နည်းပါး

ပြည်၊ ဧပြီ ၁၃၊ ၂၀၂၃။

ပဲခူးတိုင်းအနောက်ခြမ်း၊ ပြည်မြို့မှာ ဧပြီလ ၁၃ရက် ဒီနေ့မှာ ကျရောက်တဲ့ သင်္ကြန်အကြိုနေ့မှာ စစ်ေကာင်စီရဲ့ ဌာနဆိုင်ရာဝန်ထမ်းနဲ့ တပ်မိသားစုအချို့သာပါဝင်ပြီး ပြည်သူလူထူ ပူးပေါင်းမှု မရှိသလောက် နည်းပါးတယ်လို့ ဒေသခံတွေဆီက သိရပါတယ်။

ပြည်မြို့ မြင်းစီးကျောက်ရုပ်အနီးက ဗဟိုမဏ္ဍပ်မှာသာ လူအနည်းငယ် သီဆို ကခုန်နေပြီး ရဲနဲ့ စစ်သားတွေက သေနတ်တွေကိုင်ပြီး လုံခြုံရေးယူပေးနေတာတွေရှိတယ်လို့ ဒေသခံတဦးက ပြောပါတယ်။

“သူတို့လူ သူတို့ပဲ ပြည်သူတွေ မဝင်ရဲဘူး။ ဗုံးထိမှာ ကြောက်တာ။ ပြည်သူတွေ ဝင်မနွှဲတဲ့ပွဲ မသိရင် တပ်တွင်း သင်္ကြန် ကျရော။ တပ်ထဲမှာပဲ လုပ်သင့်တာ” လို့ ဆိုပါတယ်။

အကြိုနေ့မတိုင်ခင် တရက်အလိုကလည်း ဗဟိုမဏ္ဍပ်အောက်မှာ မပေါက်ကွဲသေးတဲ့ ဖုန်းနဲ့တွဲထားတဲ့ ချိန်ကိုက်ဗုံးတလုံး တွေ့တယ်ဆိုတဲ့ သတင်းထွက်ပေါ်ခဲ့ပါသေးတယ်။

ဗဟိုမဏ္ဍပ်ဖွင့်ပွဲလုပ်ဖို့အတွက် ဧပြီလ ၁၂ ရက် မနေ့ညပိုင်းကတည်းက မဏ္ဍပ်ဝန်းကျင်နေရာတွေမှာ စစ်ကောင်တပ်တွေနဲ့ ရဲတွေ လုံခြုံရေးအများအပြားချထားသလို ဒီနေ့မနက် ဖွင့်ပွဲမှာလည်း အရပ်ဝတ်၊ ယူနီဖောင်းဝတ်တွေနဲ့ လုံခြုံရေး အင်အား ၅၀ ထက်မနည်း ထားရှိကာ မဏ္ဍပ်လာသမျှယာဥ်တွေကို တားဆီးစစ်ဆေးတာတွေ လုပ်ခဲ့တယ်လို့ သိရပါတယ်။

ပဲခူး၊ မတ် ၂၄၊ ၂၀၂၃။

ပဲခူး ရွှေမော်ဓောဘုရားဗုဒ္ဓပူဇနိက (၂၆၀၅) ကြိမ်မြောက် ပွဲတော်မှာ စျေးရောင်းချတဲ့သူတွေ နည်းပါးနေတယ်လို့ မြို့ခံတွေဆီက သိရပါတယ်။

မတ်လ ၂၀ ရက်နေ့ကနေ ဧပြီလ ၁၈ ရက်နေ့အထိ ပွဲတော်ကိုကျင်းပနေပေမဲ့လည်း အခုချိန်ထိ စျေးတန်းနဲ့ကစားကွင်းတွေကို ဆောက်လုပ်နေဆဲဖြစ်သလို၊ လာရောက်ရောင်းချတဲ့ ဆိုင်တွေလည်း နည်းပါးလာတယ်လို့ ပဲခူးမြို့ခံတဦးက ပြောပါတယ်။

