ဘုတလင်၊ စက်တင်ဘာ ၉၊ ၂၀၂၅။

စစ်ကိုင်းတိုင်း၊ ဘုတလင်မြို့နယ်ထဲ စစ်ကြောင်းထိုးပြီး မုံရွာအခြေစိုက် နမခဌာနချုပ်ဆီ ပြန်ဆုတ်ခွာတဲ့စစ်ကော်မရှင်စစ်ကြောင်းကို ပစ်ခတ်တိုက်ခိုက်ခဲ့တယ်လို့ ဘုတလင်မြို့နယ်တပ်ပေါင်းစုဆီက သိရပါတယ်။

ဘုတလင်မြို့နယ်ထဲ စစ်ကြောင်းပတ်ထိုးမီးရှို့ခဲ့တဲ့ အင်အား ၂၀၀ ကျော်ပါ စစ်ကြောင်းဟာ စက်တင်ဘာ ၈ ရက် ယမန်နေ့ နေ့လယ်ပိုင်းက ရွှေတောင်ကျေးရွာကနေ နမခကို တပ်ပြန်ဆုတ်ချိန် မှန်တောဦးရွာရှိ ဥက္ကာမင်းသစ်ဆီဆိုင်အနီးမှာ တော်လှန်ရေးပူးပေါင်းတပ်တွေက တိုက်ခိုက်ခဲ့တာလို့ ဆိုပါတယ်။

” အဲ့ဒီတိုက်ပွဲမှာတော့ အီကွေ့မန့်၊ ကျည်ကာ၊ ကျည်ဘောက်တွေ ရတာတော့ရှိတယ်။ တိုက်ပွဲက မိုးရွာထဲမှာဖြစ်နေတော့ တိုက်ပြီးပြန်ဆုတ်ခဲ့ရတာ” လို့ ဘုတလင်မြို့နယ်တပ်ပေါင်းစုစစ်ကြောင်းမှူးကို ကြွက်ကလေးက မြေလတ်အသံကို ပြောပါတယ်။

အဲ့ဒီစစ်ကြောင်းဟာ မုံရွာနမခဌာနချုပ်ကနေ ဩဂုတ် ၂၀ ရက်မှာ စတင်ထွက်ခွာလာဖြစ်ပြီး စက်တင်ဘာ ၈ ရက်အထိ ရက် ၂၀ ကျော်ကြာအတွင်း ဘုတလင်မြို့နယ်က ကျေးရွာ‌ ၁၅ ရွာထက်မနည်းကို စစ်ကြောင်းထိုးမီးရှို့ခဲ့တဲ့ စစ်ကြောင်းဖြစ်တယ်လို့ သိရပါတယ်။

စစ်ကြောင်းဝင်ရောက်နေတဲ့ ဩဂုတ်လနောက်ဆုံးပတ်နဲ့ စက်တင်ဘာပထမပတ်တွေမှာ အရှေ့ပဲပြစ်တောရွာ၊ ကံသစ်ရွာ၊ ရွှေတောင်ရွာ၊ ကံသာရွာ၊ ကုန်းသာရွာတွေအနီးမှာ တိုက်ခိုက်မှုတွေပြုလုပ်ခဲ့ပြီး ယမန်နေ့ တပ်ဆုတ်ချိန်တိုက်ခိုက်မှုအပါ အဲ့ဒီစစ်ကြောင်းကို ၉ ကြိမ်အထိ တိုက်ခိုက်နိုင်ခဲ့တယ်လို့ အထက်ပါစစ်ကြောင်းမှူးက ပြောပါတယ်။

အထက်ပါတိုက်ခိုက်မှုတွေအတွင်း MA 1 ၁ လက်၊ MA 11 ၁ လက်၊ အီကွေ့မန့်၊ ကျည်ကာဦးထုပ်နဲ့ အခြားခဲယမ်းပစ္စည်းတွေ သိမ်းဆည်းနိုင်ခဲ့ပြီး စစ်ကော်မရှင်တပ်သား ၃၀ ကျော် သေဆုံးမှုရှိခဲ့တယ်လို့ ဘုတလင်မြို့နယ်တပ်ပေါင်းစုစစ်ကြောင်းမှူးက ပြောဆိုထားပေမယ့် မြေလတ်အသံက သီးခြားအတည်မပြုနိုင်ပါဘူး။

