ဒေသခံ

စစ်ကိုင်း၊ ဒီဇင်ဘာ ၂၀၊ ၂၀၂၂။

စစ်ကိုင်းတိုင်း၊ ရေဦးမြို့နယ်က စစ်ကောင်စီတပ်တွေမီးရှို့ခဲ့တဲ့ ဇဝရှာ၊ နှောကုန်းရွာနဲ့ ကုန်းနန်းရွာက ဒေသခံတွေမှာ စားနပ်ရိက္ခာ၊နေထိုင်စရာနဲ့ အဝတ်အထည်တွေ အရေးပေါ်လိုအပ်နေတယ်လို့ ဒေသခံတွေကပြောပါတယ်။

ဒီဇင်ဘာလ ၁၇ ရက်မှာ နှောကုန်းရွာက နေအိမ် ၁၀ လုံး၊ ၁၈ ရက်မှာ ဇဝရှာရွာက နေအိမ် ၇၀ လုံးနဲ့ ၁၉ ရက်မှာ ကုန်းနန်းရွာက နေအိမ် ၁၉ လုံးတို့ကို စစ်ကောင်စီတပ်တွေက မီးရှို့ဖျက်ဆီးခဲ့တာကြောင့် စုစုပေါင်းဒေသခံ ၄၀၀ ဝန်းကျင် အကူညီတွေလိုအပ်နေတာလည်းဖြစ်ပါတယ်။

“စစ်ကြောင်းက ၃ ကြောင်းဗျ။ စစ်ကြောင်းတကြောင်းစီက တရွာကျစီမီးဝင်ရှို့ခဲ့တာ။ အခုမီးရှို့ခံရတဲ့ရွာသုံး ရွာက ကျေးရွာအုပ်စုတခုတည်းပါ။ စစ်သားတွေက ရွာထဲဝင်လာပြီးတော့ ဘာမှမပြောမဆို အိမ်တွေကို မီးရှို့တော့တာပဲ”လို့ နှောကုန်းကျေးရွာသားတဦးက ပြောပါတယ်။

အခုစစ်ကြောင်းထိုးမီးရှို့ခဲ့တဲ့စစ်သားတွေဟာ မော်လိုက်အခြေစိုက် ခမရ ၃၆၄ နဲ့ မှော်ဘီအခြေစိုက် ခမရ ၇၀၁ တပ်ရင်းတွေက ဖြစ်ကြပြီး လက်ရှိမှာ ရေဦးအနောက်ဖက်ခြမ်းက ကျေးရွာတွေကို ဝင်ရောက်မီးရှို့နေကြတယ်လို့ သိရပါတယ်။

စစ်ကြောင်း ၃ ကြောင်းခွဲပြီး ရေဦးမြို့ နယ်အနောက်ဖက်ခြမ်းကို စစ်ကြောင်းထိုးလျှက်ရှိပြီး၊ မီးရှို့ခံကျေးရွာတွေကဒေသခံတွေအနေနဲ့လည်း ကျေးရွာထဲကိုပြန်ဝင်ကာ ဘုန်းကြီးကျောင်းတွေ၊ ဆေးခန်းအဟောင်းတွေနဲ့ စာသင်ကျောင်းတွေထဲမှာကပ်ပြီး နေထိုင်နေကြရတယ်လို့ နေအိမ်မီးရှို့ခံလိုက်ရတဲ့ နှောကုန်းကျေးရွာသားတဦးက ပြောပါတယ်။

“ဇဝရှာရွာမှာဆိုရင် အိမ်ခြေစုစုပေါင်းက ၁၀၀ လောက်ပဲရှိတာ။ အဲဒီထဲက ၇၀ လောက်ပြာကျသွားတယ်။ ကျနော်တို့ဆိုလည်း အခုစာသင်ကျောင်းမှာ ဖြစ်သလိုနေနေရတယ်။ အိမ်မှမရှိတော့တာ။ အိမ်က ပြာပုံပဲကျန်ခဲ့တယ်။ စားသောက်ရတာကလည်း မီးရှို့မခံရတဲ့ရွာကလူတွေ ပေးကမ်းလို့စားနေရတယ်။ အများကြီးတော့မဟုတ်ဘူး။ သူတို့တတ်နိုင်သလောက်လေးပေါ့။ ဒီလိုပဲစားနေရတယ်” လို့ ပြောပါတယ်။

