီး ဒေသတွင်း စစ်ကော်မရှင်တပ်ဖွဲ့တွေစစ်ကြောင်းထိုးချိန်တိုင်း လမ်းပြအဖြစ် လိုက်ပါဆောင်ရွက်လေ့ရှိတာကြောင့် ပစ်ခတ်ရှင်းလင်းခဲ့တာလို့ ဆိုပါတယ်။

ပစ်ခတ်မှုဖြစ်ပြီးနောက်ပိုင်း စက်တင်ဘာ ၂၃ ရက် ဒီကနေ့မနက်ပိုင်းထိ စစ်ကော်မရှင်တပ်သားတွေ ကျေးရွာကိုလာရောက်စစ်ဆေးတာမျိုးမတွေ့ရသေးဘူးလို့ သိရပါတယ်။

စက်တင်ဘာ ၁၉ ရက် ညပိုင်းမှာ နတ်တလင်းမြို့နယ်၊ စံကြီးလောင်ကျေးရွာနေ စစ်ကောင်စီလက်အောက်ရာအိမ်မှူး သေနတ်ပစ်ခံရလို့ သေဆုံးခဲ့သေးပြီး ၃ ရက်အကြာမှာ နောက်ထပ် ပျူစောထီးသင်တန်းတက်ရောက်ထားသူတဦး ထပ်မံ အသတ်ခံခဲ့ရတာလည်း ဖြစ်ပါတယ်။

စာတည်း – ဟိန်းစံ

ကဝ၊ စက်တင်ဘာ ၂၂၊ ၂၀၂၅။

ပဲခူးတိုင်းအခြေစိုက် ကဝမြို့နယ်ပြည်သူ့ကာကွယ်ရေးအဖွဲ့မှ တပ်စိတ်မှူး ၂ ဦးအပါအဝင် ၃ ဦး တပ်ရင်းကနေ ထွက်ပြေးသွားတယ်လို့ စက်တင်ဘာ ၂၁ ရက်မှာ အဲ့အဖွဲ့ကသတင်းထုတ်ပြန်လာပါတယ်။

ထွက်ပြေးသူတွေဟာ ဒုတပ်စိတ်မှူး သန့်ဇင်ဦးနဲ့ ချစ်မင်းကို၊ တပ်ဖွဲ့ဝင် ပြည်ဖြိုးအောင်တို့ ၃ ဦးဖြစ်ပြီး သူတို့ ၃ ဦးဟာ အခုနှစ် ဧပြီ ၁ ရက်၊ ဇွန် ၂၃ ရက်နဲ့ ဩဂုတ် ၁၀ ရက်တို့မှာ တဦးချင်းထွက်ပြေးသွားတာလို့ ဆိုပါတယ်။

“ပုဂ္ဂလိက အကြောင်းပြချက်အမျိုးမျိုးပါပဲ၊ မိန်းမနဲ့ သွားတွေ့ဖို့၊ ရည်းစားနဲ့ လက်ထပ်ဖို့၊ အလုပ်လုပ်ဖို့ ဆိုပြီး ထွက်သွားကြတာ။ တပ်တာဝန်ရှိသူတွေကိုအကြောင်းကြားပြီး ထွက်သွားတာမျိုးမဟုတ်ဘူး။ မြို့နယ်ပကဖတွေက ရဲဘော်တွေကို ထုတ်ပယ်တာ၊”လို့ ကဝမြို့နယ်ပကဖ သတင်းနဲ့ပြန်ကြားရေး တာဝန်ရှိသူတဦးက ပြောပါတယ်။

ထွက်ပြေးသွားသူ ၃ ဦးဟာ ၂၀၂၃ နှစ်ကုန်ပိုင်းလောက်မှာ တပ်ဖွဲ့ကိုရောက်ရှိလာတာဖြစ်ပြီး တပ်ဖွဲ့မှာ နေထိုင်ချိန် ပြစ်မှုကျူးလွန်တာ၊ စည်းကမ်းချိုးဖောက်တာမျိုးတွေလည်းမရှိဘဲ အခုလို ထွက်ပြေးတာဟာလည်း ၎င်းတို့ရဲ့ ပုဂ္ဂလိက လိုအင်ဆန္ဒတွေကြောင့် ဖြစ်နိုင်တယ်လို့ သူကဆက်ပြောပါတယ်။

တပ်ကနေထွက်ပြေးချိန်မှာလည်း တပ်ဖွဲ့ပိုင်ငွေကြေး၊ လက်နက်တွေ ယူဆောင်သွားတာ၊ စစ်ကော်မရှင်ဘက်ကို ဘက်ပြောင်းခိုလှုံသွားတာမျိုးတွေမရှိဘူးလို့ သိရကြောင်း သူကဆိုပါတယ်။

ကဝမြို့နယ်ပြည်သူ့ကာကွယ်ရေးအဖွဲ့ စတင်တည်ထောင်ခဲ့တဲ့ ၂၀၂၂ ခုနှစ်ကနေ ယနေ့အချိန်ထိ တပ်ဖွဲ့ကနေ ထွက်ပြေးသွားသူဟာ အထက်ပါ ၃ ဦးသာရှိသေးတယ်လို့ သိရပါတယ်။