” နမခ က ထိုးလာတဲ့စစ်ကြောင်းက အင်အား ၂၀၀ ကျော် ၃၀၀ နီးပါးရှိတာဆိုတော့ ကျနော်တို့ဘက်က ခုခံစစ်ပါပဲ၊ ချေမှုန်းလို့တော့မရဘူး၊ ပြောက်ကျားစနစ်ကစားခဲ့တဲ့အတွက် ကျနော်တို့ဘက်က အထိအခိုက်တော့ သိပ်မရှိဘူး၊ အနည်းအကျင်းပဲရှိတယ်၊ သူတို့ဘက်ကတော့ ထိခိုက်သေဆုံးရှိတယ်” လို့ သူက ဆက်ပြောပါတယ်။

ဒီတိုက်ခိုက်မှုကို ဘုတလင်မြို့နယ်တပ်ပေါင်းစုစစ်ကြောင်းက တိုက်ခိုက်ခဲ့တာဖြစ်ပြီး တိုက်ခိုက်ခံရပြီးနောက် ယမန်နေ့ညနေပိုင်းမှာပဲ စစ်ကော်မရှင်စစ်ကြောင်းဟာ နမခဌာနချုပ်အတွင်း ပြန်ဆုတ်သွားတယ်လို့ သိရပါတယ်။

ပြီးခဲ့တဲ့ ဩဂုတ် ၁၀ ရက်ကလည်း မုံရွာမြို့အနောက်မြောက်တိုင်းစစ်ဌာနချုပ်-နမခ စစ်ကြောင်းကို ဘုတလင်မြို့နယ် တပ်ပေါင်းစုက ၂ ကြိမ်တိုက်ခိုက်ခဲ့ရာ စစ်ကော်မရှင်တပ်သား ၁ ဦးကို အရှင်ဖမ်းဆီးနိုင်ခဲ့ပြီး သေဆုံးမှုလည်းများခဲ့တယ်လို့ သိရပါတယ်။

စာတည်း – ဟိန်းစံ

မုံရွာ၊ ဇွန် ၃၀၊ ၂၀၂၅။

စစ်ကိုင်းတိုင်း၊ မုံရွာမြို့အခြေစိုက် အနောက်မြောက်တိုင်း စစ်ဌာနချုပ် (နမခ)ကို ရှော့တိုက်ရှော့ကတ်တွေနဲ့ပစ်ခတ်ရာ စစ်ကောင်စီတပ်ဖွဲ့ဝင်တချို့သေဆုံးပြီး အဆောက်အအုံအချို့လည်း ပျက်စီးခဲ့တယ်လို့ Chindwin Rocket Brother- CRB အဖွဲ့ဆီက သိရပါတယ်။

ဇွန် ၂၇ ရက် ညနေ ၅ နာရီခွဲခန့်က ရှော့တိုက်ရှော့ကတ် ၁၀ လုံးနဲ့ ပစ်ခတ်ခဲ့ရာ အရာရှိတွေအပါ သေဆုံးသူများခဲ့တယ်လို့ ဆိုပါတယ်။

“အခုလိုသေဆုံးတဲ့ အချက်အလက်တွေကို CDM ဗိုလ်ကြီးတချို့က အတည်ပြုပေးတာပါဗျ။ ပစ်ခတ်မှုကြာချိန်ကတော့ မိနစ် ၃၀ လောက်ရှိတယ်ဗျ။ နမခထဲကနေ လက်နက်ကြီးတွေနဲ့ ပြန်လည်ပစ်ခတ်ပါတယ်။ ကျတော်တို့ရဲဘော်တွေနဲ့ မလှမ်းမကမ်းမှာကို ၃ လုံး ကျပေါက်ကွဲခဲ့သေးတယ်။ အထိအခိုက်တော့ မရှိခဲ့ဘူးဗျ။”လို့ CRB အဖွဲ့ရဲ့ တာဝန်ခံတဦးက မြေလတ်အသံကို ပြောပါတယ်။