ဒါ့အပြင် နေအိမ်တွေမီးရှို့ခံလိုက်ရတဲ့ ဒေသခံတွေရဲ့အခက်အခဲတွေကို တထောင့်တနေရာက ဖြေရှင်နိုင်ဖို့အတွက် ပြည်တွင်း၊ ပြည်ပကအလှူရှင်တွေအနေနဲ့လည်း တတ်နိုင်သလောက် လှူဒါန်းပေးစေချင်တယ်လို့လည်း ဆိုပါတယ်။

အခုဒီဇင်ဘာလ ပထမပတ်အတွင်းမှာ ရေဦးမြို့နယ်က ရှာမိဿာရှာ၊ မုတ်စီရွာ၊ ချမ်းသာရွာ၊ ကုန်းသာရွာ၊ ရွာသစ်ရွာ၊ ဆည်ကြီးရွာ၊ ပေါက်သာရွာ၊ ဇိန့်ဇွန်းရွာ၊ ပိဋိကက်ကျရွာ၊ ဇဝရှာ၊ ဝက်ဖိုးရွာ၊ ငှက်ပျောတောရွာ၊ တောင်ကုန်းရွာ၊ ချောင်းဆုံရွာ၊ သရက်ကန်ရွာ၊ မိုးဒေါင်ရွာ၊ ကွမ်းအုံရွာက နေအိမ်တွေကို စစ်ကောင်စီမီးရှို့ဖျက်ဆီးခဲ့တယ်လို့ ရေဦးမြို့နယ် ပြည်သူ့ကာကွယ်ရေးအဖွဲ့ရဲ့စာရင်းမှတ်တမ်းအရသိရပါတယ်။

ပဲခူး၊ နိုဝင်ဘာ ၇၊ ၂၀၂၂။

ပဲခူးတိုင်းအနောက်ခြမ်း၊ ပေါင်းတည်မြို့နယ်မှာ ရဲတွေနဲ့ အုပ်ချုပ်ရေးမှူးတွေ မကြာခဏ သတ်ခံနေရလို့ မဆိုင်တဲ့ ဒေသခံပြည်သူတွေကို စစ်ကောင်စီက ဖမ်းထားတာ ၁၅ ဦးထက် မနည်းရှိနေပြီ ဖြစ်ပါတယ်။

PDF အနေနဲ့ ဒလံ အုပ်ချုပ်ရေးမှူးနဲ့ ရဲတွေကို မိုင်းဆွဲတာ ရှင်းလင်းတာတွေ လုပ်ရင် တရားဝင်ထုတ်ပြန်နေတာဖြစ်လို့ PDF နဲ့ မဆိုင်ပဲ ဒေသခံတွေကို ဖမ်းနေတာကို အပြင်းအထန် ကန့်ကွက်ရှုံ့ချတယ်လို့ PPDF တာဝန်ခံတဦးက ပြောပါတယ်။

“ကျနော်တို့ ပေါင်းတည်မှာ ဒလန်တွေ အုပ်ချုပ်ရေးမှူးတွေနဲ့ မိုင်းဆွဲတိုက်ခိုက်မှုတွေလုပ်တိုင်း PDFကလုပ်ရင် ကြေညာချက်ထုတ်တယ်။ ခုလည်း ဖားယားကြီးဖြစ်စဥ်မှာ ကြေညာချက်ထုတ်ပြီးသားကို မဆိုင်တဲ့ခရာပေါက်ရွာက CDM ကျောင်းဆရာ ကိုတက်တိုးနဲ့ ရွာသားတွေအပြင် ကြို့ပင်သာရွာသား ၂ ဦးကိုလည်း ဖမ်းပြီးနှိပ်စက်နေတယ်” လို့ ပြောပါတယ်။

ပြီးခဲ့တဲ့ နိုဝင်ဘာ ၅ ရက်က ကြို့ပင်သာ အုပ်ချုပ်ရေးမှူးကို ဖားယားကြီးရွာ သူ့အိမ်မှာပဲ ထောက်ခံစာ လုပ်ရင်း သတ်ခဲ့တဲ့ ဖြစ်စဉ်ကြောင့် နိုဝင်ဘာ ၆ ရက် မနေ့က ခရာပေါက်ရွာက CDM ကျောင်းဆရာအပါအဝင် ရွာသား ၆ ဦးကို ဖမ်းသွားခဲ့တာပါ။

