မြိုင်၊ စက်တင်ဘာ ၂၅၊ ၂၀၂၅။

မကွေးတိုင်း၊ မြိုင်မြို့နယ်တောင်ပိုင်း၊ သရက်ကန်ရွာကနေ ကင်းပတ်ဖို့ထွက်လာတဲ့ ပျူစောထီးတွေကို ပစ်ခတ်တိုက်ခိုက်ရာ ၁ ဦးသေဆုံးခဲ့တယ်လို့ TYK ပြောက်ကျားတပ်ဖွဲ့ဆီက သိရပါတယ်။

စက်တင်ဘာ ၂၄ ရက် မနက် ၆ နာရီက သရက်ကန်ရွာကနေ ကင်းပတ်ဖို့ ဘန်ကာထဲကထွက်လာတဲ့ ပျူစောထီးတွေကို ရွာအနီးအရောက် သူတို့နဲ့ မီတာ ၁၀၀ နဲ့ ၁၅၀ အကွာအဝေးက ပစ်ခတ်ခဲ့တာလို့ ဆိုပါတယ်။

“ပျူစောထီးတွေ ကင်းပတ်မယ်ဆိုပြီး ဘန်ကာထဲကထွက်လာတဲ့အချိန်မှာ ကျနော်တို့ဘက်က ရိုင်ဖယ်နဲ့ စပြီး ပစ်ခတ်ခဲ့တာ၊ ပြီးကျတော့ လက်နက်ငယ်တွေနဲ့လည်း ဝိုင်းဝန်းပစ်ခတ်ခဲ့တယ်၊ ပျူစောထီး ၁ ဦး လဲပြီးတော့ ပွဲချင်းပြီးသေတယ်၊” လို့ TYK ပြောက်ကျားတပ်ဖွဲ့ဝင် စောကြီးက ပြောပါတယ်။

သေဆုံးသူဟာ သရက်ကန်ရွာက ပျူစောထီး ကင်းမှူး မျိုးနိုင်အေး ဖြစ်ပြီး ပျူစောထီးတွေဘက်ကလည်း ပြန်လည်ပစ်ခတ်ခဲ့ကြတယ်လို့ ဆိုပါတယ်။

သရက်ကန်ကျေးရွာမှာ ပျူစောထီးအင်အား ၁၀၀ ဝန်းကျင်ရှိပြီး လက်ရှိမှာ ရိက္ခာပြတ်လပ်မှုတွေနဲ့ ကြုံနေရတယ်လို့လည်းသိရကြောင်း တပ်ဖွဲ့ဝင်စောကြီးကပြောပါတယ်။

“ပစ်ခတ်ပြီးနေချိန် ပျူစောထီး လဲကျသေဆုံးပြီးနောက် ၄၀ မမ ၁ လုံးပစ်ပြီး လက်နက်ငယ်တွေနဲ့ပါ ရမ်းသမ်းပစ်ခတ်ကြတယ်။ လက်ရှိအနေနဲ့ သူတို့ဘက်မှာ ရိက္ခာပြတ်လပ်ပြီး စစ်ကော်မရှင်စစ်ကြောင်း လာမှာကိုမျှော်နေကြတယ်”လို့ သူက ဆက်ပြောပါတယ်။

ဒီတိုက်ခိုက်မှုကို TYK ပြောက်ကျားတပ်ဖွဲ့ မြိုင်ပကဖ တပ်ရင်း ၁ တပ်ခွဲ ၁၊ မြိုင်ပကဖ တပ်ရင်း ၁ တပ်ခွဲ ၄ (စက်ြာ)၊ ပြည်သူ့လွတ်မြောက်ရေးတပ်ပေါင်းစု – PLC အပါအဝင် မဟာမိတ်ပူးပေါင်းတပ်တွေက လုပ်ဆောင်ခဲ့တာလို့ သိရပါတယ်။