တိုက်ခိုက်မှုအတွင်း တဆ ၄/၃၀၀ အထူးကြပ်မတ်ဆောင်အပါ စစ်တိုင်းရုံးအတွင်းရှိ အရာရှိ ၃ ဦး၊ စစ်ကောင်စီတပ်ဖွဲ့တင် ၁၄ ဦးနဲ့ အရာရှိမိသားစုဝင်တွေလည်းသေဆုံးခဲ့တယ်လို့ ဆိုထားပေမယ့် ဒီသေဆုံးမှုတွေနဲ့ပတ်သက်ပြီးမြေလတ်အသံကသီးခြားအတည်မပြုနိုင်သေးပါဘူး။

ဒါ့အပြင် ဆီဂိုဒေါင်၊ စခန်းရုံးနဲ့ ရိက္ခာဂိုဒေါင်၊ အရာရှိရိပ်သာမှာ ရပ်ထားတဲ့ အိမ်စီးကား ၂ စီးတို့ မီးလောင်ပျက်စီးပြီး လိုင်းခန်းနှစ်ခန်းလည်း လက်နက်စထိမှန်ပျက်စီးသွားခဲ့တယ်လို့ သိရပါတယ်။

တိုက်ခိုက်မှုအပြီးမှာ နမခထဲကနေ ပါရာမိုတာ အင်ဂျင်တပ်လေထီး ၁ စီးတက်လာပြီး အနီးဝန်းကျင်ကို ၂ နာရီကြာ ပျံဝဲခဲ့တယ်လို့ သူက ဆက်ပြောပါတယ်။

ဒီတိုက်ခိုက်မှုကို Chindwin Rocket Brothers-CRB အဖွဲ့က ဦးဆောင်ပြီး မဟာမိတ်အဖွဲ့တွေဖြစ်တဲ့ ချိုမိုင်မိုင်(ကနီ)၊ Anonymous Heroes၊ Chindwin Brothers တို့ ပူးပေါင်းလုပ်ဆောင်ခဲ့တာလို့လည်း သိရပါတယ်။

ပြီးခဲ့တဲ့ ဇွန် ၁၄ ရက်ကလည်း တော်လှန်ရေးတပ်ဖွဲ့ဝင်တွေက နမခကို ရှော့တိုက်ဒုံးနဲ့ပစ်ခတ်ခဲ့လို့ အရာရှိ ၂ ဦးအပါ စစ်ကောင်စီတပ်ဖွဲ့ဝင် ၅ ဦး နေရာမှာသေဆုံးကာ ၁၀ ဦးကျော် ထိခိုက်ဒဏ်ရာရရှိခဲ့ပါသေးတယ်။

စာတည်း – လင်း

■ ကားတွေကိုမီးရှို့ပြီး လက်နက်ခဲယမ်းတွေကို တော်လှန်ရေးတပ်တွေသိမ်းဆည်း

မုံရွာ၊ မတ် ၇၊ ၂၀၂၅။

စစ်ကိုင်းတိုင်း၊ မုံရွာအခြေစိုက်အနောက်မြောက်တိုင်းစစ်ဌာနချုပ် – နမခက ထွက်လာတဲ့စစ်ကောင်စီတပ်ရဲ့ သံပြားကာကား ၂ စီးကို မတ် ၄ ရက် ညနေ ၃ နာရီ ၁၀ မိနစ်မှာ ပစ်ခတ်တိုက်ခိုက်ခဲ့တယ်လို့ Chaung U People’s Defence Force ဆီက သိရပါတယ်။