“အုပ်ကြီး အသတ်ခံရမှုနဲ့ မဆိုင်တဲ့ ဆရာဦးတက်တိုး အပါအဝင် ခရာပေါက်ရွာသား လေးဦး အဖမ်းခံရတာ။ အဲနေ့က အုပ်ကြီးကို သေနတ်နဲ့ ပစ်တဲ့သူတွေကို ရွာသားတွေက ဖမ်းဆီးဖို့တောင် လုပ်ကြသေးတာ။ ဟိုက သေနတ်နဲ့ချိန်လို့ နောက်ပြန်ဆုတ်သွားတာ” လို့ ဒေသခံတဦးက ပြောပါတယ်။

အဲ့ဒီအပြင် စစ်ကောင်စီက အခုလိုတွေ လုပ်နေတာဟာ ဒေသခံပြည်သူ့ကာကွယ်ရေးတပ် ( PDF ) တွေနဲ့ ပြည်သူတွေကို ရန်တိုက်ပေးနေတာ ဖြစ်တယ်လို့ မြို့ခံတဦးကလည်း ပြောဆိုထားပါတယ်။

ပေါင်းတည်မြို့နယ်မှာ မကြာခဏ ဆိုသလို ကင်းပတ်တဲ့ ရဲတွေ မိုင်းဆွဲခံရတာအပြင် အုပ်ချုပ်ရေးမှူးတွေ အသတ်ခံနေရလို့ မနေ့ကဖမ်းခံရတဲ့ ပြည်သူ ၆ ဦးအပါ စုစုပေါင်း ဒေသခံ ၁၅ ဦးကျော်ကို စစ်ကောင်စီက ဖမ်းဆီးနှိပ်စက်နေတယ်လို့ ဒေသခံတွေဆီက သိရပါတယ်။

မြေလတ်အသံ၊ စက်တင်ဘာ ၈၊ ၂၀၂၂။

ရခိုင်ပြည်နယ်၊ ပုဏ္ဏားကျွန်းမြို့နယ်၊ ကွမ်းအုံစု ကျေးရွာမှ အမျိုးသားတဦး ယနေ့စက်တင်ဘာ ၈ရက် ညနေ ၄နာရီကျော်အချိန်တွင် ဝါးခုတ်ပြီးပြန်လာစဉ် မိုင်းနင်းမိကာ ခြေထောက်တဖက်ပြတ်ထွက်သွားခဲ့သည်ဟု သိရသည်။

မိုင်းထိမှန်ခဲ့သူမှာ ဦးဘရွှေ ၄၁နှစ် ဖြစ်ပြီး ၎င်းမှာ ကျေးရွာ၏အနောက်ဖက်ရှိ တောင်တန်းမှ ဝါးခုတ်ပြီး ကျေးရွာသို့ပြန်အလာတွင် မိုင်းနင်မိကာ ပေါက်ကွဲမှုဖြစ်သွားသဖြင့် ညာဖက်ခြေထောက် ပြတ်သွားရခြင်းဖြစ်သည်ဟု သားမက်ဖြစ်သူ ကိုဆန်းလင်းကပြောသည်။

“ဒဏ်ရာကတော့ ခြေထောက်ခြေချင်းဝတ်အောက်က ပြတ်သွားတာပါ။ ခန္ဓာကိုယ်အနှံ့မှာတော့ မိုင်းစတွေဝင်သွားတယ်။ အခုတော့ ယိုးတရုတ်ဆေးရုံကို ပို့ထားတယ်။ သိပ်တော့မစိုးရိမ်ရဘူး”ဟုဆိုသည်။

ဩဂုတ် ၁၃ရက်နေ့တွင်လည်း ဗုဒ္ဓေါကျေးရွာအနီးရှိ တောင်တန်းပေါ်တွင် နွားရှာနေစဉ်မိုင်းပေါက်ကွဲမှုဖြစ်၍ ဒေသခံ ၄ဦး ဒဏ်ရာရရှိသွားခဲ့သည်ဟု သိရသည်။

အလားတူ ပြီးခဲ့သည့် ဩဂုတ် ၅ရက်နေ့တွင်လည်း စစ်ကောင်စီက စခန်းချထားသည့် မင်းပြားမြို့နယ်ရှိ ရာမောင်တောင်တန်းပေါ်တွင် မိုင်းပေါက်ကွဲမှုဖြစ်၍ အမျိုးသားတဦး ခြေတဖက်ပြတ်သွားခဲ့သည်။

