အင်းတော်၊ ဖေဖော်ဝါရီ ၉၊ ၂၀၂၃။

စစ်ကိုင်းတိုင်း၊ အင်းတော်မြို့နယ်ကို စစ်အုပ်ချုပ်ရေး ကြေညာအပြီး ၆ ရက်မြောက်နေ့မှာ အလယ်ဆိပ်ရွာသားတဦး ည ၁၀ နာရီကျော်မှာ အိမ်ပြန်မိလို့ သေနတ်နဲ့ ပစ်ခံရပြီး သေဆုံးသွားခဲ့ပါတယ်။

အသက် ၄၅ နှစ်အရွယ် ဦးစိုးနိုင်ဟာ ဖေဖော်ဝါရီ ၈ ရက် မနေ့ည ၁၀ နာရီလောက်မှာ မဲဇာရွာကနေ အလယ်ဆိပ်ရွာကိုပြန်လာချိန် မဲဇာရဲစခန်းရှေ့အရောက်မှာ ရဲကသေနတ်ပစ်လို့ သေဆုံးခဲ့တာ ဖြစ်တယ်လို့ အင်းတော်ဒေသခံတဦးက ပြောပါတယ်။

“ကျနော် သတိပေးထားတာတော့ ကြာပြီ။ စစ်ကောင်စီက မကြေညာခင် ကျနော် အတွင်းသတင်းရလို့အရင် သတိပေးထားတယ်။ မနေ့ကလည်း သတိပေးထားတယ်။ အဲ့လူက နဲနဲစိတ်ဖောက်နေတယ်လို့လည်း ကြားတယ်” လို့ ဆိုပါတယ်။

ဖေဖော်ဝါရီလ ၉ ရက် ဒီနေ့မနက်မှာ ရဲစခန်းက အလောင်းလာယူဖို့ နီးစပ်ရာရွာသားတွေတဆင့် ဆက်သွယ်အကြောင်းကြားလာခဲ့တ​ယ်လို့ ဆိုပါတယ်။

“ရုပ်လောင်းကတော့ မိသားစုတွေ လာယူသွားပါပြီ။ အလယ်ဆိပ်ရွာမှာပဲ မီးသင်္ဂြိုလ်လိုက်ပါပြီ။ စခတွေဘက်ကတော့ ဘာတာဝန်ယူမှုမှ မပေးပါဘူး” လို့ အင်းတော်ဒေသခံက ဆက်ပြောပါတယ်။

စစ်တပ်အာဏာမသိမ်းခင်ကလည်း အင်းတော်ရဲစခန်းရှေ့မှာ ပြည်သူတဦး သေနတ်နဲ့ ပစ်ခံရလို့ သေဆုံးခဲ့ပါသေးတယ်။

စစ်ကိုင်း၊ ဖေဖော်ဝါရီ ၅၊ ၂၀၂၃။

စစ်ကိုင်းတိုင်း၊ ဆားတောင်မြို့နယ်၊ ဆားတောင်မြို့ပေါ်(တနေရာမှာ) လောင်းကစားဝိုင်းဖွင့်ထားတဲ့ ၂ပွင့်ဗိုလ်တဦး နဲ့ နောက်လိုက် ၅ ဦး သေနတ်နဲ့ပစ်ခံရလို့ သေဆုံးခဲ့ပါတယ်။

ဖေဖော်ဝါရီလ ၅ ရက် ဒီနေ့ နေ့လယ် ၁၂ နာရီလောက်မှာ မြေအောက်လျှပ်စီးပြောက်ကျား တပ်ဖွဲ့က ပြည်သူတွေတိုင်ကြားချက်ကြောင့် လောင်းကစားဝိုင်းရှိရာနေရာကို သွားရောက်ပစ်ခတ်ခဲ့တာလို့ ဗိုလ်မုန်တိုင်း က မြေလတ်အသံကို ပြောပါတယ်။

“၂ပွင့်ဗိုလ်လို့ ဘာကြောင့်သိရလဲဆိုတော့ ၆လုံးပြူးလည်းကိုင်တယ်။ နောက်ပြီး ကျနော်တို့ကိုသတင်းပေးပို့တဲ့ ပြည်သူက အတိအကျကိုပြောတာပါ။ အဲဒီထဲမှာ ဦးစိန်ထွန်းနဲ့ ဒေါ်သိန်းကြည်က ဒလန်လင်မယားတွေပါ။ သူတို့တွေက ပြည်သူတွေကိုစစ်ကောင်စီနဲ့ ခြိမ်းခြောက်ထားပြီး လောင်းကစားဝိုင်းဖွင့်ထားပါ” လို့ ဆိုပါတယ်။