“ကစားကွင်းနဲ့ စျေးတန်းတွေက ဆောက်နေတုန်းပဲ။ ဇာတ်ပွဲက ၃၀ ရက်နေ့မှာ ဝင်မယ်လို့ပြောတယ်။ အခုချိန်ထိ ဇာတ်စင်တောင် မဆောက်ရသေးဘူး။ ဝန်းထဲမှာတော့ ရဲတယောက်နှစ်ယောက်ကို လုံခြုံရေးချထားတယ်။ ဆိုင်တန်းပေါင်း ၃၀ ဆယ်လောက်ပဲ ရှိမယ်။ ဈေးရောင်းတဲ့သူ‌တွေလည်း သိပ်မရှိဘူး” လို့ ဆိုပါတယ်။

ပြီးခဲ့တဲ့နှစ်တွေမှာ ဆိုင်တန်း(၁၅ ခန်းခန့်ပါ) ၁၀၀ ကျော် ဆောက်လုပ်ကျင်းပနိုင်ခဲ့သော်လည်း ယခုနှစ်တွင်တော့ ဆိုင်တန်း(၃၀)သာ ထိုးထားပြီး အပြည့်မလာသေးဘူးလို့ ဆိုပါတယ်။ ယခင် ဗိမ္မာန်အနောက်တွင် ဆိုင်ခန်း ၃၀ ခန့်ရှိခဲ့သော်လည်း ယခုနှစ်တွင် ၃ ဆိုင်သာ ရှိတယ်လို့ ဆိုပါတယ်။

ယခင်နှစ်တွေမှာ ဗုဒ္ဓပူဇနိယပွဲတော်ကို ၄ လပိုင်းလောက်မှ ကျင်းပလေ့ရှိပေမဲ့လည်း ဒီနှစ်မှာတော့ ပွဲတော်ကို မတ်လ အတွင်းမှာ ကျင်းပနေတာပါ။

“ရပ်ကွက်လူကြီးတွေ ဂေါ်ပကတွေ ပေါင်းပြီး ဒီနှစ်ကတော့ ပွဲကိုစောစောကျင်းပတယ်။ ဘာဖြစ်လို့လဲတော့ မသိပါဘူး။ ပွဲတော်ရက် ၂၀ ရက်ကနေ ၃၀ ရက်နေ့အထိက စျေးရောင်းပွဲတော်လုပ်မှာ။ ပွဲတော်မှာ ကပြမယ့်သူတွေ သီချင်းဆိုမယ့်သူတွေအတွက် ဇာတ်ခုံဆောက်ဖို့ လုံခြုံရေးက ၁၀၀ ကျော်ချမယ်လို့တော့ ကြားနေရတယ်’’ လို့ ဆိုပါတယ်။

ဘုရားပွဲတော်မှာ ကျင်းပမဲ့ ဇာတ်ပွဲတွေကတော့ ချစ်ရဲမင်းဇာတ်သဘင်ပွဲ၊ ချစ်ပန်းဆုဝေဇာတ်သဘင်ပွဲ၊ ရန်ကုန်ရွှေမေတ္တာဇာတ်သဘင်ပွဲနဲ့အတူ ရုပ်ရှင်နဲ့ ဂီတအနုပညာရှင်များကလည်း (၁၀) ည အခမဲ့ဖျော်ဖြေတင်ဆက်သွားမယ်လို့လည်း လက်ကမ်းစာစောင်တွေမှာ ကြေညာထားပါတယ်။

ပြီးခဲ့တဲ့ ၂၀၂၂ ခုနှစ်မှာတော့ ရွှေမော်ဓောဘုရားပွဲကို ဧပြီလ (၁၀) ရက်ကနေ (၁၉ ) ရက်နေ့အထိသာ ကျင်းပခဲ့တယ်လို့လည်း ဆိုပါတယ်။

စာတည်း – 007

မြေလတ်အသံ၊ မတ် ၁၂၊ ၂၀၂၃။

အာဏာသိမ်းယူပြီးချိန်ကစလို့ ကုန်စျေးနူန်းတွေ ကြီးမြင့်လာတဲ့အတွက် အဆောက်အဦးအသစ် ဆောက်လုပ်မှု နည်းပါးလာလို့ ပန်းရံလုပ်သားတွေ ကြုံရာကျပမ်း လုပ်ကိုင်နေရတယ်လို့ သိရပါတယ်။

ပန်းရံလုပ်ငန်းခွင်ထဲက အလုပ်ကြမ်းသမား (မဆလာနဲ့အုတ်ခဲသယ်)တွေ ကြုံရာကျပမ်း လုပ်ကိုင်နေကြရတာဖြစ်တယ်လို့ ဒေသခံပန်းရံဆရာတဦးက ပြောပါတယ်။