ရခိုင်ပြည်နယ်၌ ပေါက်ကွဲမှုဖြစ်‌နေသည့်မြေမြုပ်မိုင်းများမှာ စစ်ကောင်စီတပ်မှ ထောင်သည့်မိုင်း များဖြစ်ကြသည်ဟု ဩဂုတ် ၁၁ရက်နေ့ သတင်း စာရှင်းလင်းပွဲတွင် AA၏ ပြောရေးဆိုခွင့်ရှိသူ ခိုင်သုခကပြောဆိုခဲ့သည်။

မြေလတ်အသံ၊ သြဂုတ် ၉၊ ၂၀၂၂။

ရခိုင်ပြည်နယ်၊ အမ်းမြို့နယ်၊ ထန်းချောင်းကျေးရွာမှ အမျိုးသားတဦးမှာ မွတ်ဆလင်များကို နိုင်ငံခြားသို့ တရားမဝင်လမ်းမှ ပို့ဆောင်နေသည်ဟုဆိုကာ ယနေ့ဩဂုတ် ၉ ရက်နံနက် ၁၀ နာရီကျော် အချိန်ခန့်တွင် စစ်ကောင်စီက ဖမ်းဆီးသွားခဲ့သည်ဟု သိရသည်။

ဖမ်းဆီးခံရသူမှာ ဦးတင်အုန်း (ခ) ဥဩ (၅၄) နှစ်ဖြစ်ပြီး၊ ၎င်းကို စစ်ကောင်စီတပ်သား ၄၀ ခန့်က ကားဖြင့် အမ်းမြို့သို့ ခေါ်ဆောင်သွားခဲ့သည်ဟု ထန်းချောင်းကျေးရွာမှ ရာအိမ်မှူး ဦးသိန်းလှိုင်က မြေလတ်အသံကို ပြောသည်။

“စစ်သားတွေက ရွာကို ကားနှစ်စီးနဲ့လာကြတယ်။ ကျနော့်ကိုခေါပြီးတော့ ဥဩအိမ်ကို လိုက်ပို့ဆိုပြီးပြောတယ်။ ဥဩအိမ်ကိုရောက်တော့ သူက ကုလားတွေကို နိုင်ငံခြားကိုပို့နေတယ်ဆိုပြီး ပြောတယ်။ ဖမ်းတယ်။ ကျနော်ကတောင် သူက အဲဒီအလုပ်မလုပ်ဘူး။ကျနော်အာမခံပါတယ်လို့တောင် ပြောလိုက်သေးတယ်။ ဒါပေမဲ့မရဘူး။ စစ်သားတွေကတော့ ပြောသွားတယ်။ သူ့ကို စစ်ဆေးမေးမြန်းပြီးရင်တော့ ပြန်လွတ်ပေးမယ် လို့ပြောတယ်” ဟုဆိုသည်။

ပြီးခဲ့သည့် သြဂုတ်လ ၆ ရက်တွင် ရန်ကုန်မှတဆင့် မလေးရှားနိုင်ငံသို့ သွားရောက်ရန် ပွဲစားဆိုသူဖြင့်လာကြသည့် မွတ်ဆလင် ၈ ဦးကို ရန်ကုန်သို့ မရောက်မီ ဂွမြို့နယ်တွင် ဖမ်းဆီးရမိခဲ့သည်ဟု စစ်ကောင်စီသတင်းတွေထုတ်ပြန်သည့် ရခိုင်နေ့စဉ်က ထုတ်ပြန်ထားသည်။

ပဲခူး၊ ဇူလိုင် ၁၂၊ ၂၀၂၂။

ပဲခူးတိုင်းဒေသကြီး(အနောက်ပိုင်း)၊ ပြည်မြို့နယ် တိုင်းဒေသကြီးလွှတ်တော်ကိုယ်စားလှယ် ဦးကျော်ဇေယျ ဖမ်းဆီးခံရပြီးနောက် ဒေသခံတချို့ကို ဆက်တိုက်ဆိုသလို ဖမ်းဆီးခံနေရတယ်လို့ မြို့ခံတွေကပြောပါတယ်။