အင်အား ၃၀ ကျော်ပါ စစ်ကောင်စီသံပြားကာကား ၂ စီးကို ချောင်းဦးမြို့နယ်အပိုင်၊ မြင်းမူ-ချောင်းဦးလမ်းပိုင်းမှာ ဒေသခံကာကွယ်ရေးတပ်ဖွဲ့တွေက ၁ နာရီကျော်အကြာ ပစ်ခတ်တိုက်ခိုက်ခဲ့ကြတာလို့ ဆိုပါတယ်။

“သံပြားကာကား ၂ စီးလုံးကို တိုက်ခိုက်ခဲ့တာ။ ၂ စီးထဲက **၁၂ ကောင်ကို ဘက်စုံ(လမ်းကွေ့)ဘက်မှာ ချပြီးတော့ ဆက်မောင်းလာတာ။ သံပြားကာကားပေါ်မှာက အနည်းဆုံး ၅၀ ခန့်ပါတယ်။ ၁၂ ကောင်လျော့မယ်ဆိုရင် အင်အားက ၃၀ ကျော်နဲ့ ၄၀ ကြားပါတယ်။ တိုက်ခိုက်တဲ့အချိန် ထွက်ပြေးတာ လည်းရှိတယ်။ ကျနော်တို့ သိရတာက ၁၇ ဦးသေတယ်။”လို့ Chaung U People’s Defence Force သတင်းနဲ့ ပြန်ကြားရေးတာဝန်ခံက ပြောပါတယ်။

ပစ်ခတ်မှုအတွင်း စစ်ကောင်စီတပ်က လေထီးစက်တပ်လေယာဉ်နဲ့ လေကြောင်းတိုက်ခိုက်ပစ်ကူပေးတာတွေလုပ်သလို မြပုလဲအထိုင် စစ်တပ်စခန်းနဲ့ ချောင်းဦးမြို့ပေါ် စိုက်ကွင်းရုံး ထိုင်စခန်းကနေ ၁၂၀ မမ လက်နက်ကြီးနဲ့ ပစ်ခတ်တာတွေလုပ်တယ်လို့ ဆိုပါတယ်။

စစ်ကောင်စီဘက်က MA 1 ၄ လက်၊ MA 3 ၁ လက်၊ MA 11 ၃ လက်၊ G 3 ၁ လက်၊ G1 ၁ လက်၊ 60 mm စိန်ပြောင်း ၁ လက်၊ 40mm ဗုံးပစ်လောင်ချာ ၁ လက်၊ ကျည်ဘောက် ၂၂ ခု သိမ်းဆည်းရရှိပြီး သံပြားကာကား ၂ စီးကိုတော့ မီးရှို့ဖျက်ဆီးခဲ့တယ်လို့ Chaung U People’s Defence Force ဆီကသိရပါတယ်။

ဒီပစ်ခတ်တိုက်ခိုက်မှုကို Chaung U People’s Defence Force၊ ယင်းမာပင်မြို့နယ် ပကဖ လက်ရုံးတပ် ULF စစ်ကြောင်း၊ B21 တပ်ရင်း၊ ရတနာပုံ၊ Chindwin Brother၊ Bandula Defence Force (ဘုတလင်)၊ Three Brothers Force (ကနီ) ၊ Special Force 11၊ Immortal Guerrilla Force ၊ Sagaing District Drone Team (SDDT) တို့ ပူးပေါင်းလုပ်ဆောင်ခဲ့တာပါ။

Chaung U People’s Defence Force ဟာ ဖေဖော်ဝါရီ ၁၇ ရက်ကလည်း မုံရွာမြို့၊ ညောင်ဖြူပင်စခန်းက စစ်ကောင်စီတပ်ဖွဲ့ဝင်တွေ ကင်းမွန်းတော်ရွာကိုရောက်နေချိန်မှာလည်း ပစ်ခတ်တိုက်ခိုက်ခဲ့ သေးတယ်လို့ သိရပါတယ်။

စာတည်း – လင်း