“ဘိလပ်မြေစျေး အုတ်စျေးက အာဏာမသိမ်းခင်ကထက် ထက်ဝက်တက်သွားတော့ အဆောက်အဦးအသစ် ဆောက်မယ့်သူက နည်းသွားတယ်။ တခါမှ အလုပ်မပြတ်ဘူးတဲ့ ကျနော်ကိုယ်တိုင် အခုနားနေရတယ်။ သံလက်ကိုင်ဆရာအဆင့်တွေတောင် ဟိုအဖွဲ့သွားဆင်းလိုက် ဒီအဖွဲ့သွားဆင်းလိုက်နဲ့ အိန္ဒြေမရဘူးပေါ့။ အကြမ်းသမားတွေကတော့ ကြုံရာပေါ့။ မတ်ပဲနုတ် မတ်ပဲခြွေ လိုက်ကြရသူတွေလည်း ရှိတယ်” လို့ ပြောပါတယ်။

နေစရာအိမ် လိုအပ်နေသူတွေသာ ဆောက်လုပ်နေကြပြီး လုပ်ငန်းကြီး လုပ်ဆောင်ရတာမျိုး နည်းပါးသွားတယ်လို့ သူက ဆက်ပြောပါတယ်။

စစ်အာဏာမသိမ်းခင်က ဘိလပ်မြေတအိတ် ကျပ် ၅၅၀၀၊ အုတ်တခဲ ကျပ် ၈၀ ဝန်းကျင်ကနေ အခုအခါ ဘိလပ်မြေတအိတ် ကျပ် ၁၀၀၀၀ ဝန်းကျင်နဲ့ အုတ်တခဲကို ကျပ် ၁၅၀ ဝန်းကျင် စျေးပေါက်နေတယ်လို့ သိရပါတယ်။

ပန်းရံအကြမ်းသမားတဦး​ကတော့ လက်ရှိမှာ မတ်ပဲနုတ်၊ မတ်ပဲခြွေ လုပ်ငန်းတွေပြီးသလောက် ဖြစ်နေပြီး နောက်ထပ်အလုပ်ကလည်း မရှိသေးသလို ဆန်စျေးတက်မှာကိုပဲ စိုးရိမ်နေရပြီး လက်ရှိမှာ ငွေတိုး(ဆန်ကြမ်း) တပြည်ကို ၂၅၀၀ ကျပ်နဲ့ ပေးဝယ်စားနေရတာလို့ ပြောပါတယ်။

ဆောက်လုပ်ဆဲလုပ်ငန်းအချို့ရှိပေမယ့် လုပ်သားလျှော့ကာ လုပ်ငန်းခွင်ဝင်နေကြတာကြောင့်လည်း အလုပ်ဆင်းရက် ပုံမှန်မရှိသူတွေလည်း ရှိတယ်လို့ သူကဆက်ပြောပါတယ်။

လက်ရှိမှာ အလုပ်ကြမ်းသမား အများစုဟာ အလုပ်အကိုင် အခွင့်အလမ်း နည်းပါးလာတာကြောင့် မိသားစုစားဝတ်နေရေး ခက်ခဲနေတယ်လို့ သိရပါတယ်။

ပဲခူး၊ နိုဝင်ဘာ ၄၊ ၂၀၂၂။

ပဲခူးတိုင်း ပြည်မြို့မှာ စစ်ကောင်စီက ကျင်းပတဲ့ တန်ဆောင်တိုင်ဘုရားပွဲစျေး စျေးဝယ်သူနဲ့ လည်ပတ်သူတွေ နည်းပါးတယ်လို့ ဒေသခံတွေဆီက သိရပါတယ်။

” မဝယ်ပါဘူး ဘုရားအရှေ့လေးလုပ်တာ စွယ်တော်လာဖူးတဲ့ သူပဲရှိတယ်။ အရင်လို ပွဲစျေးတန်းတွေ ဇာတ်ပွဲတွေ ရဟတ်တွေမှ မရှိဘဲ။ ဆိုင်ခန်းတောင် အရင်လို ဝါးဆိုင်ခန်းတွေ မဟုတ်။ ဘုရားပေါ်တော့ စွယ်တော်တိုက်ဖွင့်တယ် ဘုရားဖူးတွေ ပုံမှန်အချိန်ထက်များတာ” လို့ ‌ပြည်မြို့ခံ တဦးက ပြောပါတယ်။