ပြီးခဲ့တဲ့ ဇွန်လ ၉ ရက်နေ့က ရန်ကုန်မြို့မှာ ဦးကျော်ဇေယျအပါအဝင် ၄ ဦးဖမ်းဆီးခံခဲ့ရပြီး ပြည်မြို့ကို လွှဲပြောင်းပေးလိုက်တယ်ဆိုတဲ့ သတင်းတွေထွက်ပေါ်ခဲ့ပြီး ဘယ်နေရာမှာထိန်းသိမ်းထားတယ် ဆိုတာ တိကျစွာမပြောနိုင်သေးချိန်မှာပဲ သံသယရှိတဲ့ဒေသခံတချို့ကို စစ်ကောင်စီက လိုက်လံဖမ်းဆီးနေတာပါ။

“အဖမ်းခံနေရတာကတော့ ဆက်တိုက်ပဲ အရင် NLD ပြန်ကြားရေးလုပ်ခဲ့ဖူးသူလည်း အဖမ်းခံလိုက်ရတယ်။ နောက် မြို့ကနာမည်ကြီးစီးပွားရေးသမားတယောက်လည်း လာဖမ်းသွားတယ်။ ပြန်လွှတ်မလွှတ်တော့မသိဘူး နောက်ပြီး ပေါင်းတလည်နဲ့ ဝက်ထီးကန်မြို့တွေမှာလည်း ဖုန်းနဲ့လိုက်တိုက်စစ်ပြီး ရှာတယ်။ တချို့လည်း ရှောင်နေကြတယ်။ ကိုကျော်ဇေယျနဲ့ ဆက်စပ်မှုရှိတယ်မရှိဘူးကတော့ သေချာမပြောနိုင်ဘူး” လို့ မြို့ခံအမျိုးသားတဦးကပြောပါတယ်။

ပေါင်းတလည်မြို့က စစ်ကောင်စီခန့် ရပ်ကွက်အုပ်ချုပ်ရေးမှူးတဦး၊ ယခင် NLD ပါတီသတင်းနဲ့ပြန်ကြားရေးအဖွဲ့ဝင်တဦး၊ စီးပွားရေးလုပ်ငန်းရှင်တဦးနဲ့ အခြား ဖမ်းဆီးခံရသူ ၅ ဦးထက်မနည်းရှိတယ်လို့ မြို့ခံတွေက ဆိုပါတယ်။

အဲဒီလို ကိုကျော်ဇေယျအပါအဝင် ဖမ်းဆီးခံခဲ့ရသူတွေနဲ့ နောက်ဆက်တွဲ ဖမ်းဆီးခံရသူတွေကိုပါ စစ်ကောင်စီနဲ့ NUG၊ သက်ဆိုင်ရာအဖွဲ့အစည်းတွေက တရားဝင်သတင်းထုတ်ပြန်ခြင်းမရှိသေးတဲ့အပေါ် လူထုက စိုးရိမ်နေကြတယ်လို့ဆိုပါတယ်။

“ဘယ်မှာဖမ်းမိပြီး ဘယ်ကိုပို့တယ်ဆိုတာ ကျနော်တို့သိရသလောက်ကတော့ တိတိကျကျ ပြောနိုင်သူမရှိဘူး။ ထုတ်ပြန်တာလည်းမတွေ့ရတော့ မြို့ခံတွေနဲ့ ပတ်သက်စပ်ဆက်သူတွေက စိုးရိမ်တာပေါ့ဗျာ။ အဖမ်းခံနေရတဲ့သူတွေလည်း ရှိနေတော့။ ကျနော်ပြောချင်တာကတော့ ကိုယ့်အခြေအနေကိုယ်သိပေါ့ဗျာ။ စပ်ဆက်ပတ်သက်မှုကြီးကြီးရှိနေတယ်ဆိုရင်တော့ အဖမ်းမခံရခင် ရှောင်နေတာအကောင်းဆုံးပါပဲ။” လို့ မြို့ခံတဦးကပြောပါတယ်။