ပြီးခဲ့တဲ့ စက်တင်ဘာ ၁၇ ရက်ကလည်း မြိုင်မြို့နယ်၊ သရက်ကန်ရွာက ပျူစောထီးတွေ ထန်းတက်နေတဲ့အချိန် TYK ပြောက်ကျားတပ်ဖွဲ့က ပစ်ခတ်တိုက်ခိုက်ခဲ့ပါသေးတယ်။

စာတည်း – လင်း၊ တည်းဖြတ် – M

ပခုက္ကူ၊ ဇူလိုင် ၆၊ ၂၀၂၅။

မကွေးတိုင်း၊ ပခုက္ကူမြို့ရှိ စစ်ကောင်စီထောက်ပို့လေယာဥ်တွေ အတက်အဆင်းလုပ်တဲ့ လေယာဥ်ကွင်းကို လက်နက်ကြီးနဲ့ပစ်ခတ်ခဲ့ရာ လေယာဥ်ပြေးလမ်းပျက်စီးပြီး ထိခိုက်သေဆုံးမှုတွေလည်းရှိခဲ့တယ်လို့ ပြည်သူ့ကာကွယ်ရေးတပ်ဖွဲ့ -၂ COBRA ONE Pakokku ဆီက သိရပါတယ်။

ဇူလိုင် ၅ ရက် နေ့လယ် ၁၀ နာရီ ၄၈ မိနစ်မှာ Rocket အပြင် ၆၀ မမ လက်နက်ကြီး ၅ လုံးနဲ့ ပစ်ခတ်တိုက်ခိုက်ခဲ့တာလို့ ဆိုပါတယ်။

“အခုပြုပြင်နေတဲ့ လေယာဉ်ကွင်းထဲကို Rocket ၁၀ လုံးနဲ့ ပစ်ခတ်တိုက်ခိုက်ခဲ့တာ၊ Rocket ချည်းပဲတော့မဟုတ်ဘူး၊ ၆၀ မမ လက်နက်ကြီးတွေ ညှပ်ပြီးပစ်ခဲ့တာ၊ ၆၀ မမ လက်နက်ကြီးကတော့ ၅ လုံးပစ်ခတ်နိုင်ခဲ့တယ်၊ အတွင်းသတင်းပေးချက်အရ ၅ လုံးက လေယာဉ်ကွင်းထဲ ကျရောက်ပေါက်ကွဲပြီးတော့ ၁၃ ဦးဒဏ်ရာရပြီး‌ ၃ ဦးကတော့ အခြေအနေမကောင်းဘူးလို့ ကနဦးသတင်းအရ သိရတယ်၊ နောက်ပြီးတော့ လေယာဉ်ကွင်းပြေးလမ်းလည်း ထိခိုက်ပျက်စီးသွားတယ်” လို့ COBRA ONE Pakokku ခေါင်းဆောင် ဗိုလ်မြွေဟောက်က ပြောပါတယ်။

အဲ့ဒီလေယာဥ်ကွင်းမှာ စစ်ကောင်စီတပ်ရဲ့ စက်တပ်လေထီးတွေ၊ ထောက်ပို့ရဟက်ယာဥ်တွေက အတက်အဆင်းတွေလုပ်လေ့ရှိပြီး အနီးဝန်းကျင်ဒေသတွေကို ဗုံးကြဲတာတွေလုပ်တာကြောင့် ဒေသခံတွေနဲ့ ကာကွယ်ရေးတပ်တွေအတွက် အန္တရာယ်များတဲ့နေရာဖြစ်တယ်လို့လည်း ဆိုပါတယ်။