စစ်ကောင်စီက ပွဲစျေးတန်းစည်ကားဖို့ ဆိုင်ခန်းငှားခ ပေးစရာမလိုပဲ အခမဲ့ရောင်းချခွင့်ပေးထားပေမယ့် ဆိုင်ခန်းတွေကို ကြိုယူထားပြီး တခန်း ၂သောင်းဝန်းကျင်နဲ့ ပြန်ရောင်းနေသူတွေရှိသလို ဆိုင်ခန်းမရလို့ ရန်ဖြစ်ကြသူတွေလည်း ရှိတယ်လို့ ဒေသခံတွေ ဆီကသိရပါတယ်။

ပဲခူး၊ ဇွန် ၉၊ ၂၀၂၂။

မကွေးတိုင်း၊ သရက်ခရိုင်၊ အောင်လံမြို့နယ်၊ အမှတ် ၂ အခြေခံပညာအထက်တန်းကျောင်း (အထက-၂) ကျောင်းဝန်းအတွင်းမှာ ဇွန်လ ၉ ရက် ဒီကနေ့မနက်ပိုင်းက မပေါက်ကွဲသေးတဲ့ ဗုံးတလုံးတွေ့ရှိခဲ့တယ်လို့ ဒေသခံတွေဆီက သိရပါတယ်။

အောင်လံမြို့၊ ဘိုကုန်းရပ်ကွက်မှာရှိတဲ့ အ.ထ.က ၂ စာသင်ကျောင်းမှာ မနက် ၁၀ နာရီလောက်က မပေါက်ကွဲသေးတဲ့ဗုံးကိုတွေ့ရှိခဲ့ပြီး၊ မြို့နယ်စစ်ကောင်စီက ဖုံးဖိထားခဲ့လို့ စာသင်ကျောင်းရှေ့မှာ လူစုလူဝေး ဖြစ်ပေါ်ခဲ့တယ်လို့ ဆိုပါတယ်။

“စာသင်ကျောင်းထဲ ဗုံးတွေ့တယ်ဆိုတာ ရပ်ကွက်က လူတွေကတဆင့်တဆင့်ကြားပြီး သူတို့ကလေးတွေရှိတော့စိတ်ပူပြီး ကျောင်းရှေ့ကိုသွားကြတာ။ ကျောင်းရှေ့ရောက်တော့ ဗုံးမဟုတ်ဘူ ဘာညာနဲ့ စစ်ကောင်စီကလူတွေနဲ့ ကျောင်းကလူတွေပြောတာ။ ရပ်ကွက်ကတော့ မကျေနပ်ဘူး။ ကျောင်းရှေ့မှာရုတ် ရုတ်သဲသဲတွေတော့ဖြစ်သွားသေးတယ်” လို့ မြို့ခံတဦးက မြေလတ်အသံကို ပြောပါတယ်။

အဲ့ဒီလိုဖြစ်ပွားပြီးတဲ့နောက် ဒီကနေ့နေ့လည်ပိုင်းမှာတော့ ကျောင်းသားမိဘတွေက ကျောင်းကိုမလွှတ်တော့လို့ ကျောင်းတက်ရောက်သူ မရှိသလောက် နည်းပါးသွားတယ်လို့ သူကဆက်ပြောပါတယ်။

အောင်လံမြို့မှာ အထက်တန်းကျောင်း ၃ ကျောင်းအပါအဝင် အခြေခံပညာကျောင်းအများအပြားရှိတာဖြစ်ပြီးတော့ ကျောင်းစဖွင့်တဲ့ ဇွန်လပထမအပတ် ၂ ရက် ၃ ရက်သာ စစ်ကောင်စီက အထက် တန်းကျောင်းတွေကို လုံခြုံရေးစောင့်ပေးပြီး ဒုတိယအပတ်ကစလို့ စာသင်ကျောင်းတွေမှာ လုံခြုံရေး စောင့်ပေးတာမျိုးမရှိတော့ဘူးလို့ ဒေသခံတွေက ပြောပါတယ်။