ဦးကျော်ဇေယျ ဟာ အမျိုးသားဒီမိုကရေစီအဖွဲ့ချုပ်ပါတီရဲ့ ပြည်မြို့နယ် တိုင်းဒေသကြီးလွှတ်တော်ကိုယ်စားလှယ်အဖြစ် ၂၀၁၅၊ ၂၀၂၀ ရွေးကောက်ပွဲများမှာ အနိုင်ရကိုယ်စားလှယ်ဖြစ်ခဲ့ပြီး စစ်အာဏာသိမ်းပြီးနောက်ပိုင်းမှာလည်း အာဏာရှင်ဆန့်ကျင်တော်လှန်ရေးတွေ ဆက်လက်လုပ်ဆောင်ခဲ့လို့ သူငှားရမ်းနေထိုင်ခဲ့တဲ့ အိမ်အပါအဝင် ပိုင်ဆိုင်မှုတွေကိုပါ ချိတ်ပိတ်သိမ်းဆည်းခံထားရသူဖြစ်ပါတယ်။

စစ်ကိုင်း၊‌ ဖေဖော်ဝါရီ ၂၈၊ ၂၀၂၂။

စစ်ကိုင်းတိုင်း၊ ယင်မားပင်မြို့နယ်၊ ချင်းပုန်းရွာက ဒေသခံအချို့ကို ပြီးခဲ့တဲ့ ဖေဖော်ဝါရီ ၂၆ ရက်မှာ စစ်တပ်က ဖမ်းဆီးသတ်ဖြတ်ခဲ့ပြီး၊ အချို့ဒေသခံတွေကိုတော့ ဖမ်းဆီးသွားတယ်လို့ ဒေသခံတွေဆီက သိရပါတယ်။

အမျိုးသား ၇ ဦးနဲ့ အမျိုးသမီး ၁ ဦး စုစုပေါင်း ၈ ဦးကိုသတ်ဖြတ်ခဲ့တာဖြစ်ပြီး၊ အမျိုးသား ၃ ဦးကိုတော့ ဓားစာခံအဖြစ်ဖမ်းဆီးသွားပြီး ဖမ်းဆီးခံရသူတွေရဲ့ နောက်ဆက်တွဲအခြေနေတွေကိုတော့ မသိရသေးဘူးလို့ ဒေသခံတဦးက ပြောပါတယ်။

“၂၆ ရက်နေ့မှာ သူတို့ကလေယာဥ်နဲ့ပစ်တယ်၊ မပြေးနိုင်တဲ့သူတွေ ခြေထောက်ထိတဲ့သူတွေကျတော့ သူတို့ကဖမ်းပြီး ညှင်းပန်းနှိပ်စက်တယ်၊ ခေါင်းတည့်ပြီးပစ်သတ်တဲ့ လူလည်းရှိတယ်၊ ရင်ဘက်တွေလည်းပစ်ဖောက်တယ်၊ ခုကျနော်တို့စစ်တပ်ကပစ်သတ်သွားတဲ့အလောင်း ၈ လောင်းတွေ့ရပါတယ်ဗျ၊ ၈ လောင်းမှာ အမျိုးသမီး ၁ လောင်း အမျိုးသား ၇ လောင်းပါ” လို့ သူကပြောပါတယ်။

ဒါ့အပြင် စစ်ကောင်စီတပ်တွေဟာ ကျေးရွာအတွင်းက နေအိမ်တွေကို မီးရှို့ဖျက်ဆီးသွားတဲ့အပြင် လက်နက်ကြီးတွေနဲ့ပါ ရွာကိုပစ်ကြတာကြောင့် အိမ် ၃ လုံး မီးလောင်ပြာကျခဲ့တယ်လို့လည်း ဒေသခံတဦးက ဆက်ပြောပါတယ်။

“စစ်တပ်က ချင်းပုန်းရွာမှာရှိတဲ့ ကားတွေ ဆိုင်ကယ်တွေ မီးရှို့သွားတယ်။ ဖုန်းတွေရိုက်ခွဲသွားတယ်။ ဘုန်းကြီးကျောင်းထဲက ကွန်ပျူတာတွေရိုက်ခွဲသွားတယ်။ ဆိုင်ကယ်ကတော့ အစီးရေ ၄၀ ကျော်စစ်တပ်ကမီးရှို့သွားကြပါတယ်။ အိမ် ၃ လုံးပြာကျတယ်ဗျ၊ ၂ လုံးကတော့စစ်တပ်ကဖြိုချသွားတယ်။ စစ်တပ်ကလက်နက်ကြီးတွေနဲ့လည်းရွာကို လှမ်းပစ်တယ်။ ရဟက်ယာဉ်ဂျက်ဖိုင်တာ ၂ စီး အားလုံးပေါင်း ၇ စီးနဲ့ ဝေဟင်ကနေပစ်တာပါ” လို့ ဒေသခံတဦးက ပြောပါတယ်။