“အဲ့ဒီလေယာဉ်ကွင်းဟာ ကာကွယ်ရေးတပ်ဖွဲ့ဝင်တွေရော ပြည်သူတွေရော ကြီးမားတဲ့အန္တရာယ်တခုပါ၊ ဒီလေယာဉ်ကွင်းကို အသုံးပြုမယ်ဆို တော်တော်ဒုက္ခပေးမှာကြောင့် စတင်ပြီးတော့ နှိမ်နင်းရခြင်းဖြစ်တယ်၊ အဲ့ဒီလေယာဉ်ကွင်းက ပခုက္ကူမြို့နဲ့ ၁ မိုင်ခွဲအကွာမှာရှိပြီး ၂၀၂၄ လောက်ကစလုပ်တာ၊ အခု ၂၀၂၅ မှာလည်း လေယာဉ်ဆင်းတာတွေလုပ်တာကြောင့် ပစ်ခတ်နှိမ်နင်းရခြင်းဖြစ်တယ်၊ အဲ့ဒီလေယာဉ်ကွင်းကနေ စက်တက်လေထီးတွေ အတက်အဆင်းလုပ်ပြီး ပေါက် မြိုင် ရေစကြိုဘက်တွေကို ဗုံးကြဲချတာလုပ်တယ်။”လို့ သူက ဆက်ပြောပါတယ်။

ဒီတိုက်ခိုက်မှုကို ပြည်သူ့ကာကွယ်ရေးတပ်ဖွဲ့ -၂ COBRA ONE Pakokku၊ Coloum One ပြည်သူ့ ကာကွယ်ရေးတပ်ဖွဲ့နဲ့ မဟာမိတ်အဖွဲ့တွေက ပူးပေါင်းတိုက်ခိုက်ခဲ့ကြတာဖြစ်ပါတယ်။

ချောင်းဦး-ရေစကြို-ပခုက္ကူ ကားလမ်းပေါ် ပန်းတိုင်းခြုံရွာနဲ့ ကြီးကျေးရွာကြားမှာတည်ရှိတဲ့ အဲ့ဒီလေယာဉ်ကွင်းကို နှစ် ၂၀ နီးပါး ပုံမှန်အသုံးမပြုခဲ့ဘဲ ၂၀၂၄ မှာပြန်လည်ပြုပြင်ပြီး အသုံးပြုနေတာလို့ သိရပါတယ်။

တည်းဖြတ် – HP

မြေလတ်အသံ၊ ဇူလိုင် ၂၊ ၂၀၂၅။

စစ်ကိုင်းတိုင်း၊ ကန့်ဘလူမြို့နယ်၊ ဇီးကုန်းမြို့မှာ ကင်းလှည့်ထွက်လာတဲ့ စစ်ကောင်စီတပ်ဖွဲ့ဝင်တွေကို အနီးကပ်ပစ်ခတ်တိုက်ခိုက်ခဲ့တာကြောင့် စစ်ကောင်စီတပ်ဖွဲ့ဝင် ၄ ဦးသေဆုံးပြီး ၂ ဦးဒဏ်ရာရရှိခဲ့တယ်လို့ Kantbalu Counter Revolution Army(KBU-CRA) ဆီကသိရပါတယ်။

ဇွန် ၃၀ ရက် မနက် ၆ နာရီ ၁၅ မိနစ်မှာ ဇီးကုန်းမြို့ရဲ့ အရှေ့ဘက်မီတာ ၁,၂၀၀ ခန့် အကွာမှာ စစ်အင်အား ၃၀ ခန့်နဲ့ပြုလုပ်ထားတဲ့ မူးဆုံဂိတ် ဂိတ်စခန်းကနေ မြို့ပေါ်ကိုကင်းလှည့်ဖို့ ဆိုင်ကယ်နဲ့ထွက်ခွာလာတဲ့ စစ်ကောင်စီတပ်ဖွဲ့ဝင် ၆ ဦးကို ပစ်ခတ်တိုက်ခိုက်ခဲ့တာလို့ ဆိုပါတယ်။