စာတည်း- လင်း

မြေလတ်အသံ၊ စက်တင်ဘာ ၂၀၊ ၂၀၂၅။

ပဲခူးတိုင်း၊ တောင်ငူမြို့၊ သဖန်းပင်ကျေးရွာအုပ်စု၊ အလယ်ကျွန်းရွာမှာ ဒေသခံအမျိုးသား ၅ ဦး ပေါ်တာဆွဲဖမ်းဆီးခံရပြီး ၁ ဦးက ငွေပေးပြန်လွတ်လာကာ ၄ ဦးကတော့ စစ်မှုထမ်းအတွက် ပို့ဆောင်ခံခဲ့ရတယ်လို့ ဒေသခံတွေဆီက သိရပါတယ်။

ဖမ်းဆီးခံခဲ့ရသူတွေဟာ အသက် ၂၅ နှစ်ကနေ ၃၅ နှစ်ကြားဖြစ်ပြီး စက်တင်ဘာလ ပထမပတ်အတွင်း ညနေဘက်အလုပ်ပြန်လာချိန်တွေမှာ အလယ်ကျွန်းရွာ ပျူစောထီး ကိုမျိုးနဲ့ စစ်ကော်မရှင်တပ်က ရွာထဲမှာပဲ မသင်္ကာလို့ဆိုကာဖမ်းဆီးသွားခဲ့တာလို့ ဆိုပါတယ်။

“သူ(ပျူစောထီး ကိုမျိုး)က အလယ်ကျွန်းကျေးရွာ ပျူစောထီးပေါ့နော်၊ သူက ရွာထဲကလူတွေကို ဖမ်းတယ်၊ ချက်ချင်း သိန်း ၅၀ နဲ့ အကြပ်ကိုင်ပြီးရွေးခိုင်းတယ်၊ မရွေးနိုင်ရင်တော့ တောင်ငူ တောင်ပိုင်းတိုင်းစစ်ဌာနချုပ်ကို ပို့လိုက်တယ်။ ပို့လိုက်ပြီးရင်တော့ အဲ့ဒါပြီးရင် စစ်သင်တန်းကျောင်းတွေ ရောက်ကုန်ရော။” လို့ ဖြစ်စဥ်ကိုသိရှိတဲ့ အမျိုးသားတဦးက မြေလတ်အသံကို ပြောပါတယ်။

ဖမ်းဆီးခံရသူ ၅ ဦးထဲက ၁ ဦးမှာ ကျပ်သိန်း ၅၀ ပေးပြီးရွေးခဲ့တာကြောင့် ဖမ်းဆီးခံခဲ့ရတဲ့ စက်တင်ဘာ ၄ ရက်မှာပဲ ညတွင်းချင်းပြန်လည်လွတ်မြောက်လာကာ ကျန်ဒေသခံ ၄ ဦးကတော့ လက်လုပ်လက်စား လူတန်းစားတွေဖြစ်ပြီး ပိုက်ဆံပေးမရွေးနိုင်လို့ တောင်ပိုင်းတိုင်းစစ်ဌာနချုပ်ကို ပို့ဆောင်ခံလိုက်ရတယ်ဆို့ ဆိုပါတယ်။

ဖမ်းဆီးရာမှာ ဦးဆောင်ပါဝင်တဲ့ ပျူစောထီး ကိုမျိုးနဲ့ပတ်သက်ပြီး “အလယ်ကျွန်းကျေးရွာမှာ ပျူစောထီးအင်အားက အဲ့လောက်တော့မရှိဘူး။ လက်ရှိ သူ့ကိုက ပျူစောထီးခေါင်းဆောင်ပုံစံမျိုးပေါ့ အဲ့လို မြှောက်စားထားတာတော့ စစ်တပ်ကပေါ့။ သူက ကျေးရွာအုပ်ချုပ်ရေးပိုင်းမှာလည်း မပါဘူး၊ ပြောရရင် အနေအစားချောင်လို့ပေါ့ဗျာ။ လူငယ်တွေကို သူလုပ်လို့ရတဲ့သူတွေကို လုပ်တယ်” လို့ အထက်ပါအမျိုးသားက ပြောပါတယ်။

ဒါ့အပြင် အလယ်ကျွန်းရွာ အုပ်ချုပ်ရေးမှူး စန်းဦး ဦးဆောင်ကာ ဆယ်အိမ်မှူး၊ ရာအိမ်မှူးတွေက စစ်မှုထမ်းကြေးဟုဆိုကာ လစဉ် ၂၀,၀၀၀ ကျပ် ကောက်ခံနေတာရှိပြီး အခုလို ပေါ်တာဆွဲဖမ်းဆီးခံရချိန်မှာတော့ ဘာမှမလုပ်ပေးဘူးလို့ သူက ဆက်ပြောပါတယ်။