ကားပေါ်မှာထိုင်နေတဲ့ ဗိုလ်မျိုးထွန်းသိန်း၊ ဦးစိန်ထွန်း၊ ဒေါ်သိန်းကြည်နဲ့အတူ လောင်း ကစားဝိုင်းမှာ လုံခြုံရေးယူပေးနေတဲ့ရဲတပ််ဖွဲ့ဝင် ၄ ဦး စုစုပေါင်း ၆ ဦးပစ်ခံရပြီး သေဆုံးခဲ့တယ်လို့ ဆိုပါတယ်။

“ပြည်သူတွေတိုင်ထားတာကတော့ကြာပြီ၊ အရင်ရက်တွေမှာဆို သူတို့က (စစ်ကောင်စီ) လက်နက်တွေကိုယ်စီနဲ့လာကြတော့ ကျနော်တို့က သွားပစ်လို့မရဘူး၊ လက်နက်အင်အားကမမျှလို့၊ ဒီနေ့တော့ သူတို့တပ်ဖွဲ့ထဲမှာ ဗိုလ်တယောက်ပဲ ခြောက်လုံးပြူးပါတယ်ဆိုလို့ ကျနော်တို့က သွားရောက်ပစ်ခတ်ခဲ့တာပါ” လို့ ပြောပါတယ်။

လောင်းကစားဝိုင်းထဲမှ ငွေကျပ် ၃၄၂၀၀၀ ကိုသိမ်းဆည်းရမိသွားပြီး သိမ်းဆည်းထားတဲ့ ငွေကြေးတွေကိုလည်း တော်လှန်ရေးအတွက် အသုံးပြုသွားမှာဖြစ်ကြောင်း နဲ့ ၂ ပွင့်ဗိုလ် မျိုးထွန်းသိန်း ကနေ ၆လုံးပြူး အတိုတလက်ကို သိမ်းဆည်းရမိခဲ့တယ်လို့ ပြောပါတယ်။

မန္တလေး၊ ဖေဖော်ဝါရီ ၅၊ ၂၀၂၃။

မန္တလေးတိုင်း၊ ပြည်ကြီးတံခွန်မြို့နယ်၊ သင်ပန်းကုန်းရပ်ကွက်အုပ်ချုပ်ရေးမှူး သေနတ်နဲ့ပစ်ခံရပြီး သေဆုံးသွားတယ်လို့ သိရပါတယ်။

ဖေဖော်ဝါရီလ ၄ ရက်မနေ့ကမနက် ၁၁ နာရီဝန်းကျင်မှာ သင်ပန်းကုန်းရပ်ကွက်၊ ၁၂၁×၁၂၂ လမ်းကြား၊ ၅၁ (ဘီ)လမ်းရှိ အုပ်ချုပ်ရေးမှူး ဦးသာဌေး ၆၉ နှစ်ဟာ နေအိမ်မှာရှိနေချိန် သေနတ်သမားတွေက ဝင်ရောက်ပစ်ခတ်သွားတာလို့ ဒေသခံတဦးက ပြောပါတယ်။

“သူက အရင်ကရာအိမ်မှူးပါ။ သူရပ်ကွက် အုပ်ချုပ်ရေးမှူးနေရာမှာ သူကအုပ်ကြီးဖြစ်တာ မကြာသေးဘူး။ အဲ့ဒါကို အိမ်မှာရှိနေတဲ့အချိန် ပစ်သတ်သွားတာ။ သူကအသက်လည်း တော်တော်ကြီးနေပြီ။ အရင်ကတည်းက ရာအိမ်မှူးလုပ်ခဲ့တာဆိုတော့ ဟိုနေရာဒီနေရာပါတာတော့ရှိတယ်”လို့ ပြောပါတယ်။

သေနတ်နဲ့ပစ်ခံရလို့ အုပ်ချုပ်ရေးမှူး ဦးသာဌေးဟာ ဦးခေါင်း၊ ရင်ဘတ်တွေမှာ ကျည်ဖောက်ဝင်ဒဏ်ရာ ၃ ချက်ရရှိပြီး နေရာမှာဘဲ သေဆုံးသွားတယ်လို့ ဆိုပါတယ်။