“ဆိုင်ကယ် ၃ စီး ၆ ဦးကို အနီးကပ်တေ့ပစ်ခဲ့တာပါ။ နေရာမှာ ၄ ဦးကတော့ တန်းသေသွားတယ်။ လက်နက်ကောက်ယူဖို့အသွားကို စစ်ကူရောက်လာလို့ နောက်ပြန်ဆုတ်ခဲ့ရတယ်”လို့ Kantbalu Counter Revolution Army(KBU-CRA) မှတာဝန်ရှိသူက ပြောပါတယ်။

ပြီးခဲ့တဲ့ ဇွန် ၂၃ ရက်နဲ့ ၂၆ ရက်နေ့တွေမှာ အဆိုပါစစ်ကောင်စီတပ်ဖွဲ့ဝင်တွေဟာ ဇီးကုန်းမြို့နဲ့ ကပ်လျက်ရှိတဲ့ သပြောသာ၊ ဖိုလ့်ကုန်း၊ ကျောင်းကုန်းစတဲ့ကျေးရွာတွေကို ဝင်ရောက်ပြီး နေအိမ်တချို့နဲ့ အမျိုးသား ၁၁ ဦးကို ဖမ်းဆီးပြီးသတ်ဖြတ်ခဲ့တာကြောင့် အခုလို တိုက်ခိုက်ခဲ့တာလို့ ဆိုပါတယ်။

“အမျိုးသမီး ၅ ဦးကိုလည်း ဆေးထိုးပြီး မုဒိန်းပြုကျင့်ကြတယ်။ ရွှေ၊ ငွေ၊ ဆိုင်ကယ်၊ ဖုန်းတွေကိုလည်း လုယူကြတယ်။ အဲ့ဒါကြောင့် ကျနော်တို့က ပြန်လည်တိုက်ခိုက်ခဲ့တာပါ”လို့ သူကပြောပါတယ်။

အထက်ပါတိုက်ခိုက်မှုမှာ ဒဏ်ရာရရှိတဲ့ စစ်ကောင်စီတပ်သား ၂ ဦးကိုတော့ MEC သကြားစက်ရုံရှိ စခန်းကို ကားနဲ့အရေးပေါ်သယ်ဆောင်ခဲ့ပြီးနောက် စခန်းနဲ့ ကီလိုမိတာ ၃၀ အကွာမှာရှိတဲ့ ၆၀၀၆ အမြောက်တပ်ရင်းရှိဆေးရုံကို ပို့ဆောင်ခဲ့တယ်လို့ အထက်ပါတာဝန်ရှိသူကဆိုပါတယ်။

ဇီးကုန်းမြို့ရဲစခန်း၊ မူးဆုံဂိတ်စခန်း၊ MEC သကြားစက်ရုံစခန်းနဲ့ ခမရ ၃၆၁ တပ်ရင်းတွေကနေ မြေပြင်ကရော လက်နက်ကြီးတွေနဲ့ပါ ပစ်ခတ်မှုဖြစ်တဲ့နေရာကို ပစ်ကူ၊ တပ်ကူပေးခဲ့ပေမယ့် တော်လှန်ရေးတပ်ဖွဲ့ဝင်တွေ အထိအခိုက်မရှိပြန်ဆုတ်နိုင်ခဲ့တယ်လို့ သူကဆိုပါတယ်။

ဒီတိုက်ခိုက်မှုကို ကန့်ဘလူမြို့နယ်၊ ထန်းကုန်းတိုက်နယ် ပြည်သူ့ အုပ်ချုပ်ရေး တာဝန်ခံ ကိုငယ်လေး ဦးဆောင်တဲ့ Kantbalu Counter Revolution Army (KBU -CRA)၊ Kantbalu Htaw Gyi ပကဖ၊Kantbalu TPT လျှပ်ပြေး ပကဖ၊ Kantbalu တောသားပကဖတို့ ပူးပေါင်းလုပ်ဆောင်ခဲ့တာဖြစ်ပါတယ်။

စာတည်း – လင်း၊ တည်းဖြတ် – HP