အလယ်ကျွန်းကျေးရွာဟာ အိမ်ခြေ ၃၀၀ ခန့်နဲ့ လူဦးရေ ၈၀၀ ခန့် ရှိပြီး အများစုမှာ အခြေခံအလုပ်သမားတွေ၊ လက်သမားတွေနဲ့ တောင်ငူမြို့ပေါ်တက်ကာ အလုပ်လုပ်ကြရသူတွေဖြစ်ပြီး အမျိုးသမီးတချို့ကတော့ ဆေးလိပ်လိပ်တဲ့အလုပ်လုပ်ကြသူတွေဖြစ်တယ်လို့ ဆိုပါတယ်။

လက်ရှိမှာတော့ စစ်မှုထမ်းအတွက် ဖမ်းဆီးနေကြတာကြောင့် ဒေသခံတွေအနေနဲ့ ညဘက်တွေမှာ အပြင်မထွက်ရဲကြတော့ဘူးလို့ သိရပါတယ်။

နတ်တလင်း၊ စက်တင်ဘာ ၂၀၊ ၂၀၂၅။

ပဲခူးတိုင်း၊ နတ်တလင်းမြို့နယ်၊ စံကြီးလောင့်ကျေးရွာက ရာအိမ်မှူး ၁ ဦးနေအိမ်မှာပစ်ခတ်ခံရပြီး သေဆုံးခဲ့တယ်လို့ Bamar Revolution Army – B.R.A ဆီကသိရပါတယ်။

ပစ်သတ်ခံရသူဟာ စံကြီးလောင့်ကျေးရွာ ရာအိမ်မှူး အသက် ၄၀ အရွယ် ဇော်မင်းနိုင်ဆိုသူဖြစ်ပြီး စက်တင်ဘာ ၁၉ ရက် ည ၉ နာရီခန့်က သူ့နေအိမ်မှာရှိနေချိန်ပစ်ခတ်ခဲ့တာလို့ဆိုပါတယ်။

“ရွာလယ်ပိုင်းက သူ့အမေကြီးနေအိမ်မှာရှင်းခဲ့တာ။ ထွက်ပြေးဖို့လုပ်လို့ သေနတ်အရှည်နဲ့ ၇ ချက် ပစ်ခတ်ခဲ့တယ်။ သူ့အမေကြီးအိမ်မှာဆိုတော့ ဘာမှသိမ်းဆည်းရမိတာမရှိဘူး။ သူတို့အိမ်သားတွေ ရှိပေမယ့် ထိခိုက်မှုမရှိအောင်ဂရုစိုက်လုပ်ခဲ့ပါတယ်”လို့ Bamar Revolution Army- B.R.A တပ်ခွဲမှူး လကျာ်ကပြောပါတယ်။

သေနတ်နဲ့အနီးကပ်ပစ်ခံရလို့ ရာအိမ်မှူး ဇော်မင်းနိုင်မှာ ဦးခေါင်း၊ ရင်ဘတ်မှာ ကျည်ထိဒဏ်ရာရပြီး ပစ်ခတ်ခံရတဲ့နေရာမှာတင်သေဆုံးခဲ့တယ်လို့ ဆိုပါတယ်။

ဇော်မင်းနိုင်ဟာ စစ်ကော်မရှင်တပ်သားတွေဆီ ဆက်ကြေးပေးပြီး ကျေးရွာမှာ လောင်းကစားဝိုင်းတွေပြုလုပ်တာ၊ စစ်မှုထမ်းကြေးကောက်ပေးတာ၊ စစ်ကော်မရှင်တပ်သားတွေ ကင်းထွက်ချိန်တွေမှာ လမ်းပြအဖြစ်လိုက်ပါလုပ်ဆောင်တာတွေရှိတာကြောင့် ခုလိုပစ်ခတ်ခဲ့တာလို့ ဆိုပါတယ်။

ရာအိမ်မှူးကိုပစ်ခတ်ပြီးနောက် BRA အဖွဲ့ဝင်တွေပြန်ဆုတ်လာချိန် စံကြီးလောင့်ရွာရဲ့ တမိုင်ခန့်အကွာရှိ ဒမငယ်ရဲစခန်းဘက်ကနေ လက်နက်ငယ်ပစ်သံတွေကြားရပြီး ဒီပစ်ခတ်မှုဟာ တော်လှန်ရေးတပ်တွေကို ခြိမ်းခြောက်ပစ်ခတ်တာဖြစ်နိုင်တယ်လို့ တပ်ခွဲမှူး လကျာ်ကခန့်မှန်းပါတယ်။

စက်တင်ဘာ ၁၇ ရက်ကလည်း နတ်တလင်းမြို့နယ်၊ ရှားစီးဘိုးရွာအောက်စုနေ ရာအိမ်မှူး ဦးဖိုးကျော်ဆိုသူလည်း သူရဲ့နေအိမ်အနီးမှာ ပစ်သတ်ခံရပြီးသေဆုံးခဲ့သေးတယ်လို့ သိရပါတယ်။

စာတည်း – လင်း