ဦးသာဌေးဟာ ကျူးကျော်များရှင်းလင်းရေးဟုဆိုကာ အများပြည်သူပိုင်နေအိမ်တွေကိုဖျက်ဆီးဖို့ စာရင်းကောက်ရာမှာ ဦးဆောင်သူ၊ ဧည့်စာရင်းလက်ခံသူ၊ မဲစာရင်း၊ လူဦးရေစာရင်း၊ အိမ်ထောင်စုစာရင်းကောက်ရာမှာ ဦးဆောင်ပါဝင်နေသူဖြစ်လို့ သေနတ်နဲ့ ၇ ချက် ပစ်ခတ်ရှင်းလင်းခဲ့တယ်လို့ အောင်စည်တော်စစ်ဆင်ရေးအဖွဲ့က ထုတ်ပြန်ထားပါတယ်။

ဇန်နဝါရီလ ၃၁ ရက်ကလည်း မန္တလေးတိုင်း၊ ပုသိမ်ကြီးမြို့နယ်၊ နန္ဒာတောင်ကျေးရွာသားလမ်းမှာ ဒလန်လို့လူသိများတဲ့ အမျိုးသမီးငယ်ကို မင်္ဂလာဆောင်ကနေ ဆိုင်ကယ်နဲ့ပြန်လာချိန် ဒေသကာကွယ်ရေးတပ်ဖွဲ့တခုက ပစ်ခတ်ရှင်းလင်းခဲ့ပါသေးတယ်။

မန္တလေး၊ ဖေဖော်ဝါရီ ၁၊ ၂၀၂၃။

မန္တလေးတိုင်း၊ မတ္တရာမြို့နယ်၊ မြွေမြစ်ရိုးရွာကနေ ဇီးကုန်းကျေးရွာကိုကူးလာတဲ့ စစ်ကောင်စီစစ်ကြောင်းကို ဖေဖော်ဝါရီလ ၁ ရက်ဒီနေ့လယ်ပိုင်းမှာ စနိုက်ပါနဲ့ပစ်ခတ်တိုက်ခိုက်ခဲ့တယ်လို့ သိရပါတယ်။

အင်အား ၈၀ ဝန်းကျင်ပါတဲ့ အဆိုပါစစ်ကြောင်းကို ပျောက်ကြားစနစ်နဲ့တိုက်ခိုက်ခဲ့ရာ စစ်သား ၁ ဦးသေဆုံးခဲ့တယ်လို့ တောကြီးမြွေပွေးအဖွဲ့မှ ဗိုလ်တီကပြောပါတယ်။

“မြွေမြစ်ရိုးရွာကနေ ဇီးကုန်းရွာအကူး ရွာ ၂ ရွာကြားထဲမှာ စနိုက်ပါနဲ့ပစ်ခတ်ခဲ့တာ၊ အင်အားက ၈၀ လောက်ပါတယ်၊ စစ်ကြောင်းနဲ့ထိပ်တိုက်မရင်ဆိုင်ပဲ ပျောက်ကြားစနစ်နဲ့လိုက်ပစ်တာ၊ ၁ ယောက် ထိမှန်ပြီးသေတယ်” လို့ ပြောပါတယ်။

တိုက်ခိုက်ခံရပြီးနောက် အဲဒီစစ်ကြောင်းဟာ ဇီးကုန်းရွာထဲမှာပဲတပ်စွဲနေပြီး လက်ရှိမှာတော့ မတ္တရာနယ်ထဲမှာ စစ်ကောင်စီဘက်က စစ်ကြောင်း ၄ ကြောင်းနဲ့ဝင်ရောက် အင်အားဖြန့်နေတာလို့ ဆက်ပြောပါတယ်။

ပြီးခဲ့တဲ့ဇန်နဝါရီလ ၂၉ ရက်ကလည်း မတ္တရာမြို့အနောက်ခြမ်းကို နယ်မြေရှင်းလင်းရေးလာတဲ့ စစ်ကောင်စီစစ်ကြောင်းကို ကောက်ရိုးပုံကျေးရွာနဲ့ မြွေပုံကန်ကျေးရွာအကြားမှာ တောကြီးမြွေပွေးအဖွဲ့က မိုင်းဆွဲတိုက်ခိုက်ခဲ့ရာ စစ်သား ၅ ဦး သေဆုံးခဲ့ပါသေးတယ်။