ခုလိုလုပ်ရပ်တွေကြောင့် ဒေသခံတွေလည်း ဘေးလွတ်ရာကိုတိမ်းရှောင်နေခဲ့ရပြီး၊ လက်ရှိအချိန်မှာတော့ စစ်ကောင်စီတပ်တွေလည်း ရွာမှာမရှိတော့တာကြောင့် ရွာသားတွေအနေနဲ့ ရွာထဲကိုတစစနဲ့ပြန်ဝင်လာကြပြီလို့လည်း သိရပါတယ်။

မကွေး၊ ဇန်နဝါရီ ၃၁၊၂၀၂၂။

မကွေးတိုင်းဒေသကြီး၊ မင်းတုန်းမြို့နယ်၊ ဇာလီရွာအနီး ဖြစ်ပွားသွားသော တိုက်ပွဲနှင့် သက်ဆိုင်ခြင်းမရှိသူ အမျိုးသမီး(၃) ဦးနှင့် အမျိုးသား(၁) ဦးတို့ကို ဖမ်းဆီးခဲ့ပြီး PDF စခန်းဝင်ရောက်စီးနင်းစဥ် ဖမ်းဆီးခဲ့သူများ အဖြစ် စစ်ကောင်စီက ပုံဖော်သတင်းလွှင့်ခဲ့ခြင်းဖြစ်ကြောင်း ဒေသခံများနှင့် PDF အဖွဲ့များက ဆိုသည်။

တိုက်ပွဲမှာ ငကုန်းရွာနှင့် ယင်းကောက်ကျေးရွာ ကြား ဇာလီရွာအနီးတွင် ဇန်နဝါရီလ ၂၉ ရက်နေ့၊ နံနက် ၈ နာရီခန့်က ဖြစ်ပွားခဲ့ခြင်းဖြစ်ပြီး ထိုပွဲအပြီး စစ်ကောင်စီတပ်သားများ ဆုတ်ခွါစဥ် ရွာအနီးစိုက်ခင်းများရှိ ဒေသခံသားအမိနှစ်ဦးကို ဖမ်းဆီးသွားခဲ့ပြီး၊ မင်းတုန်းမြို့သို့အရောက် စစ်ဆေးမှုများပြုလုပ်ကာ မင်းတုန်းမြို့ပေါ်မှာ လင်မယားနှစ်ဦးကို ထပ်မံဖမ်းဆီးသွားခဲ့ခြင်းဖြစ်သည်။

“ဖြစ်စဥ်မှာ အဖမ်းခံရတဲ့ သားအမိနှစ်ယောက်က သတင်းတွေမှာ ပျံ့နေသလိုမျိုး PDF တွေမဟုတ်ဘူး။ မိုင်စိုးကေသွယ်အောင်နဲ့ သူရဲ့မိခင်ပေါ့။ သူတို့က ပထမအဖမ်းဆီးခံရတာ ဖြစ်တယ်။ သူတို့နှစ်ယောက်အဖမ်းဆီးခံရပြီးတော့ ဒီမင်းတုန်းပြန်ရောက်တဲ့အချိန် သူတို့ကိုစစ်ဆေးပြီးတော့ ညနေ ၅ နာရီဝန်းကျင်မှာ မင်းတုန်းမှာနေတဲ့ မိုင်ဝင့်သီတာထွန်းဆိုတာနဲ့ သူရဲ့အမျိုးသားကထပ်အဖမ်းခံရတယ်။ PDF စခန်းကဖမ်းလာတာမဟုတ်ပဲနဲ့ သူတို့မီးရှို့လိုက်တဲ့ ဇာလီရွာကပါ။” ဟု ဒေသခံတဦးကပြောသည်။

တိုက်ပွဲဖြစ်ပွားရာမှာ ဇာလီရွာ၊ တောအတွင်းစိုက်ခင်းများအနီးတွင်ဖြစ်ခြင်းဖြစ်ပြီး ဒေသခံများမှာ စိုက်ခင်းများတွင် တဲထိုးနေထိုင်ခြင်းဖြစ်ကြောင်း တိုက်ပွဲကြောင့်ကြောက်လန့်ထွက်ပြေးခဲ့ရကြောင်း ဆိုသည်။