မကွေး၊ ဒီဇင်ဘာ ၃၁၊ ၂၀၂၂။

မကွေးတိုင်း၊ ပေါက်မြို့နယ်၊ ကိုင်းလယ်ရဲစခန်းနဲ့ တပ်ကုန်းရွာသစ် လမ်းပိုင်းတနေရာမှာ ခြေလျင်နဲ့ကင်းလှည့်နေတဲ့ စစ်ကောင်စီတပ်သားတွေနဲ့ပျူစောထီးအဖွဲ့တွေ စနိုက်ပါနဲ့ပစ်ခံရပြီး ၂ ဦးသေဆုံးကာ ၁ ဦးဒဏ်ရာရသွားတယ်လို့ သိရပါတယ်။

အဲ့ဒီစစ်ကောင်စီအဖွဲ့ဟာ ဒီဇင်ဘာလ ၃၀ ရက်မနေ့ကမနက် ၁၀ နာရီဝန်းကျင်မှာ ကိုင်းလယ်ရဲစခန်းကနေ အင်အား ၁၀ ဦးခန့်နဲ့ ခြေလျင်ကင်းလှည့်လာချိန် စနိုက်ပါနဲ့ One Shot One Kill Mission အရတိုက်ခိုက်ခဲ့တယ်လို့ Pauk Revolution Front (PRF) မှ တာဝန်ရှိသူတဦးကပြောပါတယ်။

“သူတို့အဖွဲ့က ကိုင်းလယ်စခန်းကနေထွက်လာချိန် မီတာ ၂၀၀ လောက်ပဲ ရှိအုန်းမယ်။ ကျနော်တို့အဖွဲ့ကစောင့်ပြီး စနိုက်ပါနဲ့ပစ်ခဲ့တာ။ သူတို့တွေကဝတ်စုံအပြည့်နဲ့ဆိုတော့ ထိသေတဲ့သူတွေက ပျူလား စကစလား ခွဲရတော့ခက်တယ်။ ပစ်ခတ်လို့ သူတို့ဘက်က ထိခိုက်သေဆုံးတာရှိတာနဲ့ ပြန်ဆုတ်လာခဲ့တယ်”လို့ ပြောပါတယ်။

ပစ်ခတ်မှုကြောင့် စစ်ကောင်စီဘက်က ၂ ဦးနေရာမှာတင်သေဆုံးပြီး ၁ ဦးကတော့ ဝမ်းဗိုက်ထမှန်ဒဏ်ရာရခဲ့တာကို အတည်ပြုနိုင်ပြီး သေဆုံးဒဏ်ရာရသူတွေကိုတော့ စစ်ကောင်စီဘက်က အတော်ကြာမှာ ကားနဲ့ပြန်သယ်သွားတယ်လို့ သိရပါတယ်။

ဒီဇင်ဘာလ ၂၆ ရက်ကလည်း ပေါက်မြို့နယ်၊ တရော်ကိုင်းကျေးရွာနားမှာ စစ်ကောင်စီတပ်နဲ့ ဒေသခံပြည်သူ့ကာကွယ်ရေးတပ်တွေအကြား ပစ်ခတ်မှုဖြစ်ခဲ့ပြီး နှစ်ဖက်ထိခိုက်သေဆုံးတာတွေ ရှိခဲ့သေးတယ်လို့ သိရပါတယ်။

မန္တလေး၊ ဒီဇင်ဘာ ၂၅၊ ၂၀၂၂။

မန္တလေးတိုင်း၊ ဝမ်းတွင်းမြို့နယ်၊ ညောင်တိုကျေးရွာက အုပ်ချုပ်ရေးမှူး သားအဖ သေနတ်နဲ့ပစ်ခတ်ခံရပြီး သေဆုံးသွားတယ်လို့ သိရပါတယ်။

ဒီဇင်ဘာလ ၂၄ ရက်မနေ့ကည ၈ နာရီခန့်မှာ ညောင်တိုကျေးရွာနေ အသက် ၅၀ နှစ်ဝန်းကျင် အုပ်ချုပ်ရေးမှူးဦးပြေအေး နဲ့ သူ၏သား ၂၅ နှစ်ဝန်းကျင် ကိုစိုင်မြင့်အောင်ပြေ (ခ) ပုလုံးတို့ကို နေအိမ်မှာပဲ လက်နက်ကိုင်အဖွဲ့တခုကပစ်သတ်ခဲ့တာလို့ ဒေသခံတဦးက ပြောပါတယ်။

“သူတို့သားအဖပစ်သတ်ခံရတာက ဟုတ်တယ်။ အုပ်ချုပ်ရေးမှူးဆိုတော့ သူတို့ကရွာထဲမှာ လူတွင်ကျယ်လုပ်ချင်တာလည်း ရှိတာပေါ့။ ဒါကြောင့်လာပစ်သတ်သွားတာလားတော့မသိရဘူး”လို့ ပြောပါတယ်။

အုပ်ချုပ်ရေးမှူးသားအဖအသတ်ခံရတယ်လို့သတင်းရပြီး လာရောက်စစ်ဆေးတဲ့ စစ်ကောင်စီအင်အား ၂၀ ခန့်ပါတဲ့ကားလည်း ရိုးစုကျေးရွာနဲ့ ဖုန်းစိုးကျေးရွာကြားမှာ မိုင်းဆွဲခံခဲ့ရကာ ထိခိုက်သေဆုံးမှုကိုမသိရသေးဘူးလို့ ဆိုပါတယ်။

အုပ်ချုပ်ရေးမှူး ကိုပြည်အေးဆိုသူမှာ မြို့နယ်အတွင်း အကြီးစားပျူစောထီးခေါင်းဆောင်ဖြစ်ပြီး၊ ကျေးရွာနေပြည်သူများအပေါ် အမြဲတမ်းဗိုလ်ကျအနိုင်ကျင့်နေသူဖြစ်သလို သားဖြစ်သူဟာလည်း ပျူစောထီးအဖွဲ့ဝင်တဦးဖြစ်ပြီး ရွာတွေကို PDF တွေ မလာအောင်၊ PDFတွေကိုရှာဖွေပြီး စစ်ကောင်စီကိုသတင်းပေးနေလို့ ရှင်းလင်းခဲ့တာဖြစ်သလို အလောင်းကောက်ဖို့လာတဲ့ စစ်ကောင်စီကားကိုလည်းမိုင်းဆွဲခဲ့တာဖြစ်တယ်လို့ WTRF (wundwin township revolution force)က ထုတ်ပြန်ထားပါတယ်။

ဒါ့အပြင် ဒီဇင်ဘာလ ၁၀ ရက်မှာလည်း သဲတောလေးကျေးရွာ အုပ်ချုပ်ရေးမှူးမောင်ရှိန်ကို WTRF အဖွဲ့က သုတ်သင်ရှင်းလင်းခဲ့ပါသေးတယ်။

ပဲခူး၊ ဇန်နဝါရီ ၂၉၊၂၀၂၂။

ပဲခူးတိုင်းအနောက်ခြမ်း ၊ သာယာဝတီခရိုင်၊ အုတ်ဖိုမြို့နယ် စည်ပင်သာယာရုံးကို ဇန်နဝါရီ ၂၈ရက် ည ၈နာရီခွဲဝန်းကျင်မှာ Black Eagle UG အဖွဲ့က လက်ပစ်ဗုံးနဲ့ ပစ်ဖောက်ခဲ့တယ်လို့ သိရပါတယ်။

အသံတိတ်သပိတ်မှာ မပါဖို့နဲ့ ဆိုင်တွေဖွင့်ဖို့ စစ်ကောင်စီအလိုကျ လိုက်အော်နေတာကြောင့် အခုလို ပစ်ဖောက်ခဲ့တာလို့ BEUGT အဖွဲ့က ပြောပါတယ်။

“စည်ပင်ဝန်ထမ်းတွေက silent strike နေ့မှာ စျေးဆိုင်တွေဖွင့်ဖို့ VPN တွေမသုံးဖို့နဲ့ PDF တွေနဲ့မပတ်သက်ဖို့ လိုက်အော်နေလို့ပါ” လို့ ‌Black Eagle UG Team က တာဝန်ခံက ပြောပါတယ်။

အဲ့ဒီဖောက်ခွဲမှုကြောင့် ရုံးထိခိုက်မှုရှိခဲ့ပြီး ဒီနေ့မနက်မှာတော့ စည်ပင်ရုံးရှေ့မှာ စစ်ကောင်စီက လုံခြုံရေးချထားပြီး မြို့နယ်အုပ်ချုပ်ရေးမှူး ရုံးရှေ့ကနေစပြီး စည်ပင်ရံးကျော်တဲ့ အထိ ဆိုင်ကယ်တွေကို တွန်းပြီးလမ်းလျှောက်သွားခိုင်းနေတယ်လို့ သိရပါတယ်။