“တယောက်က ဒဏ်ရာရတယ်။ တယောက်က သတင်းအဆက်သွယ်မရဘူး ကျဆုံးတာလား မသိဘူး ကျဆုံးလို့တော့ခန့်မှန်းထားတယ်။ သတင်းမှာပျံ့နေသလို လေးယောက်ကျတာမဟုတ်ဘူး။ တယောက်ပဲကျတာမျိုးဒါကိုလည်း အတည်ပြုနေတုန်းပဲ။ ဒေသခံ ၂ ဦးသတ်ခံရတယ်ဆို အတည်ပြုလို့မရဘူး။ ရွာကပြောရရင် ကစဥ်ကလျားပြေးရတာ။ ရွာရဲ့ပုံစံအနေအထားက ရွာဘေးမှာ စိုက်ခင်းတွေအများကြီးရှိတယ်။ တဲတွေဆောက်ပြီးစုနေတာ ရွာနဲ့စိုက်ခင်းကနည်းနည်း လေးဖာလုံငါးဖာလုံလောက်ဝေးတဲ့နေရာမှာ တဲတတဲ ဒီစိုက်ခင်းပေါ့ အဲ့လိုနေကြတော့ တိုက်ပွဲဖြစ်တယ်ကြားတာနဲ့ အကုန်လုံးရှောင်နေတာ။” ဟု Mindon People Revolution Force အဖွဲ့နှင့် နီးစပ်သူက ဇန်နဝါရီလ ၃၀ ရက်နေ့ ညနေကဆိုသည်။

ဇန်နဝါရီလ ၃၀ ရက်နေ့ သတင်းများတွင်ဖော်ပြထားသလို အမျိုးသမီး(၂) ဦး၊ PDF (၂) ဦး ကျဆုံး သတင်းမဟုတ်ဘဲ၊ ဇန်နဝါရီလ ၃၁ ရက်နေ့နံနက်ခင်းအတည်ပြုချက်များအရ PDF (၁) ဦးသာကျဆုံးပြီး၊ ၁ ဦးပျောက်ဆုံးနေကြောင်း ရွှေလင်းယုန် ပြည်သူ့ကာကွယ်ရေးတပ်ဖွဲ့(မြေလတ်ဒေသ) ကထုတ်ပြန်ထားသည်။

“စခန်းမီးရှို့ခံရတယ်ဆိုတာဟုတ်တယ်။ အဖွဲ့ထဲကတယောက်ကျတယ် တယောက်ပျောက်ဆုံးနေတယ်။ အဖွဲ့တွေကင်းလုံခြုံရာကိုရောက်နေပြီ။ သတင်းတွေမှာရေးထားသလို စခန်းကမဟုတ်ဘူး၊ အနီးနားရွာတွေကို ထောက်ပံ့တယ်ထင်ပြီးဝင်ဆွဲတဲ့သဘော။ ရွာနဲ့စခန်းနဲ့နီးနေလို့ ဝင်ဆွဲတဲ့သဘောပဲ။ ဒီရွာကလူတွေကစခန်းကိုသိလည်းမသိဘူး ထောက်ပံ့တာလည်းမရှိဘူး။ သူတို့ဘက်ကကျထားတာ တကောင်ကအကောင်ကြီးတယ်ဆိုတော့ သူတို့က ဖမ်းဆီးခံထားရသူ ပြည်သူတွေကိုမဲနေတာ။” ရွှေလင်းယုန် ပြည်သူ့ကာကွယ်ရေးတပ်ဖွဲ့(မြေလတ်ဒေသ) နှင့်ချိတ်ဆက်ထားသူမဟာမိတ်တဦးက ပြောသည်။

ယင်းတိုက်ပွဲတွင် စစ်ကောင်စီဘက်မှ ဗိုလ်မှုူးတဦးပါရဲဘော်(၇) ဦးသေဆုံးပြီး၊ PDF ဘက်မှ ၁ ဦးကျဆုံးကာ ၁ ဦးပျောက်ဆုံး Mindon People Revolution Force အဖွဲ့နှင့် ရွှေလင်းယုန် ပြည်သူ့ကာကွယ်ရေးတပ်ဖွဲ့(မြေလတ်ဒေသ) တို့ပူးပေါင်းသင်တန်းစခန်းမီးရှို့ခံရမှုနှင့် ကျေးရွာနေအိမ်များမီးရှို့ခံရမှုများရှိခဲ့သည်။